Ojo fiali a kuuhi ngɛ yiwutso níhi pee ngɛ Haiti. Jehanɛ hu basabasa peemi ngɛ nɔ yae ngɛ South Africa kɛ Mexico kɛ Latin Amerika he komɛ. Ngɛ je ɔ mi hehi nɛ basabasa peemi kɛ yiwutso ní peepee ba si ngɛ po ɔ, nihi peeɔ yeyeeye nɛ a nuɔ he kaa a be slɔkee ejakaa a nuɔ amaniɛ bɔmihi nɛ kɔɔ yiwutso ní peepee nɛ yaa nɔ ɔ he be fɛɛ be.

 Mɛni Baiblo ɔ de kɛ kɔ nihi nɛ a yi mlaa nɔ ngɛ je ɔ mi nɛ a yibɔ ngɛ hɛ mi yae ɔ he?

 Baiblo gba kɛ fɔ si kaa nihi fuu nɛ a be mlaa nɔ yee ɔ maa piɛɛ okadi nɛ ma kadi “níhi a blɔ nya tomi ɔ nyagbe be ɔ” he. (Mateo 24:3) Benɛ Yesu Kristo ngɛ níhi nɛ ma kadi be nɛ ɔ he munyu tue ɔ, e de ke:

•   “Akɛnɛ nihi fuu be mlaa nɔ yee he je ɔ, suɔmi nɛ nihi babauu ngɛ ɔ, nya maa jɔ.”​—Mateo 24:12.

 Baiblo ɔ hu gba kɛ fɔ si kaa “ngɛ nyagbe ligbi ɔmɛ a mi ɔ,” nihi maa pee a he “nihi nɛ a be he nɔ yemi, nihi nɛ a hɛ mi jɔɛ, nihi nɛ a sume nɔ́ kpakpa.” (2 Timoteo 3:1-5) Su nɛ ji nɔ nitsɛ pɛ e nɔ́ mi fomi ɔ ha nɛ mwɔnɛ ɔ, nihi nɛ a yi mlaa nɔ ngɛ je ɔ mi ɔ a yibɔ ngɛ hɛ mi yae.

 Se kɛ̃ ɔ, hɛ nɔ kami ngɛ. Baiblo ɔ wo si kaa e be kɛe nɛ mlaa nɔ nɛ a yi ɔ se maa po.

•   “E piɛ bɔɔ pɛ nɛ yiwutsotsɛmɛ be si hie hu; o maa hyɛ a hi he ɔmɛ, se o be mɛ nae. Se nihi nɛ a he jɔ ɔ, a nine maa su zugba a nɔ, nɛ a bua maa jɔ wawɛɛ ejakaa a ma ná tue mi jɔmi nitsɛnitsɛ.”​—La 37:10, 11.

 Moo kase babauu kɛ kɔ Baiblo mi sɛ gbi nɛ haa nɔ hɛ nɔ kami kɛ nɔ́ he je nɛ o ma nyɛ ma ná nɔ mi mami kaa níhi nɛ Baiblo ɔ gba a lɛ ngɛ mi bae mwɔnɛ ɔ he. Moo hyɛ munyuhi nɛ nyɛɛ se nɛ ɔmɛ.

 “A Real Hope for a Better Tomorrow”

 “What Is the Sign of ‘the Last Days,’ or ‘End Times’?”

 “Did the Bible Predict the Way People Think and Act Today?”