1-2. Mɛni he wa ma susu ngɛ ní kasemi nɛ ɔ mi?

KƐ O nuɔ he ha kɛɛ ke a mane mo nɔ́ ko nɛ he hia saminya, se e ba sui ngɛ be nya? Anɛ o kɔni mi jɔ̃ɔ lo? Abɛ 13:12 ɔ de ke: “Ke o ngɛ nɔ́ ko blɔ hyɛe, nɛ nɔ́ ɔ se kɛ ɔ, o yeɔ tsui.” Se ke o ba le kaa yi mi tomi kpakpa ko he je nɛ nɔ́ nɛ a mane mo ɔ bɛ lolo ɔ hu nɛɛ? Ngɛ si fɔfɔɛ kaa jã a mi ɔ, o maa to o tsui si, nɛ o maa suɔ nɛ o mlɛ.

² Ngɛ ní kasemi nɛ ɔ mi ɔ, wa ma susu Baiblo sisi tomi mlaa komɛ nɛ ma nyɛ maa ye bua wɔ konɛ waa to wa tsui si nɛ waa ya nɔ nɛ waa ‘hyɛ Yehowa blɔ’ ɔ he. (Mika 7:7) Lɔ ɔ se ɔ, wa ma susu si fɔfɔɛ enyɔ a mi nɛ e ma bi nɛ waa to wa tsui si kɛ hyɛ Yehowa blɔ nɛ e ye bua wɔ ɔ he. Nyagbe ɔ, wa maa na jɔɔmihi nɛ Yehowa ngɛ kɛ ha nihi nɛ a suɔ nɛ a to a tsui si kɛ hyɛ lɛ blɔ ɔ.

3. Mɛni wa kaseɔ ngɛ Abɛ 13:11 ɔ mi?

³ Abɛ 13:11 ɔ tsɔɔ yi mi tomi he je nɛ e sa nɛ waa to wa tsui si. Lejɛ ɔ de ke: “Ní nɛ a náa esɔesɔ ɔ, e taa mla. Nɔ nɛ buaa nɔ́ nya bɔɔbɔɔbɔɔ ɔ, e naa babauu.” Anɛ o na sisi tomi mlaa a lo? Nile ngɛ mi kaa wa maa to wa tsui si kɛ pee níhi bɔɔbɔɔbɔɔ.

4. Mɛni nɛ sisi tomi mlaa nɛ ngɛ Abɛ 4:18 ɔ tsɔɔ wɔ?

 ⁴ Abɛ 4:18 ɔ tsɔɔ kaa “blɔ nɛ dali nyɛɛɔ nɔ ɔ ngɛ kaa mɔtu pu la nɛ ngɛ kpɛe hluu kɛ yaa si piani.” Kuku nɛ ɔ tsɔɔ heii kaa Yehowa yeɔ bua e we bi nɛ a nuɔ e yi mi tomihi a sisi bɔɔbɔɔbɔɔ. Kuku nɛ ɔ hu yeɔ bua wɔ nɛ wa naa bɔ nɛ Kristofo no ko peeɔ tsakemi ngɛ e si himi mi nɛ e hɛɛ kɛ suɔ Yehowa he ha. Wa be nyɛe maa ya wa hɛ mi ngɛ mumi mi si kake. E heɔ be. Ke wa bɔɔ mɔde nɛ wa kaseɔ Baiblo ɔ, nɛ waa kɛ ga womihi nɛ ngɛ mi kɛ blɔ tsɔɔmihi nɛ Yehowa asafo ɔ kɛ haa wɔ ɔ tsuɔ ní ɔ, bɔɔbɔɔbɔɔ ɔ, wa ma ba ná Kristo su ɔmɛ, nɛ wa ma ba ná Mawu he nile wawɛɛ. Nyɛ ha nɛ wa susu bɔ nɛ Yesu ngɔ nɔ́ he tomi nɔ́ ko kɛ tsɔɔ enɛ ɔ mi ɔ he nɛ waa hyɛ.

5. Mɛni nɔ́ he tomi nɔ́ nɛ Yesu kɛ tsu ní kɛ tsɔɔ kaa e heɔ be loko nɔ ko peeɔ tsakemi ngɛ e si himi mi?

⁵ Yesu ngɔ nɔ́ he tomi nɔ́ ko kɛ tsɔɔ bɔ nɛ Matsɛ Yemi sɛ gbi ɔ nɛ wa fiɛɛɔ ɔ ngɛ kaa wu nyafii nɛ waa bɔɔbɔɔbɔɔ ngɛ tsui kpakpatsɛmɛ a tsui mi ha a mi. E de ke: “Wu ɔmɛ puɛɔ nɛ a waa—bɔ nɛ e plɛɔ nɛ e baa lɛ jã a lɛɛ [ní dulɔ ɔ] li. Zugba a nitsɛ wo yiblii bɔɔbɔɔbɔɔ, kekleekle ɔ, tso ɔ, lɔ ɔ se ɔ, e yi ɔ, nɛ nyagbe ɔ, ngma a nitsɛnitsɛ ngɛ tso ɔ yi mi.” (Maak. 4:27, 28) Mɛni Yesu ngɛ tsɔɔe? E ngɛ tsɔɔe kaa kaa bɔ nɛ tso waa bɔɔbɔɔbɔɔ ɔ, jã nɔuu kɛ̃ nɛ ke nɔ ko nu Matsɛ Yemi ɔ sɛ gbi ɔ, e waa bɔɔbɔɔbɔɔ ngɛ mumi mi. Kaa nɔ hyɛmi nɔ́ ɔ, ke wa Baiblo kaseli ngɛ hɛɛe kɛ ngɛ Yehowa he sue ɔ, wa naa kaa e kɛ we kɛkɛ a bɔni tsakemihi peemi ngɛ a si himi mi. (Efe. 4:22-24) Se e sa nɛ wa kai kaa Yehowa ji nɔ nɛ ha nɛ jamɛ a wu nyafii ɔ ngɛ wae ɔ nɛ.—1 Kor. 3:7.

6-7. Mɛni nɛ wa kaseɔ ngɛ blɔ nɔ nɛ Yehowa gu kɛ bɔ zugba a mi?

⁶ Ngɛ nɔ́ fɛɛ nɔ́ nɛ Yehowa peeɔ ɔ mi ɔ, e toɔ e tsui si nɛ e ngɔɔ be kɛ tsuɔ níhi a he ní kɛ ya siɔ be nɛ e maa gbe ní nɛ e ngɛ tsue ɔ nya. E peeɔ jã konɛ e kɛ wo e biɛ ɔ hɛ mi nyami, nɛ́ ni kpahi hu nɛ a ná he se. Kaa nɔ hyɛmi nɔ́ ɔ, moo hyɛ bɔ nɛ Yehowa to e tsui si kɛ dla zugba a kɛ ha adesahi ha.

⁷ Benɛ Baiblo ɔ ngɛ zugba a nɛ Yehowa bɔ ɔ  he munyu tue ɔ, e tsɔɔ bɔ nɛ a fɔ kpã kɛ susu e “kami kɛ e blimi” ɔ, nɔ́ nɛ nɔ́ nɛ a fia “e sisi tomi ɔmɛ” kɛ ma, kɛ nɔ nɛ to “e kɔ nya tɛ ɔmɛ” a he blɔ nya a. (Hiob 38:5, 6) Yehowa ngɔ be po kɛ hyɛ níhi nɛ e bɔ ɔ. (1 Mose 1:10, 12) Anɛ o ma nyɛ maa po he foni nɛ o hyɛ bɔ nɛ bɔfo ɔmɛ nu he ha benɛ a na nɔ́ ehe fɛɛ nɔ́ ehe nɛ Yehowa bɔ ɔ lo? Atsinyɛ jemi ko be he kaa a bua jɔ wawɛɛ nitsɛ! Enɛ ɔ he ɔ, a “hwɔ lele.” (Hiob 38:7) Mɛni wa kaseɔ ngɛ mi? E he Yehowa jeha akpehi abɔ loko e bɔ níhi ta, se benɛ e hyɛ nɔ́ fɛɛ nɔ́ nɛ e je nile mi kɛ bɔ ɔ, a “muɔ e hɛ saminya.”—1 Mose 1:31.

8. Mɛni he wa ma susu amlɔ nɛ ɔ?

⁸ Wa na ngɛ nɔ hyɛmi níhi nɛ sɛ hlami ɔ mi kaa sisi tomi mlaahi fuu ngɛ Mawu Munyu ɔ mi nɛ tsɔɔ kaa e sa nɛ waa to wa tsui si. Amlɔ nɛ ɔ, wa ma susu si fɔfɔɛ enyɔ a mi nɛ e sa nɛ waa to wa tsui si kɛ hyɛ Yehowa blɔ ɔ a he.

9. Mɛni si fɔfɔɛ kake mi nɛ e sa nɛ waa to wa tsui si kɛ mlɛ Yehowa?

⁹ Eko ɔ, e ma bi nɛ waa to wa tsui si kɛ ya si be nɛ Yehowa ma ha wa sɔlemihi a heto. Ke wa sɔle kaa Yehowa nɛ e ye bua wɔ nɛ wa nyɛ waa da ka ko nya aloo waa ye wa gbɔjɔmi ko nɔ ɔ, eko ɔ, wa maa nu he kaa Yehowa ha we wa sɔlemi ɔ heto ngɛ be nɛ wa ngɛ blɔ hyɛe ɔ mi. Mɛni he je nɛ Yehowa ha we wa sɔlemihi tsuo a heto amlɔ nɔuu ɔ?

10. Mɛni he je nɛ e sa nɛ waa to wa tsui si kɛ ya si be nɛ Yehowa ma ha wa sɔlemihi a heto ɔ?

¹⁰ Yehowa buɔ wa sɔlemihi tue saminya. (La 65:2) Ke wa je wa tsui mi kɛ sɔle ha lɛ ɔ, e naa kaa wa ngɛ e mi hemi kɛ yemi. (Heb. 11:6) Ke wa sɔle ha Yehowa kaa e ye bua wɔ nɛ waa pee e suɔmi nya ní ɔ, lɛ hu e suɔ nɛ e na kaa wa ngɛ mɔde bɔe kaa wa ma tsu wa sɔlemi ɔ nya ní. (1 Yoh. 3:22) Enɛ ɔ he ɔ, ke wa sɔle ha Yehowa kaa e ye bua wɔ nɛ waa ye su yaya ko loo wa gbɔjɔmi ko nɔ ɔ, e he maa hia nɛ waa to wa tsui si nɛ waa pee nɔ́ fɛɛ nɔ́ nɛ wa ma nyɛ kɛ pee tsakemi. Yesu ha nɛ wa na kaa tsa pi be fɛɛ be nɛ eko ɔ, Yehowa ma ha wa sɔlemihi a heto amlɔ nɔuu. E wo wɔ he wami ke: “Nyɛɛ ya nɔ nɛ nyɛɛ hi bie, nɛ a ma ha nyɛ; nyɛɛ ya nɔ nɛ nyɛɛ hi hlae, nɛ nyɛ maa na; nyɛɛ ya nɔ nɛ nyɛɛ hi sie, nɛ a ma bli ha nyɛ; ejakaa nɔ fɛɛ nɔ nɛ e biɔ ɔ, e nine suɔ nɔ, nɛ nɔ fɛɛ nɔ nɛ e hlaa a, e naa, nɛ nɔ fɛɛ nɔ nɛ e siɔ ɔ, a ma bli ha lɛ.” (Mat. 7:7, 8) Ke wa kɛ ga womi nɛ ɔ tsu ní, nɛ wa “hɛɛ sɔlemi mi” ɔ, wa ma nyɛ ma ná nɔ mi mami kaa wa hiɔwe Tsɛ ɔ buɔ wɔ tue, nɛ e ma ha wa sɔlemi ɔmɛ a heto.—Kol. 4:2.

11. Mɛni blɔ nɔ nɛ Hebri Bi 4:16 maa ye bua wɔ ke e pee kaa wa sɔlemi ko heto se ngɛ kɛe?

¹¹ Eko ɔ, e maa pee kaa nɔ́ nɛ wa sɔlemi ko heto se ngɛ kɛe, se Yehowa wo si kaa e ma ha wa sɔlemihi a heto “ngɛ be nɛ sa mi.” (Kane Hebri Bi 4:16.) Enɛ ɔ he ɔ, e sɛ nɛ wa pia Yehowa kɔkɔɔkɔ ke e ha we wa sɔlemihi a heto mla kaa bɔ nɛ wa ngɛ hlae ɔ. Kaa nɔ hyɛmi nɔ́ ɔ, nihi fuu sɔle jeha babauu kaa Mawu Matsɛ Yemi ɔ nɛ ngɔ níhi a blɔ nya tomi nɛ ɔ kɛ ba nyagbe. Yesu po de kaa waa sɔle ngɛ enɛ ɔ he. (Mat. 6:10) Se ke nɔ ko ha nɛ hemi kɛ yemi nɛ e ngɛ ngɛ Mawu mi ɔ gbɔjɔ akɛnɛ Mawu ngɔɛ níhi a blɔ nya tomi nɛ ɔ kɛ bɛ nyagbe ngɛ be nɛ adesahi ngɛ blɔ hyɛe ɔ mi ɔ, lɛɛ e je kuasia! (Hab. 2:3; Mat. 24:44) Enɛ ɔ he ɔ, nile ngɛ mi kaa wa maa to wa tsui si kɛ hyɛ Yehowa blɔ, nɛ waa sɔle ha lɛ nɛ wa ná hemi kɛ yemi kaa e ma ha wa sɔlemi ɔ heto. Nyagbe ɔ maa ba ngɛ be nɛ Yehowa to ɔ mi pɛpɛɛpɛ, ejakaa Yehowa sɛ hlami hla “ligbi ɔ kɛ ngmlɛfia a” kɛ to momo. Jamɛ a be ɔ maa pee be nɛ sa wawɛɛ kɛ ha nɔ fɛɛ nɔ.—Mat. 24:36; 2 Pet. 3:15.

12. Mɛni si fɔfɔɛ mi titli nɛ e he ma nyɛ maa wa ha wɔ kaa wa maa to wa tsui si?

 ¹² Eko ɔ, e he maa hia nɛ waa to wa tsui si kɛ hyɛ Yehowa blɔ ke a yi wɔ dami sane. Behi fuu ɔ, nihi kɛ nihi nɛ e slo a bɔ su, a he womi nɔ su, wɛtso loo ma nɛ a je mi ɔ hí si saminya. A kɛ nihi hu nɛ a be nɔmlɔ tso mi he wami kpakpa aloo a ngɛ juɛmi mi nyagba a hí si saminya. A yi Yehowa we bi fuu dami sane ngɛ a hemi kɛ yemi ɔ nɛ a kɛ da Baiblo ɔ nɔ ɔ he je. E sa nɛ wa ha nɛ Yesu munyu nɛ ɔ nɛ hi wa juɛmi mi ke a yi wɔ dami sane. E de ke: “Nɔ nɛ e ma fĩ si kɛ ya si nyagbe ɔ, a ma he e yi wami.” (Mat. 24:13) Mɛni nɛ e sa nɛ o pee ke o le kaa nɔ ko tɔ̃ tɔmi nɛ hɛdɔ ngɛ he ngɛ asafo ɔ mi? Ke a ha nɛ asafo mi nikɔtɔma amɛ le ɔ, anɛ o maa ngmɛɛ sane ɔ he kɛ ha mɛ, nɛ o maa to o tsui si kɛ mlɛ kaa a ma tsu he ní ngɛ Yehowa blɔ tsɔɔmi nya lo? Mɛni nɛ eko ɔ, e he maa hia nɛ asafo mi nikɔtɔmahi nɛ a pee ke nɔ ko tɔ̃ tɔmi nɛ hɛdɔ ngɛ he?

13. Mɛni nɛ Yehowa suɔ kaa asafo mi nikɔtɔmahi nɛ a pee ke nɔ ko tɔ̃ tɔmi nɛ hɛdɔ ngɛ he?

¹³ Ke asafo mi nikɔtɔma amɛ ba ná le kaa nɔ ko tɔ̃ tɔmi nɛ hɛdɔ ngɛ he ngɛ asafo ɔ mi ɔ, a sɔleɔ kɛ haa Yehowa nɛ e ha mɛ “juɛmi ɔ nɛ je hiɔwe ɔ” konɛ a le e juɛmi ngɛ sane ɔ he. (Yak. 3:17) Oti nɛ ngɛ a hɛ mi ji kaa a maa ye bua yayami peelɔ ɔ nɛ ke e maa hi ɔ, e ‘kpale kɛ je e blɔ yayami ɔ’ nɔ. (Yak. 5:19, 20) A suɔ nɛ a pee nɔ́ fɛɛ nɔ́ nɛ a ma nyɛ kɛ po asafo ɔ he piɛ, nɛ a wo nihi nɛ a tɔ̃ a nɔ ɔ a bua. (2 Kor. 1:3, 4) Ke nikɔtɔma amɛ ná le kaa nɔ ko tɔ̃ tɔmi ko nɛ hɛdɔ ngɛ he ɔ, kekleekle ɔ, e sa nɛ a na anɔkuale ɔ tsuo. Enɛ ɔ ma nyɛ ma he be. Jehanɛ hu ɔ, a sɔleɔ, nɛ a daa Ngmami ɔ nɔ kɛ yeɔ bua yayami peelɔ ɔ “bɔ nɛ sa.” (Yer. 30:11) Ngɛ si fɔfɔɛ kaa jã a mi ɔ, asafo mi nikɔtɔma amɛ tui tsle, nɛ a he sɔɛ kɛ kojo hulɔ. Ke asafo mi nikɔtɔmahi tsu sanehi a he ní saminya a, asafo ɔ tsuo ma ná he se. Ke nikɔtɔma amɛ gu blɔ nɛ da nɔ kɛ tsu sane ɔ he ní po ɔ, eko ɔ, ni nɛmɛ nɛ sane ɔ sa a he ngɛ blɔ yaya nɔ ɔ maa nu dɔdɔɛ he. Ke jã nɛ o sane ɔ ngɛ ɔ, mɛni o ma nyɛ maa pee konɛ o ko nu dɔdɔɛ he tsɔ?

14. Ke o nyɛmi Kristofo no ko pee mo nɔdɔ nɔ́ ko ɔ, mɛni Baiblo mi nɔ hyɛmi nɔ́ ma nyɛ maa ye bua mo kɛ da nya?

¹⁴ Anɛ nɔ ko pee mo nɔdɔ nɔ́ hyɛ, titli ɔ, nɔ ko nɛ o kɛ lɛ ngɛ asafo ɔ mi ɔ lo? Ke jã a, lɛɛ o ma nyɛ maa na nɔ hyɛmi ní kpakpahi nɛ ngɛ Mawu Munyu ɔ mi nɛ tsɔɔ wɔ bɔ nɛ wa maa to  wa tsui si kɛ hyɛ Yehowa blɔ nɛ e tsu sanehi a he ní ha. Kaa nɔ hyɛmi nɔ́ ɔ, Yosef nyɛmimɛ ɔmɛ tɔ̃ e nɔ, se e ngɔɛ dɔdɔɛ ɔ kɛ wui e mi, mohu ɔ, e ngɔ e juɛmi kɛ ma Yehowa sɔmɔmi nɔ, nɛ Yehowa jɔɔ lɛ wawɛɛ ngɛ e tsui si nɛ e to kɛ fĩ si ɔ he. (1 Mose 39:21) Benɛ be pue mi ɔ, Yosef je e juɛmi ngɛ tɔmi nɛ e nyɛmimɛ ɔmɛ tɔ̃ e nɔ ɔ nɔ, nɛ e ngɔ e juɛmi kɛ ma jɔɔmihi nɛ Yehowa jɔɔ lɛ ɔ nɔ. (1 Mose 45:5) Kaa bɔ nɛ Yosef pee ɔ, ke wa hɛ kɛ su Yehowa he, nɛ wa ngɔ wa hɛ kɛ fɔ e nɔ kaa e ye dami sane ha wɔ ngɛ be nɛ sa mi ɔ, wa tsui maa nɔ wa mi.—La 7:17; 73:28.

15. Benɛ a ye nyɛmiyo ko sane yaya a, mɛni lɛ ye bua lɛ nɛ e ngmɛɛ sane ɔ he?

¹⁵ Ngɛ anɔkuale mi ɔ, tsa pi sane yayahi tsuo nɛ a ye wɔ ɔ ji sanehi nɛ hɛdɔ ngɛ he kaa bɔ nɛ e ya nɔ ngɛ Yosef blɔ fa mi ɔ, se nɔdɔ nɔ́ fɛɛ nɔdɔ nɔ́ nɛ nɔ ko maa pee wɔ ɔ ma nyɛ ma ha nɛ waa hao. Ke waa kɛ nɔ ko ná nyagba ko, nɔ ɔ ngɛ Yehowa sɔmɔe jio, e sɔmɔ we Yehowa jio, Baiblo sisi tomi mlaahi nɛ waa kɛ ma tsu ní ɔ maa ye bua wɔ. (Filip. 2:3, 4) Mo susu níhi a si kpami ko he nɛ o hyɛ. Benɛ nyɛmiyo ko ná le kaa nɔ ko nɛ e kɛ lɛ tsuɔ ní ɔ tuɔ e he munyu yayahi nɛ a pi anɔkuale kɛ tsɔɔ ni kpahi ɔ, e dɔ lɛ wawɛɛ. Se e ngɔ be kɛ susu Yesu nɔ hyɛmi nɔ́ ɔ he mohu pe nɛ e kɛ oya yemi ma tsu sanehi a he ní. Benɛ a ngɛ Yesu jɛe ɔ, e jɛ we mɛ kɛ ma nane mi. (1 Pet. 2:21, 23) Enɛ ɔ he ɔ, nyɛmiyo ɔ ma e juɛmi nya si kaa e be sane ɔ he munyu tue. Pee se ɔ, e ba na kaa hiɔ ko nɛ nya wa ngɛ nɔ nɛ e ya tu e he munyu yaya a nya gbae, nɛ e ha nɛ e pee basaa. Nyɛmiyo ɔ ma nya si kaa munyu nɛ nɔ ɔ nɛ e kɛ tsuɔ ní ɔ tu ɔ, pi nɛ e je blɔ. Nyɛmiyo ɔ bua jɔ wawɛɛ kaa e kɛ tsui si tomi fĩ si ngɛ sane ɔ mi, nɛ enɛ ɔ ha nɛ e tue mi jɔ lɛ.

16. Mɛni ma nyɛ maa ye bua mo nɛ o fĩ si ke a yi mo dami sane? (1 Petro 3:12)

¹⁶ Ke nɔ ko yi mo dami sane ɔ, e ma nyɛ maa dɔ mo wawɛɛ, se mo kai kaa Yehowa hɛɛ kɛ suɔ “nihi nɛ a kɔni mi jɔ̃” ɔ a he. (La 34:18) Yehowa suɔ mo akɛnɛ o toɔ o tsui si nɛ o ngɔɔ o haomi ɔmɛ kɛ fɔɔ e nɔ ɔ he je. (La 55:22) Lɛ ji je ɔ tsuo Kojolɔ. Nɔ́ ko nɔ́ ko bi e hɛ mi. (Kane 1 Petro 3:12.) Ke o kɛ nyagbahi nɛ o be nyɛe ma tsu a he ní ngɛ kpee ɔ, mo kai kaa e he hia nɛ o to o tsui si kɛ hyɛ Yehowa blɔ kaa e ma tsu he ní ngɛ be nɛ sa mi.

17. Ngɛ Yesaya 30:18 ɔ mi ɔ, mɛni nɛ Yehowa wo si kaa e maa pee ha wɔ?

¹⁷ E be kɛe nɛ wa hiɔwe Tsɛ ɔ maa gu e Matsɛ Yemi ɔ nɔ kɛ jɔɔ wɔ babauu. Yesaya 30:18 ɔ de ke: ‘Yehowa ngɛ mlɛe kaa e maa na nyɛ mɔbɔ; ejakaa nɔ́ nɛ da pɛ e peeɔ daa. Nihi nɛ ngɔɔ a hɛ ngɔ fɔɔ Yehowa nɔ ɔ, a naa bua jɔmi.’ Nihi nɛ a ngɔɔ a hɛ ngɔ fɔɔ Yehowa nɔ ɔ ma ná jɔɔmihi fuu amlɔ nɛ ɔ, kɛ ngɛ je ehe nɛ maa ba a mi.

18. Mɛni jɔɔmihi nɛ wa ngɛ blɔ hyɛe?

¹⁸ Ke Mawu we bi sɛ je ehe ɔ mi ɔ, a kɛ nyagbahi nɛ a kɛ ngɛ kpee mwɔnɛ ɔ be kpee hu, nɛ a be yeyeeye pee hu. A ma je dami sane nɛ a yi ɔ kɛ ho, nɛ wa be nɔ́ nae hu. (Kpoj. 21:4) E he be hiae nɛ waa hao ngɛ wa hiami níhi a he hu, ejakaa wa ma ná ní babauu. (La 72:16; Yes. 54:13) Enɛ ɔ ji jɔɔmi nɛ se be!

19. Mɛni nɛ Yehowa ngɛ wɔ dlae bɔɔbɔɔbɔɔ kɛ ha?

¹⁹ Amlɔ nɛ ɔ, Yehowa ngɛ wɔ dlae nɛ wa nyɛ nɛ waa ye wa su yayami ɔmɛ a nɔ, nɛ wa ná su kpakpahi nɛ ma ha nɛ waa hi e nɔ yemi ɔ sisi. O kɔni mi nɛ ko jɔ̃, nɛ ko kpa Yehowa sɔmɔmi hulɔ. Si himi kpakpa ngɛ wa hɛ mi kɛ ma! Be mi nɛ wa ngɛ be kpakpa nɛ ɔ blɔ hyɛe ɔ, nyɛ ha nɛ waa je wa tsui mi nɛ waa to wa tsui si kɛ mlɛ Yehowa be mi nɛ e ngɛ níhi nɛ e wo si kaa e maa pee ɔ pee ɔ!