1. Mɛni nɛ Yehowa le ngɛ e we bi a he?

YEHOWA MAWU “náa e ma [nɛ ji e we bi] a he bua jɔmi.” (La 149:4) Enɛ ɔ nɛ wa le ɔ haa nɛ wa bua jɔɔ wawɛɛ! Yehowa le su kpakpahi nɛ wa ngɛ, e le wa nyɛmihi, nɛ e yeɔ bua wɔ konɛ waa pee e huɛmɛ. Ke wa ya nɔ nɛ wa ye lɛ anɔkuale ɔ, wa ma nyɛ maa pee e huɛmɛ kɛ ya neneene!​—Yoh. 6:44.

2. Mɛni he je nɛ e he wa ha ni komɛ kaa a ma he ye kaa Yehowa suɔ mɛ ɔ?

² Eko ɔ, nɔ ko ma bi ke, ‘I le kaa Yehowa suɔ e we bi tsuo, se kɛ ma pee kɛɛ kɛ ná nɔ mi mami kaa e suɔ imi nitsɛ?’ Mɛni ma nyɛ ma ha nɛ nɔ ko nɛ bi sane nɛ ɔ? Oksana * nɛ e kɛ nyagbahi kpe ngɛ e jokuɛwi a si ɔ de ke: “Ye bua jɔ wawɛɛ benɛ i ha nɛ a baptisi mi nɛ i je blɔ gbami ní tsumi ɔ sisi ɔ. Se jeha 15 se ɔ, i bɔni susumi kaa Yehowa bua jɔɛ ye he hu nɛ e be nyɛe maa suɔ mi.” Yua, nɛ e ji daa blɔ gbalɔ nɛ lɛ hu e kɛ nyagbahi kpe ngɛ e jokuɛwi a si ɔ de ke: “I jɔɔ ye wami nɔ kɛ ha Yehowa konɛ e bua nɛ jɔ, se i he we yi kaa e ma nyɛ maa suɔ mi hu.”

3. Mɛni he wa ma susu ngɛ ní kasemi nɛ ɔ mi?

³ Kaa bɔ nɛ yihi enyɔ nɛ a wo a ta kɛ sɛ hlami ɔ tsɔɔ ɔ, o ma nyɛ ma ná suɔmi nɛ mi wa kɛ ha Yehowa, se eko ɔ, o be nɔ mi mami kaa e suɔ mo. Mɛni he je nɛ e sa nɛ o ná nɔ mi mami kaa Yehowa susuɔ o he wawɛɛ ɔ? Mɛni ma nyɛ maa ye bua  mo ke o susu kaa Yehowa sume mo? Nyɛ ha nɛ wa susu sane bimi nɛ ɔmɛ a he nɛ waa hyɛ.

4. Mɛni he je nɛ oslaa ngɛ he kaa wa ma susu kaa Yehowa sume wɔ ɔ?

⁴ Suɔmi ma nyɛ maa wo mo he wami nɛ o pee nɔ́ ko. Ke wa ná nɔ mi mami kaa Yehowa suɔ wɔ nɛ e yeɔ bua wɔ ɔ, e maa wo wɔ he wami nɛ waa ya nɔ nɛ waa kɛ wa tsui tsuo nɛ sɔmɔ lɛ ngɛ nyagbahi nɛ waa kɛ maa kpe ɔ tsuo se. Se ke wa be nɔ mi mami kaa Yehowa suɔ wɔ ɔ, wa “he wami nɔ ma gbɔ.” (Abɛ 24:10, NW) Ke wa kɔni mi jɔ̃ nɛ wa he we yi kaa Mawu suɔ wɔ ɔ, wa be nyɛe maa da Satan tuami ɔmɛ a nya.​—Efe. 6:16.

5. Kɛ susumi nɛ ni komɛ ná kaa Mawu sume mɛ ɔ ná a nɔ he wami ha kɛɛ?

⁵ Wa nyɛmimɛ komɛ bɔni susumi kaa Yehowa sume mɛ nɛ e susuu we a he, nɛ enɛ ɔ ha nɛ a hemi kɛ yemi mi gbɔjɔ. Asafo mi nɔkɔtɔma ko nɛ a tsɛɛ lɛ ke James ɔ de ke: “E ngɛ mi kaa i ngɛ sɔmɔe ngɛ Betel nɛ i kɛ bua jɔmi ngɛ sɔmɔe ngɛ asafo ko nɛ a tuɔ gbi kpa a mi, se i be nɔ mi mami kaa Yehowa bua jɔ ye sɔmɔmi ɔ he. Be ko po ɔ, i bi ke ji Yehowa buɔ ye sɔlemi tue lo.” Nyɛmiyo ko nɛ a tsɛɛ lɛ ke Eva nɛ e ngɛ sɔmɔe ngɛ Betel ɔ hu de ke: “Oslaa ngɛ he kaa wa ma susu kaa Yehowa sume wɔ, ejakaa susumi kaa jã a náa nɔ́ fɛɛ nɔ́ nɛ wa peeɔ ngɛ e sɔmɔmi mi ɔ nɔ he wami, nɛ e haa nɛ bua jɔmi nɛ waa kɛ sɔmɔɔ Mawu ɔ taa.” Michael nɛ e ji blɔ gbalɔ kɛ asafo mi nɔkɔtɔma a de ke: “Ke wa he we yi kaa Mawu susuɔ wa he ɔ, bɔɔbɔɔbɔɔ ɔ, huɛ bɔmi nɛ ngɛ waa kɛ lɛ wa kpɛti ɔ ma puɛ.”

6. Ke wa be nɔ mi mami kaa Mawu suɔ wɔ ɔ, mɛni e sa nɛ waa pee?

⁶ Níhi a si kpami nɛ ɔmɛ tsɔɔ bɔ nɛ susumi kaa Yehowa sume wɔ ɔ ma nyɛ ma ha nɛ wa hemi kɛ yemi mi nɛ gbɔjɔ ha. Ke wa be nɔ mi mami kaa Mawu suɔ wɔ ɔ, mɛni e sa nɛ waa pee? E sa nɛ wa je jamɛ a susumi ɔ kɛ je wa juɛmi mi amlɔ nɔuu! Mo bi Yehowa nɛ e ye bua mo konɛ o ngɔ ‘Mawu tue mi jɔmi ɔ nɛ maa bu o tsui kɛ o juɛmi he’ ɔ kɛ da “susumihi nɛ haoɔ” mo ɔ nane mi. (La 139:23, NW; Filip. 4:6, 7) Nɛ o kai kaa pi mo pɛ nɛ o nuɔ he jã. Wa nyɛmimɛ anɔkualetsɛmɛ kpahi fuu hu nuɔ he jã. Yehowa sɔmɔli anɔkualetsɛmɛ nɛ a hi si blema a po nu he jã. Nyɛ ha nɛ waa  hyɛ nɔ́ nɛ wa ma nyɛ maa kase ngɛ bɔfo Paulo nɔ hyɛmi nɔ́ ɔ mi.

7. Mɛni nyagbahi nɛ Paulo kɛ kpe?

⁷ Anɛ be komɛ ɔ, o nuɔ he kaa ní tsumi fuu ngɛ o kuɛ nɔ nɛ e he waa ha mo kaa o ma tsu a he ní lo? Ke jã e ji ngɛ o blɔ fa mi ɔ, lɛɛ o maa nu Paulo sane ɔ sisi. E pee yeyeeye ngɛ “asafo ɔmɛ tsuo a he.” (2 Kor. 11:23-28) Anɛ hiɔ ko hii o nya gbae wawɛɛ nɛ lɔ ɔ ha nɛ o be bua jɔmi lo? Paulo ngɛ nyagba ko nɛ ngɛ kaa “mio ko ngɛ [e] he lo ɔ mi.” Enɛ ɔ ma nyɛ maa pee hiɔ ko nɛ ngɛ e nya gbae wawɛɛ nɛ e ná nɛ e je. (2 Kor. 12:7-10) Anɛ o gbɔjɔmihi haa nɛ be komɛ ɔ, o kɔni mi jɔ̃ɔ lo? Paulo nu he jã be komɛ. Paulo tsɔɔ kaa e ji “nɔmlɔ nɛ e ní ngɛ mɔbɔ” ejakaa e he waa ha lɛ kaa e maa pee nɔ́ nɛ da.​—Rom. 7:21-24.

8. Mɛni lɛ ye bua Paulo kɛ da e nyagba amɛ a nya?

⁸ Paulo kɛ nyagba slɔɔtohi kɛ si fɔfɔɛhi nɛ jɔ̃ɔ nɔ kɔni mi kpe, se kɛ̃ ɔ, e ya nɔ nɛ e sɔmɔ Yehowa. Mɛni lɛ wo lɛ he wami? Paulo le e gbɔjɔmihi, se kɛ̃ ɔ, e ngɛ hemi kɛ yemi nɛ mi wa ngɛ kpɔmi nɔ́ ɔ mi. Jehanɛ hu ɔ, e le si nɛ Yesu wo kaa, “nɔ fɛɛ nɔ nɛ e heɔ lɛ [Yesu] yeɔ ɔ, . . . e [ma] ná neneene wami” ɔ. (Yoh. 3:16; Rom. 6:23) Ngɛ anɔkuale mi ɔ, Paulo ngɛ hemi kɛ yemi ngɛ kpɔmi nɔ́ ɔ mi. E ngɛ nɔ mi mami kaa Yehowa pee klaalo kaa e kɛ nihi nɛ a pee yayami nɛ hɛdɔ ngɛ he po a tɔmihi maa ke mɛ ke a tsake a tsui.​—La 86:5.

9. Mɛni wa kaseɔ ngɛ Paulo munyu nɛ ngɛ Galatia Bi 2:20 ɔ mi?

⁹ Paulo he ye kaa Mawu suɔ lɛ saminya ejakaa e le kaa Mawu tsɔ Yesu nɛ e ba gbo kɛ ha lɛ. (Kane Galatia Bi 2:20.) Kadi bua womi munyuhi nɛ ngɛ kuku nɛ ɔ nyagbe ɔ. Paulo de ke: “Mawu Bi ɔ . . . suɔ mi nɛ e ngɔ e he kɛ ha ngɛ ye he.” Paulo nui he kaa e ji yayami peelɔ, lɔ ɔ he ɔ, Mawu be nyɛe maa suɔ lɛ. Paulo de we ke, ‘I le nɔ́ he je nɛ Yehowa suɔ ye nyɛmimɛ ɔmɛ, se imi lɛɛ e be nyɛe maa suɔ mi ɔ. E kai Roma bi ɔmɛ ke: “Be mi nɛ loloolo ɔ wa ji yayami peeli ɔ, Kristo gbo kɛ ha wɔ.” (Rom. 5:8) Nɔ́ ko nɔ́ ko be nyɛe maa tsi suɔmi nɛ Mawu ngɛ kɛ ha wɔ ɔ nya kɔkɔɔkɔ!

10. Mɛni wa kaseɔ ngɛ Roma Bi 8:38, 39 ɔ mi?

¹⁰ Kane Roma Bi 8:38, 39. Paulo le bɔ nɛ Mawu suɔmi ɔ ngɛ he wami ha. E ngma kaa nɔ́ ko nɔ́ ko “be nyɛe ma je wɔ kɛ je Mawu suɔmi ɔ” he. Paulo le bɔ nɛ Yehowa to e tsui si kɛ ha Israel ma a ha. E le hu kaa Yehowa na  lɛ mɔbɔ. Wa ma nyɛ maa po Paulo munyu ɔ kpiti ke, ‘Akɛnɛ Yehowa tsɔ e Bi ɔ nɛ e ba gbo kɛ ha mi he je ɔ, e sɛ nɛ ye yi mi nɛ pee mi enyɔɔnyɔ hu ngɛ Mawu suɔmi ɔ he.’​—Rom. 8:32.

11. E ngɛ mi kaa Paulo pee yayamihi nɛ a wo ta ngɛ 1 Timoteo 1:12-15 ɔ mohu lɛɛ, se mɛni he je nɛ e ná nɔ mi mami kaa Yehowa suɔ lɛ ɔ?

¹¹ Kane 1 Timoteo 1:12-15. Eko ɔ, Paulo haoɔ wawɛɛ ke e kai níhi nɛ e pee loko e ba pee Kristofo no ɔ. E tsɛ e he ke yayami peelɔ “kpanaku,” nɛ enɛ ɔ be nyakpɛ! Loko e ma ba le anɔkuale ɔ, e wa Kristofohi yi mi ngɛ ma slɔɔtohi a nɔ, e wo a ti ni komɛ tsu, nɛ e fĩ se kaa a gbe a kpɛti ni komɛ. (Níts. 26:10, 11) Atsinyɛ jemi ko be he kaa ke Paulo kɛ Kristofohi nɛ́ kɛ gu e nɔ nɛ a fɔli gbo ɔ kpe ɔ, e maa hao lɛ wawɛɛ. Yayami nɛ Paulo pee ɔ dɔ lɛ wawɛɛ, se e le kaa nɔ́ ko be nɛ e ma nyɛ maa pee kɛ tsake e si fɔfɔɛ ɔ. E kplɛɛ nɔ kaa Kristo gbo kɛ ha lɛ, nɛ e kɛ nɔ mi mami ngma ke: “Mawu dloomi ɔ lɛ ha nɛ i ngɛ kaa bɔ nɛ i ngɛ nɛ ɔ nɛ.” (1 Kor. 15:3, 10) Mɛni wa ma nyɛ maa kase ngɛ mi? E sa nɛ o ná nɔ mi mami kaa Kristo gbo kɛ ha mo, nɛ e bli blɔ kɛ ha mo konɛ huɛ bɔmi kpakpa nɛ hi o kɛ Yehowa nyɛ kpɛti. (Níts. 3:19) Nɔ́ nɛ Mawu ngɔɔ e juɛmi kɛ maa nɔ ji nɔ́ nɛ wa ngɛ pee amlɔ nɛ ɔ, kɛ nɔ́ nɛ wa maa pee hwɔɔ se, se pi yayami nɛ wa pee be ko nɛ be, benɛ wa ji Yehowa Odasefo no loo wa pi Odasefo no ɔ.​—Yes. 1:18.

12. Mɛni blɔ nɔ nɛ 1 Yohane 3:19, 20 ɔ ma nyɛ maa ye bua wɔ ke wa nuɔ he kaa wa he be se nami loo Yehowa sume wɔ?

¹² Ke o susu gbomi nɛ Yesu ba gbo ngɛ o he yayami ɔmɛ a he ɔ he ɔ, eko ɔ, o ma de ke, ‘I he we yi kaa i sa nike ní nɛ he jua wa nɛ ɔ?’ Mɛni he je nɛ o ma nyɛ maa nu he jã a? Wa tsui nɛ yi mluku ɔ ma nyɛ maa sisi wɔ nɛ wa susu kaa wa he be se nami loo Yehowa sume wɔ. (Kane 1 Yohane 3:19, 20.) Ke wa bɔni  susumi nɛ ɔ nami pɛ ɔ, e sa nɛ wa kai kaa “Mawu kle pe wa tsui ɔ.” Ke wa susu kaa Yehowa sume wɔ loo e kɛ wa he yayamihi be wɔ kee po ɔ, lɔ ɔ tsɔɔ we kaa e sume wɔ. Wa hiɔwe Tsɛ ɔ suɔ wɔ, nɛ e kɛ wa he yayami maa ke wɔ. E sa nɛ wa ná nɔ mi mami kaa Yehowa suɔ wɔ. Loko wa ma nyɛ maa pee jã a, ja wa pɔɔ e Munyu ɔ kanemi, wa sɔleɔ be fɛɛ be, nɛ waa kɛ nihi nɛ a kɛ anɔkuale yemi sɔmɔɔ lɛ ɔ bɔɔ be fɛɛ be. Mɛni he je nɛ e he hia nɛ waa pee ní nɛ ɔmɛ?

13. Mɛni blɔ nɔ nɛ Mawu Munyu ɔ nɛ wa maa kase ɔ ma nyɛ maa ye bua wɔ? (Hyɛ daka nɛ ji, “ Bɔ Nɛ Mawu Munyu ɔ Yeɔ Bua Mɛ Ha” a hulɔ.)

¹³ Moo kase Mawu Munyu ɔ daa ligbi, nɛ e maa ye bua mo konɛ o na Yehowa su kpakpa amɛ heii. O maa na bɔ nɛ e suɔ mo ha. Ke o pueɔ o yi mi tɛ ngɛ níhi nɛ o kaseɔ ngɛ Mawu Munyu ɔ mi daa ligbi ɔ he ɔ, e ma ‘dla’ o tsui kɛ o juɛmi. (2 Tim. 3:16) Asafo mi nɔkɔtɔma ko nɛ a tsɛɛ lɛ ke Kevin nɛ e nuɔ he kaa e he be se nami ɔ de ke: “Benɛ i kane La 103 ɔ nɛ i pue ye yi mi tɛ ngɛ he ɔ, e ye bua mi nɛ i dla ye susumi, nɛ i na bɔ nɛ Yehowa susuɔ ye he ha.” Eva nɛ wa tu e he munyu kɛ sɛ hlami ɔ de ke: “Daa gbɔkuɛ ɔ, i náa be kɛ susuɔ níhi nɛ a he hia ngɛ Yehowa hɛ mi ɔ a he. Jã nɛ i peeɔ ɔ haa nɛ ye tsui nɔɔ ye mi nɛ ye hemi kɛ yemi ɔ mi waa.”

14. Mɛni blɔ nɔ nɛ sɔlemi ma nyɛ maa ye bua wɔ?

¹⁴ Moo sɔle be fɛɛ be. (1 Tɛs. 5:17) Ke o suɔ nɛ o kɛ nɔ ko nɛ pee huɛ ɔ, e sa nɛ o kɛ lɛ nɛ pɔ ní sɛɛmi nɛ o de lɛ bɔ nɛ o nuɔ he ha ngɛ níhi a he. Ke wa suɔ nɛ waa kɛ Yehowa nɛ pee huɛ ɔ, e sa nɛ wɔ hu waa pee jã. Ke wa de lɛ bɔ nɛ wa nuɔ he ha, wa susumihi, kɛ wa nyagbahi ngɛ sɔlemi mi ɔ, lɔ ɔ tsɔɔ kaa wa he lɛ ye, nɛ wa le kaa e suɔ wɔ. (La 94:17-19; 1 Yoh. 5:14, 15) Yua, nɛ wa tu e he munyu kɛ sɛ hlami ɔ de ke: “Ke i ngɛ sɔlee ɔ, pi níhi nɛ ya nɔ ngɛ ligbi ɔ mi ɔ pɛ nɛ i deɔ Yehowa, mohu ɔ, i deɔ lɛ ye susumi kɛ bɔ nɛ i nuɔ he ha. Bɔɔbɔɔbɔɔ ɔ, i ba na Yehowa kaa e ji Tsɛ nɛ ngɛ suɔmi kɛ ha e bimɛ, se pi kaa ní tsumi nɔkɔtɔma ko.”​—Hyɛ daka nɛ ji, “ Anɛ O Kane Lo?”

15. Mɛni Yehowa pee kɛ tsɔɔ kaa e susuɔ wa he?

¹⁵ O kɛ huɛmɛ anɔkualetsɛmɛ nɛ bɔ; a ji nike ní nɛ je Yehowa ngɔ. (Yak. 1:17) Wa hiɔwe Tsɛ ɔ ha wɔ mumi mi weku nɛ ji wa nyɛmimɛ nyumuhi kɛ yihi nɛ a jeɔ suɔmi kpo kɛ tsɔɔ wɔ “be tsuaa be,” kɛ tsɔɔ kaa e susuɔ wa he. (Abɛ 17:17) Ngɛ sɛ womi nɛ Paulo ngma kɛ ya ha Kolose bi ɔmɛ mi ɔ, e kale Kristofohi nɛ a ye bua lɛ ɔ kaa a ji nihi nɛ e “náa bua womi kɛ jeɔ a ngɔ wawɛɛ nitsɛ.” (Kol. 4:10, 11) Kristo po hia yemi kɛ buami benɛ e ngɛ zugba a nɔ ɔ, nɛ e bua jɔ yemi kɛ buami nɛ e huɛmɛ anɔkualetsɛmɛ kɛ bɔfohi kɛ ha lɛ ɔ he.​—Luka 22:28, 43.

16. Mɛni blɔ nɔ huɛmɛ anɔkualetsɛmɛ ma nyɛ maa ye bua wɔ konɛ waa hɛ kɛ su Yehowa he wawɛɛ?

 ¹⁶ Anɛ o hlaa yemi kɛ buami ngɛ huɛmɛ nɛ a ngɛ asafo ɔ mi ɔ a ngɔ, nɛ o kplɛɛɔ yemi kɛ buami nɛ a kɛ haa mo ɔ nɔ lo? Ke o kɛ huɛmɛ nɛ a nane pi si ɔ susu o nyagbahi a he ɔ, lɔ ɔ tsɔɔ we kaa o gbɔjɔ, mohu ɔ, e ma nyɛ maa po o he piɛ. James nɛ wa tu e he munyu kɛ sɛ hlami ɔ de ke: “Huɛmɛ nɛ a nane pi si nɛ i kɛ bɔ ɔ ye bua mi wawɛɛ. Ke susumi yayahi ngɛ ye nya gbae ɔ, a buɔ mi tue saminya nɛ a kaiɔ mi kaa a suɔ mi wawɛɛ. Kɛ gu a nɔ ɔ, i naa bɔ nɛ Yehowa suɔ mi, nɛ e susuɔ ye he ha.” E he hia wawɛɛ nɛ wa ha nɛ huɛ bɔmi kpakpa nɛ ya nɔ nɛ e hi waa kɛ wa nyɛmimɛ nyumuhi kɛ yihi nɛ a ngɛ asafo ɔ mi ɔ wa kpɛti!

17-18. Mɛnɔ nɛ e sa nɛ waa bu lɛ tue, nɛ mɛni he je?

¹⁷ Satan suɔ nɛ wa kpa Yehowa suɔmi nya ní peemi. E suɔ nɛ wa he ye kaa Yehowa sume wɔ, nɛ wa sɛ yi wami hemi. Se wa na kaa enɛ ɔ, pi anɔkuale.

¹⁸ Yehowa suɔ mo. O he jua wa wawɛɛ kɛ ha lɛ. Ke o bu Yehowa tue ɔ, o maa ya nɔ “maa hi [e] suɔmi ɔ mi” kɛ ya neneene kaa bɔ nɛ e ba ngɛ Yesu blɔ fa mi ɔ. (Yoh. 15:10) Koo bu Satan loo o tsui nɛ sisiɔ mo ɔ tue kɔkɔɔkɔ. Mohu ɔ, moo bu Yehowa, nɔ nɛ naa su kpakpahi tsuo nɛ wa kpɛti nɔ fɛɛ nɔ ngɛ ɔ tue. Mo ná nɔ mi mami kaa ‘Yehowa náa’ e we bi, nɛ mo hu o piɛɛ a he ɔ a “he bua jɔmi!”