1-2. Mɛni nɛ e hia kaa waa pee be mi nɛ wa ngɛ je ehe ɔ mlɛe ɔ?

 WA BUA JƆ kaa Yehowa ma kpata je yaya nɛ ɔ hɛ mi, nɛ e maa ngɔ je ehe nɛ a yeɔ dami sane ngɛ mi ɔ kɛ ba. (2 Pet. 3:13) E ngɛ mi kaa wa li be nɛ je ehe ɔ maa ba mohu lɛɛ, se níhi nɛ ngɛ nɔ yae ngɛ je ɔ mi amlɔ nɛ ɔ ha nɛ wa na kaa e be kɛe nɛ e maa ba.​—Mat. 24:32-34, 36; Níts. 1:7.

² Wa ba anɔkuale ɔ mi kɛ jio, lingmi nɛ ɔ nɛ wa ba na anɔkuale ɔ jio, e he hia nɛ wɔ tsuo wa ha nɛ hemi kɛ yemi nɛ wa ngɛ ngɛ si womi nɛ ɔ mi ɔ mi nɛ wa. Mɛni he je? Ejakaa ke wa hemi kɛ yemi ɔ mi wa amlɔ nɛ ɔ po ɔ, lɔ ɔ tsɔɔ we kaa e mi be nyɛe ma gbɔjɔ. Bɔfo Paulo tsɔɔ kaa ke wa be hemi kɛ yemi ɔ, e ngɛ kaa ‘yayami nɛ e fĩɔ wɔ ngɛ blɔ nɛ e yi kulaa nɔ.’ (Heb. 12:1) E he hia nɛ be fɛɛ be ɔ, wa susu odasehi nɛ tsɔɔ kaa e be kɛe nɛ je ehe ɔ maa ba a he, konɛ wa hemi kɛ yemi ɔ mi nɛ ko gbɔjɔ.​—Heb. 11:1.

3. Mɛni he wa ma susu ngɛ ní kasemi nɛ ɔ mi?

³ Ngɛ ní kasemi nɛ ɔ mi ɔ, wa ma susu níhi etɛ nɛ wa ma nyɛ maa pee konɛ hemi kɛ yemi nɛ wa ngɛ ngɛ je ehe nɛ Yehowa wo si ɔ mi ɔ mi nɛ wa a he. Ní nɛ ɔmɛ ji: (1) wa yi mi tɛ nɛ wa ma pue ngɛ kpɔmi nɔ́ ɔ he, (2) wa yi mi tɛ nɛ wa ma pue ngɛ he wami nɛ Yehowa ngɛ ɔ he, kɛ (3) nɛ́ wa maa pee níhi nɛ maa hɛ wɔ kɛ su Yehowa he. Lɔ ɔ se ɔ, wa maa hyɛ bɔ nɛ sɛ gbi nɛ Yehowa kɛ ha Habakuk ɔ ma ha nɛ wa hemi kɛ yemi ɔ mi nɛ wa ha mwɔnɛ ɔ. Kekleekle ɔ, nyɛ ha nɛ waa hyɛ si fɔfɔɛ komɛ nɛ waa kɛ ma nyɛ maa kpe amlɔ nɛ ɔ nɛ ma bi nɛ wa ná hemi kɛ yemi nɛ mi wa kaa je ehe maa ba a.

 SI FƆFƆƐ KOMƐ NƐ BIƆ HEMI KƐ YEMI NƐ MI WA

4. Mɛni yi mi kpɔhi nɛ ke wa maa mwɔ ɔ, e biɔ hemi kɛ yemi nɛ mi wa?

⁴ Daa ligbi ɔ, wa mwɔɔ yi mi kpɔ komɛ nɛ biɔ hemi kɛ yemi nɛ mi wa. Kaa nɔ hyɛmi nɔ́ ɔ, wa mwɔɔ yi mi kpɔ ngɛ nihi nɛ wa suɔ kaa waa kɛ mɛ maa bɔ ɔ he. Jehanɛ hu ɔ, wa mwɔɔ yi mi kpɔ ngɛ nɔ́ nɛ wa suɔ kaa waa kɛ ma je wa hɛja, sukuu yami, gba si himi, bi fɔmi kɛ wa ní tsumi he. Enɛ ɔ he ɔ, e maa hi kaa wa ma bi wa he sane nɛ ɔmɛ: ‘Anɛ yi mi kpɔhi nɛ i mwɔɔ ɔ tsɔɔ kaa i le kaa e be kɛe nɛ Yehowa ma kpata je yaya nɛ ɔ hɛ mi nɛ e maa ngɔ je ehe kɛ ba lo? Anɛ i haa nɛ nihi nɛ a susu kaa adesahi be nyɛe maa hi si kɛ ya neneene ɔ a ní peepeehi náa yi mi kpɔhi nɛ i mwɔɔ ɔ nɔ he wami lo?’ (Mat. 6:19, 20; Luka 12:16-21) E sa nɛ wa ha nɛ hemi kɛ yemi nɛ wa ngɛ kaa e be kɛe nɛ je ehe ɔ maa ba a mi nɛ wa. Ke wa pee jã a, lɔ ɔ ma ha nɛ wa maa mwɔ yi mi kpɔhi nɛ da.

5-6. Mɛni he je nɛ e he hia nɛ wa hemi kɛ yemi ɔ mi nɛ wa ngɛ haomi behi a mi ɔ? Ngɔɔ nɔ́ he tomi nɔ́ ko kɛ tsɔɔ mi.

⁵ Jehanɛ hu ɔ, waa kɛ ka komɛ kpeɔ nɛ e biɔ nɛ wa ná hemi kɛ yemi nɛ mi wa. Eko ɔ, yi mi wami, hiɔ nɛ nya loo ní kpa komɛ ma nyɛ ma jɔ̃ wa kɔni mi. Eko ɔ, sisije ɔ, wa maa nu he kaa wa ma nyɛ maa da nya. Se ke waa kɛ kahi kaa jã kpe be kɛkɛɛ ɔ, e ma bi nɛ wa hemi kɛ yemi ɔ mi nɛ wa bɔ nɛ pee nɛ wa nyɛ nɛ wa fĩ si nɛ waa ya nɔ nɛ wa sɔmɔ Yehowa kɛ bua jɔmi.​—Rom. 12:12; 1 Pet. 1:6, 7.

⁶ Ke waa kɛ ka ko ngɛ kpee ɔ, eko ɔ, wa maa nu he kaa je ehe nɛ Yehowa wo si ɔ be bae gblee. Se ke wa nu he jã a, anɛ lɔ ɔ tsɔɔ kaa wa hemi kɛ yemi ɔ mi wɛ lo? Pi jã kulaa ji sane ɔ. Mo susu nɔ́ he tomi nɔ́ nɛ ɔ he nɛ o hyɛ. Ke hiɔmi ngɛ nɛe be kɛkɛɛ ɔ, eko ɔ, wa ma susu kaa pu be tsoe gblegbleegble. Se kɛ̃ ɔ, pu ɔ tsoɔ. Jã kɛ̃ nɛ ke wa kɔni mi jɔ̃ wawɛɛ ɔ, eko ɔ, wa ma susu kaa je ehe ɔ be bae gblee. Se ke wa hemi kɛ yemi ɔ mi wa a, wa ma ná nɔ mi mami kaa Mawu si womi ɔmɛ tsuo maa ba mi. (La 94:3, 14, 15; Heb. 6:17-19) Lɔ ɔ ma ha nɛ wa maa ngɔ Yehowa sɔmɔmi kɛ pee nɔ́ titli ngɛ wa si himi mi.

7. Mɛni susumi nɛ e sɛ nɛ wa ná?

⁷ Jehanɛ hu ɔ, e biɔ nɛ wa hemi kɛ yemi ɔ mi nɛ wa konɛ wa nyɛ nɛ wa tsu fiɛɛmi ní tsumi ɔ. Nihi nɛ wa fiɛɛɔ “sane kpakpa” a kɛ tsɔɔ mɛ ɔ a kpɛti nihi fuu he we yi kaa hwɔɔ se ɔ, Mawu ma ha nɛ je ehe ko maa ba. (Mat. 24:14; Eze. 33:32) E sa nɛ waa hyɛ saminya nɛ wa yi mi nɛ ko pee wɔ enyɔɔnyɔ ngɛ níhi nɛ Yehowa tsɔɔ wɔ ɔ a he kaa bɔ nɛ e ji ngɛ jamɛ a ni ɔmɛ a blɔ fa mi ɔ. Loko wa ma nyɛ maa pee jã a, e sa nɛ waa ya nɔ nɛ wa ha nɛ wa hemi kɛ yemi ɔ mi nɛ wa. Nyɛ ha nɛ waa hyɛ níhi etɛ nɛ wa ma nyɛ maa pee konɛ wa hemi kɛ yemi ɔ mi nɛ wa.

MO PUE O YI MI TƐ NGƐ KPƆMI NƆ́ Ɔ HE

8-9. Ke wa pue wa yi mi tɛ ngɛ kpɔmi nɔ́ ɔ he ɔ, kɛ lɔ ɔ maa ye bua wɔ ha kɛɛ?

⁸ Nɔ́ kake nɛ wa ma nyɛ maa pee konɛ wa hemi kɛ yemi ɔ mi nɛ wa ji kaa wa ma pue wa yi mi tɛ ngɛ kpɔmi nɔ́ ɔ he. Kpɔmi nɔ́ ɔ nɛ Yehowa kɛ ha wɔ ɔ he je ɔ, wa ngɛ nɔ mi mami kaa e si womi ɔmɛ tsuo maa ba mi niinɛ. Ke wa pue wa yi mi tɛ saminya ngɛ bɔ nɛ kpɔmi nɔ́ ɔ he jua wa ha, kɛ nɔ́ he je nɛ Yehowa ha wɔ kpɔmi nɔ́ ɔ he ɔ, e ma ha nɛ wa ma ná nɔ mi mami kaa si nɛ Mawu wo kaa wa maa hi si kɛ ya neneene ngɛ je ehe ɔ mi ɔ maa ba mi kokooko. Mɛni he je nɛ wa ma nyɛ ma de jã a?

⁹ Mɛni nɛ e sa kadimi ngɛ kpɔmi nɔ́ ɔ he? Yehowa tsɔ e Bitɛte nɛ e suɔ lɛ wawɛɛ, nɛ nyu bi ngɛ e kɛ lɛ a kpɛti ɔ kɛ je hiɔwe konɛ a ba fɔ lɛ kaa adesa nɛ e ye mluku ngɛ zugba a nɔ. Benɛ Yesu ba zugba a nɔ ɔ, e kɛ haomihi fuu kpe. Jehanɛ hu ɔ, e na nɔ́, nɛ e gbo gbenɔ yeyee. Enɛ ɔ tsɔɔ kaa kpɔmi nɔ́ ɔ nɛ Yehowa kɛ ha wɔ ɔ he jua wa wawɛɛ. Enɛ ɔ he ɔ, ke e sume nɛ  waa hi si kɛ ya neneene ɔ, jinɛ e be hae nɛ e Bi ɔ nɛ ba na nɔ́ nɛ e gbo kɛ ha wɔ. (Yoh. 3:16; 1 Pet. 1:18, 19) Akɛnɛ Yehowa ngɔ e Bi nɛ e suɔ lɛ wawɛɛ ɔ kɛ ha wɔ he je ɔ, e ma nyɛ ma ha nɛ wa maa hi si kɛ ya neneene ngɛ je ehe ɔ mi kokooko.

MO PUE O YI MI TƐ NGƐ HE WAMI NƐ YEHOWA NGƐ Ɔ HE

10. Ngɛ Efeso Bi 3:20 ɔ nya a, mɛni nɛ Yehowa ma nyɛ maa pee?

¹⁰ Nɔ́ enyɔne nɛ wa ma nyɛ maa pee konɛ wa hemi kɛ yemi ɔ mi nɛ wa ji wa yi mi tɛ nɛ wa ma pue ngɛ he wami nɛ Yehowa ngɛ ɔ he. Yehowa ngɛ he wami nɛ e kɛ ma ha nɛ e si womi ɔmɛ tsuo maa ba mi. Ngɛ anɔkuale mi ɔ, eko ɔ, nihi fuu ma susu kaa si nɛ Yehowa wo kaa wa maa hi si kɛ ya neneene ɔ be nyɛe maa ba mi. Se mo kai kaa níhi nɛ Yehowa wo si kaa e maa pee ɔ, adesahi be nyɛe maa pee jamɛ a ní ɔmɛ kɔkɔɔkɔ. Mɛni he je? Ejakaa lɛ ji Mawu Ope ɔ nɛ. (Hiob 42:2; Maak. 10:27) Enɛ ɔ he ɔ, e be nyakpɛ kaa níhi nɛ e wo si kaa e maa pee kɛ ha wɔ ɔ, wa juɛmi kpi he.​—Kane Efeso Bi 3:20.

11. Moo tsɔɔ si womi komɛ nɛ a ngɛ nyakpɛ nɛ Mawu wo. (Hyɛ daka nɛ ji, “ Bɔ Nɛ Si Womi Komɛ Nɛ A Ngɛ Nyakpɛ ɔ Ba Mi Ha.”)

¹¹ Nyɛ ha nɛ wa susu ní komɛ nɛ Yehowa wo si kaa e maa pee ha e we bi blema a he nɛ waa hyɛ. Ni komɛ susu kaa si womi nɛ ɔmɛ be nyɛe maa ba mi. Yehowa de Abraham kɛ Sara ke a ma fɔ binyumu ngɛ a bwɔmi si. (1 Mose 17:15-17) E kpale de Abraham ke e maa ngɔ Kaanan zugba a kɛ ha e nina. Abraham nina nɛ ji Israel bi ɔmɛ hi nyɔguɛ tso mi jehahi babauu ngɛ Egipt. Jamɛ a be ɔ mi ɔ, e ngɛ kaa nɔ́ nɛ si nɛ Yehowa wo Abraham ɔ be nyɛe maa ba mi, se e ba mi. Jeha komɛ a se ɔ, Yehowa de Elizabet ke e ma fɔ. Lɔ ɔ se ɔ, Yehowa de Maria nɛ e li nyumu ɔ kaa e ma ha nɛ lɛ hu e fɔ Binyumu. Enɛ ɔ ma ha nɛ si nɛ Mawu wo jeha akpehi abɔ ngɛ Eden abɔɔ ɔ mi ɔ maa ba mi!​—1 Mose 3:15.

12. Mɛni nɔ mi mami nɛ Yoshua 23:14 ɔ kɛ Yesaya 55:10, 11 ɔ ha nɛ wa ná ngɛ he wami nɛ Yehowa ngɛ ɔ he?

¹² Ke wa susu Yehowa si womi ɔmɛ tsuo kɛ bɔ nɛ a plɛ kɛ ba mi ha a he ɔ, wa maa na kaa Yehowa ngɛ he wami wawɛɛ. Lɔ ɔ ma ha nɛ wa ma ná hemi kɛ yemi nɛ mi wa kaa je ehe ɔ maa ba. (Kane Yoshua 23:14; Yesaya 55:10, 11.) Enɛ ɔ maa wo wɔ he wami konɛ waa ye bua nihi nɛ a na kaa si nɛ Yehowa wo kaa je ehe ko maa ba a pi nlami ko kɛkɛ. Yehowa nitsɛ wo si kaa hiɔwe ehe kɛ zugba ehe maa ba. E de ngɛ si womi nɛ ɔ he ke: “Munyu nɛ ɔmɛ ngɛ mi niinɛ nɛ a ji anɔkuale.”​—Kpoj. 21:1, 5.

MOO PEE NÍHI NƐ MA HA NƐ O HƐ KƐ SU YEHOWA HE

13. Kɛ asafo mi kpe yami ma nyɛ maa wo wa hemi kɛ yemi ɔ mi he wami ha kɛɛ? Moo tsɔɔ nya.

¹³ Nɔ́ etɛne nɛ ma ha nɛ wa hemi kɛ yemi ɔ mi maa wa ji kaa wa maa pee níhi nɛ ma ha nɛ huɛ bɔmi nɛ ngɛ waa kɛ Yehowa wa kpɛti ɔ mi maa wa. Mo susu bɔ nɛ wa náa asafo mi kpehi nɛ wa yaa a he se ha a he nɛ o hyɛ. Nyɛmiyo ko nɛ a tsɛɛ lɛ ke Anna nɛ e ngɔ be babauu kɛ tsu be tsuo sɔmɔmi ní tsumi fã slɔɔto ɔmɛ ɔ de ke: “Asafo mi kpehi nɛ i yaa a haa nɛ ye hemi kɛ yemi ɔ mi waa. Ke wa ya asafo mi kpe nɛ munyu tulɔ ko tsɔɔ we nɔ́ ehe ko loo e bɔɛ mɔde tsɔ ngɛ ní tsɔɔmi mi po ɔ, i nuɔ nɔ́ ko kɛ̃ nɛ maa ye bua mi nɛ ma nu Baiblo ɔ sisi saminya, nɛ lɔ ɔ haa nɛ ye hemi kɛ yemi ɔ mi waa wawɛɛ.” b Atsinyɛ jemi ko be he kaa ke wa ya asafo mi kpe nɛ wa nyɛmimɛ ɔmɛ ha sane heto ɔ, e haa nɛ wa hemi kɛ yemi ɔ mi waa.​—Rom. 1:11, 12; 10:17.

14. Mɛni blɔ nɔ nɛ fiɛɛmi ní tsumi ɔ haa nɛ wa hemi kɛ yemi ɔ mi waa?

¹⁴ Nɔ́ kpa ko hu nɛ maa ye bua wɔ nɛ wa  hemi kɛ yemi ɔ mi nɛ wa ji fiɛɛmi ní tsumi ɔ nɛ wa ma tsu. (Heb. 10:23) Nyɛmiyo ko nɛ a tsɛɛ lɛ ke Barbara, nɛ e ngɛ Yehowa sɔmɔe jeha 70 kɛ se ji nɛ ɔ de ke: “I na kaa fiɛɛmi ní tsumi ɔ nɛ i kɛ ye he woɔ mi ɔ haa nɛ ye hemi kɛ yemi ɔ mi waa. Be fɛɛ be nɛ i kɛ nihi maa sɛɛ ní kpakpahi nɛ Yehowa wo si kaa e maa pee ha adesahi ɔ he ní ɔ, lɔ ɔ woɔ ye hemi kɛ yemi ɔ mi he wami.”

15. Mɛni blɔ nɔ nɛ dɛ he ní kasemi haa nɛ wa hemi kɛ yemi ɔ mi waa? (Hyɛ foni ɔmɛ hulɔ.)

¹⁵ Nyɛ ha nɛ waa hyɛ nɔ́ kpa ko hu nɛ ke wa pee ɔ, e ma ha nɛ wa hemi kɛ yemi ɔ mi nɛ wa. Lɔ ɔ ji, dɛ he ní kasemi. Nyɛmiyo ko nɛ a tsɛɛ lɛ ke Susan ɔ na kaa ke e to be pɔtɛɛ nɛ e kɛ kase ní ɔ, e yeɔ bua lɛ wawɛɛ. E de ke: “Daa Hɔgba a, i kaseɔ Hwɔɔmi Mɔ nɛ a maa kase otsi nɛ maa ba a. Nɛ Hɔɛgbi kɛ Pɛplɛgbi hu ɔ, i dlaa ye kɛ haa otsi kpɛti kpe ɔ. I ngɔɔ ligbi kpa amɛ nɛ piɛ ɔ kɛ peeɔ ye dɛ he ní kasemi.” Akɛnɛ e nyɛɛɔ blɔ nya nɛ e to ɔ se he je ɔ, e nyɛɔ nɛ e kaseɔ ní be fɛɛ be, nɛ lɔ ɔ haa nɛ e hemi kɛ yemi ɔ mi waa. Nyɛmiyo Irene nɛ e kɛ jeha babauu sɔmɔ ngɛ asafo ɔ ní tsumi yi ɔ na kaa ke e kase Baiblo gbamihi a he ní ɔ, e woɔ e hemi kɛ yemi ɔ mi he wami. E de ke: “Ke i na bɔ nɛ Baiblo gbamihi ngɛ mi bae ha fitsofitso ɔ, lɔ ɔ haa nɛ ye hemi kɛ yemi ɔ mi waa.” c

“E MAA BA MI KOKOOKO”

16. Mɛni he je nɛ nɔ́ nɛ Yehowa de Habakuk ɔ ma nyɛ maa ye bua wɔ hu mwɔnɛ ɔ? (Hebri Bi 10:36, 37)

¹⁶ Jehahi babauu ji nɛ ɔ nɛ Yehowa sɔmɔli komɛ ngɛ blɔ hyɛe kaa je nɛ ɔ maa ba nyagbe. Ni komɛ nuɔ he kaa je ɔ nyagbe ɔ ngɛ se kpɛe tsɔ. Se Yehowa le bɔ nɛ e sɔmɔli nuɔ he ha. Ngɛ anɔkuale mi ɔ, Yehowa de Habakuk ke: “Be nɛ ma tsu nɔ́ nɛ ɔ sui lolo. Se kɛ̃ ɔ, be ɔ ma, nɛ e be kɛe, nɛ nɔ́ nɛ ma je ngɔ tsɔɔ mo ɔ maa ba mi kokooko. E maa pee kaa nɔ́ nɛ e ma blɛuu tsɔ, se kɛ̃ ɔ, hyɛ blɔ. Ejakaa e maa ba mi kokooko nɛ e be kɛe.” (Hab. 2:3) Anɛ Habakuk  pɛ nɛ e ná munyu nɛ ɔ nɛ Mawu tu ɔ he se lo? Aloo wɔ hu wa ma nyɛ ma ná jamɛ a munyu ɔ he se mwɔnɛ ɔ? Yehowa ha nɛ bɔfo Paulo ngma munyu ko kaa jã kɛ ha Kristofohi nɛ a ngɛ mwɔnɛ ɔ, nɛ a ngɛ je ehe ɔ blɔ hyɛe ɔ. (Kane Hebri Bi 10:36, 37.) Ngɛ anɔkuale mi ɔ, ke e pee kaa nɔ́ nɛ si nɛ Yehowa wo kaa e ma kpɔ̃ wɔ ɔ ngɛ se kpɛe po ɔ, wa ma nyɛ ma ná nɔ mi mami kaa “e maa ba mi kokooko nɛ e be kɛe.”

17. Mɛni blɔ nɔ nɛ nyɛmiyo ko ngɔ ga womi nɛ Yehowa kɛ ha Habakuk ɔ kɛ tsu ní?

¹⁷ Yehowa wo e sɔmɔli ga kaa a ya nɔ nɛ a “hyɛ blɔ” kaa je ehe ɔ maa ba, nɛ a ti nihi fuu ngɛ jã pee jehahi babauu ji nɛ ɔ. Kaa nɔ hyɛmi nɔ́ ɔ, Nyɛmiyo Louise nɛ e bɔni Yehowa sɔmɔmi kɛ je jeha 1939 ɔ de ke: “Jamɛ a be ɔ mi ɔ, i susu kaa Harmagedon maa ba loko ma gbe nɔ tsami sukuu nya, se e bɛ mi jã. Jeha komɛ a se ɔ, i kane Baiblo mi sanehi nɛ kɔɔ nihi nɛ a hyɛ blɔ kaa Yehowa maa ye e si womihi a nɔ ɔ a he, nɛ e ye bua mi nɛ i nyɛ to ye tsui si kɛ mlɛ Yehowa. Nihi nɛ i kane a he sane ɔ a ti ni komɛ ji Noa, Abraham, Yosef kɛ ni kpahi nɛ a mlɛ be kɛkɛɛ loko si nɛ Yehowa wo mɛ ɔ ba mi. Akɛnɛ i hyɛɔ blɔ be fɛɛ be kaa Yehowa si womi ɔmɛ maa ba mi he je ɔ, lɔ ɔ ha nɛ i kɛ ni kpahi wa ná nɔ mi mami kaa je ehe ɔ su si ta.” Ni kpahi hu nɛ a ngɛ Yehowa sɔmɔe be kɛkɛɛ ji nɛ ɔ na kaa enɛ ɔ ji anɔkuale.

18. Ke wa susu adebɔ níhi a he ɔ, mɛni blɔ nɔ nɛ hemi kɛ yemi nɛ wa ngɛ kaa je ehe ko maa ba a mi maa wa?

¹⁸ E ngɛ mi kaa je ehe ɔ bɛ lolo mohu lɛɛ, se mo susu ní komɛ kaa dodoehi, tsohi, lohwehi kɛ adesahi a he nɛ o hyɛ. Jinɛ be ko nɛ be ɔ, ní nɛ ɔmɛ be, se amlɔ nɛ ɔ wa naa ní nɛ ɔmɛ tsuo. Nɔ́ he je nɛ wa naa ní nɛ ɔmɛ ji kaa Yehowa lɛ bɔ mɛ. (1 Mose 1:1, 26, 27) Jã kɛ̃ nɛ wa Mawu ɔ wo si kaa e ma ha nɛ je ehe ko maa ba, nɛ e maa ye si womi nɛ ɔ nɔ kokooko. Ngɛ je ehe ɔ mi ɔ, wa ma ná nɔmlɔ tso mi he wami kpakpa, nɛ wa maa hi si kɛ ya neneene. Wa ma nyɛ ma ná nɔ mi mami kaa je ehe ɔ maa ba ngɛ be nɛ Mawu to ɔ nya.​—Yes. 65:17; Kpoj. 21:3, 4.

19. Mɛni maa ye bua mo konɛ o hemi kɛ yemi ɔ mi nɛ wa?

¹⁹ Kɛ yaa si be nɛ je ehe ɔ maa ba a, moo ngɔ he blɔ fɛɛ he blɔ nɛ o ma ná a kɛ pee níhi nɛ ma ha nɛ o hemi kɛ yemi ɔ mi maa wa. Moo na kpɔmi nɔ́ ɔ kaa nɔ́ ko nɛ he jua wa. Mo susu he wami nɛ Yehowa ngɛ ɔ he. Moo pee níhi nɛ ma ha nɛ huɛ bɔmi nɛ ngɛ o kɛ Yehowa nyɛ kpɛti ɔ mi maa wa. Ke o pee jã a, mo hu o maa piɛɛ “nihi nɛ kɛ gu hemi kɛ yemi kɛ tsui si tomi nɔ ɔ, a nine su si womi ɔmɛ a nɔ ɔ” a he.​—Heb. 6:11, 12; Rom. 5:5.