1-2. Mɛni blɔ nɔ wa maa gu kɛ nyɛɛ Yesu se? Moo ngɔ nɔ́ he tomi nɔ́ ko kɛ tsɔɔ mi.

NGƆƆ lɛ kaa o kɛ ni komɛ ngɛ nyɛɛe ngɛ he ko nɛ ngɛ gbeye, nɛ mɔsɔ hu ngɛ lejɛ ɔ. Nɔ ko nɛ e le blɔ ɔ nɔ saminya a ngɛ nyɛ hɛ mi nyɛɛe. E sɛ nyɛ hlami nɛ nyɛ na hehi nɛ e kɛ e nane ma ngɛ mɔsɔ ɔ mi. Benɛ nyɛ yaa bɔɔ ɔ, nyɛ nɛ hɛ mi nyɛɛlɔ ɔ hu! Se nyɛ tsui pui, mohu ɔ, nyɛ nyɛɛ hɛ mi nyɛɛlɔ ɔ nane mami he ɔmɛ a se haa!

² Ngɛ blɔ ko nɔ ɔ, anɔkuale Kristofohi hu ngɛ nyɛɛe ngɛ he ko nɛ ngɛ gbeye nɛ ji je yaya nɛ ɔ mi. Bua jɔmi sane ji kaa Yehowa ha wɔ hɛ mi nyɛɛlɔ nɛ ye mluku nɛ ji e Bi Yesu Kristo. Wa ma nyɛ maa nyɛɛ e nane mami he ɔmɛ a se haa. (1 Pet. 2:21) Baiblo sisi tsɔɔmi womi ko tsɔɔ kaa ngɛ ngmami nɛ ɔ mi ɔ, Petro ngɔ Yesu kɛ to hɛ mi nyɛɛlɔ he. Kaa bɔ nɛ wa ma nyɛ maa na hehi nɛ hɛ mi nyɛɛlɔ ko kɛ e nane ma a, wɔ hu wa naa Yesu nane mami he ɔmɛ, nɛ wa ma nyɛ maa nyɛɛ se. Nyɛ ha nɛ wa susu sane bimi etɛ nɛ ɔmɛ a he. Ke a ke waa nyɛɛ Yesu nane mami he ɔmɛ a se ɔ, mɛni e tsɔɔ? Mɛni he je nɛ e sa nɛ waa pee jã? Nɛ mɛni blɔ nɔ wa maa gu kɛ pee jã?

3. Ke a ke waa nyɛɛ nɔ ko nane mami hehi a se ɔ, mɛni e tsɔɔ?

³ Ke a ke o nyɛɛ nɔ ko nane mami hehi a se ɔ, mɛni e tsɔɔ? Ngɛ Baiblo ɔ mi ɔ, be komɛ ɔ, a kɛ munyunguhi nɛ ji “nyɛɛ” kɛ “nane” daa si ha bɔ nɛ nɔ ko baa e je mi ha. (1 Mose 6:9, NW; Abɛ 4:26, NW) A ma nyɛ maa ngɔ nɔ hyɛmi nɔ́ nɛ nɔ ko pee ngɛ  e si himi mi ɔ kɛ to e nane mami hehi a he. Lɔ ɔ he ɔ, ke a ke waa nyɛɛ nɔ ko nane mami hehi a se ɔ, e tsɔɔ kaa wa maa kase nɔ hyɛmi nɔ́ nɛ nɔ ɔ pee ɔ.

4. Ke a ke waa nyɛɛ Yesu nane mami he ɔmɛ a se ɔ, mɛni e tsɔɔ?

⁴ Lɛɛ ke a ke waa nyɛɛ Yesu nane mami he ɔmɛ a se ɔ, mɛni e tsɔɔ? E kpiti pomi ji kaa wa maa kase e nɔ hyɛmi nɔ́ ɔ. Ngɛ ngmami nɛ a ngɔ ní kasemi ɔ kɛ da nɔ ɔ mi ɔ, bɔfo Petro tu nɔ hyɛmi nɔ́ kpakpa nɛ Yesu pee kɛ gu si nɛ e fĩ ngɛ nɔ́ nami mi ɔ he munyu; se kɛ̃ ɔ, Yesu pee ní kpahi fuu nɛ wa ma nyɛ maa kase. (1 Pet. 2:18-25) Ngɛ anɔkuale mi ɔ, níhi tsuo nɛ Yesu de kɛ níhi tsuo nɛ e pee ngɛ e si himi mi ɔ ji nɔ́ ko nɛ wa ma nyɛ maa kase.

5. Anɛ adesahi nɛ a yi mluku ɔ ma nyɛ maa kase Yesu nɛ e ye mluku ɔ lo? Moo tsɔɔ nya.

⁵ Anɛ adesahi nɛ a yi mluku ɔ ma nyɛ maa kase Yesu nɔ hyɛmi nɔ́ ɔ lo? Ee, a ma nyɛ. Mo kai kaa Petro wo wɔ he wami kaa waa “nyɛɛ [Yesu] nane mami he ɔmɛ a se haa,” se pi kaa nihi nɛ a ye mluku. Ke wa nyɛɛ e nane mami he ɔmɛ a se, nɛ ji kaa wa pee nɔ́ fɛɛ nɔ́ nɛ wa ma nyɛ nɛ waa kɛ e blɔ tsɔɔmihi tsu ní ɔ, lɔ ɔ tsɔɔ kaa waa kɛ bɔfo Yohane munyu nɛ ji kaa waa “ya nɔ [nɛ waa] nyɛɛ kaa bɔ nɛ jamɛ a nɔ ɔ [Yesu] nyɛɛ ɔ” ngɛ ní tsue.​—1 Yoh. 2:6.

6-7. Mɛni he je nɛ wa ma nyɛ ma de ke, ke wa nyɛɛ Yesu nane mami he ɔmɛ a se ɔ, wa ma nyɛ maa hɛ kɛ su Yehowa he ɔ?

⁶ Ke wa nyɛɛ Yesu nane mami he ɔmɛ a se ɔ, wa maa hɛ kɛ su Yehowa he haa. Mɛni he je wa ma nyɛ ma de jã a? Kekleekle ɔ, Yesu pee nɔ hyɛmi nɔ́ kpakpa ngɛ blɔ nɔ nɛ nɔ ko maa gu kɛ sa Mawu hɛ mi ɔ he. (Yoh. 8:29) Enɛ ɔ he ɔ, ke wa nyɛɛ Yesu nane mami he ɔmɛ a se ɔ, wa maa sa Yehowa hɛ mi. Nɛ wa ma nyɛ ma ná nɔ mi mami kaa wa hiɔwe Tsɛ ɔ maa hɛ kɛ su nihi nɛ a ngɛ mɔde bɔe kaa a maa hɛ kɛ su e he ɔ he.​—Yak. 4:8.

 ⁷ Enyɔne, Yesu kase e Tsɛ ɔ saminya. Lɔ ɔ he je nɛ e nyɛ nɛ e de ke: “Nɔ fɛɛ nɔ nɛ e na mi ɔ, e na Tsɛ ɔ hulɔ” ɔ nɛ. (Yoh. 14:9) Ke wa kase Yesu su ɔmɛ kɛ bɔ nɛ e kɛ nihi hi si ha a, lɔ ɔ tsɔɔ kaa wa ngɛ Yehowa kasee. Kaa nɔ hyɛmi nɔ́ ɔ, e na kpititsɛ ko mɔbɔ, e mi mi sã lɛ wawɛɛ ngɛ yo ko nɛ e be he wami wawɛɛ ɔ he, nɛ e mi mi sã lɛ ngɛ ni kpahi nɛ a suɔli gbo ɔ hu a he. (Maak. 1:40, 41; 5:25-34; Yoh. 11:33-35) Ke wa bɔ mɔde nɛ wa kase Yehowa a, lɔ ɔ ma ha nɛ waa hɛ kɛ su e he wawɛɛ.

8. Moo tsɔɔ nɔ́ he je nɛ Yesu nane mami he ɔmɛ a se nɛ wa maa nyɛɛ ɔ maa ye bua wɔ nɛ waa “ye je ɔ nɔ kunimi.”

⁸ Yesu nane mami he ɔmɛ a se nɛ wa maa nyɛɛ ɔ maa ye bua wɔ nɛ je yaya nɛ ɔ ko gbla wa juɛmi. Nyɔ mi nɛ e nɔ jena Yesu ma gbo ɔ, e nyɛ nɛ e de ke: “I ye je ɔ nɔ kunimi.” (Yoh. 16:33) E ngɛ tsɔɔe kaa e ha we nɛ je ɔ susumi, níhi nɛ je ɔ susu kaa a he hia, kɛ je ɔ ní peepee ɔ nɛ ná e nɔ he wami. Yesu ha we nɛ nɔ́ ko nɛ je e juɛmi kɛ je nɔ́ he je nɛ e ba zugba a nɔ, nɛ ji kaa e ba wo Yehowa biɛ ɔ nguɔ ɔ nɔ. Wɔ hu nɛɛ? Níhi fuu ngɛ je nɛ ɔ mi nɛ ma nyɛ maa gbla wa juɛmi. Se kaa bɔ nɛ Yesu pee ɔ, ke wa ngɔ wa juɛmi kɛ ma Yehowa suɔmi nya ní peemi nɔ ɔ, wɔ hu wa maa “ye je ɔ nɔ kunimi.”​—1 Yoh. 5:5.

9. Mɛni wa ma nyɛ maa pee konɛ waa hi blɔ nɛ kɛ nɔ yaa neneene wami mi ɔ nɔ?

⁹ Ke wa nyɛɛ Yesu nane mami he ɔmɛ a se ɔ, wa ma nyɛ maa hi si kɛ ya neneene. Benɛ niheyo niatsɛ ko bi Yesu nɔ́ nɛ e maa pee konɛ e ná neneene wami ɔ, Yesu de lɛ ke: “Ba pee ye se nyɛɛlɔ.” (Mat. 19:16-21) Yesu de Yuda bi komɛ nɛ a he we yi kaa lɛ ji Kristo ɔ ke: “Ye jijɔ ɔmɛ . . . nyɛɛɔ ye se. I haa mɛ neneene wami.” (Yoh. 10:24-29) Nikodemo nɛ e ji Sanhedri bi ɔmɛ a kpɛti nɔ kake ɔ bua jɔ Yesu tsɔɔmi ɔmɛ a he. Yesu tsɔɔ kaa “nɔ fɛɛ nɔ nɛ e heɔ lɛ yeɔ ɔ” ma “ná neneene wami.” (Yoh. 3:16) Ke waa kɛ nɔ́ nɛ Yesu tsɔɔ ɔ tsu ní nɛ wa kase e nɔ hyɛmi nɔ́ ɔ, lɔ ɔ tsɔɔ kaa wa ngɛ e mi hemi kɛ yemi. Ke wa pee jã a, wa maa hi blɔ nɛ kɛ nɔ yaa neneene wami mi ɔ nɔ.​—Mat. 7:14.

10. Mɛni nɛ Yesu nɛ wa ‘maa hi lɛ lee’ ɔ biɔ nɛ waa pee? (Yohane 17:3)

¹⁰ Jã wa ba le Yesu loko wa ma nyɛ maa nyɛɛ e nane mami he ɔmɛ a se haa. (Kane Yohane 17:3.) Yesu nɛ wa ‘maa hi lɛ lee’ ɔ, pi ligbi kake nɔ́ peemi. E sa nɛ waa ya nɔ nɛ waa kase e he ní fuu nɛ waa le lɛ, nɛ tsɔɔ kaa wa maa le e su ɔmɛ, e susumihi, kɛ mlaahi nɛ e kɛ tsu ní ɔ. Ke wa se kɛ ngɛ anɔkuale ɔ mi po, e sa nɛ waa ya nɔ nɛ waa hi Yehowa kɛ e Bi ɔ “lee.”

11. Mɛni níhi wa ma nyɛ maa na ngɛ Sane Kpakpa eywiɛ ɔmɛ a mi?

¹¹ Bɔ nɛ pee nɛ waa le Yesu saminya a, Yehowa je suɔmi mi nɛ e ha nɛ a ngma Sane Kpakpa eywiɛ ɔmɛ ngɛ Baiblo ɔ mi. Sane Kpakpa womi ɔmɛ deɔ wɔ Yesu si himi kɛ e fiɛɛmi ní  tsumi ɔ he sane. E tsɔɔ wɔ níhi nɛ Yesu de, níhi nɛ e pee, kɛ bɔ nɛ e nu he ha. Womi eywiɛ nɛ ɔmɛ yeɔ bua wɔ nɛ wa ‘susuɔ’ nɔ hyɛmi nɔ́ nɛ Yesu pee ɔ he wawɛɛ. (Heb. 12:3) Ngɛ blɔ ko nɔ ɔ, a tsɔɔ wɔ Yesu nane mami he ɔmɛ. Lɔ ɔ he ɔ, ke wa kaseɔ Sane Kpakpa womi ɔmɛ saminya a, lɔ ɔ ma ha nɛ waa hi Yesu lee wawɛɛ. Nɛ enɛ ɔ maa ye bua wɔ nɛ wa ma nyɛ maa nyɛɛ e nane mami he ɔmɛ a se haa.

12. Mɛni wa ma nyɛ maa pee konɛ wa ná Sane Kpakpa womi ɔmɛ a he se saminya?

¹² Ke wa ma nyɛ ma ná Sane Kpakpa womi ɔmɛ a he se saminya a, pi kanemi pɛ nɛ e sa nɛ waa kane. E sa nɛ wa ná be kɛ kase nɛ wa pue wa yi mi tɛ ngɛ nɔ́ nɛ wa ngɛ kasee ɔ he saminya. (Yosh. 1:8) Nyɛ ha nɛ wa susu níhi enyɔ nɛ ma nyɛ maa ye bua wɔ nɛ wa pue wa yi mi tɛ ngɛ níhi nɛ wa kaneɔ ngɛ Sane Kpakpa womi ɔmɛ a mi ɔ he, nɛ wa kɛ tsu ní hulɔ.

13. Mɛni maa ye bua mo konɛ o na Sane Kpakpa womi ɔmɛ a mi si fɔfɔɛ ɔmɛ kaa nɔ́ nitsɛ?

¹³ Kekleekle ɔ, moo na si fɔfɔɛ ɔmɛ kaa nɔ́ nitsɛ. Moo ngɔ lɛ kaa o ngɛ níhi nɛ ngɛ nɔ yae ɔ nae, o ngɛ nue, nɛ o ngɛ he nue kaa bɔ nɛ nɔ nɛ o ngɛ e he sane kanee ɔ nu he ɔ. Bɔ nɛ pee nɛ o nyɛ nɛ o pee jã a, moo pee níhi a mi hlami ngɛ asafo ɔ womi ɔmɛ a mi. Mo susu níhi nɛ a ngma kɛ sɛ hlami, kɛ níhi nɛ nyɛɛ nɔ́ nɛ o ngɛ kanee ɔ se ɔ he. Moo pee níhi a mi hlami kɛ kɔ nihi nɛ a tu a he munyu kɛ hehi nɛ a wo ta ngɛ nɔ́ nɛ o ngɛ kanee ɔ mi ɔ he. Moo ngɔ nɔ́ nɛ o kane ɔ kɛ to nɔ́ nɛ Sane Kpakpa womi kpa amɛ de ɔ he. Be komɛ ɔ, Sane Kpakpa womi ngmalɔ ko ma de nɔ́ ko be mi nɛ Sane Kpakpa womi ngmalɔ kpa ko tui jamɛ a nɔ́ ɔ he munyu tsɔ.

14-15. Mɛni blɔ nɔ nɛ nɔ ko maa gu nɛ e kɛ nɔ́ nɛ e kase ngɛ Sane Kpakpa womi ɔmɛ a mi ɔ nɛ tsu ní?

¹⁴ Enyɔne, ngɔɔ níhi nɛ o kase ngɛ Sane Kpakpa womi ɔmɛ a mi ɔ kɛ tsu ní. (Yoh. 13:17) Ke o kase nɔ́ ko ngɛ Sane Kpakpa womi ɔ eko mi ta a, mo bi o he ke: ‘Anɛ oti ko ngɛ sane nɛ ɔ mi nɛ ma nyɛ ma kɛ tsu ní ngɛ ye si himi mi lo? Mɛni blɔ nɔ ma ngɔ nɔ́ nɛ i kase nɛ ɔ kɛ ye bua nɔ ko?’ Bɔɔ mɔde nɛ o susu nɔ ko pɔtɛɛ nɛ o ma nyɛ kɛ ye bua lɛ ɔ he, kɛkɛ ɔ,  ngɛ be nɛ sa mi ɔ, moo je suɔmi mi nɛ o kɛ hɛ si kami nɛ tsu ní nɛ o ngɔ nɔ́ nɛ o kase ɔ kɛ ye bua lɛ.

¹⁵ Nyɛ ha nɛ wa susu nɔ hyɛmi nɔ́ ko nɛ tsɔɔ bɔ nɛ waa kɛ ní enyɔ nɛ ɔmɛ ma tsu ní ha a he. Wa ma susu yalɔyo ohiatsɛ nɛ Yesu to e he hɛ ngɛ sɔlemi we ɔ sane ɔ he.

16. Moo kale si fɔfɔɛ nɛ a tu he munyu ngɛ Maako 12:41 ɔ.

¹⁶ Moo na si fɔfɔɛ ɔ kaa nɔ́ nitsɛ. (Kane Maako 12:41.) Poo si fɔfɔɛ nɛ nyɛɛ se ɔ he foni nɛ o hyɛ. Nisan ligbi 11, jeha 33 ɔ ba su, nɛ e be kɛe nɛ Yesu ma gbo. Yesu kɛ ngmlɛfiahi fuu tsɔɔ nihi ní ngɛ sɔlemi we ɔ. Se jami hɛ mi nyɛɛli ɔmɛ te si kɛ wo lɛ. Ni komɛ sɛ hlami bi lɛ kaa e tsɔɔ mɛ he nɛ e ná e he wami ɔ ngɛ nɛ e kɛ ngɛ nyakpɛ ní tsue ɔ. Ni komɛ hu bi lɛ sanehi nɛ a susu kaa e be nyɛe ma ha heto. (Maak. 11:27-33; 12:13-34) Amlɔ nɛ ɔ, Yesu ya sɔlemi we ɔ fã ko. Eko ɔ, e ya he nɛ a tsɛɛ ke Yi Ɔmɛ A Kpo ɔ Nɔ ɔ. Benɛ e ngɛ lejɛ ɔ, e ma nyɛ maa ba kaa e na sika tsumi dakahi nɛ a maa si ngɛ gbogbo ɔmɛ a he ɔ. E hi si nɛ e bɔni nihi nɛ a kɛ sika ma sika tsumi daka amɛ a mi womi ɔ hyɛe. E na niatsɛmɛ fuu nɛ a kɛ sika fuu ba ngɛ mi woe. Eko ɔ, e hi si ngɛ he ko nɛ e kɛ sika tsumi daka a eko he kɛ we nɛ ke a kɛ sika ba ngɛ mi woe ɔ, e maa nu e pɛmi ɔ.

17. Mɛni nɛ yalɔyo ohiatsɛ ɔ nɛ a tu e he munyu ngɛ Maako 12:42 ɔ pee?

¹⁷ Kane Maako 12:42. Be bɔɔ se ɔ, Yesu hɛngmɛ gba yo ko nɔ. E ji “yalɔyo ohiatsɛ.” (Luka 21:2) Si himi ɔ mi wa ha lɛ, nɛ eko ɔ, e gboɔ dengme loko e nine suɔ e hiami níhi a nɔ. Se kɛ̃ ɔ, e ya sika tsumi daka a eko he nɛ e ngɔ sika nyafii enyɔ kɛ ya wo mi. Eko ɔ, benɛ e ngɔ sika a kɛ wo mi po ɔ, e pɛ́ nɛ nɔ ko maa nu. Yesu le sika nɛ yo ɔ kɛ wo mi​—lepta enyɔ. Enɛ ɔ ji sika nɛ a yeɔ ngɛ jamɛ a be ɔ mi ɔ mi nyafii pe kulaa. Sika nɛ ɔ be nyɛe ma he otoklii kake po, nɛ ji lohwe pɛlitsɛmɛ nɛ a he jua wɛ kulaa ngɛ jamɛ a be ɔ mi ɔ a kpɛti kake.

18. Ngɛ Maako 12:43, 44 ɔ nya a, mɛni Yesu de ngɛ yalɔyo ɔ yemi kɛ buami ɔ he?

¹⁸ Kane Maako 12:43, 44. Yesu bua jɔ yalɔyo nɛ ɔ he wawɛɛ. Enɛ ɔ he ɔ, e tsɛ e kaseli ɔmɛ nɛ e gbla a juɛmi kɛ ya yalɔyo ɔ nɔ nɛ e de ke: “Yalɔyo ohiatsɛ nɛ ɔ ngɔ babauu kɛ wo mi pe ni kpa amɛ tsuo.” E ya nɔ nɛ e tsɔɔ nya ke: “Mɛ tsuo [titli sikatsɛmɛ ɔmɛ] ɔ, nɔ́ nɛ a ná nɛ be nɔ ɔ nɛ a kɛ ba wo mi, se yalɔyo ɔ lɛɛ, e we ohia a mi nɛ e je nɛ e ngɔ nɔ́ nɛ e ngɛ ɔ tsuo, nɛ ji nɔ́ nɛ e kɛ maa hyɛ e he ɔ tsuo kɛ ba wo mi.” Jamɛ a ligbi ɔ, yalɔyo anɔkualetsɛ nɛ ɔ ngɔ sika tsuo nɛ e ngɛ ɔ kɛ ya wo daka a mi. Nɔ́ nɛ e pee ɔ tsɔɔ kaa e ngɔ e hɛ kɛ fɔ Yehowa nɔ kaa e maa hyɛ e nɔ.​—La 26:3.

19. Mɛni ji nɔ́ titli nɛ wa ma nyɛ maa kase ngɛ nɔ́ nɛ Yesu de ngɛ yalɔyo ohiatsɛ ɔ he ɔ mi?

¹⁹ Ngɔɔ nɔ́ nɛ o kase ɔ kɛ tsu ní ngɛ o si himi mi. Mo bi o he ke, ‘Mɛni ma nyɛ ma kase ngɛ nɔ́ nɛ Yesu de ngɛ yalɔyo ohiatsɛ ɔ he ɔ mi?’ Mo susu yalɔyo ɔ he nɛ o hyɛ. E ná nɛ e pee babauu kɛ ha Yehowa. Se kɛ̃ ɔ, e pee nɔ́ nɛ e ma nyɛ; e ngɔ nɔ́ fɛɛ nɔ́ nɛ e ngɛ ɔ kɛ ha Yehowa. Yesu le kaa yalɔyo ɔ yemi kɛ buami ɔ he jua wa kɛ ha e Tsɛ ɔ. Nɔ́ nɛ wa ma nyɛ maa kase ngɛ sane ɔ mi ji nɛ ɔ nɛ: Yehowa bua jɔɔ ke waa kɛ wa tsui tsuo kɛ wa susuma tsuo sɔmɔ lɛ. (Mat. 22:37; Kol. 3:23) Yehowa bua jɔɔ ke e na kaa wa peeɔ nɔ́ fɛɛ nɔ́ nɛ wa ma nyɛ ngɛ e sɔmɔmi mi! Sisi tomi mlaa nɛ ɔ kɔɔ be abɔ kɛ wa nyɛmi tsuo nɛ waa kɛ ma sɔmɔ Yehowa a he, nɛ fiɛɛmi ní tsumi kɛ asafo mi kpehi nɛ wa maa ya a hu piɛɛ he.

20. Mɛni blɔ nɔ nɛ o kɛ nɔ́ nɛ o kase ngɛ yalɔyo ohiatsɛ ɔ he ɔ ma nyɛ ma tsu ní? Mo ha enɛ ɔ he nɔ hyɛmi nɔ́.

²⁰ Mɛni blɔ nɔ nɛ o kɛ nɔ́ nɛ o kase ngɛ yalɔyo ɔ sane ɔ mi ɔ ma nyɛ ma tsu ní? Bɔɔ mɔde  nɛ o susu nihi pɔtɛɛ nɛ eko ɔ, e he maa hia nɛ a ye bua mɛ nɛ a ná nɔ mi mami kaa Yehowa bua jɔ a mɔde bɔmi ɔ he ɔ he. Kaa nɔ hyɛmi nɔ́ ɔ, anɛ o le nyɛmiyo ko nɛ e wa ngɛ jeha mi nɛ eko ɔ, e susu kaa e he be se nami akɛnɛ e be nɔmlɔ tso mi he wami kpakpa, nɛ e nyɛ we nɛ e pee babauu ngɛ fiɛɛmi ní tsumi ɔ mi ɔ he je lo? Aloo anɛ o le nyɛminyumu ko nɛ e be he wami wawɛɛ, nɛ e kɔni mi jɔ̃ akɛnɛ e nyɛ we nɛ e ya asafo mi kpehi be fɛɛ be ɔ he je lo? Moo ye bua nihi kaa jã kɛ gu munyuhi nɛ ‘fiaa nɔ kɛ maa si’ nɛ o maa tu kɛ tsɔɔ mɛ ɔ nɔ. (Efe. 4:29) O kɛ mɛ nɛ susu bua womi munyuhi nɛ wa kase kɛ kɔ yalɔyo ohiatsɛ ɔ he ɔ he. He wami womi munyuhi nɛ o maa tu kɛ tsɔɔ mɛ ɔ ma ha nɛ a ná nɔ mi mami kaa Yehowa bua jɔɔ ke waa kɛ wa nyɛmi tsuo sɔmɔ lɛ. (Abɛ 15:23; 1 Tɛs. 5:11) Mo je ni kpahi a yi ngɛ a nyɛmi tsuo nɛ a kɛ ngɛ Yehowa sɔmɔe ɔ he. Ke o je a yi ngɛ ní nyafinyafi nɛ a peeɔ ɔ he ɔ, lɔ ɔ tsɔɔ kaa o ngɛ Yesu nane mami he ɔmɛ a se nyɛɛe haa.

21. Mɛni nɛ o fia o pɛɛ si kaa o maa pee?

²¹ Wa bua jɔɔ kaa Sane Kpakpa womi ɔmɛ tu níhi fuu nɛ ya nɔ ngɛ Yesu si himi mi nɛ maa ye bua wɔ nɛ waa kase lɛ, nɛ waa nyɛɛ e nane mami he ɔmɛ a se haa a he munyu! Anɛ o kɛ Sane Kpakpa womi ɔmɛ ma nyɛ maa pee o dɛ he ní kasemi loo Weku Mawu Jami lo? Nyɛ ha nɛ wa kai kaa loko wa ma ná ní kasemi ɔ he se ɔ, jã wa ngɔ sane ɔ kaa nɔ́ ko nɛ ya nɔ nitsɛnitsɛ nɛ waa kɛ oti nɛ ngɛ mi ɔ tsu ní. E sa nɛ waa kase ní kɛ je níhi nɛ Yesu pee ɔ mi, se e sa nɛ waa bu níhi nɛ e de ɔ tue hulɔ. Ngɛ ní kasemi nɛ nyɛɛ se ɔ mi ɔ, wa maa hyɛ nɔ́ nɛ wa ma nyɛ maa kase ngɛ Yesu nyagbe munyuhi nɛ e tu benɛ e ngɛ zugba a nɔ ɔ mi.