1. Ke wa susu Abraham hemi kɛ yemi ɔ he ɔ, mɛni sane nɛ wa ma nyɛ ma bi wa he?

 E NGƐ mi kaa nihi babauu nu Abraham he sane hyɛ mohu lɛɛ, se a li níhi fuu ngɛ e he. Se moo lɛɛ o le níhi fuu ngɛ Abraham he. Kaa nɔ hyɛmi nɔ́ ɔ, o le kaa a tsɛ Abraham ke “tsɛ kɛ ha nihi tsuo nɛ a ngɛ hemi kɛ yemi” ɔ. (Rom. 4:11) Eko ɔ, o ma bi o he ke, ‘Anɛ imi hu ma nyɛ ma pee ye ní kaa Abraham nɛ ma ná hemi kɛ yemi nɛ mi wa ngɛ Yehowa mi lo?’ Ee, o ma nyɛ.

2. Mɛni he je nɛ e he hia nɛ waa kase Abraham nɔ hyɛmi nɔ́ ɔ he ní ɔ? (Yakobo 2:​22, 23)

² Blɔ kake nɛ wa maa gu nɔ kɛ ná hemi kɛ yemi kaa Abraham ji kaa wa maa kase e nɔ hyɛmi nɔ́ ɔ he ní. Abraham pee nɔ́ fɛɛ nɔ́ nɛ Yehowa de lɛ kaa e pee ɔ. E hia kɛ je e ma a mi kɛ ho he tsitsaa ya nɛ e ya hi bo tsu mi jehahi babauu. Jehanɛ hu ɔ, e pee klaalo po kaa e maa ngɔ e bi Isak nɛ e suɔ lɛ ɔ kɛ sã afɔle ha Mawu. Abraham pee ní nɛ ɔmɛ tsuo ejakaa e ngɛ hemi kɛ yemi nɛ mi wa ngɛ Yehowa mi. Akɛnɛ Abraham ngɔ e ní peepee kɛ tsɔɔ kaa e ngɛ hemi kɛ yemi ngɛ Yehowa mi he je ɔ, huɛ bɔmi kpakpa ba hi e kɛ Yehowa a kpɛti nɛ Yehowa bua jɔ e he hulɔ. (Kane Yakobo 2:​22, 23.) Yehowa suɔ nɛ wɔ tsuo waa pee e suɔmi nya ní konɛ huɛ bɔmi kpakpa nɛ hi waa kɛ lɛ wa kpɛti. Enɛ ɔ he je nɛ e ha nɛ Paulo kɛ Yakobo ngma Abraham nɔ hyɛmi nɔ́ ɔ kɛ wo Baiblo ɔ mi ɔ nɛ. Nyɛ ha nɛ wa susu  nɔ́ nɛ Roma Bi yi 4 kɛ Yakobo yi 2 ɔ de ngɛ Abraham he ɔ he. Paulo kɛ Yakobo tsuo de nɔ́ ko nɛ sa kadimi wawɛɛ ngɛ Abraham he.

3. Mɛni ngmami nɛ Yakobo kɛ Paulo tsɛ se ngɛ a munyu ɔ mi?

³ Paulo kɛ Yakobo tsuo tsɛ ngmami nɛ ngɛ 1 Mose 15:6 se. Lejɛ ɔ de ke: “[Abraham] ná hemi kɛ yemi ngɛ Yehowa mi, nɛ e bu lɔ ɔ dami kɛ ha lɛ.” Mawu naa nɔ ko kaa e ji dalɔ ke ji kaa nɔ ɔ peeɔ e suɔmi nya ní loo piami ko be jamɛ a nɔ ɔ he. Enɛ ɔ he ɔ, e ngɛ bua jɔmi wawɛɛ kaa Mawu ma nyɛ ma tsɛ adesahi nɛ a yi mluku ɔ kaa dali loo nihi nɛ piami ko be a he! E ngɛ heii kaa o suɔ nɛ Yehowa nɛ na mo kaa o ji dalɔ, nɛ e ma nyɛ maa ba jã hulɔ. Amlɔ nɛ ɔ, wa maa kase nɔ́ he je nɛ Yehowa tsɛ Abraham ke dalɔ, kɛ nɔ́ nɛ wa ma nyɛ maa pee konɛ Yehowa nɛ na wɔ kaa dali.

4. Mɛni lɛ ha nɛ adesahi nyɛ we nɛ a pee dali ɔ?

⁴ Ngɛ sɛ womi nɛ Paulo ngma kɛ ya ha Roma bi ɔmɛ ɔ mi ɔ, e tsɔɔ kaa adesahi tsuo ji yayami peeli. (Rom. 3:23) Enɛ ɔ he ɔ, mɛni blɔ nɔ wa maa gu kɛ sa Yehowa hɛ mi konɛ e na wɔ kaa dali? Bɔ nɛ pee nɛ anɔkuale Kristofohi tsuo nɛ a na heto ɔ, Paulo ngɔ Abraham nɔ hyɛmi nɔ́ ɔ kɛ tsu ní.

5. Mɛni nɔ nɛ Yehowa da kɛ bu Abraham dalɔ? (Roma Bi 4:​2-4)

⁵ Yehowa tsɛ Abraham ke dalɔ be mi nɛ e ngɛ Kanaan zugba a nɔ ɔ. Mɛni ha nɛ Yehowa tsɛ Abraham ke dalɔ ɔ? Pi Mose Mlaa a nɔ nɛ Abraham ye ɔ he je nɛ Yehowa tsɛ lɛ dalɔ. Mɛni he je nɛ wa de jã? (Rom. 4:13) Benɛ Yehowa tsɛ Abraham ke dalɔ ɔ, jamɛ a be ɔ, Mose Mlaa a be. Jeha 400 be loko Yehowa ngɔ Mose Mlaa a kɛ ha Israel bi ɔmɛ. Ke jã a, lɛɛ mɛni nɔ nɛ Yehowa da kɛ bu Abraham dalɔ ɔ? Yehowa dloo Abraham nɛ e bu lɛ dalɔ ngɛ e hemi kɛ yemi ɔ he je.—Kane Roma Bi 4:​2-4.

6. Mɛni he je nɛ Yehowa ma nyɛ maa bu yayami peelɔ ko kaa dalɔ ɔ?

⁶ Jehanɛ hu ɔ, Paulo tsɔɔ kaa ke nɔ ko ná hemi kɛ yemi ngɛ Mawu mi ɔ, “a buɔ e hemi kɛ yemi ɔ kaa dami.” (Rom. 4:5) Paulo de hu ke: ‘Kaa bɔ nɛ David hu tu bua jɔmi nɛ adesa nɛ Mawu buɔ lɛ dalɔ náa a he munyu, se pi ngɛ ní tsumihi a he ɔ: “Nihi nɛ a ngɔ a mlaa nɔ tɔmi ní peepeehi kɛ pa mɛ nɛ́ a ha a yayamihi a nɔ ha mɛ ɔ ngɛ bua jɔmi; adesa nɛ Yehowa be e yayami he akɔtaa bue ɔ ngɛ bua jɔmi.”’ (Rom. 4:​6-8; La 32:​1, 2) Mawu ngɔɔ nihi nɛ a náa hemi kɛ yemi ngɛ e mi ɔ a tɔmi kɛ keɔ mɛ. Akɛnɛ Yehowa ngɔɔ a tɔmi ɔ kɛ keɔ mɛ kulaa he je ɔ, e be a tue gblae ngɛ he hu. E naa nimli nɛ ɔmɛ kaa nihi nɛ piami ko be a he nɛ a ji dali ngɛ a hemi kɛ yemi ɔ he je.

7. Mɛni he je nɛ wa ma nyɛ ma de ke Mawu sɔmɔli nɛ a hi si blema a ji dali ɔ?

⁷ E ngɛ mi kaa a bu Abraham, David, kɛ Mawu sɔmɔli anɔkualetsɛmɛ kpahi kaa a ji dali mohu lɛɛ, se loloolo ɔ, a ji nihi nɛ a yi mluku. Se ngɛ a hemi kɛ yemi ɔ he je ɔ, Yehowa bu mɛ kaa nihi nɛ piami ko be a he, titli ke a kɛ mɛ to nihi nɛ a sɔmɔ we lɛ ɔ a he. (Efe. 2:12) Ngɛ sɛ womi nɛ Paulo ngma a mi ɔ, e ha nɛ e pee heii kaa hemi kɛ yemi ji nɔ́ titli nɛ haa nɛ huɛ bɔmi kpakpa hiɔ nɔ ko kɛ Yehowa a kpɛti. Abraham kɛ David ji Mawu huɛmɛ ejakaa a ná hemi kɛ yemi ngɛ e mi. Wɔ hu wa ma nyɛ ma pee Mawu huɛ ke wa ná hemi kɛ yemi ngɛ e mi.

8-9. Mɛni nɛ ni komɛ de ngɛ nɔ́ nɛ Paulo kɛ Yakobo ngma a he nɛ dɛ, nɛ mɛni he je?

⁸ Kɛ je blema lokoo ɔ, jami hɛ mi nyɛɛli sãa nya ngɛ tsakpa nɛ ngɛ hemi kɛ yemi kɛ ní  tsumihi a kpɛti ɔ he. Jami hɛ mi nyɛɛli komɛ tsɔɔ kaa nɔ́ nɛ e he hia nɛ o pee konɛ o ná yi wami hemi pɛ ji kaa o ma he wa Nyɔmtsɛ Yesu Kristo maa ye. Eko ɔ, o nu nɛ a de si abɔ ke, “Mo he Yesu nɛ o ye konɛ a he o yi wami.” Eko ɔ, jami hɛ mi nyɛɛli nɛ ɔmɛ tsɛɔ Paulo munyu nɛ ɔ se: ‘Mawu buɔ nɔ ko dalɔ, se pi ngɛ e ní tsumihi a he.’ (Rom. 4:6) Jehanɛ hu ɔ, ni kpahi hu deɔ kaa a ma nyɛ ma he nɔ ko yi wami ke nɔ ɔ peeɔ kpakpa nɛ e yaa hehi nɛ sɔlemi ɔmɛ susuɔ kaa a ngɛ klɔuklɔu ɔ. Eko ɔ, a tsɛɔ Yakobo 2:24 ɔ se kɛ maa a munyu ɔ nɔ mi. Lejɛ ɔ de ke, “A buɔ adesa ko dalɔ kɛ guɔ ní tsumihi a nɔ, se pi kɛ gu hemi kɛ yemi pɛ nɔ.”

⁹ Akɛnɛ jami hɛ mi nyɛɛli nɛ ɔmɛ hɛɛ hemi kɛ yemi ekpaekpa he je ɔ, Baiblo he ní leli komɛ tsɔɔ kaa nɔ́ nɛ Paulo kɛ Yakobo tsuo ngma kɛ kɔ hemi kɛ yemi kɛ ní tsumi he ɔ kpa we gbi. Jami hɛ mi nyɛɛli komɛ tsɔɔ kaa Paulo he ye kaa wa hia hemi kɛ yemi pɛ loko wa ma nyɛ maa sa Yehowa hɛ mi. Se Yakobo hu tsɔɔ kaa e sa nɛ waa pee kpakpa loko wa maa sa Yehowa hɛ mi. Jami he ní lelɔ ko de ke, “Yakobo li nɔ́ he je nɛ Paulo tsɔɔ kaa wa hia hemi kɛ yemi pɛ loko wa ma nyɛ maa pee dali. Enɛ ɔ he je nɛ e kɛ Paulo kpa we gbi ɔ nɛ.” Se Yehowa nɛ ha nɛ mɛ tsuo a ngma a munyu ɔmɛ ɔ nɛ. (2 Tim. 3:16) Enɛ ɔ he ɔ, blɔ kpiti ko ngɛ nɛ wa ma nyɛ maa gu nɔ kɛ nu nɔ́ nɛ mɛ ni enyɔ ɔmɛ tsuo a de ɔ sisi. Nyɛ ha nɛ wa susu nɔ́ nɛ de ɔ he kɛ ya tsitsaa.

10. Mɛni “ní tsumihi” tutuutu nɛ Paulo ngɛ he munyu tue ngɛ hiɛ ɔ? (Roma Bi 3:​21, 28) (Hyɛ foni ɔ hulɔ.)

¹⁰ Mɛni “ní tsumihi” nɛ Paulo tu he munyu ngɛ Roma Bi yi 3 kɛ 4 ɔ mi ɔ? E ngɛ heii kaa Paulo ngɛ “mlaa nya ní tsumihi” nɛ ji Mose Mlaa a nɛ Yehowa kɛ ha ngɛ Sinai Yoku ɔ nɔ ɔ  he munyu tue. (Kane Roma Bi 3:​21, 28.) Eko ɔ, ngɛ Paulo be ɔ mi ɔ, e he wa ha Yuda bi nɛ a ji Kristofohi ɔ kaa a maa kplɛɛ nɔ kaa Mose Mlaa a nɛ a kɛ ngɛ ní tsue loloolo ɔ be be. Enɛ ɔ he ɔ, Paulo ngɔ Abraham nɔ hyɛmi nɔ́ ɔ kɛ tsɔɔ mɛ kaa e he hia we nɛ a ye Mose Mlaa a nɔ loko Yehowa maa kplɛɛ a nɔ, mohu ɔ, a hia hemi kɛ yemi. Munyu nɛ ɔ woɔ nɔ bua wawɛɛ ejakaa e tsɔɔ wɔ kaa ke wa ná hemi kɛ yemi ngɛ Mawu kɛ Kristo mi ɔ, wa ma nyɛ maa sa Mawu hɛ mi.

11. Mɛni “ní tsumihi” nɛ Yakobo ngɛ tsɔɔe?

¹¹ Se kɛ̃ ɔ, “ní tsumihi” nɛ a tu he munyu ngɛ Yakobo yi 2 ɔ je ekpa ngɛ “mlaa nya ní tsumihi” nɛ Paulo tu he munyu ɔ he. Yakobo ngɛ ní tsumihi loo níhi nɛ Kristofohi peeɔ daa ligbi ɔ he munyu tue. Ní tsumi nɛ ɔmɛ haa nɛ wa naa ke ji Kristofo no ko ngɛ hemi kɛ yemi nitsɛnitsɛ ngɛ Mawu mi loo e be hemi kɛ yemi. Mo susu nɔ hyɛmi níhi enyɔ nɛ Yakobo kɛ tsu ní ɔ he nɛ o hyɛ.

12. Mɛni blɔ nɔ nɛ Yakobo tsɔɔ tsakpa nɛ ngɛ hemi kɛ yemi kɛ ní tsumihi a kpɛti? (Hyɛ foni ɔ hulɔ.)

¹² Ngɛ kekleekle nɔ hyɛmi nɔ́ ɔ mi ɔ, Yakobo tsɔɔ kaa e sa nɛ Kristofohi tsuo kɛ nɔ fɛɛ nɔ nɛ hi si saminya. E ngɔ nɔ hyɛmi nɔ́ ko kɛ tsɔɔ oti nɛ ɔ mi. E tsɔɔ kaa nyumu ko je mi mi jɔmi kpo kɛ tsɔɔ sikatsɛ ko, se e pee we jã kɛ ha ohiatsɛ ko. Yakobo tsɔɔ heii kaa jamɛ a nyumu ɔ ma de ke e ngɛ hemi kɛ yemi, se anɛ e ní peepee tsɔɔ jã lo? (Yak. 2:​1-5, 9) Ngɛ nɔ hyɛmi nɔ́ enyɔne ɔ mi ɔ, Yakobo tu nɔ ko nɛ e na e nyɛmi ko nɛ e ‘be heha nɔ́ loo niye ní’ se e yi bua lɛ ɔ he munyu. Ke jamɛ a nɔ ɔ de kaa e ngɛ hemi kɛ yemi po ɔ, e ní peepee tsɔɔ we jã. Enɛ ɔ he ɔ, Yakobo ngma ke, ‘hemi kɛ yemi nɛ ní tsumihi piɛɛ we he ɔ, e gbo.’—Yak. 2:​14-17.

13. Mɛni nɔ hyɛmi nɔ́ nɛ Yakobo kɛ tsu ní kɛ tsɔɔ kaa e sa nɛ waa ngɔ wa ní peepee kɛ tsɔɔ kaa wa ngɛ hemi kɛ yemi? (Yakobo 2:​25, 26)

 ¹³ Yakobo tu Rahab he munyu kaa e ji nɔ ko nɛ e ngɔ e ní peepee kɛ tsɔɔ kaa e ngɛ hemi kɛ yemi. (Kane Yakobo 2:​25, 26.) E nu nyakpɛ níhi nɛ Yehowa pee, kɛ bɔ nɛ e ngɛ Israel bi ɔmɛ ye buae ha a he. (Yosh. 2:​9-11) Enɛ ɔ he ɔ, e ngɔ e ní peepee kɛ tsɔɔ kaa e ngɛ hemi kɛ yemi. E laa Israel bi nɛ a ba a ma a mi ɔ nɔ, konɛ a wami nɛ ko ya je oslaa mi. Enɛ ɔ he ɔ, Yehowa bu Rahab nɛ tsa pi Israel no ji lɛ ɔ dalɔ kaa bɔ nɛ e bu Abraham dalɔ ɔ. Rahab nɔ hyɛmi nɔ́ ɔ ha nɛ wa na kaa e he hia nɛ waa ngɔ wa ní peepee kɛ tsɔɔ kaa wa ngɛ hemi kɛ yemi.

14. Mɛni he je nɛ wa ma nyɛ ma de ke nɔ́ nɛ Paulo kɛ Yakobo ngma a ti si kɛ wui a sibi ɔ?

¹⁴ Ngɛ anɔkuale mi ɔ, Paulo kɛ Yakobo tsuo ngɛ hemi kɛ yemi kɛ ní tsumi he munyu tue ngɛ blɔ slɔɔtohi a nɔ. Paulo ngɛ Yuda bi nɛ a ji Kristofohi ɔ tsɔɔe kaa pi Mose Mlaa a nɔ pɛ nɛ́ a maa ye ɔ nɛ ma ha nɛ Yehowa nɛ kplɛɛ a nɔ. Nɛ Yakobo hu ngɛ nɔ mi mae kaa e he hia nɛ Kristofohi tsuo nɛ a pee ni kpahi kpakpa kɛ tsɔɔ kaa a ngɛ hemi kɛ yemi.

15. Mɛni ji ní komɛ nɛ wa ma nyɛ maa pee kɛ tsɔɔ kaa wa ngɛ hemi kɛ yemi? (Hyɛ foni ɔ hulɔ.)

¹⁵ Yehowa de we kaa ja wa pee nɔ́ fɛɛ nɔ́ nɛ Abraham pee ɔ pɛpɛɛpɛ loko a ma nyɛ maa bu wɔ dali. Ngɛ anɔkuale mi ɔ, blɔhi fuu ngɛ nɛ wa ma nyɛ maa gu nɔ kɛ tsɔɔ kaa wa ngɛ hemi kɛ hemi. Wa ma nyɛ ma he ni hehi nɛ a ba asafo ɔ mi ɔ atuu, wa ma nyɛ maa ye bua nyɛmimɛ nɛ a hia yemi kɛ buami wawɛɛ ɔ, nɛ waa pee wa weku li kpakpa. Ní nɛ ɔmɛ nɛ wa maa pee ɔ ma ha nɛ Yehowa maa kplɛɛ wa nɔ nɛ e maa jɔɔ wɔ. (Rom. 15:7; 1 Tim. 5:​4, 8; 1 Yoh. 3:18) Blɔ nɛ hi pe kulaa nɛ wa ma nyɛ maa gu nɔ kɛ tsɔɔ kaa wa ngɛ hemi kɛ yemi ji  nɛ wa maa fiɛɛ kɛ kã. (1 Tim. 4:16) Wɔ tsuo wa ma nyɛ maa ngɔ wa ní peepee kɛ tsɔɔ kaa wa he ye kaa Yehowa si womi ɔmɛ tsuo maa ba mi, nɛ blɔhi a nɔ nɛ e guɔ kɛ peeɔ níhi ɔ se be. Ke wa pee jã a, wa ma nyɛ ma ná nɔ mi mami kaa Yehowa maa bu wɔ dali nɛ wa maa pee e huɛmɛ hulɔ.

16. Mɛni blɔ nɔ nɛ hɛ nɔ kami kɛ hemi kɛ yemi nɛ Abraham ngɛ ɔ ngɛ tsakpa?

¹⁶ Roma Bi yi 4 ɔ tsɔɔ nɔ́ kpa ko nɛ he hia wawɛɛ nɛ wa ma nyɛ maa kase ngɛ Abraham he. Lɔ ɔ ji hɛ kɛ nɔ fɔmi. Yehowa wo Abraham si kaa kɛ gu e nɔ ɔ, a maa jɔɔ “je mahi fuu.” Enɛ ɔ ji hɛ kɛ nɔ fɔmi ko nɛ se be nɛ Abraham ná. (1 Mose 12:3; 15:5; 17:4; Rom. 4:17) Se kɛ̃ ɔ, benɛ Abraham ye jeha 100, nɛ Sara hu ye jeha 90 ɔ, jamɛ a be ɔ mi ɔ, a fɔ we bi ko lolo. Ngɛ adesa susumi nya a, e he ma nyɛ maa wa kaa Abraham kɛ Sara ma fɔ binyumu. Enɛ ɔ ji ka agbo ko nɛ Abraham kɛ kpe. “Se kɛ̃ ɔ, ngɛ hɛ kɛ nɔ fɔmi nɛ e ngɛ ɔ he je ɔ, e ná hemi kɛ yemi kaa e ma ba pee tsɛ kɛ ha je mahi fuu.” (Rom. 4:​18, 19) Nɛ nyagbenyagbe ɔ, hɛ kɛ nɔ fɔmi nɛ Abraham ngɛ ɔ ba mi. A fɔ Isak nɛ ji binyumu nɛ Abraham hyɛ blɔ be kɛkɛɛ ɔ.—Rom. 4:​20-22.

17. Kɛ wa plɛ kɛ le kaa Mawu ma nyɛ maa bu wɔ dali ha kɛɛ?

¹⁷ Mawu ma nyɛ maa kplɛɛ wa nɔ nɛ e bu wɔ dali kaa bɔ nɛ e ji ngɛ Abraham blɔ fa mi ɔ. Enɛ ɔ ji nɔ́ nɛ Paulo ma nɔ mi be mi nɛ e ngma ke, “Munyu nɛ ji, ‘a bu lɔ ɔ kɛ ha lɛ’ ɔ, pi [Abraham] he pɛ nɛ a ngma ngɛ, mohu ɔ, a ngma ngɛ wɔ hu wa he, wɔ nihi nɛ wɔ hu a maa bu lɔ ɔ kɛ ha wɔ, akɛnɛ wa heɔ Mawu, nɔ nɛ e tle Yesu nɛ ji wa Nyɔmtsɛ ɔ si” ɔ. (Rom. 4:​23, 24) Kaa bɔ nɛ Abraham pee ɔ, wɔ hu e sa nɛ wa ná hemi kɛ yemi ngɛ Yehowa mi, wa tsu ní tsumi kpakpahi nɛ wa ná hɛ kɛ nɔ fɔmi ngɛ Yehowa mi kaa e si womi ɔmɛ maa ba mi. Ngɛ Roma Bi yi 5 ɔ, Paulo ya nɔ nɛ e tu hɛ kɛ nɔ fɔmi nɛ wa ngɛ ɔ he munyu. Wa ma susu hɛ kɛ nɔ fɔmi nɛ ɔ he ngɛ ní kasemi nɛ nyɛɛ se ɔ mi.