Dɛbi. Abosiami de we Hawa kaa ke e ye tso yiblii nɛ Mawu de mɛ ke a ko ye ɔ, e maa pee kaa nɔ́ nɛ e gbo, se e fã ko (nɔ́ nɛ mwɔnɛ ɔ, nihi fuu tsɛɛ ke susuma nɛ gbo we ɔ) maa ya nɔ maa hi si ngɛ he ko. Satan gu sinɔ ɔ nɔ kɛ tsɔɔ kaa ke Hawa ye jamɛ a tso ɔ yiblii ɔ, ‘e be gboe gblegbleegble.’ Abosiami ngɛ tsɔɔe kaa Hawa maa ya nɔ maa hi si ngɛ je mi, nɛ e maa ya nɔ ma ná bua jɔmi ngɛ si himi mi ngɛ zugba a nɔ, nɛ Mawu be e nɔ yee.​—1 Mose 2:17; 3:3-5.

Ke lakpa tsɔɔmi nɛ pɔ he mwɔnɛ ɔ nɛ ji susuma nɛ gbo we ɔ ji sisi ngɛ Eden abɔɔ ɔ mi ɔ, lɛɛ jije e je kɛ ba mɔ? Wa be nyɛe maa tsɔɔ tutuutu. Se wa le kaa a kpata lakpa jamihi tsuo a hɛ mi ngɛ Nyu Kpekpemi nɛ ba ngɛ Noa be ɔ mi ɔ mi. Akɛnɛ Noa kɛ e weku ɔ nɛ́ a sɔmɔɔ Yehowa ngɛ anɔkuale mi ɔ pɛ nɛ a yi ná wami ngɛ Nyu Kpekpemi ɔ mi he je ɔ, nɔ ko be nɛ e maa tsɔɔ lakpa tsɔɔmi ko hu.

Enɛ ɔ he ɔ, wa ma nyɛ ma de ke lakpa tsɔɔmi nɛ ji susuma gbo we nɛ nihi fuu he ye mwɔnɛ ɔ je sisi ngɛ Nyu Kpekpemi ɔ se. Atsinyɛ jemi ko be he kaa lakpa tsɔɔmi nɛ ji susuma gbo we ɔ je sisi benɛ Mawu futu gbihi nɛ a tuɔ ngɛ Babel nɛ adesahi gbɛ fĩa “je ɔ mi tsuo” ɔ. (1 Mose 11:8, 9) E ngɛ mi kaa wa li be tutuutu nɛ lakpa tsɔɔmi nɛ ɔ je sisi mohu lɛɛ, se wa ngɛ nɔ mi mami kaa Satan Abosiami nɛ ji “lakpa a e tsɛ” ɔ lɛ ha nɛ lakpa tsɔɔmi nɛ ɔ gbɛ fĩa je ɔ mi tsuo ɔ nɛ.​—Yoh. 8:44.