Ngɛ anɔkuale mi ɔ, tsa pi jã nɛ ngmami nɛ ɔ ngɛ tsɔɔe. Ngmami nɛ ɔ ngɛ nɔ ko nɛ e kɛ haomihi babauu kpeɔ se e nyɛɔ fĩɔ si ngɛ tsuo mi ɔ he munyu tue.

Mo ha nɛ waa hyɛ kuku nɛ sɛ jamɛ a kuku ɔ hlami kɛ kuku nɛ nyɛɛ jamɛ a kuku ɔ se ɔ. “Koo pee o ní kaa yiwutsotsɛmɛ nɛ woɔ nimli kpakpahi ka nɛ a ngɔɔ a níhi, aloo a kpɔɔ a wehi ngɛ a dɛ pani nya. Nɔmlɔ kpakpa a, ke e nɔ si nɔtonɔto si kpaago po, e maa te si ekohu. Se nimli yayamihi lɛɛ ke haomi ba a nɔ kɛkɛ a hɛ mi kpata pɛsɛpɛsɛ. Ke o he nyɛlɔ tɛ nɔ́, loo e nɔ si ɔ, ko nya.”​—Abɛ 24:15-17.

Ni komɛ susu kaa kuku 16 ngɛ nɔ ko nɛ e tɔ̃ɔ se e piaa e he, nɛ́ huɛ bɔmi kpakpa hii e kɛ Mawu a kpɛti ɔ he munyu tue. Kaa nɔ hyɛmi nɔ́ ɔ, jami hɛ mi nyɛɛli enyɔ nɛ a je England ɔ tsɔɔ kaa fiɛɛli nɛ a hi si blema kɛ fiɛɛli nɛ a ngɛ mwɔnɛ ɔ tsɔɔ ngmami nɛ ɔ sisi ngɛ blɔ nɛ ɔ nɔ. A de hu kaa nɔ́ nɛ sisi tsɔɔmi nɛ ɔ tsɔɔ ji kaa “nɔmlɔ kpakpa ma nyɛ maa pee yayami nɛ hɛdɔ ngɛ he, se e ma nyɛ maa ya nɔ maa suɔ Mawu nɛ́ Mawu bua nɛ jɔ e he ke kaa e tsake e tsui be fɛɛ be.” Nɔ ko nɛ e bɔɛ mɔde kaa e ma kpa yayami ko nɛ e ngɛ pee ɔ bua maa jɔ sisi tsɔɔmi nɛ ɔ he. Eko ɔ, e ma susu kaa ke e tɔ̃ si abɔ po, Mawu kɛ maa ke lɛ.

Se tsa pi jã nɛ kuku 16 ngɛ tsɔɔe.

A kɛ Hebri munyu nɛ a tsɔɔ sisi ke “nɔ si” nɛ je kpo ngɛ kuku 16 kɛ 17 ɔ mi ɔ ma nyɛ ma tsu ní ngɛ blɔ slɔɔtohi a nɔ. E ma nyɛ maa tsɔɔ si nitsɛ nɛ nɔ ko maa nɔ. Kaa nɔ hyɛmi nɔ́ ɔ, lohwe ma nyɛ maa nɔ si ngɛ blɔ nɔ, nɔ ko ma nyɛ maa nɔ si kɛ je tsu yi mi, nɛ blɛfo hu ma nyɛ maa nɔ si ngɛ zugba. (5 Mose 22:4, 8; Amos 9:9) Se munyu nɛ ɔ ma nyɛ maa hɛɛ sisi numi kpa ko kaa nɔ́ nɛ nyɛɛ se ɔ. ‘Yehowa tsɔɔ blɔ nɛ sa nɛ o nyɛɛ nɔ. Nɛ ke o pee saminya a, e naa o he bua jɔmi. Ke o nɔ si tete po, o be zugba tlɔe; ejakaa Yehowa ma wo o nɔ ekohu.’​—La 37:23, 24.

Se mo susu munyu ko nɛ Professor Edward H. Plumptre tu ɔ he nɛ o hyɛ. E tsɔɔ kaa Hebri munyungu nɛ a tsɔɔ sisi ke “nɔ si” ɔ dɛ si kɛ ha “yayami.” Nɛ nilelɔ kpa ko hu tsɔɔ kuku nɛ ɔ sisi ke: “Se nami be he kaa nɔ ko maa wa Mawu we bi yi mi, ejakaa a maa ye manye be fɛɛ be. Se yiwutsotsɛmɛ lɛɛ, a be manye yee gblee!”

Lɔ ɔ he ɔ, odase nɛ ɔmɛ tsuo tsɔɔ kaa tsa pi yayami nɛ nɔ ko maa pee ɔ he munyu nɛ Abɛ 24:16 ngɛ tue, mohu ɔ, e ngɛ nyagbahi nɛ nɔ ko kɛ kpeɔ si abɔ ɔ he munyu tue. Ngɛ je yaya nɛ ɔ mi ɔ, nɔ nɛ peeɔ nɔ́ nɛ da a ma nyɛ maa nu hiɔ loo e kɛ nyagba kpahi maa kpe. Eko ɔ, nɔ yeli ɔmɛ ma nyɛ maa wa lɛ yi mi ngɛ e hemi kɛ yemi ɔ he je. Se e ma nyɛ ma ná nɔ mi mami kaa Mawu ma fĩ e se, nɛ e maa ye bua lɛ konɛ e nyɛ nɛ e da nyagba nɛ ɔmɛ a nya. Mo bi o he ke: ‘Anɛ i yɔse we kaa níhi pɔɔ nɔ yami saminya ha Mawu sɔmɔli lo?’ Mɛni he je? Ejakaa wa ngɛ nɔ mi mami kaa “nihi nɛ ngɛ haomi mi ɔ, [Yehowa] piɛɔ a he, nɛ nihi nɛ nɔ si ɔ, e woɔ a nɔ kɛ daa si ekohu.”​—La 41:1-3; 145:14-19.

Ke nihi ngɛ nɔ́ nae ɔ, “dalɔ” nya we. Mohu ɔ, e náa bua womi, ejakaa e le kaa “nihi nɛ yeɔ Mawu gbeye anɔkuale mi ɔ, e hii ha mɛ.”​—Fiɛlɔ 8:11-13; Hiob 31:3-6; La 27:5, 6