ANƐ o yɔse kaa mwɔnɛ ɔ, nihi fuu nuɔ he kaa a nɔ kuɔ pe ni kpahi, nɛ a suɔ nɛ nihi nɛ a je bumi klɛdɛɛ kpo kɛ tsɔɔ mɛ lo? Ngɛ anɔkuale mi ɔ, ke nihi je bumi kpo kɛ tsɔɔ mɛ po ɔ, a susuɔ kaa e sa nɛ ni ɔmɛ nɛ a pee babauu pe jã. Nihi nɛ a hɛɛ susumi nɛ ɔ foɔ mɛ pɛ a nɔ́ mi, nɛ a bua jɔɛ níhi nɛ a ngɛ ɔ he. Jã nɛ Baiblo ɔ tsɔɔ kaa nihi maa pee a ní ngɛ nyagbe ligbi ɔmɛ a mi.—2 Tim. 3:2.

Ngɛ anɔkuale mi ɔ, pi mwɔnɛ ɔ nɛ adesahi bɔni mɛ pɛ a nɔ́ mi fomi. Kaa nɔ hyɛmi nɔ́ ɔ, Adam kɛ Hawa suɔ nɛ mɛ nitsɛmɛ a mwɔ yi mi kpɔ ngɛ nɔ́ nɛ da kɛ nɔ́ nɛ dɛ he. Enɛ ɔ ha nɛ wɔ tsuo wa ngɛ nɔ́ nae mwɔnɛ ɔ. Jehanɛ hu ɔ, Uzia nɛ ji Yuda Matsɛ ɔ hu susu kaa e ngɛ he blɔ nɛ e sãa tsopa kɛ he via ngɛ sɔlemi we ɔ. Se ngɛ anɔkuale mi ɔ, e ngɛ e he sisie. (2 Kron. 26:​18, 19) Jã kɛ̃ nɛ Farisibi ɔmɛ kɛ Sadukibi ɔmɛ hu susu kaa akɛnɛ a ji Abraham nina he je ɔ, Mawu kɛ mɛ maa hi si ngɛ blɔ klɛdɛɛ nɔ.—Mat. 3:9.

Akɛnɛ nihi woɔ a he nɔ nɛ a foɔ mɛ pɛ a nɔ́ mi wawɛɛ he je ɔ, ke wa hyɛ we nɛ hi ɔ, su nɛ ɔmɛ ma nyɛ ma ná wa nɔ he wami. (Gal. 5:26) Eko ɔ, wa ma bɔni susumi kaa e sa nɛ wa nine nɛ su he blɔ klɛdɛɛ ko nɔ, aloo e sa nɛ nihi nɛ a je bumi kpo kɛ tsɔɔ wɔ ngɛ blɔ klɛdɛɛ ko nɔ. Mɛni ma nyɛ maa ye bua wɔ konɛ wa kua susumi nɛ dɛ nɛ ɔ? Kekleekle ɔ, e sa nɛ waa le Yehowa susumi ngɛ sane nɛ ɔ he. Enɛ ɔ he ɔ, nyɛ ha nɛ wa susu Baiblo sisi tomi mlaahi enyɔ nɛ maa ye bua wɔ ɔ he.

Yehowa pɛ lɛ e ma nyɛ maa tsɔɔ nɔ́ nɛ e sa nɛ wa nine nɛ su nɔ. Mo susu nɔ hyɛmi ní nɛ ɔmɛ a he nɛ o hyɛ.

•   Ngɛ weku ɔ mi ɔ, Yehowa suɔ nɛ yogbayo nɛ bu e huno, nɛ huno hu nɛ suɔ e yo. (Efe. 5:33) Yehowa suɔ nɛ nihi nɛ a sɛ gba si himi mi ɔ nɛ a je suɔmi nɛ hiɔ nyumu kɛ yo pɛ a kpɛti ɔ kpo kɛ tsɔɔ a sibi, se pi nɔ kpa ko. (1 Kor. 7:3) Jehanɛ hu ɔ, Yehowa suɔ nɛ bimɛ nɛ a bu a fɔli, nɛ jã kɛ̃ nɛ e suɔ nɛ fɔli hu nɛ a hyɛ a bimɛ ɔmɛ a nɔ, nɛ a je suɔmi kpo kɛ tsɔɔ mɛ.—2 Kor. 12:14; Efe. 6:2.

• Ngɛ asafo ɔ mi hu ɔ, Yehowa suɔ nɛ wa je bumi kpo kɛ tsɔɔ asafo mi nikɔtɔmahi ngɛ ní tsumi nɛ a ngɛ tsue ɔ he je. (1 Tɛs. 5:12) Se kɛ̃ ɔ, nikɔtɔma amɛ be he blɔ nɛ a tsɔɔ nyɛmimɛ ɔmɛ nɔ́ nɛ e sa nɛ a pee.—1 Pet. 5:​2, 3.

• Mawu ha nɔ yeli ɔmɛ he blɔ konɛ a ngɔ tóhi ngɛ ma bi ɔmɛ a dɛ, nɛ ma a mi bi ɔmɛ hu nɛ a ba a he si ha nɔ yeli ɔmɛ.—Rom. 13:​1, 6, 7.

Yehowa jeɔ suɔmi mi nɛ e haa wɔ níhi fuu pe bɔ nɛ e sa nɛ e ha wɔ. Akɛnɛ Adam ngɔ yayami kɛ sã wɔ he je ɔ, jinɛ gbenɔ pɛ lɛ sa wɔ. (Rom. 6:23) Se kɛ̃ ɔ, akɛnɛ Yehowa suɔmi ɔ se pui he je ɔ, wa náa jɔɔmihi fuu. (La 103:​10, 11) Jinɛ wa sɛ kɛ ha jɔɔmihi loo he blɔhi nɛ Yehowa kɛ haa wɔ ɔ, se e dloomi ɔ he je ɔ, e kɛ haa wɔ.—Rom. 12:​6-8; Efe. 2:8.

Moo hyɛ nɛ hi nɛ je ɔ susumi ɔ nɛ ko ná o nɔ he wami. Eko ɔ, wa ma susu kaa e sa nɛ wa nine nɛ su he blɔhi fuu a nɔ pe ni kpahi be mi nɛ wɔ nitsɛmɛ po wa yɔse we. Yesu tsɔɔ bɔ nɛ susumi nɛ ɔ ma nyɛ ma ná wa nɔ he wami ha. E ngɔ nɔ́ he tomi nɔ́ nɛ kɔɔ ní tsuli nɛ a nyɔmtsɛ ha mɛ denario kake ɔ he ɔ kɛ tsu ní. E tsɔɔ kaa ní tsuli ɔmɛ a kpɛti ni komɛ je ní tsumi sisi mɔtu mla, nɛ a tsu ní ligbi ɔ tsuo ngɛ pu ɔ nɔ. Se ni kpa amɛ lɛɛ a tsu ní ngmlɛfia kake pɛ. Ní tsuli ɔmɛ nɛ a sɛ hlami ɔ susu kaa akɛnɛ a tsu ní ligbi ɔ tsuo he je ɔ, a maa fɔ a hiɔwo ɔ nɔ. (Mat. 20:​1-16) Yesu tsɔɔ nɔ́ nɛ wa ma nyɛ maa kase ngɛ nɔ́ he tomi nɔ́ nɛ ɔ mi. E tsɔɔ e kaseli ɔmɛ kaa e sa nɛ a bua nɛ jɔ nɔ́ nɛ Mawu suɔ kaa e ma ha mɛ ɔ he.

Mo je hɛsa kpo, koo hyɛ blɔ kaa doo ɔ nihi nɛ a ha mo níhi. (1 Tɛs. 5:18) Moo kase bɔfo Paulo nɔ hyɛmi nɔ́ ɔ. E ngɛ mi kaa Paulo ngɛ he blɔ nɛ e deɔ nyɛmimɛ nɛ a ngɛ Korinto ɔ kaa a ha lɛ e hiami níhi mohu lɛɛ, se e pee we jã. (1 Kor. 9:​11-14) E sa nɛ wa bua nɛ jɔ nɔ́ saisaa nɛ nihi ma ha wɔ ɔ he, nɛ wa ko nyɛ nihi a nɔ kaa a ha wɔ nɔ́ ko.

 Moo ba o he si. Ke nɔ ko susuɔ kaa e nɔ kuɔ pe ni kpahi ɔ, behi fuu ɔ, lɔ ɔ haa nɛ e nuɔ he kaa e sa nɛ e ná babauu pe nɔ́ nɛ e ngɛ ɔ. Se ke wa baa wa he si ɔ, lɔ ɔ maa ye bua wɔ nɛ waa na kaa susumi kaa jã a ma nyɛ maa ye wɔ awi.

Gbalɔ Daniel pee he si bami he nɔ hyɛmi nɔ́ nɛ sa kadimi wawɛɛ. E nine su he blɔ klɛdɛɛ komɛ a nɔ. Eko ɔ, Daniel ko nyɛ susu kaa weku mi nɛ e je, bɔ nɛ e he ngɛ fɛu ha, nile kɛ nyɛmi nɛ e ngɛ ɔ he je nɛ e ná jamɛ a he blɔ ɔmɛ ɔ nɛ. (Dan. 1:​3, 4, 19, 20) Se Daniel susuu we jã, mohu ɔ, e ya nɔ nɛ e ba e he si. Su nɛ ɔ ha nɛ Yehowa bua jɔ Daniel he wawɛɛ.—Dan. 2:30; 10:​11, 12.

Wa sume nɛ wa fo wɔ pɛ wa nɔ́ mi, nɛ wa wo wa he nɔ kaa bɔ nɛ nihi fuu pɔɔ peemi ɔ, mohu ɔ, nyɛ ha nɛ be fɛɛ be ɔ, wa bua nɛ jɔ jɔɔmihi tsuo nɛ Yehowa kɛ dlooɔ wɔ ɔ he wawɛɛ.