Haykanush, nɛ e ngɛ Armenia, nɛ e ji fiɛɛlɔ nɛ a baptisii we lɛ ɔ na nɔ ko blɔ hiami womi ngɛ a we ɔ kasa nya. Sika kaadihi kɛ sika ngua ko ngɛ nɔ ɔ blɔ hiami womi ɔ mi. E bɔ e huno nɛ lɛ hu e ji fiɛɛlɔ nɛ a baptisii we lɛ lolo ɔ amaniɛ.

E kɛ e huno ɔ tsuo ngɛ ohia yee. A ye nihi hiɔ, se kɛ̃ ɔ, a mwɔ a yi mi kpɔ kaa a maa ngɔ adrɛs nɛ ngɛ blɔ hiami womi ɔ mi ɔ kɛ hla nɔtsɛ ɔ, konɛ a ngɔ sika a kɛ ha lɛ. Benɛ a na nɔtsɛ ɔ nɛ a ngɔ ní ɔmɛ kɛ ha lɛ ɔ, e kɛ e weku ɔ a nya kpɛ a he. Haykanush kɛ e huno ɔ de mɛ kaa níhi nɛ a ngɛ kasee ngɛ Baiblo ɔ mi ɔ lɛ ye bua mɛ nɛ a laa we ní ɔmɛ a nɔ ɔ nɛ. A susu kaa e sa nɛ a ye anɔkuale, nɛ a ngɔ he blɔ nɛ a ná a kɛ tsɔɔ mɛ nimli nɛ Yehowa Odasefohi ji, nɛ a ha mɛ asafo ɔ womi ɔmɛ ekomɛ.

Weku ɔ suɔ kaa a maa ke Haykanush sika ngɛ nɔ́ nɛ e pee ha mɛ ɔ he, se e ngɔɛ. E nɔ jena a, nɔtsɛ ɔ yo ɔ ya slaa Haykanush kɛ e huno ɔ, nɛ nɔtsɛ ɔ yo ɔ ngɔ diamond ga ko kɛ ba konɛ e kɛ ba na Haykanush si. E nyɛ Haykanush nɔ nɛ e ngɔ daimond ga a.

Kaa bɔ nɛ nyumu ɔ kɛ e weku ɔ a nya kpɛ a he ngɛ anɔkuale nɛ Haykanush kɛ e huno ɔ ye ɔ he ɔ, jã kɛ̃ nɛ nɔ́ nɛ Haykanush pee ɔ maa pee nihi fuu hu nyakpɛ. Se anɛ e maa pee Yehowa hu nyakpɛ lo? Kɛ anɔkuale nɛ a ye ɔ ma ha nɛ Yehowa maa nu he ha kɛɛ? Anɛ se nami ngɛ anɔkuale nɛ a ye ɔ he lo?

Sane bimi nɛ ɔmɛ a heto nami yi. Nɔ́ he je ji kaa Mawu sɔmɔli le kaa ke a je Yehowa suhi kpo ɔ, ngɛ Yehowa hɛ mi ɔ, a he jua wa kulaa pe daimond, sika tsu, aloo he lo nya ní kpahi. Niinɛ, e slo níhi nɛ Yehowa naa kaa a he jua wa aloo a he jua wɛ ɔ ngɛ níhi nɛ nihi fuu naa kaa a he jua wa aloo a he jua wɛ ɔ a he. (Yes. 55:8, 9) Nɛ ke Yehowa sɔmɔli kase suhi nɛ Yehowa ngɛ ɔ saminya a, a ma ná he se wawɛɛ.

Wa naa enɛ ɔ ngɛ nɔ́ nɛ Baiblo ɔ de ngɛ nile kɛ nɔ́ sisi numi he ɔ he. Abɛ 3:13-15 ɔ de ke: “Nɔmlɔ nɛ le ní, nɛ e nuɔ nɔ́ sisi ɔ, a gbaa lɛ saminya. Ejakaa e he ngɛ se nami pe sika tsu, kɛ sika hiɔ. Nile he ngɛ se nami kulaa pe june; nɔ́ ko be nɛ o suɔ saminya nɛ a kɛ maa to nile he.” Niinɛ, atsinyɛ jemi ko be he kaa Yehowa bua jɔ suhi kaa jã a he pe he lo nya níhi.

Nɛ anɔkuale yemi hu nɛɛ?

Yehowa nitsɛ yeɔ anɔkuale; e “yi lakpa.” (Tito 1:2) E gu bɔfo Paulo nɔ kɛ ngma munyu nɛ nyɛɛ se nɛ ɔ kɛ ha Kristofohi nɛ a ji Hebri bi nɛ a hi si ngɛ kaseli ɔmɛ a be ɔ mi ɔ: “Nyɛɛ sɔle ha wɔ daa. Wa le kaa wa he nile bui wɔ fɔ; ejakaa be tsuaa be ɔ, wa suɔ nɛ waa kɛ anɔkuale yemi nɛ ba wa je mi ngɛ nɔ́ tsuaa nɔ́ mi.”​—Heb. 13:18, NW.

Yesu Kristo pee nɔ hyɛmi nɔ́ kpakpa kɛ kɔɔ anɔkuale yemi he. Kaa nɔ hyɛmi nɔ́ ɔ, mo kai benɛ Osɔfo Nɔkɔtɔma Kayafa de Yesu ke: “I ngɛ mo kita kae ngɛ Mawu hɛ kalɔ ɔ biɛ mi kaa ke mo ji Kristo, Mawu Bi ɔ, de wɔ!” E ngɛ mi kaa anɔkuale nɛ Yesu maa tu ɔ ma nyɛ ma ha nɛ kojomi he ngua nɛ ji Sanhedrin ɔ maa po munyu kɛ fɔ e nɔ kaa e bɔ musu nɛ a maa gbe lɛ mohu lɛɛ, se e tu anɔkuale, nɛ e je e he si kaa lɛ ji Mesia a nɛ.​—Mat. 26:63-67.

Wɔ hu nɛɛ? Ke wa ya je si himi ko mi nɛ e ba kaa waa ye lakpa aloo waa laa nihi níhi a nɔ konɛ wa ná he lo nya níhi ɔ, anɛ wa maa ya nɔ maa ye anɔkuale lo?

Ngɛ anɔkuale mi ɔ, e be gbɔjɔɔ kaa wa maa ye anɔkuale ngɛ nyagbe ligbi nɛ ɔmɛ a  mi, ejakaa nihi fuu ‘foɔ mɛ nitsɛmɛ pɛ a nɔ́ mi, nɛ a pee a he sika suɔli.’ (2 Tim. 3:2) Ohia, aloo ní tsumi nɛ be ɔ ha nɛ e yeɔ ha nihi kaa a maa ye anɔkuale. Nihi fuu susu kaa tɔmi ko he kaa a maa ju, loo a maa sisi nihi, loo a kɛ a he maa wo ju kɛ fɔ ní peepeehi a mi. Nɔ́ nɛ ɔ he si wawɛɛ hluu kaa nihi fuu susu kaa tɔmi ko be he kaa nɔ ko maa ye lakpa konɛ e ná he lo nya níhi fuu. Ni komɛ nɛ a ji Kristofohi po pee we juɛmi nɛ da ngɛ nɔ́ nɛ ɔ blɔ fa mi, nɛ akɛnɛ a ‘hɛ tsuɔ ngɛ sika he’ he je ɔ, a be si dami kpakpa ngɛ asafo ɔ mi.​—1 Tim. 3:8; Tito 1:7.

Se Kristofohi babauu kaseɔ Yesu. A yɔse kaa su kpakpa he jua wa kulaa pe ní nami loo he lo nya nɔ́ ko nɛ a ma ná. Enɛ ɔ he ɔ, nihewi kɛ yihewi nɛ a ji Kristofohi nɛ a ngɛ sukuu yae ɔ jui ke a ngɛ ka ngmae. (Abɛ 20:23) Ngɛ anɔkuale mi ɔ, tsa pi be tsuaa be nɛ nihi maa ke wɔ nɔ́ ko kaa bɔ nɛ e ji ngɛ Haykanush blɔ fa mi ɔ. Se ke wa yeɔ anɔkuale ɔ, ngɛ Mawu hɛ mi ɔ, lɔ ɔ tsɔɔ kaa wa peeɔ nɔ́ nɛ da, nɛ lɔ ɔ haa nɛ wa náa he nile kpakpa. He nile kpakpa se be.

Gagik nɔ hyɛmi nɔ́ ɔ tsɔɔ jã. E de ke: “Loko ma ba pee Kristofo no ɔ, i tsuɔ ní ngɛ ní tsumi he ngua ko mi. Nitsumitsɛ ɔ sume nɛ e woɔ to, nɛ se nɛ e náa a, bɔɔ ko pɛ nɛ e kɛ peeɔ akɔtaa. Akɛnɛ imi nɛ i hyɛɔ ní tsumi ɔ nɔ he je ɔ, e haa nɛ i kɛ nɔ nɛ ba heɔ to ɔ ‘peeɔ kake,’ nɛ i woɔ nɔ ɔ kotoku mi nɔ́ ko, nɛ e maa e hɛ kɛ fɔɔ jamɛ a ju kɛ fɔ ní peepee ɔ nɔ. Enɛ ɔ he ɔ, nihi le mi kaa i yi anɔkuale. E ngɛ mi kaa a woɔ mi hiɔ saminya mohu lɛɛ, se benɛ i ba kase anɔkuale ɔ, i kpa jamɛ a ní tsumi ɔ. I bli imi nitsɛ ye ní tsumi. Nɛ kekleekle ligbi nɛ i je ní tsumi ɔ sisi ɔ, i ngɔ kɛ wo mlaa sisi, nɛ i wo tohi tsuo nɛ e sa kaa ma wo ɔ.”​—2 Kor. 8:21.

Gagik de ke: “Se nɛ i náa ngɛ ní tsumi ɔ mi ɔ nɔ ba gbɔ kulaa, enɛ ɔ he ɔ, nɔ́ nɛ i kɛ ye weku ɔ maa ye po pee dengme. Se kɛ̃ ɔ, i ngɛ bua jɔmi amlɔ nɛ ɔ. I ngɛ he nile kpakpa ngɛ Yehowa hɛ mi. Ye bi nyumuwi enyɔ ɔmɛ kase nɔ́ ko kɛ je nɔ́ nɛ i pee ɔ mi, nɛ ye he hu ba su kɛ ha he blɔhi ngɛ asafo ɔ mi. Nihi nɛ a hyɛɔ to womi nɔ, kɛ ni kpahi nɛ i kɛ mɛ tsuɔ ní ɔ le mi kaa i yeɔ anɔkuale, nɛ a jeɔ ye yi.”

Yehowa suɔ nihi nɛ a kɛ níhi nɛ e tsɔɔ mɛ ɔ tsuɔ ní, nɛ a jeɔ e su kpakpa amɛ kpo ɔ. Anɔkuale yemi piɛɛ su nɛ ɔmɛ a he. (Tito 2:10) Yehowa ha nɛ Matsɛ David ngma ke: ‘Kɛ je ye nihe be mi kɛ ba si ye wami si nɛ ɔ, i nɛ kaa Yehowa kua nɔ ko nɛ peeɔ nɔ́ nɛ da. E bimɛ hu, i nɛ kaa a ngɛ ní bae.’​—La 37:25.

Anɔkualetsɛ Rut nɔ hyɛmi nɔ́ ɔ ha nɛ wa na kaa munyu nɛ ɔ ji anɔkuale. E mɛtɛ Naomi nɛ ji e nganyɛ ɔ he gbagbanii, nɛ benɛ e bwɔ po ɔ, e si we lɛ. Rut hia kɛ ho Israel ya, konɛ e nyɛ nɛ e ja anɔkuale Mawu ɔ. (Rut 1:16, 17) Benɛ Rut ngɛ Israel ɔ, e tsɔɔ kaa e yeɔ anɔkuale nɛ e tsuɔ ní wawɛɛ. E ya kpɛteɔ niye ní ngɛ nihi a ngmɔhi a mi kaa bɔ nɛ Mlaa a ngmɛɔ blɔ kaa nihi nɛ a pee ɔ. Kaa bɔ nɛ Yehowa si we David ɔ, e si we Rut kɛ Naomi hulɔ. (Rut 2:2-18) Tsa pi he lo nya níhi pɛ nɛ Yehowa ha Rut, e pee níhi fuu ha lɛ. E ha nɛ Rut ba pee Matsɛ David kɛ Mesia a, a nanakasowa!​—Rut 4:13-17; Mat. 1:5, 16.

Eko ɔ, sika bɔɔ ko pɛ lɛ Yehowa sɔmɔli a kpɛti ni komɛ náa, enɛ ɔ he ɔ, e he waa ha mɛ kaa a nine maa su a hiami níhi a nɔ. A sume kaa a maa gu nɔ sisimi blɔ ko nɔ kɛ ná a he, mohu ɔ, a bɔɔ mɔde kaa a ma tsu ní wawɛɛ. Enɛ ɔ tsɔɔ kaa a naa Mawu su kpakpa amɛ nɛ anɔkuale yemi piɛɛ he ɔ kaa  a he jua wa pe he lo nya ní.​—Abɛ 12:24; Efe. 4:28.

Kristofohi nɛ a ngɛ je kɛ wɛ ɔ peeɔ a ní kaa Rut nɛ a wo e ta ngɛ Baiblo ɔ mi ɔ. A ngɛ hemi kɛ yemi kaa Yehowa ngɛ he wami nɛ e kɛ ma nyɛ maa ye bua mɛ. A ngɛ hɛ kɛ nɔ fɔmi nɛ mi wa ngɛ Yehowa mi. Yehowa wo si ngɛ e Munyu ɔ mi ke: “I be mo sie, nɛ i be mo kuae gblegbleegble.” (Heb. 13:5) Kɛ je blema a, Yehowa ha nɛ wa na kaa e ma nyɛ maa ye bua nihi nɛ a be nɔ́ ko se a yeɔ lɛ anɔkuale be tsuaa be ɔ. Yehowa yeɔ e si nɛ e wo e sɔmɔli kaa e ma ha mɛ a hiami ní ɔ nɔ.​—Mat. 6:33.

Niinɛ, eko ɔ, adesahi maa na daimond kɛ ní kpahi kaa a he jua wa. Se wa ma nyɛ ma ná nɔ mi mami kaa ke wa yeɔ anɔkuale, nɛ wa jeɔ su kpakpa kpahi kpo ɔ, wa hiɔwe Tsɛ ɔ bua maa jɔ wa he, nɛ e maa bu wɔ kaa wa he jua wa pe juetlihi nɛ nihi buɔ kaa a he jua wa!