Nihi nɛ a tue nui nɔ́ nɛ a ngɛ je kɛ wɛ mwɔnɛ ɔ a yibɔ maa su ayɔ 70, nɛ a kpɛti nihi fuu tuɔ mumuihi a gbi nɛ hiɛ pe 200 ɔ a kpɛti kake. Aywilɛho sane ji kaa, nihi fuu kɛ nihi nɛ a tue nui nɔ́ ɔ yi saminya, kaa bɔ nɛ munyuhi nɛ nyɛɛ se ɔ tsɔɔ:

•   “Ngɛ je ɔ mi tsuo ɔ, behi fuu ɔ, nihi maa a hɛ kɛ fɔɔ he blɔhi nɛ nihi nɛ a tue nui nɔ́ kɛ nihi nɛ a nui nɔ́ kpakpa ko ɔ ngɛ ɔ nɔ.”​—National Association of the Deaf (U.S.).

•   “Nihi nɛ a tue nui nɔ́ nɛ a ngɛ mahi nɛ kpaako a ngɛ hɛ mi yae ɔ mi ɔ, piɛɛ nihi nɛ ohia yeɔ mɛ wawɛɛ ngɛ je ɔ mi ɔ a he, nɛ a ná we sukuu tsɔsemi kpakpa, kɛ ní tsumi kpakpa hulɔ, nɛ a nine sui amaniɛ bɔmi kpakpa hu nɔ.”​—World Federation of the Deaf.

 Kɛ Yehowa nuɔ he ha nihi nɛ a tue nui nɔ́ ɔ ha kɛɛ? Mɛni Baiblo ɔ de kɛ kɔ nihi nɛ a tue nui nɔ́ ɔ he? Nɛ ngɛ mɛni blɔ nɔ nɛ Yehowa Odasefohi ngɛ mɛ ye buae mwɔnɛ ɔ?

Bɔ Nɛ Mawu Naa Nihi Nɛ A Tue Nui Nɔ́ ɔ Ha

 Baiblo ɔ ha nɛ wa le kaa Yehowa a Mawu susuɔ nihi nɛ a tue nui nɔ́ ɔ a he. E suɔ nɛ waa kɛ mɛ nɛ ye saminya nɛ mɛ hu a ná tsɔsemi nɛ e kɛ ngɛ wɔ hae ɔ he se.

 Ngmami: “Koo gbiɛ tuekpokutsɛ.”​—3 Mose 19:14.

 Ngmami: “Mawu hlɛ nɔ mi.”​—Ní Tsumi 10:34.

 Ngmami: “Yesu ya kpa ma amɛ kɛ kɔpe ɔmɛ tsuo a mi . . . , nɛ e fiɛɛ Matsɛ Yemi ɔ he sane kpakpa a.”​—Mateo 9:35.

 Ngmami: Yesu ha nɛ ‘tuekpokutsɛmɛ nu nɔ́, nɛ amuɛtihi hu tu munyu.’​—Maako 7:37.

 Ngmami: “Tuekpokutsɛmɛ maa nu nɔ.”​—Yesaya 35:5.

 Nɔ́ nɛ e tsɔɔ: Yehowa gba kɛ fɔ si kaa nihi nɛ a tue nui nɔ́ ɔ maa nu nɔ.​—Yesaya 29:18.

Bɔ Nɛ Yehowa Odasefohi Yeɔ Bua Nihi Nɛ A Tue Nui Nɔ́ ɔ Ha Mwɔnɛ ɔ

 Yehowa Odasefohi kɛ nihi nɛ a tue nui nɔ́ ngɛ je kɛ wɛ ɔ susuɔ Mawu sɛ gbi nɛ kɔɔ hɛ nɔ kami nɛ ngɛ kɛ ha mɛ ɔ he. Mɛni wa ngɛ pee konɛ wa nyɛ nɛ wa tsu enɛ ɔ he ní kɛ pi si? Wa peeɔ Baiblo ɔ kɛ Baiblo kasemi videohi ngɛ mumuihi a gbi nɛ hiɛ pe 100 mi. Jehanɛ hu waa kɛ nihi kaseɔ Baiblo ɔ nɛ wa peeɔ asafo mi kpehi ngɛ mumuihi a gbi mi. Wa peeɔ enɛ ɔmɛ tsuo nɛ́ wa he we nihi nɛ a suɔ nɛ Mawu nɛ ye bua mɛ ɔ nɔ́ ko. Mɛni he je? Ejakaa Yesu fã wɔ ke: “Nyɛ ná lɛ yaka gu, nyɛɛ ngɔ kɛ ha yaka gu.”​—Mateo 10:8.

 O ma nyɛ maa na ní nɛ ɔmɛ ngɛ Intanɛti ɔ nɔ aloo o ma nyɛ maa gbla ngɛ hehi nɛ nyɛɛ se nɛ ɔmɛ kɛ fɔ o klama a nɔ:

 JW.ORG. Moo nyɛ gbi okadi ɔ nɛ ngɛ yiti je ngɛ wɛbsaiti ɔ nɔ ɔ nɔ konɛ o na níhi nɛ a pee ngɛ mumuihi a gbi pɔtɛɛ nɛ o ngɛ hlae ɔ mi.

 JW Library Sign Language app. O ma nyɛ maa gblaa app ɔ kɛ fɔ o klama a nɔ nɛ́ o be nɔ́ ko woe, kɛkɛ ɔ, o ma nyɛ maa gblaa aloo o ma nyɛ maa hyɛ mumuihi a video ɔmɛ ngɛ nɔ.

Mɛni Baiblo Mi Tsɔsemi He Níhi Nɛ Wa Pee?

 Wa pee Baiblo ɔ ngɛ́ mumuihi a gbi mi. New World Translation of the Holy Scriptures Baiblo ɔ nɛ a pee ngɛ Amerika Mumuihi A Gbi Mi ɔ ji kekleekle Baiblo nɛ a pee ngɛ mumui a gbi mi ngɛ je ɔ tsuo. A pee New World Translation Baiblo mluku ɔ tsuo aloo e fã ko ngɛ mumuihi a gbi mi, nɛ daa jeha a, a peeɔ ekpahi kɛ piɛɛɔ he. (Ke o suɔ nɛ o na gbi ɔmɛ aloo o hyɛ Baiblo ɔ ngɛ Intanɛti ɔ nɔ ɔ, moo hyɛ daka ji “ New World Translation Baiblo ɔ Ngɛ Mumuihi A Gbi Mi.”)

•   Moo hyɛ video nɛ ji The Complete New World Translation Is Available in ASL, konɛ o kase bɔ nɛ a plɛɔ kɛ peeɔ Baiblo ɔ ngɛ mumuihi a gbi ɔ mi ha.

•   Bɔ nɛ pee nɛ o na Baiblo kanemi nɛ ya hɛ mi saminya a, moo gblaa JW Library Sign Language app ɔ eko. App nɛ ɔ maa ye bua mo konɛ o hla ngmami pɔtɛɛ ngɛ mumuihi a Baiblo ɔ mi.

•   Dmytro kɛ Vita ji fɔli nɛ a tue nui nɔ́, se a bimɛ ɔmɛ lɛɛ a nuɔ nɔ́. Hyɛ bɔ nɛ Baiblo ɔ nɛ a pee lɛ video nɛ a weku ɔ hyɛɛ daa ligbi ngɛ mumuihi a gbi mi ɔ yeɔ bua mɛ ha.

 Videohi nɛ a kɛ tsɔɔ Baiblo ɔ mi. Yehowa Odasefohi pee videohi ngɛ mumuihi a gbi mi nɛ yeɔ bua nihi konɛ a nu ga womihi nɛ kɔɔ si fɔfɔɛhi nɛ nyɛɛ se nɛ ɔmɛ a he ɔ sisi . . .

•   Gba si himi he piɛɛli kɛ wekuhi

•   Nihewi kɛ yihewi

•   Jokuɛwi

 Baiblo ɔ nɛ nɔ ko kɛ mo maa kase. Nɔ ko maa ye bua mo kɛ kase Baiblo ɔ ngmlɛfia abɔ nɛ o suɔ ngɛ mumuihi a gbi mi. Mo bi konɛ a tsɔɔ mo bɔ nɛ wa peeɔ Baiblo mi ní kasemi nɛ a he we nɔ́ ko ɔ ha.

 Jeson Senajonon je Philippines. Hyɛ bɔ nɛ wa Baiblo mi ní kasemi nɛ a he we nɔ́ ko ɔ ye bua lɛ nɛ huɛ bɔmi kpakpa ngɛ e kɛ Mawu a kpɛti ha.

 Mario Antúnez ji osɔfo ngɛ jami ko mi ngɛ Honduras. Moo hyɛ bɔ nɛ e na e sane bimi ɔmɛ a heto ngɛ Baiblo ɔ mi ha kaa bɔ nɛ e tsɔɔ ngɛ munyu nɛ ji “I Had More Questions Than Answers” ɔ mi ɔ.

 Kpehi kɛ ní peemi slɔɔtohi. Wa ngɛ asafohi kɛ kuhi ngɛ mumuihi a gbi mi ngɛ je kɛ wɛ, nɛ mumuihi kpeɔ nɛ a kaseɔ ní nɛ a jaa Yehowa daa otsi. Jehanɛ se hu ɔ, wa toɔ ní peemi slɔɔtohi nɛ a daa Baiblo ɔ nɔ kɛ tsɔseɔ mumuihi ɔ he blɔ nya daa jeha. Ngɛ wa kpehi kɛ ní peemi slɔɔtohi a sisi ɔ, wa yeɔ bua nihi nɛ a hɛngmɛ yu nɛ a ji mumuihi hulɔ ɔ kɛ guɔ a nine nɛ a pɛtɛɛ he kɛ peeɔ okadihi ɔ nɔ. Wa peeɔ womihi kɛ haa hɛ yuyuili nɛ wa he we sika.

•   Hla he nɛ a peeɔ asafo mi kpe ngɛ nɛ kɛ o he kɛ we.

•   Moo kase kpokpa nɔ kpehi kɛ kpɔ mi kpehi nɛ wa peeɔ daa jeha a he ní.

•   Moo ya ní peemi nɛ he hia pe kulaa nɛ́ ji Yesu Gbenɔ ɔ Kaimi nɛ wa peeɔ daa jeha a eko.

 José Luis Ayala ngɛ Mexico. Benɛ a fɔ lɛ ɔ, e tue nui nɔ́ nɛ lɔ ɔ se ɔ, e hɛngmɛ hu ba yu. Moo hyɛ bɔ nɛ a ye bua lɛ ha nɛ e ba pee nɔ ko nɛ e nyɛɔ tsɔɔ nihi Baiblo ɔ saminya.