1-3. (a) Mɛni he je nɛ wa ngɛ nɔ mi mami kaa wa ma nyɛ maa pee Mawu huɛmɛ ɔ? (b) Mɛnɔmɛ a he wa ma susu ngɛ munyu nɛ ɔ mi?

BAIBLO Ɔ de si etɛ kaa Abraham ji Mawu huɛ. (2 Kronika 20:7; Yesaya 41:8; Yakobo 2:23) Lɛ pɛ nɛ Baiblo ɔ tsɛ tɛ̃ɛ kaa Mawu huɛ. Anɛ enɛ ɔ tsɔɔ kaa Abraham pɛ ji adesa nɛ pee Yehowa huɛ lo? Dɛbi. Baiblo ɔ tsɔɔ kaa wɔ tsuo wa ma nyɛ maa pee Mawu huɛmɛ.

² Ngɛ Baiblo ɔ mi ɔ, a tu nyumuhi kɛ yihi anɔkualetsɛmɛ fuu a he munyu kaa a ye Yehowa gbeye, a he lɛ ye, nɛ a ba pee e huɛmɛ nɛ nyu bi ngɛ e kɛ mɛ a kpɛti. (Kane La 25:14.) A piɛɛ “nimli kpekpemi nitsɛnitsɛ kaa bɔku” nɛ bɔfo Paulo tu a he munyu ɔ he. Mawu huɛmɛ ji nimli nɛ ɔmɛ tsuo.​—Hebri Bi 12:1.

³ Nyɛ ha nɛ wa susu Yehowa huɛmɛ etɛ nɛ a tu a he munyu ngɛ Baiblo ɔ mi ɔ a he saminya nɛ waa hyɛ: (1) Yalɔyo wayoo ko nɛ e je Moab nɛ a tsɛɛ lɛ ke Rut, (2) Yuda matsɛ ko nɛ e ye anɔkuale nɛ a tsɛɛ lɛ ke Hezekia, kɛ (3) Yesu nyɛ Maria nɛ e baa e he si ɔ. Mɛni wa ma nyɛ maa kase ngɛ nɔ́ nɛ a ti nɔ  fɛɛ nɔ pee nɛ lɔ ɔ ha nɛ e ba pee Mawu huɛ ɔ he?

4, 5. Mɛni sane ko nɛ mi jiɔ nɛ Rut mwɔ e yi mi kpɔ ngɛ he, nɛ mɛni he je nɛ e be gbɔjɔɔ ɔ? (Moo hyɛ foni nɛ ngɛ ní kasemi ɔ sisije ɔ.)

⁴ Naomi kɛ e binyumu ɔmɛ a yi ɔmɛ nɛ a tsɛɛ mɛ ke Rut kɛ Orpa a je Moab nɛ a ngɛ nyɛɛe kɛ yaa Israel. E ji blɔ gagaaga. Benɛ a nyɛɛ kɛ su he ko ɔ, Orpa ma e juɛmi nya si kaa e maa kpale kɛ ho e ma mi ya ngɛ Moab. Se Naomi mwɔ e yi mi kpɔ kaa e maa ya Israel, he nɛ e je ɔ. Mɛni Rut ma e juɛmi nya si kaa e maa pee? E biɔ nɛ e ma e juɛmi nya si ngɛ sane ko nɛ mi jiɔ he. Anɛ e maa kpale kɛ ho e weku li a ngɔ ya ngɛ Moab, loo e maa mɛtɛ e nganyɛ ɔ he kɛ ho Betlehem ya?​—Rut 1:1-8, 14.

⁵ Rut weku li ngɛ Moab. Enɛ ɔ he ɔ, e ma nyɛ maa kpale kɛ ho a ngɔ ya konɛ eko ɔ, a hyɛ e nɔ. Moab no ji lɛ, Moab gbi ɔ ji e je gbi, nɛ e le Moab kusumihi hulɔ. Naomi wui Rut si kaa e ma ná si himi ɔ gbɔjɔɔ ngɛ Betlehem. Naomi li kaa Rut ma ya na nyumu ko nɛ e kɛ lɛ maa hi si aloo e ma ná he ko nɛ e maa hi. Enɛ ɔ he ɔ Naomi de lɛ ke e kpale kɛ ho Moab ya. Kaa bɔ nɛ wa le ɔ, Orpa ‘kpale e se kɛ ho e weku li kɛ e Mawu ɔmɛ a ngɔ ya.’ (Rut 1:9-15) Se Rut lɛɛ e mwɔ e yi mi kpɔ kaa e be kpalee kɛ ya e weku li kɛ lakpa mawu ɔmɛ a ngɔ ya.

6. (a) Mɛni juɛmi nɛ da nɛ Rut pee? (b) Mɛni he je nɛ Boaz tu Rut he munyu kaa e ba sa we ngɛ Yehowa pɛli sisi ɔ?

⁶ Eko ɔ, Rut kase Yehowa he ní ngɛ e huno ɔ loo Naomi ngɔ. E kase kaa Yehowa be kaa Moab mawu ɔmɛ. E suɔ Yehowa nɛ e le kaa e sa nɛ e je e tsui mi kɛ ja lɛ. Enɛ ɔ he ɔ, Rut pee juɛmi nɛ da. E de Naomi ke: “O je kɛ wɛ maa pee imi hu ye je kɛ wɛ, nɛ o Mawu maa pee ye Mawu.” (Rut 1:16) Ke wa susu suɔmi nɛ Rut je kpo kɛ ha Naomi ɔ he ɔ, e taa wa tsui he wawɛɛ. Se nɔ́ nɛ wa bua jɔ he wawɛɛ ji suɔmi nɛ Rut ná kɛ ha Yehowa a. Pee se ɔ, Boaz hu to suɔmi nɛ ɔ he hɛ nɛ e je e yi kaa e ‘ba sa we ngɛ Yehowa ngɔ.’ (Kane Rut 2:12.) Eko ɔ, munyu nɛ Boaz tu ɔ ha nɛ wa kai bɔ nɛ lohwe pɛlitsɛ ya saa we ngɛ e nyɛ pɛli sisi ɔ. (La 36:7; 91:1-4) Jã kɛ̃ nɛ Yehowa hu je suɔmi mi kɛ po Rut he piɛ nɛ e jɔɔ lɛ, akɛnɛ e ngɛ hemi kɛ yemi ngɛ Yehowa mi ɔ he je. Rut pia we e he hyɛ kaa e mwɔ yi mi kpɔ ko kaa jã.

7. Mɛni ma nyɛ maa ye bua nihi nɛ a ngɛ a nane si gblae kaa a maa jɔɔ a he nɔ ha Yehowa a?

⁷ Nihi fuu kaseɔ Yehowa he ní, se a pee we a juɛmi kaa a maa sa we ngɛ e ngɔ. A gblaa a nane si kaa a maa jɔɔ a wami nɔ ha lɛ nɛ a baptisi mɛ. Ke e peeɔ mo jã a, lɛɛ mo susu he nɛ o hyɛ kaa mɛni lɛ ha nɛ o ngɛ o nane si gblae ɔ. Nɔ fɛɛ nɔ sɔmɔɔ mawu ko kɛ̃. (Yoshua 24:15) Juɛmi ngɛ mi kaa wa maa mwɔ wa yi mi kpɔ kaa wa ma sɔmɔ anɔkuale Mawu ɔ. Ke o jɔɔ o he nɔ ha Yehowa a, lɔ ɔ tsɔɔ kaa o ngɛ hemi kɛ yemi kaa e maa pee wesa he ha mo. Ke o pee jã a, Yehowa maa ye bua mo konɛ o nyɛ nɛ o sɔmɔ lɛ ngɛ haomihi nɛ o kɛ maa kpe ɔ tsuo se. Jã nɛ Mawu pee ha Rut.

8. Mo de wɔ Hezekia he sane.

⁸ E slo Hezekia ngɛ Rut he. Hezekia lɛɛ Israel no ji lɛ. Israel ma a ji ma ko nɛ Mawu hla kɛ ha e he. Se pi Israel bi ɔmɛ tsuo nɛ a ye anɔkuale. Hezekia tsɛ nɛ ji Matsɛ Ahaz ɔ ji yiwutsotsɛ. E je we bumi  kpo kɛ ha Mawu sɔlemi we ɔ, nɛ e plɛ nihi a yi mi nɛ a ja mawu kpahi. Ahaz sã Hezekia nyɛminyumu ɔmɛ ekomɛ hɛngmengmle kɛ ha lakpa mawu ko. Níhi nɛ Hezekia na ngɛ e jokuɛ mi ɔ ngɛ gbeye!​—2 Matsɛmɛ 16:2-4, 10-17; 2 Kronika 28:1-3.

9, 10. (a) Mɛni he je nɛ eko ɔ, e ko yi kaa Hezekia mi mi ma fu ɔ? (b) Mɛni he je nɛ e sɛ nɛ wa mi mi nɛ fu Mawu ɔ? (d) Mɛni he je nɛ e sɛ nɛ wa susu kaa weku mi nɛ wa je lɛ maa tsɔɔ kaa wa maa pee nimli kpakpahi loo nimli yayamihi ɔ?

⁹ Nɔ hyɛmi nɔ́ yaya nɛ Matsɛ Ahaz pee ɔ ma nyɛ ma ha nɛ Hezekia nɛ ná Yehowa he abofu. Mwɔnɛ ɔ, nyagbahi nɛ nihi kɛ ngɛ kpee ɔ sui nɔ́ nɛ Hezekia kɛ kpe ɔ, se a susu kaa ke a ná Yehowa loo Yehowa asafo ɔ he “abofu” ɔ, tɔmi ko be he. (Abɛ 19:3) Ni komɛ hu susuɔ kaa weku mi nɛ a je kɛ bɔ nɛ a fɔli plɛ kɛ tsɔse mɛ ha a ma nyɛ ma ha nɛ a ba a je mi kaa a fɔli ɔmɛ pɛpɛɛpɛ. (Ezekiel 18:2, 3) Se anɛ susumi nɛ ɔmɛ da lo?

¹⁰ Bɔ nɛ Hezekia hi si ha a ha nɛ wa na kaa susumi nɛ ɔ dɛ kulaa! Nɔ́ ko be nɛ wa ma nyɛ maa da nɔ kɛ ná Yehowa he abofu kɔkɔɔkɔ. Tsa pi Mawu nɛ e ngɔɔ haomihi kɛ baa nihi a nɔ. (Hiob 34:10) E ngɛ mi kaa fɔli ma nyɛ maa tsɔse a bimɛ konɛ a pee nɔ́ kpakpa loo nɔ́ yaya. (Abɛ 22:6; Kolose Bi 3:21) Se enɛ ɔ tsɔɔ we kaa weku mi nɛ wa je ɔ lɛ maa tsɔɔ nɔ pɔtɛɛ nɛ wa ma ji. Mɛni he je? Ejakaa, Yehowa ha wɔ nike ní ko. Lɔ ɔ ji he blɔ nɛ wa ngɛ kaa wɔ nitsɛmɛ wa ma nyɛ maa mwɔ wa yi mi kpɔ ngɛ níhi a he. Enɛ ɔ tsɔɔ kaa wa ma nyɛ maa hla kaa wa maa pee nɔ́ nɛ da loo nɔ́ nɛ dɛ. (5 Mose 30:19) Kɛ Hezekia ngɔ nike ní nɛ he jua wa nɛ ɔ kɛ tsu ní ha kɛɛ?

11. Mɛni he je nɛ Hezekia ji Yuda matsɛmɛ ɔmɛ nɛ a pee nɔ́ kpakpa a kpɛti nɔ kake ɔ?

¹¹ E ngɛ mi kaa Hezekia tsɛ ji Yuda matsɛmɛ ɔmɛ nɛ a bɛ a je mi saminya a kpɛti nɔ kake mohu lɛɛ, se Hezekia lɛɛ e ji Yuda matsɛmɛ ɔmɛ nɛ a pee nɔ́ kpakpa a kpɛti nɔ kake. (Kane 2 Matsɛmɛ 18:5, 6.) E ma e juɛmi nya si kaa e be e tsɛ ɔ nɔ hyɛmi nɔ́ yaya a kasee. Mohu ɔ, e fia e pɛɛ si kaa e maa bu Yehowa gbali ɔmɛ tue. Gbali nɛ ɔmɛ a ti ni komɛ ji Yesaya, Mika, kɛ Hosea. E bu ga womihi kɛ tsɔsemi nɛ a kɛ ha lɛ ɔ tue saminya. Jã nɛ e pee ɔ ye bua lɛ nɛ e nyɛ nɛ e dla níhi fuu nɛ e tsɛ ɔ puɛ ɔ. E tsukɔ sɔlemi we ɔ he, e kpa Mawu pɛɛ konɛ e ngɔ ni ɔmɛ a he  yayami ɔmɛ kɛ pa mɛ, nɛ e ku amagahi tsuo nɛ ngɛ ma amɛ a mi ɔ. (2 Kronika 29:1-11, 18-24; 31:1) Pee se benɛ Asiria matsɛ Senakerib wo Yerusalem bi ɔmɛ a he gbeye kaa e ma ba tua mɛ ɔ, Hezekia pee kã nɛ e tsɔɔ kaa e ngɛ hemi kɛ yemi nɛ mi wa. E ngɛ hɛ kɛ nɔ fɔmi kaa Yehowa maa po e we bi a he piɛ, nɛ e wo e ma mi bi ɔmɛ he wami. (2 Kronika 32:7, 8) Be ko ɔ, Hezekia ba wo e he nɔ, se benɛ Yehowa tsɔse lɛ ɔ, e ba e he si. (2 Kronika 32:24-26) E ngɛ heii kaa, e sa nɛ waa kase nɔ hyɛmi nɔ́ kpakpa nɛ Hezekia pee ɔ. E ngmɛ́ blɔ nɛ weku mi nɛ e je ɔ nɛ puɛ e si himi. Mohu ɔ, e tsɔɔ kaa Yehowa huɛ ji lɛ.

12. Mwɔnɛ ɔ, mɛni blɔ nɔ nɛ nihi fuu tsɔɔ kaa a ji Yehowa huɛmɛ kaa bɔ nɛ Hezekia pee ɔ?

¹² Nihi nɛ a ngɛ je ɔ mi mwɔnɛ ɔ je we suɔmi kpo, nɛ a yi mi wa. Nihi fuu hu ngɛ nɛ kɛ je a jokuɛwi a si ɔ, a fɔli je we suɔmi kpo kɛ tsɔɔ mɛ. (2 Timoteo 3:1-5) E ngɛ mi kaa Kristofohi fuu ngɛ nɛ a kɛ si himi nɛ wa kpe ngɛ weku nɛ a wa ngɛ mi ɔ mi mohu lɛɛ, se a ma a juɛmi nya si kaa a kɛ Yehowa maa pee huɛ. Kaa bɔ nɛ Hezekia pee ɔ, mɛ hu a tsɔɔ kaa pi weku nɛ nɔ ko je mi ɔ nɛ maa tsɔɔ kaa nɔ ɔ ma ba pee nɔmlɔ kpakpa loo nɔmlɔ yaya hwɔɔ se. Mawu ha wɔ he blɔ konɛ wɔ nitsɛmɛ waa hla kaa wa maa pee nɔ́ nɛ wa suɔ, enɛ ɔ he ɔ, wa ma nyɛ maa hla kaa wa ma sɔmɔ lɛ nɛ waa wo e hɛ mi nyami kaa bɔ nɛ Hezekia pee ɔ.

13, 14. Mɛni he je nɛ eko ɔ, ní tsumi nɛ a ha Maria a ngɛ kaa nɔ́ ko nɛ he wa wawɛɛ ɔ, se kɛ e pee e ní ngɛ nɔ́ nɛ bɔfo Gabriel de lɛ ɔ he ha kɛɛ?

¹³ Jehahi babauu ngɛ Hezekia gbenɔ se ɔ, zangmayo ko nɛ e baa e he si nɛ a tsɛɛ lɛ ke Maria a hu kɛ Yehowa pee huɛ. Huɛ bɔmi klɛdɛɛ ko hi e kɛ Yehowa a kpɛti. Yehowa ha lɛ ní tsumi klɛdɛɛ ko. E maa ngɔ hɔ, nɛ e ma fɔ Mawu Bi ɔ, nɛ e maa hyɛ lɛ! E ngɛ heii kaa Yehowa suɔ Maria nɛ e ngɛ hɛ kɛ nɔ fɔmi ngɛ e mi, enɛ ɔ he je nɛ e wo e hɛ mi nyami kaa kikɛ ɔ nɛ. Se benɛ a de lɛ ní tsumi nɛ e ma tsu ɔ, kɛ e pee e ní ha kɛɛ?

¹⁴ Wa pɔɔ demi ke Maria ná he blɔ ngua. Se mɛni ji ní komɛ nɛ eko ɔ, e wo e he gbeye? Kaa nɔ hyɛmi nɔ́ ɔ, bɔfo Gabriel de lɛ ke e maa ngɔ hɔ be mi nɛ e kɛ nyumu ko ná we bɔmi. Se bɔfo Gabriel ya de we Maria weku li kɛ e kpɔ mi bimɛ ɔmɛ bɔ nɛ Maria ma plɛ kɛ ngɔ hɔ ɔ ha. Kɛ a ma susu ngɛ e he ha kɛɛ? Mɛni blɔ nɔ e maa gu kɛ tsɔɔ Yosef níhi a nya konɛ e nu sisi kaa e ji e se? Blɔ nya ní tsumi agbo hu fɔɔ si ngɛ e nɔ kaa e ma tsɔse Mawu Bi ɔ kaa adesa nɛ e maa hyɛ e nɔ! Wa li níhi tsuo nɛ wo Maria he gbeye, se wa le nɔ́ nɛ e de benɛ bɔfo Gabriel kɛ lɛ  tu munyu ta a. E de ke: “Nyɔmtsɛ ɔ mawayo ji mi; bɔ nɛ e de ɔ, e ba mi jã.”​—Luka 1:26-38.

15. Mɛni he je nɛ Maria hemi kɛ yemi ɔ sa kadimi ɔ?

¹⁵ Maria hemi kɛ yemi ɔ sa kadimi wawɛɛ nitsɛ! E pee klaalo kaa e maa pee nɔ́ tsuaa nɔ́ nɛ a ma de lɛ ɔ kaa bɔ nɛ mawayo peeɔ ɔ. E ngɛ hɛ kɛ nɔ fɔmi ngɛ Yehowa mi kaa e maa hyɛ e nɔ nɛ e maa po e he piɛ. Kɛ Maria plɛ kɛ ná hemi kɛ yemi nɛ mi wa nɛ ɔ ha kɛɛ? A fɔ we wɔ kɛ hemi kɛ yemi. Ja wa bɔ wa he mɔde, nɛ Mawu hu jɔɔ wa mɔde bɔmi ɔ nɔ loko wa ma ná hemi kɛ yemi. (Galatia Bi 5:22; Efeso Bi 2:8) Maria bɔ mɔde wawɛɛ kaa e ma ha nɛ e hemi kɛ yemi ɔ mi nɛ wa. Kɛ wa plɛ kɛ le enɛ ɔ ha kɛɛ? Nyɛ ha nɛ wa susu bɔ nɛ e bu tue ha, kɛ níhi nɛ e tu a he munyu ɔ he nɛ waa hyɛ.

16. Mɛni tsɔɔ kaa Maria buɔ munyu tue saminya?

¹⁶ Bɔ nɛ Maria bu tue ha. Baiblo ɔ de ke waa “bu tue” nɛ wa “he ko sɔ kɛ tu munyu.” (Yakobo 1:19) Maria buɔ munyu tue saminya. Baiblo ɔ tsɔɔ kaa e bu níhi nɛ a de lɛ ɔ tue saminya, titli ɔ, níhi nɛ kɔɔ Yehowa he ɔ. E ngɔ be kɛ susu níhi nɛ a he hia nɛ ɔmɛ a he. Nɔ hyɛmi nɔ́ kake ji kaa benɛ e fɔ Yesu ɔ, bɔfo ko ya de to hyɛli komɛ nɔ́ ko, nɛ benɛ to hyɛli ɔmɛ ba bɔ Maria amaniɛ ɔ, e bu mɛ tue. Pee se ɔ, benɛ Yesu ye jeha 12 ɔ, e de nɔ́ ko nɛ pee Maria nyakpɛ. Ngɛ si fɔfɔɛ enyɔ nɛ ɔmɛ tsuo a mi ɔ, Maria bu tue, e kai, nɛ e susu níhi nɛ e nu ɔmɛ a he.​—Kane Luka 2:16-19, 49, 51.

17. Munyuhi nɛ Maria tu ɔ ha nɛ wa kase mɛni ngɛ e he?

¹⁷ Níhi nɛ Maria tu he munyu. Baiblo ɔ de we wɔ níhi fuu ngɛ nɔ́ nɛ Maria de ɔ he. A ngma Maria munyu nɛ e tu nɛ e nya kɛ pe kulaa a ngɛ Luka 1:46-55. Munyu nɛ ɔmɛ tsɔɔ kaa Maria le Hebri Ngmami ɔ saminya. Mɛni he je? Maria munyu ɔmɛ kɛ sɔlemi nɛ Samuel yayo Hana sɔle ɔ kɔ. (1 Samuel 2:1-10) E ngɛ kaa nɔ́ nɛ Maria tsɛ Ngmami ɔ se maa pee si 20 sɔuu ngɛ munyu nɛ e tu ɔ mi. E ngɛ heii kaa e suɔ nɛ e maa tu anɔkualehi nɛ e kase ngɛ e Huɛ nɛ pe kulaa nɛ ji Yehowa a he munyu.

18. Mɛni blɔhi a nɔ nɛ wa ma nyɛ maa kase Maria hemi kɛ yemi ɔ ngɛ?

¹⁸ Eko ɔ, wɔ hu Yehowa ma nyɛ ma ha wɔ ní tsumi ngɛ be komɛ a mi kaa bɔ nɛ e ha Maria a. Se wa ma nyɛ maa nu he kaa ní tsumi ɔ kle pe wɔ. Ke e ba jã a, nyɛ ha nɛ waa kase Maria nɔ hyɛmi nɔ́ ɔ konɛ waa je he si bami mi kɛ kplɛɛ ní tsumi ɔ nɔ, nɛ waa ngɔ wa hɛ ngɔ fɔ Yehowa nɔ kaa e maa ye bua wɔ. Wa ma nyɛ maa kase Maria hemi kɛ yemi ɔ konɛ waa bu Yehowa tue saminya, nɛ wa susu níhi nɛ e de wɔ kɛ e yi mi tomihi a he. Kɛkɛ ɔ, wa ma nyɛ maa ngɔ bua jɔmi kɛ de ni kpahi níhi nɛ wa kase ɔ.​—La 77:11, 12; Luka 8:18; Roma Bi 10:15.

19. Ke wa kase nɔ hyɛmi ní kpakpahi nɛ nihi pee kɛ tsɔɔ kaa a ngɛ hemi kɛ yemi ɔ, mɛni wa ma nyɛ maa hyɛ blɔ kaa wa ma ná?

¹⁹ E ngɛ heii kaa Rut, Hezekia, kɛ Maria tsuo ji Yehowa huɛmɛ kaa bɔ nɛ Abraham hu ji ɔ. A piɛɛ “nimli kpekpemi nitsɛnitsɛ kaa bɔku” nɛ a ná he blɔ nɛ a pee Mawu huɛmɛ ɔ a he. Nyɛ ha nɛ waa ya nɔ nɛ waa kase a hemi kɛ yemi ɔ. (Hebri Bi 6:11, 12) Ke wa pee jã a, wa ma nyɛ maa hyɛ blɔ kaa waa kɛ Yehowa maa pee huɛ kɛ ya neneene!