Anɛ o kane munyuhi nɛ a ngɛ jeha nɛ ɔ Hwɔɔmi Mɔ ɔ mi ɔ saminya lo? Ke jã a, lɛɛ hyɛ kaa o ma nyɛ ma ha sane bimi nɛ ɔmɛ a heto lo:

Mɛni nɛ wa ‘juɛmi nɛ wa maa hi tsakee ɔ tsɔɔ’? (Rom. 12:2)

E biɔ babauu pe ní kpakpahi pɛ nɛ wa maa pee ngɛ wa si himi mi. E sa nɛ waa kpa wa mi nɛ waa le nɔ tutuutu nɛ wa ji ngɛ wa tsui mi, nɛ waa pee tsakemihi konɛ waa ba wa je mi ngɛ Mawu mlaahi a nya.—w23.01, bf. 8-9.

Mɛni wa ma nyɛ maa pee kɛ tsɔɔ kaa wa hɛ ka si be mi nɛ wa ngɛ níhi nɛ ngɛ nɔ yae ngɛ je ɔ mi ɔ hyɛe ɔ?

Wa suɔ nɛ waa le bɔ nɛ níhi nɛ ngɛ nɔ yae ngɛ je ɔ mi ɔ ha nɛ Baiblo gbami ngɛ mi bae ha. Se kɛ̃ ɔ, wa sume nɛ wa de nɔ́ ko nɛ maa ngɔ mi gbami kɛ ba asafo ɔ mi. Mohu ɔ, e sa nɛ waa le nɔ́ nɛ womihi loo videohi nɛ a pee lingmi nɛ ɔ tsɔɔ kɛ kɔ sanehi kaa jã a he, nɛ waa kɛ ni kpahi nɛ susu he. (1 Kor. 1:10)—w23.02, bf. 16.

Mɛni blɔ nɔ nɛ Yesu baptisimi ɔ ngɛ slɔɔto ngɛ e se nyɛɛli ɔmɛ a nɔ́ ɔ he?

A fɔ Yesu ngɛ ma nɛ Mawu hla kɛ ha e he ɔ mi. Enɛ ɔ he ɔ, e he hia we nɛ e jɔɔ e he nɔ kɛ ha Yehowa kaa bɔ nɛ wa peeɔ amlɔ nɛ ɔ. Jehanɛ hu ɔ, Yesu ye mluku nɛ yayami ko be e he, enɛ ɔ he ɔ, e he hia we nɛ e pia e he ngɛ yayami ko he.—w23.03, bf. 5.

Mɛni wa ma nyɛ maa pee kɛ wo ni kpahi he wami konɛ a ha sane heto ngɛ asafo mi kpehi a sisi?

E sa nɛ wa ha nɛ wa heto ɔmɛ nɛ pee kpiti bɔ nɛ pee nɛ ni kpahi nɛ a ná he blɔ kɛ tu munyu. Koo bɔ mɔde kaa o maa tu otihi fuu a he munyu, konɛ ni kpahi hu nɛ a tu munyu.—w23.04, bf. 23.

Mɛni nɛ “Blɔ klɔuklɔu” ɔ nɛ a tu he munyu ngɛ Yesaya 35:8 ɔ tsɔɔ?

Kekleekle ɔ, okadi peemi blɔ nɛ ɔ daa si ha blɔ nɛ Yuda bi ɔmɛ gu nɔ kɛ je Babilon kɛ ba a ma a mi ɔ. Nɛ wa be nɛ ɔ mi hu nɛɛ? Ngɛ jehahi babauu nɛ be loko jeha 1919 ɔ su ɔ, a tsu blɔ nɛ ɔ he ní. Ní tsumi nɛ ɔmɛ ekomɛ ji Baiblo ɔ nɛ a tsɔɔ sisi nɛ a print. Mawu we bi ngɛ nyɛɛe ngɛ “Blɔ klɔuklɔu” ɔ nɔ ngɛ mumi mi Paradeiso ɔ mi ɔ, nɛ e ma ha nɛ a ná jɔɔmihi ngɛ Matsɛ yemi ɔ mi.—w23.05, bf. 15-19.

Mɛni ga womi nɛ Abɛ yi 9 ɔ kɛ ha ngɛ okadi peemi yihi enyɔ komɛ a he?

Abɛ womi ɔ tu “yo kuasia” ko he munyu. E tsɔɔ kaa nihi nɛ a kplɛɛɔ e nine fɔmi nɔ ɔ, a wuhi a he je momo “ngɛ gbeje.” ‘Nile nitsɛnitsɛ’ nɛ e daa si kɛ ha yo ní lelɔ ɔ nine fɔmi ɔ haa nɛ nɔ ‘hlaa nile se blɔ’ ngɛ e si himi mi. (Abɛ 9:​1, 6, 13, 18)—w23.06, bf. 22-24.

Mɛni blɔ nɔ nɛ bɔ nɛ Mawu tsu Lot sane ɔ he ní ha a tsɔɔ kaa Mawu baa e he si, nɛ e nuɔ nɔ́ sisi nɛ e pee we kpɛii?

Yehowa fã Lot kaa e tu fo kɛ je Sodom kɛ ho yoku ɔmɛ a nɔ ya. Se Lot kpa Yehowa pɛɛ kaa e ha nɛ e kɛ e weku ɔ nɛ ya sa we ngɛ Zoar, nɛ Yehowa ngmɛ lɛ blɔ.—w23.07, bf. 21.

Mɛni yogbayo ko ma nyɛ maa pee ke e huno hyɛɛ bɔmi nami he foni loo video?

E sɛ nɛ e pia e he kaa lɛ nɛ e ha nɛ e ba jã. E sa nɛ e ngɔ e juɛmi kɛ ma huɛ bɔmi kpakpa nɛ ngɛ e kɛ Mawu a kpɛti ɔ nɔ, nɛ e pue e yi mi tɛ ngɛ Baiblo mi sanehi nɛ kɔɔ yihi nɛ a hao se a ná bua womi ɔ he. E ma nyɛ maa je he si bami mi nɛ e ye bua e huno ɔ konɛ e yu e he ngɛ si fɔfɔɛhi nɛ ma nyɛ maa pee oslaa kɛ ha lɛ ɔ he.—w23.08, bf. 14-17.

Ke nɔ ko bi wɔ sane ngɛ nɔ́ nɛ wa heɔ yeɔ ɔ he ɔ, mɛni blɔ nɔ nɛ hɛ si kami maa ye bua wɔ nɛ wa he nɛ jɔ?

E sa nɛ waa na sane bimi ɔ kaa nɔ́ ko nɛ maa ye bua wɔ konɛ waa le nɔ́ nɛ he hia lɛ loo bɔ nɛ e susuɔ níhi a he ha. Ke wa pee jã a, lɔ ɔ maa ye bua wɔ nɛ waa je mi mi jɔmi mi kɛ ha lɛ heto.—w23.09, bf. 17.

Mɛni wa ma nyɛ maa kase ngɛ Maria nɔ hyɛmi nɔ́ ɔ mi ngɛ bɔ nɛ wa náa he wami womi ha a he?

Benɛ Maria ná le kaa lɛ nɛ e ma fɔ Mesia a, ni kpahi wo lɛ he wami. Bɔfo Gabriel kɛ Elizabet da Ngmami ɔ nɔ kɛ wo lɛ he wami wawɛɛ. Jã nɔuu nɛ wɔ hu wa nyɛmimɛ Kristofohi ma nyɛ maa wo wɔ he wami wawɛɛ.—w23.10, bf. 15.

Mɛni blɔ nɔ nɛ eko ɔ, Yehowa maa gu kɛ ha wa sɔlemihi a heto?

Yehowa wo wɔ si kaa e maa bu wa sɔlemihi tue, nɛ e maa hyɛ ke ji wa sɔlemi ɔmɛ kɛ e yi mi tomi kɔ. (Yer. 29:12) Ke wa sɔle ngɛ nɔ́ ko he nɛ nɔ kpa ko hu sɔle ngɛ jamɛ a nɔ́ ɔ nɔuu he ɔ, Yehowa ma nyɛ maa gu blɔ ekpaekpahi a nɔ kɛ ha nɔ fɛɛ nɔ heto, nɛ e maa ye bua wɔ be fɛɛ be.—w23.11, bf. 21-22.

Roma Bi 5:2 ɔ tu “hɛ kɛ nɔ fɔmi” he munyu, se mɛni he je nɛ a tu he munyu ekohu ngɛ kuku 4 ɔ?

Ke wa fiɛɛ sane kpakpa a kɛ ha nihi ɔ, e ma nyɛ ma ha nɛ a ná hɛ kɛ nɔ fɔmi kaa a maa hi si kɛ ya neneene ngɛ paradeiso zugba a nɔ. E ngɛ mi kaa a kɛ haomihi ma nyɛ maa kpe mohu lɛɛ, se ke a fĩ si ɔ, Mawu maa kplɛɛ a nɔ, nɛ hɛ kɛ nɔ fɔmi nɛ a ngɛ ɔ mi maa wa wawɛɛ, nɛ e maa pee nɔ́ nitsɛ kɛ ha mɛ.—w23.12, bf. 12-13.