1. Mɛni he blɔ nɛ wa ngɛ?

E JI he blɔ ngua nɛ wa ná kaa wa ngɛ Yehowa asafo ɔ mi! Wa ngɛ mumi mi paradeiso mi, nɛ nihi nɛ a ngɛ mi ɔ ngɛ tue mi jɔmi kɛ bua jɔmi. Mɛni ji o ní tsumi ngɛ asafo ɔ mi?

2. Mɛni nɔ́ he tomi nɔ́ nɛ bɔfo Paulo kɛ tsu ní ngɛ e sɛ womi komɛ a mi?

² Wa ma nyɛ maa kase sane nɛ ɔ he ní babauu ngɛ nɔ́ he tomi nɔ́ ko nɛ bɔfo Paulo kɛ tsu ní ngɛ sɛ womi komɛ nɛ Mawu mumi ɔ ha nɛ e ngma a mi. Ngɛ sɛ womi nɛ ɔmɛ eko fɛɛ eko mi ɔ, Paulo ngɔ asafo ɔ kɛ to adesa nɔmlɔ tso ɔ he. Jehanɛ hu ɔ, e ngɔ ni kakaakahi nɛ a ngɛ asafo ɔ mi ɔ kɛ to nɔmlɔ tso ɔ he ní ɔmɛ a he.​—Rom. 12:4-8; 1 Kor. 12:12-27; Efe. 4:16.

3. Mɛni níhi etɛ a he nɛ wa ma susu ngɛ ní kasemi nɛ ɔ mi?

³ Ngɛ ní kasemi nɛ ɔ mi ɔ, wa ma susu ní etɛ komɛ nɛ a he hia nɛ wa ma nyɛ maa kase ngɛ Paulo nɔ́ he tomi ní ɔmɛ a mi ɔ a he. Kekleekle ɔ, wa maa na kaa wa ti nɔ fɛɛ nɔ ngɛ ní tsumi * ngɛ Yehowa asafo ɔ mi. Enyɔne ɔ, wa ma susu nɔ́ nɛ wa ma nyɛ maa pee ke e he wa ha wɔ kaa wa ma yɔse wa ní tsumi ngɛ asafo ɔ mi ɔ he. Nɛ etɛne ɔ, wa maa na nɔ́ he je nɛ e sa nɛ waa ya nɔ nɛ wa tsu ní tsumi nɛ Mawu kɛ ha wɔ ngɛ e we asafo ɔ mi ɔ.

4. Mɛni wa kaseɔ ngɛ Roma Bi 12:4, 5 ɔ mi?

⁴ Kekleekle nɔ́ nɛ wa ma nyɛ maa kase ngɛ Paulo nɔ́ he tomi nɔ́ ɔ mi ji kaa wa kpɛti nɔ fɛɛ nɔ ngɛ ní tsumi ko nɛ he hia ngɛ Yehowa weku ɔ mi. Paulo je e nɔ́ he tomi nɔ́ ɔ sisi ke: “Kaa bɔ  nɛ wa ngɛ he níhi fuu ngɛ nɔmlɔ tso kake mi, se he ní ɔmɛ tsuo tsu we nɔ́ kake ɔ, jã kɛ̃ nɛ wɔ hu e ngɛ mi kaa wa he hiɛ mohu lɛɛ, se wa ji nɔmlɔ tso kake nɛ waa kɛ Kristo pee kake, se kaa ni kakaakahi ɔ, wa ji wa sibi a he níhi.” (Rom. 12:4, 5) Mɛni Paulo ngɛ tsɔɔe? E ngɛ tsɔɔe kaa wɔ tsuo wa tsuɔ ní tsumi slɔɔtoslɔɔtohi ngɛ asafo ɔ mi, se wɔ tsuo wa he jua wa.

5. Mɛni “nike níhi” nɛ Yehowa kɛ ha ngɛ asafo ɔ mi?

⁵ Ke wa ngɛ nihi nɛ a ngɛ ní tsumi ngɛ asafo ɔ mi ɔ a he munyu tue ɔ, eko ɔ, nihi nɛ o juɛmi maa ya a nɔ amlɔ nɔuu ji nihi nɛ a ngɛ hɛ mi nyɛɛe ɔ. (1 Tɛs. 5:12; Heb. 13:17) Ngɛ anɔkuale mi ɔ, Yehowa “ngɔ nike níhi kɛ ha ngɛ adesahi a mi” ngɛ e we asafo ɔ mi kɛ gu Kristo nɔ. (Efe. 4:8) Nike ní nɛ ɔmɛ ekomɛ ji Blɔ Tsɔɔmi Ajla Toli, nihi nɛ a yeɔ bua Blɔ Tsɔɔmi Ajla Toli ɔmɛ, Asafo ɔ Ní Tsumi Kɔni ɔ Ajla Toli, kpɔ mi nɔ hyɛli, nihi nɛ a tsɔɔ ní ngɛ Baiblo kasemi sukuuhi a mi, asafo mi nikɔtɔmahi kɛ asafo mi sɔmɔli. A kɛ mumi klɔuklɔu ɔ hla nyumu nɛ ɔmɛ tsuo konɛ a hyɛ Yehowa to ɔmɛ a nɔ, nɛ a tsu asafo ɔ hiami níhi a he ní ha mɛ.​—1 Pet. 5:2, 3.

6. Ngɛ 1 Tɛsalonika Bi 2:6-8 ɔ nya a, mɛni nɛ nyumuhi nɛ a kɛ mumi klɔuklɔu ɔ hla mɛ ɔ bɔɔ mɔde kaa a maa pee?

⁶ A kɛ mumi klɔuklɔu ɔ hla nyɛmimɛ nyumuhi konɛ a tsu blɔ nya ní tsumi slɔɔtohi a he ní ngɛ asafo ɔ mi. Kaa bɔ nɛ nɔmlɔ tso ɔ he níhi kaa nine kɛ nane tsuɔ ní konɛ nɔmlɔ tso ɔ tsuo nɛ ná he se ɔ, ja nɔuu kɛ̃ nɛ a kɛ mumi klɔuklɔu ɔ hla nyɛmimɛ nyumu nɛ ɔmɛ nɛ a tsu ní wawɛɛ konɛ asafo ɔ tsuo nɛ ná he se. Nyɛmimɛ nɛ ɔmɛ hla we hɛ mi nyami kɛ ha a he, mohu ɔ, a bɔɔ mɔde kaa a maa wo nyɛmimɛ ɔmɛ he wami nɛ a fia mɛ kɛ ma si. (Kane 1 Tɛsalonika Bi 2:6-8.) Wa naa Yehowa si kaa e ha wɔ nyumuhi nɛ a he su nɛ a fo we mɛ pɛ a nɔ́ mi!

7. Mɛni jɔɔmihi nɛ nihi fuu nɛ a kɛ a he wo be tsuo sɔmɔmi ní tsumi ɔ mi ɔ náa?

⁷ Nyɛmimɛ nɛ a ngɛ asafo ɔ mi ɔ a kpɛti ni komɛ sɔmɔɔ kaa ma se sane kpakpa fiɛɛli, blɔ gbali klɛdɛɛ kɛ daa blɔ gbali. Ngɛ anɔkuale mi ɔ, wa nyɛmimɛ nɛ a ngɛ je kɛ wɛ ɔ ngɔ kaselɔ peemi ní tsumi ɔ kɛ pee nɔ́ titli ngɛ a si himi mi. Jã nɛ a pee ɔ ha nɛ a ye bua nihi babauu nɛ a ba pee Kristo Yesu kaseli. E ngɛ mi kaa fiɛɛli nɛ ɔmɛ be he lo nya níhi fuu mohu lɛɛ, se Yehowa jɔɔ mɛ babauu. (Maak. 10:29, 30) Wa suɔ nyɛmimɛ nɛ ɔmɛ nɛ wa bua jɔ kaa a piɛɛ wa he kɛ ngɛ sɔmɔe ngɛ asafo ɔ mi!

8. Mɛni he je nɛ sane kpakpa fiɛɛli tsuo a he jua wa ha Yehowa a?

⁸ Anɛ nyɛmimɛ nyumuhi nɛ a hla mɛ kɛ nihi nɛ a ngɛ be tsuo sɔmɔmi ní tsumi ɔ mi ɔ pɛ nɛ a ngɛ ní tsumi ngɛ asafo ɔ mi lo? Dɛbi! Nɔ fɛɛ nɔ ko nɛ fiɛɛɔ sane kpakpa a he jua wa ha Mawu kɛ asafo ɔ. (Rom. 10:15; 1 Kor. 3:6-9) Ngɛ anɔkuale mi ɔ, ní tsumi ko nɛ e he hia wawɛɛ ngɛ asafo ɔ mi ji nɛ nɔ ko maa pee nihi Nyɔmtsɛ Yesu Kristo kaseli. (Mat. 28:19, 20; 1 Tim. 2:4) Nihi tsuo nɛ a ngɛ asafo ɔ mi, nɛ ji fiɛɛli nɛ a baptisi mɛ kɛ fiɛɛli nɛ a baptisi we mɛ ɔ tsuo bɔɔ mɔde kaa a maa ngɔ ní tsumi nɛ ɔ kɛ pee oti ngɛ a si himi mi.​—Mat. 24:14.

9. Mɛni he je nɛ wa naa wa nyɛmimɛ yi ɔmɛ kaa a he jua wa?

⁹ Yehowa ha nyɛmimɛ yihi nɛ a ngɛ asafo ɔ mi ɔ ní tsumi klɛdɛɛ ko. Jã nɛ e pee ɔ tsɔɔ kaa e ngɛ bu kɛ ha mɛ. E naa yigbayi, nyɛmɛ, yalɔyihi kɛ nyɛmimɛ yihi nɛ a sɛ we gba si himi mi nɛ a kɛ anɔkuale yemi sɔmɔɔ lɛ ɔ kaa a he jua wa. Baiblo ɔ tu yihi babauu nɛ a pee níhi nɛ sa Mawu hɛ mi ɔ a he munyu. E tu hemi kɛ yemi nɛ a ngɛ, kã nɛ a pee, bɔ nɛ a je a tsui mi kɛ ha nihi ní faa, bɔ nɛ a kɛ nile tsu ní ha kɛ ní kpakpahi fuu nɛ a pee ɔ he munyu. (Luka 8:2, 3; Níts. 16:14, 15; Rom. 16:3, 6; Filip. 4:3;  Heb. 11:11, 31, 35) Wa naa Yehowa si wawɛɛ kaa e ha wɔ nyɛmimɛ yihi kaa kikɛ ngɛ wa we asafo ɔmɛ a mi. Nyɛmimɛ yi nɛ ɔmɛ ngɛ su kpakpahi kaa yihi nɛ a tu a he munyu ngɛ Baiblo ɔ mi ɔ.

10. Mɛni he je nɛ wa naa wa nyɛmimɛ nɛ a wa ngɛ jeha mi ɔ kaa a he jua wa a?

¹⁰ Wa bua jɔ hu kaa wa ngɛ nyɛmimɛ nɛ a wa ngɛ jeha mi ngɛ asafo ɔ mi. Ngɛ asafo komɛ a mi ɔ, a ngɛ nyɛmimɛ nyumuhi kɛ yihi nɛ a wa ngɛ jeha mi nɛ a kɛ anɔkuale yemi ngɛ Yehowa sɔmɔe be kɛkɛɛ. A kpɛti ni komɛ hu ba na anɔkuale ɔ kɛ we. Wa nyɛmimɛ nɛ ɔmɛ a kpɛti nihi fuu kɛ nyagbahi kpeɔ akɛnɛ a jeha ngɛ hɛ mi yae ɔ he je. Eko ɔ, nyagba nɛ ɔmɛ be hae nɛ a nyɛ nɛ a pee babauu ngɛ asafo ɔ kɛ fiɛɛmi ní tsumi ɔ mi. Se kɛ̃ ɔ, a peeɔ nɔ́ nɛ a ma nyɛ ngɛ fiɛɛmi ní tsumi ɔ mi, nɛ a kɛ a nyɛmi tsuo woɔ ni kpahi he wami nɛ a tsɔseɔ mɛ. Wɔ hu wa náa nyɛmimɛ nɛ ɔmɛ a níhi a si kpami ɔmɛ a he se. Ngɛ anɔkuale mi ɔ, a he ngɛ fɛu ngɛ Yehowa hɛ mi, nɛ a he ngɛ fɛu ha wɔ hulɔ.​—Abɛ 16:31.

11-12. Kɛ nihewi kɛ yihewi nɛ a ngɛ o we asafo ɔ mi ɔ a ní peepee woɔ mo he wami ha kɛɛ?

¹¹ Jehanɛ hu ɔ, nyɛ ha nɛ wa susu nihewi kɛ yihewi nɛ a ngɛ wa kpɛti ɔ hu a he nɛ waa hyɛ. Susumi yayamihi nɛ ngɛ Satan je ɔ mi ɔ ngɛ nihewi kɛ yihewi a nɔ he wami náe. Enɛ ɔ ha nɛ a kɛ nyagbahi fuu ngɛ kpee. (1 Yoh. 5:19) Se ke wa na kaa nihewi kɛ yihewi nɛ ɔmɛ ngɛ sane heto hae ngɛ asafo mi kpe sisi, a kɛ a he ngɛ fiɛɛmi ní tsumi ɔ mi woe, nɛ a kɛ kã ngɛ a hemi kɛ yemi ɔ he fãe ɔ, e woɔ wɔ he wami wawɛɛ. Nihewi kɛ yihewi, nyɛ ngɛ ní tsumi ko nɛ he hia wawɛɛ tsue ngɛ Yehowa asafo ɔ mi!​—La 8:2.

¹² Se e he waa ha wa nyɛmimɛ komɛ kaa a maa kplɛɛ nɔ kaa mɛ hu a ngɛ ní tsumi nɛ e he hia ngɛ asafo ɔ mi. Mɛni ma nyɛ maa ye bua wa ti nɔ fɛɛ nɔ konɛ e nu he kaa lɛ hu e ngɛ ní tsumi ngɛ asafo ɔ mi? Nyɛ ha nɛ waa hyɛ.

13-14. Mɛni ma nyɛ ma ha nɛ nɔ ko nɛ nu he kaa e he hia we ngɛ asafo ɔ mi?

¹³ Nyɛ ha nɛ waa hyɛ nɔ́ enyɔne nɛ wa ma  nyɛ maa kase ngɛ Paulo nɔ́ he tomi nɔ́ ɔ mi. E tsɔɔ nyagba ko nɛ nihi fuu kɛ kpeɔ mwɔnɛ ɔ. Lɔ ɔ ji kaa e he waa ha nihi fuu kaa a maa kplɛɛ nɔ kaa a he jua wa ngɛ asafo ɔ mi. Paulo ngma ke: “Ke nanewɛɛ de ke, ‘Akɛnɛ pi nine ji mi he je ɔ, i piɛɛ we nɔmlɔ tso ɔ he’ ɔ, lɔ ɔ tsɔɔ we kaa e piɛɛ we nɔmlɔ tso ɔ he. Nɛ ke tue de ke, ‘Akɛnɛ pi hɛ ngmɛ ji mi he je ɔ, i piɛɛ we nɔmlɔ tso ɔ he’ ɔ, lɔ ɔ tsɔɔ we kaa e piɛɛ we nɔmlɔ tso ɔ he.” (1 Kor. 12:15, 16) Mɛni Paulo ngɛ tsɔɔe?

¹⁴ Ke o ngɔɔ o he kɛ toɔ ni kpahi a he ngɛ asafo ɔ mi ɔ, lɔ ɔ ma ha nɛ o bɔni he numi kaa o he hia we. Nihi nɛ a ngɛ asafo ɔ mi ɔ a ti ni komɛ le ní tsɔɔmi wawɛɛ, a ti ni komɛ hu le níhi a he blɔ nya tomi saminya, nɛ a ti ni komɛ hu le bɔ nɛ a woɔ nɔ he wami wawɛɛ ha. Enɛ ɔ he ɔ, eko ɔ, o maa nu he kaa moo lɛɛ o nyɛ we mɔde bɔmi kaa mɛ. Ke o nuɔ he jã a, lɔ ɔ tsɔɔ kaa o baa o he si nɛ o peeɔ o he humi. (Filip. 2:3) Se e sa nɛ o hyɛ nɛ hi. Ke kpamisaa nɛ ɔ o ngɔ o he kɛ ngɛ nihi nɛ a ngɛ nyɛmi pɔtɛɛ komɛ a he toe ɔ, o kɔni mi ma jɔ̃. Kaa bɔ nɛ Paulo tsɔɔ ɔ, e ma ha nɛ o nu he kaa o he hia we ngɛ asafo ɔ mi. Mɛni ma nyɛ maa ye bua mo konɛ o ko nu he jã?

15. Ngɛ 1 Korinto Bi 12:4-11 ɔ nya a, mɛni nɛ e sa nɛ waa le ngɛ nike ní ko nɛ eko ɔ, wa ngɛ ɔ he?

¹⁵ Mo susu sane nɛ ɔ he nɛ o hyɛ: Yehowa gu mumi klɔuklɔu ɔ nɔ kɛ ha Kristofohi nɛ a hi si ngɛ kaseli ɔmɛ a be ɔ mi ɔ dloomi nike níhi, se e slo nɔ fɛɛ nɔ kɛ e nike ní. (Kane 1 Korinto Bi 12:4-11.) Yehowa ha a ti nɔ fɛɛ nɔ nike ní slɔɔtohi kɛ nyɛmi slɔɔtohi, se mɛ tsuo a he jua wa. Mwɔnɛ ɔ, Yehowa gui nyakpɛ blɔ nɔ kɛ ha wɔ mumi klɔuklɔu ɔ kaa bɔ nɛ e ha Kristofohi nɛ a hi si ngɛ kaseli ɔmɛ a be ɔ mi ɔ. Se wa ma nyɛ maa kase nɔ́ ko kɛ je a sane ɔ mi. E ngɛ mi kaa wɔ tsuo wa be nyɛe ma tsu ní tsumi kake ngɛ asafo ɔ mi mohu lɛɛ, se wɔ tsuo wa he jua wa ha Yehowa.

16. Mɛni ga womi nɛ bɔfo Paulo kɛ ha nɛ e sa nɛ wa kɛ tsu ní?

¹⁶ E sa nɛ waa ngɔ Paulo ga womi nɛ nyɛɛ se nɛ ɔ kɛ tsu ní mohu pe nɛ wa maa ngɔ wa he kɛ to wa nyɛmimɛ a he. Mawu mumi ɔ ye bua  bɔfo Paulo nɛ e ngma ke: “Nyɛ ha nɛ nɔ fɛɛ nɔ nɛ e hyɛ lɛ nitsɛ e ní tsumihi a mi, kɛkɛ ɔ, lɛ nitsɛ pɛ e ma ná nɔ́ ko nɛ e maa da nɔ kɛ nya nɛ pi kaa e kɛ e he ngɛ nɔ kpa ko he toe.”​—Gal. 6:4.

17. Ke waa kɛ Paulo ga womi ɔ tsu ní ɔ, mɛni se wa ma ná?

¹⁷ Ke waa kɛ Paulo ga womi nɛ e je Mawu mumi ɔ mi kɛ ngma a tsu ní, nɛ wa kpa wɔ nitsɛmɛ wa mi ɔ, eko ɔ, lɔ ɔ maa ye bua wɔ nɛ wa yɔse nike ní kɛ nyɛmi klɛdɛɛhi nɛ wa ngɛ ɔ. Kaa nɔ hyɛmi nɔ́ ɔ, eko ɔ, asafo mi nɔkɔtɔma ko nyɛ we nɛ e tuɔ magbɛ nɔ munyu saminya tsɔ mohu lɛɛ, se eko ɔ, e he be ngɛ kaselɔ peemi ní tsumi ɔ mi wawɛɛ. Aloo eko ɔ, asafo mi nɔkɔtɔma ko nyɛ we nɛ e toɔ níhi a he blɔ nya saminya kaa bɔ nɛ asafo mi nikɔtɔma kpahi nɛ a ngɛ e we asafo ɔ mi ɔ peeɔ ɔ mohu lɛɛ, se eko ɔ, e peeɔ nyɛmimɛ ɔmɛ kpakpa nɛ e jeɔ suɔmi kpo kɛ tsɔɔ mɛ, nɛ lɔ ɔ haa nɛ a nyɛɔ hɛɔ kɛ suɔ e he kɛ ha Baiblo mi ga womi. Aloo eko ɔ, a le lɛ kaa nɔ ko nɛ e peeɔ nihi nibwɔ wawɛɛ. (Heb. 13:2, 16) Ke wa le wa nyɛmihi kɛ dloomi nike níhi nɛ wa ngɛ ɔ, lɔ ɔ ma ha nɛ wa bua nɛ jɔ nɔ́ nɛ wa nyɛɔ peeɔ kɛ yeɔ bua asafo ɔ he. Nɛ lɔ ɔ be hae nɛ wa hɛ nɛ kɔ̃ wa nyɛmimɛ a nɔ ngɛ nyɛmihi nɛ a ngɛ ɔ he je.

18. Mɛni maa ye bua wɔ konɛ waa pee tsɔɔli kpakpahi?

¹⁸ E ngɛ mi kaa wɔ tsuo wa ngɛ ní tsumi slɔɔtoslɔɔtohi ngɛ asafo ɔ mi mohu lɛɛ, se e sa kaa wɔ tsuo waa bɔ mɔde nɛ waa ya wa hɛ mi ngɛ níhi nɛ wa nyɛɔ peeɔ ngɛ Yehowa sɔmɔmi mi ɔ mi. Yehowa guɔ tsɔsemi slɔɔtohi nɛ e we asafo ɔ kɛ haa a nɔ kɛ yeɔ bua wɔ konɛ waa ya wa hɛ mi nɛ waa pee tsɔɔli kpakpahi. Kaa nɔ hyɛmi nɔ́ ɔ, ngɛ otsi kpɛti kpe ɔ mi ɔ, a haa wɔ blɔ tsɔɔmihi nɛ maa ye bua wɔ konɛ wa fiɛɛmi ní tsumi ɔ nɛ nu tso wawɛɛ. Anɛ o kɛ blɔ tsɔɔmi nɛ ɔmɛ ngɛ ní tsue lo?

19. Mɛni o ma nyɛ maa pee konɛ o nyɛ nɛ o ya Sukuu Kɛ Ha Matsɛ Yemi Sane Kpakpa Fiɛɛli ɔ eko?

¹⁹ Sukuu kpa ko hu nɛ asafo ɔ to he blɔ nya ji Sukuu Kɛ Ha Matsɛ Yemi Sane Kpakpa Fiɛɛli. A to sukuu nɛ ɔ he blɔ nya kɛ ha nyɛmimɛ nyumuhi kɛ yihi nɛ a ngɛ be tsuo sɔmɔmi ní tsumi ɔ mi nɛ a ye jeha 23 kɛ ya si 65. Eko ɔ, e maa pee mo kaa nɔ́ nɛ o be nyɛe maa ya sukuu nɛ ɔ eko. Se moo ngma yi mi tomihi a he je nɛ o suɔ nɛ o ya sukuu ɔ kɛ fɔ si mohu pe nɛ o maa ngma yi mi tomihi a he je nɛ o be nyɛe maa ya sukuu ɔ. Lɔ ɔ se ɔ, moo pee níhi nɛ maa ye bua mo konɛ o nyɛ nɛ o su oti nɛ ɔmɛ a he. Ke o pee o blɔ fa mi nɔ́ ɔ, Yehowa hu maa ye bua mo konɛ o pee nɔ́ nɛ o susu kaa o be nyɛe maa pee ɔ.

20. Mɛni wa ma nyɛ maa kase ngɛ Roma Bi 12:6-8 ɔ mi?

²⁰ Wa maa na nɔ́ etɛne nɛ wa ma nyɛ maa kase ngɛ Paulo nɔ́ he tomi nɔ́ ɔ mi ɔ ngɛ Roma Bi 12:6-8. (Kane.) Ngɛ ngmami nɛ ɔ mi hu ɔ, Paulo tsɔɔ kaa nihi nɛ a ngɛ asafo ɔ mi ɔ, a ti nɔ fɛɛ nɔ ngɛ nike ní slɔɔtohi. Se amlɔ nɛ ɔ lɛɛ nɔ́ nɛ e ngɛ nɔ mi mae ji kaa e sa nɛ wa ti nɔ fɛɛ nɔ nɛ ngɔ nike ní nɛ e ngɛ ɔ kɛ wo asafo ɔ he wami nɛ e kɛ fia asafo ɔ kɛ ma si.

21-22. Mɛni wa ma nyɛ maa kase ngɛ Robert kɛ Felice a níhi a si kpami ɔ mi?

²¹ Nyɛ ha nɛ wa susu nyɛminyumu ko nɛ a tsɛɛ lɛ ke Robert * ɔ nɔ hyɛmi nɔ́ ɔ he nɛ waa hyɛ. E sɔmɔ ngɛ ma se, nɛ pee se ɔ a ha nɛ e ya sɔmɔ ngɛ Betel ngɛ e ma mi. E ngɛ mi kaa a ha nɛ e ná nɔ mi mami kaa pi mɔde nɛ e bɔɛ he je nɛ a tsake e ní tsumi ɔ ha lɛ mohu lɛɛ, se e de ke: “Nyɔhiɔhi fuu ba be nɛ ye bua jɔɛ ejakaa i susu kaa i nyɛ we nɛ ma tsu ní tsumi nɛ a kɛ wo ye dɛ ngɛ ma se ɔ saminya.  E suu be nɛ i nuɔ he kaa ma kpa sɔmɔmi ngɛ Betel.” Mɛni ye bua lɛ nɛ e ná bua jɔmi ekohu? Asafo mi nɔkɔtɔma ko kai lɛ kaa Yehowa tsɔseɔ wɔ ngɛ ní tsumi nɛ wa tsu kɛ be ɔ mi konɛ wa nyɛ nɛ wa tsu ní tsumi nɛ e kɛ wo wa dɛ amlɔ nɛ ɔ saminya. Robert yɔse kaa e sa nɛ e kpa e se hyɛmi nɛ e ngɔ e juɛmi kɛ ma nɔ́ nɛ e ma nyɛ maa pee amlɔ nɛ ɔ mohu nɔ.

²² Nyɛminyumu Felice Episcopo hu ná níhi a si kpami ko kaa jã. Benɛ e kɛ e yo ɔ ya Gilead sukuu ngɛ jeha 1956 mi nɛ a gbe nya a, a ha nɛ e ya sɔmɔ kaa kpɔ mi nɔ hyɛlɔ ngɛ Bolivia. Ngɛ jeha 1964 ɔ mi ɔ, a fɔ. Felice de ke: “E he wa ha wɔ kaa wa maa je ní tsumi nɛ wa bua jɔ he wawɛɛ ɔ he. Ye kɔni mi jɔ̃ maa pee jeha kake sɔuu. Se ngɛ Yehowa yemi kɛ buami nya a, i nyɛ nɛ i da si fɔfɔɛ nɛ ɔ nya, nɛ i ngɔ ye juɛmi kɛ ma blɔ nya ní tsumi ehe nɛ i ná a nɔ.” Anɛ mo hu o kɛ si fɔfɔɛ ko nɛ ngɛ kaa Robert kɛ Felice a nɔ́ ɔ eko ngɛ kpee lo? Anɛ o kɔni mi jɔ̃ akɛnɛ sɔmɔmi he blɔ nɛ o ngɛ ɔ tsake he je lo? Ke jã a, lɛɛ mo je o juɛmi ngɛ nɔ́ nɛ be ɔ nɔ nɛ o ngɔ o juɛmi kɛ ma nɔ́ nɛ o ma nyɛ maa pee ha Yehowa amlɔ nɛ ɔ nɔ, nɛ lɔ ɔ ma ha nɛ o bua maa jɔ wawɛɛ. Moo ya nɔ nɛ o ngɔ dloomi nike níhi kɛ nyɛmihi nɛ o ngɛ ɔ kɛ ye bua ni kpahi konɛ o kɛ fia asafo ɔ kɛ ma si, nɛ lɔ ɔ ma ha nɛ o bua maa jɔ wawɛɛ.

23. Mɛni nɛ e sa nɛ wa he be kɛ pee, nɛ mɛni he nɛ wa ma susu ngɛ ní kasemi nɛ nyɛɛ se ɔ mi?

²³ Wa kpɛti nɔ fɛɛ nɔ he jua wa ha Yehowa. E suɔ nɛ waa nu he kaa wa piɛɛ e weku ɔ he. Ke wa he be kɛ susu níhi nɛ wa ma nyɛ maa pee kɛ fia wa nyɛmimɛ kɛ ma si ɔ he, nɛ wa bɔ mɔde wawɛɛ nɛ wa pee jã a, lɔ ɔ ma nyɛ maa ye bua wɔ konɛ wa ko nu he kaa wa he hia we ngɛ asafo ɔ mi! Se kɛ wa naa ni kpahi nɛ a ngɛ asafo ɔ mi ɔ ha kɛɛ? Mɛni wa maa pee kɛ tsɔɔ kaa wa suɔ mɛ nɛ wa ngɛ bumi kɛ ha mɛ? Wa ma susu sane bimi nɛ ɔmɛ a he ngɛ ní kasemi nɛ nyɛɛ se ɔ mi.