Nɔ́ Nɛ Baiblo ɔ Tsɔɔ

Ke A Ke Huno Ji Weku Yi ɔ, Mɛni E Tsɔɔ?

NGƐ hehi fuu ɔ, nyumu ɔ kɛ yo ɔ tsuo kãa kita ngɛ yo kpeemi sisi. Ngɛ kita nɛ a kã nɛ ɔ nya a, yo ɔ tsɔɔ kaa e maa bu e huno ɔ. Se ngɛ anɔkuale mi ɔ, yihi fuu kplɛɛ we nɔ kaa huno ɔ ji yi ngɛ gba si himi ɔ mi. Nyɛ ha nɛ waa hyɛ nɔ́ nɛ Baiblo ɔ de ngɛ munyu nɛ ɔ he. Wa maa na kaa nile ngɛ blɔ nya nɛ Mawu to nɛ ɔ mi.

Bɔ Nɛ Mawu To Yi Yemi He Blɔ Nya Ha

Baiblo ɔ tu bɔ nɛ a to yi yemi he blɔ nya ha a he munyu ngɛ Efeso Bi 5:22-24 ɔ. Lejɛ ɔ de ke: “Ha yigbayihi nɛ a ba a he si kɛ ha a hunomɛ kaa nɔ́ nɛ Nyɔmtsɛ ɔ lɛ a ngɛ pee ha, ejakaa huno ji e yo ɔ yi kaa bɔ nɛ Kristo ɔ ji asafo ɔ yi ɔ . . . Ngɛ anɔkuale mi ɔ, kaa bɔ nɛ asafo ɔ ngɛ Kristo ɔ sisi ɔ, jã nɔuu kɛ̃ nɛ e sa kaa yigbayihi hu nɛ a pee kɛ ha a hunomɛ ngɛ nɔ́ fɛɛ nɔ́ mi.” Akɛnɛ “huno ɔ ji e yo ɔ yi” he je ɔ, e sa nɛ nyumu ɔ nɛ nyɛɛ weku ɔ hɛ mi, nɛ yo ɔ nɛ e fĩ e se nɛ e je bumi kpo kɛ ha e huno ɔ.​—Efeso Bi 5:33.

E sa nɛ huno ɔ hu nɛ e ba e he si kɛ ha Mawu kɛ Kristo. E be he blɔ nɛ e deɔ e yo ɔ kaa e gbo Mawu mlaa a nɔ tue, loo e ko ngɔ lɛ nitsɛ e he nile nɛ e kɛ Baiblo ɔ tsɔse ɔ kɛ tsu ní. E ngɛ mi kaa huno ɔ be he blɔ nɛ ɔmɛ mohu lɛɛ, se kɛ̃ ɔ, Mawu hla lɛ konɛ e tsu blɔ nya ní tsumi komɛ nɛ a he hia, nɛ lɔ ɔ ji kaa e maa mwɔ yi mi kpɔ kɛ ha e weku ɔ.​—Roma Bi 7:2; 1 Korinto Bi 11:3.

Baiblo ɔ tsɔɔ kaa ke huno ngɛ e ní tsumi nɛ ji weku yi ɔ he ní tsue ɔ, e sɛ nɛ e fo lɛ pɛ e nɔ́ mi, mohu ɔ, e sa nɛ e susu e yo ɔ hiami níhi a he kekle. Efeso Bi 5:25 ɔ de ke: “Hunomɛ, nyɛɛ ya nɔ nɛ nyɛɛ suɔ nyɛ yi ɔmɛ kaa bɔ nɛ Kristo ɔ hu suɔ asafo ɔ nɛ e ngɔ lɛ nitsɛ e he kɛ ha ngɛ asafo ɔ he ɔ.” Huno nɛ e nyɛɛɔ Kristo nɔ hyɛmi nɔ́ kpakpa a se ɔ, pee we níhi nɛ lɛ pɛ e ma ná he se.

Jehanɛ se hu ɔ, Baiblo ɔ wo hunomɛ ga kaa a kɛ a yi ɔmɛ nɛ hi si “ngɛ nile mi.” (1 Petro 3:7) Ngɛ anɔkuale mi ɔ, slɔɔto ngɛ nyumu kɛ yihi a kpɛti ke e ba lɛ ngɛ he wami nɛ a ngɛ, kɛ bɔ nɛ a peeɔ a ní ha a blɔ fa mi. Se tsa pi enɛ ɔ pɛ nɛ e sa kaa e hi huno ɔ juɛmi mi. E sa nɛ e le e yo ɔ hiami níhi saminya.

“E Ji O He Piɛɛlɔ”

Ke a ke yo nɛ ba e he si ha e huno ɔ, anɛ lɔ ɔ tsɔɔ kaa e be he blɔ kaa e tsɔɔ e juɛmi ngɛ níhi a he lo? Mo susu nɔ hyɛmi nɔ́ nɛ Sara pee ɔ he nɛ o hyɛ. Baiblo ɔ tsɔɔ kaa e ba e he si ha e huno Abraham. (1 Petro 3:5, 6) E ba e he si ha e huno ɔ ngɛ nɔ́ fɛɛ nɔ́ ko mi. Benɛ e ba bi nɛ a je a we nɛ ngɛ fɛu ɔ mi nɛ a ya hi bo tsu mi ɔ, Sara kplɛɛ nɔ. Jehanɛ hu ɔ, benɛ a ná nibwɔ komɛ nɛ a hyɛ we blɔ ɔ, e kɛ oya yemi hoo ní ha mɛ. (1 Mose 12:5-9; 18:6) Benɛ Abraham kɛ Sara kpa we gbi ngɛ sane ko nɛ he hia a he ɔ, Sara tsɔɔ e juɛmi ngɛ he si abɔ. Enɛ ɔ ya nɔ benɛ e ngɛ hlae nɛ a fiee e mawayo nɛ ji Hagar kɛ e bitɛte nɛ ji Ishmael kɛ je we ɔ mi ɔ. Mawu kã we Sara hɛ mi, mohu ɔ, e de Abraham kaa e “bu lɛ tue.” Sara kɛ oya yemi fiee we Hagar kɛ Ishmael kɛ je we ɔ mi, mohu ɔ, e ya nɔ nɛ e ba e he si ha Abraham konɛ lɛ nitsɛ e tsu sane ɔ he ní.​—1 Mose 21:8-14.

Sara nɔ hyɛmi nɔ́ ɔ tsɔɔ kaa e sɛ nɛ yo ko nɛ hi si gu kɛkɛ nɛ e hi blɔ hyɛe kaa e huno ɔ ma tsu nɔ́ fɛɛ nɔ́ ko he ní. Mohu ɔ, e sa nɛ e kai kaa e ji e huno ɔ “he piɛɛlɔ,” nɛ enɛ ɔ ji he blɔ ko nɛ se be nɛ e ná. (Malaki 2:14, NW) Akɛnɛ yo ɔ ji nyumu ɔ yemi kɛ bualɔ he je ɔ, ke nyumu ɔ maa mwɔ yi mi kpɔ ko ɔ, e tsɔɔ e juɛmi ngɛ sane ɔ he. Jehanɛ hu ɔ, e ngɛ he blɔ ko nɛ se be, nɛ lɔ ɔ ji kaa e hyɛɛ we ɔ mi níhi fuu a nɔ, nɛ e le bɔ nɛ a hyɛɛ sika nɔ ha. Ngɛ anɔkuale mi ɔ, ke e biɔ nɛ a mwɔ yi mi kpɔ ko ɔ, yo ɔ maa tsɔɔ e juɛmi mohu lɛɛ, se nyumu ɔ lɛ e maa ma nɔ́ fɛɛ nɔ́ nya si.​—Abɛ 31:10-31; 1 Timoteo 5:14.

Mo Je Bumi Kpo Kɛ Tsɔɔ Bɔlɔ ɔ

Yehowa Mawu bɔ nyumu kɛ yo, nɛ e to gba si himi nɛ ngɛ klɔuklɔu ɔ sisi konɛ e kɛ pee mɛ kake. (1 Mose 2:18-24) Jehanɛ hu ɔ, e tsɔɔ nyumu ɔ kɛ yo ɔ tsuo a blɔ nya ní tsumi nɛ e sa kaa a tsu, nɛ lɔ ɔ ma ha mɛ bua jɔmi.​—5 Mose 24:5; Abɛ 5:18.

Akɛnɛ Yehowa lɛ to gba si himi sisi he je ɔ, e ngɛ he blɔ kaa e woɔ mlaahi nɛ ma kudɔ gba si himi ɔ. Ke nihi nɛ a sɛ gba si himi mi ɔ tsu a blɔ nya ní tsumihi saminya, nɛ a nyɛɛ yi yemi he blɔ nya nɛ Mawu to ɔ se ɔ, e maa jɔɔ mɛ. Pi nɛ a peeɔ jã akɛnɛ e ji a blɔ nya ní tsumi ɔ he je, mohu ɔ, bumi nɛ a ngɛ kɛ ha Yehowa a he je nɛ a peeɔ jã.

ANƐ O KAI LO?

◼ Mɛnɔ ji nɔ nɛ e pee yi yemi he nɔ hyɛmi nɔ́ nɛ pe kulaa?​—Efeso Bi 5:25.

◼ Anɛ huzu ngɛ he blɔ nɛ huno ngɛ kaa weku yi ɔ he lo?​—1 Korinto Bi 11:3.

◼ Mɛni ji yi mi tomi nɛ ngɛ gba si himi kɛ yi yemi blɔ nya tomi ɔ he?​—Abɛ 5:18.

[Foni]

Ke hunomɛ kase nɔ hyɛmi nɔ́ nɛ Kristo pee kɛ kɔ yi yemi he ɔ, e ma ha nɛ a kɛ a yi ɔmɛ tsuo a bua maa jɔ, nɛ a tsui hu maa nɔ a mi