1. Mɛni he je nɛ wa ma nyɛ ma de ke Abraham hɛ kɛ nɔ fɔmi ɔ sa kadimi ɔ?

 YEHOWA wo Abraham si kaa e maa gu e nina nɔ kɛ jɔɔ je ma amɛ tsuo. (1 Mose 15:5; 22:18) Akɛnɛ Abraham ngɛ hemi kɛ yemi nɛ mi wa ngɛ Mawu mi he je ɔ, e ngɛ nɔ mi mami kaa Mawu si womi ɔmɛ maa ba mi. E ngɛ mi kaa Mawu wo Abraham si mohu lɛɛ, se benɛ e ye jeha 100 nɛ e yo ɔ hu ye jeha 90 ɔ, a fɔ we bi ko. (1 Mose 21:​1-7) Se Baiblo ɔ de ke: “Ngɛ hɛ kɛ nɔ fɔmi nɛ e ngɛ ɔ he je ɔ, e ná hemi kɛ yemi kaa e ma ba pee tsɛ kɛ ha je mahi fuu ngɛ nɔ́ nɛ a de ɔ nya.” (Rom. 4:18) Ngɛ anɔkuale mi ɔ, Abraham hɛ kɛ nɔ fɔmi ɔ ba mi. A fɔ binyumu nɛ e hyɛ blɔ be kɛkɛɛ ɔ nɛ a wo lɛ biɛ ke Isak. Mɛni lɛ ha nɛ Abraham ná nɔ mi mami kaa Yehowa maa ye e si womi ɔ nɔ ɔ?

2. Mɛni he je nɛ Abraham ná nɔ mi mami kaa Yehowa si womi ɔmɛ maa ba mi niinɛ ɔ?

² Akɛnɛ huɛ bɔmi kpakpa ngɛ Abraham kɛ Yehowa a kpɛti he je ɔ, e “ná nɔ mi mami nɛ mi wa kaa nɔ́ nɛ Mawu wo he si ɔ” maa ba mi. (Rom. 4:21) Akɛnɛ Abraham ngɛ hemi kɛ yemi he je ɔ, Yehowa kplɛɛ e nɔ nɛ e bu lɛ dalɔ. (Yak. 2:23) Kaa bɔ nɛ Roma Bi 4:18 ɔ tsɔɔ ɔ, Abraham ngɛ hemi kɛ yemi, nɛ e ngɛ hɛ nɔ kami hulɔ. Amlɔ nɛ ɔ, wa ma susu nɔ́ nɛ bɔfo Paulo de ngɛ hɛ kɛ nɔ fɔmi he ngɛ Roma Bi yi 5 ɔ he.

3. Mɛni nɛ Paulo tsɔɔ mi ngɛ hɛ kɛ nɔ fɔmi he?

 ³ Paulo tsɔɔ nɔ́ he je nɛ wa ma nyɛ ma ná nɔ mi mami kaa “hɛ kɛ nɔ fɔmi ha we nɛ nɔ nine nyɛɔ si.” (Rom. 5:5) Jehanɛ hu ɔ, e tsɔɔ wɔ bɔ nɛ wa hɛ kɛ nɔ fɔmi ɔ mi ma nyɛ maa wa ha. Ke wa ngɛ Roma Bi 5:​1-5 ɔ he susue ɔ, mo susu bɔ nɛ o hemi kɛ yemi ɔ mi wa ha amlɔ nɛ ɔ he. Jehanɛ hu ɔ, wa maa hyɛ nɔ́ nɛ maa ye bua mo konɛ o hɛ kɛ nɔ fɔmi ɔ mi nɛ wa wawɛɛ po pe bɔ nɛ e ngɛ ha amlɔ nɛ ɔ. Nyɛ ha nɛ wa susu hɛ kɛ nɔ fɔmi nɛ se nɛ be nɛ Paulo tsɔɔ kaa e be hae nɛ wa nine nɛ nyɛ si ɔ he.

4. Mɛni he wa susu ngɛ Roma Bi 5:​1, 2 ɔ mi?

⁴ Kane Roma Bi 5:​1, 2. Paulo ngma munyu nɛ ɔmɛ kɛ ya ha asafo nɛ ngɛ Roma a. Nyɛmimɛ ɔmɛ nɛ a ngɛ jamɛ a asafo ɔ mi ɔ kase Yehowa kɛ Yesu he ní, nɛ a ná hemi kɛ yemi nɛ a ba pee Kristofohi. Enɛ ɔ he je nɛ Mawu “gu hemi kɛ yemi nɔ kɛ bu [mɛ] dali,” nɛ e ngɔ mumi klɔuklɔu ɔ kɛ pɔ mɛ nu ɔ nɛ. Enɛ ɔ ha nɛ a ba ná hɛ kɛ nɔ fɔmi nɛ e se be, nɛ a le hu kaa e maa ba mi kokooko.

5. Mɛni hɛ kɛ nɔ fɔmi nɛ nihi nɛ a pɔ mɛ nu ɔ ngɛ?

⁵ Pee se ɔ, Paulo ngma sɛ womi kɛ ya ha Kristofohi nɛ a pɔ mɛ nu nɛ a ngɛ Efeso ɔ. Ngɛ jamɛ a sɛ womi ɔ mi ɔ, e tu hɛ kɛ nɔ fɔmi nɛ Mawu kɛ ha mɛ ɔ he munyu. E tsɔɔ kaa a nine maa su ‘gbosi ní nɛ ngɛ kɛ ha ni klɔuklɔu ɔmɛ’ ɔ nɔ. (Efe. 1:18) Jehanɛ hu ɔ, Paulo tsɔɔ Kolose bi ɔmɛ he nɛ a nine maa su a hiɔwo ɔ nɔ ngɛ. E tsɔɔ kaa e ji “hɛ kɛ nɔ fɔmi nɛ a kɛ to ha [mɛ] ngɛ hiɔwe.” (Kol. 1:​4, 5) Kristofohi nɛ a pɔ mɛ nu ɔ ngɛ hɛ kɛ nɔ fɔmi kaa a ma ná neneene wami ngɛ hiɔwe nɛ a kɛ Kristo maa ye matsɛ.—1 Tɛs. 4:​13-17; Kpoj. 20:6.

6. Mɛni nɛ nyɛminyumu ko nɛ a pɔ lɛ nu ɔ de ngɛ e hɛ kɛ nɔ fɔmi ɔ he?

⁶ Kristofohi nɛ a pɔ mɛ nu ɔ bua jɔ hɛ kɛ nɔ fɔmi nɛ a ngɛ ɔ he wawɛɛ. A kpɛti nɔ kake ji Nyɛminyumu Frederick Franz. E tsɔɔ bɔ nɛ e nuɔ he ha ngɛ e hɛ kɛ nɔ fɔmi ɔ he. E de ke:  “Wa hɛ kɛ nɔ fɔmi ɔ maa ba mi niinɛ, nɛ nimli 144,000 ɔmɛ a kpɛti nɔ fɛɛ nɔ nine maa su e hiɔwo ɔ nɔ. Hɛ kɛ nɔ fɔmi nɛ ɔ ji nɔ́ ko nɛ se be nɛ wa nine maa su nɔ.” Benɛ Nyɛminyumu Franz kɛ jehahi babauu sɔmɔ Yehowa se ɔ, e de ngɛ jeha 1991 ɔ mi ke: “Loloolo ɔ, [wa] hɛ kɛ nɔ fɔmi ɔ he hia wɔ wawɛɛ. . . . Be mi nɛ wa yaa nɔ nɛ wa ngɛ mlɛe ɔ, wa hɛ kɛ nɔ fɔmi ɔ hu mi ngɛ wae wawɛɛ. Ke e he ba hia nɛ waa mlɛ jeha ayɔhi abɔ po ɔ, wa pee klaalo kaa wa maa mlɛ kɛ ya si be nɛ e maa ba mi. Amlɔ nɛ ɔ, ye bua jɔ hɛ kɛ nɔ fɔmi nɛ i ngɛ ɔ he wawɛɛ pe be ko nɛ be ɔ.”

7-8. Mɛni hɛ kɛ nɔ fɔmi nɛ nihi fuu ngɛ? (Roma Bi 8:​20, 21)

⁷ Yehowa sɔmɔli fuu nɛ a ngɛ mwɔnɛ ɔ ngɛ hɛ kɛ nɔ fɔmi kpa ko. Hɛ kɛ nɔ fɔmi nɛ ɔ nɔuu nɛ Abraham hu ngɛ. Lɔ ɔ ji kaa a maa hi si kɛ ya neneene ngɛ zugba a nɔ ngɛ Mawu Matsɛ Yemi ɔ mi. (Heb. 11:​8-10, 13) Paulo tu hɛ kɛ nɔ fɔmi nɛ se be nɛ ɔ he munyu. (Kane Roma Bi 8:​20, 21.) Kekleekle be nɛ o kase si womihi nɛ kɔɔ hwɔɔ se he ngɛ Baiblo ɔ mi ɔ, te nɛɛ lɛ o bua jɔ he wawɛɛ? Anɛ lɔ ɔ ji lemi nɛ o ba le kaa ligbi ko ɔ, adesahi tsuo maa ye mluku ɔ lo? Aloo o bua jɔ wawɛɛ akɛnɛ o ba le kaa a ma tle o suɔli tsuo nɛ a gbo ɔ si ngɛ paradeiso zugba a nɔ ɔ lo? Ngɛ anɔkuale mi ɔ, hɛ kɛ nɔ fɔmi nɛ Mawu kɛ ha wɔ nɛ ɔ he je ɔ, o ngɛ ní kpakpahi fuu blɔ hyɛe.

⁸ Ke wa hɛ nɔ kami ji kaa wa maa ya hiɔwe jio, wa maa hi zugba a nɔ jio, wɔ tsuo wa ngɛ hɛ kɛ nɔ fɔmi nɛ se be nɛ haa nɛ wa bua jɔɔ. Nɛ wa ma nyɛ ma ná nɔ mi mami nɛ mi wa kaa wa hɛ kɛ nɔ fɔmi ɔ maa ba mi niinɛ. Paulo tsɔɔ bɔ nɛ enɛ ɔ ma plɛ kɛ ba mi ha. Nyɛ ha nɛ wa susu nɔ́ nɛ e de kɛ kɔ wa hɛ kɛ nɔ fɔmi ɔ he. Ke wa pee jã a, e maa ye bua wɔ nɛ wa ná nɔ mi mami nɛ mi wa kaa wa hɛ kɛ nɔ fɔmi ɔ maa ba mi niinɛ.

9-10. Kaa bɔ nɛ Paulo nɔ hyɛmi nɔ́ ɔ tsɔɔ ɔ, mɛni nɛ Kristofohi ma nyɛ maa hyɛ blɔ? (Roma Bi 5:3) (Hyɛ foni ɔmɛ hulɔ.)

⁹ Kane Roma Bi 5:3. Paulo tsɔɔ kaa ke wa ngɛ nɔ́ nae po ɔ, hɛ kɛ nɔ fɔmi nɛ wa ngɛ ɔ mi  ma nyɛ maa wa. Eko ɔ, enɛ ɔ maa pee wɔ nyakpɛ. Se anɔkuale sane ji kaa e sa nɛ Kristo se nyɛɛli tsuo nɛ a hyɛ blɔ kaa a kɛ haomihi maa kpe. Mo susu Paulo nɔ hyɛmi nɔ́ ɔ he nɛ o hyɛ. E de Tɛsalonika bi ɔmɛ ke: “Benɛ waa kɛ nyɛ ngɛ ɔ, wa de nyɛ ngɔ to kaa wa maa na amanehlu, nɛ . . . lɔ ɔ lɛ ba mi ɔ nɛ.” (1 Tɛs. 3:4) Nɛ e de Korinto bi ɔmɛ ke: “Wa sume kaa wa maa ngɔ amanehlu nɛ waa kɛ kpe . . . ɔ kɛ laa nyɛ. . . . Wa hɛ be nɔ po kaa wa maa hi wami mi.”—2 Kor. 1:8; 11:​23-27.

¹⁰ Kristofohi nɛ a ngɛ mwɔnɛ ɔ hu ma nyɛ maa hyɛ blɔ kaa a kɛ amanehlu kaa kikɛ nɛ ɔ maa kpe. (2 Tim. 3:12) Anɛ mo hu a ngɛ mo yi mi wae akɛnɛ o ba ná hemi kɛ yemi ngɛ Kristo mi nɛ o ngɛ e se nyɛɛe ɔ he je lo? O huɛmɛ kɛ o weku li ma nyɛ maa ye o he fɛu. Eko po ɔ, a ngɛ mo yi mi wae wawɛɛ. Anɛ akɛnɛ o fia o pɛɛ si kaa o maa ya nɔ maa ye anɔkuale ngɛ o ní tsumi mi he je ɔ, e ha nɛ a ngɛ mo yi mi wae lo? (Heb. 13:18) Anɛ akɛnɛ o tuɔ o hɛ kɛ nɔ fɔmi ɔ he munyu kɛ tsɔɔ ni kpahi he je ɔ, amlaalo ɔ teɔ si kɛ woɔ mo lo? Mo kai kaa Haomi fɛɛ haomi nɛ waa kɛ maa kpe ɔ, Paulo wo wɔ he wami kaa e sa nɛ wa bua nɛ jɔ. Mɛni he je?

11. Mɛni he je nɛ e sa kaa waa fia wa pɛɛ si kaa wa ma fĩ si ngɛ kahi a mi ɔ?

¹¹ Ke wa ngɛ nɔ́ nae po ɔ, wa bua ma nyɛ maa jɔ, ejakaa wa le kaa wa nɔ́ nami ɔ ma nyɛ ma ha nɛ waa kase su ko nɛ he hia wawɛɛ. Kaa bɔ nɛ Roma Bi 5:3 ɔ tsɔɔ ɔ, “amanehlu ngɔɔ si fimi kɛ baa.” Kristofohi tsuo kɛ haomi maa kpe, lɔ ɔ he ɔ, e sa nɛ wɔ tsuo wa fĩ si. E sa nɛ waa fia wa pɛɛ si kaa ka fɛɛ ka nɛ waa kɛ maa kpe ɔ, wa maa da nya. Ja jã loko wa nine maa su wa hiɔwo ɔ nɔ. Wa sume nɛ waa pee kaa wuhi nɛ a ya pue tɛ sa nɔ nɛ Yesu tu a he munyu ngɛ e nɔ́ he tomi nɔ́ ɔ mi ɔ. Sisije ɔ, nimli nɛ ɔmɛ kplɛɛ munyu ɔ nɔ kɛ bua jɔmi, se benɛ a kɛ “haomi loo yi mi wami” bɔni kpemi ɔ, a nane tɔ̃tɔ̃. (Mat. 13:​5, 6, 20, 21) Ngɛ anɔkuale mi ɔ, wa ti nɔ ko be nɛ e bua jɔ nɔ́ nami loo yi mi wami he, se ke wa fĩ si ngɛ mi ɔ, e ngɔɔ jɔɔmihi babauu kɛ baa. Mɛni he je nɛ wa de jã a?

12. Ke wa fĩ si ngɛ kahi a mi ɔ, kɛ wa náa he se ha kɛɛ?

¹² Yakobo tsɔɔ nɔ́ he je nɛ e he hia wawɛɛ kaa wa ma fĩ si ngɛ kahi a mi ɔ. E ngma ke: “Nyɛ ha nɛ si fimi nɛ gbe e ní tsumi ɔ nya, konɛ nyɛɛ hi kɛ pi si, nɛ nyɛ he nɛ su ngɛ blɔ fɛɛ blɔ nɔ, nɛ nɔ́ ko nɔ́ ko nɛ ko hia nyɛ.” (Yak. 1:​2-4) Yakobo tsɔɔ kaa si fimi ngɛ yi mi tomi loo ní tsumi ko nɛ e sa kaa e tsu he ní. Mɛni ji jamɛ a yi mi tomi ɔ loo ní tsumi ɔ? Si fimi ma nyɛ maa ye bua wɔ konɛ wa je su komɛ kaa tsui si tomi kɛ hemi kɛ yemi kpo wawɛɛ, nɛ waa ngɔ wa hɛ kɛ fɔ Mawu nɔ hulɔ. Se ke wa fĩ si ɔ, wa náa he se ngɛ blɔ kpa ko nɛ he hia wawɛɛ ɔ nɔ.

13-14. Ke wa fĩ si ɔ, mɛni jeɔ mi kɛ baa, nɛ mɛni tsakpa nɛ ngɛ e kɛ hɛ kɛ nɔ fɔmi a kpɛti? (Roma Bi 5:4)

¹³ Kane Roma Bi 5:4. Paulo tsɔɔ kaa si fimi ngɔɔ “si himi nɛ a kplɛɛ nɔ kɛ baa.” Lɔ ɔ he ɔ, ke o fĩ si ɔ, e haa nɛ Yehowa bua jɔɔ o he. Se enɛ ɔ tsɔɔ we kaa Yehowa suɔ nɛ wa hi nɔ́ nae. Mohu ɔ, e bua jɔɔ o he akɛnɛ o kɛ anɔkuale yemi ngɛ si fĩe ɔ he je. Ngɛ anɔkuale mi ɔ, ke wa fĩ si ɔ, e haa nɛ Yehowa bua jɔɔ!—La 5:12.

¹⁴ Mo kai kaa benɛ Abraham fĩ si ngɛ kahi nɛ e kɛ kpe ɔmɛ a mi ɔ, Yehowa bua jɔ e he wawɛɛ. Enɛ ɔ ha nɛ Yehowa bu lɛ dalɔ, nɛ e ba pee e huɛ. (1 Mose 15:6; Rom. 4:​13, 22) E ma nyɛ maa ba jã ngɛ wɔ hu wa blɔ fa mi. Pi sɔmɔmi he blɔ nɛ wa ngɛ loo ní tsumi abɔ nɛ wa tsuɔ ngɛ Mawu jami mi ɔ nɛ e haa nɛ Yehowa kplɛɛɔ wa nɔ. Mohu ɔ, e kplɛɛɔ wa nɔ akɛnɛ waa kɛ anɔkuale yemi fĩɔ si ngɛ kahi a mi ɔ he je. Enɛ ɔ he ɔ, wa wa jio, wa wɛ jio, bɔ fɛɛ bɔ  nɛ wa si fɔfɔɛ ma ji ɔ, wɔ hu wa ma nyɛ ma fĩ si. Anɛ o ngɛ si fĩe ngɛ ka ko mi amlɔ nɛ ɔ lo? Ke jã a, mo kai kaa o ha nɛ Yehowa bua jɔɔ. Ke wa le kaa Yehowa kplɛɛ wa nɔ ɔ, e ma ha nɛ hɛ kɛ nɔ fɔmi nɛ wa ngɛ ɔ mi maa wa wawɛɛ.

15. Mɛni oti kpa ko nɛ Paulo tu he munyu, nɛ mɛni sane nɛ nɔ ko ma nyɛ ma bi?

¹⁵ Kaa bɔ nɛ Paulo tsɔɔ ɔ, ke wa fĩ si ngɛ kahi a mi ɔ, e haa nɛ Yehowa kplɛɛɔ wa nɔ. Paulo tsa nɔ nɛ e ngma ke: “Si himi nɛ a kplɛɛ nɔ ɔ hu ngɔɔ hɛ kɛ nɔ fɔmi kɛ baa, nɛ hɛ kɛ nɔ fɔmi ha we nɛ nɔ nine nyɛɔ si.” (Rom. 5:​4, 5) Enɛ ɔ ma nyɛ maa pee wɔ nyakpɛ. Mɛni he je? Ejakaa Paulo sɛ hlami nɛ e ngma ngɛ Roma Bi 5:2 ɔ kaa Kristofohi nɛ a ngɛ Roma a ngɛ hɛ kɛ nɔ fɔmi momo, nɛ ji “Mawu hɛ mi nyami ɔ he hɛ kɛ nɔ fɔmi ɔ.” Enɛ ɔ he ɔ, nɔ ko ma nyɛ ma bi ke, ‘Ke Kristofo ɔmɛ ngɛ hɛ kɛ nɔ fɔmi momo ɔ, lɛɛ mɛni he je mɔ nɛ Paulo tu hɛ kɛ nɔ fɔmi he munyu ekohu ɔ?’

16. Mɛni blɔ nɔ nɛ hɛ kɛ nɔ fɔmi nɛ nɔ ko ngɛ ɔ mi waa bɔɔbɔɔbɔɔ? (Hyɛ foni ɔmɛ hulɔ.)

¹⁶ Ke wa ba le kaa hɛ kɛ nɔ fɔmi ji nɔ́ ko nɛ e mi waa a, lɔ ɔ maa ye bua wɔ nɛ waa nu nɔ́ nɛ Paulo ngɛ tsɔɔe ɔ sisi saminya. Kaa nɔ hyɛmi nɔ́ ɔ, anɛ o kai kekleekle be nɛ o kane hɛ kɛ nɔ fɔmi ko nɛ se be nɛ a ngma ngɛ Mawu Munyu ɔ mi ɔ lo? Eko ɔ, benɛ o nu kaa adesahi maa hi si ngɛ paradeiso zugba a nɔ kɛ ya neneene ɔ, e pee mo nyakpɛ, se o be nɔ mi mami kaa e maa ba mi. Se benɛ o bɔni Yehowa kɛ e si womi ɔmɛ a he ní kasemi ɔ, o ba ná nɔ mi mami nitsɛnitsɛ kaa si womi nɛ ɔ maa ba mi niinɛ.

17. Ke o jɔɔ o he nɔ nɛ a baptisi mo se ɔ, mɛni blɔ nɔ nɛ o hɛ kɛ nɔ fɔmi ɔ mi waa?

¹⁷ Benɛ a baptisi mo se ɔ, o ba le Yehowa nɛ o ná suɔmi nɛ mi wa kɛ ha lɛ. Enɛ ɔ ha nɛ o ba ná nɔ mi mami nitsɛnitsɛ kaa níhi tsuo nɛ o heɔ yeɔ ɔ maa ba mi niinɛ. (Heb. 5:13–6:1) Eko ɔ, munyu nɛ ngɛ Roma Bi 5:​2-4 ɔ ba mi ngɛ o blɔ fa mi. O kɛ amanehlu slɔɔtoslɔɔtohi kpe nɛ o nyɛ nɛ o fĩ si, nɛ Yehowa ha nɛ  o na kaa e bua jɔ o he. Akɛnɛ o ba le kaa Yehowa suɔ mo, nɛ e kplɛɛ o nɔ he je ɔ, amlɔ nɛ ɔ, o ngɛ yi mi tomi kpakpa he je nɛ e sa kaa o mlɛ kɛ ya si benɛ e si womi ɔmɛ maa ba mi. O hɛ kɛ nɔ fɔmi ɔ mi ba wa wawɛɛ pe sa a. E ba pee nɔ́ nitsɛ kɛ ha mo, nɛ e ná o nɔ he wami wawɛɛ. E haa nɛ o kɛ o weku mi bimɛ ɔmɛ hiɔ si saminya, o mwɔɔ yi mi kpɔhi nɛ da, nɛ o kɛ o be hu tsuɔ ní saminya.

18. Mɛni nɔ mi mami nɛ Yehowa ha wɔ?

¹⁸ Bɔfo Paulo tsɔɔ oti kpa ko nɛ he hia nɛ kɔɔ hɛ kɛ nɔ fɔmi nɛ o ba ná benɛ Mawu kplɛɛ o nɔ ɔ se ɔ. E ma nɔ mi kɛ ha mo kaa o hɛ kɛ nɔ fɔmi ɔ maa ba mi kokooko. Mɛni he je nɛ wa de jã a? Paulo tu nɔ mi mami nɛ Mawu kɛ ha a he munyu kɛ tsɔɔ Kristofo ɔmɛ. E de ke: “Hɛ kɛ nɔ fɔmi ha we nɛ nɔ nine nyɛɔ si; ejakaa a plɛ Mawu suɔmi ɔ ngɔ wo wa tsui mi kɛ gu mumi klɔuklɔu ɔ nɛ a kɛ ha wɔ ɔ nɔ.” (Rom. 5:5) Ngɛ anɔkuale mi ɔ, o ma nyɛ ma ná nɔ mi mami ngɛ o hɛ kɛ nɔ fɔmi ɔ mi.

19. Mɛni nɔ mi mami nɛ o ma nyɛ ma ná ngɛ o hɛ kɛ nɔ fɔmi ɔ he?

¹⁹ Mo pue o yi mi tɛ ngɛ si nɛ Yehowa wo Abraham kɛ bɔ nɛ Mawu kplɛɛ e nɔ nɛ e ba pee e huɛ ɔ ha a he. Abraham hɛ kɛ nɔ fɔmi ɔ pee we yaka. Baiblo ɔ de ke: “Benɛ Abraham to e tsui si ɔ, e nine su si womi nɛ ɔ nɔ.” (Heb. 6:15; 11:​9, 18; Rom. 4:​20-22) E ngɛ heii kaa e nine nyɛ we si. Mo hu o ma nyɛ ma ná nɔ mi mami kaa ke o ya nɔ nɛ o ye anɔkuale ɔ, Yehowa maa jɔɔ mo ngɛ o hɛ kɛ nɔ fɔmi ɔ he je. O hɛ kɛ nɔ fɔmi ɔ maa ba mi niinɛ, e ma ha nɛ o bua maa jɔ, nɛ o nine be si nyɛe kɔkɔɔkɔ! (Rom. 12:12) Paulo ngma ke: “Mawu, nɔ nɛ e haa nɔ hɛ kɛ nɔ fɔmi ɔ nɛ e ha nɛ bua jɔmi tsuo kɛ tue mi jɔmi nɛ hyi nyɛ tɔ kɛ gu nyɛ hɛ nɛ nyɛɛ kɛ fɔ e nɔ ɔ nɔ, konɛ hɛ kɛ nɔ fɔmi kɛ mumi klɔuklɔu ɔ he wami ɔ nɛ hiɛ kɛ be nɔ ha nyɛ.”—Rom. 15:13.