BAIBLO ngmali ɔmɛ tĩ munyuza komɛ a mi si abɔ. Mo susu yi mi tomi komɛ a he je nɛ eko ɔ, a pee jã a he nɛ o hyɛ:

Be mi nɛ a kɛ ngma. Ngɛ blema Israel ɔ, nihi fuu be Mlaa womi ɔ nɛ a kɛ nine ngma a eko. Behi fuu ɔ, nihi buaa a he nya ngɛ kpe he bo tsu ɔ nya nɛ a kaneɔ Mlaa a mi munyu ɔmɛ kɛ haa mɛ nɛ a buɔ tue. (5 Mose 31:​10-12) E ngɛ heii kaa níhi fuu ma nyɛ maa gbla ni ɔmɛ a juɛmi ke a daa si be kɛkɛɛ nɛ a ngɛ Mlaa a mi munyu ɔmɛ kanee kɛ ngɛ mɛ hae ɔ. (Neh. 8:​2, 3, 7) Enɛ ɔ he ɔ, ke a tĩ oti komɛ nɛ a ngɛ Ngmami ɔ mi ɔ mi kɛ ha mɛ si abɔ ɔ, e he be wae kulaa kaa a maa nu sisi nɛ a kai nɛ a kɛ tsu ní. Ke a tĩ munyu komɛ a mi si abɔ kɛ ha mɛ ɔ, e maa ye bua mɛ wawɛɛ konɛ a kai otihi nɛ a he hia wawɛɛ nɛ Yehowa kɛ ha mɛ ngɛ Mlaa womi ɔ mi ɔ.—3 Mose 18:​4-22; 5 Mose 5:1.

Bɔ nɛ a ngma lɛ ha. Baiblo ɔ mi womi ɔmɛ nɛ a ngma a ekomɛ ji lahi. Kaa nɔ hyɛmi nɔ́ ɔ, La, Lahi A Mi La, kɛ Kɔmɔ Yemi womi ɔmɛ ji lahi. Be komɛ ɔ, a tĩɔ munyuhi nɛ ngɛ lahi a mi ɔ si abɔ kɛ maa la a yi ɔ nɔ mi. Enɛ ɔ haa nɛ tue buli ɔmɛ nyɛɔ nɛ a kaseɔ la a mi munyu ɔmɛ kɛ woɔ a yi mi. Kaa nɔ hyɛmi nɔ́ ɔ, mo kadi munyuhi nɛ ngɛ La 115:​9-11 ɔ. E de ke: ‘Israel ma, nyɛɛ ngɔ nyɛ hɛ kɛ fɔ Yehowa nɔ. Lɛ ji nyɛ he piɛɛlɔ, kɛ nyɛ yi baalɔ. Aaron nina, nyɛɛ ngɔ nyɛ hɛ kɛ fɔ Yehowa nɔ. Lɛ ji nyɛ he piɛɛlɔ, kɛ nyɛ yi baalɔ. Nyɛ nihi nɛ nyɛ yeɔ Yehowa gbeye, nyɛɛ ngɔ nyɛ hɛ kɛ fɔ Yehowa nɔ. Lɛ ji nyɛ he piɛɛlɔ, kɛ nyɛ yi baalɔ.’ Anɛ o na bɔ nɛ la a mi munyu ɔmɛ nɛ a tĩ mi si abɔ ɔ maa ye bua nɔ nɛ e ngɛ lae ɔ ha konɛ anɔkuale munyu ɔmɛ nɛ tlɔ e tsui mi lo?

Nɔ́ he je nɛ a ngma. Be komɛ ɔ, Baiblo ngmali ɔmɛ tĩɔ munyuza komɛ nɛ a he hia a mi si abɔ. Kaa nɔ hyɛmi nɔ́ ɔ, benɛ Yehowa fã Israel bi ɔmɛ kaa a ko ye muɔ ɔ, e ha nɛ Mose tĩ yi mi tomi he je nɛ e sɛ nɛ a pee jã a mi si abɔ. Mawu suɔ nɛ e ma nɔ mi kɛ ha e we bi kaa wami ngɛ muɔ mi. Enɛ ɔ tsɔɔ kaa muɔ daa si kɛ ha adesa loo lohwe ko wami. (3 Mose 17:​11, 14) Pee se benɛ bɔfo ɔmɛ kɛ nikɔtɔma amɛ nɛ a ngɛ Yerusalem ɔ ngɛ Kristofohi níhi nɛ e sa nɛ a kua konɛ a sa Mawu hɛ mi ɔ tsɔɔe ɔ, a ma nɔ mi ekohu kaa e sa nɛ a yu a he ngɛ muɔ he.—Níts. 15:​20, 29.

E ngɛ mi kaa a tĩ munyu komɛ a mi si abɔ ngɛ Baiblo ɔ mi mohu lɛɛ, se lɔ ɔ tsɔɔ we kaa Yehowa suɔ nɛ wa kɛ pee wa su, nɛ waa hi Baiblo ɔ mi munyu ɔmɛ a mi tĩe kɛkɛ. Yesu de ke: “Ke o ngɛ sɔlee ɔ, koo tĩ munyu kake ɔ nɔuu mi si abɔ.” (Mat. 6:7) Lɔ ɔ se ɔ, e ya nɔ nɛ e tsɔɔ wɔ níhi nɛ a kɛ Mawu suɔmi nya ní kɔ nɛ wa ma nyɛ maa sɔle ngɛ he. (Mat. 6:​9-13) Enɛ ɔ he ɔ, e ngɛ mi kaa wa sume nɛ waa tĩ munyu kake nɔuu mi si abɔ ke wa ngɛ sɔlee mohu lɛɛ, se wa ma nyɛ maa sɔle ngɛ sane ko he si abɔ.—Mat. 7:​7-11.

Ngɛ yi mi tomi kpakpa komɛ a he je ɔ, Mawu Munyu ɔ ngɔ munyu loo munyuza komɛ kɛ tsu ní si abɔ. Wa Tsɔɔlɔ Ngua a guɔ blɔ nɛ ɔ nɔ kɛ tsɔɔ wɔ ní konɛ wa ná he se.—Yes. 48:​17, 18.