NÍ KASEMI 7
LA 15 Mo Je Yehowa Bitɛte ɔ Yi!
Yayami Nɛ Yehowa Kɛ Keɔ—Bɔ Nɛ O Ma Ná He Se Ha
“Mo lɛ o ngɔɔ yayami kɛ keɔ kulaa.”—LA 130:4.
OTI NƐ NGƐ NÍ KASEMI Ɔ MI
Wa ma susu nɔ́ he tomi ní komɛ nɛ Baiblo ɔ kɛ tsu ní kɛ tsɔɔ blɔ klɛdɛɛ nɔ nɛ Yehowa guɔ nɛ e kɛ wa he yayami ɔmɛ keɔ wɔ ɔ he. Ní kasemi nɛ ɔ maa ye bua wɔ nɛ wa je hɛsa kpo wawɛɛ ngɛ yayami nɛ Yehowa kɛ keɔ wɔ ɔ he.
1. Ke nɔ ko de ke e kɛ yayami ke ɔ, mɛni he je nɛ e he ma nyɛ maa wa kaa wa maa le nɔ́ tutuutu nɛ e ngɛ tsɔɔe ɔ?
“I NGƆ o he yayami ke mo.” Munyu nɛ ɔ woɔ nɔ bua wawɛɛ, titli, ke o le kaa o de nɔ́ ko loo o pee nɔ ko nɔdɔ nɔ́ ko! Se mɛni nɛ munyu nɛ ji “I ngɔ o he yayami ke mo” ɔ tsɔɔ tutuutu? Anɛ nɔ ɔ ngɛ tsɔɔe kaa nyɛ ma nyɛ ma tsa nyɛ huɛ bɔmi ɔ nɔ ekohu lo? Aloo eko ɔ, e ngɛ tsɔɔe kaa e sume nɛ e maa tu nɔ́ nɛ ba a he munyu ekohu lo? Ngɛ anɔkuale mi ɔ, ke nihi de kaa a kɛ yayami ke ɔ, e tsɔɔ níhi fuu.
2. Kɛ a kale bɔ nɛ Yehowa kɛ yayami keɔ ha ngɛ Baiblo ɔ mi ha kɛɛ? (Hyɛ sisi ningma a hulɔ.)
2 Bɔ nɛ Yehowa kɛ yayami keɔ adesahi nɛ a yi mluku ɔ je ekpa ngɛ bɔ nɛ adesahi kɛ yayami keɔ a sibi ha a he. Bɔ nɛ Yehowa kɛ yayami keɔ ha a ngɛ slɔɔto kulaa. La polɔ ɔ de ngɛ Yehowa he ke: “Mo lɛ o ngɔɔ yayami kɛ keɔ kulaa, konɛ a ye mo gbeye.” a (La 130:4) Ee, ke Yehowa kɛ yayami ko ke ɔ, e kɛ ‘ke kulaa.’ Lɛ ji nɔ nɛ e tsɔɔ wɔ bɔ nɛ a kɛ yayami keɔ nitsɛnitsɛ ha. Ngɛ Hebri Ngmami ɔmɛ ekomɛ a mi ɔ, Baiblo ngmali ɔmɛ kɛ munyungu ko kale bɔ nɛ Yehowa kɛ yayami keɔ ha, se a kɛ jamɛ a munyungu ɔ kale we bɔ nɛ adesahi kɛ tɔmi keɔ ha a.
3. Mɛni blɔ nɔ nɛ bɔ nɛ Yehowa kɛ yayami keɔ ha a je ekpa kulaa? (Yesaya 55:6, 7)
3 Ke Yehowa ngɔ nɔ ko yayami kɛ ke lɛ ɔ, e kaii we hu, nɛ huɛ bɔmi kpakpa ba hiɔ nɔ ɔ kɛ Yehowa a kpɛti ekohu. Ke wa tɔ̃ Yehowa nɔ si abɔ po ɔ, e kɛ keɔ wɔ. Enɛ ɔ haa nɛ wa bua jɔɔ wawɛɛ.—Kane Yesaya 55:6, 7.
4. Mɛni blɔ nɔ Yehowa guɔ kɛ haa nɛ wa nuɔ bɔ nɛ e kɛ yayami keɔ kulaa ha a sisi saminya?
4 Ke bɔ nɛ Yehowa kɛ yayami keɔ ha a je ekpa ngɛ wa nɔ́ ɔ he ɔ, lɛɛ kɛ adesahi nɛ a yi mluku ɔ ma plɛ kɛ nu sisi saminya ha kɛɛ? Yehowa ngɔɔ nɔ́ he tomi níhi nɛ sa kɛ yeɔ buaa wɔ konɛ waa nu bɔ nɛ e kɛ tɔmi keɔ ha a sisi saminya. Wa ma susu nɔ́ he tomi ní nɛ ɔmɛ ekomɛ a he ngɛ ní kasemi nɛ ɔ mi. Wa maa na kaa ke wa pee yayami nɛ wa tsake wa tsui ɔ, Yehowa kɛ wa he yayami ɔ keɔ wɔ, nɛ e haa nɛ huɛ bɔmi kpakpa ba hiɔ waa kɛ lɛ wa kpɛti ekohu. Ke wa susu nɔ́ he tomi ní nɛ ɔmɛ a he ɔ, e maa ye bua wɔ konɛ wa je hɛsa kpo wawɛɛ kɛ ha wa Tsɛ nɛ ngɛ suɔmi, nɛ e ngɔɔ wa he yayami ɔmɛ kɛ keɔ wɔ ngɛ blɔ slɔɔtohi a nɔ ɔ.
YEHOWA JEƆ WA YAYAMI Ɔ KƐ JEƆ
5. Mɛni maa ba ke Yehowa ngɔ wa yayami ɔmɛ ke wɔ?
5 Be komɛ ɔ, Baiblo ɔ ngɔɔ yayami kɛ toɔ tlomi ko nɛ jiɔ he. Matsɛ David kale lɛ nitsɛ e yayami ɔmɛ ngɛ blɔ nɛ ɔ nɔ. E de ke: “Ye tɔmi ɔmɛ laa ye yi; a ngɛ kaa tlomi nɛ jiɔ, a jiɔ tsɔ pe bɔ nɛ ma nyɛ ma tloo.” (La 38:4) Yehowa kɛ yayami peeli nɛ a tsake a tsui ɔ a he yayami ɔmɛ keɔ mɛ. (La 25:18; 32:5) Hebri munyu nɛ a tsɔɔ sisi ke “keɔ” ngɛ ngmami nɛ ɔ mi ɔ sisi ji nɛ a ma “wo nɔ́ ko nɔ,” loo nɛ a maa “tloo.” Enɛ ɔ he ɔ, ke Yehowa ngɔ wa yayami ɔ kɛ ke wɔ ɔ, e ngɛ kaa nɔ́ nɛ e wo tlomi ko nɛ mi jiɔ ngɛ wa kuɛ nɔ.
‘Yayami kɛ kemi’ (La 32:5)
6. Kɛ bɔ nɛ Yehowa jeɔ wa he yayami ɔmɛ kɛ yaa se tsitsaa a mi kɛmi ngɛ ha kɛɛ?
6 Baiblo ɔ ngɔ nɔ́ he tomi nɔ́ kpa ko kɛ tsu ní kɛ tsɔɔ bɔ nɛ Yehowa jeɔ wa yayami ɔmɛ kɛ yaa se tsitsaa ha. La 103:12 ɔ de ke: “Kaa bɔ nɛ puje he kɛ pusinɔ he a kpɛti kɛ ɔ, jã kɛ̃ nɛ e ha nɛ waa kɛ wa tɔmi ɔmɛ a kpɛti kɛ.” Puje he kɛ pusinɔ he a kpɛti kɛ nɛ a be nyɛe maa kpe gblee. Enɛ ɔ tsɔɔ kaa Yehowa jeɔ wa yayami ɔmɛ kɛ yaa tsitsaa pe bɔ nɛ wa juɛmi ma nyɛ maa kpe he. Enɛ ɔ haa nɛ wa náa nɔ mi mami kaa Yehowa kɛ wa yayami ɔmɛ keɔ wɔ kulaa.
“Kaa bɔ nɛ puje he kɛ pusinɔ he a kpɛti kɛ ɔ” (La 103:12)
7. Kɛ Baiblo ɔ kale bɔ nɛ Yehowa peeɔ wa yayami ɔmɛ ha kɛɛ? (Mika 7:18, 19)
7 E ngɛ mi kaa Yehowa jeɔ wa yayami ɔmɛ kɛ yaa tsitsaa lokoo ngɛ okadi peemi blɔ nɔ mohu lɛɛ, se anɛ loloolo ɔ, e hɛɛɔ mi lo? Dɛbi. Matsɛ Hezekia de ngɛ Yehowa he ke: “O sake ye he yayami ɔmɛ tsuo kɛ fɔ o se.” Aloo kaa bɔ nɛ sisi ningma a tsɔɔ ɔ, “o je ye he yayami ɔmɛ tsuo kɛ je o hɛ mi.” (Yes. 38:9, 17, NW; sisi ningma) Nɔ́ he tomi nɔ́ nɛ ɔ tsɔɔ kaa ke nɔ ko pee yayami nɛ e tsake e tsui ɔ, Yehowa sakeɔ e yayami ɔ kɛ fɔɔ he kulaa nɛ e hyɛ we hu. A ma nyɛ maa tsɔɔ munyu nɛ ɔ sisi hu kaa: “O ha nɛ e pee kaa nɔ́ nɛ [i pee we yayami] ko hyɛ.” Baiblo ɔ ngɔ nɔ́ he tomi nɔ́ kpa ko hu kɛ tsu ní kɛ ma oti nɛ ɔ nɔ mi ngɛ Mika 7:18, 19 ɔ. (Kane.) Baiblo ɔ de ngɛ lejɛ ɔ kaa, Yehowa muɔɔ wa yayami ɔmɛ kɛ ya pueɔ wo ɔ sisi tɔɔ. Ngɛ blema be ɔ mi ɔ, e maa ye kaa nɔ ko ma ya wo nɔ́ ko nɛ a sake kɛ fɔ wo ɔ sisi tɔɔ.
‘O sake ye he yayami ɔmɛ tsuo kɛ fɔ o se’ ( Yes. 38:17)
‘A ní yayami ɔmɛ ɔ, o maa muɔɔ kɛ ya wo wo mi, kɛ yaa su wo ɔ sisi tɔɔ’ (Mika 7: 19)
8. Kɛ ba si hiɛ ɔ, mɛni wa kase?
8 Nɔ́ he tomi ní nɛ ɔmɛ ye bua wɔ nɛ wa na kaa ke Yehowa kɛ wa yayami ɔmɛ ke wɔ ɔ, e kɛ keɔ wɔ kulaa, nɛ e he hia we nɛ wa he nile nɛ bu wɔ fɔ hu. Nɔ́ nɛ David de ɔ ji anɔkuale, “nihi nɛ a ngɔ a mlaa nɔ tɔmi ní peepeehi kɛ ke mɛ nɛ́ a ha a yayamihi a nɔ ha mɛ ɔ ngɛ bua jɔmi; adesa nɛ Yehowa be e yayami he akɔtaa bue ɔ ngɛ bua jɔmi.” (Rom. 4:7, 8) Enɛ ɔ tsɔɔ kaa Yehowa kɛ tɔmi keɔ kulaa!
YEHOWA TSUƆ WA HE YAYAMI ƆMƐ
9. Mɛni blɔ nɔ nɛ Baiblo ɔ yeɔ buaa wɔ nɛ wa naa kaa Yehowa ngɔɔ wa yayami ɔmɛ kɛ keɔ wɔ kulaa?
9 Yehowa ngɔ nɔ́ he tomi ní kpahi kɛ tsu ní konɛ waa na kaa kɛ gu kpɔmi nɔ́ ɔ nɔ ɔ, e nyɛɔ nɛ e tsuɔ nihi nɛ a tsake a tsui ɔ a he yayamihi kulaa. Baiblo ɔ tsɔɔ kaa Yehowa fɔɔ yayami kɛ jeɔ. Enɛ ɔ haa nɛ yayami peelɔ he tsɔɔ. (La 51:7; Yes. 4:4; Yer. 33:8) Ke Yehowa fɔ nɔ ko he yayami ngɛ e he ɔ, Yehowa nitsɛ tsɔɔ nɔ́ nɛ jeɔ mi kɛ baa. E de ke: “E ngɛ mi kaa nyɛ yayami ɔmɛ tsuɔ tsutsuutsu mohu lɛɛ, se ma ha nɛ a hiɛ futaa kaa snoo; e ngɛ mi kaa a tsuɔ kaa kɔjai [aloo kuajai] mohu lɛɛ, se a maa pee kaa jijɔ he bwɔmi.” (Yes. 1:18, sisi ningma.) Ke nɔ́ tsutsuu ko sɛ tade futaa mi ɔ, e jemi yeɔ. Yehowa kɛ nɔ́ he tomi nɔ́ nɛ ɔ tsu ní konɛ wa ná nɔ mi mami kaa e ma nyɛ ma fɔ wa he yayami ɔmɛ kɛ je kulaa.
“E ngɛ mi kaa nyɛ yayami ɔmɛ tsuɔ tsutsuutsu mohu lɛɛ, se ma ha nɛ a hiɛ futaa kaa snoo” ( Yes. 1:18)
10. Mɛni nɔ́ he tomi nɔ́ kpa nɛ Yehowa kɛ tsu ní kɛ tsɔɔ kaa e kɛ yayami keɔ kulaa?
10 Kaa bɔ nɛ wa na ngɛ ní kasemi nɛ sɛ hlami ɔ mi ɔ, a kɛ yayami to “hiɔ” he. (Mat. 6:12; Luka 11:4) Lɔ ɔ he ɔ, be fɛɛ be nɛ wa maa pee yayami kɛ si Yehowa a, e ngɛ kaa nɔ́ nɛ hiɔ nɛ wa ye Yehowa a ngɛ klee. Wa hɛɛ lɛ hiɔ agbo! Se ke Yehowa kɛ wa yayami ke wɔ ɔ, e ngɛ kaa nɔ́ nɛ e po hiɔ nɛ wa hɛɛ lɛ ɔ mi. E hyɛ we blɔ kaa waa wo yayami he hiɔ nɛ e kɛ ke wɔ ɔ. Ke nɔ ko ye hiɔ nɛ a kɛ ke lɛ ɔ, e bua jɔɔ. Jã kɛ̃ nɛ wɔ hu wa bua jɔɔ ke Yehowa ngɔ wa he yayami ɔmɛ kɛ ke wɔ!
“Ngɔɔ wa hiɔ ɔmɛ kɛ ke wɔ” (Mat. 6:12)
11. Ke Baiblo ɔ de ke a “tsu” nɔ ko he yayami ɔ, mɛni e tsɔɔ? (Ní Tsumi 3:19)
11 Pi nɛ Yehowa poɔ wa hiɔ ɔmɛ aloo wa yayami ɔmɛ a mi pɛ kɛkɛ, mohu ɔ, e tsuɔ kɛ jeɔ kulaa. (Kane Ní Tsumi 3:19.) Kaa nɔ hyɛmi nɔ́ ɔ, ke nɔ ko ye hiɔ nɛ a ngɔ kɛ ke lɛ ɔ, a ngɔɔ pen kɛ poɔ hiɔ ɔ mi ngɛ womi mi. Se kɛ̃ ɔ, nɔ ɔ naa hiɔ ɔ nɛ a po mi ɔ loloolo ngɛ womi ɔ mi. Se ke a tsu nɔ́ ko nɛ a ngma ngɛ womi nɔ ɔ, lɛɛ o be nae hu. Bɔ nɛ pee nɛ waa nu munyu nɛ ɔ sisi saminya a, e sa nɛ wa kai kaa ngɛ blema a, ke a kɛ ink ngma ní ɔ, a ma nyɛ maa ngɔ nyu kɛ tsu. Nɔ ko ma nyɛ maa ngɔ kutsa nɛ pɔ kɛ tsu nɔ́ nɛ a ngma a. Lɔ ɔ he ɔ, ke a “tsu” hiɔ nɛ nɔ ko ye ɔ, e laa kulaa, nɛ nɔ ko nɔ ko be nɔ́ nɛ a ngma a nae hu. E ngɛ kaa nɔ́ nɛ nɔ ɔ yi hiɔ ko gblee. Ngɛ anɔkuale mi ɔ, pi nɛ Yehowa poɔ wa yayami ɔmɛ a mi pɛ kɛkɛ, se e tsuɔ wa yayami ɔmɛ kulaa. Enɛ ɔ haa nɛ wa tsui nɔɔ wa mi!—La 51:9.
“Konɛ a tsu nyɛ he yayami ɔmɛ” (Níts. 3:19)
12. Mɛni wa kaseɔ ngɛ nɔ́ he tomi nɔ́ nɛ kɔɔ bɔku kpii nɛ a nɛ a kɛ tsu ní ɔ he ɔ mi?
12 Yehowa ngɔ nɔ́ he tomi nɔ́ kpa ko hu kɛ tsu ní kɛ tsɔɔ bɔ nɛ e tsuɔ yayami ha. E de ke: ‘Ma tsu o he yayami ɔ kaa nɔ́ nɛ bɔku lɛ ha nɔ, nɛ ma tsu o tɔmi ɔmɛ kaa nɔ́ nɛ bɔku kpii lɛ ha nɔ.’ (Isa. 44:22) Ke Yehowa ngɔ wa yayami kɛ ke wɔ ɔ, e ngɛ kaa nɔ́ nɛ e ngɔ bɔku kpii ko kɛ ha wa yayami ɔmɛ a nɔ bɔ nɛ pee nɛ nɔ ko nɛ ko na.
‘Ma tsu o he yayami ɔ kaa nɔ́ nɛ bɔku lɛ ha nɔ’ ( Yes. 44:22)
13. Ke Yehowa kɛ wa he yayamihi ke wɔ ɔ, kɛ wa nuɔ he ha kɛɛ?
13 Mɛni nɛ nɔ́ he tomi nɔ́ nɛ ɔ tsɔɔ? Ke Yehowa kɛ wa yayami ɔmɛ ke wɔ ɔ, e sɛ nɛ wa he nile nɛ ya nɔ nɛ e hi wɔ fɔ bue wa wami be tsuo. Kɛ gu Yesu Kristo muɔ ɔ nɔ ɔ, Yehowa tsu wa he hiɔ ɔmɛ tsuo. Ke Yehowa kɛ wa yayami ɔmɛ ke wɔ ɔ, e ngɛ kaa nɔ́ nɛ wa pee we yayami ko. Ke wa pee yayami nɛ wa pia wa he kɛ je wa tsui mi ɔ, bɔ nɛ Yehowa kɛ keɔ wɔ ha ji nɛ ɔ nɛ.
YEHOWA KPLƐƐƆ WA NƆ NƐ WA BA PEEƆ E HUƐMƐ EKOHU
Yayami nɛ wa hiɔwe Tsɛ ɔ kɛ keɔ wɔ ɔ haa nɛ huɛ bɔmi kpakpa hiɔ waa kɛ lɛ wa kpɛti (Hyɛ kuku 14)
14. Mɛni he je nɛ wa ma nyɛ ma he ye kaa Yehowa kɛ wa he yayami ɔmɛ maa ke wɔ ɔ? (Hyɛ foni ɔmɛ hulɔ.)
14 Ke Yehowa kɛ wa he yayamihi ke wɔ ɔ, lɔ ɔ haa nɛ huɛ bɔmi kpakpa hiɔ waa kɛ lɛ wa kpɛti ekohu. Enɛ ɔ yeɔ buaa wɔ nɛ wa he nile bui wɔ fɔ. E sɛ nɛ wa susu kaa Yehowa hɛɛ wa yayami ɔmɛ a mi, nɛ e ngɛ blɔ ko hlae nɛ e gu nɔ kɛ gbla wa tue. Ngɛ anɔkuale mi ɔ, Yehowa be jã pee kɔkɔɔkɔ. Mɛni he je nɛ wa ma nyɛ ma ná nɔ mi mami kaa ke Yehowa ngɔ wa he yayami ɔmɛ kɛ ke wɔ ɔ, e kɛ keɔ wɔ kulaa a? Yehowa gu gbalɔ Yeremia nɔ kɛ ngma ke: “Ma ngɔ a he yayami ɔmɛ kɛ pa mɛ, nɛ a ní yayami ɔmɛ hu i be kaie hu.” (Yer. 31:34) Bɔfo Paulo hu tsɛ munyu nɛ ɔ se, nɛ e de ke: “I be a yayami ɔmɛ kaie hu.” (Heb. 8:12) Se mɛni nɛ munyu nɛ ɔ tsɔɔ tutuutu?
“A ní yayami ɔmɛ hu i be kaie hu” ( Yer. 31:34)
15. Ke a ke Yehowa kaii we wa yayami ɔmɛ hu ɔ, mɛni e tsɔɔ?
15 Ke a kɛ munyu nɛ ji “kai” ɔ tsu ní ngɛ Baiblo ɔ mi ɔ, pi be fɛɛ be nɛ e tsɔɔ kaa nɔ ko ngɛ nɔ́ ko nɛ be ɔ he susue. Mohu ɔ, e ma nyɛ maa tsɔɔ nɔ́ nɛ nɔ ko maa pee. Ojo fialɔ ɔ nɛ a sɛu lɛ ngɛ Yesu kasa nya a de lɛ ke: “Yesu, ke o sɛ o Matsɛ Yemi ɔ mi ɔ, mo kai mi.” (Luka 23:42, 43) Pi nɛ e ngɛ Yesu dee kaa e kai lɛ ngɛ Matsɛ Yemi ɔ mi pɛ kɛkɛ, mohu ɔ, e ngɛ Yesu bie nɛ e pee nɔ́ ko ha lɛ ngɛ e Matsɛ Yemi ɔ mi. Yesu de ojo fialɔ nɛ ɔ kaa e ma tle lɛ si. Lɔ ɔ he ɔ, ke Yehowa de ke e kaii we wa yayami ɔmɛ hu ɔ, nɔ́ nɛ e ngɛ tsɔɔe ji kaa e kɛ ke wɔ kulaa, nɛ e be wa tue gblae ngɛ wa yayami ɔmɛ a he.
16. Mɛni he nɛ Baiblo ɔ ngɔ wɔ kɛ to?
16 Ke Yehowa kɛ wa yayami ɔ ke wɔ ɔ, wa yeɔ wa he. Baiblo ɔ ngɔ nɔ́ he tomi nɔ́ kpa ko hu kɛ tsu ní konɛ waa nu munyu nɛ ɔ sisi saminya. Akɛnɛ wa yi mluku he je ɔ, a ngɔ wɔ kɛ to “yayami nyɔguɛhi” a he. Se akɛnɛ Yehowa kɛ wa yayami ɔmɛ keɔ wɔ he je ɔ, wa ba pee nyɔguɛhi nɛ a ‘ye a he kɛ je yayami he.’ (Rom. 6:17, 18; Kpoj. 1:5) Kaa bɔ nɛ ke nyɔguɛ ko ye e he nɛ e bua jɔɔ ɔ, jã nɔuu kɛ̃ nɛ ke Yehowa ngɔ wa he yayami ɔmɛ kɛ ke wɔ ɔ, wa hu bua jɔɔ.
“A ha nɛ nyɛ ye nyɛ he kɛ je yayami he” (Rom. 6:18)
17. Mɛni he je nɛ ke a ngɔ nɔ ko he yayami kɛ ke lɛ ɔ, e ngɛ kaa nɔ́ nɛ a tsa lɛ ɔ? (Yesaya 53:5)
17 Kane Yesaya 53:5. Akɛnɛ wa ji yayami peeli he je ɔ, Baiblo ɔ ngɔ wɔ kɛ to nihi nɛ a nu gbenɔ hiɔ ɔ he. Kɛ gu Yesu kpɔmi afɔle sami ɔ nɔ ɔ, wa ngɛ kaa nihi nɛ Yehowa tsa mɛ ngɛ okadi peemi blɔ nɔ. (1 Pet. 2:24) Ke wa pee yayami ɔ, huɛ bɔmi nɛ ngɛ waa kɛ Yehowa wa kpɛti ɔ puɛɔ. Se kɛ gu kpɔmi nɔ́ ɔ nɔ ɔ, Yehowa kɛ wa yayami ɔmɛ ma nyɛ maa ke wɔ, nɛ huɛ bɔmi kpakpa ma ba hi waa kɛ lɛ wa kpɛti ekohu. Ke nɔ ko nu gbenɔ hiɔ ko nɛ a tsa lɛ ɔ, e bua jɔɔ wawɛɛ. Jã nɔuu kɛ̃ nɛ ke Yehowa kɛ wa he yayami ɔmɛ ke wɔ, nɛ huɛ bɔmi kpakpa ba hi waa kɛ lɛ wa kpɛti ekohu ɔ, wa bua jɔɔ.
“A wo e he pa, konɛ wɔɔ lɛɛ wa ná tsami” ( Yes. 53:5)
BƆ NƐ WA NÁA YAYAMI NƐ YEHOWA KƐ KEƆ Ɔ HE SE HA
18. Mɛni wa kaseɔ ngɛ nɔ́ he tomi níhi nɛ kɔɔ bɔ nɛ Yehowa kɛ yayami keɔ ha a mi? (Hyɛ daka nɛ ji, “Bɔ Nɛ Yehowa Kɛ Wa Yayami Ɔmɛ Keɔ Wɔ Ha.”)
18 Mɛni wa kaseɔ ngɛ nɔ́ he tomi níhi nɛ kɔɔ bɔ nɛ Yehowa kɛ yayami keɔ ha a mi? Ke Yehowa kɛ tɔmi ke ɔ, e kɛ keɔ kulaa nɛ e kaii we hu. Enɛ ɔ yeɔ buaa wɔ nɛ huɛ bɔmi kpakpa hiɔ waa kɛ wa hiɔwe Tsɛ ɔ wa kpɛti. Jehanɛ hu ɔ, wa le kaa yayami nɛ a kɛ keɔ ɔ ji nike ní nɛ je Yehowa nɛ ngɛ suɔmi nɛ e mi mi jɔ ɔ ngɔ, nɛ e kɛ haa adesahi nɛ a ji yayami peeli ɔ. Ngɛ anɔkuale mi ɔ, e ji nike ní nɛ Yehowa kɛ dloo wɔ.—Rom. 3:24.
19. (a) Mɛni he nɛ e sa nɛ wa bua nɛ jɔ ngɛ? (Roma Bi 4:8) (b) Mɛni he wa ma susu ngɛ ní kasemi nɛ nyɛɛ se ɔ mi?
19 Kane Roma Bi 4:8. E sa kaa wa ti nɔ fɛɛ nɔ bua nɛ jɔ kaa Yehowa ji Mawu nɛ ngɔɔ yayami kɛ “keɔ kulaa”! (La 130:4) Se ke wa suɔ nɛ Yehowa nɛ ngɔ wa he yayamihi kɛ ke wɔ ɔ, e sa nɛ waa pee nɔ́ ko nɛ he hia wawɛɛ. Yesu de ke: “Ke nyɛ ngɔɛ nihi a tɔmihi kɛ pɛ mɛ ɔ, nyɛ Tsɛ ɔ hu kɛ nyɛ tɔmihi be nyɛ pae.” (Mat. 6:14, 15) Ngɛ anɔkuale mi ɔ, e sa kaa waa kase bɔ nɛ Yehowa kɛ tɔmi keɔ ha a. Se mɛni blɔ nɔ wa maa gu kɛ pee jã? Wa maa na heto ɔ ngɛ ní kasemi nɛ nyɛɛ se ɔ mi.
LA 46 Wa Naa Mo Si Yehowa
