1. E ngɛ mi kaa behi fuu ɔ, gba si himi jeɔ sisi kɛ bua jɔmi mohu lɛɛ, se mɛni ma nyɛ maa ba? (Moo hyɛ foni nɛ ngɛ ní kasemi ɔ sisije ɔ.)

KE A ngɔ ayɛflo kɛ ba ha e huno ngɛ yo kpeemi ligbi ɔ nɔ ɔ, bua jɔmi nɛ a náa a hí kalemi. Benɛ a ngɛ huɛ bɔe konɛ a kɛ sɛ gba si himi mi ɔ, suɔmi nɛ a ngɛ ha a sibi ɔ mi ba waa wawɛɛ. Lɔ ɔ se ɔ, a kãa a sibi kita kaa ke a sɛ gba si himi mi ɔ, a maa ye a sibi anɔkuale daa. Ngɛ anɔkuale mi ɔ, ja mɛ ni enyɔ ɔmɛ tsuo pee tsakemihi ngɛ a si himi mi loko a ma nyɛ maa hi si. Se Mawu Munyu ɔ kɛ ga womi haa nihi tsuo nɛ a suɔ kaa a maa sɛ gba si himi mi ɔ. Yehowa ji nɔ nɛ to gba si himi sisi, nɛ e suɔ kaa nihi nɛ a maa sɛ gba si himi mi ɔ nɛ a ná bua jɔmi. (Abɛ 18:22) Se kɛ̃ ɔ, Ngmami ɔ ha nɛ wa le heii kaa adesahi yi mluku, enɛ ɔ he ɔ, ke a sɛ gba si himi mi ɔ, a ma gbo “dengme.” (1 Kor. 7:28) Mɛni maa ye bua mɛ konɛ a ko gbo dengme tsɔ? Nɛ mɛni Kristofohi ma nyɛ maa pee konɛ a gba si himi ɔ nɛ ngɔ?

2. Mɛni suɔmi slɔɔtoslɔɔtohi nɛ e sa kaa nɔ kɛ e yo nɛ a je kpo kɛ tsɔɔ a sibi?

² Baiblo ɔ tsɔɔ kaa suɔmi he hia wawɛɛ nitsɛ. E he hia nɛ nihi  kɛ a yihi nɛ a je suɔmi nɛ hii huɛmɛ a kpɛti ɔ (Hela, phi·liʹa) kpo kɛ tsɔɔ a sibi. Suɔmi nɛ hii nyumu kɛ yo a kpɛti ɔ (eʹros) hu haa nɛ bua jɔmi hiɔ gba si himi ɔ mi. Nɛ ke a fɔ bimɛ hu ɔ, e he hia nɛ a je suɔmi nɛ hiɔ weku mi bimɛ a kpɛti ɔ (stor·geʹ) kpo kɛ ha a he. Se suɔmi nɛ a kɛ daa sisi tomi mlaa nɔ ɔ (a·gaʹpe) lɛ haa nɛ gba si himi ɔ yeɔ manye. Bɔfo Paulo tu suɔmi nɛ ɔ he munyu. E de ke: “E sa kaa nyɛ ti nɔ tsuaa nɔ nɛ suɔ e yo kaa bɔ nɛ e suɔ lɛ nitsɛ e he, nɛ yogbayo tsuaa yogbayo nɛ bu e huno.”​—Efe. 5:33.

3. Kɛ e sa kaa suɔmi nɛ hiɔ gba si himi mi ɔ mi nɛ wa ha kɛɛ?

³ Paulo ngma ke: “Nyɛ hunomɛ, nyɛɛ suɔ nyɛ yi ɔmɛ kaa bɔ nɛ Kristo hu suɔ asafo ɔ, nɛ e ngɔ lɛ nitsɛ e wami ngɔ ha ngɛ e he ɔ.” (Efe 5:25) Loko Yesu se nyɛɛli ma nyɛ maa kase lɛ ɔ, e sa nɛ mɛ hu a suɔ a sibi kaa bɔ nɛ e suɔ mɛ ɔ. (Kane Yohane 13:34, 35; 15:12, 13.) Ke Kristofohi sɛ gba si himi mi ɔ, e sa nɛ suɔmi nɛ maa hi a kpɛti ɔ mi nɛ wa wawɛɛ, nɛ ke e he hia kaa a gbo ha a sibi po ɔ, a pee jã. Se ke a kɛ haomihi nɛ mi wa ngɛ kpee ɔ, eko ɔ, a be suɔe kaa a ma gbo ha a sibi. Se a·gaʹpe suɔmi haa nɔ “toɔ tsui si ngɛ nɔ́ tsuaa nɔ́ mi. E haa nɔ heɔ nɔ́ tsuaa nɔ́ yeɔ; e ngɔɔ e hɛ ngɔ fɔɔ Mawu nɔ, nɛ e miaa e hɛ mi ngɛ níhi tsuo mi.” Niinɛ, “suɔmi se pui gblegbleegble.” (1 Kor. 13:7, 8) E sa nɛ Kristofohi nɛ a sɛ gba si himi mi ɔ nɛ a kai kita nɛ a kã a sibi ɔ. A wo a he si kaa a maa suɔ a sibi nɛ a maa ye a sibi anɔkuale be fɛɛ be. Ke enɛ ɔ ngɛ a juɛmi mi ɔ, a ma bi Yehowa konɛ e ye bua mɛ kɛ tsu nyagbahi nɛ a kɛ kpeɔ ngɛ a gba si himi mi ɔ he ní.

4, 5. (a) Mɛni ji huno ɔ nɛ ji wekuyi ɔ blɔ nya ní tsumi? (b) Kɛ e sa kaa yogbayo kɛ e huno nɛ ji e yi ɔ nɛ hi si ha kɛɛ? (d) Mɛni tsakemi lɛ nɔ ko kɛ e yo a pee?

⁴ Paulo tsɔɔ huno ɔ kɛ yo ɔ tsuo a blɔ nya ní tsumi. E ngma ke: “Nyɛ yigbayi, nyɛɛ ba nyɛ he si ha nyɛ hunomɛ kaa bɔ nɛ nyɛ maa pee ha Nyɔmtsɛ ɔ. Ejakaa huno ɔ ngɛ e yo ɔ nɔ he wami kaa bɔ nɛ Kristo hu ngɛ asafo ɔ nɔ he wami ɔ. Kristo ngɔ e wami ngɔ ha, nɛ e kɛ he asafo ɔ yi wami.” (Efe. 5:22, 23) Enɛ ɔ tsɔɔ we kaa huno ɔ he hia pe yo ɔ. Blɔ tsɔɔmi nɛ ɔ yeɔ bua yo ɔ nɛ e tsuɔ blɔ nya ní tsumi nɛ Mawu kɛ wo yigbayihi a dɛ ɔ he ní. Mawu de ke: ‘E hí kaa Adam nɔ kake too nɛ hi si; ma ha lɛ he piɛɛlɔ nɛ sa lɛ.’ (1 Mose 2:18) Kaa bɔ nɛ Kristo nɛ ji ‘asafo ɔ yi’ ɔ je suɔmi kpo kɛ tsɔɔ asafo ɔ, jã kɛ̃ nɛ e sa kaa wekuyihi nɛ a ji Kristofohi ɔ hu nɛ a je suɔmi kpo kɛ tsɔɔ a weku mi bimɛ. Ke huno ko pee jã a, lɔ ɔ haa nɛ e yo ɔ bua jɔɔ nɛ e tsui nɔɔ e mi, nɛ lɛ hu e buɔ e huno ɔ nɛ e baa e he si kɛ haa lɛ, nɛ e fĩɔ e se ngɛ nɔ́ fɛɛ nɔ́ mi.

⁵ Nyɛmiyo ko nɛ a tsɛɛ lɛ ke Cathy ^[1] ɔ de ke: “Benɛ i sɛ we gba si himi mi lolo ɔ, i peeɔ nɔ́ tsuaa nɔ́ ngɛ ye dɛ he. Se benɛ i sɛ gba si himi mi ɔ, i ba na kaa e sa nɛ ma pee tsakemi. I kase kaa ke ma pee nɔ́ ko ɔ, e he hia nɛ ma de ye huno ɔ. Tsa pi be fɛɛ be nɛ jã peemi ngɛ gbɔjɔɔ, se akɛnɛ i kɛ Yehowa blɔ tsɔɔmi tsuɔ ní he je ɔ, suɔmi nɛ ngɛ wa kpɛti ɔ mi wa.” Cathy huno Fred de ke: “E be gbɔjɔɔ ha mi kaa ma mwɔ yi mi kpɔ ngɛ nɔ́ ko he. Ke o ngɔ yo ɔ, e he ba hia nɛ o susu yo ɔ he ngɛ nɔ́ fɛɛ nɔ́ ko nɛ o maa pee ɔ mi, nɛ enɛ ɔ peemi be gbɔjɔɔ. Se akɛnɛ i sɔleɔ kɛ biɔ Yehowa blɔ tsɔɔmi nɛ i buɔ ye yo ɔ tue he je ɔ, e yi ha mi tsɔ kaa ma pee jã. I naa kaa kake peemi ngɛ wa kpɛti!”

6. Ke haomi ko ba gba si himi mi ɔ, ngɛ mɛni blɔ nɔ nɛ suɔmi ma nyɛ maa pee kaa ‘kpã nɛ fĩɔ níhi tsuo ngɔ peeɔ kake’?

⁶ Ke nɔ ko kɛ e yo ‘naa ha a sibi, nɛ a kɛ tɔmihi paa a he’ ɔ, lɔ ɔ haa nɛ suɔmi nɛ a ngɛ kɛ ha a sibi ɔ mi waa. Ngɛ anɔkuale mi ɔ, a ti nɔ tsuaa nɔ ma nyɛ ma tɔ̃. Se ke e ba jã a, a ma nyɛ maa kase nɔ́ ko kɛ je a tɔmi ɔ mi, a  kɛ tɔmihi nɛ pa a sibi, nɛ a ha nɛ suɔmi nɛ ngɛ kaa ‘kpã nɛ fĩɔ níhi tsuo ngɔ peeɔ kake ɔ nɛ fĩ mɛ kɛ bla.’ (Kol. 3:13, 14) Jehanɛ se hu ɔ, ‘suɔmi toɔ e tsui si, nɛ e mi mi hi. E kɛ nɔ ko tɔmi wui e mi.’ (1 Kor. 13:4, 5) Ke pɛ ko ba a, e sa nɛ a dla amlɔ nɔuu. Enɛ ɔ he ɔ, ke pɛ ko ba nɔ kɛ e yo nɛ a ji Kristofohi ɔ a kpɛti ɔ, e sa nɛ a dla loko pu nɛ nɔ si. (Efe. 4:26, 27) E biɔ he si bami kɛ kã loko nɔ ko ma de ke, “Ye nɔ́ be mi.” Se ke nɔ ko kɛ e yo nyɛ nɛ a pee jã a, lɔ ɔ ma ha nɛ pɛ ɔ ma gbo, nɛ a maa suɔ a sibi wawɛɛ.

7, 8. (a) Mɛni ga Baiblo ɔ wo ngɛ bɔmi nami nɛ yaa nɔ ngɛ gba si himi mi ɔ he? (b) Mɛni he je nɛ e he hia nɛ nihi kɛ a yihi nɛ hɛɛ a sibi dɔdɔɔdɔ ɔ?

⁷ Baiblo ɔ haa wɔ ga womi nɛ ma nyɛ maa ye bua nɔ kɛ e yo konɛ a le blɔ nɛ da nɛ a ma nyɛ maa gu nɔ kɛ ha a sibi gba si himi blɔ nya nɔ́ ɔ. (Kane 1 Korinto Bi 7:3-5.) E he hia nɛ nɔ kɛ e yo nɛ a je suɔmi mi nɛ a susu a sibi a he. Ke nɔ ko hɛɛ we e yo dɔdɔɔdɔ ɔ, yo ɔ bua be bɔmi nami he jɔe. E sa nɛ hunomɛ nɛ “a na nya” ha a yi ɔmɛ. (1 Pet. 3:7) E sɛ nɛ huno aloo yogbayo ko nɛ e nyɛ e he piɛɛlɔ ɔ nɔ kaa e kɛ lɛ ma ná bɔmi. E sa nɛ a ti nɔ fɛɛ nɔ nɛ je e tsui mi kɛ pee jã. Behi fuu ɔ, nyumuhi akɔnɔ teɔ si mlamlaamla pe yihi. Se loko a ma ná bɔmi ɔ, e sa nɛ a ti nɔ tsuaa nɔ bua nɛ jɔ he kaa e maa pee jã.

⁸ E ngɛ mi kaa Baiblo ɔ wui mlaa ngɛ bɔ nɛ e sa kaa nɔ kɛ e yo nɛ a je suɔmi kpo kɛ ha a sibi aloo a ná bɔmi ha a he mohu lɛɛ, se e tu bɔ nɛ ni komɛ je suɔmi kpo ha a he munyu. (Lahi 1:2; 2:6) E sa kaa nɔ kɛ e yo nɛ a ji Kristofohi nɛ a hɛɛ a sibi dɔdɔɔdɔ.

9. Mɛni he je nɛ e sɛ kaa nihi nɛ a sɛ gba si himi mi ɔ nɛ a je suɔmi nɛ hii nɔ kɛ e yo a kpɛti ɔ kpo kɛ tsɔɔ nɔ kpa ko ɔ?

⁹ Ke nɔ kɛ e yo suɔ Mawu kɛ a nyɛmi nɔmlɔ wawɛɛ ɔ, lɔ ɔ be hae nɛ nɔ ko, aloo nɔ́ ko nɛ puɛ a gba a. Ni komɛ nɛ a sɛ gba si himi mi ɔ hyɛɛ ajuama bɔmi he fonihi, nɛ enɛ ɔ puɛ a gba a. E sa kaa wa kua ajuama bɔmi he fonihi a hyɛmi kɛ ajuama bɔmi ní peepeehi nɛ ma nyɛ ma puɛ gba. E sɛ nɛ wa je suɔmi nɛ hii nɔ kɛ e yo a kpɛti ɔ kpo kɛ tsɔɔ nɔ ko nɛ pi wa huno loo wa yo. Lɔ ɔ tsɔɔ we suɔmi. Ke be tsuaa be ɔ, wa kaiɔ kaa Mawu le níhi nɛ wa susuɔ nɛ e naa níhi nɛ wa peeɔ ɔ, lɔ ɔ maa wo wɔ he wami nɛ wa maa ya nɔ maa pee níhi nɛ e suɔ, nɛ wa he ma tsɔ.​—Kane Mateo 5:27, 28; Hebri Bi 4:13.

10, 11. (a) Kɛ gba puɛmi pɔ he ha kɛɛ mwɔnɛ ɔ? (b) Mɛni Baiblo ɔ de ngɛ gba jemi loo nɔ yo he ngmɛɛmi he? (d) Mɛni maa ye bua nɔ ko konɛ e ko ye oya kɛ je gba aloo e ngmɛɛ e yo he?

¹⁰ Ke nɔ ko kɛ e yo kɛ gba si himi mi nyagbahi nɛ a mi wa ngɛ kpee nɛ a nyɛ we nɛ a tsu he ní ɔ, lɔ ɔ ma nyɛ ma ha nɛ yo ɔ nɛ ma e juɛmi nya si kaa e maa je gba, aloo nyumu ɔ nɛ ma e juɛmi nya si kaa e maa ngmɛɛ e yo ɔ he, aloo mɛ ni enyɔ ɔmɛ tsuo a maa ma nya si kaa a maa po gba a mi. Ngɛ ma komɛ a nɔ ɔ, nihi babauu kɛ a yihi aloo a hunomɛ poɔ gba mi. Enɛ ɔ pɔɛ bami ngɛ Kristofohi asafo ɔ mi, se nyagbahi nɛ Kristofohi kɛ ngɛ kpee ngɛ gba si himi mi ɔ ji nɔ́ ko nɛ e sa kaa wa susu he.

¹¹ Baiblo ɔ kɛ blɔ tsɔɔmi nɛ nyɛɛ se nɛ ɔ ha. E de ke: “Yo kó je gba! Enɛ ɔ, pi imi nɛ i de. Se ke e na je gba kɛ̃ ɔ, e hi si jã, nɛ e ko gba, aloo e ya nɛ e kɛ e huno ɔ ya dla. Jehanɛ hu, nyumu ko ngmɛɛ e yo he.” (1 Kor. 7:10, 11) E sɛ nɛ waa bu gba jemi kaa nɔ́ ko nyafii. Eko ɔ, e maa pee wɔ kaa nyagba komɛ ngɛ nɛ ja nɔ ko je gba, aloo nɔ ko ngmɛɛ e yo he loko a ma nyɛ ma tsu he ní, se jã peemi kɛ nyagbahi fuu baa. Yesu ti munyu nɛ Mawu tu kaa nyumu ma si e tsɛ kɛ e nyɛ, nɛ e maa mɛtɛ e yo he ɔ mi. Lɔ ɔ se ɔ, e de ke: “Nɔ́ nɛ Mawu ngɔ tsa a, nɔmlɔ kó gba mi.” (Mat. 19:3-6; 1 Mose 2:24) Enɛ ɔ hu tsɔɔ kaa e sɛ nɛ  huno ko aloo yogbayo ko nɛ gba ‘nɔ́ nɛ Mawu ngɔ tsa a mi.’ Yehowa suɔ kaa nɔ kɛ e yo nɛ a hi si daa. (1 Kor. 7:39) Ke nɔ kɛ e yo ha nɛ e hi a juɛmi mi kaa a ti nɔ tsuaa nɔ maa bu akɔtaa kɛ ha Mawu ɔ, lɔ ɔ maa wo mɛ he wami konɛ a bɔ mɔde nɛ a tsu nyagbahi nɛ a kɛ maa kpe ɔ a he ní amlɔ nɔuu loko nyagba a mi nɛ ba wa.

12. Mɛni ma nyɛ ma ha nɛ nɔ ko nɛ je gba aloo e ngmɛɛ e yo he?

¹² Eko ɔ, nyumu ɔ loo yo ɔ aloo mɛ ni enyɔ ɔmɛ tsuo hyɛɔ nɔ́ ko nɛ be nyɛe maa ba mi ɔ blɔ. Enɛ ɔ ngɔɔ haomihi kɛ baa gba si himi ɔ mi. Ke nɔ ko suɔ nɛ bua jɔmi nɛ hi e gba si himi mi se bua jɔmi be mi ɔ, lɔ ɔ be hae nɛ nɔ ɔ tsui nɛ nɔ e mi, e ma susu kaa a sisi lɛ, nɛ e mi mi hu ma fu. Níhi nɛ ma nyɛ maa ngɔ nyagba kɛ ba gba si himi mi ɔ ekomɛ ji bɔ nɛ a tsɔse nyumu ɔ loo yo ɔ ha, bɔ nɛ a ti nɔ fɛɛ nɔ peeɔ e ní ha, bɔ nɛ a kɛ sika tsuɔ ní ha, nganyɛmɛ kɛ ngatsɛmɛ a ní peepee, kɛ bimɛ a tsɔsemi. Se bua jɔmi sane ji kaa Kristofohi nɛ a sɛ gba si himi mi ɔ a ti nihi babauu nyɛɔ tsuɔ nyagbahi nɛ a kɛ kpeɔ ɔ a he ní, ejakaa a kɛ Mawu blɔ tsɔɔmi tsuɔ ní.

13. Mɛni ji ní komɛ nɛ nɔ ko ma nyɛ maa da nɔ kɛ je gba loo e ngmɛɛ e yo he?

¹³ Be komɛ ɔ, tɔmi ko be he kaa yo ko maa je gba, aloo nyumu ko maa ngmɛɛ e yo he. Mɛni ji ní komɛ nɛ ma nyɛ ma ha nɛ nɔ ko nɛ pee jã? Ke nɔ ko je blɔ nɛ e kua e weku ɔ nɔ hyɛmi, aloo e kongoɔ e yo loo e huno, aloo e ngmɛ́ e yo loo e huno blɔ nɛ e ja Mawu. Ke Kristofohi nɛ a sɛ gba si himi kɛ haomihi nɛ a mi wa ngɛ kpee ɔ, e sa nɛ a de asafo mi nikɔtɔma amɛ konɛ a ye bua mɛ. Asafo mi nikɔtɔma amɛ ngɛ níhi a si kpami fuu, nɛ a ma nyɛ maa ye bua nɔ kɛ e yo ɔ konɛ a kɛ blɔ tsɔɔmi nɛ ngɛ Mawu Munyu ɔ mi ɔ nɛ tsu ní. Loko wa ma nyɛ ma tsu nyagbahi nɛ waa kɛ kpeɔ ngɛ gba si himi mi ɔ he ní ɔ, e sa kaa waa sɔle kɛ ha Yehowa konɛ e ha wɔ e mumi ɔ nɛ e ye bua wɔ nɛ waa kɛ Baiblo sisi tomi mlaahi nɛ tsu ní, nɛ waa wo mumi ɔ yiblii ɔ.​—Gal. 5:22, 23. ^[2]

14. Mɛni ga womi Baiblo ɔ kɛ ha nihi nɛ a yihi kɛ a hunomɛ pi Yehowa sɔmɔli?

¹⁴ Ni komɛ ngɛ nɛ a hunomɛ aloo a yihi pi Yehowa sɔmɔli. Ke nɔ ko ngɛ si fɔfɔɛ kaa jã a mi ɔ, Baiblo ɔ tsɔɔ yi mi tomi komɛ a he je nɛ e sa kaa e kɛ e yo ɔ loo e huno ɔ nɛ hi si. (Kane 1 Korinto Bi 7:12-14.) Ke e ba jã a, akɛnɛ nɔ nɛ pi Yehowa sɔmɔlɔ ɔ kɛ nɔ nɛ sɔmɔɔ Yehowa a sɛ gba si himi mi he je ɔ, “a tsukɔ e he ngɔ ha Mawu.” Ke a ngɛ bimɛ ɔ, a ba peeɔ bimɛ nɛ “a tsukɔ a he ngɔ ha Mawu.” Paulo ngma ke: “Mo yo nɛ o le Kristo, kɛ o maa pee kɛ le kaa alini mo lɛ o ma he o huno ɔ yi wami? Mo nyumu nɛ o le Kristo, kɛ o maa pee kɛ le kaa alini mo lɛ o ma he o yo ɔ yi wami?” (1 Kor. 7:16) Nihi fuu ngɛ asafo ɔ mi nɛ a hunomɛ kɛ a yihi pi Yehowa Odasefohi, se a ‘he a yi wami,’ aloo a ye bua mɛ nɛ a ba pee Yehowa sɔmɔli.

15, 16. (a) Mɛni ga Baiblo ɔ wo yihi nɛ a hunomɛ pi Mawu sɔmɔli ɔ? (b) Ke huno loo yo ko nɛ ‘li Kristo ɔ ngmɛɛ e yo he loo e je gba’ a, mɛni e sa kaa Kristofo no ɔ nɛ pee?

¹⁵ Bɔfo Petro wo yigbayihi nɛ a ji Kristofohi ɔ he wami kaa a ba a he si kɛ ha a hunomɛ ‘bɔ nɛ pee nɛ ke a ti ni komɛ he we Mawu munyu ɔ yi ɔ, a je mi bami nɛ tsake mɛ. E be hiae kaa a kɛ mɛ nɛ tu munyu po, ejakaa mɛ nitsɛmɛ a maa na kaa a je mi bami he tsɔ, nɛ a yeɔ Mawu gbeye.’ Ke yogbayo ɔ “he jɔ, nɛ e ngɛ kpoo ɔ, e he fɛu nɛ tsakee we ɔ ji nɔ́ nɛ he jua wa saminya ngɛ Mawu hɛ mi.” E je mi bami ma nyɛ ma ha nɛ e huno ɔ nɛ tsake nɛ e ba pee Yehowa sɔmɔlɔ. E he be hiae kaa e kɛ lɛ nɛ tu munyu po.​—1 Pet. 3:1-4.

¹⁶ Nɛ ke huno ko loo yogbayo ko nɛ e pi Yehowa sɔmɔlɔ ɔ ngmɛɛ e yo he loo e je gba hu nɛɛ? Baiblo ɔ de ke: “Ke nyumu nɛ li Kristo ɔ suɔ kaa e maa ngmɛɛ e yo nɛ le Kristo ɔ he ɔ, aloo yo nɛ li Kristo suɔ kaa e ma kua e huno nɛ le Kristo ɔ, lɔ ɔ lɛɛ faa. Ke e ba mi  jã a, mlaa ko mlaa ko nui nɔ nɛ le Kristo ɔ, nyumu ɔ jio, yo ɔ jio. Mawu tsɛ nyɛ nɛ nyɛɛ hi si ngɛ he jɔmi mi.” (1 Kor. 7:15) Ke e ba jã a, lɔ ɔ tsɔɔ we kaa ngɛ Ngmami ɔ nya a, Kristofo no ɔ nɛ e je gba a loo e ngmɛɛ e yo ɔ he ɔ ma nyɛ maa sɛ gba si himi mi. Se e sɛ nɛ nɔ ko nɛ nyɛ nɔ nɛ he we yi ɔ nɔ kaa e ko je. Eko ɔ, nihi nɛ a ngmɛɛ a yihi a he, aloo a je gba a a tue mi maa jɔ mɛ. Kristofo no ɔ ma nyɛ ma ná hɛ nɔ kami kaa e yo ɔ loo e huno ɔ kɛ lɛ ma ba hi si ekohu, nɛ a maa pee kake kɛ baa a gba si himi ɔ yi. E ma nyɛ ma ná hɛ nɔ kami hu kaa hwɔɔ se ɔ, e huno ɔ loo e yo ɔ ma ba sɔmɔ Yehowa.

17. Mɛni e sa kaa Kristofohi nɛ a sɛ gba si himi mi ɔ nɛ a kɛ pee oti ngɛ a si himi mi?

¹⁷ Akɛnɛ wa ngɛ “nyagbe ligbi ɔmɛ” a mi he je ɔ, “je mi he wa wawɛɛ.” (2 Tim. 3:1-5) Se ke wa ha nɛ huɛ bɔmi kpakpa hi waa kɛ Mawu wa kpɛti ɔ, lɔ ɔ be hae nɛ waa kase je ɔ su yaya a. Paulo ngma ke: “Be ɔ pi hu. Kɛ je be nɛ ɔ mi kɛ yaa a, yitsɛmɛ nɛ a hi si kaa nɔ́ nɛ yo be a dɛ, nihi nɛ a kɛ je ɔ ngɛ bɔe ɔ, a pee a ní kaa nihi nɛ puɛ we a be ngɛ je ɔ mi.” (1 Kor. 7:29-31) Paulo tsɔɔ we kaa nihi nɛ a sɛ gba si himi mi ɔ nɛ a ko tsu a blɔ nya ní tsumihi ngɛ gba si himi mi ɔ he ní. Akɛnɛ be nɛ piɛ ɔ pi he je ɔ, e he hia nɛ nihi nɛ a sɛ gba si himi mi ɔ nɛ a ngɔ Mawu jami mi níhi kɛ pee oti ngɛ a si himi mi.​—Mat. 6:33.

18. Mɛni he je nɛ Kristofohi a gba si himi ma nyɛ maa pee bua jɔmi, nɛ e ngɔ ɔ?

¹⁸ E ngɛ mi kaa wa ngɛ be nɛ mi wa mi, nɛ gba si himihi ngɛ puɛe mohu lɛɛ, se wa ma nyɛ ma ha nɛ bua jɔmi nɛ hi wa gba si himi ɔ mi, nɛ e ngɔ. Ngɛ anɔkuale mi ɔ, Kristofohi nɛ a sɛ gba si himi mi nɛ a ngɔ a he kɛ mɛtɛ Yehowa we bi, nɛ a kɛ Baiblo ɔ mi ga womi tsuɔ ní, nɛ a ngmɛɛɔ blɔ nɛ mumi klɔuklɔu ɔ kudɔɔ mɛ ɔ ma nyɛ maa po “nɔ́ nɛ Mawu ngɔ tsa a” he piɛ.​—Mar. 10:9.