1, 2. (a) Kɛ gba si himi plɛ kɛ je sisi ha kɛɛ? (b) Mɛni eko ɔ, Adam kɛ Hawa na ngɛ gba si himi he? (Moo hyɛ foni nɛ ngɛ ní kasemi ɔ sisije ɔ.)

GBA SI HIMI piɛɛ adesahi a si himi he. Ke wa susu bɔ nɛ gba si himi plɛ kɛ je sisi, kɛ yi mi tomi he je nɛ a to gba si himi sisi ɔ he ɔ, e maa ye bua wɔ konɛ wa ná gba si himi he juɛmi kpakpa, nɛ wa ná jɔɔmihi fuu ngɛ mi. Benɛ Mawu bɔ Adam ɔ, e ngɔ lohwe ɔmɛ kɛ ba ha lɛ konɛ e wo mɛ biɛ. Se “lɛ nɔmlɔ ɔ nitsɛ lɛɛ a na we he piɛɛlɔ nɛ sa ha lɛ lolo.” Lɔ ɔ he ɔ, Mawu ha nɛ mahe vii ko ba nɔ Adam nɔ, nɛ Mawu je e kasa wu kake, nɛ e kɛ pee yo, nɛ e ngɔ lɛ ba ha Adam. (Kane 1 Mose 2:20-24.) Enɛ ɔ tsɔɔ kaa Mawu ji nɔ nɛ to gba si himi sisi.

² Yesu ma nɔ mi kaa Yehowa ji nɔ nɛ de ke: “Nyumu ma si e tsɛ kɛ e nyɛ, nɛ e maa mɛtɛ e yo he, nɛ mɛ ni enyɔ ɔmɛ a ma plɛ pee nɔ kake.” (Mat. 19:4, 5) Adam kasa wu kake ɔ nɛ Mawu kɛ bɔ Hawa a ha nɛ mɛ ni enyɔ ɔmɛ na kaa a ngɛ kɛ ha a sibi. Mawu de we ke a po gba a mi ligbi ko, nɛ jã kɛ̃ nɛ e de we ke nyumu nɛ ngɔ yo fuu, aloo yo nɛ gba nyumuhi fuu.

3. Mɛni yi mi tomi titli he je nɛ Mawu to gba si himi sisi?

³ Adam bua jɔ e yo ɔ he, nɛ pee se ɔ, e wo lɛ biɛ ke Hawa. Hawa ji Adam “he piɛɛlɔ” nɛ “sa lɛ.” Mɛ ni enyɔ ɔmɛ ma ná bua jɔmi ngɛ si himi mi kaa nɔ kɛ e yo daa. (1 Mose 2:18) Nɔ́ titli he je nɛ Mawu to gba si himi sisi ji kaa adesahi nɛ a fɔ nɛ a hyi zugba a nɔ. (1 Mose 1:28) E ngɛ mi kaa bimɛ maa suɔ a fɔli mohu lɛɛ, se be maa su nɛ a maa sɛ gba si himi mi nɛ a ma si a fɔli ɔmɛ, nɛ a maa to mɛ nitsɛmɛ a wekuhi a sisi. Jinɛ adesahi ma hyi zugba a nɔ bɔ nɛ sa, nɛ a ma ha nɛ zugba a tsuo maa pee paradeiso.

4. Mɛni ba Adam kɛ Hawa a gba a nɔ?

⁴ Adam kɛ Hawa gba a puɛ, ejakaa a gbo Mawu tue. “Blema sinɔ ngua a” nɛ ji Satan Abosiami ɔ sisi Hawa. E ha nɛ Hawa susu kaa ke e ye “tso nɛ haa nɔ leɔ kpakpa kɛ yayami” ɔ yiblii ɔ, e maa le ní saminya, nɛ e ma nyɛ maa mwɔ e yi mi kpɔ ngɛ kpakpa kɛ yayami he. E bui e huno ɔ kaa lɛ ji weku ɔ yi konɛ e ma bi lɛ ga womi ngɛ sane ɔ he. Nɛ be mi nɛ e sa kaa Adam ko bu Mawu tue ɔ, lɛ hu e sɔle tso yiblii ɔ ngɛ Hawa dɛ nɛ e ye.​—Kpoj. 12:9; 1 Mose 2:9, 16, 17; 3:1-6.

5. Mɛni wa ma nyɛ maa kase kɛ je heto nɛ Adam kɛ Hawa ha Yehowa a mi?

⁵ Benɛ Mawu bi Adam sane ɔ, Adam tsɛ̃ munyu ɔ kɛ fɔ e yo ɔ nɔ. E de ke: “Yo ɔ nɛ o ngɔ ba piɛ ye he ɔ, lɛ nɛ ha mi tso ɔ yiblii ɔ eko nɛ i ye.” Hawa hu de ke sinɔ ɔ lɛ mlɔɔ lɛ. (1 Mose 3:12, 13) Adam kɛ Hawa ngɔ níhi nɛ sisi numi be he kɛ je a nya! Akɛnɛ a gbo Yehowa tue he je ɔ, e bu mɛ gbenɔ fɔ. Nɔ́ nɛ ba a nɔ ɔ ji kɔkɔ bɔmi kɛ ha wɔ! Loko nɔ kɛ e yo ma ná bua jɔmi ɔ, e sa kaa a ti nɔ tsuaa nɔ nɛ kplɛɛ e tɔmi nɔ nɛ e bu Yehowa tue.

6. Kɛ o ma plɛ kɛ tsɔɔ 1 Mose 3:15 ɔ nya ha kɛɛ?

⁶ Ngɛ nɔ́ nɛ Satan pee ngɛ Eden abɔɔ ɔ mi tsuo se ɔ, Yehowa ma nɔ mi kɛ ha adesahi kaa a ma nyɛ ma ná hɛ nɔ kami hwɔɔ se. Kekleekle gbami nɛ ngɛ Baiblo ɔ mi ɔ ha nɛ wa ná hɛ nɔ kami nɛ ɔ. (Kane 1 Mose 3:15.) Gbami nɛ ɔ tsɔɔ kaa “yo” ɔ “nina” a ma kpata Satan hɛ mi. Huɛ bɔmi gbagbanii ngɛ Yehowa kɛ bɔfo anɔkualetsɛmɛ nɛ a ngɛ lɛ sɔmɔe ngɛ hiɔwe ɔ a kpɛti. A ngɛ kaa e yo. E ma ha nɛ nɔ ko maa je bɔfo nɛ ɔmɛ a kpɛti nɛ e maa “fia” Abosiami yi nɔ́. Nina a ma ha nɛ adesahi nɛ a buɔ Yehowa tue ɔ a nine maa su nɔ́ nɛ ngmɛɛ Adam kɛ Hawa a nɔ. A ma ná he blɔ kaa a maa hi si ngɛ zugba a nɔ kɛ ya neneene kaa bɔ nɛ Yehowa to e yi mi kɛ je blema a.​—Yoh. 3:16.

7. (a) Kɛ je be nɛ Adam kɛ Hawa tɔ̃ ɔ, mɛni lɛ ba gba si himi nɔ? (b) Mɛni Yehowa suɔ kaa huno kɛ e yo nɛ a pee?

⁷ Atua nɛ Adam kɛ Hawa tsɔ ɔ sa a gba si himi ɔ he, nɛ e sa gba si himi kpahi hu a he. Kaa nɔ hyɛmi nɔ́ ɔ, Hawa kɛ yihi tsuo nɛ maa ba ngɛ e se ɔ maa pii ngɛ a hɔ ngɔmi kɛ a fɔmi be mi. Yigbayi maa suɔ a hunomɛ wawɛɛ, se a hunomɛ maa ye a nɔ, nɛ a maa pee mɛ ní sɛ níhi po, kaa bɔ nɛ nihi fuu peeɔ ngɛ a gba si himi mi mwɔnɛ ɔ. (1 Mose 3:16) Yehowa suɔ kaa wekuyihi nɛ a suɔ a yihi, nɛ e suɔ kaa yigbayi hu nɛ a ba a he si kɛ ha a hunomɛ. (Efe. 5:33) Ke nɔ kɛ e yo nɛ a yeɔ Mawu gbeye peeɔ kake ɔ, a ma nyɛ ma tsu nyagbahi fuu nɛ a kɛ maa kpe ngɛ a gba si himi mi ɔ he ní.

8. Mɛni o ma nyɛ ma de ngɛ gba si himi nɛ hi si kɛ je Adam yi nɔ kɛ ba si benɛ Nyu Kpekpemi ɔ ba a he?

⁸ Loko Adam kɛ Hawa ma gbo ɔ, a fɔ binyumuhi kɛ biyihi. (1 Mose 5:4) Kain ji a bitɛte. Yo nɛ e ngɔ ɔ ji lɛ nitsɛ e weku no. Kain nina Lamek ji kekleekle nɔ nɛ Baiblo ɔ tu e he munyu kaa e ngɔ yihi enyɔ. (1 Mose 4:17, 19) Kɛ je Adam yi nɔ kɛ ba si benɛ Nyu Kpekpemi ɔ ba ngɛ Noa be ɔ mi ɔ, nihi nɛ a hi si ɔ a ti nihi bɔɔ ko pɛ ji Yehowa sɔmɔli. Nimli nɛ ɔmɛ a kpɛti ni komɛ ji Habel, Enok, kɛ Noa kɛ e weku ɔ. Baiblo ɔ tsɔɔ kaa ngɛ Noa be ɔ mi ɔ, “Mawu binyumu ɔmɛ ekomɛ na kaa yi nɛ ɔmɛ a he ngɛ fɛu; lɔ ɔ he ɔ, a ngɔ a ti ni nɛmɛ nɛ a suɔ.” Yehowa bɔɛ bɔfohi kaa a kɛ yihi nɛ hi si, enɛ ɔ he ɔ, bimɛ nɛ bɔfo ɔmɛ kɛ yi ɔmɛ fɔ ɔ je ekpa ngɛ adesahi a he. A tsɛɛ bɔfohi a bimɛ nɛ ɔmɛ ke Nefilim. Jamɛ a be ɔ mi ɔ, “nimlihi a yi mi wa, nɛ nɔ́ yaya pɛ a susuɔ daa nɛ ɔ.”​—1 Mose 6:1-5.

9. Mɛni Yehowa pee yayami peeli ɔmɛ ngɛ Noa be ɔ mi, nɛ mɛni wa ma nyɛ maa kase ngɛ nɔ́ nɛ ya nɔ jamɛ a be ɔ mi ɔ mi?

⁹ Yehowa ngɔ Nyu Kpekpemi ɔ nɛ ba ngɛ Noa be ɔ mi ɔ kɛ kpata yayami peeli a hɛ mi. Jamɛ a be ɔ mi ɔ, níhi nɛ nihi peeɔ daa ligbi ɔ he a juɛmi. “Noa nɛ fiɛɛ ke a pee nɔ́ nɛ da a” bɔ mɛ kɔkɔ ngɛ hɛ mi kpatami nɛ ma a he, se a bui tue. Ní nɛ ɔmɛ a kpɛti kake ji gba si himi mi sɛmi. (2 Pet. 2:5) Yesu ngɔ níhi nɛ ya nɔ ngɛ jamɛ a be ɔ mi ɔ kɛ to níhi nɛ wa maa na ngɛ wa be ɔ mi ɔ he. (Kane Mateo 24:37-39.) Mwɔnɛ ɔ, wa ngɛ Mawu Matsɛ Yemi ɔ he sane kpakpa a fiɛɛe ngɛ je ɔ mi tsuo, konɛ wa kɛ ye je ma amɛ tsuo odase loko je ɔ nyagbe ɔ nɛ ba, se nihi fuu bui tue. Mɛni wa ma nyɛ maa kase ngɛ nɔ́ nɛ ya nɔ benɛ Nyu Kpekpemi ɔ ba a mi? E sɛ nɛ wa ha nɛ níhi kaa gba si himi kɛ bi fɔmi nɛ he wa juɛmi nɛ wa hɛ nɛ je nɔ kaa Yehowa ligbi ɔ su si ta.

10. (a) Mɛni ajuama bɔmi ní peepeehi nɛ he si ngɛ mahi fuu a nɔ? (b) Mɛni blɔ nɔ Abraham kɛ Sara gu kɛ pee nɔ hyɛmi nɔ́ kpakpa ngɛ gba si himi mi?

¹⁰ E ngɛ mi kaa Noa kɛ e binyumuhi etɛ ɔmɛ tsuo a ti nɔ tsuaa nɔ ngɔ yo kake mohu lɛɛ, se ngɛ a be ɔ mi ɔ, ni komɛ hu ngɔ yihi fuu. Ngɛ ma komɛ a nɔ ɔ, nihi nɛ́ tɔmi ko ngɛ ajuama bɔmi ní peepeehi a he. A peeɔ jamɛ a ní ɔmɛ ngɛ a jamihi po a mi. Benɛ Abram (Abraham) kɛ e yo Sarai (Sara) bu Mawu tue nɛ a hia kɛ ho Kanaan ya a, Kanaan bi ɔmɛ peeɔ níhi kɛ gbeɔ gba si himi he guɛ. Enɛ ɔ he ɔ, Yehowa ma e juɛmi nya si kaa e ma kpata Sodom kɛ Gomora hɛ mi, ejakaa ma bi ɔmɛ kɛ a he woɔ ajuama bɔmi mi, nɛ a kplɛɛɔ ajuama bɔmi ní peepeehi a nɔ. Abraham hyɛ e weku ɔ nɔ saminya, nɛ Sara hu pee nɔ hyɛmi nɔ́ kpakpa nɛ e ba e he si kɛ ha Abraham kaa e yi. (Kane 1 Petro 3:3-6.) Abraham ha nɛ e bi Isak ngɔ yo nɛ jaa Yehowa. Isak hu ha nɛ e bi Yakob ngɔ yo nɛ jaa Yehowa. Yakob binyumu ɔmɛ nɛ a pee Israel wɛtso 12 ɔ nɛ.

11. Mɛni blɔ nɔ Mose Mlaa a po Israel bi ɔmɛ a he piɛ ngɛ?

¹¹ Pee se ɔ, Yehowa kɛ Yakob (Israel) nina a so somi ko. E ha mɛ Mose Mlaa a, nɛ Mlaa a po hunomɛ kɛ yigbayi a he piɛ ngɛ a gba si himi ɔ mi. Mlaa a eko tsɔɔ kaa e sɛ nɛ a ngɔ yihi fuu. Mlaa a po Israel bi ɔmɛ a he piɛ, nɛ a kɛ nihi nɛ a jaa lakpa mawuhi sɛ we gba si himi mi konɛ a ko je mɛ kɛ je Yehowa he. (Kane  5 Mose 7:3, 4.) Ke nihi kɛ a yihi kɛ nyagbahi nɛ a mi wa ngɛ kpee ɔ, ma nimeli yeɔ bua mɛ. Ke nɔ ko je e yo loo e huno se, aloo e ngɛ hunga jee, aloo e yi mi tɛ lɛ ngɛ e huno ɔ loo e yo ɔ he ɔ, mlaa a yeɔ bua mɛ kɛ tsuɔ he ní. Mlaa a ngmɛ blɔ kaa nihi kɛ a yihi ma nyɛ maa po gba mi, se blɔ tsɔɔmi ngɛ he. Ke nyumu ko na “nɔ́ yayami” ko ngɛ e yo he ɔ, e kɛ lɛ ma nyɛ maa po gba mi. (5 Mose 24:1) Baiblo ɔ tsɔɔ we nɔ́ pɔtɛɛ nɛ ji “nɔ́ yayami” ɔ, se hunomɛ be nyɛe maa da sane tsɔwitsɔwi a nɔ nɛ a kɛ a yihi nɛ po gba mi.​—3 Mose 19:18.

12, 13. (a) Kɛ ni komɛ kɛ a yihi hi si ha kɛɛ ngɛ Malaki be ɔ mi? (b) Mwɔnɛ ɔ, ke nɔ ko nɛ a baptisi lɛ kɛ nɔ ko yo loo nɔ ko huno puɛ gba a, mɛni maa je mi kɛ ba?

¹² Ngɛ gbalɔ Malaki be ɔ mi ɔ, hunomɛ nɛ a ji Yuda bi fuu da tɔ̃tɔ̃mi tsɔwitsɔwihi a nɔ nɛ a kɛ a yihi po gba mi. A ngmɛɔ a nihe mi yihi nɛ a kpee ɔ a he nɛ a ya ngɔɔ zangmawi, aloo yihi nɛ a jaa wɔ po. Benɛ Yesu ngɛ zugba a nɔ ɔ, Yuda bi “daa nɔ́ tsuaa nɔ́” ko nɔ nɛ a kɛ a yi ɔmɛ poɔ gba mi. (Mat. 19:3) Yehowa Mawu sume gba mi pomi kaa kikɛ ɔ.​—Kane Malaki 2:13-16.

¹³ Mwɔnɛ ɔ, Yehowa sɔmɔlɔ ko be nyɛe nɛ e da nɔ́ ko kɛkɛ nɔ nɛ e kɛ e yo loo e huno nɛ po gba mi. Se ngɔɔ lɛ kaa nɔ ko nɛ a baptisi lɛ puɛ gba, nɛ e kɛ lɛ nitsɛ e yo loo e huno po gba mi konɛ e kɛ nɔ nɛ e kɛ lɛ puɛ gba a nɛ sɛ gba si himi mi. Ke nɔ ɔ pia we e he ɔ, a maa fie lɛ kɛ je asafo ɔ mi konɛ asafo ɔ he nɛ tsɔ. (1 Kor. 5:11-13) Ja e ‘pee níhi nɛ tsɔɔ kaa e tsake e tsui’ loko a maa ngɔ lɛ ngɛ asafo ɔ mi ekohu. (Luka 3:8; 2 Kor. 2:5-10) A tsɔɔ we be abɔ nɛ e sa kaa nɔ ɔ nɛ ye loko a ngɔ lɛ ngɛ asafo ɔ mi ekohu. Se ke nɔ ko je e yo loo e huno se ɔ, e sɛ nɛ wa ma wa hɛ kɛ fɔ nɔ, e ngɛ mi kaa e ji nɔ́ ko nɛ pɔɛ bami ngɛ asafo ɔ mi mohu lɛɛ. E ma nyɛ ma he be, eko ɔ, jeha kake loo nɔ́ nɛ pe jã loko nɔ ɔ kɛ maa tsɔɔ kaa e pia e he niinɛ. Ke a ngɔ nɔ ɔ ngɛ asafo ɔ mi ekohu po ɔ, loloolo ɔ, ‘Mawu hɛ mi e maa da si ngɛ nɛ Mawu maa kojo lɛ.’​—Rom. 14:10-12; hyɛ November 15, 1979 Blɛfo gbi Hwɔɔmi Mɔ ɔ bf. 31-32.

14. Mɛni Mose Mlaa a tsu?

¹⁴ Mose Mlaa a hɛɛ Israel bi ɔmɛ jeha 1,500 kɛ se. Mlaa a ye bua Mawu we bi ngɛ blɔhi fuu a nɔ. Kaa nɔ hyɛmi nɔ́ ɔ, sisi tomi mlaahi ngɛ Mlaa a mi nɛ e yeɔ bua mɛ kɛ tsuɔ a weku mi nyagbahi a he ní, nɛ e hɛɛ mɛ kɛ ya si benɛ Mesia a ba. (Gal. 3:23, 24) Benɛ Yesu gbo ɔ, Mlaa a se po, nɛ Mawu kɛ blɔ nya tomi ehe bɔni ní tsumi. (Heb. 8:6) Blɔ nya tomi ehe nɛ ɔ kplɛɛ we ní komɛ nɛ Mose Mlaa a kplɛɛ nɔ ɔ a nɔ.

15. (a) Mɛni gba si himi he mlaa nɛ e sa kaa Kristofohi nɛ a nyɛɛ se? (b) Ke Kristofo no ko kɛ e yo loo e huno maa po gba mi ɔ, mɛni he e sa kaa e susu?

¹⁵ Ligbi ko ɔ, Farisi bi ɔmɛ ba bi Yesu sane ko kɛ kɔ gba si himi he. Yesu tsɔɔ kaa e ngɛ mi kaa Mose Mlaa ngmɛ blɔ kaa nihi kɛ a yihi loo a hunomɛ ma nyɛ maa po gba mi mohu lɛɛ, se “pi jã ji sane ɔ kɛ je sisi je.” (Mat. 19:6-8) Heto nɛ Yesu ha a tsɔɔ kaa yi mi tomi he je nɛ Mawu to gba si himi sisi ɔ ji nɔ́ nɛ e sa kaa Kristofohi nɛ a nyɛɛ se. (1 Tim. 3:2, 12) Akɛnɛ ke nihi sɛ gba si himi mi nɛ a peeɔ “he lo kake” he je ɔ, e sa nɛ nihi kɛ a yihi aloo a hunomɛ nɛ mɛtɛ a sibi a he, nɛ a ha nɛ suɔmi nɛ a ngɛ kɛ ha Mawu kɛ a sibi ɔ mi nɛ wa. Ke nɔ ko kɛ e huno  aloo e yo po gba mi ngɛ mlaa nya nɛ tsa pi kaa nɔ kake ɔ ya bɔ ajuama a, a ti nɔ ko kɛ nɔ kpa ko be nyɛe maa sɛ gba si himi mi hu. (Mat. 19:9) Ngɛ anɔkuale mi ɔ, ke nɔ ko huno loo e yo puɛ gba nɛ e pia e he ɔ, nɔ ɔ ma nyɛ maa ngɔ kɛ pa lɛ kaa bɔ nɛ gbalɔ Hosea hu ngɔ e yo Gomer gba puɛlɔ ɔ he yayami kɛ pa lɛ ɔ. Jã kɛ̃ nɛ Yehowa hu na Israel ma nɛ a puɛ gba ngɛ mumi mi ɔ mɔbɔ. (Hos. 3:1-5) Ke nɔ ko le kaa e yo aloo e huno puɛ gba nɛ e kplɛɛ nɛ e kɛ lɛ na bɔmi ɔ, lɔ ɔ tsɔɔ kaa e ngɔ nɔ nɛ puɛ gba a he yayami kɛ pa lɛ. Ke e ba jã a, nɔ́ ko be nɛ nɔ ɔ maa da nɔ ngɛ Ngmami ɔ mi nɛ e kɛ nɔ ɔ nɛ po gba mi.

16. Mɛni Yesu de ngɛ si nɛ a hiɔ nɛ a sɛ we gba si himi mi ɔ he?

¹⁶ Yesu tsɔɔ kaa ngɛ anɔkuale Kristofohi a blɔ fami ɔ, ja huno ko aloo yogbayo ko ya bɔ ajuama pɛ loko a ma nyɛ maa po gba mi. Lɔ ɔ se ɔ, e tu ‘nihi nɛ Mawu ha’ mɛ nyɛmi nɛ a ma nyɛ maa hi si nɛ a be gba si himi mi sɛe ɔ a he munyu. E de ke: ‘Nɔ nɛ ma nyɛ maa pee jã a, e pee jã.’ (Mat. 19:10-12) Nihi fuu suɔ kaa a maa hi si nɛ a be gba si himi mi sɛe konɛ a nyɛ nɛ a ngɔ a juɛmi tsuo kɛ ma Yehowa jami nɔ. Wa ngɛ nihi nɛ a pee jã a yi jee wawɛɛ.

17. Mɛni ma nyɛ maa ye bua Kristofo no ko konɛ e ma e juɛmi nya si ke ji e maa sɛ gba si himi mi loo e be mi sɛe?

¹⁷ Nɔ ko ma nyɛ maa hi si nɛ e be gba si himi mi sɛe jio, e maa sɛ gba si himi mi jio, e sa nɛ lɛ nitsɛ nɛ e hyɛ kaa e ngɛ jamɛ a nyɛmi ɔ lo. Bɔfo Paulo wo nihi he wami kaa ke e maa hi ɔ a ko sɛ gba si himi mi. Se e de hu ke: “Ajuama bɔmi he ɔ, nyumu tsuaa nyumu nɛ ná lɛ nitsɛ e yo, nɛ yo tsuaa yo nɛ ná lɛ nitsɛ e huno.” Lɔ ɔ se ɔ, Paulo de ke: “Ke nyɛ nyɛ we nyɛ he nɔ nyɛɛ ye ɔ, e hia kaa nyɛɛ sɛ gba si himi mi. Ejakaa lɔ ɔ hi pe nɔ́ nɛ akɔnɔ ma ba hao nyɛ.” Ke nɔ ko sɛ gba si himi mi ɔ, lɔ ɔ ma nyɛ maa po e he piɛ konɛ akɔnɔ nɛ ko ha nɛ e fiɛ e fɔmi nihi a he, loo e bɔ ajuama. Jehanɛ hu ɔ, jeha nɛ nɔ ko ye ɔ he hia. Paulo de ke: ‘Ke nɔ ko na kaa e nyɛ we e he nɔ nɛ e hyɛ, nɛ e wa bɔ nɛ sa a, e pee kaa bɔ nɛ e ngɛ hlae ɔ. Yayami ko be enɛ ɔ mi. Ee, a sɛ gba si himi mi.’ (1 Kor. 7:2, 9, 36; 1 Tim. 4:1-3) E sɛ nɛ nihewi kɛ zangmawi nɛ da bɔmi nami he akɔnɔ nɛ mi wa nɛ a náa a nɔ kɛ sɛ gba si himi mi. Eko ɔ, e wɛ nɛ́ e ma nyɛ ma tsu blɔ nya ní tsumihi nɛ ngɛ gba si himi mi ɔ a he ní.

18, 19. (a) Mɛnɔ nɛ e sa kaa Kristofo no nɛ e kɛ lɛ nɛ sɛ gba si himi? (b) Mɛni he wa ma susu ngɛ ní kasemi nɛ nyɛɛ se ɔ mi?

¹⁸ Ke Kristofo no ko maa sɛ gba si himi mi ɔ, e sa nɛ e kɛ nyumu loo yo nɛ a baptisi lɛ nɛ e suɔ Yehowa kɛ e tsui tsuo ɔ nɛ pee jã. E sa nɛ a suɔ a sibi wawɛɛ hulɔ. Ngɛ anɔkuale mi ɔ, ke nɔ ko kɛ “nɔ ko nɛ le Nyɔmtsɛ ɔ” sɛ gba si himi mi ɔ, a ma ná jɔɔmi. (1 Kor. 7:39) Ke a ná sɛ gba si himi mi ɔ, atsinyɛ jemi ko be he kaa mɛ tsuo a maa na kaa ga womi nɛ ngɛ Baiblo ɔ mi ɔ se be, nɛ e maa ye bua mɛ nɛ a gba si himi ɔ maa ngɔ.

¹⁹ Ngɛ “nyagbe ligbi ɔmɛ” a mi ɔ, nihi nɛ a sɛ gba si himi mi kɛ nyagbahi kpeɔ, nɛ nyumuhi kɛ yihi fuu peeɔ níhi nɛ ha we nɛ bua jɔmi nɛ hi a gba si himi ɔ mi. (2 Tim. 3:1-5) Ngɛ munyu nɛ nyɛɛ se ɔ mi ɔ, wa maa kase Ngmami ɔ mi munyu komɛ nɛ ma nyɛ maa ye bua Kristofohi nɛ a sɛ gba si himi mi ɔ konɛ a nyɛ nɛ a da nyagba nɛ ɔmɛ a nya. Yehowa kɛ ga womi kpakpahi ha wɔ ngɛ Baiblo ɔ mi. Ga womi nɛ ɔmɛ maa ye bua nihi nɛ a sɛ gba si himi mi ɔ konɛ a gba si himi ɔ nɛ ngɔ, nɛ a ya nɔ nɛ a kɛ e we bi nɛ nyɛɛ neneene wami blɔ ɔ nɔ.​—Mat. 7:13, 14.