ANƐ o ji nɔ ko nɛ o jeɔ hɛsa kpo nɛ o naa nihi si ngɛ níhi nɛ a peeɔ ha mo ɔ he lo? Enɛ ɔ ji sane bimi ko nɛ e sa nɛ wɔ tsuo wa susu he. Baiblo ɔ gba kaa ngɛ wa be nɛ ɔ mi ɔ, nihi fuu maa pee a he “nihi nɛ a li sina.” (2 Tim. 3:2) Eko ɔ, o le nihi nɛ a susuɔ kaa doo ɔ, e sa nɛ ni kpahi nɛ a pee níhi ha mɛ, aloo a ha mɛ níhi. E pee kaa nɔ́ nɛ a li nɔ́ he je nɛ e sa nɛ a je hɛsa kpo ngɛ níhi nɛ nɔ ko pee ha mɛ ɔ he. Eko ɔ, o yɔse kaa ke o kɛ nihi kaa jã ngɛ bɔe ɔ, o bua jɔɛ.

Se Yehowa we bi lɛɛ, a woɔ mɛ he wami kaa a ‘pee a he nihi nɛ a le sina.’ E sa nɛ waa “na si ngɛ nɔ́ fɛɛ nɔ́ he.” (Kol. 3:15; 1 Tɛs. 5:18) Ngɛ anɔkuale mi ɔ, e hi kaa wa maa na si ngɛ nɔ́ fɛɛ nɔ́ he. Wa ngɛ yi mi tomihi fuu a he je nɛ e sa nɛ waa pee jã.

Yi mi tomi kake he je nɛ e he hia kaa waa na si ji kaa e haa nɛ wa bua jɔɔ. Ke nɔ ko je hɛsa kpo ngɛ nɔ́ ko nɛ a pee kɛ ha lɛ ɔ he ɔ, e bua jɔɔ, nɛ nɔ nɛ e pee nɔ́ ɔ nɛ a na lɛ si ɔ hu bua jɔɔ. Mɛni he je nɛ e baa lɛ jã a? Kaa nɔ hyɛmi nɔ́ ɔ, nihi jeɔ a tsui mi nɛ a peeɔ níhi kɛ haa wɔ, ejakaa a susuɔ wa he, nɛ a nuɔ he kaa e sa wɔ. Ke o yɔse kaa a susuɔ o he ɔ, lɔ ɔ ma ha nɛ o bua maa jɔ. Wa le kaa jã nɛ Rut hu nu he. Boaz je mi mi jɔmi kpo kɛ tsɔɔ Rut. Enɛ ɔ he ɔ, benɛ Rut yɔse kaa nɔ ko susuɔ e he ɔ, e bua jɔ wawɛɛ.​—Rut 2:10-13.

E he hia wawɛɛ kaa wa ma je hɛsa kpo ngɛ níhi nɛ Mawu pee ha wɔ ɔ he. Atsinyɛ jemi ko be he kaa be komɛ ɔ, o susuɔ mumi mi níhi kɛ he lo nya níhi fuu nɛ Yehowa yaa nɔ nɛ e kɛ haa wɔ ɔ he. (5 Mose 8:17, 18; Níts. 14:17) Se níhi nɛ Mawu pee ha mo nɛ o maa le ɔ kɛkɛ pi, e he hia nɛ o he be kɛ pue o yi mi tɛ ngɛ jɔɔmihi nɛ Mawu jɔɔ mo kɛ o suɔli ɔ he. Ke o pue o yi mi tɛ ngɛ mi mi jɔmi kpo nɛ o Bɔlɔ ɔ je kpo kɛ tsɔɔ mo ɔ he ɔ, lɔ ɔ ma ha nɛ o ma je hɛsa kpo ngɛ níhi nɛ e pee ha mo ɔ he wawɛɛ, nɛ o maa na bɔ nɛ e suɔ mo nɛ e bua jɔ o he ha.​—1 Yoh. 4:9.

Tsa pi níhi nɛ Yehowa pee ha wɔ ɔ pɛ nɛ e sa nɛ wa susu he nɛ wa pue wa yi mi tɛ ngɛ he; e sa nɛ waa na Yehowa si ngɛ ní kpakpahi nɛ e peeɔ ha wɔ ɔ he. (La 100:4, 5) A deɔ ke, “Hɛsa kpo jemi haa nɛ nihi a bua jɔɔ.”

Yi mi tomi kpa ko hu he je nɛ hɛsa kpo jemi he hia ji kaa e haa nɛ huɛ bɔmi nɛ ngɛ nihi a kpɛti ɔ mi waa. Wɔ tsuo wa suɔ nɛ ke wa pee nɔ́ ko ha nɔ ko ɔ, nɔ ɔ nɛ je hɛsa kpo. Ke o je o tsui mi nɛ o na nɔ ko si ngɛ nɔ́ ko nɛ e pee kɛ ha mo ɔ he ɔ, e haa nɛ nyɛ ni enyɔ ɔmɛ tsuo nyɛ hɛɛ kɛ suɔ nyɛ sibi a he wawɛɛ. (Rom. 16:3, 4) Jehanɛ hu ɔ, behi fuu ɔ, nihi nɛ a jeɔ hɛsa kpo ɔ yeɔ bua ni kpahi. A yɔseɔ mi mi jɔmi nɛ nihi jeɔ kpo kɛ tsɔɔ mɛ ɔ, nɛ mɛ hu a bɔɔ mɔde kaa a maa pee jã kɛ ha ni kpahi. Niinɛ, ke wa ye bua ni kpahi ɔ, e haa nɛ wa bua jɔɔ. Yesu de ke: “Bua jɔmi babauu ngɛ nɔ́ hami mi pe nɔ́ ngɔmi.”​—Níts. 20:35.

Robert Emmons nɛ e ji nɔkɔtɔma ngɛ University of California a tu hɛsa kpo nɛ a ma je ɔ he munyu. E de ke: “Loko wa ma nyɛ ma je hɛsa kpo ɔ, jã wa nu sisi kaa wa hia wa sibi. Be komɛ ɔ, wa yeɔ bua wa nyɛmimɛ, nɛ be komɛ hu ɔ, wa nyɛmimɛ hu yeɔ bua wɔ.” Anɔkuale sane ji kaa loko wa ma nyɛ ma ná bua jɔmi ngɛ si himi mi ɔ, wa hia wa nyɛmimɛ a yemi kɛ buami ngɛ blɔ slɔɔtohi a nɔ. Kaa nɔ hyɛmi nɔ́ ɔ, eko ɔ, e ma bi nɛ a ha wɔ  niye ní aloo a hyɛ wa nɔ ke wa be he wami. (1 Kor. 12:21) Nɔ nɛ jeɔ hɛsa kpo ɔ bua jɔɔ nɔ́ nɛ ni kpahi peeɔ kɛ haa lɛ ɔ he. Ke jã a, lɛɛ anɛ o bɔɔ mɔde kaa o ma je hɛsa kpo ngɛ nɔ́ nɛ ni kpahi peeɔ kɛ haa mo ɔ he lo?

Yi mi tomi kpa ko hu he je nɛ e sa nɛ o je hɛsa kpo ji kaa e yeɔ bua mo nɛ o kɛ o juɛmi maa ní kpakpahi a nɔ ngɛ si himi mi pe nyagbahi nɛ o kɛ kpee ɔ. Ngɛ blɔ ko nɔ ɔ, o juɛmi ɔ tsuɔ ní kaa nɔ́ nɔ domi nɔ́. E haa nɛ o kɛ o juɛmi maa ní kpakpahi a nɔ, nɛ o jeɔ o juɛmi ngɛ ní yayamihi a nɔ. Ke o bua jɔɔ níhi nɛ nihi pee ha mo ɔ he ɔ, o pɔɔ ní kpakpahi nami, nɛ lɔ ɔ haa nɛ o jeɔ hɛsa kpo wawɛɛ. Ke o ngɔ o juɛmi kɛ ma níhi nɛ ma ha nɛ o je hɛsa kpo ɔ a nɔ ɔ, lɔ ɔ maa ye bua mo konɛ o kɛ bɔfo Paulo ga womi nɛ ɔ nɛ tsu ní. E de ke: “Be fɛɛ be ɔ, nyɛ nya ngɛ Nyɔmtsɛ ɔ mi.”​—Filip. 4:4.

Ke o jeɔ hɛsa kpo ɔ, lɔ ɔ maa ye bua mo nɛ o be ní yayahi a he susue. E he maa wa kaa nɔ ko ma je hɛsa kpo, nɛ́ jamɛ a be ɔ mi nɔuu ɔ, e je hunga, e ye aywilɛho, aloo e mi mi nɛ fu. Jehanɛ hu ɔ, nihi nɛ a jeɔ hɛsa kpo ɔ kɛ a juɛmi mɛ he lo nya níhi a se dimi nɔ. A bua jɔɔ níhi nɛ a ngɛ ɔ he, nɛ a kɛ a juɛmi mɛ ní nami fuu nɔ.​—Filip. 4:12.

Anɔkuale Kristofohi le kaa Satan suɔ kaa e ma ha nɛ nyagbahi nɛ a kɛ ngɛ kpee ngɛ nyagbe ligbi nɛ ɔmɛ a mi ɔ nɛ ha nɛ a kɔni mi nɛ jɔ̃. Satan bua maa jɔ wawɛɛ ke o ji nɔ ko nɛ o tuɔ níhi a he munyu nyanyaanya be fɛɛ be. Ke o ji nɔ ko nɛ o peeɔ jã a, e he maa wa kaa nihi maa bu mo tue ngɛ fiɛɛmi mi. Hɛsa kpo jemi kɛ mumi ɔ yiblii ɔ ngɛ tsakpa. Kaa nɔ hyɛmi nɔ́ ɔ, bua jɔmi haa nɛ wa naa níhi nɛ Mawu pee ha wɔ ɔ, nɛ wa náa hemi kɛ yemi ngɛ e si womi ɔmɛ a mi.​—Gal. 5:22, 23.

Akɛnɛ o piɛɛ Yehowa we bi a he he je ɔ, eko ɔ, o kplɛɛ nɔ́ nɛ a de kɛ kɔ hɛsa kpo jemi he ngɛ munyu nɛ ɔ mi ɔ nɔ. Se o ma yɔse kaa a kɛ hɛsa kpo nɛ nɔ ko ma je ɔ fɔ we nɔ. Se e sɛ nɛ lɔ ɔ nɛ ha nɛ o kɔni mi nɛ jɔ̃. O ma nyɛ maa kase bɔ nɛ a jeɔ hɛsa kpo ha, nɛ́ o ya nɔ nɛ o pee jã. Ngɛ mɛni blɔ nɔ? Daa ligbi ɔ, mo he be kɛ susu ní pɔtɛɛ komɛ nɛ ya nɔ ngɛ o si himi mi nɛ o bua jɔ he ɔ he. Ke o yaa nɔ nɛ o peeɔ jã a, bɔɔbɔɔbɔɔ ɔ, e he be wae ha mo kaa o ma je hɛsa kpo. Lɔ ɔ ma ha nɛ o bua nɛ jɔ pe nihi nɛ a ngɔɔ a juɛmi kɛ maa si himi mi nyagbahi a nɔ ɔ. Ngɔɔ o juɛmi kɛ ma ní kpakpahi nɛ Mawu kɛ ni kpahi peeɔ haa mo nɛ woɔ mo he wami, kɛ níhi nɛ haa nɛ o bua jɔɔ ɔ nɔ. Eko ɔ, o ma nyɛ maa ngma ní nɛ ɔmɛ kɛ fɔ si. Daa ligbi ɔ, o ma nyɛ maa ngma níhi enyɔ loo etɛ nɛ ha nɛ o bua jɔ ɔ kɛ fɔ si.

Níhi a mi hlami tsɔɔ kaa ke nihi jeɔ hɛsa kpo be fɛɛ be ɔ, e ma nyɛ ma tsake bɔ nɛ a susuɔ níhi a he ha a, nɛ lɔ ɔ ma ha nɛ a bua nɛ jɔ ngɛ si himi mi. Nɔ nɛ jeɔ hɛsa kpo ɔ ngɛ bua jɔmi. Mo susu jɔɔmihi nɛ o ná a he, o bua nɛ jɔ ní kpakpahi nɛ yaa nɔ ngɛ o si himi mi ɔ he, nɛ́ o je hɛsa kpo be fɛɛ be! Ko ma o hɛ kɛ fɔ ní kpakpahi nɛ o náa a nɔ, mohu ɔ, moo ‘na Yehowa si, ejakaa e hi.’ Ee, moo “na si ngɛ nɔ́ fɛɛ nɔ́ he.”​—1 Kron. 16:34; 1 Tɛs. 5:18.