1. Mɛni nɛ e sa nɛ niheyo ko nɛ e ji Kristofo no ɔ nɛ pee konɛ e ye manye ngɛ si himi mi?

 MATSƐ David de Salomo ke: ‘O he nɛ wa, nɛ o pee nyumu.’ (1 Ma. 2:​1-3) E sa nɛ nyumuhi nɛ a ji Kristofohi tsuo nɛ a kɛ ga womi nɛ ɔ nɛ tsu ní. Loko nihewi ma nyɛ maa ye manye ngɛ si himi mi ɔ, e sa nɛ a kɛ Yehowa mlaahi kɛ Baiblo sisi tomi mlaahi nɛ tsu ní ngɛ a si himi mi. (Luka 2:52) Mɛni he je nɛ e he hia nɛ nihewi nɛ a pee Kristofohi nɛ a nane pi si ɔ?

2-3. Mɛni he je nɛ e he hia nɛ niheyo ko nɛ ya e hɛ mi konɛ e ba pee Kristofo no nɛ e nane pi si ɔ?

² Kristofo no nɛ e ji nyumu ɔ ngɛ blɔ nya ní tsumihi fuu nɛ a he hia nɛ e sa nɛ e tsu a he ní ngɛ asafo ɔ kɛ e weku ɔ mi. Nihewi, atsinyɛ jemi ko be he kaa nyɛ susuɔ blɔ nya ní tsumihi nɛ eko ɔ, nyɛ ma tsu a he ní hwɔɔ se ɔ he. Eko ɔ, nyɛ suɔ kaa nyɛ ma sɔmɔ kaa daa blɔ gbali loo asafo mi sɔmɔli, konɛ pee se ɔ, nyɛ sɔmɔ kaa asafo mi nikɔtɔmahi. Eko ɔ, nyɛ maa suɔ nɛ nyɛɛ sɛ gba si himi mi nɛ nyɛ fɔ. (Efe. 6:4; 1 Tim. 3:1) Loko nyɛ ma nyɛ maa su oti nɛ ɔmɛ a he nɛ nyɛɛ ye manye ɔ, e sa nɛ nyɛɛ pee Kristofohi nɛ a nane pi si. b

³ Mɛni maa ye bua nyɛ konɛ nyɛɛ pee Kristofohi nɛ a nane pi si? Ní komɛ ngɛ nɛ a he hia nɛ e sa nɛ nyɛɛ kase konɛ nyɛɛ pee Kristofohi nɛ a nane pi si. Ke jã a, mɛni ma nyɛ maa ye bua nyɛ konɛ nyɛ dla nyɛ he kɛ ha blɔ nya ní tsumihi nɛ nyɛ ma tsu hwɔɔ se ɔ konɛ nyɛɛ ye manye?

4. Jije o ma nyɛ maa na nihi nɛ a peeɔ nɔ hyɛmi ní kpakpahi nɛ maa ye bua mo ngɛ? (Hyɛ foni ɔ hulɔ.)

⁴ Nyɛɛ kase nihi nɛ a peeɔ nɔ hyɛmi nɔ́ kpakpa. Baiblo ɔ tu  nyumu komɛ nɛ a pee nɔ hyɛmi nɔ́ kpakpa nɛ nihewi ma nyɛ maa kase ɔ a he munyu. Nyumu nɛ ɔmɛ suɔ Mawu nɛ a hyɛ e we bi a nɔ ngɛ blɔ slɔɔtohi a nɔ. O ma nyɛ maa na nyumuhi nɛ a peeɔ nɔ hyɛmi nɔ́ kpakpa nɛ a nane pi si ngɛ o weku ɔ mi kɛ o we asafo ɔ mi hulɔ. (Heb. 13:7) Jehanɛ hu ɔ, o ma nyɛ maa kase Yesu Kristo nɔ hyɛmi nɔ́ nɛ se be ɔ. (1 Pet. 2:21) Moo kase nimli nɛ ɔmɛ a he ní saminya, nɛ o susu su kpakpahi nɛ a je kpo ɔ he. (Heb. 12:​1, 2) Lɔ ɔ se ɔ, hyɛ kaa o ma nyɛ maa kase nɔ́ ko ngɛ a nɔ hyɛmi nɔ́ ɔ mi lo.

5. Mɛni maa ye bua mo konɛ o nyɛ nɛ o susu níhi a he saminya, nɛ mɛni he je nɛ e he hia a? (La 119:9)

⁵ “Moo bu nyɛmi nɛ a kɛ susuɔ nɔ́ he ɔ he.” (Abɛ 3:​21, NW) Nyumu nɛ e ngɛ nyɛmi nɛ a kɛ susuɔ nɔ́ he ɔ kɛ oya yemi tsu we níhi a he ní kɛkɛ. Mohu ɔ, e susuɔ níhi a he saminya loko e maa e juɛmi nya si ngɛ nɔ́ nɛ e maa pee ɔ he. Enɛ ɔ he ɔ, moo bɔ mɔde nɛ o kase bɔ nɛ a susuɔ níhi a he ha saminya, nɛ o pee jã be fɛɛ be. Mɛni he je? Ejakaa mwɔnɛ ɔ, nihewi fuu daa mɛ nitsɛmɛ a susumi kɛ bɔ nɛ a nuɔ he ha a nɔ kɛ mwɔɔ yi mi kpɔ. (Abɛ 7:7; 29:11) Níhi nɛ nyɛ nuɔ ngɛ tiivi kɛ Intanɛti ɔ nɔ hu ma nyɛ ma ná nyɛ nɔ he wami wawɛɛ. Ke jã a, mɛni ma nyɛ maa ye bua nyɛ konɛ nyɛ susu níhi a he saminya? Kekleekle ɔ, nyɛɛ kase Baiblo sisi tomi mlaahi nɛ nyɛ susu bɔ nɛ e maa ye bua nyɛ ngɛ nyɛ si himi mi ha a he. Lɔ ɔ se ɔ, nyɛɛ ngɔ Baiblo sisi tomi mlaa amɛ kɛ tsu ní konɛ nyɛ nyɛ́ nɛ nyɛɛ mwɔ yi mi kpɔhi nɛ maa sa Yehowa hɛ mi. (Kane La 119:9.) Ke nyɛ gu blɔ nɛ ɔ nɔ kɛ susu níhi a he ɔ, e maa ye bua nyɛ konɛ nyɛɛ pee Kristofohi nɛ a nane pi si. (Abɛ 2:​11, 12; Heb. 5:14) Nyɛ ha nɛ waa hyɛ bɔ nɛ nyɛmi nɛ a kɛ susuɔ nɔ́ he ɔ ma nyɛ maa ye bua nyɛ ngɛ blɔ enyɔ nɛ ɔmɛ a nɔ ha: (1) bɔ nɛ nyɛɛ kɛ nyɛmimɛ yihi maa hi si ha kɛ (2) yi mi kpɔhi nɛ nyɛ mwɔɔ ngɛ he dlami he.

6. Ke niheyo ko susuɔ níhi a he saminya a, kɛ e maa ye bua lɛ nɛ e jé bumi kpo kɛ tsɔɔ nyɛmimɛ yihi ha kɛɛ?

⁶ Nyɛmi nɛ a kɛ susuɔ nɔ́ he ɔ, ma nyɛ maa ye bua nyɛ konɛ nyɛ je bumi kpo kɛ tsɔɔ yihi. Tɔmi ko be he kaa nyɛminyumu ko kɛ nyɛmiyo ko maa pee huɛ konɛ a le a sibi saminya. Se, ke nyɛminyumu ko pee we e juɛmi kaa e kɛ nyɛmiyo ko maa sɛ gba si himi mi ɔ, e sɛ nɛ e de nɔ́ ko loo e pee nɔ́ ko aloo e ngma sɛ gbi ko nɛ ma ha nɛ nyɛmiyo ɔ maa nu he kaa e bua jɔ e he. Ke e pee we e ní jã a, lɔ ɔ tsɔɔ kaa e susuɔ nɔ́ he saminya. (1 Tim. 5:​1, 2) Ke nyɛminyumu ko kɛ  nyɛmiyo ko bɔni kpo jemi ɔ, e sa nɛ e hyɛ saminya nɛ e kɛ nyɛmiyo ɔ pɛ a ko ya hi he ko nɛ nɔ ko nɔ ko piɛɛ we a he.—1 Kor. 6:18.

7. Ke niheyo ko susuɔ níhi a he saminya a, kɛ lɔ ɔ maa ye bua lɛ nɛ e mwɔ yi mi kpɔ ngɛ he dlami he ha kɛɛ?

⁷ Nɔ́ kpa ko hu nɛ niheyo ko ma nyɛ maa pee kɛ tsɔɔ kaa e susuɔ níhi a he kaa bɔ nɛ Yehowa peeɔ ɔ ji kaa e maa mwɔ yi mi kpɔ nɛ da ngɛ he dlami he. Behi fuu ɔ, nihi nɛ a tuɔ tadehi nɛ ba nɔ ɔ he munyu nɛ a fiaa he adafi ɔ, tsa pi Yehowa sɔmɔli ji mɛ loo a bɛ a je mi saminya kulaa. Enɛ ɔ he ɔ, tadehi nɛ a woɔ nihi he wami kaa a wo ɔ ji tadehi nɛ miaa nɔ loo tadehi nɛ ke nyumu ko wo ɔ nihi ma susu kaa yo ji lɛ. Lɔ ɔ ke niheyo ko nɛ e ngɛ mɔde kaa e maa pee Kristofo no nɛ e nane pi si ɔ ngɛ hlae nɛ e mwɔ yi mi kpɔ ngɛ tade nɛ e maa wo ɔ he ɔ, e sa nɛ e ha nɛ Baiblo sisi tomi mlaahi nɛ kudɔ lɛ, nɛ e kase nihi nɛ a peeɔ nɔ hyɛmi nɔ́ kpakpa ngɛ asafo ɔ mi ɔ. E ma nyɛ ma bi e he ke: ‘Anɛ yi mi kpɔhi nɛ i mwɔɔ ɔ tsɔɔ kaa ye juɛmi mi tsɔ nɛ i buɔ ni kpahi lo? Ke i dla ye he ɔ, anɛ nihi naa kaa i ji Mawu sɔmɔlɔ lo?’ (1 Kor. 10:​31-33; Tito 2:6) Niheyo nɛ e susuɔ nɔ́ he saminya a, jeɔ bumi kpo kɛ tsɔɔ nyɛmimɛ nyumuhi kɛ yihi kɛ Yehowa nɛ ji wa hiɔwe Tsɛ ɔ hulɔ.

8. Mɛni nɛ niheyo ko ma nyɛ maa pee kɛ tsɔɔ kaa a ma nyɛ maa ngɔ hɛ kɛ fɔ e nɔ?

⁸ Moo pee o he nɔ nɛ a ma nyɛ maa ngɔ hɛ kɛ fɔ e nɔ. Niheyo nɛ a ma nyɛ maa ngɔ hɛ kɛ fɔ e nɔ ɔ tsuɔ e blɔ nya ní tsumihi tsuo a he ní. (Luka 16:10) Mo susu nɔ hyɛmi nɔ́ nɛ se be nɛ Yesu pee ɔ he nɛ o hyɛ. Yesu tsu e blɔ nya ní tsumihi a he ní pɛpɛɛpɛ. Jehanɛ hu ɔ, e pee nɔ́ fɛɛ nɔ́ nɛ Yehowa de lɛ ke e pee ɔ, ke e he wa ha lɛ kaa e maa pee jã po. E suɔ nimli, titli ɔ, e kaseli ɔmɛ, nɛ e je e tsui mi nɛ e ngɔ e wami kɛ fɔ si ha mɛ. (Yoh. 13:1) Ke o bɔ mɔde wawɛɛ nɛ o tsu ní tsumi saisaa nɛ a kɛ maa wo o dɛ ɔ, lɔ ɔ tsɔɔ kaa o ngɛ Yesu kasee. Ke o li bɔ nɛ o ma plɛ kɛ tsu ní tsumi nɛ a kɛ wo o dɛ ɔ, moo ba o he si nɛ o bi nyɛmimɛ nyumuhi nɛ a nane pi si ɔ konɛ a tsɔɔ mo. Ko tsu ní tsumi ɔ eko kɛ eko kɛkɛ. (Rom. 12:11) Mohu ɔ, mo tsu ní tsumi ɔ saminya, ejakaa “Yehowa nɛ [o] ngɛ pee ha, se pi adesahi.” (Kol. 3:23) Ngɛ anɔkuale mi ɔ, o yi mluku, enɛ ɔ he ɔ, moo ba o he si nɛ o kplɛɛ o tɔmihi a nɔ.—Abɛ 11:2.

9. Mɛni he je nɛ e sa nɛ niheyo nɛ kase ní komɛ nɛ maa ye bua lɛ ngɛ si himi mi?

⁹ Loko o ma nyɛ maa pee Kristofo no nɛ e nane pi si ɔ, e he maa hia nɛ o kase ní komɛ nɛ maa ye bua mo ngɛ si himi mi. Jã nɛ o maa pee ɔ maa ye bua mo konɛ o nyɛ nɛ o tsu ní tsumihi nɛ a kɛ maa wo o dɛ ngɛ asafo ɔ mi ɔ. Jehanɛ hu ɔ, e maa ye bua mo konɛ o nyɛ nɛ o tsu ní kɛ hyɛ mo nitsɛ o he kɛ weku ɔ, nɛ huɛ bɔmi kpakpa maa hi o kɛ ni kpahi nyɛ kpɛti. Mo susu ní komɛ nɛ a he hia nɛ ma nyɛ maa ye bua mo ngɛ si himi mi ɔ he nɛ o hyɛ.

10-11. Ke niheyo ko le ní kanemi kɛ ní ngmami saminya a, kɛ e maa ye bua lɛ nitsɛ kɛ asafo ɔ ha kɛɛ? (La 1:​1-3) (Hyɛ foni ɔ hulɔ.)

¹⁰ Moo kase ní kanemi kɛ ní ngmami saminya. Baiblo ɔ tsɔɔ kaa loko niheyo ko ma ná bua  jɔmi nɛ e ye manye ngɛ si himi mi ɔ, ja e ná be kɛ kane Mawu Munyu ɔ nɛ e pue e yi mi tɛ ngɛ he. (Kane La 1:​1-3.) Ke niheyo ko kaneɔ Baiblo ɔ daa ligbi ɔ, e maa le bɔ nɛ Yehowa susuɔ níhi a he ha, nɛ lɔ ɔ maa ye bua lɛ konɛ e susu níhi a he saminya, nɛ e kɛ níhi nɛ e kaneɔ ngɛ Ngmami ɔ mi ɔ nɛ tsu ní. (Abɛ 1:​3, 4) Nyumuhi kaa jã a, a he hia ngɛ asafo ɔ mi. Mɛni he je?

¹¹ Wa hia nyumuhi kaa jã ngɛ asafo ɔ mi konɛ a nyɛ nɛ a tsɔɔ wɔ ní nɛ a wo wɔ ga kɛ je Baiblo ɔ mi. (Tito 1:9) Ke o nyɛɔ nɛ o kaneɔ ní nɛ o ngmaa ní saminya a, e maa ye bua mo konɛ o dla o he kɛ ha ní tsumihi nɛ a kɛ maa wo o dɛ ngɛ asafo ɔ mi, nɛ o ha munyu heto konɛ o kɛ fia nyɛmimɛ ɔmɛ kɛ ma si hulɔ. Jehanɛ hu ɔ, e maa ye bua mo nɛ ke o ya asafo mi kpehi loo kpɔ mi kpe loo kpokpa nɔ kpe ɔ, o ma nyɛ maa ngma otihi nɛ a he hia kɛ fɔ si. Níhi nɛ o maa ngma kɛ fɔ si ɔ maa ye bua mo konɛ o hemi kɛ yemi ɔ mi nɛ wa, nɛ o wo ni kpahi he wami hulɔ.

12. Mɛni maa ye bua mo konɛ o le bɔ nɛ a kɛ nihi sɛɛɔ ní ha saminya?

¹² Moo kase bɔ nɛ a kɛ nihi sɛɛɔ ní ha saminya. E sa nɛ nyumu nɛ e ji Kristofo no ɔ nɛ e le bɔ nɛ a kɛ nihi sɛɛɔ ní ha saminya. Enɛ ɔ tsɔɔ kaa ke e kɛ nihi ngɛ ní sɛɛe ɔ, e sa nɛ e bu mɛ tue nɛ e le bɔ nɛ a ngɛ he nue ha. (Abɛ 20:5) Ke e kɛ nɔ ko ngɛ munyu tue ɔ, e ma nyɛ maa bɔ mɔde nɛ e yɔse nɔ ɔ gbi tso kɛ bɔ nɛ nɔ ɔ pee e hɛ mi ha kɛ e ní peepee. Ja o náa be nɛ o kɛ nihi sɛɛɔ ní loko o ma nyɛ maa pee ní nɛ ɔmɛ. Ke o pɔɔ nihi sɛ gbi manemi kɛ guɔ fon nɔ ɔ, lɔ ɔ be hae nɛ o le bɔ nɛ a kɛ nihi sɛɛɔ ní ha hɛ mi kɛ hɛ mi. Enɛ ɔ he ɔ, moo bɔ mɔde kaa o kɛ nihi maa sɛɛ ní hɛ mi kɛ hɛ mi.—2 Yoh. 12.

13. Mɛni ji nɔ́ kpa ko nɛ e sa nɛ niheyo ko nɛ e kase? (1 Timoteo 5:8) (Hyɛ foni ɔ hulɔ.)

¹³ Mo tsu ní kɛ hyɛ mo nitsɛ o he. E sa nɛ nyumu nɛ e ji Kristofo no nɛ e nane pi si ɔ nɛ e tsu ní konɛ e nyɛ nɛ e hyɛ lɛ nitsɛ e he kɛ weku ɔ. (Kane 1 Timoteo 5:8.) Ngɛ ma komɛ a nɔ ɔ, nihewi ma nyɛ maa kase ní tsumi nɛ a papaa loo a weku no kpa ko tsuɔ ɔ. Ngɛ ma kpahi hu a nɔ ɔ, niheyo ko ma nyɛ maa kase nine nya ní tsumi ko ngɛ nɔ tsami sukuu. Ngɛ anɔkuale mi ɔ, e hi kaa o maa kase nine nya ní tsumi nɛ maa ye bua mo hwɔɔ se konɛ o ná ní tsumi nɛ o tsu. (Níts. 18:​2, 3; 20:34; Efe. 4:28) Ke o ngɛ nɔ́ ko he ní tsue ɔ, moo bɔ mɔde wawɛɛ kaa o maa gbe nya. Ke o pee jã a, ni kpahi ma yɔse, nɛ a bua maa jɔ o ní tsumi he wawɛɛ, nɛ e he be wae kaa o ma ná ní tsumi hulɔ. Suhi kɛ ní kpahi nɛ wa susu a he kɛ sɛ hlami ɔ hu he hia nyumuhi nɛ a ji Kristofohi ɔ wawɛɛ, ejakaa e maa ye bua mɛ konɛ a nyɛ nɛ a tsu ní tsumihi nɛ a kɛ ma nyɛ maa wo a dɛ hwɔɔ se ɔ. Amlɔ nɛ ɔ, nyɛ ha nɛ wa susu ní tsumi nɛ ɔmɛ ekomɛ a he nɛ waa hyɛ.

14. Mɛni nɛ nyɛminyumu wayoo ko ma nyɛ maa pee kɛ dla e he kɛ ha be tsuo sɔmɔmi ní tsumi ɔ?

¹⁴ O ma nyɛ maa ngɔ o he kɛ wo be tsuo sɔmɔmi ní tsumi ɔ mi. Nyɛmimɛ nyumuhi fuu nɛ a nane pi si nɛ a ngɛ be tsuo sɔmɔmi ní tsumi ɔ mi ɔ je sisi be mi nɛ a ji nihewi. Blɔ gbami ní tsumi ɔ yeɔ bua nihewi nɛ a leɔ bɔ nɛ a kɛ nihi slɔɔtoslɔɔtohi maa hi si ha. Jehanɛ hu ɔ, e yeɔ bua mɛ nɛ a nyɛɔ nɛ a toɔ a sika he blɔ nya saminya. (Filip. 4:​11-13) Ke o ngɛ hlae nɛ o kɛ o he nɛ wo be tsuo sɔmɔmi ní tsumi ɔ mi ɔ, o ma nyɛ maa je sisi nɛ o kɛ o he nɛ wo blɔ gbali a wami ní tsumi ɔ mi. Behi fuu ɔ, ke nihi ngɛ hlae nɛ a ngɔ a he kɛ wo daa blɔ gbami ní tsumi ɔ mi ɔ, a ngɔɔ a he kɛ woɔ blɔ gbali a wami ní tsumi ɔ mi be bɔɔ. Ke o kɛ o he wo blɔ gbami ní tsumi ɔ mi ɔ, e ma nyɛ ma bli blɔ kɛ ha mo konɛ o ya ye bua kɛ ma asafo ɔ tsuhi loo o ya sɔmɔ ngɛ Betel.

15-16. Mɛni ma nyɛ maa ye bua niheyo ko konɛ e nyɛ nɛ e sɔmɔ kaa asafo mi sɔmɔlɔ loo asafo mi nɔkɔtɔma?

¹⁵ O ma nyɛ ma sɔmɔ kaa asafo mi sɔmɔlɔ loo asafo mi nɔkɔtɔma. E sa nɛ nyumuhi nɛ a ji Kristofohi ɔ nɛ a bɔ mɔde nɛ a he nɛ su konɛ a nyɛ nɛ a sɔmɔ kaa asafo mi nikɔtɔmahi nɛ a sɔmɔ a nyɛmimɛ ɔmɛ. Baiblo ɔ tsɔɔ kaa ke nyumu ko ngɛ mɔde bɔe kaa e maa su oti nɛ ɔ he ɔ, lɔ ɔ tsɔɔ kaa e “suɔ wawɛɛ nitsɛ kaa e ma tsu ní tsumi kpakpa.” (1 Tim. 3:1) Loko nyumu ko ma sɔmɔ kaa asafo mi nɔkɔtɔma a, kekleekle ɔ, e sa nɛ e he nɛ su nɛ e sɔmɔ kaa asafo mi sɔmɔlɔ. Asafo mi sɔmɔli yeɔ bua asafo mi nikɔtɔma amɛ ngɛ blɔhi fuu a nɔ. Asafo mi sɔmɔli kɛ asafo mi nikɔtɔma amɛ tsuo baa a he si nɛ a yaa nɔ nɛ a sɔmɔɔ a nyɛmimɛ ɔmɛ nɛ a kɛ kã tsuɔ fiɛɛmi ní tsumi ɔ hulɔ. Nihewi nɛ a yi jeha 20 lolo po ma nyɛ maa bɔ mɔde nɛ a he nɛ su konɛ a sɔmɔ kaa asafo mi sɔmɔli. Jehanɛ hu ɔ, ke asafo mi sɔmɔlɔ ko ye jeha 20 pɛ po, se e bɔɔ mɔde wawɛɛ ɔ, a ma nyɛ maa hla lɛ kaa asafo mi nɔkɔtɔma.

¹⁶ Mɛni o ma nyɛ maa pee konɛ o he nɛ su nɛ o sɔmɔ kaa asafo mi sɔmɔlɔ konɛ pee se ɔ, o sɔmɔ kaa asafo mi nɔkɔtɔma? Baiblo ɔ tsɔɔ suhi nɛ e sa kaa o ná konɛ o he nɛ su. Jehanɛ hu ɔ, e sa nɛ o suɔ Yehowa kɛ o weku ɔ kɛ asafo ɔ mi bimɛ ɔmɛ. (1 Tim. 3:​1-13; Tito 1:​6-9; 1 Pet. 5:​2, 3) Moo bɔ mɔde nɛ o le níhi nɛ a ngɛ hlae ngɛ o he, nɛ o sɔle konɛ Yehowa nɛ ye bua mo konɛ o nyɛ nɛ o su jamɛ a ní ɔmɛ a he. c

17. Mɛni ma nyɛ maa ye bua nyɛminyumu wayoo ko konɛ e nyɛ nɛ e pee huno loo weku yi kpakpa? (Hyɛ foni ɔ hulɔ.)

¹⁷ O ma nyɛ maa pee huno kɛ weku yi. Kaa bɔ nɛ Yesu tsɔɔ ɔ, Kristofohi komɛ ngɛ nɛ a ji nyumuhi nɛ a ma a juɛmi nya si kaa a be gba si himi mi sɛe. (Mat. 19:12) Se, ke o ma o juɛmi nya si kaa o maa sɛ gba si himi mi ɔ, blɔ nya ní  tsumi komɛ ma ba fɔ si ngɛ o kuɛ nɔ. O ma ba pee huno kɛ weku yi. (1 Kor. 11:3) Yehowa hyɛɛ blɔ kaa nyumu nɛ́ e suɔ e yo, nɛ e ha lɛ e he lo nya hiami níhi, nɛ e kɛ lɛ nɛ pee e huɛ, nɛ e ye bua lɛ konɛ huɛ bɔmi nɛ ngɛ e kɛ Yehowa a kpɛti ɔ mi nɛ wa. (Efe. 5:​28, 29) Suhi kɛ ní komɛ nɛ maa ye bua mo ngɛ si himi mi nɛ wa susu he kɛ sɛ hlami ngɛ ní kasemi nɛ ɔ mi ɔ ma ha nɛ o pee huno kpakpa. Ní nɛ ɔmɛ ekomɛ ji nɛ o ma susu níhi a he saminya, nɛ o ma ná bumi kɛ ha yihi, nɛ o maa pee o he nɔ nɛ a ma nyɛ maa ngɔ hɛ kɛ fɔ e nɔ. Ke o pee jã a, hwɔɔ se ɔ, o ma nyɛ ma tsu blɔ nya ní tsumihi nɛ ma ba fɔ si ngɛ o kuɛ nɔ kaa huno kɛ weku yi ɔ he ní.

18. Ke niheyo ko suɔ nɛ e pee bitsɛ ɔ, mɛni ma nyɛ maa ye bua lɛ?

¹⁸ O ma nyɛ ma ba pee bitsɛ. Ke o sɛ gba si himi mi se ɔ, o ma nyɛ ma ba pee bitsɛ. Mɛni maa ye bua mo konɛ o pee tsɛ kpakpa kaa bɔ nɛ Yehowa ji ɔ? Níhi fuu ngɛ nɛ o ma nyɛ maa kase ngɛ Yehowa he. (Efe. 6:4) Yehowa de e bi Yesu ke e suɔ lɛ nɛ e bua jɔ e he. (Mat. 3:17) Ke o ba pee bitsɛ ɔ, moo bɔ mɔde kaa o ma de o bimɛ ɔmɛ be fɛɛ be kaa o suɔ mɛ. Moo pɔ a yi jemi ngɛ ní kpakpahi nɛ a peeɔ ɔ he. Bitsɛmɛ nɛ a kaseɔ Yehowa nɔ hyɛmi nɔ́ ɔ, yeɔ bua a bimɛ ɔmɛ nɛ a ba peeɔ Kristofohi nɛ a nane pi si. Ke o ngɛ hlae nɛ o pee bitsɛ kpakpa a, moo je sisi amlɔ nɛ ɔ nɛ o je suɔmi kpo kɛ tsɔɔ nihi nɛ a ngɛ a asafo ɔ mi kɛ o weku ɔ mi ɔ, nɛ o hyɛ a nɔ saminya. Mo de mɛ kaa o suɔ mɛ, nɛ o ha nɛ a na kaa a he jua wa ha mo wawɛɛ. (Yoh. 15:9) Enɛ ɔ maa ye bua mo konɛ hwɔɔ se ɔ, o pee huno kpakpa kɛ bitsɛ kpakpa. Se loko e maa su jamɛ a be ɔ, Yehowa kɛ mo ma tsu ní, nɛ o weku ɔ kɛ asafo ɔ tsuo ma ná he se wawɛɛ.

19-20. Mɛni maa ye bua nihewi konɛ a pee Kristofohi nɛ a nane pi si? (Hyɛ foni nɛ ngɛ womi ɔ hɛ mi ɔ.)

¹⁹ Nihewi, e biɔ mɔde bɔmi wawɛɛ loko nyɛ ma nyɛ maa pee Kristofohi nɛ a nane pi si. Bɔ nɛ pee nɛ nyɛ nyɛ nɛ nyɛɛ pee jã a, e sa nɛ nyɛɛ kɛ nihi nɛ a peeɔ nɔ hyɛmi nɔ́ kpakpa nɛ bɔ, nɛ nyɛɛ kase mɛ, nyɛ susu níhi a he saminya, nyɛɛ pee nyɛ he nihi nɛ a ma nyɛ maa ngɔ hɛ kɛ fɔ a nɔ, nyɛɛ kase ní komɛ nɛ ma nyɛ maa ye bua nyɛ ngɛ si himi mi, nɛ nyɛ dla nyɛ he kɛ ha blɔ nya ní tsumihi nɛ a kɛ maa wo nyɛ dɛ hwɔɔ se ɔ.

²⁰ Ke nyɛ susu níhi nɛ e sa kaa nyɛ tsu he ní ɔ a he ɔ, eko ɔ, nyɛ ma susu kaa nyɛ be nyɛe maa pee. Se nyɛ kɔni mi nɛ ko jɔ̃, nyɛ ma nyɛ maa pee. Nyɛ kai kaa Yehowa suɔ kaa e maa ye bua nyɛ. (Yes. 41:​10, 13) Ngɛ anɔkuale mi ɔ, nyɛmimɛ nɛ a ngɛ asafo ɔ mi ɔ hu maa ye bua nyɛ. Ke nyɛ bɔ mɔde nɛ nyɛ pee Kristofohi nɛ a nane pi si ɔ, nyɛ tsui maa nɔ nyɛ mi. Nihewi, wa suɔ nyɛ wawɛɛ! Ke nyɛ bɔ mɔde kaa nyɛ maa pee Kristofohi nɛ a nane pi si ɔ, Yehowa maa jɔɔ nyɛ wawɛɛ.—Abɛ 22:4.