1. Mɛni blɔ nɔ Nyɛminyumu Russell kɛ nihi nɛ a piɛɛ e he ɔ gu kɛ kase Baiblo ɔ, nɛ mɛni he je nɛ e ji blɔ kpakpa a?

NYƐMINYUMU C.  T.  Russell kɛ nihi nɛ piɛɛ e he, nɛ ji kuu nyafii ko kpeɔ nɛ a kaseɔ Mawu Munyu ɔ ngɛ jeha lafa kɛ se nɛ be ɔ mi. A suɔ nɛ a le nɔ́ nɛ Baiblo ɔ tsɔɔ ngɛ Yehowa Mawu, Yesu Kristo, si fɔfɔɛ mi nɛ gbogboehi ngɛ, kɛ kpɔmi nɔ́ ɔ he. Bɔ nɛ a kaseɔ ní ha a yi kulaa. Nɔ ko ma bi sane, kɛkɛ kuu ɔ mi bi ɔmɛ pee níhi a mi hlami ngɛ ngmamihi tsuo nɛ kɔɔ jamɛ a sane bimi ɔ he ɔ he. Nɛ lɔ ɔ se ɔ, a ngmaa níhi nɛ a na a kɛ fɔɔ si. Yehowa ye bua nyumuhi anɔkualetsɛmɛ nɛ ɔmɛ nɛ a nu Baiblo mi anɔkualehi fuu nɛ a he hia a sisi. Kikɛmɛ a anɔkuale nɛ ɔmɛ hu he hia wɔ mwɔnɛ ɔ.

2. Be komɛ ɔ, mɛni ma nyɛ ma ha nɛ waa nu Baiblo gbami ko sisi ngɛ blɔ nɛ dɛ nɔ?

² Se e kɛ we nɛ Baiblo kaseli ɔmɛ yɔse kaa Baiblo mi gbamihi a sisi numi yee pe Baiblo sisije tsɔɔmi ɔmɛ. Mɛni he je? Yi mi tomi kake he je ji kaa behi fuu ɔ, ke Baiblo gbami ko ngɛ mi bae loo e ba mi ta a, e sisi numi yi. Se yi mi tomi kpa ko hu ngɛ. Loko wa maa nu Baiblo gbami ko sisi saminya a, e he maa hia nɛ wa susu gbami ɔ tsuo he. Ke wa ngɔ wa juɛmi kɛ ma gbami ɔ fã ko pɛ nɔ nɛ wa si fã komɛ ɔ, eko ɔ, wa maa nu sisi ngɛ blɔ nɛ dɛ nɔ. Nɛ jã ji bɔ nɛ e ba ngɛ Yoel gbami ɔ blɔ fa mi. Amlɔ nɛ ɔ, wa ma susu gbami ɔ he ekohu, nɛ́ waa hyɛ nɔ́ he je nɛ e biɔ nɛ wa tsake bɔ nɛ wa nu sisi ha a he.

3-4. Ngɛ jehahi nɛ be ɔ mi ɔ, kɛ wa nu gbami nɛ ngɛ Yoel 2:7-9 ɔ sisi ha kɛɛ?

³ Kane Yoel 2:7-9. Yoel gba kaa baalɛhi babauu ma ba kpata Israel zugba a hɛ mi. Baalɛ nɛ ɔmɛ a lungu kɛ a  tsitsa wu ngɛ kaa jata nɔ́, nɛ a ma puɛ niba ní tsuo nɛ ngɛ Israel zugba a nɔ ɔ! (Yoel 1:4, 6) Ngɛ jehahi nɛ be ɔ mi ɔ, wa nu gbami nɛ ɔ sisi kaa, Yehowa we bi ngɛ fiɛɛe kaa baalɛhi nɛ nɔ́ ko be nyɛe maa tsi a nya. Wa ba le hu kaa ní tsumi nɛ ɔ ma gba “zugba” a, loo nihi nɛ jami hɛ mi nyɛɛli ɔmɛ ngɛ mɛ kudɔe ɔ a nya. *

⁴ Ke wa kane Yoel 2:7-9 ɔ pɛ ɔ, wa ma susu kaa jamɛ a sisi numi ɔ da. Se ke wa susu gbami ɔ tsuo he saminya a, wa maa na kaa sisi numi nɛ ɔ dɛ. Nyɛ ha nɛ wa susu yi mi tomi eywiɛ komɛ a he je nɛ wa deɔ jã a he nɛ waa hyɛ.

5-6. Mɛni sane nɛ wa biɔ ke wa kane (a) Yoel 2:20? (b) Yoel 2:25?

⁵ Kekleekle ɔ, mo kadi si nɛ Yehowa wo ngɛ baalɛ ɔmɛ a he ɔ. E de ke: “Ma je baalɛ tabo nɛ je omleyi je ba tua nyɛ ɔ kɛ je nyɛ he kɛ ho lokoo ya.” (Yoel 2:20) Ke baalɛ nɛ ɔmɛ daa si kɛ ha Yehowa Odasefohi nɛ a buɔ Yesu fami tue, nɛ a fiɛɛɔ nɛ a peeɔ nihi kaseli ɔ, lɛɛ mɛni he je nɛ Yehowa wo si kaa e ma je mɛ kɛ ho lokoo ya a? (Eze. 33:7-9; Mat. 28:19, 20) E ngɛ heii kaa pi Yehowa sɔmɔli anɔkualetsɛmɛ ɔmɛ ji nihi nɛ e ma je mɛ kɛ ho, se mohu ɔ, nɔ ko aloo nɔ́ ko nɛ gbaa Yehowa we bi a nya.

⁶ Yi mi tomi enyɔne. Mo susu sane nɛ ngɛ Yoel 2:25 ɔ he nɛ o hyɛ. Lejɛ ɔ nɛ Yehowa de ke: “Ní nɛ baalɛ ɔmɛ ba ha nɛ a ye jeha babauu ɔ, ma ha nyɛ ekohu. Imi nitsɛ nɛ i je baalɛ slɔɔtoslɔɔtohi a ta nguaa nɛ ɔ kɛ wo nyɛ ɔ nɛ.” Mo kadi kaa Yehowa wo si kaa níhi nɛ baalɛ ɔmɛ puɛ ɔ, e “ma ha [mɛ] ekohu.” Ke baalɛ ɔmɛ daa si kɛ ha Matsɛ Yemi sane kpakpa fiɛɛli ɔ, lɛɛ lɔ ɔ maa tsɔɔ kaa sɛ gbi nɛ a fiɛɛɔ ɔ puɛɔ ní. Se sane kpakpa a heɔ nihi a yi wami, nɛ e ma nyɛ ma ha nɛ nimli yayamihi po nɛ tsake. (Eze. 33:8, 19) Enɛ ɔ ji nɔ́ kpakpa, se pi nɔ́ yaya!

7. Mɛni sisi numi nɛ munyu nɛ ji “pee se” nɛ ngɛ Yoel 2:28, 29 ɔ yeɔ bua wɔ nɛ wa náa?

⁷ Kane Yoel 2:28, 29. Yi mi tomi etɛne ɔ ji bɔ nɛ a to níhi nɛ maa ya nɔ ɔ nya ha ngɛ gbami ɔ mi. Yehowa de ke: “Pee se ɔ, ma plɛ ye mumi ɔ kɛ pue [a] nɔ.” Lɔ ɔ maa pee be nɛ baalɛ ɔmɛ gbe ní tsumi nɛ a kɛ wo a dɛ ɔ nya. Ke baalɛ ɔmɛ ji Mawu Matsɛ Yemi ɔ he sane kpakpa fiɛɛli ɔ, lɛɛ mɛni he je nɛ Yehowa de ke e ma plɛ e mumi ɔ kɛ pue a nɔ pee se be mi nɛ a gbe fiɛɛmi ní tsumi ɔ nya a? Anɔkuale sane ji kaa ke pi Mawu mumi klɔuklɔu ɔ nɛ ye bua mɛ ɔ, jinɛ a ko nyɛ we sane kpakpa a fiɛɛmi jehahi babauu ngɛ si temi kɛ womi nɛ a kɛ kpe kɛ nya tsimihi nɛ a kɛ ba a nɔ ɔ tsuo se.

8. Baalɛhi nɛ a kale ngɛ Kpo Jemi 9:1-11 ɔ daa si kɛ ha mɛnɔmɛ? (Hyɛ foni nɛ ngɛ womi ɔ hɛ mi ɔ.)

⁸ Kane Kpo Jemi 9:1-11. Amlɔ nɛ ɔ, nyɛ ha nɛ waa hyɛ yi mi tomi eywiɛne ɔ. Be ko nɛ be ɔ, wa tsɔɔ kaa baalɛhi nɛ Yoel tu a he munyu ɔ daa si kɛ ha wa fiɛɛmi ní tsumi ɔ, ejakaa Kpo Jemi womi ɔ hu tu gbami ko kaa jã he munyu. Gbami nɛ ngɛ Kpo Jemi womi ɔ mi ɔ tsɔɔ baalɛhi a kuu ko nɛ a hɛ mi ngɛ kaa adesa hɛ mi, nɛ nɔ́ ko ngɛ a yi “kaa sika tsu jlasi.” (Kpoj. 9:7) Baalɛ nɛ ɔmɛ pii “ni nɛmɛ [Mawu he nyɛli] nɛ Mawu nɔ́ nya sɔumi nɔ́ ɔ be a hɛ nya a” nyɔhiɔ enuɔ. Baalɛhi yeɔ maa pee nyɔhiɔ enuɔ ngɛ je mi. (Kpoj. 9:4, 5) E ngɛ heii kaa Yehowa  sɔmɔli anɔkualetsɛmɛ nɛ a pɔ mɛ nu ɔ a he munyu nɛ a ngɛ tue ɔ nɛ. A kɛ kã jajeɔ Mawu kojomi ɔ kɛ siɔ je yaya nɛ ɔ, nɛ lɔ ɔ haa nɛ nihi nɛ a fĩɔ je yaya nɛ ɔ se ɔ a he jɔɛ mɛ.

9. Mɛni slɔɔto lɛ ngɛ baalɛhi nɛ Yoel na a kɛ nɔ́ nɛ Yohane na a a kpɛti?

⁹ Ngɛ anɔkuale mi ɔ, gbami nɛ ngɛ Kpo Jemi womi ɔ mi ɔ kɛ nɔ́ nɛ ngɛ Yoel womi ɔ mi ɔ je a he. Se kɛ̃ ɔ, slɔɔto ngɛ a kpɛti. Mo susu he nɛ o hyɛ: Ngɛ Yoel gbami ɔ mi ɔ, baalɛ ɔmɛ kpata ngmɔ niba ní ɔmɛ a hɛ mi. (Yoel 1:4, 6, 7) Se ngɛ Yohane nina a mi ɔ, a “de [baalɛ ɔmɛ] ke a ko ye zugba a nɔ nga . . . ko awi.” (Kpoj. 9:4) Baalɛhi nɛ Yoel na a je omleyi je. (Yoel 2:20) Se nɔ́ nɛ Yohane na a je muɔ voo ɔ mi. (Kpoj. 9:2, 3) A je baalɛhi nɛ Yoel tu a he munyu ɔ kɛ ho lokoo ya. Se ngɛ Kpo Jemi womi ɔ mi ɔ, a je we baalɛ ɔmɛ kɛ yɛ he ko, mohu ɔ, a ngmɛɛ a he, nɛ a gbe a ní tsumi ɔ nya. Nɔ́ ko be Baiblo ɔ mi nɛ tsɔɔ kaa Yehowa bua jɔɛ a he.​—Hyɛ daka nɛ ji “ Gbamihi Nɛ Kɔɔ Baalɛhi A He​—A Je A He Se Slɔɔto Ngɛ A Kpɛti” ɔ.

10. Mɛni Baiblo mi nɔ hyɛmi nɔ́ ko lɛ tsɔɔ kaa baalɛhi nɛ Yoel tu a he munyu kɛ nɔ́ nɛ Yohane tu a he munyu ɔ ma nyɛ maa da si kɛ ha ní kpahi?

¹⁰ Slɔɔto nɛ ngɛ gbami enyɔ nɛ ɔmɛ a kpɛti ɔ ye bua wɔ nɛ wa nu sisi kaa tsakpa ko be gbami nɛ ɔmɛ a mi. Anɛ wa ngɛ  tsɔɔe kaa baalɛhi nɛ Yoel tu a he munyu ɔ je ekpa ngɛ baalɛhi nɛ a tu a he munyu ngɛ Kpo Jemi womi ɔ mi ɔ he lo? Ee. Be komɛ ɔ, ke a kɛ okadi kake tsu ní ngɛ blɔ ekpaekpa nɔ ngɛ Baiblo ɔ mi ɔ, e nyɛɔ hɛɛɔ sisi numi ekpaekpa. Kaa nɔ hyɛmi nɔ́ ɔ, ngɛ Kpo Jemi 5:5 ɔ, a tsɛ Yesu ke “Yuda wɛtso ɔ mi Jata,” nɛ ngɛ 1 Petro 5:8 ɔ, a kale Abosiami kaa “jata nɛ ngɛ huãe.” Yi mi tomi eywiɛ ɔmɛ nɛ wa susu he kɛ sɛ hlami kɛ nyagbahi nɛ wa na ngɛ he ɔ ha nɛ wa na kaa e he hia nɛ waa le nɔ́ nɛ Yoel gbami ɔ tsɔɔ nitsɛnitsɛ. Lɛɛ mɛni nɛ Yoel gbami ɔ ngɛ tsɔɔe mɔ?

11. Ngɛ mɛni blɔ nɔ nɛ Yoel 1:6 kɛ 2:1, 8, 11 ɔ yeɔ bua wɔ nɛ wa naa nɔ́ nɛ baalɛ ɔmɛ daa si kɛ ha?

¹¹ Ke wa susu ngmami kpahi nɛ ngɛ Yoel womi ɔ mi nɛ kɔɔ gbami ɔ he ɔ, wa maa na kaa gbalɔ ɔ ngɛ ta buli a tuami ko he munyu tue. (Yoel 1:6; 2:1, 8, 11) Yehowa tsɔɔ kaa e maa ngɔ e “ta nguaa” (Babilonia ta buli) kɛ gbla Israel bi tue gboli ɔmɛ a tue. (Yoel 2:25) E da kaa a tsɛ ta buli nɛ ɔmɛ ke tabo nɛ je “omleyi je,” ejakaa Babilonia bi ɔmɛ ma ya tua Israel bi ɔmɛ kɛ je omleyi je. (Yoel 2:20) A ngɔ jamɛ a ta buli ɔmɛ kɛ to baalɛhi a kuu nɛ a to a he blɔ nya saminya a he. Yoel de ngɛ a he ke: “A maa gblee níhi a mi kɛ be slɔkee, . . . a maa tuu kɛ sɛ ma a mi; a maa ma fo ngɛ gbogbo ɔmɛ a nɔ, nɛ a maa kuɔ kɛ gu saflɛhi a mi, kɛ sɛ wehi a mi kaa juli.” (Yoel 2:8, 9) Moo po he foni nɛ o hyɛ. Ta buli ngɛ he fɛɛ he. He ko be nɛ o maa laa o he ngɛ. Nɔ ko be nyɛe maa je Babilonia bi ɔmɛ a dɛ mi!

12. Yoel gbami nɛ kɔɔ baalɛ ɔmɛ a he ɔ ba mi ngɛ mɛni blɔ nɔ?

¹² Babilonia bi (loo, Kaldea bi) nɛ a ngɛ kaa baalɛhi ɔ ya tua Yerusalem ma a ngɛ jeha 607 ɔ loko a fɔ Kristo ɔ mi. Baiblo ɔ bɔ amaniɛ ke: ‘Babilonia matsɛ ɔ kɛ klaate gbe Yuda nihewi ɔmɛ, . . .  e nɛ́ nɔ ko nɔ ko mɔbɔ, jokuɛyo jio, nɔkɔtɔma jio, yo jio, nyumu jio, hiɔtsɛ jio, nɔ nɛ ngɛ he wami jio. Mawu ngɔ mɛ tsuo pɛpɛɛpɛ ngɔ wo e dɛ mi. E sã Yehowa we ɔ, kɛ Yerusalem ma a kɛ e mi mɔ ɔmɛ; e kpata ní kpakpahi tsuo a hɛ mi, nɛ e ku Yerusalem gbogbo ɔ ngɔ pue si.’ (2 Kron. 36:17, 19) Benɛ Babilonia bi ɔmɛ ya tua ma a nɛ a kpata zugba a hɛ mi ta a, nɔ́ nɛ nihi de ji: “Zugba nɛ ɔ ma ba pee nga kplanaa nɔ, nɛ nimli kɛ lohwehi be nɔ hie hu. A ngɛ dee hu ke a maa ngɔ zugba a kɛ wo Babilonia bi ɔmɛ a dɛ mi.”​—Yer. 32:43.

13. Mɛni nɛ munyu nɛ ngɛ Yeremia 16:16, 18 ɔ tsɔɔ?

¹³ Yoel gbami ɔ se maa pee jeha 200 ɔ, Yehowa gu Yeremia nɔ kɛ gba kɛ kɔ tuami nɛ ɔ nɔuu he. E tsɔɔ kaa nihi nɛ a ma ba tua mɛ ɔ ma hla Israel bi nɛ a pee ní yayamihi ɔ tsuo saminya, nɛ a maa nuu mɛ tsuo. ‘Yehowa ke, “Ma tsɔ hɛli babauu kɛ ba nɛ a ba hɛ nimli nɛ ɔmɛ kaa a hɛɛ lo. Lɔ ɔ se ɔ, ma tsɔ de dali babauu kɛ ba nɛ a ba da mɛ kaa a daa lohwe de ngɛ yo tsuaa yo, kɛ yoku tsuaa yoku, kɛ tɛ puɔ tsuaa tɛ puɔ mi ngɛ tɛ sa amɛ a nɔ. Ma gbla a tue si enyɔ ngɛ a yayami ɔmɛ, kɛ a yi wu tso ní ɔmɛ a he.”’ Wo ɔ loo hue tso ɔmɛ po be nyɛe maa laa Israel bi nɛ a tsakee we a tsui ɔ a nɔ konɛ Babilonia bi ɔmɛ a nine ko su a nɔ.​—Yer. 16:16, 18.

14. Mɛni be nɛ Yoel 2:28, 29 ɔ ba mi?

¹⁴ Jehanɛ ɔ lɛɛ, Yoel tu nɔ́ kpakpa ko he munyu. Zugba a maa ba ní ekohu. (Yoel  2:23-26) Nɛ hwɔɔ se ko ɔ, mumi mi niye ní fuu ma ba pɔ he. Yehowa de ke, “Ma plɛ ye mumi ɔ kɛ pue nɔ tsuaa nɔ nɔ; nyɛ binyumu ɔmɛ kɛ nyɛ biyi ɔmɛ maa fiɛɛ ye sɛ gbi ɔ . . . Jamɛ a be ɔ mi ɔ, ma plɛ ye mumi ɔ kɛ pue tsɔli, kɛ mawayihi po a nɔ.” (Yoel 2:28, 29) Pi be nɛ Israel bi ɔmɛ je Babilonia kɛ ba a zugba a nɔ nɔuu nɛ Mawu plɛ e mumi ɔ kɛ pue a nɔ. Mohu ɔ, nɔ́ nɛ ɔ ya nɔ jeha lafa komɛ a se ngɛ Pentekoste ligbi ɔ nɔ ngɛ jeha 33 ɔ mi. Kɛ wa plɛ kɛ le enɛ ɔ ha kɛɛ?

15. Ngɛ Ní Tsumi 2:16, 17 ɔ nya a, mɛni tsakemi nɛ Petro pee ngɛ ngmami nɛ ngɛ Yoel 2:28 ɔ he, nɛ mɛni lɔ ɔ tsɔɔ?

¹⁵ Mumi klɔuklɔu ɔ ye bua bɔfo Petro nɛ e ngɔ nɔ́ nɛ ya nɔ ngɛ Pentekoste ligbi ɔ nɔ ɔ kɛ to Yoel 2:28, 29 ɔ he. Jamɛ a mɔtu ɔ maa pee ngmlɛ nɛɛ ɔ, Mawu plɛ e mumi klɔuklɔu ɔ kɛ pue nihi a nɔ, nɛ ni ɔmɛ bɔni “Mawu ní nguangua amɛ” jajemi. (Níts. 2:11) Ngɛ Mawu mumi klɔuklɔu ɔ yemi kɛ buami nya a, Petro ngɔ munyu kpa komɛ kɛ da munyu komɛ nɛ ngɛ Yoel gbami ɔ mi ɔ nane mi. Anɛ o kadi tsakemi nɛ e pee ɔ lo? (Kane Ní Tsumi 2:16, 17.) Petro kɛ munyu nɛ ji “pee se” nɛ a kɛ tsu ní ngɛ Yoel womi ɔ mi ɔ tsu we ní. Mohu ɔ, e de ke: “Nɛ ngɛ nyagbe ligbi ɔmɛ a mi ɔ.” Nyagbe ligbi ɔ nɛ a ngɛ he munyu tue ɔ ji be nɛ e piɛ bɔɔ nɛ a ma kpata Yerusalem ma a kɛ sɔlemi we ɔ hɛ mi ɔ nɛ. Jamɛ a be ɔ, Mawu ma plɛ e mumi klɔuklɔu ɔ kɛ pue “he lo fɛɛ he lo nɔ.” Enɛ ɔ tsɔɔ kaa be pue mi loko Yoel gbami nɛ ɔ ba mi.

16. Mɛni blɔ nɔ nɛ Mawu mumi klɔuklɔu ɔ ye bua nɛ fiɛɛmi ní tsumi ɔ ya hɛ mi ngɛ kaseli ɔmɛ a be ɔ mi, nɛ wa be nɛ ɔ mi hu nɛɛ?

¹⁶ Mawu plɛ mumi klɔuklɔu ɔ kɛ pue Kristofohi nɛ a hi si ngɛ kaseli ɔmɛ a be ɔ  mi ɔ a nɔ se loko fiɛɛmi ní tsumi ɔ yi bɔni blimi. E ma nyɛ maa pee kaa jeha 61 ɔ mi nɛ bɔfo Paulo ngma sɛ womi kɛ ya ha Kolose asafo ɔ nɛ. Ngɛ jamɛ a sɛ womi ɔ mi ɔ, e tsɔɔ kaa a ngɛ sane kpakpa a fiɛɛe kɛ ha “adebɔ níhi tsuo nɛ a ngɛ hiɔwe sisi ɔ.” (Kol. 1:23) “Adebɔ níhi tsuo” nɛ Paulo kɛ tsu ní ɔ tsɔɔ je ɔ mi he slɔɔtohi nɛ Paulo kɛ ni kpahi ma nyɛ maa hia blɔ kɛ ya. Kɛ gu Yehowa mumi klɔuklɔu ɔ yemi kɛ buami nɔ ɔ, fiɛɛmi ní tsumi ɔ ya hɛ mi ngɛ wa be nɛ ɔ mi kɛ “ya su zugba a nyagbe he ɔmɛ”!​—Níts. 13:47; hyɛ daka nɛ ji, “ Ma Plɛ Ye Mumi ɔ Kɛ Pue” A Nɔ.

17. Mɛni blɔ nɔ nɛ bɔ nɛ wa nu Yoel gbami nɛ kɔɔ baalɛ ɔmɛ a he ɔ sisi ha a tsake?

¹⁷ Mɛni lɛ tsake? Amlɔ nɛ ɔ, wa nu gbami nɛ ngɛ Yoel 2:7-9 ɔ sisi saminya. E ngɛ heii kaa kuku nɛ ɔmɛ kɔ we fiɛɛmi ní tsumi ɔ nɛ waa kɛ kã ngɛ tsue ɔ he, mohu ɔ, e kɔɔ hɛ mi kpatami nɛ Babilonia ta buli ɔmɛ kɛ ba Yerusalem bi ɔmɛ a nɔ ngɛ jeha 607 ɔ mi loko a fɔ Kristo ɔ he.

18. Mɛni lɛ tsakee we ngɛ Yehowa we bi a he?

¹⁸ Mɛni lɛ tsakee we? Yehowa we bi yaa nɔ nɛ a guɔ blɔ slɔɔtohi a nɔ kɛ fiɛɛɔ sane kpakpa a ngɛ he fɛɛ he. (Mat. 24:14) Nɔ yemi ko be nɛ ma nyɛ maa tsi ní tsumi nɛ a kɛ wo wa dɛ kaa waa fiɛɛ ɔ nya. Nɛ ngɛ Yehowa yemi kɛ buami nya a, waa kɛ kã ngɛ Matsɛ Yemi sane kpakpa a fiɛɛe pe be ko nɛ be ɔ! Nyɛ ha nɛ waa ya nɔ nɛ waa ngɔ wa hɛ kɛ fɔ Yehowa nɔ konɛ e ye bua wɔ nɛ waa nu Baiblo gbamihi a sisi, ejakaa wa he ye kaa ngɛ be nɛ sa mi ɔ, e ma kudɔ wɔ “kɛ ya anɔkuale ɔ tsuo mi”!​—Yoh. 16:13.