ANƐ o kɛ nyagba ko kpe hyɛ nɛ o nu he kaa nɔ ko be nɛ maa ye bua mo lo? Wa ngɛ ‘behi nɛ a mi wa nɛ a nya dami yeɔ’ ɔ mi, nɛ enɛ ɔ ma nyɛ ma jɔ̃ wa kɔni mi, nɛ waa nu he kaa e piɛ wɔ pɛ. (2 Tim. 3:1) Se kɛ̃ ɔ, ke waa kɛ nyagbahi ngɛ kpee ɔ, nihi ngɛ nɛ a maa ye bua wɔ. Baiblo ɔ tsɔɔ kaa huɛmɛ kpakpahi ma nyɛ maa ye bua wɔ ngɛ “haomi behi” a mi.—Abɛ 17:17.

Bɔfo Paulo huɛmɛ nɛ e kɛ mɛ hia blɔ kɛ ya tsu ma se sane kpakpa fiɛɛmi ní tsumi ɔ ye bua lɛ ngɛ blɔhi fuu a nɔ. (Kol. 4:​7-11) Benɛ a wo Paulo tsu ngɛ Roma a, e huɛmɛ ɔmɛ tsu ní tsumi nɛ lɛ nitsɛ e nyɛ we nɛ e tsu ɔ. Kaa nɔ hyɛmi nɔ́ ɔ, Epafrodito ngɔ níhi nɛ Paulo hia nɛ nyɛmimɛ nɛ a ngɛ Filipi ɔ kɛ mane ɔ kɛ ya ha lɛ. (Filip. 4:18) Tikiko hu ngɔ sɛ womihi nɛ Paulo ngma a kɛ ya ha asafo slɔɔtoslɔɔto ɔmɛ. (Kol. 4:7) E ngɛ mi kaa a wo Paulo tsu ngɛ we mi nɛ e nyɛ we nɛ e je kpo mohu lɛɛ, se e huɛmɛ ɔmɛ ye bua lɛ nɛ e nyɛ nɛ e tsu e sɔmɔmi ní tsumi ɔ. Mɛni maa ye bua mo konɛ o pee huɛ nitsɛ?

Mwɔnɛ ɔ, nyɛmimɛ fuu yeɔ buaa a sibi kɛ tsɔɔ kaa a ji huɛmɛ kpakpahi. Mo susu nyɛmiyo ko nɛ e pee e he huɛ nitsɛ kɛ ha Elisabet nɛ e ji blɔ gbalɔ ngɛ Spain ɔ he nɛ o hyɛ. Benɛ Elisabet ná le kaa e mami ná kansa a, nyɛmiyo ɔ mane Elisabet sɛ gbihi fuu nɛ woɔ nɔ bua kɛ je Baiblo ɔ mi. Elisabet de ke: “Sɛ gbi nɛ ɔmɛ wo mi he wami, nɛ i nyɛ nɛ i da bɔ nɛ i ngɛ he nue ha a nya daa ligbi.”—Abɛ 18:24.

Nɔ́ nɛ ma nyɛ maa ye bua wɔ konɛ huɛ bɔmi gbagbanii nɛ hi waa kɛ wa nyɛmimɛ ɔmɛ wa kpɛti ji kaa wa maa ye bua mɛ konɛ a nyɛ nɛ a ya fiɛɛmi kɛ asafo mi kpe. Kaa nɔ hyɛmi nɔ́ ɔ, ke o ngɛ lɔle ɔ, o ma nyɛ maa ngɔ nyɛmi ko nɛ e wa ngɛ jeha mi ɔ kɛ ya asafo mi kpe loo fiɛɛmi. Ke o pee jã a, e maa wo mo he wami, nɛ mo hu o maa wo lɛ he wami. (Rom. 1:12) Se ngɛ anɔkuale mi ɔ, nyɛmimɛ ɔmɛ ekomɛ ngɛ nɛ a tlɔ we mi. Ke jã a, kɛ wa ma plɛ kɛ ye bua mɛ ha kɛɛ?

Nyɛmimɛ komɛ ngɛ nɛ hiɔ loo nyagba kpahi nɛ a kɛ kpeɔ ɔ ha nɛ a nyɛ we nɛ a yaa asafo mi kpe ngɛ Matsɛ Yemi Asa a nɔ. Mo susu nyɛminyumu ko nɛ a tsɛɛ lɛ ke David nɛ e ná kansa a si fɔfɔɛ ɔ he nɛ o hyɛ. A pee tsopa ha lɛ nyɔhiɔ ekpa kɛ se sɔuu. Jamɛ a be ɔ mi tsuo ɔ, David kɛ e yo Lidia yaa asafo mi kpe kɛ guɔ videoconference nɔ.

Kɛ nyɛmimɛ nɛ a ngɛ asafo ɔ mi ɔ ye bua mɛ ha kɛɛ? Ke a kpa asafo mi kpe ɔ, nyɛmimɛ komɛ bɔɔ mɔde kaa a kɛ David kɛ Lidia maa sɛɛ ní kɛ gu  videoconference nɔ ngɛ Matsɛ Yemi Asa a nɔ. Jehanɛ hu ɔ, be fɛɛ be nɛ David kɛ Lidia ma ha sane heto ngɛ asafo mi kpe sisi ɔ, nyɛmimɛ ɔmɛ maneɔ mɛ sɛ gbi, nɛ a woɔ mɛ he wami. Mɛni lɛ je mi kɛ ba? David kɛ Lidia nu he kaa nyɛmimɛ ɔmɛ suɔ mɛ wawɛɛ.

Eko ɔ, mo hu o ma nyɛ maa to blɔ nya konɛ o kɛ nyɛmi ko nɛ e tlɔ we mi ɔ nɛ ya fiɛɛmi. Wa ma nyɛ maa pee tsakemi nyafinyafi komɛ ngɛ wa si himi mi konɛ wa nyɛ nɛ waa ye bua nyɛmi ko kaa jã. Ke wa pee jã a, lɔ ɔ ma ha nɛ a na kaa wa susuɔ a he wawɛɛ. (Abɛ 3:27) Eko ɔ, o kɛ mɛ ma nyɛ ma tsu fiɛɛmi ní tsumi ɔ kɛ gu tɛlifoo loo sɛ womi ngmami nɔ. Jehanɛ hu ɔ, asafo mi nikɔtɔmahi ma nyɛ maa to blɔ nya konɛ nihi nɛ a tlɔ we mi ɔ nɛ a nyɛ nɛ a hyɛ fiɛɛmi yami kpe ɔmɛ kɛ gu videoconference nɔ. David kɛ Lidia bua jɔ blɔ nya tomi nɛ ɔ he wawɛɛ. David de ke, “Ke wa piɛɛ wa fiɛɛmi yami kuu ɔ he, nɛ wa bu ní sɛɛmi kpiti nɛ yaa nɔ kɛ sɔlemi nɛ a sɔleɔ ɔ tue ɔ, e woɔ wɔ he wami wawɛɛ.” Jehanɛ hu ɔ, be komɛ ɔ, o ma nyɛ ma bi nyɛmi ɔ nɛ e tlɔ we mi ɔ ke ji e maa suɔ nɛ o ngɔ nɔ ko nɛ o kɛ lɛ kaseɔ Baiblo ɔ kɛ ba e we ɔ mi konɛ nyɛɛ kase ní lo.

Ke waa kɛ wa nyɛmimɛ nɛ a tlɔ we mi ɔ pee kake kɛ tsu ní ɔ, wa maa na su kpakpahi nɛ a ngɛ ɔ, nɛ wa maa hɛ kɛ su a he wawɛɛ. Kaa nɔ hyɛmi nɔ́ ɔ, ke o kɛ nyɛmimɛ nɛ ɔmɛ ya fiɛɛmi nɛ o yɔse bɔ nɛ a kɛ Mawu Munyu ɔ tsuɔ ní saminya kɛ yeɔ buaa nihi konɛ a hɛ kɛ su Yehowa he ɔ, o bua maa jɔ a he wawɛɛ. Ke o ye bua nyɛmimɛ ɔmɛ konɛ a nyɛ nɛ a ya asafo mi kpehi loo fiɛɛmi ɔ, lɔ ɔ ma nyɛ ma ha nɛ o ná huɛmɛ ehehi.—2 Kor. 6:13.

Benɛ Paulo kɛ si fɔfɔɛhi nɛ a mi wa ngɛ kpee nɛ́ e huɛ Tito ya slaa lɛ ɔ, Paulo bua jɔ wawɛɛ. (2 Kor. 7:​5-7) E hi kaa waa kɛ wa munyu tutui maa wo nyɛmimɛ ɔmɛ he wami mohu lɛɛ, se Tito nɔ hyɛmi nɔ́ ɔ ha nɛ wa na kaa ke wa ya slaa wa nyɛmimɛ ɔmɛ, nɛ wa pee níhi kɛ ye bua mɛ ɔ, lɔ ɔ hu ma nyɛ maa wo a bua wawɛɛ.—1 Yoh. 3:18.

Wa nyɛmimɛ nɛ a ngɛ Russia a yeɔ buaa a sibi wawɛɛ, nɛ enɛ ɔ ji nɔ hyɛmi nɔ́ kpakpa kɛ ha wɔ. Mo susu Sergey kɛ e yo Tatyana a níhi a si kpami ɔ he nɛ o hyɛ. Polisi ɔmɛ ya sɛ a we ɔ mi nɛ a gbɛ a tsu ɔ mi, nɛ a nuu mɛ kɛ je konɛ a ya bi mɛ sanehi. Pee se ɔ, a ngmɛɛ Tatyana he nɛ e ho we mi ya. Sergey de ke: “Benɛ Tatyana ya su we mi nɔuu ɔ, nyɛmiyo ko pee kã nɛ e ya slaa lɛ. Lɔ ɔ se ɔ, nyɛmimɛ fuu ba ye bua wɔ kɛ dla we ɔ mi.”

Sergey de hu ke: “Ye bua jɔ ngmami nɛ ngɛ Abɛ 17:17 ɔ he. Lejɛ ɔ de ke: ‘Huɛ nitsɛ jeɔ suɔmi kpo be fɛɛ be, nɛ e ji nyɛmi nɛ a fɔ kɛ ha haomi behi.’ Benɛ a ngɛ mi yi mi wae ɔ, ye huɛmɛ ɔmɛ ye bua mi wawɛɛ. Enɛ ɔ ha nɛ i yɔse kaa munyu nɛ ngɛ Abɛ 17:17 ɔ ji anɔkuale. Yehowa ha mi huɛmɛ nɛ a ngɛ kã nɛ a ye bua mi.” a

Ke waa kɛ si himi nɛ mi wa kpe ɔ, wa hia wa huɛmɛ ɔmɛ a yemi kɛ buami. Ngɛ amanehlu ngua a mi ɔ, e he maa hia nɛ a ye bua wɔ wawɛɛ. Enɛ ɔ he ɔ, nyɛ ha nɛ waa bɔ mɔde nɛ waa pee wa he huɛmɛ kpakpahi amlɔ nɛ ɔ!—1 Pet. 4:​7, 8.