1-2. (a) Mɛni ji nyami jeha? (Hyɛ daka nɛ ji “ Mɛni Ji Nyami Jeha a?”) (b) Mɛni he munyu nɛ Yesu tu ngɛ Luka 4:16-18 ɔ?

NGƐ ma komɛ a nɔ ɔ, ke matsɛ ko aloo manyɛ ko ye nɔ jeha 50 ɔ, a yeɔ gbijlɔ ko kɛ kadiɔ jamɛ a jeha a. Behi fuu ɔ, a tsɛɛ jeha nɛ to nɔ 50 ɔ ke nɔ yelɔ ɔ Nyami Jeha. Níhi nɛ a peeɔ ngɛ gbijlɔ yemi nɛ ɔ mi ɔ yaa nɔ ngɛ ligbi kake mi, loo otsi, loo nɔ́ nɛ pã jã po, se e baa nyagbe kɛ̃, nɛ bɔɔbɔɔbɔɔ ɔ, ma bi ɔmɛ a hɛ jeɔ níhi nɛ ya nɔ ɔ nɔ.

² Wa ma susu Nyami Jeha ko nɛ hi pe kulaa he. E hi po pe Nyami Jeha nɛ blema Israel bi ɔmɛ yeɔ daa jeha 50 ɔ. Nyami Jeha nɛ ɔ ha nɛ Israel bi ɔmɛ ná he yemi. Mɛni he je nɛ e sa nɛ waa kase enɛ ɔ he ní ɔ? Ejakaa Nyami Jeha nɛ blema Israel bi ɔmɛ ye ɔ kaiɔ wɔ blɔ nya ko nɛ Yehowa to kɛ ha wɔ. E ma ha nɛ waa ye wa he kɛ ya neneene, nɛ amlɔ nɛ ɔ po ɔ, wa ma nyɛ ma ná he se. Yesu tu he yemi nɛ ɔ he munyu.​—Kane Luka 4:16-18.

3. Kaa bɔ nɛ 3 Mose 25:8-12 ɔ tsɔɔ ɔ, kɛ Israel bi ɔmɛ ná Nyami Jeha a he se ha kɛɛ?

³ Ke wa susu Nyami Jeha nɛ Mawu to he blɔ nya kɛ ha Israel bi ɔmɛ ɔ he ɔ, e maa ye bua wɔ nɛ waa nu nɔ́ nɛ Yesu ngɛ tsɔɔe benɛ e tu he yemi he munyu ɔ sisi saminya. Yehowa de Israel bi ɔmɛ ke: ‘Bɔ nɛ nyɛ maa pee jeha nɛ ji nyingmi enuɔ ɔ klɔuklɔu ji nɛ ɔ nɛ. Nyɛɛ fiɛɛ kɛ ha zugba a nɔ bi ɔmɛ tsuo ke Heyemi be ɔ su oo. E maa pee nyami jeha ha nyɛ. Jamɛ a jeha a, weto ní tsuaa weto ní nɛ nɔ ko kɛ to awaba a, a kpale kɛ ha nɔtsɛ ɔ, loo e nina. Nɔ tsuaa nɔ nɛ a kɛ lɛ ya to awaba a e kpale e se kɛ ya e nɔ́ mi, kɛ e weku li a ngɔ ekohu.’ (Kane 3 Mose 25:8-12.) Ngɛ ní kasemi nɛ sɛ hlami ɔ mi ɔ, wa na bɔ nɛ Israel bi ɔmɛ ná He Jɔɔmi Ligbi nɛ a yeɔ daa otsi ɔ he se ha. Nɛ kɛ a ná Nyami  Jeha a hu he se ha kɛɛ? Moo ngɔ lɛ kaa Israel no ko ye hiɔ, nɛ lɔ ɔ he ɔ, e jua e zugba konɛ e kɛ wo hiɔ ɔ. Ke e su Nyami Jeha a nɔ ɔ, e sa nɛ a kpale nɔ ɔ zugba a kɛ ha lɛ. Enɛ ɔ he ɔ, e sa nɛ nɔ nɛ a jua zugba a kɛ ha lɛ ɔ nɛ ‘kpale zugba a kɛ ha nɔtsɛ,’ bɔ nɛ pee nɛ weto ní nɛ e bimɛ ma ná hwɔɔ se ɔ nɛ ko bɔ mɛ. Aloo eko ɔ, ke Israel no ko ye hiɔ ɔ, e ma nyɛ maa ngɔ e bi aloo lɛ nitsɛ e he kɛ ya to awaba. Ke e su Nyami Jeha a nɔ ɔ, e sa nɛ nɔ nɛ a kɛ lɛ ya to awaba a nɛ ‘kpale e se kɛ ya e weku li a ngɔ ekohu.’ Enɛ ɔ he ɔ, nɔ ko be nyɔguɛ pee kɛ ya neneene! Blɔ nya tomi nɛ ɔ tsɔɔ kaa Yehowa susuɔ e we bi a he!

4-5. Mɛni he je nɛ e sa nɛ wa susu Nyami Jeha nɛ Israel bi ɔmɛ ye ɔ he?

⁴ Mɛni se nami kpa ko hu nɛ ngɛ Nyami Jeha a he? Yehowa de ke: ‘Ohiatsɛ be nyɛ kpɛti hie; ejakaa Yehowa, o Mawu ɔ maa gbaa mo ngɛ zugba a nɛ e ngɔ kɛ ngɛ mo hae kaa o weto ní ɔ nɔ.’ (5 Mose 15:4) Enɛ ɔ je ekpa kulaa ngɛ bɔ nɛ níhi ngɛ nɔ yae ha ngɛ je ɔ mi mwɔnɛ ɔ he. Behi fuu ɔ, niatsɛmɛ yaa nɔ nɛ a náa ní kpɔtɔɔ, nɛ ohiatsɛmɛ hu yaa nɔ nɛ a yeɔ ohia futaa!

⁵ Mwɔnɛ ɔ, Kristofohi be Mose Mlaa a sisi. Enɛ ɔ tsɔɔ kaa wa be Nyami Jeha a blɔ nya tomi ɔ sisi nɛ e ma bi nɛ a ngmɛɛ nyɔguɛhi a he, á ngɔ hiɔhi kɛ ke, nɛ́ a kpale weto níhi kɛ ha nɔtsɛmɛ. (Rom. 7:4; 10:4; Efe. 2:15) Se kɛ̃ ɔ, e he hia nɛ waa kase Nyami Jeha a he ní. Mɛni he je? Ejakaa wa ma nyɛ ma ná he yemi ko hwɔɔ se; enɛ ɔ kaiɔ wɔ blɔ nya nɛ Yehowa to kɛ ha Israel bi ɔmɛ ɔ.

6. Mɛni mi nɛ e he hia nɛ a kpɔ̃ adesahi ngɛ?

⁶ E he hia nɛ a kpɔ̃ wɔ tsuo, ejakaa ngɛ blɔ ko nɔ ɔ, wɔ tsuo wa ji yayami nyɔguɛhi. Akɛnɛ wa ji yayami peeli he je ɔ, wa nuɔ hiɔ, wa bwɔɔ, nɛ wa gboɔ. Wa naa ní nɛ ɔmɛ ke wa hyɛ ahuhuɛ mi, aloo wa ya na dɔkita konɛ e tsa wɔ. Jehanɛ hu ɔ, ke wa pee yayami ko ɔ, wa kɔni mi jɔ̃ɔ. Bɔfo  Paulo tsɔɔ kaa ‘yayami mlaa nɛ ngɛ e nɔmlɔ tso ɔ mi ɔ ngɔ lɛ nyɔguɛ.’ Nɛ e tsa nɔ ke: “I ji nɔmlɔ nɛ e ní ngɛ mɔbɔ! Mɛnɔ ma kpɔ̃ mi kɛ je nɔmlɔ tso nɛ e kɛ mi ngɛ gbenɔ nɛ ɔ mi woe ɔ dɛ mi?”​—Rom. 7:23, 24.

7. Mɛni nɛ Yesaya gba ngɛ he yemi he?

⁷ Bua jɔmi sane ji kaa Mawu to blɔ nya kɛ ha wɔ konɛ e kɛ kpɔ̃ wɔ kɛ je yayami mi. Kpɔmi nɛ ɔ maa ba mi kɛ gu Yesu nɔ. Ngɛ jeha lafa kpaanyɔ mi loko a fɔ Kristo ɔ, gbalɔ Yesaya gba he yemi ko nɛ maa ba hwɔɔ se ɔ kɛ fɔ si. E ji he yemi ngua ko nɛ ma pã nɔ́ nɛ Israel bi ɔmɛ ná ngɛ Nyami Jeha a nɔ ɔ. E gba ke: ‘Nyɔmtsɛ Yehowa mumi ɔ ngɛ ye nɔ; Yehowa pɔ mi nu, nɛ e tsɔ mi, konɛ ma ngɔ manye munyu ya ha nihi nɛ a ní ngɛ mɔbɔ ɔ; nɛ ma wo kɔmɔ yeli a bua; nɛ ma ya de nihi nɛ a nuu mɛ nyɔguɛ ɔ ke a he yemi be su ta.’ (Yes. 61:1) Mɛnɔmɛ a he nɛ gbami nɛ ɔ kɔɔ?

8. Mɛnɔmɛ a he nɛ Yesaya gbami nɛ kɔɔ he yemi he ɔ kɔɔ?

⁸ Gbami nɛ kɔɔ he yemi he nɛ ɔ bɔni mi bami benɛ Yesu je e sɔmɔmi ní tsumi ɔ sisi ɔ. Benɛ Yesu ya sɔlemi we ɔ ngɛ e ma nɛ ji Nazaret ɔ mi ɔ, e kane gbalɔ Yesaya munyu nɛ ɔmɛ nɔuu kɛ tsɔɔ Yuda bi nɛ a bua a he nya ngɛ lejɛ ɔ. Yesu tsɔɔ kaa gbami nɛ ɔ kɔɔ e he. E de ke: “Yehowa mumi ɔ ngɛ ye nɔ, ejakaa e pɔ mi nu kaa ma ba jaje sane kpakpa a kɛ tsɔɔ ohiatsɛmɛ. E tsɔ mi kaa ma ba jaje kɛ tsɔɔ nyɔguɛhi kaa a maa ye a he, nɛ́ ma jaje kɛ tsɔɔ hɛ yuyuili kaa a maa hyɛ nɔ́, nɛ e tsɔ mi kaa ma ba kpɔ̃ nihi nɛ a ngɛ mɛ yi mi wae ɔ, nɛ́ ma fiɛɛ jeha nɛ sa Yehowa hɛ mi ɔ.” (Luka 4:16-19) Kɛ Yesu ha nɛ gbami nɛ ɔ ba mi ha kɛɛ?

9. Mɛni he yemi nɛ nihi nɛ a ngɛ Yesu be ɔ mi ɔ hyɛ blɔ?

⁹ Ngɛ kaseli ɔmɛ a be ɔ mi ɔ, Yesaya gbami nɛ kɔɔ he yemi he nɛ Yesu kane ɔ bɔni mi bami. Yesu ma enɛ ɔ nɔ mi benɛ e de ke: “Mwɔnɛ ɔ, ngmami nɛ ɔ nɛ nyɛ nu ɔ ba mi” ɔ. (Luka 4:21) Nihi nɛ a nu nɔ́ nɛ Yesu kane ɔ a ti nihi fuu ngɛ blɔ hyɛe kaa eko ɔ, a ma kpɔ̃ mɛ kɛ je Roma nɔ yemi ɔ sisi. Eko ɔ, a nu he kaa bɔ nɛ nyumuhi enyɔ komɛ nu he ɔ. Nyumu nɛ ɔmɛ de ke: “Jinɛ wa hɛ kɛ nɔ fɔmi ji kaa nyumu nɛ ɔ ji nɔ nɛ e ma ba kpɔ̃ Israel.” (Luka 24:13, 21) Se wa le kaa Yesu wui e se nyɛɛli ɔmɛ he wami kaa a te si kɛ wo Roma bi ɔmɛ ngɛ yi mi nɛ a ngɛ mɛ wae ɔ he je. Mohu ɔ, e fã mɛ kaa a ngɔ “Kaisare níhi ngɔ ha Kaisare.” (Mat. 22: 21) Lɛɛ kɛ Yesu plɛ kɛ kpɔ̃ ni ɔmɛ ha kɛɛ ngɛ jamɛ a be ɔ mi?

10. Mɛni he nɛ Yesu ha nɛ nihi ye a he ngɛ?

¹⁰ Mawu Bi ɔ ba konɛ e ha nɛ adesahi nɛ a ye a he ngɛ blɔ enyɔ nɔ. Kekleekle ɔ, Yesu ye bua nihi nɛ a ye a he ngɛ lakpa tsɔɔmihi nɛ jami hɛ mi nyɛɛli kɛ nyɛ a nɔ ɔ he. Jami hɛ mi nyɛɛli ɔmɛ ngɔ adesahi a kusumihi kɛ lakpa tsɔɔmihi kɛ nyɛ Yuda bi fuu nɛ a hi si ngɛ jamɛ a be ɔ mi ɔ a nɔ. (Mat. 5:31-37; 15:1-11) Ngɛ blɔ ko nɔ ɔ, nihi nɛ a deɔ ke a ngɛ ni ɔmɛ ye buae konɛ a kase Mawu he ní ɔ mohu a hɛ ngmɛ yu. Akɛnɛ a kua Mesia a kɛ anɔkuale nɛ e tsɔɔ ɔ he je ɔ, a ya nɔ nɛ a hi diblii kɛ a yayami ɔ mi. (Yoh. 9:1, 14-16, 35-41) Akɛnɛ Yesu tsɔɔ anɔkuale ɔ nɛ e pee nɔ hyɛmi nɔ́ kpakpa he je ɔ, e ye bua he si bali nɛ a na bɔ nɛ a maa pee ha kɛ ye a he ngɛ lakpa tsɔɔmi he.​—Maak. 1:22; 2:23–3:5.

11. Mɛni ji blɔ enyɔne nɛ Yesu gu nɔ kɛ ha nɛ nihi ye a he?

¹¹ Nɔ́ nɛ ji enyɔ ɔ, Yesu ye bua adesahi nɛ a ye a he ngɛ yayami nyɔguɛ nɛ a ya je sisi ɔ he. Yesu kpɔmi afɔle sami ɔ he je ɔ, Yehowa ma nyɛ maa ngɔ nihi nɛ a ngɛ hemi kɛ yemi ngɛ kpɔmi nɔ́ ɔ mi, nɛ́ a kɛ a ní peepee hu tsɔɔ jã a a he yayamihi kɛ pa mɛ. (Heb. 10:12-18) Yesu de ke: “Ke Bi ɔ ha nɛ nyɛ ye nyɛ he ɔ, nyɛ maa ye nyɛ he niinɛ.” (Yoh. 8:36) Ngɛ anɔkuale mi ɔ, jamɛ a he yemi ɔ hi kulaa pe he yemi ko nɛ Israel nɔ ko ma ná ngɛ Nyami Jeha a mi! Kaa nɔ hyɛmi nɔ́ ɔ, ke Israel no ko ye e he ngɛ Nyami Jeha a mi ɔ, e ma nyɛ maa pee nyɔguɛ ekohu, nɛ nyagbenyagbe ɔ, e ma gbo.

12. Mɛnɔmɛ nɛ a ná he yemi nɛ Yesu tu he munyu ɔ he se kekle?

¹² Ngɛ Pentekoste jeha 33 ɔ nɔ ɔ, Yehowa kɛ e mumi ɔ pɔ Yesu bɔfo ɔmɛ kɛ nyumuhi kɛ yihi anɔkualetsɛmɛ kpa komɛ nu. E ngɔ mɛ kaa e binyumuhi, nɛ hwɔɔ se ɔ, e ma tle mɛ si kɛ ya hiɔwe konɛ a kɛ Yesu nɛ ye matsɛ. (Rom. 8:2, 15-17) Mɛ ji nihi nɛ a ma ná he yemi ɔ nɛ Yesu tu he munyu ngɛ sɔlemi we ɔ nɛ ngɛ Nazarɛt ɔ he se kekle. Nyumuhi kɛ yi nɛ ɔmɛ ye a he ngɛ Yuda jami hɛ mi nyɛɛli ɔmɛ a lakpa tsɔɔmi ɔmɛ kɛ adesahi a kusumi ɔmɛ a he. Jehanɛ hu ɔ, Mawu bu mɛ kaa nihi nɛ a ye a he ngɛ yayami nɛ kɛ gbenɔ baa a he. Okadi peemi nyami jeha a je sisi benɛ a pɔ Kristo se nyɛɛli ɔmɛ nu ngɛ jeha 33 ɔ mi, nɛ e maa ba nyagbe ngɛ  Kristo Jeha Akpe Nɔ Yemi ɔ nyagbe. Kɛ je be nɛ ɔ kɛ ya si be nɛ Kristo Jeha Akpe Nɔ Yemi ɔ maa ba nyagbe ɔ, mɛni ní kpakpahi lɛ maa ya nɔ?

13-14. Ngɛ nihi nɛ a pɔ mɛ nu ɔ a se ɔ, mɛnɔmɛ hu nɛ a ma ná he yemi nɛ Yesu tu he munyu ɔ he se?

¹³ Ngɛ wa be nɛ ɔ mi ɔ, nihi ayɔhi abɔ nɛ a je ma slɔɔtohi a nɔ piɛɛ ‘jijɔ kpa amɛ’ a he. (Yoh. 10:16) Mawu hlɛ mɛ kaa a piɛɛ Yesu he kɛ ye matsɛ ngɛ hiɔwe. Mohu ɔ, Baiblo ɔ tsɔɔ kaa a ma nyɛ maa hi zugba a nɔ kɛ ya neneene. Anɛ mo hu o hɛ nɔ kami ji lɔ ɔ lo?

¹⁴ Amlɔ nɛ ɔ po ɔ, o ngɛ jɔɔmihi nɛ nihi nɛ a pɔ mɛ nu nɛ a kɛ Yesu maa ye matsɛ ngɛ hiɔwe ɔ ngɛ náe ɔ ekomɛ náe momo. Akɛnɛ o ngɛ hemi kɛ yemi ngɛ Yesu gbenɔ afɔle sami ɔ mi he je ɔ, o ma nyɛ ma kpa Yehowa pɛɛ nɛ e ngɔ o he yayami ɔmɛ kɛ pa mo. Nɛ lɔ ɔ ma ha nɛ Mawu maa kplɛɛ o nɔ, nɛ o ma ná he nile kpakpa hulɔ. (Efe. 1:7; Kpoj. 7:14, 15) Jehanɛ hu ɔ, moo hyɛ jɔɔmihi nɛ o ná akɛnɛ o ye o he ngɛ lakpa tsɔɔmihi a he ɔ he je. Yesu de ke: “Nyɛ maa le anɔkuale ɔ, nɛ anɔkuale ɔ ma ha nɛ nyɛ maa ye nyɛ he.” (Yoh. 8:32) Hyɛ bɔ nɛ wa bua jɔ ha kaa wa ye wa he!

15. Mɛni he yemi kɛ jɔɔmihi nɛ wa ma nyɛ maa hyɛ blɔ hwɔɔ se?

¹⁵ O ma nyɛ maa hyɛ blɔ kaa he yemi nɛ pe kulaa maa ba hwɔɔ se. E be kɛe nɛ  Yesu ma je lakpa jamihi kɛ adesa nɔ yemihi tsuo kɛ je. Mawu maa po “asafo kuu ngua” a nɛ a ngɛ lɛ sɔmɔe ɔ a he piɛ, nɛ lɔ ɔ se ɔ, e maa jɔɔ mɛ babauu ngɛ paradeiso zugba a nɔ. (Kpoj. 7:9, 14) A ma tle nimli babauu si kɛ ba wami mi, nɛ a maa ye a he kɛ je níhi nɛ Adam yayami ɔ kɛ ba a tsuo he.​—Níts. 24:15.

16. Mɛni he yemi ngua adesahi ma ná hwɔɔ se?

¹⁶ Ngɛ Jeha Akpe Nɔ Yemi ɔ mi ɔ, Yesu kɛ nihi nɛ a maa piɛɛ e he kɛ ye matsɛ ɔ ma ha nɛ adesahi ma ná nɔmlɔ tso mi he wami kpakpa, nɛ huɛ bɔmi kpakpa maa hi a kɛ Mawu a kpɛti. Tsakemi nɛ ɔ kɛ he yemi nɛ ɔ maa pee kaa Nyami Jeha nɛ Israel bi ɔmɛ ye ɔ. Enɛ ɔ tsɔɔ kaa adesahi tsuo nɛ a sɔmɔɔ Yehowa ngɛ anɔkuale mi ɔ maa ye mluku, nɛ a be yayami pee hu.

17. Mɛni nɛ Yesaya 65:21-23 ɔ de ngɛ Mawu we bi a he? (Hyɛ foni nɛ ngɛ womi ɔ hɛ mi ɔ.)

¹⁷ Yesaya 65:21-23 (Kane.) ɔ tsɔɔ bɔ nɛ si himi ɔ maa pee ha ngɛ zugba a nɔ hwɔɔ se. Jamɛ a be ɔ mi ɔ, adesahi be hejɔ pee. Baiblo ɔ tsɔɔ kaa Mawu we bi ma tsu ní wawɛɛ kɛ bua jɔmi. Ke Jeha Akpe Nɔ Yemi ɔ ba nyagbe ɔ, wa ma nyɛ ma ná nɔ mi mami kaa ‘adebɔ ní ɔmɛ nitsɛmɛ hu maa ye a he kɛ je puɛmi nyɔguɛ yemi ɔ mi, nɛ a ma ná Mawu bimɛ ɔmɛ a hɛ mi nyami he yemi ɔ.’​—Rom. 8:21.

18. Mɛni he je nɛ wa ma nyɛ ma ná nɔ mi mami kaa wa ma ná bua jɔmi hwɔɔ se ɔ?

¹⁸ Kaa bɔ nɛ Yehowa to blɔ nya kɛ ha Israel bi ɔmɛ konɛ a ná be kɛ tsu ní nɛ a ná be hu kɛ jɔɔ a he ɔ, jã nɔuu kɛ̃ nɛ e maa pee ha e we bi ngɛ Kristo Jeha Akpe Nɔ Yemi ɔ mi. Wa ma ná be kɛ ja Mawu. Mwɔnɛ ɔ, Mawu jami haa nɛ nɔ bua jɔɔ, enɛ ɔ he ɔ, ngɛ je ehe ɔ mi ɔ, wa ma ná be kɛ ja Mawu. Niinɛ, adesahi anɔkualetsɛmɛ tsuo a bua maa jɔ ngɛ Kristo Jeha Akpe Nɔ Yemi ɔ mi, ejakaa wɔ tsuo waa kɛ bua jɔmi ma tsu ní, nɛ wa ma sɔmɔ Mawu.