1. Mɛni blɔ nɔ nɛ Yehowa guɔ kɛ haa e sɔmɔli anɔkualetsɛmɛ a sɔlemihi a heto?

 KE YEHOWA sɔmɔlɔ ko hao nɛ e je e tsui mi kɛ sɔle ɔ, anɛ o le kaa Yehowa ma nyɛ maa gu o nɔ kɛ ha e sɔlemi ɔ heto lo? Ke o ji asafo mi nɔkɔtɔma jio, asafo mi sɔmɔlɔ jio, blɔ gbalɔ jio, fiɛɛlɔ jio, Yehowa ma nyɛ maa gu o nɔ kɛ ye bua nihi kaa jã. Yehowa ma nyɛ maa gu jokuɛwi loo nikɔtɔmahi, kɛ nyumuhi kɛ yihi hu a nɔ kɛ pee jã. Ke nɔ ko nɛ e suɔ Yehowa a sɔle kɛ ha lɛ konɛ e ye bua lɛ ɔ, wa Mawu ɔ guɔ asafo mi nikɔtɔmahi kɛ e sɔmɔli anɔkualetsɛmɛ kpahi a nɔ ‘kɛ woɔ e bua wawɛɛ nitsɛ.’ (Kol. 4:11) E ji he blɔ nɛ se be nɛ wa ná kaa wa ma sɔmɔ Yehowa kɛ wa nyɛmimɛ ɔmɛ! Wa ma nyɛ maa pee jã ke hiɔ ko nɛ sãa nɔ gbɛ fĩa, ke oslaa ko ba, aloo ke a ngɛ wa nyɛmimɛ ɔmɛ yi mi wae.

2. Mɛni he je nɛ e he ma nyɛ maa wa ha wɔ kaa wa maa ye bua ni kpahi ke hiɔ ko gbɛ fĩa a?

² Ke hiɔ ko gbɛ fĩa a, e he ma nyɛ maa wa ha wɔ kaa wa maa ye bua wa sibi. Kaa nɔ hyɛmi nɔ́ ɔ, eko ɔ, wa maa suɔ kaa wa ya slaa wa huɛmɛ, se lɔ ɔ ma nyɛ maa ye wɔ awi. Wa maa suɔ hu kaa wa maa fɔ̃ nihi nɛ a be nɔ́ ko tsɔ ɔ nine konɛ a kɛ wɔ nɛ ba ye ní, se lɔ ɔ hu be hie peemi. Eko ɔ, wa maa suɔ kaa wa maa ye bua ni kpahi, se ke wɔ nitsɛmɛ wa weku li hu ngɛ nɔ́ nae ɔ, e he ma nyɛ maa wa kaa wa maa pee jã. Se ngɛ enɛ ɔmɛ tsuo se ɔ, wa suɔ nɛ waa ye bua wa nyɛmimɛ ɔmɛ. Ke wa pee nɔ́ nɛ wa ma nyɛ kɛ ye bua mɛ ɔ, Yehowa bua maa jɔ. (Abɛ 3:27; 19:17) Mɛni wa ma nyɛ maa pee kɛ ye bua mɛ?

3. Mɛni wa kaseɔ ngɛ nɔ hyɛmi nɔ́ nɛ asafo mi nikɔtɔmahi nɛ a kɛ nyɛmiyo Desi ngɛ asafo mi ɔ pee ɔ mi? (Yeremia 23:4)

³ Nɔ́ nɛ asafo mi nikɔtɔmahi ma nyɛ maa pee. Ke o ji asafo mi nɔkɔtɔma a, e sa nɛ o le nyɛmimɛ ɔmɛ saminya. (Kane Yeremia 23:4.) Nyɛmiyo Desi nɛ a tu e he munyu ngɛ ní kasemi nɛ  sɛ enɛ ɔ hlami ɔ mi ɔ de ke: “Be ko nɛ be ɔ, asafo mi nikɔtɔmahi nɛ a ngɛ ye fiɛɛmi yami kuu ɔ mi ɔ kɛ imi kɛ nyɛmimɛ kpahi yaa fiɛɛmi, nɛ wa jeɔ wa hɛja hulɔ.” b Enɛ ɔ nɛ a pee ɔ ha nɛ a nyɛ nɛ a ye bua nyɛmiyo Desi ngɛ COVID-19 be ɔ mi benɛ hiɔ ɔ gbe e weku li komɛ ɔ.

4. Mɛni ha nɛ asafo mi nikɔtɔma amɛ nyɛ nɛ a ye bua nyɛmiyo Desi, nɛ mɛni asafo mi nikɔtɔmahi ma nyɛ maa kase ngɛ mi?

⁴ Nyɛmiyo Desi de ke: “Akɛnɛ asafo mi nikɔtɔma amɛ ji ye huɛmɛ momo he je ɔ, e he wɛ ha mi kaa ma de mɛ bɔ nɛ i ngɛ he nue ha, kɛ níhi nɛ ngɛ mi haoe ɔ.” Mɛni asafo mi nikɔtɔmahi ma nyɛ maa kase ngɛ mi? Asafo mi nikɔtɔmahi, nyɛɛ hyɛ nyɛmimɛ ɔmɛ a nɔ saminya loko a kɛ si fɔfɔɛ ko nɛ mi wa nɛ kpe. Nyɛɛ kɛ mɛ nɛ pee huɛ. Ke hiɔ ko gbɛ fĩa nɛ o nyɛ we nɛ o ya slaa mɛ ɔ, moo gu blɔ kpahi a nɔ kɛ ye bua mɛ. Desi de ke: “Be komɛ ɔ, asafo mi nikɔtɔmahi slɔɔtoslɔɔtohi tsɛɔ mi ngɛ fon nɔ loo a maneɔ mi sɛ gbi ngɛ ligbi kake pɛ mi. E ngɛ mi kaa i le ngmamihi nɛ a kɛ mi susuɔ he ɔ saminya mohu lɛɛ, se jamɛ a ngmami ɔmɛ taa ye tsui he wawɛɛ.”

5. Mɛni blɔ nɔ nɛ asafo mi nikɔtɔmahi maa gu kɛ le nyɛmimɛ ɔmɛ a hiami níhi konɛ a ye bua mɛ?

⁵ Blɔ kake nɔ nɛ asafo mi nikɔtɔma amɛ ma nyɛ maa gu kɛ le nyɛmimɛ ɔmɛ a hiami níhi ji kaa a ma bi mɛ sanehi nɛ be hae nɛ zo maa gbe mɛ. (Abɛ 20:5) Kaa nɔ hyɛmi nɔ́ ɔ, anɛ a ngɛ niye ní, tsopa kɛ ní kpahi nɛ he hia mɛ lo? Anɛ a ní tsumi ma nyɛ maa je a dɛ lo? Anɛ a ngɛ sika nɛ a kɛ maa wo a tsu he hiɔ lo? Ke amlaalo ɔ to blɔ nya ko kɛ ha yemi kɛ buami ɔ, anɛ a maa suɔ nɛ nɔ ko nɛ ye bua mɛ konɛ a nine nɛ su nɔ lo? Nyɛmimɛ Kristofohi ye bua nyɛmiyo Desi nɛ e nine su he lo nya níhi a nɔ. Suɔmi nɛ asafo mi nikɔtɔma amɛ je kpo kɛ tsɔɔ lɛ, kɛ Baiblo ɔ nɔ nɛ a da kɛ wo lɛ he wami ɔ ji nɔ́ titli nɛ ye bua lɛ nɛ e nyɛ nɛ e da haomihi nɛ e kɛ kpe ɔ nya. E de ke: “Asafo mi nikɔtɔma amɛ kɛ mi sɔle. I kai we nɔ́ tutuutu nɛ a de ngɛ sɔlemi ɔ mi mohu lɛɛ, se i kai bɔ nɛ sɔlemi ɔ ha nɛ i nu he ha. I nu he kaa Yehowa ngɛ mi dee ke, ‘I piɛɛ o he.’”​—Yes. 41:10, 13.

6. Mɛni nɛ nyɛmimɛ nɛ a ngɛ asafo ɔ mi ɔ ma nyɛ maa pee kɛ ye bua nyɛmimɛ kpahi? (Hyɛ foni ɔ.)

⁶ Nɔ́ nɛ ni kpahi ma nyɛ maa pee. Wa hyɛɔ asafo mi nikɔtɔma amɛ blɔ kaa mɛ lɛ e sa nɛ a ye bua nyɛmimɛ ɔmɛ ngɛ asafo ɔ mi. Se  Yehowa suɔ nɛ wɔ tsuo waa wo wa nyɛmimɛ ɔmɛ he wami nɛ waa ye bua mɛ. (Gal. 6:10) Ke nɔ ko be he wami nɛ wa pee nɔ́ nyafii ko po kɛ ye bua lɛ ɔ, e ma nyɛ maa wo lɛ he wami wawɛɛ. Jokuɛ wayoo ko ma nyɛ ma maa piɛɛ e fɔli a he kɛ ya slaa nyɛmi ko nɛ e be he wami. Yiheyo ko hu ma nyɛ ma ya he níhi loo e pee nɔ́ kpa ko kɛ ha nyɛmiyo ko. Nyɛmimɛ kpahi nɛ a ngɛ asafo ɔ mi ɔ hu ma nyɛ maa hoo ní kɛ ya ha nɔ ko nɛ e be he wami ngɛ e we mi. Ngɛ anɔkuale mi ɔ, ke hiɔ ko gbɛ fĩa a, asafo mi bimɛ ɔmɛ tsuo hia he wami womi. Enɛ ɔ he ɔ, ke a kpa asafo mi kpe ɔ, wa ma nyɛ maa mlɛ bɔɔ nɛ waa kɛ nyɛmimɛ ɔmɛ nɛ sɛɛ ní, ke wa ya Matsɛ Yemi Asa a nɔ jio, wa pee ngɛ fon loo videoconferencing nɔ jio. Asafo mi nikɔtɔma amɛ hu hia he wami womi. Ke hiɔ ko gbɛ fĩa a, asafo mi nikɔtɔmahi ngɔɔ be babauu kɛ yeɔ bua nyɛmimɛ ɔmɛ. Nyɛmimɛ komɛ ngmaa sɛ womi kɛ ya haa asafo mi nikɔtɔma nɛ ɔmɛ kɛ woɔ mɛ he wami. E hi kaa ‘wa maa ya nɔ nɛ waa hi wa sibi he wami woe, nɛ waa hi wa sibi fiae kɛ hi si mae.’​—1 Tɛs. 5:11.

7. Ke oslaa ko ba a, mɛni nyagba nɛ nihi kɛ ma nyɛ maa kpe?

⁷ Ke oslaa ko ba a, e ma nyɛ ma tsake nihi a si fɔfɔɛ kaa a fiaa hɛngmɛ. Nihi nɛ oslaa a ba a nɔ ɔ, a níhi kɛ a wehi ma nyɛ ma puɛ, nɛ a suɔli hu ma nyɛ ma gbo. Oslaahi kaa jã baa wa nyɛmimɛ ɔmɛ ekomɛ a nɔ. Mɛni wa ma nyɛ maa pee kɛ ye bua mɛ?

8. Mɛni nɛ asafo mi nikɔtɔmahi kɛ weku yihi ma nyɛ maa pee loko oslaa ko nɛ ba?

⁸ Nɔ́ nɛ asafo mi nikɔtɔmahi ma nyɛ maa pee. Asafo mi nikɔtɔmahi, nyɛɛ ye bua nyɛmimɛ ɔmɛ nɛ a dla a he kɛ fɔ si loko oslaa ko nɛ ba. Nyɛɛ bɔ mɔde kaa nyɛ maa ye bua asafo mi bi ɔmɛ tsuo nɛ a le níhi nɛ a maa pee kɛ po a he piɛ, kɛ bɔ nɛ a nine ma plɛ kɛ su nyɛ nɔ ke oslaa ko ba. Nyɛmiyo Margaret nɛ a wo e ta ngɛ ní kasemi nɛ sɛ enɛ ɔ hlami ɔ mi ɔ de ke: “Ngɛ asafo ɔ hiami nɔ́ ko nɛ asafo mi nikɔtɔma amɛ kɛ wɔ susu he ɔ mi ɔ, a bɔ wɔ kɔkɔ kaa loloolo ɔ, la a ngɛ ní puɛe. A de wɔ kaa, ke e ba mi kaa ma nikɔtɔma amɛ ke waa je wa we ɔmɛ a mi, aloo si fɔfɔɛ ɔ ba pee oslaa a, e sa nɛ waa je oya nɔuu.” Ga womi nɛ asafo mi nikɔtɔma amɛ kɛ ha wɔ ɔ ba ngɛ be nya, ejakaa otsi enuɔ se ɔ, la ko nɛ nya wa wawɛɛ bɔni ní puɛmi ekohu. Ke nyɛ ngɛ weku Mawu jami pee ɔ, weku yi ɔ kɛ weku ɔ ma nyɛ ma susu níhi nɛ weku mi bi ɔmɛ a ti nɔ fɛɛ nɔ ma nyɛ maa pee ke oslaa ko ba a he. Ke nyɛɛ kɛ nyɛ bimɛ ɔmɛ dla nyɛ he kɛ fɔ si nɛ oslaa ko ba a, e ngɛ heii kaa nyɛ be haoe tsɔ.

9. Mɛni asafo mi nikɔtɔmahi ma nyɛ maa pee kɛ ye bua nyɛmimɛ ɔmɛ loko oslaa ko nɛ ba, kɛ benɛ oslaa a ba a se?

⁹ Ke o ji fiɛɛmi yami kuu nɔ hyɛlɔ ɔ, koo mlɛ nɛ oslaa ko nɛ ba loko o bi nyɛmimɛ ɔmɛ nɛ a ngɛ o kuu ɔ mi nɛ a ha mo a fon nɔma nɛ ngɛ ní tsue. Moo ngma a nɔma amɛ kɛ fɔ si konɛ ke pee ɔ, o hyɛ kaa lɔ ɔ nɔuu nɛ a kɛ ngɛ ní tsue lo. Ke o pee jã nɛ oslaa ko ba a, o nine ma nyɛ maa su fiɛɛli tsuo nɛ a ngɛ o kuu ɔ mi ɔ a nɔ, nɛ o maa le nɔ́ nɛ he hia kaa a pee ha mɛ. Lɔ ɔ se ɔ, mo ha nikɔtɔmahi a kuu ɔ sanehi a he blɔ nya tolɔ ɔ lemi, kɛkɛ ɔ, lɛ hu e ma de kpɔ mi nɔ hyɛlɔ ɔ. Ke mɛ tsuo a pee kake kɛ tsu ní ɔ, a ma nyɛ maa ye bua nyɛmimɛ nɛ oslaa ba a nɔ ɔ wawɛɛ. Benɛ la a puɛ ní se ɔ, Margaret mɛ a kpɔ mi nɔ hyɛlɔ ɔ fɔ̃ nyɔ ngmlɛfia 36 sɔuu, nɛ e hyɛ konɛ asafo mi nikɔtɔma amɛ a nine nɛ su nyɛmimɛ maa pee 450 nɛ a je a we ɔmɛ a mi ɔ konɛ a ye bua mɛ. (2 Kor. 11:27) A nyɛ a nɛ a ye bua nihi tsuo nɛ a hia yemi kɛ buami ɔ, nɛ a ha mɛ he ko nɛ a hi.

10. Mɛni he je nɛ asafo mi nikɔtɔmahi naa slaami nɛ a kɛ woɔ nyɛmimɛ he wami ɔ kaa e he hia a? (Yohane 21:15)

¹⁰ Asafo mi nikɔtɔma amɛ a ní tsumi ɔ eko ji  kaa a maa da Baiblo ɔ nɔ kɛ wo nyɛmimɛ ɔmɛ he wami, nɛ a ye bua nyɛmimɛ nɛ a hao ɔ. (1 Pet. 5:2) Ke oslaa ko ba a, kekleekle ɔ, e sa nɛ asafo mi nikɔtɔma amɛ nɛ a hyɛ kaa nyɛmimɛ ɔmɛ tsuo ngɛ slɔkee nɛ a ngɛ niye ní, tade, kɛ hwɔ he. Se ngɛ nyɔhiɔ komɛ a se ɔ, loloolo ɔ, e he maa hia kaa a wo nyɛmimɛ ɔmɛ he wami kɛ je Baiblo ɔ mi, nɛ́ a je suɔmi kpo kɛ tsɔɔ mɛ. (Kane Yohane 21:15.) Nyɛminyumu Harold sɔmɔɔ kaa Asafo ɔ Ní Tsumi Kɔni ɔ Ajla Toli ɔmɛ a kpɛti nɔ kake. E kɛ nyɛmimɛ fuu nɛ a kɛ oslaahi kpe ɔ sɛɛ ní. E de ke: “E ma he be loko a ma je ngɛ a juɛmi mi. Bɔɔbɔɔbɔɔ ɔ, a ma nyɛ ma je ngɛ a juɛmi mi, se ke a suɔlɔ ko gbo, aloo a nɔ́ ko nɛ e he jua wa puɛ, aloo si fɔfɔɛ ko nɛ a ya je mi ɔ ngɛ oslaa a, eko ɔ, a hɛ be nɔ jee. Ke a kai ní nɛ ɔmɛ ɔ, e ma nyɛ ma ha nɛ a ma bɔni aywilɛho yemi ekohu. Se lɔ ɔ tsɔɔ we kaa a be hemi kɛ yemi. Jã nɛ nihi tsuo nɛ a kɛ si fɔfɔɛhi kaa jã kpe ɔ hu maa nu he.”

11. Mɛni yemi kɛ buami nɛ e sa nɛ a kɛ ha wekuhi?

¹¹ Asafo mi nikɔtɔmahi kɛ ga womi nɛ ji “nyɛɛ kɛ nihi nɛ a ngɛ ya foe ɔ nɛ fo” ɔ tsuɔ ní. (Rom. 12:15) E sa nɛ asafo mi nikɔtɔma amɛ nɛ a ha nɛ nihi nɛ a kɛ oslaa kpe ɔ nɛ a ná nɔ mi mami kaa loloolo ɔ, Yehowa suɔ mɛ, nɛ nyɛmimɛ ɔmɛ hu suɔ mɛ. E sa nɛ asafo mi nikɔtɔma amɛ nɛ a ye bua wekuhi nɛ a ya nɔ nɛ a sɔle, a kase ní, a ya asafo mi kpehi, nɛ a ya fiɛɛmi. A ma nyɛ maa wo fɔli he wami konɛ a ye bua a bimɛ ɔmɛ nɛ a ngɔ a juɛmi kɛ ma níhi nɛ oslaa be nyɛe ma puɛ ɔ a nɔ. Fɔli, nyɛ kai nyɛ bimɛ ɔmɛ kaa Yehowa ma nyɛ maa pee a Huɛ daa, nɛ e ma nyɛ maa ye bua mɛ hulɔ. Nyɛ ha nɛ a le kaa waa kɛ nyɛmimɛ nɛ a ngɛ je kɛ wɛ ɔ ji weku kake mi bimɛ, nɛ a pee klaalo kaa a maa ye bua mɛ.​—1 Pet. 2:17.

12. Ke oslaa ko ba a, mɛni ni kpahi ma nyɛ maa pee kɛ ye bua? (Hyɛ foni ɔ.)

¹² Nɔ́ nɛ ni kpahi ma nyɛ maa pee. Ke oslaa ko ba ngɛ he nɛ o ngɛ ɔ, mo bi asafo mi nikɔtɔma amɛ konɛ a tsɔɔ mo nɔ́ nɛ o ma nyɛ maa pee kɛ ye bua. Eko ɔ, o ma nyɛ ma ha nɛ nihi nɛ oslaa a ha nɛ a je a wehi a mi, loo nihi nɛ a ngɛ ye buae ɔ nɛ a ba to o we ɔ mi be bɔɔ. O ma nyɛ ma ha nyɛmimɛ nɛ oslaa a ba a nɔ ɔ niye ní loo ní kpahi nɛ hia mɛ. Ke he nɛ oslaa a ba ngɛ ɔ kɛ ɔ, loloolo ɔ, o ma nyɛ maa ye bua. Mɛni blɔ nɔ o maa gu kɛ pee jã? Moo sɔle ha nihi nɛ oslaa a ba a nɔ ɔ. (2 Kor. 1:8-11) O ma nyɛ ma ha yemi kɛ buami kɛ fĩ je kɛ wɛ ní tsumi ɔ se konɛ a kɛ tsu oslaa a he ní. (2 Kor. 8:2-5) Ke o ma nyɛ maa hia blɔ kɛ ya he nɛ oslaa a ba ngɛ ɔ, mo bi nikɔtɔma amɛ nɔ́ nɛ o ma nyɛ maa pee kɛ ye bua. Ke a fɔ̃ mo nine  kaa o ya ye bua a, a ma ha mo tsɔsemi nɛ maa ye bua mo konɛ a kɛ mo nɛ tsu ní ngɛ he nɛ o he hia ngɛ, kɛ be nɛ o he hia.

13. Mɛni nyagbahi nɛ wa nyɛmimɛ nɛ a ngɛ mahi nɛ a tsi wa ní tsumi ɔ nya ngɛ nɔ ɔ kɛ kpeɔ?

¹³ A waa wa nyɛmimɛ nɛ a ngɛ mahi nɛ a tsi wa ni tsumi ɔ nya ngɛ mi ɔ yi mi, nɛ lɔ ɔ ha nɛ si himi ɔ mi wa ha mɛ. Nyɛmimɛ nɛ a ngɛ ma nɛ ɔmɛ a nɔ ɔ kɛ sika he nyagba kpeɔ, a nuɔ hiɔ, nɛ a suɔli hu gboɔ. Se akɛnɛ a tsi wa ní tsumi ɔ nya ngɛ he nɛ a ngɛ ɔ he je ɔ, e be gbɔjɔɔ kaa asafo mi nikɔtɔma amɛ ma ya slaa mɛ nɛ a kɛ nihi nɛ hia he wami womi ɔ nɛ sɛɛ ní. Jã ji bɔ nɛ e ba ngɛ Andrei nɛ a wo e ta ngɛ ní kasemi nɛ sɛ enɛ ɔ hlami ɔ mi ɔ blɔ fa mi. Nyɛmiyo ko ngɛ e fiɛɛmi yami kuu ɔ mi nɛ e kɛ sika he nyagba ngɛ kpee. Nyɛmiyo nɛ ɔ kɛ lɔle hu ya ná oslaa. E he hia nɛ a pee lɛ operation slɔɔtoslɔɔtohi, nɛ e be nyɛe ma tsu ní hulɔ. E ngɛ mi kaa a tsi wa ní tsumi ɔ nya ngɛ he a ngɛ ɔ, nɛ COVID-19 hiɔ ɔ hu gbɛ fĩa mohu lɛɛ, se nyɛmimɛ ɔmɛ pee nɔ́ nɛ a ma nyɛ kɛ ye bua lɛ. Yehowa na nɔ́ nɛ a pee ɔ tsuo.

14. Mɛni nɔ hyɛmi nɔ́ nɛ asafo mi nikɔtɔmahi ma nyɛ maa pee kɛ tsɔɔ kaa a ngɔ a hɛ kɛ fɔ Yehowa nɔ?

¹⁴ Nɔ́ nɛ asafo mi nikɔtɔmahi ma nyɛ maa pee. Andrei sɔle nɛ e pee nɔ́ nɛ e ma nyɛ. Mɛni blɔ nɔ Yehowa gu kɛ ha e sɔlemi ɔ heto? Yehowa ha nɛ nyɛmimɛ nɛ a ngɛ asafo ɔ mi, nɛ a ma nyɛ maa ye bua nyɛmiyo ɔ ya pee jã. Ni komɛ ngɔɔ a lɔle kɛ ya woɔ lɛ kɛ yaa hiɔ tsami he. Ni komɛ hu haa lɛ sika. Yehowa wo mɛ he wami nɛ a pee nɔ́ nɛ a ma nyɛ. Yehowa ha nɛ nyɛmimɛ nɛ a ngɛ asafo ɔ mi ɔ ya pee nɔ́ fɛɛ nɔ́ nɛ e hia a kɛ ha lɛ, nɛ e jɔɔ mɛ ngɛ a kake peemi kɛ kã nɛ a je kpo ɔ he. (Heb. 13:16) Asafo mi nikɔtɔmahi, ke a tsi wa ní tsumi ɔ nya a, nyɛ ha nɛ ni kpahi nɛ a ye bua nyɛ. (Yer. 36:5, 6) Nɔ́ nɛ he hia pe kulaa nɛ nyɛ maa pee ji, nɛ́ nyɛ maa ngɔ nyɛ hɛ kɛ fɔ̃ Yehowa nɔ. E ma nyɛ maa ye bua nyɛ konɛ nyɛ tsu nyɛmimɛ ɔmɛ a hiami níhi a he ní kɛ ha mɛ.

15. Ke nihi ngɛ wɔ yi mi wae ɔ, kɛ wa maa pee kɛ baa kake peemi nɛ ngɛ wa kpɛti ɔ yi ha kɛɛ?

¹⁵ Nɔ́ nɛ ni kpahi ma nyɛ maa pee. Ke a tsi wa ní tsumi ɔ nya a, eko ɔ, a ma gba wa mi kɛ wo kuu tsɔwitsɔwihi a mi. Enɛ ɔ he ɔ, e he hia wawɛɛ kaa wa ma ha nɛ tue mi jɔmi nɛ hi waa kɛ wa nyɛmimɛ ɔmɛ wa kpɛti amlɔ nɛ ɔ. Nyɛ ko ngmɛ Satan blɔ nɛ e gba nyɛ mi. Ke pɛ ba waa kɛ nyɛmi ko wa kpɛti ɔ, e sa nɛ wa dla wa kpɛti oya nɔuu, aloo wa ma wa hɛ kɛ fɔ̃ nɔ. (Abɛ 19:11; Efe. 4:26) E sa nɛ waa pee klaalo kaa wa maa ye bua wa nyɛmimɛ ɔmɛ. (Tito 3:14)  Yemi kɛ buami nɛ nyɛmimɛ kpahi kɛ ha nyɛmiyo ɔ ná ni kpahi nɛ a ngɛ e fiɛɛmi yami kuu ɔ mi ɔ a nɔ he wami. Lɔ ɔ ha nɛ a hɛ kɛ su a sibi a he wawɛɛ, nɛ a pee kaa weku.​—La 133:1.

16. Ngɛ Kolose Bi 4:3, 18 ɔ nya a, mɛni wa ma nyɛ maa pee kɛ ye bua wa nyɛmimɛ nɛ a ngɛ mɛ yi mi wae ɔ?

¹⁶ E ngɛ mi kaa amlaalo ɔ tsi wa ní tsumi ɔ nya ngɛ ma komɛ a nɔ mohu lɛɛ, se wa nyɛmimɛ akpehi abɔ ngɛ Yehowa sɔmɔe ngɛ jamɛ a ma amɛ a nɔ. A wo a kpɛti ni komɛ tsu ngɛ a hemi kɛ yemi ɔ he je. Wa ma nyɛ maa sɔle kɛ ha mɛ kɛ a weku li. Nyɛmimɛ komɛ pee kã kɛ ngɛ nyɛmimɛ nɛ a wo mɛ tsu ɔ ye buae, e ngɛ mi kaa a ma nyɛ maa wo mɛ hu tsu mohu lɛɛ. Wa ma nyɛ maa sɔle kɛ ha nihi nɛ a pee kã kɛ ngɛ nyɛmimɛ nɛ ɔmɛ ye buae ɔ. A woɔ nyɛmimɛ nɛ a wo mɛ tsu ɔ he wami konɛ a ya nɔ nɛ a ngɔ a hɛ kɛ fɔ Yehowa nɔ, a haa mɛ a hiami níhi, nɛ a fãa a he ngɛ kojomi he. c (Kane Kolose Bi 4:3, 18.) O hɛ nɛ ko je nɔ kaa o sɔlemi ɔ ma nyɛ maa ye bua nyɛmimɛ nɛ ɔmɛ tsuo!​—2 Tɛs. 3:1, 2; 1 Tim. 2:1, 2.

17. Mɛni o ma nyɛ maa pee amlɔ nɛ ɔ kɛ dla o he kɛ ha yi mi wami?

¹⁷ O kɛ o weku ɔ ma nyɛ ma dla nyɛ he kɛ fɔ si amlɔ nɛ ɔ kɛ ha yi mi wami. (Níts. 14:22) Ko susu ní yayahi nɛ ma nyɛ maa ba a he. Mohu ɔ, ha nɛ huɛ bɔmi nɛ ngɛ o kɛ Yehowa nyɛ kpɛti ɔ mi nɛ wa, nɛ o ye bua o bimɛ ɔmɛ nɛ mɛ hu a pee jã. Be fɛɛ be nɛ o maa hao ɔ, mo de Mawu nɔ́ fɛɛ nɔ́ nɛ ngɛ o tsui mi. (La 62:7, 8) Nyɛɛ pee kake kaa weku kɛ susu yi mi tomihi a he je nɛ nyɛ ma nyɛ maa ngɔ nyɛ hɛ kɛ fɔ Yehowa nɔ ɔ he. d Kaa bɔ nɛ ke o kɛ o bimɛ ɔmɛ dla nyɛ he kɛ to oslaa nɛ nyɛ ma ná he se ɔ, jã kɛ̃ nɛ ke nyɛ dla nyɛ he kɛ to loko nyɛɛ kɛ yi mi wami ko kpe ɔ, lɔ ɔ hu maa ye bua nyɛ. Ke e ba jã a, a maa pee kã nɛ a maa to a tsui si ejakaa o tsɔɔ mɛ kaa a ngɔ a hɛ kɛ fɔ Yehowa nɔ.

18. Mɛni blɔ wa ngɛ hyɛe hwɔɔ se?

¹⁸ Mawu tue mi jɔmi ɔ ha nɛ wa ngɛ slɔkee. (Filip. 4:6, 7) Enɛ ɔ he ɔ, mwɔnɛ ɔ, wa nuɔ hiɔ, nɛ waa kɛ oslaahi kɛ yi mi wami hu kpeɔ lɛɛ, se ngɛ enɛ ɔmɛ tsuo se ɔ, Yehowa guɔ e tue mi jɔmi ɔ nɔ kɛ toɔ wa tsui nɔ nine. E haa nɛ asafo mi nikɔtɔma amɛ tsuɔ ní wawɛɛ ngɛ asafo ɔ mi nɛ a woɔ wɔ he wami. E ha wɔ tsuo he blɔ kaa waa ye bua wa sibi hulɔ. Tue mi jɔmi nɛ wa ngɛ amlɔ nɛ ɔ maa ye bua wɔ konɛ wa dla wa he kɛ ha ka nguahi nɛ waa kɛ maa kpe, nɛ́ “amanehlu ngua” a hu piɛɛ he ɔ. (Mat. 24:21) Enɛ ɔ he ɔ, e sa nɛ waa ya nɔ nɛ waa kɛ nihi nɛ hi si ngɛ tue mi jɔmi mi, nɛ waa ye bua ni kpahi nɛ mɛ hu a pee jã. Se ngɛ amanehlu ngua a se ɔ, waa kɛ nyagba nguahi nɛ a haa nɛ wa yeɔ tsui ɔ be kpee hu. Wa ma ná tue mi jɔmi nɛ́ Yehowa wo si ke e ma ha wɔ ɔ​—tue mi jɔmi nitsɛnitsɛ nɛ e se be poe gblegbleegble.​—Yes. 26:3, 4.