Anɛ o to o tsui si kɛ kane Hwɔɔmi Mɔ slɔɔtohi nɛ ba lingmi nɛ ɔ lo? Ke jã a, lɛɛ moo hyɛ kaa o ma nyɛ ma ha sane bimihi nɛ nyɛɛ se nɛ ɔ a heto:

Mɛni he je nɛ Yehowa kplɛɛ nɔ nɛ blema Israel bi ɔmɛ hwu ta a?

Yehowa suɔ nɔmlɔ. Se kɛ̃ ɔ, be komɛ ɔ, ke ma ko ngɛ Israel bi ɔmɛ yi mi wae aloo a ngɛ mɛ níhi nɛ sɛ pee ɔ, Yehowa haa nɛ Israel bi ɔmɛ kɛ jamɛ a ma a hwuɔ ta. Mawu pɛ nɛ e tsɔɔ nɔ nɛ e sa kaa e ya ta a, kɛ be nɛ e sa kaa a hwu ta a.​—w15-E 11/1, bf. 4-5.

Mɛni ji níhi nɛ a he hia nɛ fɔli ma nyɛ maa pee kɛ tsɔse a bimi nɛ a ye kɛ je jeha 13 kɛ yaa a konɛ a sɔmɔ Yehowa?

E he hia nɛ fɔli nɛ a je suɔmi kpo kɛ tsɔɔ a bimɛ nɛ a ye kɛ je jeha 13 kɛ yaa a, nɛ a ba a he si kɛ pee nɔ hyɛmi nɔ́ kɛ ha a bimɛ ɔmɛ. E he hia kaa fɔli nɛ a kɔ nɔ́ se, konɛ a bɔ mɔde wawɛɛ kaa a maa nu a bimɛ nɛ a ye kɛ je jeha 13 kɛ yaa a sisi hulɔ.​—w15 11/15, bf. 9-11.

Mɛni he je nɛ e sɛ nɛ nihi nɛ a na pope ɔ kaa Petro nane mi dalɔ ɔ?

Mateo 16:17, 18 ɔ tsɔɔ we kaa bɔfo Petro maa pee Kristofohi asafo ɔ yi. Baiblo ɔ tsɔɔ kaa Yesu mohu ji asafo ɔ kɔ nya tɛ, se pi Petro. (1 Pet. 2:4-8)​—w15-E 12/1, bf. 12-14.

Loko wa maa tu munyu ɔ, mɛni níhi a he e sa kaa wa susu?

Loko wa nya mi munyu ma nyɛ maa wo nɔ he wami ɔ, e sa kaa waa le (1) be nɛ e sa kaa waa tu munyu (Fiɛlɔ 3:7), (2) nɔ́ nɛ e sa kaa wa de (Abɛ 12:18), kɛ (3) blɔ nɔ nɛ wa maa gu kɛ tu munyu (Abɛ 25:15).​—w15 12/15, bf. 18-21.

Mɛni ji ní komɛ nɛ tsɔɔ we anɔkuale yemi nɛ e sa kaa Kristofohi nɛ a kua?

Anɔkuale Kristofohi yi lakpa nɛ a gbi nɔ he guɛ hulɔ. A tui lakpa munyuhi aloo munyu yayahi kɛ ye nihi awi. A ju we nɛ a fiɛ nihi ojo hulɔ.​—wp16.1, bf. 5.

Mɛnɔmɛ ji “osɔfo nikɔtɔma amɛ” nɛ a tu a he munyu ngɛ Baiblo ɔ mi ɔ?

E ngɛ heii kaa munyu nɛ ji “osɔfo nikɔtɔma amɛ” ɔ kɔɔ nihi titli nɛ a ngɛ osɔfo ɔmɛ a kpɛti ɔ a he. Nihi nɛ a sɔmɔ kaa osɔfo nikɔtɔmahi be ko nɛ be ɔ hu piɛɛ he.​—wp16.1, bf. 10.

Kɛ e sa kaa o kɛ nyɛmimɛ nyumuhi kɛ yihi nɛ a pɔ mɛ nu ɔ nɛ hi si ha kɛɛ?

Kristofohi bui jamɛatsɛmɛ ɔmɛ kaa a nɔ kuɔ pe ni kpahi. Nɔ nɛ a pɔ lɛ nu nitsɛnitsɛ ɔ be suɔe kaa nihi nɛ a bu lɛ kaa e nɔ kuɔ pe ni kpahi, nɛ e be nihi dee kaa a pɔ lɛ nu hulɔ. (Mat. 23:8-12)​—w16.01, bf. 21-23.

Mɛni wa ma nyɛ maa kase kɛ je nɔ́ nɛ Abraham pee loko e ba pee Mawu huɛ ɔ mi?

Eko ɔ, Abraham kase Mawu he ní kɛ je Shem ngɔ. Nɛ bɔ nɛ Mawu kɛ Abraham kɛ e weku ɔ hi si ha a ha nɛ Abraham ná níhi a si kpami. Wɔ hu wa ma nyɛ maa pee jã.​—w16.02, bf. 4-5.

Mɛnɔmɛ nɛ a gba Baiblo ɔ mi kɛ wo yihi kɛ kukuhi a mi ɔ?

Ngɛ jeha 1200 ɔmɛ a mi ɔ, osɔfo Stephen Langton gba Baiblo ɔ mi kɛ wo yihi a mi. Kekleekle ɔ, Yuda bi ɔmɛ a womi ngmali ɔmɛ gba womihi nɛ a ngɛ Hebri Baiblo ɔ mi ɔ mi kɛ wo kukuhi a mi. Ngɛ jeha 1500 ɔmɛ a mi ɔ, ní lelɔ ko nɛ a tsɛɛ lɛ ke Robert Estienne hu gba womihi nɛ a ngɛ Kristofohi a Hela Ngmami ɔ mi ɔ kɛ wo kukuhi a mi.​—wp16.2, bf. 14-15.

Benɛ Satan ka Yesu ɔ, anɛ e ngɔ Yesu kɛ ya sɔlemi we ɔ nitsɛnitsɛ, aloo e je sɔlemi we ɔ kɛ tsɔɔ lɛ ngɛ nina mi?

Wa li blɔ tutuutu nɔ nɛ satan gu kɛ pee jã. Munyu nɛ ngɛ Mateo 4:5 kɛ Luka 4:9 ɔ ma nyɛ maa tsɔɔ kaa e ngɔ Yesu kɛ ya sɔlemi we ɔ ngɛ nina mi aloo e ha nɛ Yesu ya da sɔlemi we ɔ yi mi he ko ploplooplo nitsɛnitsɛ.​—w16.03, bf. 31-32.

Ngɛ mɛni blɔ nɔ nɛ wa fiɛɛmi ní tsumi ɔ ngɛ kaa bɔ́?

Bɔ́ woɔ bɔɔbɔɔbɔɔ, e haa nɛ nɔ he jɔɔ lɛ, nɛ e hi ha níhi nɛ wami ngɛ a mi. Bɔ́ ji jɔɔmi nɛ je Mawu ngɔ. (5 Mose 33:13) Jã kɛ̃ nɛ kake nɛ Mawu sɔmɔli peeɔ kɛ tsuɔ fiɛɛmi ní tsumi ɔ hu ji.​—w16.04, bf. 32.