A daa si kɛ ha hiɔwe tabo ɔ nɛ kpata Yerusalem hɛ mi ɔ, nɛ mɛ nɔuu lɛ a ma kpata Satan je yaya nɛ ɔ hɛ mi ngɛ Harmagedon ta a mi. Mɛni he je nɛ e da blɔ kaa wa pee tsakemi ngɛ bɔ nɛ wa nu nina nɛ ɔ sisi ha a he ɔ?

Loko e maa su jeha 607 loko a fɔ Kristo ɔ, Ezekiel na nina ko nɛ kɔɔ níhi nɛ maa ya nɔ ngɛ Yerusalem loko a ma kpata ma a hɛ mi ɔ he. Ngɛ nina a mi ɔ, Ezekiel na ní yayamihi fuu nɛ Yerusalem bi nɛ a kua hemi kɛ yemi ɔ ngɛ pee. E na nyumuhi ekpa nɛ a hɛɛ awi yemi dadehi ngɛ a dɛ mi. Jehanɛ se hu ɔ, e na nyumu ko ngɛ a kpɛti nɛ e “ha kploba” nɛ e “kpla womi ngmami nɔ́ ko ngɛ e kasa nya.” (Eze. 8:6-12; 9:2, 3) A de jamɛ a nyumu ɔ ke: ‘Yaa kpa si kɛ gu ma a mi tsuo. Nihi nɛ ngɛ haoe, nɛ a ngɛ kɔmɔ yee ngɛ ní hiemi níhi nɛ a ngɛ pee ɔ a he ɔ, pee okadi ngɛ a hɛ nya.’ Lɔ ɔ se ɔ, a de nyumu ɔmɛ nɛ a hɛɛ awi yemi dadehi ngɛ a dɛ mi ɔ kaa a ya nɛ a ya gbe nihi tsuo nɛ a ngɛ ma a mi, nɛ a kadi we a hɛ nya a. (Eze. 9:4-7) Mɛni wa ma nyɛ maa kase ngɛ nina nɛ ɔ mi, nɛ mɛnɔ ji nyumu ɔ nɛ kpla womi ngmami nɔ́ ko ngɛ e kasa nya a?

A je nina nɛ ɔ kɛ tsɔɔ Ezekiel ngɛ jeha 612 loko a fɔ Kristo ɔ mi. E ji gbami, nɛ kekleekle ɔ, e ba mi ngɛ jeha enuɔ se benɛ Babilon ta buli ɔmɛ ya kpata Yerusalem hɛ mi ɔ. E ngɛ mi kaa Babilon bi nɛ a jaa wɔhi ɔ lɛ a kpata Yerusalem hɛ mi mohu lɛɛ, se a tsu ní kaa Yehowa plaafohi. (Yer. 25:9, 15-18) Yehowa gu a nɔ kɛ gbla e we bi nɛ a kua hemi kɛ yemi ɔ a tue. Se Yehowa ha we nɛ a kpata nɔ fɛɛ nɔ ko hɛ mi. E sɛ nɛ a kpata dali a hɛ mi kɛ piɛɛ yayami peeli a he. Enɛ ɔ he ɔ, Yehowa je suɔmi mi nɛ e to blɔ nya konɛ a baa Yuda bi nɛ a bua jɔɛ ní hiemi níhi nɛ ngɛ nɔ yae ngɛ ma a mi ɔ he ɔ a yi.

Ezekiel pee we okadi ngɛ nihi a hɛ nya, nɛ jã kɛ̃ nɛ e piɛɛ we nihi nɛ a ya kpata ni ɔmɛ a hɛ mi ɔ hu a he. Mohu ɔ, hiɔwe bɔfohi ji nihi nɛ a kudɔ hɛ mi kpatami ɔ nɛ. Enɛ ɔ he ɔ, gbami nɛ ɔ ha nɛ wa le níhi nɛ ya nɔ ngɛ hiɔwe. Yehowa fã e bɔfo ɔmɛ kaa a kpata yayami peeli pɛ a hɛ mi nɛ a baa dali a yi. *

Be ko nɛ be ɔ, wa tsɔɔ kaa gbami nɛ ɔ ngɛ mi bae ngɛ wa be nɛ ɔ mi hulɔ. Wa tsɔɔ kaa nyumu ɔ nɛ e kpla womi ngmami nɔ́ ko ngɛ e kasa nya a daa si kɛ ha nihi nɛ a pɔ mɛ nu ɔ a kpɛti nihi nɛ piɛ ngɛ zugba a nɔ ɔ. Wa susu kaa a kadi nihi nɛ a bua jɔ sɛ gbi ɔ nɛ wa ngɛ fiɛɛe ɔ he ɔ kɛ ha yi baami. Se lingmi nɛ ɔ, wa ba na heii kaa e he hia nɛ waa pee tsakemi ngɛ bɔ nɛ wa tsɔɔ munyu nɛ ɔ sisi ha a he. Mateo 25:31-33 ɔ tsɔɔ kaa Yesu lɛ maa kojo nihi. E ma tsu e nyagbe kojomi ɔ he ní ngɛ haomi ngua a mi. E ma je nihi nɛ a peeɔ a ní kaa jijɔhi ɔ kɛ je nihi nɛ a peeɔ a ní kaa apletsihi ɔ a kpɛti. Nihi nɛ a peeɔ a ní kaa jijɔhi ɔ ma ná yi baami, nɛ e ma kpata nihi nɛ a peeɔ a ní kaa apletsihi ɔ a hɛ mi.

Ngɛ sisi numi ehe nɛ ɔ nɛ wa ba ná a nya a, mɛni wa kaseɔ ngɛ Ezekiel nina a mi? Ke e hí kulaa a, wa kaseɔ níhi enuɔ ngɛ mi:

1.  Loko a ma kpata Yerusalem hɛ mi ɔ, Ezekiel, Yeremia, kɛ Yesaya bɔ nihi kɔkɔ ngɛ nɔ́ nɛ maa ba ma a nɔ ɔ he. Mwɔnɛ ɔ, Yehowa gu e sɔmɔli nɛ e pɔ mɛ nu ɔ a kpɛti nihi bɔɔ ko a nɔ kɛ ngɛ e we bi niye ní hae, nɛ a ngɛ mɛ kɔkɔ bɔe loko haomi ngua a nɛ je sisi. Ngɛ anɔkuale mi ɔ, Kristo tsɔli kpa amɛ tsuo hu ngɛ nihi kɔkɔ bɔe.​—Mat. 24:45-47.

2.    Ezekiel kadi we nihi a hɛ nya kɛ ha yi baami, nɛ jã kɛ̃ nɛ Mawu we bi nɛ a ngɛ mwɔnɛ ɔ hu kadi we nihi a hɛ nya kɛ ha yi baami. Nɔ́ kɛkɛ nɛ a tsuɔ ji kaa a fiɛɛɔ Yehowa sɛ gbi ɔ kɛ haa nihi ngɛ hiɔwe bɔfohi a blɔ tsɔɔmi sisi.​—Kpoj. 14:6.

3.  Ngɛ Ezekiel be ɔ mi ɔ, a pee we okadi nitsɛ ko ngɛ nihi a hɛ nya. Mwɔnɛ ɔ hu jã nɔuu nɛ e ji. Mɛni e he hia nɛ nihi nɛ a pee konɛ ngɛ blɔ ko nɔ ɔ, lɔ ɔ nɛ tsɔɔ kaa a pee okadi ngɛ a hɛ nya? E he hia nɛ a bu sɛ gbi ɔ nɛ a ngɛ fiɛɛe mwɔnɛ ɔ tue, a ná Kristofohi a suhi, a jɔɔ a he nɔ ha Yehowa, nɛ a kɛ anɔkuale yemi nɛ fĩ Kristo nyɛmimɛ ɔmɛ a se. (Mat. 25:35-40) Nihi nɛ a peeɔ ní nɛ ɔmɛ ɔ, a nine maa su yi baami okadi ɔ nɔ ngɛ haomi ngua a nɛ ma a mi.

4.  Mwɔnɛ ɔ, nyumu ɔ nɛ kpla womi ngmami nɔ́ ko ngɛ e kasa nya a daa si kɛ ha Yesu Kristo. Ngɛ haomi ngua a mi ɔ, e maa pee okadi ngɛ nimli asafo nɛ e maa na mɛ kaa a peeɔ a ní kaa jijɔhi ɔ a hɛ nya. Enɛ ɔ ma ha nɛ a ma ná neneene wami ngɛ zugba nɛ ɔ nɔ.​—Mat. 25:34, 46. *

5.  Mwɔnɛ ɔ, nyumuhi ekpa nɛ a hɛɛ awi yemi dadehi ngɛ a dɛ ɔ daa si kɛ ha Yesu hiɔwe tabo ɔ, nɛ Yesu ji a nyatsɛ. E be kɛe nɛ a ma kpata je mahi kɛ yayami peeli tsuo a hɛ mi.​—Eze. 9:2, 6, 7; Kpoj. 19:11-21.

Níhi nɛ wa kase ngɛ nina nɛ ɔ mi ɔ ha nɛ wa ná nɔ mi mami kaa Yehowa kpataa we dali a hɛ mi kɛ piɛɛ we yayami peeli a he. (2 Pet. 2:9; 3:9) Jehanɛ hu ɔ, wa ba na kaa fiɛɛmi ní tsumi ɔ he hia wawɛɛ ngɛ wa be nɛ ɔ mi. E he hia nɛ nɔ fɛɛ nɔ nɛ nu kɔkɔ bɔmi ɔ he loko nyagbe ɔ nɛ ba!​—Mat. 24:14.