Mɛni Baiblo ɔ De Ngɛ Nyu He Nyagba Nɛ Ngɛ Bae Ngɛ Je Kɛ Wɛ ɔ He?
Wɔ tsuo wa hia nyu nɛ mi tsɔ konɛ wa nyɛ nɛ waa hi wami mi. António Guterres, nɛ e ji United Nations kuu ɔ hɛ mi nyɛɛlɔ nɔkɔtɔma a de ke, “be abɔ nɛ nyu he ngɛ hiae ngɛ je ɔ mi tsuo ɔ, waa kɛ nyu he nyagba nɛ nya wa maa kpe.” Nimli ayɔhi abɔ nɛ a ngɛ je ɔ mi mwɔnɛ ɔ nine sui nyu nunui nɛ mi tsɔ nɔ.
Strdel/AFP via Getty Images
Anɛ be maa su nɛ wa ma ná nyu babauu nɛ maa su nɔ fɛɛ nɔ lo? Aloo waa kɛ nyu he nyagba maa hi kpee be fɛɛ be lo? Mɛni Baiblo ɔ de?
Si nɛ Baiblo ɔ wo kɛ kɔ nyu nɛ wa náa a he
Baiblo ɔ de kaa be maa su nɛ waa kɛ nyu he nyagba be kpee hu. Ngɛ anɔkuale mi ɔ, nyu nɛ mi tsɔ maa pɔ he wawɛɛ.
“Pahi maa hia ngɛ nga kplanaa zugba a nɔ. Blesiblesi ma plɛ pee taku, nɛ nyu hɛngmɛhi ma ha zugba gbigbli ɔ maa tɔ nyu.”—Yesaya 35:6, 7.
Mɛni he je nɛ wa ma nyɛ ma he Baiblo si womi nɛ ɔ ye ɔ? Mo susu nɔ́ nɛ Baiblo ɔ de kɛ kɔ bɔ nɛ a to wa zugba a he blɔ nya ha a he nɛ o hyɛ.
Nɔ́ nɛ Baiblo de kɛ kɔ zugba a kɛ bɔ nɛ nyu bɔleɔ si ngɛ nɔ ha a he
‘[Mawu] bɔɛ [zugba] a ngɔ fɔɛ si gu nɛ e pee yaka; se e pee lɛ konɛ nimli nɛ hi nɔ.’—Yesaya 45:18.
Akɛnɛ Mawu bɔ je ɔ konɛ wa nyɛ nɛ waa hi nɔ he je ɔ, e bɔ níhi nɛ ma ha nɛ wa ná nyu babauu nɛ mi tsɔ.
“[Mawu] lɛ gblaa nyu kɛ jeɔ zugba, nɛ e haa nɛ e plɛɔ peeɔ hiɔmi nɛ nɛɛ. E haa nɛ hiɔmi nɛɛ babauu kɛ jeɔ bɔku mi kɛ pueɔ si ha nimli adesahi tsuo.”—Hiob 36:27, 28.
Ngɛ kpiti pomi mi ɔ, ngmami nɛ ɔ kale bɔ nɛ Mawu to nyu he blɔ nya ha konɛ wa nine nɛ su nɔ be fɛɛ be. Nyu jeɔ zugba a kɛ woɔ mi, kɛ sɛɛ kɔɔhiɔ mi, nɛ e plɛɔ peeɔ hiɔmi nɛ e nɛɛ, nɛ enɛ ɔ haa nɛ nimli adesahi kɛ lohwehi naa nyu nɛ mi tsɔ be fɛɛ be.—Fiɛɛlɔ 1:7; Amos 5:8.
“Ma ha hiɔmi maa nɛ ngɛ e be mi; zugba a maa ba ní babauu, nɛ tso ɔmɛ maa wo yiblii.”—3 Mose 26:4.
Mawu wo si kaa e maa jɔɔ blema Israel bi ɔmɛ nɛ́ a ji ngmɔ huli ɔ, konɛ a ngmɔ ní ɔmɛ nɛ ba saminya kɛ gu nyu nɛ e ma ha nɛ e nɛ ha mɛ be fɛɛ be ɔ nɔ. E le kaa loko a ngmɔ ní ɔmɛ maa ba saminya a, ja hiɔmi nɛ ngɛ be nɛ sa mi ha mɛ.
Nɔ́ nɛ Mawu pee kɛ ha blema Israel bi ɔmɛ ɔ, e be kɛe nɛ e maa pee jã ngɛ zugba a nɔ tsuo. (Yesaya 30:23) Amlɔ nɛ ɔ, ngɛ je ɔ mi he komɛ ɔ, nyu he nyagba ngɛ hɛ mi yae, nɛ hiɔmi nɛ́ e nɛ́ ɔ hu piɛɛ he nɛ nyagba nɛ ɔ ngɛ bae ɔ nɛ. Mɛni ji nɔ́ kpa nɛ Baiblo ɔ de kɛ kɔ bɔ nɛ a ma plɛ kɛ tsu nyu he nyagba nɛ waa kɛ ngɛ kpee mwɔnɛ ɔ he ní ha a he?
Bɔ nɛ nyu he nyagba se ma plɛ kɛ po ha
Baiblo ɔ ha nɛ wa na kaa, Mawu maa gu e Matsɛ Yemi ɔ nɔ kɛ tsu nyagbahi nɛ ngɛ bae ngɛ zugba a nɔ, nɛ́ nyu he nyagba hu piɛɛ he ɔ he ní. (Mateo 6:9, 10) Mawu Matsɛ Yemi ɔ ji nɔ yemi ko nɛ ngɛ hiɔwe nɛ maa ye zugba a tsuo nɔ. (Daniel 2:44; Kpo Jemi 11:15) Jehanɛ hu ɔ, Mawu Matsɛ Yemi ɔ ma tsu nyagbahi nɛ adesa nɔ yemi nyɛ we nɛ e tsu he ní ɔ he ní, nɛ e ma je níhi nɛ e kɛ nyu he nyagbahi baa a kɛ je.
Nyagba: Kɔɔhiɔ mi tsakemi ha we nɛ nyu he blɔ nya tomi ɔ nɛ e tsu ní saminya kaa bɔ nɛ e sa nɛ e hi ɔ. Nɔ́ nɛ jeɔ mi kɛ baa a ekomɛ ji pu nɛ tsoɔ wawɛɛ nɛ́ hiɔmi hu nɛ́ be kɛkɛɛ, kɛ hiɔmi nɛ nɛɛ kɛ beɔ nɔ aloo woɔ nɛ hiɔ lɛ kɛ beɔ nɔ.
Nyagba nɛ ɔ nya tsaba: Mawu Matsɛ Yemi ɔ ma dla níhi tsuo nɛ ngɛ puɛe ngɛ zugba a nɔ ɔ konɛ wa zugba a nɛ ba da kaa bɔ nɛ e ngɛ sisije ɔ. Mawu wo si ke: “Hyɛ! i ngɛ níhi tsuo pee ehe.” (Kpo Jemi 21:5) Nyu babauu nɛ mi tsɔ maa ba ngɛ zugba gbigbli nɔ, nɛ enɛ ɔ ma ha nɛ níhi nɛ wami ngɛ a mi ɔ, maa wa flɔ̃flɔ̃ɔflɔ̃, nɛ hehi nɛ amlɔ nɛ ɔ, e nɔ hí himi ɔ po piɛɛ he. (Yesaya 41:17-20) Mawu Matsɛ Yemi ɔ nɛ Yesu Kristo maa nyɛɛ hɛ mi ɔ ma kudɔ adebɔ mi he wamihi ngɛ zugba a nɔ.
Benɛ Yesu ngɛ zugba a nɔ ɔ, e jɔɔ kɔɔhiɔ nɛ nya wa ko nɛ ngɛ gbeye ɔ he. E pee enɛ ɔ kɛ tsɔɔ he wami nɛ Mawu kɛ ha lɛ ɔ. (Maako 4:39, 41) Ngɛ Yesu Kristo nɛ ji Mawu Matsɛ Yemi ɔ nya Matsɛ ɔ nɔ yemi sisi ɔ, adebɔ mi oslaahi tsuo a se maa po. Nihi ma ná tue mi jɔmi nitsɛnitsɛ nɛ a maa hi si slɔkee, nɛ a be gbeye yee kaa adebɔ mi oslaa ko maa ba a nɔ.
Nyagba: Adesahi nɛ a susuu we a ní peepee he kɛ ya tsitsaa, kɛ blɔ nya tomihi nɛ a hɛ tsu ɔ, peeɔ níhi nɛ puɛɔ pahi kɛ nyuhi nɛ a ngɛ zugba a nɔ ɔ, nɛ enɛ ɔ piɛɛ he nɛ adesahi ná we nyu nɛ mi tsɔ nɛ e maa su mɛ ɔ nɛ.
Nyagba nɛ ɔ nya tsaba: Mawu ma dla zugba a nɔ, nɛ e ma dla níhi nɛ adesahi pee kɛ puɛ wo ɔ, pahi kɛ nyuhi nɛ a ngɛ zugba a nɔ ɔ. Zugba a maa pee paradeiso. Gbalɔ Yesaya ngma munyu nɛ nyɛɛ se nɛ ɔ ngɛ asilɛ mi ke: “Nga zugba kpataa nɛ gbli ɔ ma ná bua jɔmi; zia zugba a ma nya, nɛ mɔmɔhi maa puɛ ngɛ nɔ.”—Yesaya 35:1.
Mɛni lɛ maa ba nihi nɛ pi a kɔmɔ ji adesahi aloo bɔ nɛ níhi ngɛ puɛe ha ngɛ zugba a nɔ ɔ nɔ? Mawu wo si kaa, e ma “kpata ni nɛmɛ nɛ a ngɛ zugba a hɛ mi kpatae ɔmɛ a hɛ mi.”—Kpo Jemi 11:18; Abɛ 2:21, 22.
Nyagba: Adesahi hyɛ we nyuhi nɛ wa náa ngɛ zugba a nɔ ɔ nɔ saminya, enɛ ɔ haa nɛ a kpataa nyu fuu hɛ mi pe bɔ nɛ wa náa ngɛ zugba a nɔ ɔ.
Nyagba nɛ ɔ nya tsaba: Kɛ gu Mawu Matsɛ Yemi ɔ nɔ ɔ, a maa pee Mawu suɔmi nya ní “ngɛ zugba a nɔ” se pi nɔ́ nɛ adesahi nɛ a foɔ mɛ pɛ a nɔ́ mi ɔ suɔ. (Mateo 6:9, 10) Mawu Matsɛ Yemi ɔ ma ha nɛ e sisi bimɛ ma ná tsɔsemi nɛ se be. Yesaya 11:9 ɔ de ke, ‘zugba a tsuo maa le Yehowa.’ a Nile nɛ se be nɛ ɔ nɛ adesahi ma ná kɛ suɔmi nɛ mi kuɔ nɛ a ma ná kɛ ha Mawu kɛ níhi tsuo nɛ e bɔ ɔ, ma ha nɛ a hyɛ wa zugba nɛ ngɛ fɛu nɛ ɔ kɛ níhi tsuo nɛ ngɛ nɔ ɔ nɔ saminya.
Ke o suɔ nɛ o kase babauu kɛ kɔ nɔ́ nɛ Mawu Matsɛ Yemi ɔ maa pee ɔ he ɔ, moo kane munyu nɛ ji “Mɛni Mawu Matsɛ Yemi ɔ Ma Tsu?”
Moo kane Baiblo mi womi nɛ ji Yesaya a yi 35, konɛ o na bɔ nɛ a ma dla zugba a kɛ pee paradeiso ha.
Hyɛ video nɛ ji, Mɛni He Je Nɛ Mawu Bɔ Zugba a? konɛ o kase Mawu yi mi tomi kɛ ha zugba a kɛ adesahi ɔ he ní fuu.
a Mawu biɛ nitsɛ ji Yehowa. (La 83:18) Hyɛ munyu nɛ ji “Mɛnɔ ji Yehowa?”
Eko ɔ, O Bua Maa Jɔ Enɛ ɔ Hu He
ESSENTIAL BIBLE TEACHINGS
Mɛni Ji Mawu Matsɛ Yemi ɔ?
Yesu tu Mawu Matsɛ Yemi ɔ he munyu wawɛɛ pe ní kpahi ngɛ e fiɛɛmi ní tsumi ɔ mi. E se nyɛɛli ɔmɛ kɛ jeha babauu sɔle konɛ Matsɛ Yemi ɔ nɛ ɔ nɛ ba.
WA HE SANEHI
Mo Bi Nɛ A Ba Slaa Mo
Nyɛ ma nyɛ ma susu Baiblo mi sane bimi ko he, aloo nyɛ ma nyɛ maa kase Yehowa Odasefohi a he ní.
