1. Mɛni he je nɛ Yehowa ji Buɛ Puɛlɔ kpanaa a?

NGƐ November 2010 mi ɔ, a jua blema China buɛ ko ngɛ London ngɛ England. E piɛ bɔɔ nɛ e jua ko su dɔla ayɔ 70. Enɛ ɔ tsɔɔ heii kaa buɛ puɛlɔ ko ma nyɛ maa ngɔ zu kɛkɛ kɛ pee nɔ́ ko nɛ ngɛ fɛu nɛ he jua wa. Se kɛ̃ ɔ, adesa buɛ puɛlɔ ko be nɛ waa kɛ lɛ ma nyɛ maa to Yehowa he. Ngɛ ní bɔmi ligbi ekpa a nyagbe ɔ, Mawu “ngɔ zugba zu kɛ puɛ nɔmlɔ” nɛ e ye mluku nɛ ji Adam. E ha lɛ nyɛmi konɛ e nyɛ nɛ e je lɛ Bɔlɔ ɔ e suhi kpo. (1 Mose 2:7) E da blɔ kaa a tsɛɛ Adam ke “Mawu bi.”​—Luka 3:38.

2, 3. Kɛ wa ma plɛ kɛ kase Israel bi ɔmɛ nɛ a tsake a tsui ɔ ha kɛɛ?

² Se Adam ha nɛ he blɔ nɛ e ná kaa Mawu bi ɔ bɔ lɛ benɛ e tsɔ e Bɔlɔ ɔ hɛ mi atua a. Se kɛ̃ ɔ, benɛ jehahi fuu ba pue mi ɔ, Adam nina, nɛ ji “nimli kpekpemi” ko kplɛɛ Mawu nɔ yemi ɔ nɔ. (Heb. 12:1) Akɛnɛ a baa a he si kɛ haa a Bɔlɔ ɔ he je ɔ, a tsɔɔ kaa a suɔ kaa a Bɔlɔ ɔ nɛ pee a Tsɛ kɛ a Puɛlɔ, se pi Satan. (Yoh. 8:44) Anɔkuale nɛ a yeɔ Mawu ɔ haa nɛ wa kaiɔ munyu ko nɛ Yesaya tu kɛ kɔ Israel bi nɛ a tsake a tsui ɔ a he ɔ. Yesaya de ke: ‘Yehowa, mo ji wa Tsɛ, wa ngɛ kaa zu, nɛ moo lɛɛ o ngɛ kaa buɛ puɛlɔ; mo lɛ o bɔ wɔ.’​—Yes. 64:8.

 ³ Mwɔnɛ ɔ, nihi tsuo nɛ a jaa Yehowa ngɛ mumi kɛ anɔkuale mi ɔ hu bɔɔ mɔde kaa a maa ba a he si nɛ a bu Yehowa tue. A naa kaa e ji he blɔ nɛ a ná kaa a ma tsɛ Yehowa kaa a Tsɛ, nɛ a maa ba a he si ha lɛ kaa a Puɛlɔ. Anɛ o naa o he kaa o ji zu nɛ he jɔ ngɛ Mawu dɛ mi konɛ e ngɔ mo kɛ puɛ buɛ nɛ sa e hɛ mi lo? Anɛ o naa nyɛmimɛ ɔmɛ a ti nɔ tsuaa nɔ hu kaa e ji zu nɛ he jɔ nɛ Mawu kɛ ngɛ buɛ nɛ sa e hɛ mi puɛe lo? Ha nɛ wa susu níhi etɛ nɛ Yehowa peeɔ kaa wa Puɛlɔ ɔ he, konɛ lɔ ɔ nɛ ye bua wɔ nɛ waa hɛɛ juɛmi kpakpa. Kekleekle ɔ, bɔ nɛ e plɛɔ kɛ hlaa nihi nɛ e maa ye bua mɛ ha, enyɔne ɔ, nɔ́ he je nɛ e yeɔ bua mɛ, kɛ etɛne ɔ, blɔ nɔ nɛ e guu kɛ yeɔ bua mɛ.

4. Mɛni blɔ nɔ Yehowa guu kɛ hlaa nihi nɛ́ e gblaa mɛ kɛ suɔ e he ɔ? Mo ha enɛ ɔ he nɔ hyɛmi níhi.

⁴ Yehowa hyɛ we bɔ nɛ adesa ngɛ ha ngɛ kpo nɔ blɔ, mohu ɔ, e hyɛɛ bɔ nɛ wa ngɛ ha ngɛ wa tsui mi. (Kane 1 Samuel 16:7b.) Mawu tsɔɔ kaa e hyɛɔ nɔ tsui mi benɛ e to Kristofohi asafo ɔ sisi ɔ. E gbla nihi fuu nɛ́ ngɛ adesahi a hɛ mi ɔ, eko ɔ, a maa bu mɛ kaa a sɛ ɔ kɛ ba e kɛ e Bi ɔ a ngɔ. (Yoh. 6:44) Nimli nɛ ɔmɛ a kpɛti nɔ kake ji Farisi no ko nɛ a tsɛɛ lɛ ke Saulo ɔ. Be ko nɛ be ɔ, ‘e tu musu bɔmi munyuhi kɛ si Mawu; e wa lɛ yi mi, nɛ e pee níhi basabasa.’ (1 Tim. 1:13) Se ‘Yehowa nɛ kaa adesa tsui hyɛɔ ɔ,’ bui Saulo kaa e ji zu nɛ se nami be he. (Abɛ 17:3) Mohu ɔ, Mawu na kaa e ma nyɛ maa ye bua lɛ konɛ e ba plɛ buɛ nɛ sa e hɛ mi. Ngɛ anɔkuale mi ɔ, Mawu na kaa Saulo ma nyɛ ma tsake, enɛ ɔ he ɔ, e “hla lɛ” konɛ e ye Mawu he odase ‘ha ma je li, matsɛmɛ, kɛ Israel ma a tsuo.’ (Níts. 9:15) Ni kpahi hu nɛ Mawu na mɛ kaa a ma nyɛ maa pee ‘buɛhi nɛ a hɛ mi ngɛ nyami’ ɔ a kpɛti ni komɛ ji nihi nɛ be ko nɛ be ɔ, a ji dã deli, ajuama bɔli, kɛ juli. (Rom. 9:21; 1 Kor. 6:9-11) Be mi nɛ a kaseɔ Mawu Munyu ɔ nɛ a jeɔ hemi kɛ yemi kpo ɔ, a haa nɛ Yehowa yeɔ bua mɛ nɛ a peeɔ tsakemihi.

5, 6. Mɛni blɔ nɔ e sa kaa wa hɛ nɛ waa kɛ fɔ Yehowa nɔ kaa wa Puɛlɔ ɔ nɛ sa bɔ nɛ (a) wa buɔ nihi nɛ a ngɛ wa zugba kpɔ ɔ mi ɔ ha a he? (b) wa buɔ wa nyɛmimɛ ha a he?

⁵ Wa ngɛ hemi kɛ yemi kaa Yehowa hlaa tsui kpakpa tsɛmɛ nɛ e gblaa mɛ kɛ baa e ngɔ. Enɛ ɔ he ɔ, e sɛ nɛ waa kojo nihi nɛ a ngɛ wa zugba kpɔ ɔ mi, kɛ wa we asafo ɔ hu mi. Mo susu nyumu ko nɛ a tsɛɛ lɛ ke Michael ɔ he nɛ o hyɛ. E de ke: “Ke Yehowa Odasefohi ba ye ngɔ ɔ, i bui mɛ tue, nɛ i hyɛ we mɛ po. I bui mɛ fɛɛ! Pee se ɔ, i kɛ weku ko ya kpe ngɛ he kpa ko, nɛ ye bua jɔ bɔ nɛ a baa a je mi ha a he. Kɛkɛ nɛ ligbi ko ɔ, i ba ná le kaa a ji Yehowa Odasefohi. Enɛ ɔ ha nɛ ye he mi po! Bɔ nɛ a peeɔ a ní ha a ha nɛ i susu nɔ́ he je nɛ i sume Yehowa Odasefohi a sane ɔ he saminya. E kɛ we kulaa nɛ i ba yɔse kaa munyuhi nɛ i nuɔ nɛ nihi tuɔ ngɛ a he ɔ nɛ ha nɛ i sume a sane ɔ nɛ, se pi nɛ i le mɛ tutuutu.” Akɛnɛ Michael suɔ kaa e maa le bɔ nɛ Yehowa Odasefohi ngɛ ha tutuutu he je ɔ, e kplɛɛ kaa a kɛ lɛ nɛ kase Baiblo ɔ. Pee se ɔ, e ba anɔkuale ɔ mi, nɛ e kɛ e he wo be tsuo sɔmɔmi ní tsumi ɔ mi.

⁶ Ke wa kplɛɛ nɔ kaa Yehowa ji wa Puɛlɔ ɔ, lɔ ɔ hu ma nyɛ maa sa bɔ nɛ wa buɔ wa nyɛmimɛ Odasefohi ha a he. Anɛ o naa nyɛmimɛ kaa bɔ nɛ Mawu naa mɛ ɔ lo? Anɛ o naa mɛ kaa nihi nɛ Mawu ngɛ a he ní tsue, se pi nihi nɛ Mawu tsu a he ní ta lo? Mawu ma nyɛ maa na nɔ́ nɛ ngɛ nɔ ko tsui mi, kɛ nɔ́ nɛ ke e tsɔse nɔ ɔ, nɔ ɔ ma nyɛ maa pee. Enɛ ɔ he ɔ, Yehowa ngɛ nihi a he juɛmi kpakpa, nɛ e kɛ e juɛmi mɛ mluku nɛ a yi ɔ nɔ, ejakaa e le kaa e be kɛe nɛ a maa ye mluku. (La 130:3) Wa ma nyɛ maa kase lɛ konɛ wɔ hu waa hɛɛ e sɔmɔli a he juɛmi kpakpa. Wa nyɛmimɛ ɔmɛ ngɛ mɔde bɔe kaa a ma ha nɛ huɛ bɔmi kpakpa nɛ hi a kɛ Mawu a kpɛti. Ngɛ anɔkuale  mi ɔ, waa kɛ wa Puɛlɔ ɔ ma nyɛ maa pee kake kɛ tsu ní konɛ waa ye bua mɛ nɛ a pee jã. (1 Tes. 5:14, 15) Asafo mi nikɔtɔma amɛ ji “nike níhi” nɛ Mawu kɛ ha nɔmlɔ adesa, enɛ ɔ he ɔ, e sa kaa a pee nɔ hyɛmi nɔ́ kpakpa ngɛ enɛ ɔ blɔ fa mi.​—Efe. 4:8, 11-13.

7. Mɛni he je nɛ o bua jɔ Yehowa tsɔsemi he ɔ?

⁷ Eko ɔ, o nu nɛ nɔ ko tu munyu nɛ nyɛɛ se nɛ ɔ hyɛ: ‘Benɛ i ba fɔ bimɛ ɔ loko i ba na kaa se nami ngɛ tsɔsemi nɛ ye fɔli kɛ ha mi ngɛ ye jokuɛ mi ɔ he.’ Ke wa ná níhi a si kpamihi fuu ngɛ si himi mi ɔ, eko ɔ, wa maa bu tsɔsemi kaa bɔ nɛ Yehowa buɔ lɛ ɔ. Yehowa buɔ tsɔsemi kaa e ji blɔ nɛ a guu nɔ kɛ jeɔ suɔmi kpo kɛ tsɔɔ nihi. (Kane Hebri Bi 12:5, 6, 11.) Niinɛ, Yehowa bimɛ ji wɔ, nɛ akɛnɛ e suɔ wɔ he je ɔ, e toɔ e tsui si nɛ e yeɔ bua wɔ konɛ waa pee tsakemihi ngɛ wa si himi mi. E suɔ nɛ waa pee juɛmitsɛmɛ nɛ wa bua nɛ jɔ, konɛ wɔ hu waa suɔ lɛ. (Abɛ 23:15) Ke wa ngɛ nɔ́ náe ɔ, e bua jɔɛ he, nɛ e sume nɛ wa gbo kaa ‘yayami peeli,’ akɛnɛ wa ji Adam sisi bimɛ ɔ he je.​—Efe. 2:2, 3.

8, 9. Mɛni blɔ nɔ Yehowa guɔ kɛ tsɔɔ wɔ ní mwɔnɛ ɔ, nɛ kɛ tsɔsemi nɛ ɔ maa ya nɔ ha kɛɛ hwɔɔ se?

⁸ Akɛnɛ wa ji ‘yayami peeli’ he je ɔ, be ko nɛ be ɔ, wa je su komɛ nɛ Mawu sume ɔ kpo. Eko ɔ, wa pee wa ní kaa lohwe awi yeli po! Se kɛ̃ ɔ, wa bua jɔ kaa Yehowa ye bua wɔ nɛ wa pee tsakemihi ngɛ wa si himi mi, nɛ wa he ba jɔ kaa jijɔhi. (Yes. 11:6-8; Kol. 3:9, 10) Wa ngɛ mumi mi paradeiso mi. Mwɔnɛ ɔ, Yehowa ngɛ mumi paradeiso nɛ ɔ dlae konɛ lɔ ɔ nɛ ye bua wɔ nɛ waa pee tsakemi ngɛ wa si himi mi. Wa ngɛ je nɛ a peeɔ yi wu tso ní ngɛ mi ɔ mi mohu lɛɛ, se wa ngɛ slɔkee. Jehanɛ hu ɔ, wa ti ni komɛ ngɛ nɛ a je we suɔmi kpo kɛ tsɔɔ we wɔ ngɛ wa jokuɛwi a si, se amlɔ nɛ ɔ, nihi jeɔ suɔmi nitsɛnitsɛ kpo kɛ tsɔɔ wɔ. (Yoh. 13:35) Nɛ wɔ hu wa jeɔ suɔmi kpo kɛ tsɔɔ nihi. Nɔ́ nɛ pe kulaa a, wa ba le Yehowa kaa wa Tsɛ, nɛ amlɔ nɛ ɔ, wa ngɛ suɔmi nɛ e ngɛ kɛ ha wɔ ɔ he se náe.​—Yak. 4:8.

⁹ Wa ma ná mumi mi paradeiso ɔ he se kɛ pi si ngɛ je ehe ɔ mi. Jehanɛ se hu ɔ, waa kɛ bua jɔmi maa hi paradeiso nitsɛnitsɛ ɔ mi ngɛ Mawu Matsɛ Yemi ɔ sisi. Jamɛ a be ɔ mi ɔ, Yehowa ma tsake níhi a hɛ mi ngɛ zugba a nɔ. E maa ya nɔ maa ye bua nihi tsuo nɛ maa hi zugba a nɔ ɔ, nɛ e maa tsɔɔ mɛ ní ngɛ blɔ nɛ wa be nyɛe maa kale nɔ. (Yes. 11:9) Jehanɛ se hu ɔ, Mawu ma ha nɛ wa juɛmi kɛ wa nɔmlɔ tso maa ye mluku, konɛ wa nyɛ nɛ wa ná e ní tsɔɔmi ɔ he se kɛ pi si, nɛ waa pee e suɔmi nya ní pɛpɛɛpɛ. Enɛ ɔ he ɔ, nyɛ ha nɛ waa fia wa pɛɛ si kaa wa maa ya nɔ maa ba wa he si ha Yehowa kɛ tsɔɔ kaa wa le kaa e suɔ wɔ, nɛ lɔ ɔ he je nɛ e yeɔ bua wɔ konɛ waa pee tsakemihi ngɛ wa si himi mi ɔ nɛ.​—Abɛ 3:11, 12.

10. Mɛni Yesu pee kɛ tsɔɔ kaa e toɔ e tsui si, nɛ e kɛ ga tsuɔ ní kaa bɔ nɛ Buɛ Puɛlɔ Kpanaa a peeɔ ɔ?

¹⁰ Kaa bɔ nɛ buɛ puɛlɔ nɛ e he be peeɔ ɔ, Yehowa le bɔ nɛ “zu” nɛ e kɛ ma tsu ní ɔ ngɛ ha, nɛ e kɛ puɛɔ nɔ́ nɛ sa. (Kane La 103:10-14.) Ngɛ anɔkuale mi ɔ, e daa wa ti nɔ tsuaa nɔ gbɔjɔmi, kɛ bɔ nɛ e wa ngɛ mumi mi ha a nɔ kɛ tsuɔ e he ní. E Bi ɔ ha nɛ wa le bɔ nɛ e kɛ e sɔmɔli nɛ a yi mluku ɔ hiɔ si ha. Ke Yesu bɔfo ɔmɛ pee nɔ́ ko nɛ dɛ ɔ, mo susu bɔ nɛ e peeɔ e ní ngɛ a he ha a he nɛ o hyɛ. Be komɛ ɔ, e bɔfo ɔmɛ sãa nya ngɛ nɔ nɛ ji nɔmlɔ ngua pe kulaa ngɛ a kpɛti ɔ he. Kaa o ngɛ lejɛ ɔ, anɛ o ko na mɛ kaa a baa a he si, nɛ a ji zu nɛ he jɔ lo? Se Yesu ná we a he juɛmi yaya. Yesu jeɔ mi jɔmi kɛ tsui si tomi mi nɛ e woɔ e bɔfo anɔkualetsɛmɛ ɔmɛ ga. E le kaa ke a bu e ga womi ɔ tue, nɛ a kase e he si bami ɔ, lɔ ɔ ma nyɛ maa ye bua mɛ konɛ a pee tsakemi. (Mar. 9:33-37; 10:37, 41-45;  Luka 22:24-27) Benɛ a tle Yesu si kɛ ho hiɔwe ya nɛ mumi klɔuklɔu ɔ ba e bɔfo ɔmɛ a nɔ ɔ, a ngɔ a juɛmi kɛ ma ní tsumi nɛ e kɛ ha mɛ ɔ nɔ, se pi he blɔ nɛ a ma ná, kɛ biɛ nɛ a ma he ɔ nɔ.​—Níts. 5:42.

11. Ngɛ mɛni blɔhi a nɔ nɛ David pee e ní kaa zu nɛ he jɔ, nɛ kɛ wa ma plɛ kɛ kase lɛ ha kɛɛ?

¹¹ Mwɔnɛ ɔ, Yehowa guɔ e Munyu ɔ, e mumi klɔuklɔu ɔ, kɛ Kristofohi asafo ɔ nɔ kɛ yeɔ bua e sɔmɔli. Ke wa kaneɔ Mawu Munyu ɔ saminya, nɛ wa pueɔ wa yi mi tɛ ngɛ níhi nɛ wa kaneɔ ɔ a he, nɛ wa biɔ Yehowa kaa e ye bua wɔ konɛ wa kɛ tsu ní ɔ, wa ma nyɛ maa pee tsakemihi. David ngma ke: “Ke i kai mo ngɛ ye sa nɔ kikɛ nɛ ɔ, o he sɔuu i susuɔ nyɔ ɔ mi tsuo.” (La 63:6) E ngma hu ke: ‘Ma je Yehowa yi, ejakaa e ha mi juɛmi. Nyɔ mi po, ye he nile kɛ mi tuɔ munyu.’ (La 16:7) Niinɛ, David pueɔ e yi mi tɛ ngɛ Yehowa ga womihi a he, nɛ e haa nɛ lɔ ɔ tsakeɔ bɔ nɛ e susuɔ níhi a he kɛ bɔ nɛ e peeɔ e ní ha ke a kã e hɛ mi po. (2 Sam. 12:1-13) David ba e he si kɛ pee nɔ hyɛmi nɔ́ kpakpa kɛ ha wɔ! Anɛ mo hu o pueɔ o yi mi tɛ ngɛ Mawu Munyu ɔ he, nɛ o haa nɛ e tsakeɔ bɔ nɛ o susuɔ níhi a he kɛ bɔ nɛ o peeɔ o níhi haa a lo? Anɛ o ma nyɛ maa pee babauu po pe jã lo?​—La 1:2, 3.

12, 13. Mɛni blɔ nɔ Yehowa guu nɛ e kɛ e mumi klɔuklɔu ɔ kɛ Kristofohi asafo ɔ yeɔ bua wɔ?

¹² Mumi klɔuklɔu ɔ ma nyɛ maa ye bua wɔ. Kaa nɔ hyɛmi nɔ́ ɔ, e ma nyɛ maa ye bua wɔ konɛ waa kase Kristo su ɔmɛ. Su nɛ ɔmɛ piɛɛ Mawu mumi ɔ yiblii ɔ he. (Gal. 5:22, 23) Mumi ɔ yiblii ɔ kake ji suɔmi. Wa suɔ Mawu, nɛ wa suɔ kaa wa maa bu lɛ tue konɛ e ye bua wɔ. Wa le kaa e mlaa amɛ a nɔ yemi yi. Mumi klɔuklɔu ɔ ma nyɛ maa ye bua wɔ konɛ waa hwu kɛ si je ɔ kɛ e mumi yaya a konɛ a ko puɛ wa je mi bami. (Efe. 2:2) Be ko nɛ be ɔ, benɛ bɔfo Paulo ji niheyo ɔ, e ha nɛ Yuda bi a jami nya dali ɔmɛ a he nɔ womi ní peepee ɔ tsake e je mi bami wawɛɛ. Se pee se ɔ, e ngma ke: “Kristo lɛ woɔ mi he wami nɛ e haa nɛ i nyɛɔ peeɔ nɔ́ tsuaa nɔ́.” (Filip. 4:13) Lɔ ɔ he ɔ, nyɛ ha nɛ waa pee wa ní kaa Paulo nɛ waa ya nɔ nɛ wa bi Mawu nɛ e ha wɔ mumi klɔuklɔu ɔ. Wa le kaa ke wa ba wa  he si kɛ bi Yehowa nɔ́ ko ɔ, e ma ha wɔ kokooko.​—La 10:17.

¹³ Yehowa guɔ Kristofohi asafo ɔ, kɛ asafo mi nikɔtɔma amɛ a nɔ kɛ yeɔ bua wɔ. Kaa nɔ hyɛmi nɔ́ ɔ, ke asafo mi nikɔtɔma amɛ yɔse kaa wa ngɛ gbɔjɔmi ko ɔ, a bɔɔ mɔde kaa a maa ye bua wɔ, se tsa pi adesa nile nɔ nɛ a daa kɛ peeɔ jã. (Gal. 6:1) Mohu ɔ, a baa a he si, nɛ a kɛ a hɛ fɔɔ Mawu nɔ, nɛ a biɔ lɛ konɛ e ha mɛ juɛmi kɛ níhi a se kɔmi. A hlaa níhi a mi ngɛ Mawu Munyu ɔ kɛ asafo ɔ womi ɔmɛ a mi konɛ a nyɛ nɛ a ye bua wɔ saminya. Enɛ ɔ haa nɛ a kɛ yemi kɛ buami nɛ sa haa wɔ. Ke a ba o ngɔ nɛ a je mi mi jɔmi kɛ suɔmi mi nɛ a kɛ yemi kɛ buami ko ha mo ngɛ nɔ́ ko kaa o tade womi he ɔ, anɛ o maa kplɛɛ a ga womi ɔ nɔ, nɛ o maa bu ga womi ɔ kaa e ji suɔmi nɛ Mawu ngɛ kpo jee kɛ ngɛ mo tsɔɔe lo? Ke o pee jã a, lɔ ɔ tsɔɔ kaa o ji zu nɛ he jɔ ngɛ Yehowa dɛ mi, nɛ o suɔ kaa e ye bua mo konɛ o pee tsakemihi nɛ o ma ná he se ngɛ o si himi mi.

14. E ngɛ mi kaa Yehowa ngɛ wa nɔ he wami mohu lɛɛ, se mɛni tsɔɔ kaa e suɔ nɛ wɔ nitsɛmɛ waa mwɔ wa yi mi kpɔ ngɛ níhi a he?

¹⁴ Ke wa le blɔ nɔ nɛ Mawu guu kɛ yeɔ bua wɔ ɔ, lɔ ɔ ma ha nɛ waa kɛ wa nyɛmimɛ Odasefohi, nihi nɛ a ngɛ wa zugba kpɔ ɔ mi, kɛ nihi nɛ waa kɛ mɛ kaseɔ Baiblo ɔ maa hi si saminya. Ngɛ blema Israel ɔ, ke buɛ puɛlɔ ko maa ngɔ zu kɛ puɛ buɛ ko ɔ, pi kaa ke e tsua zu ɔ nɔuu kɛkɛ e bɔni buɛ ɔ puɛmi. Kekleekle ɔ, e jeɔ tɛhi kɛ dwɔmi ngɛ zu ɔ mi. Jã kɛ̃ nɛ Mawu hu yeɔ bua nihi tsuo nɛ a baa a he si ɔ konɛ a nyɛ nɛ a pee tsakemihi. E nyɛ we nihi a nɔ kaa a pee tsakemi, mohu ɔ, e tsɔɔ mɛ e mlaahi nɛ a da a konɛ mɛ nitsɛmɛ a je a tsui mi nɛ a pee tsakemi ngɛ a si himi mi nɛ a ba a je mi saminya.

15, 16. Mɛni nihi nɛ waa kɛ mɛ kaseɔ Baiblo ɔ peeɔ kɛ tsɔɔ kaa a suɔ nɛ Yehowa nɛ ye bua mɛ nɛ a pee tsakemihi? Mo ha enɛ ɔ he nɔ́ hetomi nɔ́.

¹⁵ Mo susu nyɛmiyo ko nɛ a tsɛɛ lɛ ke Tessie nɛ e je Australia a he nɛ o hyɛ. Nyɛmiyo nɛ e kɛ Tessie kase ní ɔ de ke: “Benɛ i kɛ Tessie ngɛ Baiblo ɔ mi anɔkuale ɔ kasee ɔ, e nu níhi a sisi mlamlaamla. Se e yɛ e hɛ mi. Asafo mi kpehi po e yɛ! I sɔle nɛ i susu sane ɔ he saminya, nɛ i ma ye juɛmi nya si kaa i kɛ lɛ ma kpa ní ɔ kasemi. Lɔ ɔ se ɔ, nyakpɛ nɔ́ ko ya nɔ. Ligbi ko nɛ i ya lejɛ ɔ kɛ juɛmi ɔ kaa ke wa kase ní ɔ ta a, i be lejɛ ɔ yae hu ɔ, Tessie de mi níhi nɛ ngɛ e tsui mi. E tsɔɔ kaa e susu kaa e ngɛ osato pee, ejakaa e bua jɔ asɔ fiɛmi he saminya. Se amlɔ nɛ ɔ, e mwɔ e yi mi kpɔ kaa e ma kpa.”

¹⁶ Lɔ ɔ se ɔ, e kɛ we nɛ Tessie bɔni Kristofohi a kpehi yami, nɛ e bɔni su kpakpahi kpo jemi. E huɛmɛ yeɔ e he fɛu mohu lɛɛ, se lɔ ɔ si we lɛ kpu. Nyɛmiyo ɔ de hu ke: “Saii mi ɔ, a baptisi Tessie, nɛ pee se ɔ, e sɔmɔ kaa daa blɔ gbalɔ, e ngɛ mi kaa e ngɛ bimɛ enyɔ nɛ a wɛ mohu lɛɛ.” Niinɛ, ke Baiblo kaseli bɔni tsakemihi peemi ngɛ a si himi mi konɛ a sa Mawu hɛ mi ɔ, Mawu maa hɛ lɛ kɛ su a he nɛ e maa ye bua mɛ konɛ a plɛ pee buɛhi nɛ se nami ngɛ a he.

17. (a) Mɛni ha nɛ o bua jɔɔ wawɛɛ kaa Yehowa ji o Puɛlɔ ɔ? (b) Mɛni he wa ma susu ngɛ munyu nɛ nyɛɛ se ɔ mi?

¹⁷ Mwɔnɛ ɔ, loloolo ɔ, buɛ puɛli komɛ toɔ a tsui si nɛ a kɛ a nine puɛɔ buɛ. Jã kɛ̃ nɛ wa Puɛlɔ ɔ hu toɔ e tsui si kɛ haa wɔ, nɛ e woɔ wɔ ga nɛ maa ye bua wɔ konɛ waa pee tsakemihi, nɛ e hyɛɔ kaa waa kɛ e ga womi ɔmɛ ma tsu ní lo. (Kane La 32:8.) Anɛ o yɔse kaa Yehowa susuɔ o he lo? Anɛ o buɔ o he kaa o ngɛ Yehowa dɛ mi nɛ e to e tsui si kɛ ngɛ mo puɛe lo? Ke jã a, lɛɛ mɛni su kpahi maa ye bua mo konɛ o pee kaa zu nɛ he jɔ nɛ ngɛ tsuãa ngɛ Yehowa dɛ mi? Mɛni suhi nɛ e sa kaa o yu o he ngɛ a he konɛ o ko kplii o tsui? Nɛ mɛni blɔ nɔ fɔli maa gu konɛ a kɛ Yehowa nɛ pee kake kɛ tsɔse a bimɛ? Wa ma susu sane bimi nɛ ɔmɛ a he ngɛ munyu nɛ nyɛɛ se ɔ mi.