Ngɛ je ɔ mi tsuo ɔ, nihi fuu a mi gba kɛ wo ma kudɔmi kuuhi a mi. Jeha 2022 Pew Research Center, nɛ ji níhi a mi hlami ko nɛ a pee ɔ tsɔɔ kaa “nikɔtɔmahi lafa mi 65 nɛ a ngɛ mahi 19 mi ɔ de kaa nya samihi nɛ a mi wa yaa nɔ ngɛ ma kudɔmi kuu slɔɔtohi nɛ ngɛ a ma amɛ a mi ɔ a kpɛti.”

 Anɛ o to he hɛ kaa ma kudɔmi blɔ nya tomihi ha nɛ nihi nɛ a ngɛ he nɛ o ngɛ ɔ a mi ngɛ gbae wawɛɛ lo? Mɛni he je nɛ e ngɛ lɛ bae jã a? Anɛ enɛ ɔ nya tsaba ko ngɛ lo? Moo hyɛ nɔ́ nɛ Baiblo ɔ de.

 Baiblo ɔ gba kɛ fɔ si kaa ngɛ wa be nɛ ɔ nɛ́ ji, “nyagbe ligbi ɔmɛ” a mi ɔ, nihi fuu ma je suhi nɛ be hae nɛ kake peemi nɛ ba a kpo.

•   “Ngɛ nyagbe ligbi ɔmɛ a mi ɔ, behi nɛ a mi wa nɛ a nya dami maa ye maa ba. Ejakaa adesahi maa pee nihi nɛ a suɔ mɛ nitsɛmɛ a he, . . . nihi nɛ a hí kɛ somi ko somi.”​—2 Timoteo 3:1-3.

 E ngɛ mi kaa nihi fuu ngɛ mɔde bɔe kaa a ma ha nɛ nɔ yemi ɔmɛ nɛ a ye manye mohu lɛɛ, se a nyɛ we nɛ a ye manye. Nihi nɛ a kɛ a sibi kpa we gbi ngɛ níhi a he ɔ nyɛ we nɛ a pee kake kɛ tsu nyagbahi a he ní. Ní nɛ ɔmɛ nɛ ngɛ nɔ yae ɔ ma munyu ko nɛ Baiblo ɔ de kɛ fɔ si kɛ je blema a nɔ mi.

•   ‘Adesa ngɔɔ blɔ nya nɛ e náa a kɛ yeɔ e nyɛmimɛ awi.’​—Fiɛlɔ 8:9.

 Se kɛ̃ ɔ, Baiblo ɔ tsɔɔ nɔ́ nɛ kɛ nyagba nɛ ɔmɛ a nya tsaba maa ba a, nɛ lɔ ɔ ji nɔ yemi ko nɛ́ e nya dalɔ ɔ ma nyɛ ma je nyagbahi tsuo nɛ adesahi kɛ ngɛ kpee mwɔnɛ ɔ kɛ je.

 Baiblo ɔ tsɔɔ nɔ yelɔ nɛ e he su kɛ pi si ɔ, nɛ lɛ ji Yesu Kristo. Yesu ngɛ he wami ɔ, kɛ he blɔ ɔ kɛ suɔmi ɔ nɛ́ e kɛ ma ha nɛ kake peemi kɛ tue mi jɔmi nɛ hi adesahi a kpɛti.

•   ‘A maa ye dami sane saminya ngɛ e yi nɔ; e yi nɔ maa jɔ kulaa ngɛ he tsuaa he!’​—La 72:7.

•   ‘Je ma amɛ tsuo ma sɔmɔ lɛ!’​—La 72:11.

 Yesu ji nɔ yelɔ nɛ se be, ejakaa e susuɔ adesahi a he nɛ e suɔ nɛ e ye bua mɛ, titli ɔ, nihi nɛ a yi mɛ dami sane ɔ.

•   “Ke ohiatsɛ, loo nɔ nɛ e fi lɛ, loo nɔ nɛ be nɔ ko tsɛ lɛ ɔ, e buɔ lɛ tue. Nihi nɛ gbɔjɔ, kɛ nihi nɛ e fi mɛ ɔ, e naa mɛ mɔbɔ. Nihi nɛ e fi mɛ ɔ, e heɔ a yi wami. E heɔ a yi wami kɛ jeɔ yi mi wami, kɛ awi yemi mi.”​—La 72:12-14.

 Moo kase babauu kɛ kɔ Mawu Matsɛ Yemi ɔ, nɛ́ ji hiɔwe nɔ yemi nɛ Yesu ji e nya dalɔ ɔ he. Moo hyɛ blɔ nɔ nɛ o maa gu kɛ ná nɔ yemi ɔ he se, kɛ blɔ nɔ nɛ o maa gu kɛ fĩ nɔ yemi nɛ ɔ se ɔ.

•   Moo hyɛ video nɛ ji Mɛni Ji Mawu Matsɛ Yemi ɔ?

•   Moo kane munyu nɛ ji “Mawu Matsɛ Yemi ɔ​—Nɔ Yemi Nɛ Yeɔ Anɔkuale.”