1. Mɛni he je nɛ Yesu de Yehowa kaa e bu e se nyɛɛli ɔmɛ a he ɔ?

 NYƆ mi nɛ e nɔ jena Yesu ma gbo ɔ, e ngɔ ní bimi ko nɛ he hia wawɛɛ kɛ fɔ e hiɔwe Tsɛ ɔ hɛ mi. E de Yehowa ngɛ sɔlemi mi kaa e bu e se nyɛɛli ɔmɛ a he. (Yoh. 17:15, 20) Ngɛ anɔkuale mi ɔ, Yehowa hyɛɛ e we bi a nɔ be fɛɛ be, nɛ e poɔ a he piɛ. Se Yesu le kaa Satan maa te si kɛ wo e se nyɛɛli ɔmɛ wawɛɛ. Jehanɛ hu ɔ, e le kaa e se nyɛɛli ɔmɛ maa hia Yehowa yemi kɛ buami konɛ a nyɛ nɛ a da Satan tuami ɔmɛ a nya.

2. Ngɛ La 33:18-20 ɔ nya a, mɛni he je nɛ e sɛ kaa waa ye gbeye ke waa kɛ nyagbahi ngɛ kpee?

² Satan je ɔ ha nɛ níhi a mi wa ha anɔkuale Kristofohi, nɛ a kɛ nyagbahi fuu ngɛ kpee mwɔnɛ ɔ. Haomihi nɛ waa kɛ kpeɔ ɔ ma nyɛ ma jɔ̃ wa kɔni mi, nɛ e ma nyɛ ma ha nɛ e he nɛ wa ha wɔ kaa wa maa ye Yehowa anɔkuale. Se ní kasemi nɛ ɔ ma ha nɛ waa na kaa e sɛ nɛ waa ye gbeye. Yehowa ngɛ wa nɔ hyɛe, e naa nyagbahi nɛ waa kɛ ngɛ kpee ɔ, nɛ e pee klaalo kaa e maa ye bua wɔ kɛ da nya. Nyɛ ha nɛ wa susu Baiblo mi nɔ hyɛmi níhi enyɔ nɛ tsɔɔ kaa ‘nihi nɛ yeɔ Yehowa gbeye ɔ, Yehowa buu a he’ ɔ he.​—Kane La 33:18-20.

3. Mɛni behi a mi nɛ wa ma nyɛ maa nu he kaa e piɛ wɔ pɛ?

³ E ngɛ mi kaa wa ngɛ nyɛmimɛ nyumuhi kɛ yihi fuu ngɛ wa we asafo ɔmɛ a mi, se be komɛ ɔ, wa ma nyɛ maa nu he kaa e piɛ wɔ pɛ. Kaa nɔ hyɛmi nɔ́ ɔ, nihewi kɛ yihewi ma nyɛ maa nu he kaa nɔ ko be nɛ maa ye bua mɛ ke e he ba hia nɛ a fã a hemi kɛ yemi ɔ he ngɛ a sukuu bimɛ a hɛ mi, aloo ke a hia kɛ ya asafo kpa mi. Wa ti ni komɛ ngɛ nɛ ke wa nu he kaa e piɛ wɔ pɛ ɔ, wa kɔni mi jɔ̃ɔ, nɛ wa susuɔ kaa e sa nɛ wa tsu nyagba a he ní ngɛ wa dɛ he. Eko ɔ, e he maa wa ha wɔ kaa waa  kɛ ni kpahi maa sɛɛ nyagba a he ní ejakaa wa susu kaa a be wɔ sisi nue. Be komɛ ɔ, wa ma nyɛ maa nu he kaa nihi susuu we wa he. Ke wa nuɔ he jã a, e ma nyɛ ma ha nɛ wa kɔni mi nɛ jɔ̃, nɛ́ waa pee yeyeeye. Yehowa sume nɛ waa nu he jã kulaa. Mɛni he je nɛ wa ma nyɛ ma de jã a?

4. Mɛni he je nɛ gbalɔ Eliya de ke: “Imi nɔ kake too pɛ nɛ i piɛ” ɔ?

⁴ Mo susu nyumu anɔkualetsɛ Eliya nɔ hyɛmi nɔ́ ɔ he nɛ o hyɛ. Benɛ Yezebel ka kita kaa e maa gbe lɛ ɔ, e tu fo nɛ e ya laa e he ligbi 40. (1 Ma. 19:1-9) Nyagbenyagbe ɔ, benɛ lɛ pɛ e ngɛ tɛ puɔ ko mi ɔ, e de Yehowa ke: ‘Imi nɔ kake too pɛ ji gbalɔ nɛ piɛ.’ (1 Ma. 19:10) Jamɛ a be ɔ mi ɔ, gbali kpahi ngɛ. Kaa nɔ hyɛmi nɔ́ ɔ, Obadia ngɔ gbali 100 kɛ laa konɛ Yezebel yiwutsotsɛ ɔ nine nɛ ko su a nɔ nɛ e gbe mɛ. (1 Ma. 18:7, 13) Lɛɛ mɛni he je mɔ nɛ Eliya nu he kaa e piɛ lɛ pɛ ɔ? Anɛ e susu kaa gbali ɔmɛ nɛ Obadia ngɔ mɛ kɛ laa a tsuo gbo lo? Yehowa ha nɛ a le ngɛ Karmel Yoku ɔ nɔ kaa lɛ ji anɔkuale Mawu ɔ. Se lɔ ɔ se po ɔ, nɔ ko ba piɛɛ we e he kɛ ja Mawu. Anɛ enɛ ɔ lɛ ha nɛ e nu he kaa e piɛ lɛ pɛ ɔ lo? Aloo eko ɔ, e nu he kaa nɔ ko nɔ ko li kaa e he nyɛli ngɛ hlae nɛ a gbe lɛ, aloo nɔ ko susuu we e he lo? Baiblo ɔ tui bɔ nɛ Eliya nu he ha a he munyu fuu. Se nɔ́ nɛ wa le ji kaa Yehowa le nɔ́ he je nɛ Eliya nu he kaa e piɛ lɛ pɛ ɔ, nɛ e le blɔ tutuutu nɛ e maa gu nɔ kɛ ye bua lɛ.

5. Mɛni blɔ nɔ Yehowa ha nɛ Eliya le kaa e píɛ lɛ pɛ?

⁵ Yehowa ye bua Eliya ngɛ blɔhi fuu a nɔ. E wo lɛ he wami kaa e tu munyu. Yehowa bi Eliya si enyɔ ke: “Mɛni o ngɛ pee ngɛ hiɛ ɔ?” (1 Ma. 19:9, 13) Eliya de Yehowa bɔ nɛ e ngɛ he nue ha, nɛ Yehowa bu lɛ tue. Yehowa ha nɛ Eliya na kaa lɛ Yehowa a, e ji nɔ ko nɛ e ngɛ nitsɛnitsɛ nɛ e ngɛ he wami wawɛɛ. Jehanɛ hu ɔ, Yehowa ha nɛ Eliya le kaa Israel bi kpahi fuu ngɛ nɛ a ngɛ lɛ sɔmɔe. (1 Ma. 19:11, 12, 18) Ngɛ anɔkuale mi ɔ, Eliya tsui nɔ e mi benɛ e na bɔ nɛ Yehowa ha e sɔlemi ɔ heto ha a. Yehowa ngɔ ní tsumihi nɛ a he hia wawɛɛ kɛ wo Eliya dɛ. Yehowa de lɛ kaa e pɔ Hazael nu kaa Siria matsɛ, e pɔ Yehu hu nu nɛ e ye matsɛ ngɛ Israel, nɛ e pɔ Elisha nu konɛ e sɔmɔ kaa  gbalɔ. (1 Ma. 19:15, 16) Ní tsumi nɛ ɔmɛ nɛ Yehowa kɛ wo Eliya dɛ ɔ ye bua lɛ nɛ e ngɔ e juɛmi kɛ ma ní kpakpahi nɛ maa ye bua lɛ ɔ nɔ. Jehanɛ hu ɔ, Mawu ha nɛ e ná huɛ kpakpa nɛ ji Elisha. Ke o nu he kaa e piɛ mo pɛ ɔ, mɛni o ma nyɛ maa pee konɛ o ná Yehowa yemi kɛ buami?

6. Mɛni ji ní komɛ nɛ o ma nyɛ maa sɔle ngɛ he ke o nu he kaa e piɛ mo pɛ? (La 62:8)

⁶ Yehowa suɔ kaa o sɔle kɛ ha lɛ. E le nyagbahi nɛ o kɛ ngɛ kpee, nɛ e suɔ nɛ o ná nɔ mi mami kaa e maa bu o sɔlemi tue be fɛɛ be. (1 Tɛs. 5:17) E suɔ nɛ e bu e sɔmɔli a sɔlemi tue. (Abɛ 15:8) Mɛni ji ní komɛ nɛ o ma nyɛ maa sɔle ngɛ he ke o nu he kaa e piɛ mo pɛ? Mo de Yehowa bɔ nɛ o ngɛ he nue ha, kaa bɔ nɛ Eliya pee ɔ. (Kane La 62:8.) Mo de lɛ o nyagba amɛ, kɛ bɔ nɛ nyagba amɛ haa nɛ o nuɔ he ha. Mo bi Yehowa nɛ e ye bua mo nɛ o le nɔ́ nɛ o maa pee ke o ngɛ he nue kaa e piɛ mo pɛ aloo ke o bua jɔɛ. Kaa nɔ hyɛmi nɔ́ ɔ, ke o ngɛ gbeye yee kaa o maa ye o sukuu bi odase ɔ, mo bi Yehowa nɛ e wo mo kã konɛ o nyɛ nɛ o tsɔɔ níhi a mi saminya. O ma nyɛ ma bi lɛ nɛ e ha mo nile konɛ o nyɛ nɛ o kɛ hɛ si kami nɛ tsɔɔ níhi a mi. (Luka 21:14, 15) Ke o kɔni mi jɔ̃ loo o hao ɔ, mo bi Yehowa nɛ e ye bua mo konɛ o nyɛ nɛ o kɛ Kristofo no ko nɛ e nane pi si nɛ sɛɛ he ní. O ma nyɛ ma bi Yehowa nɛ e ye bua nɔ nɛ o kɛ lɛ yaa sɛɛ ní ɔ nɛ e bu mo tue nɛ e nu bɔ nɛ o ngɛ he nue ha a sisi. Moo sɔle kɛ ha Yehowa, nɛ o hyɛ bɔ nɛ e ma ha o sɔlemi ɔ heto ha, nɛ o kplɛɛ yemi kɛ buami nɛ ni kpahi kɛ ma ha mo ɔ nɔ. Ke o pee jã a, o be he nue tsɔ kaa e piɛ mo pɛ.

7. Mɛni o kase ngɛ Mauricio nɔ hyɛmi nɔ́ ɔ mi?

⁷ Yehowa ngɔ ní tsumi ko nɛ e he hia kɛ wo wɔ tsuo wa dɛ. Mo ná nɔ mi mami kaa Yehowa naa nɔ́ fɛɛ nɔ́ nɛ o ngɛ tsue ngɛ asafo ɔ mi kɛ fiɛɛmi ní tsumi ɔ mi ɔ, nɛ e bua jɔ he. (La 110:3) Ke o kɛ o nyɛmi tsuo tsu ní tsumi nɛ ɔ, e maa ye bua mo nɛ o be he nue kaa e piɛ mo pɛ. Ngɛ mɛni blɔ nɔ? Mo susu nyɛminyumu wayoo ko nɛ a tsɛɛ lɛ ke Mauricio ɔ nɔ hyɛmi nɔ́ ɔ he nɛ o hyɛ. * Benɛ a baptisi lɛ kɛ we ɔ, bɔɔbɔɔbɔɔ ɔ, e huɛmɛ nɛ nyu bi ngɛ e kɛ mɛ a kpɛti ɔ a ti nɔ kake je anɔkuale ɔ mi. Mauricio de ke: “Benɛ ye huɛ ɔ kpa Yehowa sɔmɔmi ɔ, e ha nɛ kã nɛ i kɛ ngɛ Yehowa sɔmɔe ɔ nɔ gbɔ. Enɛ ɔ ha nɛ i bi ye he ke ji ma nyɛ ma ye si nɛ i wo Yehowa a nɔ, nɛ ma ya nɔ ma piɛɛ e weku ɔ he. I nu he kaa e piɛ mi pɛ, nɛ i susu kaa bɔ nɛ i ngɛ he nue ha a, nɔ ko be mi sisi nue.” Mɛni nɛ ye bua Mauricio? E de ke: “I ngɔ be fuu kɛ tsu fiɛɛmi ní tsumi ɔ. Lɔ ɔ ye bua mi nɛ i je ye juɛmi ngɛ bɔ nɛ i ngɛ he nue ha a nɔ. Ke i kɛ nihi ngɛ fiɛɛe ɔ, ye bua jɔɔ nɛ i nui he kaa e piɛ mi pɛ.” Ke wa nyɛ we nɛ waa kɛ wa nyɛmimɛ nɛ nyɛɛ ngɛ fiɛɛmi tso mi, se waa kɛ mɛ bla kɛ pee ní komɛ kaa sɛ womi ngmami  kɛ tɛlifoo nɔ odase yemi ɔ, e woɔ wɔ he wami wawɛɛ. Mɛni ji nɔ́ kpa ko nɛ ye bua Mauricio? E de hu ke: “I tsu babauu ngɛ asafo ɔ mi. Ke a ha mi ní peemi ko ɔ, i bɔɔ mɔde kaa ma dla ye he konɛ ma tsu he ní saminya. Ní peemi nɛ ɔmɛ ha nɛ i nu he kaa ye he jua wa ha Yehowa nɛ ye he hia ye nyɛmimɛ ɔmɛ.”

8. Ke waa kɛ kahi nɛ nya wa kpe ɔ, kɛ e ma ha nɛ waa nu he ha kɛɛ?

⁸ Wa ngɛ blɔ hyɛe kaa waa kɛ kahi maa kpe ngɛ nyagbe ligbi nɛ ɔmɛ a mi. (2 Tim. 3:1) Se eko ɔ, ka pɔtɛɛ nɛ waa kɛ maa kpe, kɛ be nɛ waa kɛ jamɛ a ka a maa kpe ɔ ma nyɛ ma ha nɛ wa he mi nɛ po. Eko ɔ, waa kɛ sika he nyagba maa kpe tlukaa, hiɔ ko nɛ nya wa ma nyɛ maa fia wɔ, aloo wa suɔlɔ ko ma nyɛ ma gbo. Ngɛ si fɔfɔɛhi kaa jã mi ɔ, wa ma nyɛ maa hao wawɛɛ, titli ke nyagba amɛ ba kɛ tsa nɔ aloo a ba ngɛ be kake mi. Se mo kai kaa Yehowa le nyagbahi nɛ waa kɛ ngɛ kpee, nɛ e maa ye bua wɔ konɛ waa kɛ kã nɛ fĩ si ngɛ wa ka amɛ a mi.

9. Moo tsɔɔ nyagbahi nɛ Hiob kɛ kpe ɔ ekomɛ.

⁹ Mo susu bɔ nɛ Yehowa ye bua anɔkualetsɛ Hiob ha a he nɛ o hyɛ. Ngɛ be kpiti mi ɔ, e kɛ ka slɔɔtohi nɛ a nya wa kpe. Ngɛ ligbi kake mi ɔ, a ba bɔ Hiob amaniɛ kaa a ju e lohwe ɔmɛ, nɛ a gbe e sɔmɔli ɔmɛ kɛ e bimɛ. (Hiob 1:13-19) Be bɔɔ se benɛ Hiob ngɛ aywilɛho yee ɔ, hiɔ ko nɛ nya wa ba fia lɛ. (Hiob 2:7) E nyagba a ha nɛ e hao wawɛɛ nitsɛ nɛ e de ke: ‘Je mi si himi pee we mi akɔnɔ hu; i sume nɛ ma hi wami mi hu.’​—Hiob 7:16.

10. Mɛni Yehowa pee kɛ ye bua Hiob nɛ e nyɛ nɛ e fĩ si ngɛ e ka amɛ a mi? (Hyɛ foni nɛ ngɛ womi ɔ hɛ mi ɔ.)

¹⁰ Yehowa hyɛ Hiob nɔ. Akɛnɛ Yehowa suɔ Hiob he je ɔ, e ye bua lɛ konɛ e nyɛ nɛ e fĩ si ngɛ e ka a mi, nɛ́ e ya nɔ nɛ e ye anɔkuale. Yehowa kɛ Hiob sɛɛ ní, nɛ e kai Hiob kaa lɛ Yehowa a, e nile ɔ mi kuɔ, nɛ e suɔ e nibɔ níhi wawɛɛ. Yehowa kɛ lɛ sɛɛ lohwe slɔɔtoslɔɔtohi nɛ a he ngɛ nyakpɛ ɔ he ní. (Hiob 38:1, 2; 39:9, 13, 19, 27; 40:15; 41:1, 2) Jehanɛ hu ɔ, Yehowa gu nyumu anɔkualetsɛ Elihu nɔ kɛ wo Hiob he wami, nɛ e wo e bua. Elihu ha nɛ Hiob ná nɔ mi mami kaa Yehowa jɔɔ e sɔmɔli nɛ a fĩɔ si ngɛ kahi a mi ɔ wawɛɛ. Se Yehowa gu Elihu nɔ kɛ wo Hiob ga ngɛ suɔmi mi hulɔ. Elihu kai Hiob kaa ke a ngɔ adesahi kɛ to je ɔ tsuo Bɔlɔ nɛ ji Yehowa he ɔ, pi nɔ́ ko kulaa ji wɔ. Enɛ ɔ ye bua Hiob nɛ e ngɔ e juɛmi kɛ ma Yehowa nɔ mohu pe lɛ nitsɛ e nɔ. (Hiob 37:14) Yehowa ngɔ ní tsumi kɛ wo Hiob dɛ kaa e sɔle kɛ ha e huɛmɛ etɛ ɔmɛ nɛ a pee yayami ɔ. (Hiob 42:8-10) Mwɔnɛ ɔ, ke waa kɛ kahi nɛ a mi wa ngɛ kpee ɔ, mɛni Yehowa peeɔ kɛ yeɔ bua wɔ?

11. Ngɛ mɛni blɔ nɔ nɛ Baiblo ɔ yeɔ bua wɔ ke waa kɛ kahi ngɛ kpee?

¹¹ Yehowa kɛ wɔ tu we munyu tɛɛ kaa bɔ nɛ e kɛ Hiob tu munyu ɔ, se e kɛ wɔ sɛɛɔ ní kɛ guɔ e Munyu nɛ ji Baiblo ɔ nɔ. (Rom. 15:4) E ha wɔ hwɔɔ se he hɛ nɔ kami kpakpa, nɛ lɔ ɔ woɔ wa bua. Nyɛ ha nɛ wa susu ní komɛ nɛ Baiblo ɔ de nɛ ma nyɛ maa wo wa bua ke waa kɛ kahi ngɛ kpee ɔ he. Ngɛ Ngmami ɔ mi ɔ, Yehowa ma nɔ mi kɛ ha wɔ kaa nɔ́ ko nɔ́ ko “be nyɛe ma je wɔ kɛ je [e] suɔmi ɔ” he. Kahi nɛ a mi wa wawɛɛ po be nyɛe ma je wɔ kɛ je Yehowa suɔmi ɔ he. (Rom. 8:38, 39) Jehanɛ hu, Yehowa ha nɛ wa ná nɔ mi mami kaa kɛ gu sɔlemi nɔ ɔ, ‘nɔ tsuaa nɔ nɛ tsɛɔ lɛ ɔ, e hɛɛ lɛ kɛ suu e he.’ (La 145:18) Yehowa ha nɛ wa le kaa ke wa ngɔ wa hɛ kɛ fɔ e nɔ ɔ, wa ma nyɛ ma fĩ si ngɛ ka fɛɛ ka nɛ waa kɛ maa kpe ɔ mi, nɛ ke wa ngɛ nɔ́ nae po wa ma ná bua jɔmi. (1 Kor. 10:13; Yak. 1:2, 12) Mawu Munyu ɔ hu kaiɔ wɔ kaa kahi nɛ waa kɛ ngɛ kpee ɔ se be kɛe, se jɔɔmihi nɛ wa ma ná a maa hi si kɛ ya neneene. (2 Kor. 4:16-18)  Yehowa ha nɛ wa ná hɛ kɛ nɔ fɔmi nɛ mi wa kaa e ma je nɔ́ nɛ ngɔ wa nyagba amɛ ba a kɛ je pɛsɛpɛsɛ. Lɔ ɔ ji Satan Abosiami kɛ nihi tsuo nɛ a peeɔ yi wu tso ní kaa lɛ ɔ. (La 37:10) Anɛ o ngɔ Baiblo mi munyu komɛ nɛ woɔ nɔ bua kɛ wo o yi mi konɛ e ye bua mo o nyɛ nɛ o da kahi nɛ o kɛ maa kpe hwɔɔ se ɔ nya lo?

12. Mɛni Yehowa suɔ kaa waa pee konɛ wa ná e Munyu ɔ he se kɛ pi si?

¹² Yehowa suɔ nɛ waa to be nɛ wa kɛ kase Baiblo ɔ be fɛɛ be, nɛ́ wa pue wa yi mi tɛ ngɛ nɔ́ nɛ wa kase ɔ he saminya. Ke waa kɛ níhi nɛ wa kase ɔ tsu ní ɔ, wa hemi kɛ yemi mi maa wa wawɛɛ, nɛ wa maa hɛ kɛ su wa hiɔwe Tsɛ ɔ he. Jã peemi maa ye bua wɔ nɛ wa fĩ si ngɛ kahi a mi. Jehanɛ hu ɔ, Yehowa kɛ e mumi klɔuklɔu ɔ haa nihi nɛ a ngɔɔ a hɛ kɛ fɔɔ e Munyu ɔ nɔ ɔ. Mumi klɔuklɔu ɔ ma nyɛ ma ha wɔ “he wami nɛ pe adesahi a nɔ́” konɛ wa nyɛ nɛ wa fĩ si ngɛ kahi a mi.​—2 Kor. 4:7-10.

13. Ngɛ mɛni blɔ nɔ nɛ mumi mi niye ní nɛ “tsɔlɔ anɔkualetsɛ kɛ ní lelɔ ɔ” haa wɔ ɔ yeɔ bua wɔ nɛ wa daa kahi a nya?

¹³ Ngɛ Yehowa yemi kɛ buami nya a, “tsɔlɔ anɔkualetsɛ kɛ ní lelɔ ɔ” ha wɔ mumi mi níhi fuu. Ekomɛ ji, munyuhi nɛ ngɛ wa womi ɔmɛ a mi, videohi kɛ lahi nɛ ma nyɛ maa fia wa hemi kɛ yemi kɛ ma si nɛ ma ha nɛ waa ya nɔ nɛ waa mɛtɛ Yehowa he. (Mat. 24:45) E sa nɛ waa kɛ níhi tsuo nɛ Yehowa kɛ ha wɔ ɔ nɛ tsu ní saminya. Lingmi nɛ ɔ, nyɛmiyo ko nɛ e ngɛ United States ɔ tsɔɔ bɔ nɛ e hɛ sa mumi mi níhi tsuo nɛ e nine suɔ nɔ ɔ ha. E de ke: “Ngɛ jeha 40 nɛ i kɛ sɔmɔ Yehowa a mi ɔ, i kɛ si fɔfɔɛ slɔɔtohi kpe nɛ e ka ye anɔkuale yemi.” Nyɛmiyo ɔ kɛ kahi nɛ a nya wa kpe. Be ko ɔ, dlɛɛva ko nɛ e de dã kɛ lɔle fia e nɛnɛ nɛ e gbo, e fɔli ba nu hiɔ wawɛɛ nɛ a gbo, nɛ lɛ nitsɛ hu e ná kansa si enyɔ. Mɛni ye bua lɛ nɛ e fĩ si? E de ke: “Yehowa hyɛɔ ye nɔ be fɛɛ be. Mumi mi niye ní nɛ Yehowa guɔ tsɔlɔ anɔkualetsɛ kɛ ní lelɔ ɔ nɔ kɛ haa wɔ ɔ ye bua mi nɛ i fĩ si. Enɛ ɔ he ɔ, ma nyɛ ma de kaa bɔ nɛ Hiob de ɔ. E de ke: ‘Kɛ yaa si ye gbenɔ ligbi ɔ, i be ye anɔkuale yemi ɔ he ngmɛɛe.’”​—Hiob 27:5.

14. Mɛni blɔ nɔ nɛ Yehowa guɔ wa nyɛmimɛ ɔmɛ a nɔ kɛ yeɔ bua wɔ ke waa kɛ kahi ngɛ kpee? (1 Tɛsalonika Bi 4:9)

¹⁴ Yehowa tsɔse e we bi konɛ a je suɔmi kpo kɛ tsɔɔ a sibi, nɛ́ a wo a sibi bua ngɛ behi nɛ a mi wa mi. (2 Kor. 1:3, 4; kane 1 Tɛsalonika Bi 4:9.) Wa nyɛmimɛ nyumuhi kɛ yihi kase Elihu nɔ hyɛmi nɔ́ ɔ, nɛ a pee klaalo kaa a maa ye bua wɔ konɛ waa ya nɔ nɛ waa ye anɔkuale ke waa kɛ nyagbahi ngɛ kpee. (Níts. 14:22)  Kaa nɔ hyɛmi nɔ́ ɔ, mo susu nyɛmiyo ko nɛ a tsɛɛ lɛ ke Diane he nɛ o hyɛ. Benɛ e huno ɔ nu hiɔ ko nɛ nya wa a, nyɛmimɛ nɛ e kɛ mɛ ngɛ asafo ɔ mi ɔ wo lɛ he wami nɛ a ye bua lɛ nɛ e ya nɔ nɛ e mɛtɛ Yehowa he. E de ke: “E be gbɔjɔɔ. Níhi a mi wa ha wɔ ngɛ jamɛ a nyɔhiɔ ɔmɛ a mi, se wa na bɔ nɛ Yehowa je suɔmi mi kɛ ye bua wɔ ha. Nyɛmimɛ nɛ waa kɛ mɛ ngɛ asafo ɔ mi ɔ pee níhi fuu kɛ ye bua wɔ. A ba slaa wɔ, a tsɛ wɔ ngɛ fon nɔ, nɛ a fua wɔ. Ní nɛ ɔmɛ ye bua wɔ nɛ wa fĩ si. Akɛnɛ i li lɔle hɛɛmi he je ɔ, nyɛmimɛ ɔmɛ to blɔ nya konɛ ma ya asafo mi kpehi kɛ fiɛɛmi be fɛɛ be nɛ ye si fɔfɔɛ ɔ maa ngmɛ mi blɔ.” Wa bua jɔ kaa wa ngɛ nyɛmimɛ nyumuhi kɛ yihi ngɛ asafo ɔ mi nɛ a suɔ wɔ!

15. Mɛni he je nɛ wa ngɛ nɔ mi mami kaa wa ma nyɛ maa da kahi a nya?

¹⁵ Wɔ tsuo waa kɛ kahi maa kpe ngɛ wa si himi mi. Se kaa bɔ nɛ wa ba kase ɔ, Yehowa be wɔ sie ke waa kɛ kahi ngɛ kpee. Yehowa hyɛɔ wa nɔ be fɛɛ be kaa bɔ nɛ tsɛ nɛ ngɛ suɔmi peeɔ ɔ. E ngɛ wa kasa nya, e pee klaalo kaa e maa bu wa sɔlemi tue, nɛ e maa ye bua wɔ. (Yes. 43:2) Wa ngɛ nɔ mi mami kaa wa ma nyɛ maa da kahi nɛ waa kɛ kpeɔ ɔ nya, ejakaa Yehowa je suɔmi mi nɛ e ha wɔ nɔ́ fɛɛ nɔ́ nɛ wa hia konɛ wa nyɛ nɛ wa fĩ si. Sɔlemi, Baiblo ɔ, mumi mi niye ní babauu nɛ wa nine suɔ nɔ, kɛ suɔmi mi nɛ wa nyɛmimɛ jeɔ kɛ yeɔ bua wɔ ngɛ behi nɛ a mi wa mi ɔ tsuo ji nike ní nɛ je Yehowa ngɔ.

16. Mɛni wa ma nyɛ maa pee konɛ Yehowa nɛ ya nɔ nɛ e hyɛ wa nɔ?

¹⁶ Wa bua jɔ wawɛɛ kaa wa ngɛ hiɔwe Tsɛ nɛ buɔ wa he! “Wa tsui nyaa ngɛ e mi.” (La 33:21, NW) Ke waa kɛ níhi nɛ Yehowa ha wɔ ɔ tsu ní ɔ, e tsɔɔ kaa wa hɛ sa bɔ nɛ e ngɛ wa nɔ hyɛe ha a. Ke wa pee wa blɔ fa mi nɔ́ ɔ, Mawu maa ya nɔ maa hyɛ wa nɔ. Jehanɛ hu ɔ, ke wa ya nɔ nɛ wa pee nɔ́ fɛɛ nɔ́ nɛ wa ma nyɛ nɛ wa bu lɛ tue, nɛ wa pee níhi nɛ da ngɛ e hɛ mi ɔ, e maa hyɛ wa nɔ kɛ ya neneene!​—1 Pet. 3:12.