NÍ KASEMI 34
Moo Kase Ní Kɛ Je Baiblo Gbamihi A Mi
“Ní leli ɔmɛ . . . maa nu sisi.”—DAN. 12:10.
LA 98 Ngmami ɔ Je Mawu Mumi Mi
NƆ́ NƐ WA MAA KASE a
1. Mɛni maa ye bua wɔ konɛ wa bua nɛ jɔ Baiblo gbamihi a kasemi he?
NYƐMINYUMU BEN nɛ wa tu e he munyu ngɛ ní kasemi nɛ sɛ hlami ɔ mi ɔ de ke, “Ye bua jɔ Baiblo gbamihi a kasemi he wawɛɛ.” Jã nɛ mo hu o nuɔ he lo? Aloo o susu kaa Baiblo gbamihi a sisi numi yee? Eko ɔ, o maa nu he kaa ke o kase Baiblo gbamihi ɔ, o be sisi nue. Se ke o ba le nɔ́ he je nɛ Yehowa ha nɛ a ngma gbamihi kɛ wo e Munyu ɔ mi ɔ, e maa ye bua mo konɛ o bua nɛ jɔ Baiblo gbamihi a he.
2. Mɛni he wa ma susu ngɛ ní kasemi nɛ ɔ mi?
2 Ngɛ ní kasemi nɛ ɔ mi ɔ, wa maa na nɔ́ he je nɛ e sa nɛ waa kase Baiblo gbamihi, kɛ bɔ nɛ wa ma plɛ kɛ kase ha. Jehanɛ hu ɔ, wa ma susu gbami enyɔ komɛ nɛ ngɛ Daniel womi ɔ mi ɔ he, kɛ bɔ nɛ wa ma ná he se ha mwɔnɛ ɔ ke wa nu sisi.
MƐNI HE JE NƐ E SA NƐ WAA KASE BAIBLO GBAMIHI?
3. Mɛni e sa nɛ waa pee ke wa suɔ nɛ waa nu Baiblo gbami ko sisi?
3 Loko wa ma nyɛ maa nu Baiblo gbamihi a sisi ɔ, ja wa bi yemi kɛ buami. Mo susu nɔ́ he tomi nɔ́ nɛ ɔ he nɛ o hyɛ. Ngɔɔ lɛ kaa o yaa he ko nɛ o li lejɛ ɔ, se o huɛ ko nɛ e kɛ mo ngɛ blɔ ɔ hiae ɔ le he nɛ nyɛ yaa a saminya. E le he tutuutu nɛ nyɛ su, nɛ e le he nɛ blɔ ɔmɛ eko fɛɛ eko kɛ nyɛ maa ya. E ngɛ heii kaa o bua maa jɔ wawɛɛ kaa o huɛ ɔ kplɛɛ nɔ nɛ e kɛ mo hia blɔ nɛ ɔ! Ngɛ anɔkuale mi ɔ, Yehowa ngɛ kaa jamɛ a huɛ ɔ. Yehowa le he nɛ wa su ngɛ je nɛ ɔ mi, kɛ nɔ́ nɛ maa ba hwɔɔ se ɔ saminya. Enɛ ɔ he ɔ, loko wa ma nyɛ maa nu Baiblo gbami ko sisi ɔ, e sa nɛ waa je he si bami mi nɛ wa bi Yehowa nɛ e ye bua wɔ.—Dan. 2:28; 2 Pet. 1:19, 20.
Baiblo gbamihi nɛ wa maa kase ɔ maa ye bua wɔ konɛ wa dla wa he kɛ ha níhi nɛ maa ya nɔ hwɔɔ se ɔ (Hyɛ kuku 4)
4. Mɛni he je nɛ Yehowa ha nɛ a ngma gbamihi ngɛ e Munyu ɔ mi ɔ? (Yeremia 29:11) (Hyɛ foni ɔ hulɔ.)
4 Fɔlɔ fɛɛ fɔlɔ nɛ e suɔ e bimɛ ɔ suɔ nɛ e hi ha mɛ hwɔɔ se. Jã kɛ̃ nɛ Yehowa hu suɔ nɛ e bimɛ nɛ a ná si himi kpakpa hwɔɔ se. (Kane Yeremia 29:11.) Se Yehowa be kaa adesahi, ejakaa e ma nyɛ maa tsɔɔ wɔ nɔ́ nɛ maa ba hwɔɔ se, nɛ e maa ba mi jã pɛpɛɛpɛ. E ha nɛ a ngma gbamihi kɛ wo e Munyu ɔ mi bɔ nɛ pee nɛ waa le ní komɛ nɛ a he hia nɛ maa ba hwɔɔ se loko a ba. (Yes. 46:10) Baiblo gbamihi ji nike ní nɛ je wa hiɔwe Tsɛ nɛ suɔ wɔ ɔ ngɔ. Se mɛni maa ye bua mo konɛ o ná nɔ mi mami kaa Baiblo gbamihi maa ba mi niinɛ?
5. Mɛni nɛ nihewi kɛ yihewi ma nyɛ maa kase ngɛ Max níhi a si kpami ɔ mi?
5 Nihi nɛ a be bumi kɛ ha Baiblo ɔ ji nihi nɛ a bɔle nihewi kɛ yihewi nɛ a ji Odasefohi nɛ a ngɛ sukuu yae ɔ. A munyu tumi kɛ a ní peepee ma nyɛ ma ha nɛ niheyo loo yiheyo ko nɛ e ji Odasefo no ɔ yi mi nɛ pee lɛ enyɔɔnyɔ ngɛ e hemi kɛ yemi ɔ he. Mo susu nyɛminyumu ko nɛ a tsɛɛ lɛ ke Max ɔ níhi a si kpami ɔ he nɛ o hyɛ. E de ke, “Benɛ i ji niheyo ɔ, ye yi mi bɔni mi enyɔɔnyɔ peemi, nɛ i bi ye he ke ji níhi nɛ ye fɔli ɔmɛ ngɛ mi tsɔɔe ɔ ji anɔkuale. Jehanɛ hu i he we yi kaa Baiblo ɔ ji Mawu Munyu.” Mɛni nɛ Max fɔli ɔmɛ pee ngɛ e si fɔfɔɛ ɔ he? Max de ke, “I le kaa a hao wawɛɛ mohu lɛɛ, se a to a tsui si kɛ ha mi.” Max fɔli ɔmɛ da Baiblo ɔ nɔ kɛ ha sanehi tsuo nɛ Max bi mɛ ɔ heto. Se Max nitsɛ hu pee nɔ́ ko. E de ke, “I kase Baiblo gbamihi ngɛ ye dɛ he, nɛ i kɛ nihewi kɛ yihewi kpahi susu nɔ́ nɛ i kase ɔ he.” Mɛni lɛ je mi kɛ ba? Max de ke, “Benɛ i pee jã a, i ná nɔ mi mami nɛ mi wa kaa Baiblo ɔ ji Mawu Munyu!”
6. Mɛni e sa nɛ o pee ke o yi mi ngɛ mo pee enyɔɔnyɔ, nɛ mɛni he je?
6 Kaa bɔ nɛ e ji ngɛ Max blɔ fa mi ɔ, ke mo hu o juɛmi bɔni mo enyɔɔnyɔ peemi ngɛ Baiblo mi anɔkuale ɔmɛ a he ɔ, e sɛ nɛ o ha nɛ o he nile nɛ bu mo fɔ. E he hia nɛ o pee he nɔ́ ko oya nɔuu. Susumi kaa jã a ngɛ kaa kana. Ke nɔ́ ko nɔ kana nɛ a pee we he nɔ́ ko ɔ, bɔɔbɔɔbɔɔ ɔ, kana a ma puɛ nɔ́ ɔ kulaa. Lɔ ɔ he ɔ, ke o yi mi ngɛ mo pee enyɔɔnyɔ ngɛ o hemi kɛ yemi ɔ he ɔ, moo je sisi nɛ o pee he nɔ́ ko. E sa nɛ o bi o he ke, ‘Anɛ i he ye kaa nɔ́ nɛ Baiblo ɔ de kɛ kɔ hwɔɔ se he ɔ maa ba mi niinɛ lo?’ Ke o be nɔ mi mami ɔ, lɛɛ e sa nɛ o kase Baiblo gbamihi nɛ a ba mi momo ɔ a he ní. Kɛ o ma plɛ kɛ pee jã ha kɛɛ?
BƆ NƐ O MA PLƐ KƐ KASE BAIBLO GBAMI HA
Bɔ nɛ pee nɛ wa ná hɛ kɛ nɔ fɔmi nɛ mi wa ngɛ Yehowa mi kaa bɔ nɛ Daniel pee ɔ, e sa nɛ waa kɛ he si bami nɛ kase Baiblo gbamihi, nɛ waa kɛ juɛmi nɛ da nɛ pee jã, nɛ wa hla níhi a mi saminya hulɔ (Hyɛ kuku 7)
7. Mɛni ye bua Daniel nɛ e nyɛ nɛ e kase Baiblo gbamihi? (Daniel 12:10) (Hyɛ foni ɔ hulɔ.)
7 Daniel pee nɔ hyɛmi nɔ́ kpakpa ngɛ bɔ nɛ wa ma plɛ kɛ kase Baiblo gbamihi ha a he. Daniel kase gbamihi kɛ juɛmi nɛ da, ejakaa e suɔ nɛ e le anɔkuale ɔ. Jehanɛ hu ɔ, Daniel baa e he si, ejakaa e le kaa ke e hɛ kɛ su Yehowa he nɛ e bu lɛ tue ɔ, e maa ye bua lɛ nɛ e nu gbamihi a sisi. (Dan. 2:27, 28; kane Daniel 12:10.) Daniel ngɔ e hɛ kɛ fɔ Yehowa nɔ konɛ e ye bua lɛ, enɛ ɔ hu tsɔɔ kaa e baa e he si. (Dan. 2:18) Jehanɛ hu ɔ, Daniel kase ní saminya. E hla níhi a mi ngɛ Ngmami kpahi nɛ ngɛ ngɛ jamɛ a be ɔ mi ɔ mi. (Yer. 25:11, 12; Dan. 9:2) Mɛni o ma nyɛ maa pee kɛ kase Daniel nɔ hyɛmi nɔ́ ɔ?
8. Mɛni he je nɛ ni komɛ he we yi kaa Baiblo gbamihi baa mi ɔ, se mɛni e sa nɛ waa pee?
8 Mo susu nɔ́ he je nɛ o suɔ nɛ o kase Baiblo gbamihi ɔ he. Anɛ o suɔ nɛ o kase Baiblo gbamihi akɛnɛ e ngɛ o tsui nɔ kaa o maa le anɔkuale ɔ he je lo? Ke jã a, lɛɛ Yehowa maa ye bua mo. (Yoh. 4:23, 24; 14:16, 17) Mɛni ji yi mi tomi kpa ko he je nɛ eko ɔ, nɔ ko maa suɔ kaa e maa kase Baiblo gbamihi? Ni komɛ maa suɔ kaa a maa kase Baiblo gbamihi konɛ a hyɛ kaa a maa na nɔ́ ko nɛ a da nɔ kɛ tsɔɔ kaa Baiblo ɔ pi Mawu Munyu. A susuɔ kaa ke a ba na kaa Baiblo ɔ pi Mawu Munyu ɔ, lɛɛ mɛ nitsɛmɛ a ma nyɛ maa mwɔ a yi mi kpɔ ngɛ nɔ́ nɛ da kɛ nɔ́ nɛ dɛ he. Se wɔɔ lɛɛ, e sa nɛ waa kɛ juɛmi nɛ da nɛ kase Baiblo gbamihi. Jehanɛ hu ɔ, wa hia su kpa ko nɛ maa ye bua wɔ konɛ waa nu Baiblo gbamihi a sisi.
9. Mɛni su nɛ wa hia konɛ wa nyɛ nɛ waa nu Baiblo gbamihi a sisi? Moo tsɔɔ nya.
9 Moo ba o he si. Yehowa wo si kaa e maa ye bua nihi nɛ a baa a he si ɔ. (Yak. 4:6) Enɛ ɔ he ɔ, e sa nɛ waa sɔle ha lɛ nɛ e ye bua wɔ konɛ waa nu Baiblo gbamihi a sisi. Jehanɛ hu ɔ, ke wa baa wa he si ɔ, wa maa kplɛɛ yemi kɛ buami nɛ tsɔlɔ anɔkualetsɛ kɛ ní lelɔ ɔ kɛ haa wɔ ɔ nɔ, ejakaa wa le kaa Yehowa guɔ a nɔ kɛ haa wɔ mumi mi niye ní ngɛ be nɛ sa mi. (Luka 12:42) Yehowa ji Mawu nɛ pee we e ní basabasa. Enɛ ɔ he ɔ, nile ngɛ mi kaa Yehowa maa gu blɔ kake pɛ nɔ kɛ ye bua wɔ konɛ waa nu anɔkualehi nɛ ngɛ e Munyu ɔ mi ɔ sisi.—1 Kor. 14:33; Efe. 4:4-6.
10. Mɛni o kase ngɛ Esther níhi a si kpami ɔ mi?
10 Mo hla níhi a mi saminya. Kekleekle ɔ, moo hla gbami ko nɛ o bua jɔ he nɛ o hla níhi a mi ngɛ he. Jã nɛ nyɛmiyo Esther nɛ wa tu e he munyu ngɛ ní kasemi nɛ sɛ hlami ɔ mi ɔ pee. E bua jɔ gbamihi nɛ tu Mesia a bami ɔ he munyu ɔ he wawɛɛ. E de ke: “Benɛ i ye jeha 15 ɔ, i bɔni níhi a mi hlami konɛ ma ná nɔ mi mami kaa a ngma gbamihi nɛ kɔɔ Yesu he ɔ kɛ fɔ si loko a fɔ lɛ niinɛ.” Níhi nɛ e kase kɛ kɔɔ Ngo Wo ɔ Womi Kpo ɔmɛ a he ɔ ha nɛ e ná nɔ mi mami ngɛ gbami nɛ ɔmɛ a mi. Esther de ke, “A ngma womi kpo nɛ ɔmɛ ekomɛ loko a fɔ Kristo, enɛ ɔ he ɔ, e ngɛ heii kaa gbamihi nɛ ngɛ mi ɔ je Mawu ngɔ.” E de hu ke, “I kane sane nɛ ɔmɛ a he ní si abɔ loko i nyɛ nɛ i nu níhi a sisi saminya.” Se e bua jɔ wawɛɛ kaa e bɔ mɔde nɛ e pee jã. Benɛ e hla níhi a mi saminya ngɛ Baiblo gbamihi fuu a he ɔ, e de ke, “Amlɔ nɛ ɔ, i na heii kaa níhi nɛ Baiblo ɔ de ɔ ji anɔkuale!”
11. Ke wa kase ní nɛ wa ná nɔ mi mami kaa níhi nɛ Baiblo ɔ de ɔ ji anɔkuale ɔ, kɛ wa ma ná he se ha kɛɛ?
11 Ke wa na bɔ nɛ gbami komɛ nɛ a ngɛ Mawu Munyu ɔ mi ɔ ba mi momo ha a, e ma ha nɛ wa ná hɛ kɛ nɔ fɔmi nɛ mi wa ngɛ Yehowa mi, nɛ waa kɛ blɔ tsɔɔmihi tsuo nɛ e kɛ ma ha wɔ ɔ ma tsu ní. Jehanɛ hu ɔ, ke waa kɛ kahi nɛ a nya wa ngɛ kpee amlɔ nɛ ɔ po ɔ, Baiblo gbamihi maa ye bua wɔ konɛ waa ya nɔ nɛ wa ná juɛmi nɛ da ngɛ hɛ kɛ nɔ fɔmi nɛ wa ngɛ ɔ he. Amlɔ nɛ ɔ, nyɛ ha nɛ wa susu gbami enyɔ komɛ nɛ ngɛ Daniel womi ɔ mi nɛ a ngɛ mi bae mwɔnɛ ɔ he. Ke wa nu gbami nɛ ɔmɛ a sisi ɔ, e maa ye bua wɔ nɛ waa mwɔ yi mi kpɔhi nɛ da.
NƆ́ HE JE NƐ E SA KAA O KASE AMAGA A NANEWƐƐ Ɔ NƐ A KƐ DADE KƐ ZU FUTU Ɔ HE NÍ
12. Mɛni nɛ amaga a nanewɛɛ ɔ nɛ a kɛ ‘dade kɛ zu nɛ a pɔtɔ futu lɛ’ ɔ daa si kɛ ha? (Daniel 2:41-43)
12 Kane Daniel 2:41-43. Ngɛ nlami nɛ Matsɛ Nebukadnezar nla nɛ Daniel tsɔɔ lɛ sisi ɔ mi ɔ, e na kaa amaga a nanewɛɛ ɔ ji ‘dade nɛ a kɛ zu nɛ a pɔtɔ futu lɛ.’ Ke wa ngɔ gbami nɛ ɔ kɛ to ekpahi nɛ a ngɛ Daniel womi ɔ kɛ Kpo Jemi womi ɔ mi ɔ a he ɔ, wa ma nyɛ maa ma nya si kaa amaga a nanewɛɛ ɔ daa si kɛ ha Anglo-Amerika nɔ yemi ɔ nɛ e ji nɔ yemi nɛ e he wa wawɛɛ ngɛ je ɔ mi mwɔnɛ ɔ. Daniel de ngɛ nɔ yemi nɛ ɔ he ke, “Matsɛ yemi nɛ ɔ he fã mi maa wa, nɛ he fã hu ma gbɔjɔ.” Mɛni he je nɛ he fã ma gbɔjɔ ɔ? Ejakaa nimli gu ɔmɛ nɛ a daa si kɛ ha zu ɔ ngmɛ́ nɔ yemi nɛ ɔ blɔ nɛ́ e kɛ e he wami nɛ ngɛ kaa dade ɔ nɛ tsu ní. b
13. Mɛni anɔkuale komɛ nɛ a he hia nɛ wa kase ngɛ Daniel gbami ɔ mi?
13 Wa kase anɔkuale komɛ nɛ a he hia ngɛ bɔ nɛ Daniel kale amaga a ha a mi. Se wa ma nyɛ maa kase níhi fuu ngɛ amaga a nanewɛɛ ɔ he titli. Kekleekle ɔ, Anglo-Amerika nɔ yemi ɔ tsɔɔ kaa e ngɛ he wami wawɛɛ. Kaa nɔ hyɛmi nɔ́ ɔ, United States kɛ Britain piɛɛ mahi nɛ a ye kunimi ngɛ kekleekle je mi ta a kɛ je mi ta enyɔne ɔ tsuo mi. Se ngɛ enɛ ɔ tsuo se ɔ, nɔ yemi nɛ ɔ mi gbɔjɔ, nɛ e mi maa ya nɔ ma gbɔjɔ, ejakaa ma mi bi ɔmɛ teɔ si kɛ woɔ a sibi kɛ nɔ yemi ɔ. Enyɔne ɔ, Anglo-Amerika nɔ yemi ɔ maa pee nyagbe nɔ yemi nɛ e maa hi nɔ yee loko Mawu Matsɛ Yemi ɔ ma ba kpata adesa nɔ yemihi tsuo a hɛ mi. E ngɛ mi kaa be komɛ ɔ, ma kpahi teɔ si kɛ woɔ Anglo-Amerika nɔ yemi ɔ mohu lɛɛ, se a be nyɛe ma kpɔ̃ matsɛ yemi ɔ ngɛ e dɛ. Wa le enɛ ɔ ejakaa “tɛ ɔ” nɛ daa si kɛ ha Mawu Matsɛ Yemi ɔ ma ba fia amaga a nanewɛɛ ɔ nɛ ji Anglo-Amerika nɔ yemi ɔ.—Dan. 2:34, 35, 44, 45.
14. Ke wa nu gbami nɛ kɔɔ amaga a nanewɛɛ ɔ nɛ a kɛ dade kɛ zu futu lɛ ɔ sisi ɔ, kɛ e maa ye bua wɔ ha kɛɛ nɛ waa mwɔ yi mi kpɔhi nɛ da?
14 Anɛ o he ye kaa Daniel gbami nɛ kɔɔ amaga a nanewɛɛ ɔ nɛ a kɛ dade kɛ zu futu lɛ ɔ ji anɔkuale lo? Ke jã a, lɛɛ e sa nɛ a na ngɛ o ní peepee mi. Lɔ ɔ ma ha nɛ o be he lo nya níhi fuu a se die ngɛ je nɛ e be kɛe nɛ a ma kpata e hɛ mi ɔ mi. (Luka 12:16-21; 1 Yoh. 2:15-17) Ke o ba nu gbami nɛ ɔ sisi ɔ, e maa ye bua mo konɛ o na kaa e he hia wawɛɛ nɛ o fiɛɛ nɛ o tsɔɔ nihi ní. (Mat. 6:33; 28:18-20) Ke o kase gbami nɛ ɔmɛ a he ní ta a, mo bi o he ke, ‘Anɛ yi mi kpɔhi nɛ i mwɔɔ ɔ tsɔɔ kaa i he ye kaa e be kɛe nɛ Mawu Matsɛ Yemi ɔ ma ba kpata adesa nɔ yemihi tsuo a hɛ mi lo?’
KƐ “OMLEYI JE MATSƐ Ɔ” KƐ “WOYI JE MATSƐ Ɔ” A NÍ PEEPEE SAA O HE HA KƐƐ?
15. Mɛnɔmɛ ji “omleyi je matsɛ ɔ” kɛ “woyi je matsɛ ɔ” mwɔnɛ ɔ? (Daniel 11:40, NW)
15 Baiblo ɔ de ke: “Ngɛ nyagbe be ɔ mi ɔ, woyi je matsɛ ɔ kɛ lɛ [omleyi je matsɛ ɔ] ma si koli. Nɛ omleyi je matsɛ ɔ maa ngɔ ta zugba lɛhi, okpɔngɔ nɔ hili kɛ melehi babauu kɛ hwu kɛ si woyi je matsɛ ɔ; nɛ e maa ya zugba amɛ a nɔ nɛ e maa gu a nɔ kaa nyu kpekpemi.” (Daniel 11:40, NW) Daniel yi 11 ɔ tu matsɛmɛ enyɔ loo nɔ yemi enyɔ komɛ nɛ a maa te si kɛ wo a sibi ɔ he munyu. Ke wa ngɔ gbami nɛ ɔ kɛ to ekpahi nɛ a ngɛ Baiblo ɔ mi ɔ he ɔ, wa ma nyɛ ma de ke “omleyi je matsɛ ɔ” ji Russia kɛ ma komɛ nɛ a fĩ e se ɔ, nɛ “woyi je matsɛ ɔ” ji Anglo-Amerika nɔ yemi ɔ nɛ. c
Ke wa yɔse kaa si temi kɛ womi nɛ je “omleyi je matsɛ ɔ” kɛ “woyi je matsɛ ɔ” ngɔ ɔ ha nɛ Baiblo gbamihi ngɛ mi bae ɔ, lɔ ɔ ma ha nɛ wa be tsui yee tsɔ nɛ wa hemi kɛ yemi ɔ mi maa wa hulɔ (Hyɛ kuku 16-18)
16. Mɛni nyagbahi nɛ nyɛmimɛ nɛ a ngɛ “omleyi je matsɛ ɔ” nɔ yemi ɔ sisi ɔ kɛ kpeɔ?
16 Mwɔnɛ ɔ, a waa Mawu we bi nɛ a ngɛ “omleyi je matsɛ ɔ” nɔ yemi ɔ sisi ɔ yi mi wawɛɛ. A kongoɔ Odasefohi komɛ nɛ a woɔ mɛ tsu ngɛ a hemi kɛ yemi ɔ he je. E ngɛ mi kaa “omleyi je matsɛ ɔ” waa wa nyɛmimɛ ɔmɛ yi mi wawɛɛ mohu lɛɛ, se lɔ ɔ wui a he gbeye, mohu ɔ, lɔ ɔ haa nɛ hemi kɛ yemi nɛ a ngɛ ngɛ Yehowa kɛ e Munyu ɔ mi ɔ mi waa. Mɛni he je? Ejakaa wa nyɛmimɛ ɔmɛ le kaa yi mi nɛ a ngɛ mɛ wae ɔ ha nɛ gbami ko nɛ ngɛ Daniel womi ɔ mi ɔ ngɛ mi bae. d (Dan. 11:41) Enɛ ɔ nɛ wa le ɔ hu ma nyɛ maa ye bua wɔ konɛ wa ná hɛ kɛ nɔ fɔmi nɛ mi wa, nɛ waa ya nɔ nɛ waa ye Yehowa anɔkuale.
17. Mɛni nyagbahi nɛ Mawu we bi nɛ a ngɛ “woyi je matsɛ ɔ” nɔ yemi ɔ sisi kɛ kpe?
17 Ngɛ blema a, “woyi je matsɛ ɔ” hu wa Yehowa we bi yi mi. Kaa nɔ hyɛmi nɔ́ ɔ, ngɛ kekleekle je mi ta a kɛ je mi ta enyɔne ɔ mi ɔ, a wo wa nyɛmimɛ ɔmɛ fuu tsu ngɛ a hemi kɛ yemi ɔ he je, nɛ a fiee wa nyɛmimɛ komɛ hu a bimɛ ngɛ sukuu. Lingmi nɛ ɔ hu ɔ, Yehowa sɔmɔli nɛ a ngɛ woyi je matsɛ ɔ nɔ yemi sisi ɔ kɛ ka kpahi kpe. Kaa nɔ hyɛmi nɔ́ ɔ, ke e piɛ bɔɔ nɛ a maa fɔ sɔ ɔ, e ma nyɛ maa pee ka kɛ ha Kristofo no ko kaa e fĩ ma kudɔmi kuu ko loo nɔ yelɔ ko se. Eko ɔ, e ya be sɔ fɔe mohu lɛɛ, se ngɛ e tsui kɛ e juɛmi mi lɛɛ e fĩ ma kudɔmi kuu ko se. Enɛ ɔ he ɔ, loko wa ma nyɛ maa yu wa he ngɛ ma kudɔmi sanehi a he kulaa a, e sa nɛ waa hyɛ wa ní peepee, wa munyu tutui kɛ wa susumi saminya!—Yoh. 15:18, 19; 18:36.
18. Kɛ wa peeɔ wa ní ngɛ ninyɛ nɛ ngɛ “omleyi je matsɛ ɔ” kɛ “woyi je matsɛ ɔ” a kpɛti ɔ he ha kɛɛ? (Hyɛ foni ɔ hulɔ.)
18 Nihi nɛ a be hemi kɛ yemi ngɛ Baiblo gbamihi a mi ɔ ma nyɛ maa ye tsui wawɛɛ ke a na kaa “woyi je matsɛ ɔ” kɛ “omleyi je matsɛ ɔ” ngɛ ‘koli sie’ loo a ngɛ a sibi tuae ɔ. (Dan. 11:40, NW) Matsɛmɛ enyɔ nɛ ɔmɛ tsuo ngɛ he wami wawɛɛ, nɛ a pee oplɛmihi nɛ ngɛ he wami nɛ ma nyɛ ma kpata níhi nɛ wami ngɛ a mi ɔ tsuo a hɛ mi ngɛ zugba a nɔ. Se wa le kaa Yehowa be mɛ blɔ ngmɛe nɛ a pee jã. (Yes. 45:18) Enɛ ɔ he ɔ, wa hɛwi ngɛ ninyɛ nɛ ngɛ “omleyi je matsɛ ɔ” kɛ “woyi je matsɛ ɔ” a kpɛti ɔ he, mohu ɔ, lɔ ɔ woɔ wa hemi kɛ yemi ɔ mi he wami wawɛɛ, ejakaa e haa nɛ wa naa kaa e be kɛe nɛ je nɛ ɔ maa ba nyagbe.
O HƐ NƐ HI GBAMIHI A NƆ BE FƐƐ BE
19. Mɛni nɛ e sa nɛ waa le ngɛ Baiblo gbamihi a he?
19 Ngɛ anɔkuale mi ɔ, wa li bɔ nɛ Baiblo gbami komɛ ma plɛ kɛ ba mi ha. Gbalɔ Daniel po nui gbami komɛ nɛ e ngma ngɛ e be ɔ mi ɔ sisi. (Dan. 12:8, 9) Se ke wa li blɔ nɔ nɛ gbami ko ma plɛ kɛ ba mi ha po ɔ, lɔ ɔ tsɔɔ we kaa e be mi bae. Ngɛ anɔkuale mi ɔ, wa ma nyɛ ma ná nɔ mi mami kaa ngɛ be nɛ sa mi ɔ, Yehowa ma ha nɛ waa le níhi nɛ e sa kaa waa le kaa bɔ nɛ e pee blema a pɛpɛɛpɛ.—Amos 3:7.
20. Mɛni Baiblo gbamihi nɛ́ sa kadimi nɛ e be kɛe nɛ a maa ba mi, nɛ mɛni nɛ e sa nɛ waa ya nɔ nɛ waa pee?
20 E be kɛe nɛ nihi ma de ke “tue mi jɔmi kɛ slɔkee si himi ba.” (1 Tɛs. 5:3) Lɔ ɔ se ɔ, je ɔ mi nɔ yeli ɔmɛ tsuo ma tua lakpa jami nɛ a ma kpata e hɛ mi kulaa. (Kpoj. 17:16, 17) Jehanɛ se ɔ, a ma ba tua Mawu we bi. (Eze. 38:18, 19) Ní nɛ ɔmɛ nɛ maa ya nɔ ɔ, maa ngɔ nyagbe ta nɛ ji Hamagedɔn ɔ kɛ ba. (Kpoj. 16:14, 16) Wa ma nyɛ ma ná nɔ mi mami kaa e be kɛe nɛ ní nɛ ɔmɛ maa ya nɔ. Se kɛ yaa si jamɛ a be ɔ, nyɛ ha nɛ wa hɛ nɛ hi Baiblo gbamihi a nɔ, nɛ waa ye bua ni kpahi konɛ mɛ hu a pee jã. Ke wa pee jã a, lɔ ɔ maa tsɔɔ kaa wa bua jɔ níhi nɛ wa hiɔwe Tsɛ nɛ ngɛ suɔmi ɔ pee kɛ ha wɔ ɔ he.
LA 95 La a Nya Ngɛ Wae
a Ke je ɔ mi si fɔfɔɛ ngɛ puɛe kaa mɛni po ɔ, wa ma nyɛ ma ná nɔ mi mami kaa wa si himi mi maa pee kpakpa hwɔɔ se. Loko wa ma nyɛ ma ná nɔ mi mami nɛ ɔ, ja wa kase Baiblo gbamihi. Ní kasemi nɛ ɔ maa tsɔɔ wɔ ní pɔtɛɛ komɛ a he je nɛ e sa nɛ waa kase Baiblo gbamihi. Jehanɛ hu ɔ, wa ma susu gbami enyɔ komɛ nɛ ngɛ Daniel womi ɔ mi ɔ he, kɛ bɔ nɛ wa ma plɛ kɛ ná gbami nɛ ɔmɛ a he se ha ke wa nu sisi.
b Hyɛ munyuyi nɛ ji, “Mawu Matsɛ Yemi ɔ Ngɛ Nɔ Yee Amlɔ Nɛ ɔ!” nɛ ngɛ July 2022 Hwɔɔmi Mɔ ɔ kk. 10 mi ɔ.
