‘Yehowa, Wa Mawu ɔ, Lɛ Nɔ Kake Too Pɛ Ji Yehowa’
‘Israel ma, nyɛ hɛ nɛ hi nɔ kaa Yehowa, wa Mawu ɔ, lɛ nɔ kake too pɛ ji Yehowa.’—5 MOSE 6:4.
1, 2. (a) Mɛni he je nɛ nihi le munyuhi nɛ ngɛ 5 Mose 6:4 ɔ wawɛɛ ɔ? (b) Mɛni he je nɛ Mose tu munyu nɛ ɔ?
YUDA BI ɔmɛ ti munyu nɛ ngɛ 5 Mose 6:4 ɔ mi ngɛ a sɔlemi mi jeha lafahi abɔ. Daa ligbi ɔ, a tiɔ mi mɔtu kɛ gbɔkuɛ. A tsɛɛ sɔlemi nɛ ɔ ke Shema. Shema ji kekleekle munyu nɛ ngɛ jamɛ a ngmami ɔ mi. Ngɛ sɔlemi nɛ ɔ mi ɔ, Yuda bi nɛ a kɛ Mawu jami fiɛ we ɔ tsɔɔ kaa a jaa Mawu pɛ.
2 Jamɛ a munyu ɔmɛ piɛɛ munyuhi nɛ Mose tu benɛ Israel bi ɔmɛ bua a he nya ngɛ Moab nga a nɔ nɛ e kɛ mɛ ngɛ sɛ yee ɔ he. Nɔ́ nɛ ɔ ya nɔ ngɛ jeha 1473 ɔ mi loko a fɔ Kristo. E piɛ bɔɔ nɛ Israel bi ɔmɛ maa po Yordan pa a konɛ a nine nɛ su Si Womi Zugba a nɔ. (5 Mose 6:1) Mose sɔmɔ kaa a hɛ mi nyɛɛlɔ jeha 40 sɔuu. E suɔ nɛ Israel bi ɔmɛ nɛ a kɛ kã nɛ da haomihi nɛ a kɛ maa kpe ngɛ a hɛ mi ɔ nya. E he hia nɛ a ná hɛ kɛ nɔ fɔmi ngɛ Yehowa a Mawu ɔ mi konɛ a ye lɛ anɔkuale. Atsinyɛ jemi ko be he kaa nyagbe munyuhi nɛ Mose tu Israel bi ɔmɛ ɔ wo mɛ he wami wawɛɛ. Benɛ Mose wo Kita Nyɔngma amɛ kɛ mlaa kpa amɛ nɛ Yehowa kɛ ha Israel bi ɔmɛ ɔ a nɔ ta se ɔ, Mose tu munyu nɛ he wami ngɛ mi nɛ a ngma ngɛ 5 Mose 6:4, 5 ɔ. (Kane.)
3. Mɛni sane bimihi a he wa ma susu ngɛ munyu nɛ ɔ mi?
3 Anɛ Israel bi nɛ a kɛ Mose bua a he nya ngɛ lejɛ ɔ li kaa Yehowa a Mawu ɔ, ‘lɛ nɔ kake too pɛ ji Yehowa’ lo? Ngɛ anɔkuale mi ɔ, a le. Israel bi anɔkualetsɛmɛ ɔmɛ le kaa Mawu kake pɛ nɛ ngɛ, nɛ a ja lɛ pɛ. Mawu nɛ ɔ ji a nɛnɛ Abraham, Isak, kɛ Yakob a Mawu ɔ nɛ. Ke jã a, lɛɛ mɛni he je nɛ Mose tsɛ a tue se kaa Yehowa a Mawu ɔ, ‘lɛ nɔ kake too pɛ ji Yehowa’ a? Anɛ enɛ ɔ kɛ suɔmi nɛ nɔ ko maa suɔ Yehowa kɛ e tsui tsuo, e klaa tsuo, kɛ e he wami tsuo kaa bɔ nɛ a tsɔɔ ngɛ kuku 5 ɔ mi ɔ ngɛ tsakpa ko lo? Mwɔnɛ ɔ, mɛni wa ma nyɛ maa kase ngɛ 5 Mose 6:4, 5 ɔ mi?
YEHOWA KAKE TOO PƐ LƐ NGƐ
4, 5. (a) Mɛni ji munyu nɛ ji, ‘lɛ nɔ kake too pɛ ji Yehowa’ a sisi numi kake? (b) Mɛni blɔ nɔ nɛ e slo Yehowa ngɛ je ma amɛ a mawu ɔmɛ a he ngɛ?
4 Mawu Ko Kɛ Lɛ Sɔɛ. Ngɛ Hebri gbi ɔ kɛ gbi kpahi a mi ɔ, munyungu nɛ ji “kake” ɔ, ma nyɛ maa hɛɛ sisi numi kpahi. E ma nyɛ maa tsɔɔ kaa nɔ ko kɛ lɛ sɔɛ. E ma nyɛ maa ba kaa pi hemi kɛ yemi nɛ nihi ngɛ ngɛ Triniti ɔ mi ɔ nɛ Mose ngɛ munyu tue kɛ ngɛ sie. Yehowa ji hiɔwe kɛ zugba Bɔlɔ. Lɛ ji je mluku ɔ Matsɛ. Yehowa se ɔ, anɔkuale Mawu kpa ko be. Mawu ko kɛ lɛ sɔɛ. (2 Sam. 7:22) Enɛ ɔ he ɔ, Mose ngɛ Israel bi ɔmɛ kaie kaa e sa nɛ a ja Yehowa pɛ. E sɛ nɛ a pee a ní kaa nihi nɛ bɔle mɛ ɔ nɛ mɛɛ a jaa mawu slɔɔtoslɔɔtohi ɔ. Jamɛ a ni ɔmɛ buɔ lakpa mawu nɛ ɔmɛ ekomɛ kaa mɛ lɛ a kudɔɔ ní komɛ ngɛ je ɔ mi.
5 Kaa nɔ hyɛmi nɔ́ ɔ, Egipt bi ɔmɛ jaa pu mawu Ra, bɔku yo mawu Nut, zugba mawu Geb, Nilo mawu Hapi, kɛ lohwehi fuu. Yehowa ngɔ Haomi Nyɔngma a kɛ pue lakpa mawu nɛ ɔmɛ a kpɛti fuu a hɛ mi si. Kanaan bi ɔmɛ a mawu nɛ nihi le wawɛɛ ji Baal. A buɔ lɛ kaa lɛ ji mawu nɛ haa nɛ nɔ fɔɔ, nɛ e ji bɔku, hiɔmi, kɛ kɔɔhiɔ mawu hulɔ. Ngɛ hehi fuu ɔ, nihi kɛ a hɛ fɔɔ Baal nɔ kɛ ha he piɛ pomi. (4 Mose 25:3) E sa nɛ Israel bi ɔmɛ nɛ a kai kaa a Mawu ɔ ji “anɔkuale Mawu,” nɛ ‘lɛ nɔ kake too pɛ ji Yehowa.’—5 Mose 4:35, 39.
6, 7. Mɛni ji munyungu “kake” ɔ sisi numi kpa ko, nɛ mɛni Yehowa pee kɛ tsɔɔ kaa lɛ nɔ “kake” too pɛ ji Yehowa?
6 E Tsakee We, E Yeɔ Anɔkuale. Munyungu nɛ ji “kake” ɔ hu tsɔɔ kaa Yehowa Mawu yi mi pee we lɛ enyɔɔnyɔ ngɛ níhi nɛ e to e yi mi kaa e maa pee ɔ he. Yehowa Mawu tsakee we, nɛ wa ma nyɛ maa ngɔ wa hɛ kɛ fɔ e nɔ. E yeɔ e munyu nɔ be fɛɛ be, e tsakee we e nya, nɛ e yeɔ anɔkuale. Yehowa wo Abraham si kaa e nina maa hi Si Womi Zugba a nɔ, nɛ e tsu nyakpɛ ní nguanguahi kɛ ha nɛ jamɛ a si womi ɔ ba mi. Benɛ Yehowa wo si nɛ ɔ, jeha 430 ba be mohu lɛɛ, se kɛ̃ ɔ, e ha nɛ e yi mi tomi ɔmɛ ba mi.—1 Mose 12:1, 2, 7; 2 Mose 12:40, 41.
7 Jeha lafa komɛ a se ɔ, Yehowa tu Israel bi ɔmɛ a he munyu kaa a ji e we odasehi. E de mɛ ke: “Imi pɛ ji Mawu. Ye se ɔ, mawu kpa ko hi si hyɛ, nɛ eko be bae gblegbleegble.” Benɛ Yehowa ngɛ tsɔɔe kaa e yi mi tomi tsakee we ɔ, e de hu ke: “Imi ji Mawu, nɛ i ngɛ daa.” (Yes. 43:10, 13; 44:6; 48:12) Yehowa ji Mawu nɛ e yeɔ anɔkuale nɛ waa kɛ wa hɛ ma nyɛ maa fɔ e nɔ be fɛɛ be. Israel bi ɔmɛ ná he blɔ ngua kɛ sɔmɔ Yehowa. Jã kɛ̃ nɛ e ji he blɔ ngua nitsɛ nɛ wɔ hu wa ná kaa wa ngɛ Yehowa sɔmɔe!—Mal. 3:6; Yak. 1:17.
8, 9. (a) Mɛni Yehowa ngɛ blɔ hyɛe kaa nihi nɛ a jaa lɛ ɔ nɛ a pee? (b) Mɛni blɔ nɔ Yesu ma munyu nɛ Mose tu ɔ nɔ mi ngɛ?
8 Niinɛ Mose kai Israel bi ɔmɛ kaa Yehowa ngɛ daa, nɛ suɔmi nɛ e ngɛ kɛ ha mɛ, kɛ bɔ nɛ e susuɔ a he ha a tsakee we. Ke jã a, lɛɛ sisi numi ngɛ he kaa a ma ja lɛ pɛ, nɛ a suɔ lɛ kɛ a tsui, a klaa, kɛ a he wami tsuo. E sa nɛ nihewi kɛ yihewi ɔmɛ hu nɛ a ja Yehowa pɛ, ejakaa e he hia nɛ a fɔli ɔmɛ nɛ a tsɔɔ mɛ ní be fɛɛ be.—9 Akɛnɛ Yehowa tsakee we, nɛ e yi mi tomi kɛ níhi nɛ e suɔ baa mi be fɛɛ be he je ɔ, e ngɛ heii kaa bɔ nɛ e suɔ kaa a ja lɛ blema a, jã kɛ nɛ e suɔ kaa a ja lɛ mwɔnɛ ɔ hulɔ. Jã wa ja lɛ pɛ, nɛ wa suɔ lɛ kɛ wa tsui, wa juɛmi, kɛ wa he wami tsuo loko e bua maa jɔ jami nɛ wa jaa lɛ ɔ he. Ngɛ anɔkuale mi ɔ, benɛ nɔ ko bi Yesu Kristo sane ɔ, jã pɛpɛɛpɛ nɛ Yesu Kristo de lɛ. (Kane Marko 12:28-31.) Enɛ ɔ he ɔ, nyɛ ha nɛ waa hyɛ bɔ nɛ waa kɛ wa ní peepee ma nyɛ maa tsɔɔ kaa wa nu sisi kaa ‘Yehowa wa Mawu ɔ, lɛ nɔ kake too pɛ ji Yehowa.’
MO JA YEHOWA PƐ
10, 11. (a) Ngɛ mɛni sisi numi nya nɛ wa jaa Yehowa pɛ ɔ? (b) Mɛni Hebri nihewi nɛ a hi Babilon ɔ pee kɛ tsɔɔ kaa a jaa Yehowa pɛ?
10 Loko Yehowa ma nyɛ maa pee wa Mawu ɔ, e sa nɛ wa ja lɛ pɛ. Wa be nyɛe ma ja Mawu kpa ko kɛ piɛɛ e he, nɛ jã kɛ̃ nɛ wa be nyɛe maa ngɔ tsɔɔmi aloo ní peepee kpa ko kɛ futu jami nɛ wa jaa lɛ ɔ. E sɛ nɛ wa susu kaa Yehowa ji mawu ko kɛkɛ, aloo e nɔ kuɔ pe mawu kpahi tsuo kɛkɛ. Yehowa pɛ ji nɔ nɛ e sa kaa nihi nɛ ja.—Kane Kpojemi 4:11.
11 A tu Hebri nihewi nɛ ji Daniel, Hanania, Mishael, kɛ Azaria a he munyu ngɛ Daniel womi ɔ mi. Tsa pi niye ní nɛ he tsɔ we nɛ a yi ɔ pɛ nɛ a kɛ tsɔɔ kaa a jaa Yehowa pɛ, se a kpla we si kɛ ha Nebukadnezar sika tsu amaga a hulɔ. Oti nɛ a kɛ ma a hɛ mi ji kaa a be mawu kpa ko jae kɛ piɛɛ Mawu nɛ a jaa a he.—Dan. 1:1–3:30.
12. Loko wa ma nyɛ ma ja Yehowa pɛ ɔ, e sa kaa waa hyɛ wa he nɛ hi ngɛ mɛni he?
12 Loko wa ma nyɛ ma ja Yehowa pɛ ɔ, e sa nɛ waa hyɛ nɛ hi konɛ wa ko ngɔ nɔ́ kpa ko kɛ pee nɔ́ titli ngɛ wa si himi mi. Mɛni ji ní komɛ nɛ ke wa hyɛ we nɛ hi ɔ, waa kɛ ma nyɛ maa pee nɔ́ titli ngɛ wa si himi mi? Ngɛ Kita Nyɔngma amɛ a mi ɔ, Yehowa ha nɛ e mi tɛ̃ ha e we bi ɔmɛ kaa e sɛ nɛ a ja mawu kpa ko ngɛ e se. (5 Mose 5:6-10) Mwɔnɛ ɔ, wa ngɛ wɔ jami mimi slɔɔtoslɔɔtohi. Ekomɛ a yɔsemi yee. Se níhi nɛ Yehowa ngɛ hlae ngɛ e sɔmɔli a dɛ ɔ tsakee we. Loloolo ɔ, ‘lɛ nɔ kake too pɛ ji Yehowa.’ Nyɛ ha nɛ wa susu nɔ́ nɛ wa ma nyɛ maa kase ngɛ munyu nɛ ɔ mi ɔ he nɛ waa hyɛ.
13. Mɛni ji ní komɛ nɛ wa ma nyɛ ma ná suɔmi kɛ ha mɛ pe Yehowa?
13 Ngɛ Kolose Bi 3:5 (kane), a kɛ kɔkɔ bɔmi nɛ hɛdɔ ngɛ he ha Kristofohi kɛ kɔɔ níhi nɛ ma nyɛ ma ha nɛ a ma ja mawu kpahi kɛ piɛɛ Yehowa he ɔ a he. Mo yɔse kaa ngmami ɔ tsɔɔ kaa hɛ tsumi ngɛ kaa amaga jami. Nɔ́ he je ji kaa ke nɔ ko suɔ wawɛɛ kaa e ná sika, aloo e nine nɛ su níhi nɛ a he jua wa, aloo nɔ́ kpa ko nɔ ɔ, nɔ ɔ tsui hii jamɛ a nɔ́ ɔ mi hluu po kaa jamɛ a nɔ́ ɔ ba peeɔ kaa Mawu ko kɛ haa lɛ. Se ke wa susu ngmami nɛ ɔ nɛ wa kane ɔ tsuo he ɔ, e be yee ha wɔ kaa wa maa na kaa ní peepee yayahi tsuo nɛ ngmami ɔ wo nɔ ta a kɛ hɛ tsumi ngɛ tsakpa, enɛ ɔ he ɔ, a ji wɔ jami. Ke wa suɔ wawɛɛ kaa wa ma ná níhi kaa jã a, wa ma ná suɔmi kɛ ha jamɛ a ní ɔmɛ pe Mawu. Anɛ e sa nɛ waa ngmɛ blɔ konɛ ní nɛ ɔmɛ eko nɛ ná wa nɔ he wami hluu kaa wa be Yehowa nae kaa ‘lɛ nɔ kake too pɛ ji Yehowa’ lo? Ohoo, e sɛ nɛ waa pee jã.
14. Mɛni kɔkɔ bɔmi nɛ bɔfo Yohane kɛ ha wɔ?
14 Bɔfo Yohane kɛ kɔkɔ bɔmi nɛ ɔ nɔuu ha. E tsɔɔ kaa níhi nɛ ngɛ je ɔ mi ɔ ji “níhi nɛ he lo ɔ dii se, níhi nɛ hɛngmɛ dii se, kɛ níhi nɛ nihi fĩaa kɛ fɔɔ nɔ ɔ.” E tsɔɔ hu kaa ke nɔ ko suɔ ní nɛ ɔmɛ ɔ, “lɛɛ e sume Tsɛ ɔ.” (1 Yoh. 2:15, 16) Enɛ ɔ tsɔɔ kaa e he hia nɛ waa hyɛ wa tsui mi be fɛɛ be, konɛ waa hyɛ ke ji wa suɔ je ɔ loo wa sume je ɔ. Eko ɔ, wa ma yɔse kaa wa bua bɔni je ɔ hɛja jemi he jɔmi, aloo wa bua jɔ je ɔ tade womi kɛ he dlami he, aloo wa suɔ kaa waa kɛ je ɔ nɛ bɔ huɛ. Aloo eko ɔ, wa suɔ kaa waa ya sukuu kɛ ya tsitsaa konɛ waa pee “ní nguanguahi.” (Yer. 45:4, 5) E be kɛe kulaa nɛ je ehe nɛ Mawu wo he si ɔ maa ba. Enɛ ɔ he ɔ, e he hia wawɛɛ kaa wa ma ha nɛ munyu nɛ he wami ngɛ mi nɛ Mose tu ɔ nɛ hi wa juɛmi mi! Ke wa he ye wawɛɛ kaa ‘Yehowa wa Mawu ɔ, lɛ nɔ kake too pɛ ji Yehowa’ a, wa maa bɔ mɔde wawɛɛ nɛ wa ma ja lɛ pɛ kaa bɔ nɛ e suɔ kaa waa pee ɔ.—Heb. 12:28, 29.
YAA NƆ NƐ O HA KAKE PEEMI NƐ HI ASAFO Ɔ MI
15. Mɛni he je Paulo kai Kristofohi kaa Mawu ɔ, ‘lɛ nɔ kake too pɛ ji Yehowa’ a?
15 Munyu nɛ ji ‘lɛ nɔ kake too pɛ ji Yehowa’ a yeɔ bua wɔ nɛ wa nuɔ sisi kaa Yehowa suɔ kaa kake peemi nɛ hi e sɔmɔli a kpɛti, konɛ mɛ tsuo a hɛɛ yi mi tomi kake. Yuda bi, Hela bi, Roma bi kɛ nihi nɛ a je ma kpahi a nɔ ji nihi nɛ a hi Kristofohi asafo nɛ hi si ngɛ kaseli ɔmɛ a be ɔ mi ɔ mi. E slo jami nɛ a ti nɔ tsuaa nɔ hi mi, bɔ nɛ a tsɔse a ti nɔ fɛɛ nɔ ha, kɛ bɔ nɛ a ti nɔ fɛɛ nɔ peeɔ e ní ha, kɛ níhi nɛ a suɔ kɛ níhi nɛ a sume. Enɛ ɔ he ɔ, e he wa ha a ti ni komɛ kaa a maa kplɛɛ blɔ ehe nɛ a guɔ nɔ kɛ jaa Mawu ɔ nɔ, nɛ e he wa ha ni komɛ hu kaa a ma kpa níhi nɛ a peeɔ 1 Korinto Bi 8:5, 6.
sa a. Bɔfo Paulo na kaa e sa nɛ e kai mɛ kaa Kristofohi ngɛ Mawu kake pɛ, nɛ lɛ ji Yehowa.—Kane16, 17. (a) Mɛni gbami nɛ ngɛ mi bae ngɛ wa be nɛ ɔ mi, nɛ mɛni je mi kɛ ba? (b) Mɛni ma nyɛ ma puɛ kake peemi nɛ ngɛ Mawu we bi a kpɛti ɔ?
16 Nɛ si fɔfɔɛ nɛ ngɛ Kristofohi asafo ɔ mi mwɔnɛ ɔ hu nɛɛ? Gbalɔ Yesaya gba kɛ fɔ si kaa “hwɔɔ se ko,” aloo ngɛ nyagbe ligbi ɔmɛ a mi ɔ, nihi maa je je ma amɛ tsuo a mi nɛ a maa pee kake kɛ ja Yehowa. A ma de ke: ‘Yehowa maa tsɔɔ wɔ nɔ́ nɛ e suɔ kaa waa pee; nɛ wa maa pee bɔ nɛ e maa tsɔɔ wɔ ɔ pɛpɛɛpɛ.’ (Yes. 2:2, 3) Wa bua jɔ kaa wa na kaa gbami nɛ ɔ ngɛ mi bae mwɔnɛ ɔ! Enɛ ɔ ha nɛ ngɛ asafohi fuu a mi ɔ, nihi nɛ a je ma slɔɔtohi, nɛ e slo a kusumi, nɛ a tuɔ gbi slɔɔtohi peeɔ kake kɛ jeɔ Yehowa yi. Se be komɛ ngɛ nɛ enɛ ɔ ma nyɛ maa ngɔ nyagbahi kɛ ba.
Anɛ o ha nɛ kake peemi ngɛ Kristofohi asafo ɔ mi lo? (Hyɛ kuku 16-19)
17 Kaa nɔ hyɛmi nɔ́ ɔ, kɛ o buɔ o nyɛmimɛ Kristofohi nɛ a je ma kpahi a nɔ ɔ ha kɛɛ? Eko ɔ, o bua jɔɛ a je gbi, a tade womi kɛ a he dlami, a ní peepee, kɛ ní nɛ a yeɔ ɔ he. Anɛ o yuɔ o he ngɛ a he, nɛ o kɛ nihi nɛ o kɛ mɛ je ma kake mi ɔ pɛ lɛ bɔɔ lo? Aloo kɛ o buu nihi nɛ a hla mɛ kaa nɔ hyɛli ngɛ nyɛ we asafo ɔ mi, kpɔ ɔ mi, aloo asafo ɔ ní tsumi kɔni ɔ nɛ o wa pe mɛ, aloo a je ma kpahi a nɔ ɔ ha kɛɛ? Anɛ o haa nɛ níhi kaa jã a puɛɔ kake peemi nɛ ngɛ Yehowa we bi a kpɛti ɔ lo?
18, 19. (a) Mɛni ga womi a kɛ ha wɔ ngɛ Efeso Bi 4:1-3 ɔ? (b) Mɛni wa ma nyɛ maa pee konɛ kake peemi nɛ hi asafo ɔ mi daa?
18 Mɛni maa ye bua wɔ konɛ wa ko pee wa ní jã? Efeso ma a ji sika ma, nɛ nimli slɔɔtoslɔɔtohi ngɛ mi. Enɛ ɔ he ɔ, Paulo kɛ ga womi kpakpa ha Kristofohi nɛ a hi lejɛ ɔ. (Kane Efeso Bi 4:1-3.) Mo yɔse kaa kekleekle ɔ, Paulo wo su komɛ kaa he si bami, humi peemi, tsui si tomi, kɛ suɔmi ta. Wa ma nyɛ maa ngɔ su nɛ ɔmɛ kɛ to titimahi nɛ hɛɛ tsu ko ɔ a he. Se ke a kɛ titimahi ma tsu ko po ɔ, loloolo ɔ, e he hia nɛ a ya nɔ nɛ a dla tsu ɔ, ke pi jã a, tsu ɔ maa hule. Paulo de Kristofohi nɛ a hi Efeso ɔ kaa a bɔ mɔde wawɛɛ nɛ a ya nɔ nɛ a “pee kake kɛ hi si.”
19 E sa nɛ wa ti nɔ fɛɛ nɔ, nɛ bɔ mɔde kaa e ma ha nɛ kake peemi nɛ hi asafo ɔ mi daa. Mɛni wa ma nyɛ maa pee? Kekleekle ɔ, e sa nɛ waa bɔ mɔde nɛ wa ná suhi kaa he si bami, humi peemi, tsui si tomi, kɛ suɔmi nɛ Paulo wo ta a. Lɔ ɔ se ɔ, e sa nɛ waa bɔ mɔde nɛ wa ha nɛ ‘he jɔmi nɛ haa nɛ wa peeɔ kake ɔ,’ nɛ hi wa kpɛti. E sa nɛ waa bɔ mɔde nɛ wa dla níhi nɛ ma nyɛ ma puɛ tue mi jɔmi nɛ ngɛ wa kpɛti ɔ. Ke wa peeɔ jã a, lɔ ɔ ma ha nɛ tue mi jɔmi kɛ kake peemi maa ya nɔ maa hi wa kpɛti daa.
20. Mɛni wa maa pee kɛ tsɔɔ kaa wa nu sisi kaa ‘Yehowa wa Mawu ɔ, lɛ nɔ kake too pɛ ji Yehowa’ a?
20 ‘Yehowa wa Mawu ɔ, lɛ nɔ kake too pɛ ji Yehowa.’ He wami ngɛ munyu nɛ ɔ mi wawɛɛ nitsɛ! Munyu nɛ ɔ wo Israel bi ɔmɛ he wami nɛ a nyɛ da haomihi nɛ a kɛ kpe benɛ a su Si Womi Zugba a nɔ ɔ nya. Ke wɔ hu wa bu munyu nɛ ɔ tue ɔ, e maa wo wɔ he wami nɛ wa ma nyɛ maa da níhi nɛ waa kɛ maa kpe ngɛ haomi ngua a mi ɔ a nya, nɛ wa nine maa su Paradeiso ɔ nɔ. Nyɛ ha nɛ waa ya nɔ nɛ wa ja Yehowa pɛ, nɛ waa suɔ lɛ nɛ wa sɔmɔ lɛ kɛ wa tsui kɛ wa klaa tsuo, nɛ waa bɔ mɔde wawɛɛ nɛ wa ha nɛ kake peemi nɛ hi waa kɛ wa nyɛmimɛ Kristofohi wa kpɛti. Ke wa yaa nɔ nɛ wa peeɔ jã a, waa kɛ nɔ mi mami ma nyɛ maa hyɛ blɔ kaa nɔ́ nɛ Yesu ma de nihi nɛ e maa bu mɛ kaa jijɔhi ɔ maa ba mi. E ma de mɛ ke: “Nyɛ nihi nɛ Tsaatsɛ gbaa nyɛ, nyɛɛ ba! Matsɛ yemi ɔ nɛ a dla ngɔ to nyɛ kɛ je be nɛ a to je ɔ sisi ɔ, nyɛ ba ngɔ.”—Mat. 25:34.