Anɛ o ma nyɛ maa da jeha 2019 Hwɔɔmi Mɔ ɔ nɔ kɛ ha sane bimi nɛ ɔmɛ a heto lo?

Mɛni nɛ Mawu si womi nɛ ɔ tsɔɔ? “Ta hwumi níhi nɛ a sɔ̃ nɛ ɔmɛ ekoeko be nyɛe maa pee mo nɔ́ ko.” (Yes. 54:17)

Wa ma nyɛ ma ná nɔ mi mami kaa Mawu maa po wa he piɛ ngɛ “yiwutsotsɛmɛ nɛ a yi mi wa” a he. (Yes. 25:4, 5) Wa he nyɛli ɔmɛ be nyɛe maa ye wa nɔ kunimi kɛ ya neneene.​—w19.01, bf. 6-7.

Anɛ bɔ nɛ Mawu kɛ Kaanan bi ɔmɛ kɛ Israel bi ɔmɛ nɛ a yi anɔkuale ɔ ye ha a tsɔɔ kaa e yeɔ dami sane lo?

Mawu kpata nihi nɛ a kɛ a he wo ajuama bɔmi mi loo nihi nɛ a wa yihi kɛ jokuɛwi yi mi ɔ a hɛ mi. Se e jɔɔ nihi nɛ a bu lɛ tue kɛ nihi nɛ a kɛ ni kpahi hi si saminya a.​—w19.02, bf. 22-23.

Ke nɔ ko nɛ e sɔmɔ we Yehowa sɔle be mi nɛ wa ngɛ lejɛ ɔ, mɛni e sa nɛ waa pee?

Wa ma nyɛ maa pee dii, nɛ e sɛ nɛ waa pee nɔ́ ko nɛ maa tsɔɔ kaa wa bui mɛ. Se e sɛ nɛ wa de ke “amen” loo waa pɛtɛ wa sibi a nine he. Wa ma nyɛ maa sɔle kpiti ngɛ wa yi mi.​—w19.03, bf. 31.

Anɛ hɛdɔ ngɛ nisɛ ní nɛ a peeɔ jokuɛwi ɔ he lo?

Ke a pee jokuɛ ko nisɛ ní ɔ, e ji yayami nɛ a pee kɛ si jokuɛ ɔ, asafo ɔ, ma a, kɛ Mawu. Ke e biɔ nɛ asafo mi nikɔtɔmahi nɛ a bɔ polisi ɔmɛ amaniɛ ɔ, a peeɔ jã.​—w19.05, bf. 9-10.

Mɛni blɔ nɔ o maa gu kɛ tsake he wami nɛ kudɔɔ o juɛmi ɔ, aloo o wo mi he wami?

Nɔ́ nɛ maa ye bua mo: O kɛ Yehowa nɛ sɛɛ ní kɛ gu sɔlemi nɔ. Mo pue o yi mi tɛ nɛ o hyɛ tsakemi nɛ e he maa hia nɛ o pee. Moo hla huɛmɛ kpakpahi.​—w19.06, bf. 11.

Mɛni wa ma nyɛ maa pee kɛ dla wa he kɛ ha si temi kɛ womi?

E sa nɛ wa ha nɛ huɛ bɔmi nɛ ngɛ waa kɛ Yehowa wa kpɛti ɔ mi nɛ wa. E sa nɛ wa ná nɔ mi mami kaa e suɔ wɔ, nɛ e be wɔ kuae gblegbleegble. Moo kane Baiblo ɔ daa ligbi, nɛ o sɔle be fɛɛ be. Mo ná nɔ mi mami kaa jɔɔmihi nɛ Mawu Matsɛ Yemi ɔ kɛ maa ba a maa ba mi niinɛ. Kase ngmamihi kɛ asafo lahi nɛ o bua jɔ he ɔ kɛ wo o yi mi.​—w19.07, bf. 2-4.

Mɛni wa ma nyɛ maa pee kɛ ye bua wa weku li konɛ a he a yi wami?

E sa nɛ wa mi mi nɛ sã wɔ ngɛ a he, waa pee nɔ hyɛmi nɔ́ kpakpa, waa to wa tsui si, nɛ waa kɛ hɛ si kami nɛ tsu ní.​—w19.08, bf. 15-17.

Kaa bɔ nɛ Yesu wo si ngɛ Mateo 11:28 ɔ, ngɛ mɛni blɔ nɔ nɛ wa he mi jɔɔ wɔ?

Wa ngɛ nɔ hyɛli kpakpahi nɛ a suɔ wɔ, huɛmɛ kpakpahi, kɛ ní tsumi nɛ hi pe kulaa.​—w19.09, bf. 23.

Mɛni blɔ nɔ nɛ Mawu ma nyɛ ma ha wɔ suɔmi ɔ kɛ he wami ɔ nɛ wa kɛ tsu ní? (Filip. 2:13)

Ke wa kane Mawu Munyu ɔ nɛ wa pue wa yi mi tɛ ngɛ níhi nɛ wa kase ɔ he ɔ, Mawu ma ha wɔ suɔmi ɔ nɛ waa kɛ maa pee e suɔmi nya ní kɛ he wami ɔ nɛ waa kɛ maa pee jã. Mawu mumi ɔ maa ye bua wɔ nɛ waa kɛ nyɛmi ko nɛ wa ngɛ ɔ ma tsu ní saminya.​—w19.10, bf. 21.

Mɛni níhi nɛ a he hia nɛ e sa kaa waa pee loko waa mwɔ yi mi kpɔ ko nɛ hɛdɔ ngɛ he?

Níhi enuɔ nɛ e sa kaa o pee: Pee níhi a mi hlami wawɛɛ. Moo sɔle kɛ bi juɛmi. Mo susu nɔ́ he je nɛ o yaa mwɔ yi mi kpɔ ɔ he. Ngɔɔ oti pɔtɛɛ komɛ kɛ ma o hɛ mi. Moo le o nyɛmi.​—w19.11, bf. 27-29.

Anɛ nɔ́ nɛ Satan de Hawa a lɛ ngɔ susumi nɛ ji susuma gbo we ɔ kɛ ba lo?

Dɛbi. Satan de Hawa kaa e be gboe, se pi kaa e maa pee kaa nɔ́ nɛ e gbo, nɛ́ e fã ko maa ya nɔ maa hi si ngɛ he ko. Nihi nɛ a tsɔɔ lakpa tsɔɔmihi nɛ a hɛɛ lakpa susumihi a yi ná we wami ngɛ Nyu Kpekpemi ɔ mi. Enɛ ɔ he ɔ, lakpa tsɔɔmi nɛ ji susuma gbo we ɔ je sisi benɛ Mawu futu gbihi nɛ a tuɔ ngɛ Babel nɛ nihi gbɛ fĩa “je ɔ mi tsuo” ɔ.​—w19.12, bf. 15.