A ngɛ blɔ hyɛe kaa nihi nɛ a yibɔ maa su ayɔ akpe enuɔ ji nihi nɛ a maa hyɛ FIFA World Cup ɔ nɛ́ a je sisi kɛ je November 20 nɛ́ a maa gbe nya ngɛ December 18, 2022 ɔ. Nihi fuu susuɔ kaa pi kake peemi pɛ nɛ hɛja jemi blɔ nya tomi nɛ ɔ ma ha nɛ e hi nihi a kpɛti ke a ngɛ hyɛe, se mohu ɔ, e ma nyɛ ma tsu níhi fuu a he ní.

•   “Hɛja jemi blɔ nya tomi nɛ ɔmɛ ngɛ he wami nɛ a kɛ ma tsake je ɔ. A ma nyɛ maa wo nihi he wami nɛ́ a pee ní kpakpahi. Nɛ a ma nyɛ ma ha nɛ nihi nɛ a pee kake ngɛ blɔ klɛdɛɛ nɔ.”​—Nelson Mandela, nɛ́ e ji South Africa ma nɔ yelɔ be ko nɛ be ɔ.

•   “Bɔɔlu fiami . . . haa nɛ nihi peeɔ kake ejakaa e haa nɛ nihi nuɔ he kaa a ngɛ hɛ nɔ kami, a bua jɔɔ, a nyaa, nɛ e haa nɛ a náa suɔmi kɛ haa nihi, nɛ a nuɔ he kaa tsakpa ngɛ a kɛ ni kpahi a kpɛti.”​—Gianni Infantino, nɛ́ e ji FIFA a nɔkɔtɔma a.

 Anɛ ní kpakpahi kaa jã ma nyɛ maa je World Cup aloo hɛja jemi blɔ nya tomi kpa ko mi kɛ ba lo? Anɛ hɛ nɔ kami ko ngɛ kaa tue mi jɔmi kɛ kake peemi maa ba lo?

 Jeha nɛ ɔ World Cup ɔ ha nɛ nihi susuɔ níhi fuu a he pe bɔɔlu fiami kɛkɛ. Fiɛmi nɛ ɔ ha nɛ nihi ngɛ a juɛmi tsɔɔe ngɛ adesahi a si himi mi nyagbahi kɛ ma kudɔmi sanehi a he. Nɛ sane nɛ ɔmɛ kɔɔ he blɔhi nɛ adesahi ngɛ kaa a hlaa nɔ́ nɛ a suɔ kɛ ekpahi, munyu nɛ a tuɔ kɛ siɔ wɛtso mi nɛ́ nɔ ko je, kɛ sika he blɔ nya tomi nɛ e sɔɛ ɔ he. Nɛ nihi kɛ a sibi kpa we gbi ngɛ ní nɛ ɔmɛ a he.

 Se loloolo ɔ, nihi fuu a bua jɔɔ je ɔ tsuo hɛja jemi blɔ nya tomi kaa World Cup ɔ he wawɛɛ. Se ngɛ bɔ nɛ nihi suɔ kaa hɛja jemi nɛ ɔmɛ nɛ́ a pee nihi kake ɔ tsuo se ha a, a be nyɛe ma ha nɛ kake peemi nɛ hi nihi a kpɛti kɛ ya daa. Mohu ɔ, behi fuu ɔ, hɛja jami nɛ ɔmɛ haa nɛ a naa suhi nɛ nihi jeɔ kpo kɛ ní peepeehi nɛ ngɔɔ mi gbami kɛ baa nihi a kpɛti ɔ heii, nɛ enɛ ɔ ji níhi nɛ Baiblo ɔ de ke a maa na ngɛ “nyagbe ligbi ɔmɛ” a mi ɔ nɛ.​—2 Timoteo 3:1-5.

 Baiblo ɔ tsɔɔ nɔ́ tutuutu nɛ maa pee je ɔ tsuo kake ɔ, nɛ enɛ ɔ ji hɛ nɔ kami nitsɛnitsɛ. E wo si kaa nihi tsuo nɛ a ngɛ zugba a nɔ ɔ maa pee kake ngɛ hiɔwe nɔ yemi, nɛ ji “Mawu Matsɛ Yemi ɔ” sisi.​—Luka 4:43; Mateo 6:10.

 Matsɛ Yemi nɛ ɔ nya Matsɛ nɛ ji Yesu Kristo ɔ, maa hyɛ konɛ tue mi jɔmi nɛ ba je ɔ mi tsuo. Baiblo ɔ de ke:

•   “Á ye dami sane saminya ngɛ e yi nɔ; e yi nɔ nɛ jɔ kulaa ngɛ he tsuaa he!”​—La 72:7.

•   “Ke ohiatsɛ . . . tsɛ lɛ ɔ, e buɔ lɛ tue. E heɔ a yi wami kɛ jeɔ yi mi wami, kɛ awi yemi mi.”​—La 72:12, 14.

 Mwɔnɛ ɔ po ɔ, Yesu tsɔɔmi ɔmɛ pee nihi ayɔhi abɔ nɛ a ngɛ mahi 239 a mi ɔ kake. A bɔ mɔde kaa a ma je ninyɛ kɛ je a mi. Ke o suɔ nɛ o kase enɛ ɔ he ní fuu ɔ, moo kane munyuhi nɛ ji “Breaking the Cycle of Hatred.”