MƐNI ligbi nɛ o bua jɔ pe kulaa ngɛ o si himi mi? Ligbi nɛ o sɛ gba si himi mi ɔ lo, aloo ligbi nɛ o fɔ o kekleekle bi ɔ? Aloo ligbi nɛ a baptisi mo ɔ? Eko ɔ, ligbi nɛ a baptisi mo ɔ ji ligbi nɛ he hia mo pe kulaa, nɛ jamɛ a ligbi ɔ ji ligbi nɛ o bua jɔ pe kulaa. Ngɛ jamɛ a ligbi ɔ nɔ ɔ, nyɛmimɛ nyumuhi kɛ yihi tsuo a bua jɔ kaa o ma nɔ mi kaa o suɔ Mawu kɛ o tsui, kɛ o klaa, kɛ o juɛmi, kɛ o he wami tsuo!​—Marko 12:30.

Eko ɔ, kɛ je be nɛ a baptisi mo kɛ ba si piɔ ɔ, o náa bua jɔmi ngɛ Yehowa sɔmɔmi mi. Se fiɛɛli komɛ be bua jɔmi hu kaa be ko nɛ be ɔ. Mɛni he je nɛ e ba jã a? Mɛni yi mi tomihi a he je nɛ e sa kaa waa ya nɔ nɛ wa sɔmɔ Yehowa kɛ bua jɔmi ɔ?

Matsɛ Yemi sɛ gbi ɔ haa wa náa bua jɔmi wawɛɛ. Mɛni he je? Ejakaa Yehowa wo wɔ si kaa e be kɛe nɛ Matsɛ Yemi ɔ ma kpata je yaya nɛ ɔ hɛ mi, nɛ e maa ngɔ Mawu je ehe ɔ kɛ ba. Zefania 1:14 ɔ deɔ wɔ ke: ‘Jamɛ a ligbi nguaa a nɛ Yehowa maa gbla e ma a tue ɔ ma kɛ fo; e su si ta!’ Se ke wa susu kaa wa ngɛ mlɛe be kɛkɛɛ nɛ nyagbe ɔ bɛ ɔ, lɔ ɔ be hae nɛ wa bua nɛ jɔ hu kaa be ko nɛ be ɔ. Enɛ ɔ ma ha nɛ wa ma gbɔjɔ sɔmɔmi nɛ waa kɛ haa Mawu ɔ mi.​—Abɛ 13:12.

Ke waa kɛ wa nyɛmimɛ nyumuhi kɛ yihi bɔɔ ɔ, a woɔ wɔ he wami konɛ waa ya nɔ nɛ wa sɔmɔ Yehowa kɛ bua jɔmi. Yehowa we bi baa a je mi saminya. Eko ɔ, lɔ ɔ lɛ gbla wɔ kɛ ba anɔkuale jami ɔ mi, nɛ wa bɔni Mawu jami kɛ bua jɔmi ɔ nɛ. (1 Petro 2:12) Se ke nyɛmi ko yi Mawu mlaahi a nɔ nɛ a gbla e tue ɔ, mɛni ma nyɛ maa ba? Enɛ ɔ ma nyɛ ma jɔ̃ ni komɛ a nine mi ngɛ asafo ɔ mi, nɛ a bua be jɔe hu.

He lo nya níhi fuu a se dimi hu ma nyɛ ma ha nɛ wa be bua jɔmi náe hu. Ngɛ mɛni blɔ nɔ? Satan je ɔ bɔɔ mɔde kaa e ma plɛ wa yi mi konɛ wa he níhi nɛ a he hia we wɔ. Enɛ ɔ he ɔ, nyɛ ha nɛ wa kai munyu nɛ Yesu tu kɛ nyɛɛ se nɛ ɔ: “Nɔ ko be nyɛe ma sɔmɔ nyɔmtsɛmɛ enyɔ; eko ɔ, e maa nyɛ nɔ kake, nɛ e maa suɔ nɔ kake; aloo e maa pee nɔ kake suɔmi nya ní, nɛ nɔ kake ɔ lɛɛ e be lɛ bue fɛɛ. O be nyɛe ma sɔmɔ Mawu kɛ sika tsuo.” (Mateo 6:24) Wa be nyɛe maa hi Yehowa sɔmɔe ngɛ bua jɔmi mi nɛ ngɛ jamɛ a be ɔ mi nɔuu ɔ, wa maa hi mɔde bɔe kaa wa ma ná nɔ́ fɛɛ nɔ́ ngɛ je nɛ ɔ mi.

Nihi nɛ a suɔ Yehowa a, e yi ha mɛ kaa a ma sɔmɔ lɛ. (1 Yohane 5:3) Mo kai kaa Yesu de ke: “Nyɛ nihi tsuo nɛ nyɛ tloo tlomi nɛ pɔ tɔ nyɛ, nyɛɛ ba ye ngɔ, nɛ ma ha nɛ nyɛɛ jɔɔ nyɛ he. Nyɛɛ ngɔ ye kuɛpã tso ɔ ngɔ tloo, nɛ nyɛɛ kase mi; ejakaa ye he jɔ, nɛ i baa ye he si kɛ jee ye tsui mi. Ke nyɛ pee jã a, nyɛ ma ná he jɔmi; ejakaa ye kuɛpã tso ɔ tloomi wɛ, nɛ ye tlomi ɔ hu jiɔ we.” (Mateo 11:28-30) Anɔkuale Kristofohi nɛ wa ji ɔ haa wɔ he jɔɔmi kɛ bua jɔmi.  Niinɛ, yi mi tomi kpakpa komɛ a he je nɛ wa bua jɔɔ ngɛ Yehowa sɔmɔmi ɔ mi ɔ nɛ. Amlɔ nɛ ɔ, nyɛ ha nɛ wa susu yi mi tomi nɛ ɔmɛ a kpɛti etɛ a he nɛ waa hyɛ.​—Habakuk 3:18.

Wa sɔmɔɔ Mawu nɛ e ngɛ bua jɔmi nɛ e ha wɔ wami ɔ. (Bɔfo Ɔmɛ A Ní Tsumi 17:28; 1 Timoteo 1:11) Wa le kaa wa Bɔlɔ ɔ lɛ ha nɛ wa ngɛ wami mi. Enɛ ɔ he ɔ, a baptisi wɔ kɛ jio, lingmi nɛ ɔ pɛ nɛ a baptisi wɔ jio, nyɛ ha nɛ waa ya nɔ nɛ wa sɔmɔ lɛ kɛ bua jɔmi.

Mo susu Nyɛminyumu Héctor he nɛ o hyɛ. E kɛ jeha 40 sɔmɔ Yehowa kaa kpɔ mi nɔ hyɛlɔ. ‘Ngɛ e bwɔmi be mi tete po’ ɔ, e bua jɔ Yehowa sɔmɔmi he. (La 92:12-14) Hiɔ nɛ e yo ɔ ngɛ nue he je ɔ, e nyɛ we nɛ e tsu babauu ngɛ Mawu sɔmɔmi ɔ mi hu, se Héctor ngɛ bua jɔmi. E de ke: “E ngɛ mi kaa e peeɔ mi aywilɛho kaa ye yo ɔ nɔmlɔ tso mi he wami nami nɔ ngɛ gbɔe bɔɔbɔɔbɔɔ, nɛ e nɔ hyɛmi be gbɔjɔɔ ha mi mohu, se i ha we nɛ lɔ ɔ nɛ puɛ bua jɔmi nɛ i ngɛ náe ngɛ anɔkuale Mawu ɔ sɔmɔmi mi ɔ. Lemi nɛ i le kaa Yehowa lɛ ha nɛ i ngɛ wami mi, nɛ e bɔ adesa ngɛ yi mi tomi ko he je ɔ kɛkɛ po ha nɛ i ngɛ suɔmi nɛ mi kuɔ kɛ ha lɛ, nɛ i sɔmɔɔ lɛ kɛ ye tsui tsuo. I bɔɔ mɔde kaa ma ya fiɛɛmi be fɛɛ be, nɛ i haa nɛ Matsɛ Yemi ɔ he hɛ nɔ kami ɔ hiɔ ye juɛmi mi, konɛ ma ná bua jɔmi daa.”

Yehowa ha nɛ Yesu ngɔ e he kɛ sã afɔle ngɛ wa he je, konɛ wa nyɛ nɛ wa ná bua jɔmi. Ngɛ anɔkuale mi ɔ, “Mawu suɔ je ɔ saminya, nɛ e ngɔ e Bi kake ɔ ngɔ ha, konɛ nɔ tsuaa nɔ nɛ heɔ lɛ yeɔ ɔ, e hɛ mi ko kpata, se mohu e ná neneene wami.” (Yohane 3:16) Niinɛ, ke wa ná hemi kɛ yemi ngɛ kpɔmi nɔ́ ɔ nɛ ji, nike ní nɛ Mawu je suɔmi mi kɛ ha wɔ ɔ mi ɔ, Mawu ma nyɛ maa ngɔ wa he yayami ɔmɛ kɛ pa wɔ, nɛ wa ma nyɛ ma ná neneene wami. Enɛ ɔ ji yi mi tomi nɛ pe kulaa nɛ e sa kaa e ha nɛ wa ná bua jɔmi! Ke wa bua jɔ kpɔmi nɔ́ ɔ he ɔ, lɔ ɔ maa wo wɔ he wami konɛ waa kɛ bua jɔmi nɛ sɔmɔ Yehowa.

Nyɛminyumu ko nɛ a tsɛɛ lɛ ke Jesús, nɛ e ngɛ Mexico ɔ de ke: “Ye ní tsumi he mi nyɔguɛ. Be komɛ ɔ, i kɛ ngmlɛfia babauu tsuɔ ní pe nine nɛ́ tsa pi nɔ ko hu nɛ́ e ngɛ ye nɔ nyɛe kaa ma pee jã. I pee jã konɛ ma ná sika fuu. Kɛkɛ nɛ i ba kase Yehowa he ní, nɛ i ba na hu kaa e ngɔ e Bi nɛ e suɔ wawɛɛ ɔ kɛ ha ngɛ wa he je. I suɔ wawɛɛ kaa ma sɔmɔ lɛ. Enɛ ɔ he ɔ, i jɔɔ ye he nɔ kɛ ha Yehowa, nɛ ngɛ jeha 28 sɔuu nɛ i kɛ tsu ní ɔ se ɔ, i ma ye juɛmi nya si kaa ma kpa ní tsumi ɔ, konɛ ma ngɔ ye he kɛ wo be tsuo sɔmɔmi ní tsumi ɔ mi.” Bɔ nɛ Jesús plɛ kɛ bɔni Yehowa sɔmɔmi kɛ bua jɔmi ha ji nɛ ɔ nɛ.

Wa je mi bami he tsɔ, nɛ lɔ ɔ haa wɔ bua jɔmi. Anɛ o kai bɔ nɛ o baa o je mi ha loko o ba le Yehowa a lo? Bɔfo Paulo kai Kristofohi nɛ a hi Roma a kaa ‘jinɛ sa a, yayami ye mɛ nyɔguɛ,’ se jehanɛ ɔ lɛɛ ‘a ba bɔni nɔ́ nɛ da peemi.’ Akɛnɛ a je mi bami he  tsɔ he je ɔ, a hyɛ blɔ kaa a ma ná neneene wami. (Roma Bi 6:17-22) Wɔ hu wa yeɔ Yehowa mlaahi a nɔ. Enɛ ɔ he ɔ, wa ye wa he ngɛ haomihi nɛ nihi kɛ kpeɔ akɛnɛ a ngɔɔ a he kɛ woɔ je mi bami yaya kɛ awi yemi ní peepeehi a mi ɔ he je. E sa nɛ enɛ ɔ nɛ ha wa bua nɛ jɔ!

Mo susu Jaime he nɛ o hyɛ. Be ko nɛ be ɔ, e he we yi kaa Mawu ngɛ, e heɔ su tsakemi tsɔɔmi ɔ yeɔ, nɛ e nɔɔ kunɔ hulɔ. Jaime ba bɔni asafo mi kpehi yami, nɛ bɔ nɛ suɔmi ngɛ nyɛmimɛ ɔmɛ a kpɛti ha a ta e tsui he. Bɔ nɛ pee nɛ Jaime nɛ yu e he ngɛ níhi nɛ e peeɔ ɔ a he ɔ, e de Yehowa konɛ e ye bua lɛ nɛ e ná hemi kɛ yemi kaa lɛ Yehowa a, e ngɛ. Jaime de ke: “Bɔɔbɔɔbɔɔ ɔ, i ba kpa si kaa Tsɛ ko ngɛ nɛ e naa nɔ mɔbɔ. Yehowa mlaa amɛ a nɔ nɛ i yeɔ ɔ poɔ ye he piɛ. Kaa i tsakee we ɔ, jinɛ eko ɔ, be nɛ ɔ mi ɔ, i gbo kaa bɔ nɛ nihi nɛ i kɛ mɛ nɔɔ kunɔ ɔ a ti ni komɛ gbo ɔ. Kɛ je benɛ i bɔni Yehowa sɔmɔmi ɔ, ye bua jɔɔ wawɛɛ ngɛ si himi mi.”

Be mi nɛ wa ngɛ mlɛe konɛ je yaya nɛ ɔ nɛ ba nyagbe ɔ, kɛ e sa kaa waa pee wa ní ha kɛɛ? Mo kai kaa wa peeɔ Mawu suɔmi nya ní nɛ wa ngɛ blɔ hyɛe kaa wa ma ná neneene wami. “Lɔ ɔ he ɔ, wa ko ha nɛ kpakpa peemi nɛ gbe wa nya; ejakaa ke wa kɔni mi wui nyu ɔ, ní kpami be ɔ, wa ma ná he se.” (Galatia Bi 6:8, 9) Ngɛ Yehowa yemi kɛ buami nya a, nyɛ ha nɛ waa to wa tsui si, nɛ waa bɔ mɔde wawɛɛ konɛ wa ná suhi nɛ maa ye bua wɔ kɛ po “haomi kpetekpleenyɛ” ɔ, nɛ waa ya nɔ nɛ wa sɔmɔ Yehowa kɛ bua jɔmi.​—Kpojemi 7:9, 13, 14; Yakobo 1:2-4.

Wa ma nyɛ ma ná nɔ mi mami kaa Yehowa maa jɔɔ wɔ ke wa to wa tsui si, ejakaa e le ní nɛ wa ngɛ tsue, nɛ e le kaa wa suɔ lɛ, nɛ wa fiɛ we e biɛ ɔ he. Ke wa yaa nɔ nɛ wa sɔmɔɔ Yehowa kɛ bua jɔmi ɔ, wɔ hu wa maa tu munyu nɛ David tu kɛ nyɛɛ se nɛ ɔ. E de ke: ‘I susuɔ Yehowa he daa. Nɛ́ Yehowa ngɛ ye kasa nya nɛ ɔ, nɔ́ ko nɔ́ ko be mi pee. Enɛ ɔ he je ɔ, imi nɔmlɔ ɔ tsuo i ná bua jɔmi, kɛ he jɔmi.’​—La 16:8, 9.