Pi kaa 5 Mose 22:25-27 ɔ ngɛ hlae nɛ e tsɔɔ ke ji nyumu ɔ ye fɔ aloo e yi fɔ, ejakaa ngɛ sane nɛ ɔ mi ɔ, a bu nyumu ɔ fɔ momo. Se mlaa nɛ ɔ tsɔɔ nɔ́ he je nɛ yo ɔ yi fɔ. Nyɛ ha nɛ waa hyɛ bɔ nɛ sane ɔ ya nɔ ha.

Kukuhi nɛ sɛ hlami ɔ tu nyumu ko nɛ e kɛ yiheyo ko nɛ a bi e si ɔ ná bɔmi ngɛ “ma a mi” ɔ he munyu. Akɛnɛ a naa yiheyo ɔ nɛ a bi e si ɔ kaa nɔ́ nɛ e sɛ gba si himi mi momo he je ɔ, nyumu ɔ nɛ e kɛ lɛ ya ná bɔmi ɔ puɛ gba. Nɛ yiheyo ɔ hu nɛɛ? ‘E kpa we ngmlaa ngɛ ma a mi he nɛ a tsu zo ní nɛ ɔ ngɛ ɔ.’ Kaa e kpa ngmlaa a, jinɛ ni komɛ maa nu, nɛ a ma ba je ngmlaa ha lɛ. Se e pee we jã. Enɛ ɔ tsɔɔ kaa e piɛɛ he nɛ a puɛ gba a nɛ, lɔ ɔ he ɔ, mɛ ni enyɔ ɔmɛ tsuo ye fɔ.​—5 Mose 22:23, 24.

Lɔ ɔ se ɔ, Mlaa a tu si fɔfɔɛ kpa ko he munyu: “Se ke nga mi nɛ nyumu ko ya nu yiheyo ko nɛ a bi e si ngɛ, nɛ e kɛ lɛ ná bɔmi ɔ, lɔ ɔ lɛɛ á gbe nyumu ɔ pɛ, a ko pee yiheyo ɔ nɔ́ ko, ejakaa e pee we nɔ́ ko nɛ sa gbenɔ. Munyu nɛ ɔ ngɛ kaa bɔ nɛ nɔ ko woɔ nɔ ká nɛ e ya gbee lɛ ɔ pɛ. Nyumu ɔ ya nu yiheyo nɛ a bi e si ɔ ngɛ nga mi, nɛ eko ɔ e kpa ngmlaa lɛɛ, se nɔ ko be nɛ ma ba je ngmlaa ha lɛ.”​—5 Mose 22:25-27.

Ke e ba jã a, kojoli ɔmɛ ma he yo ɔ ye. Mɛni he je? A ngɔɔ lɛ kaa “eko ɔ e kpa ngmlaa lɛɛ, se nɔ ko be nɛ ma ba je ngmlaa ha lɛ.” Enɛ ɔ he ɔ, yiheyo ɔ puɛ we gba. Se nyumu ɔ lɛɛ a buɔ lɛ fɔ kaa e tua yiheyo ɔ nɛ a bi e si ɔ abonua, nɛ e puɛ gba, ejakaa e ‘nu lɛ nɛ e kɛ lɛ ná bɔmi.’

E ngɛ mi kaa mlaa nɛ ɔ tu bemi nɛ yo ɔ ye ɔ he munyu titli, se e da kaa a bu nyumu ɔ fɔ kaa e tua yiheyo ɔ abonua, nɛ e puɛ gba hulɔ. Se wa ngɛ nɔ mi mami kaa kojoli ɔmɛ ma “hla mi fitsofitso kaa sane ɔ ngɛ mi niinɛ lo,” nɛ a maa da blɔ tsɔɔmi nɛ ngɛ heii nɛ Mawu tĩ mi si abɔ kɛ ha mɛ ɔ nɔ kɛ kojo.​—5 Mose 13:14; 17:4; 2 Mose 20:14.