Ye papaa kɛ ye mami yaa Katoliki sɔlemi ɔ, nɛ a kɛ Mawu jami fiɛ we kulaa. Se benɛ Yehowa Odasefohi tsɔɔ mɛ ngɛ Baiblo ɔ mi kaa a tsɛɛ Mawu ke Yehowa a, a ba pee Yehowa Odasefohi, nɛ a kɛ kã sɔmɔ Yehowa. Jinɛ ye papaa ngɔɔ tso kɛ kpɛɔ Yesu he fonihi, se e pee we jã hu. Mohu ɔ, e ngɔ kapitɛ ní tsumi ɔ he nile nɛ e ngɛ ɔ kɛ tsake wa tsu ɔ sisi ɔ kɛ pee Matsɛ Yemi Asa. Enɛ ɔ ji kekleekle Matsɛ Yemi Asa nɛ wa ná ngɛ San Juan del Monte nɛ ngɛ Philippines ma ngua nɛ ji Manila a mi ɔ.

A fɔ mi ngɛ jeha 1952 ɔ mi. Ye fɔli ɔmɛ tsɔɔ mi Yehowa he ní kaa bɔ nɛ a tsɔɔ ye nyɛmimɛ ɔmɛ ɔ. I ngɛ nyɛmimɛ nyumu nikɔtɔmahi eywiɛ kɛ nyɛmimɛ yihi nikɔtɔmahi hu etɛ. Benɛ i ngɛ wae ɔ, ye papaa wo mi he wami kaa ma kane Baiblo ɔ. E de mi kaa ke e hí kulaa a, ma kane yi kake daa ligbi. Jehanɛ hu ɔ, e kɛ mi kase asafo ɔ womi slɔɔtoslɔɔtohi. Be komɛ ɔ, ye fɔli ɔmɛ haa nɛ kpɔ mi nɔ hyɛli kɛ asafo ɔ ní tsumi kɔni ɔ nane mi dali ba hiɔ wa we ɔ mi. Níhi a si kpamihi nɛ nyɛmimɛ nɛ ɔmɛ deɔ wɔ ɔ, woɔ wɔ he wami nɛ wa náa bua jɔmi. Enɛ ɔ wo wa weku ɔ he wami nɛ wɔ tsuo waa kɛ Yehowa sɔmɔmi pee nɔ́ titli ngɛ wa si himi mi.

Ye fɔli ɔmɛ kɛ anɔkuale yemi sɔmɔ Yehowa, nɛ i kase ní babauu kɛ je a nɔ hyɛmi nɔ́ ɔ mi. Benɛ ye mami ba nu hiɔ nɛ e gbo se ɔ, i kɛ ye papaa tsuo je blɔ gbami ní tsumi ɔ sisi ngɛ jeha 1971 ɔ mi. Se ngɛ jeha 1973 ɔ mi benɛ i ye jeha 20 ɔ, ye papaa hu ba gbo. Akɛnɛ ye fɔli ɔmɛ tsuo gbo he je ɔ, ye kɔni mi jɔ̃ nɛ i nu he kaa e piɛ imi nɔ kake pɛ. Se hɛ kɛ nɔ fɔmi nɛ ngɛ “gbugbuugbu nɛ e pi si kpɛii” nɛ ngɛ Baiblo ɔ mi ɔ ye bua mi nɛ i ná juɛmi nɛ da nɛ i hɛwi tsɔ, nɛ huɛ bɔmi nɛ ngɛ i kɛ Yehowa wa kpɛti ɔ mi wa. (Heb. 6:19) Benɛ ye papaa gbo ɔ, e kɛ we nɛ a de mi kaa ma ya sɔmɔ kaa blɔ gbalɔ klɛdɛɛ ngɛ zugba kpɔ nɛ nyu bɔle lɛ nɛ e tsɔ e he banee nɛ ngɛ Coron ngɛ Palawan kpokpa a nɔ ɔ.

Benɛ i ya su Coron ɔ, jamɛ a be ɔ, i ye jeha 21. Akɛnɛ i wa ngɛ ma ngua mi he je ɔ, benɛ i na  kaa nihi bɔɔ pɛ lɛ a ngɛ light, pipe kɛ lɔle loo moto ngɛ a we ɔmɛ a mi ɔ, e pee mi nyakpɛ wawɛɛ nitsɛ. E ngɛ mi kaa nyɛmimɛ komɛ ngɛ lejɛ ɔ mohu lɛɛ, se a ti nɔ ko tsu we blɔ gbami ní tsumi ɔ konɛ i kɛ lɛ nɛ ya fiɛɛmi. Enɛ ɔ he ɔ, be komɛ ɔ, imi pɛ lɛ i yaa fiɛɛmi. Sisije ɔ, ye hɛ ja ngɛ ye wekuli kɛ ye huɛmɛ a he wawɛɛ nitsɛ. Ke je jɔ ɔ, i hyɛɔ dodoe ɔmɛ nɛ a ngɛ kpɛe ngɛ hiɔwe ɔ, nɛ i foɔ ya. I nu he kaa ma kpa ye sɔmɔmi ní tsumi ɔ nɛ ma je kɛ ho we mi ya.

Ngɛ si fɔfɔɛ nɛ ɔmɛ a mi ɔ, i jeɔ ye tsui mi nɛ i sɔleɔ kɛ haa Yehowa. I kaiɔ he wami womi munyuhi nɛ i kane ngɛ Baiblo ɔ kɛ asafo ɔ womi ɔmɛ a mi ɔ. Behi fuu ɔ, La 19:14 ɔ baa ye yi mi. I na kaa ke i pue ye yi mi tɛ ngɛ níhi nɛ Yehowa pee kɛ e su ɔmɛ a he ɔ, lɔ ɔ ma ha nɛ ma ngɔ Yehowa kɛ pee “ye Tɛsa kɛ ye Kpɔlɔ.” Jehanɛ hu ɔ, munyu nɛ ji, “You Are Never Alone” a nɛ ngɛ Hwɔɔmi Mɔ ko mi ɔ ye bua mi wawɛɛ. I kane munyu nɛ ɔ si abɔ. Ke i nu he kaa e piɛ imi nɔ kake pɛ ɔ, i nuɔ he kaa Yehowa ngɛ ye kasa nya, nɛ i ngɔɔ jamɛ a be ɔ kɛ sɔleɔ, nɛ i kaseɔ ní nɛ i pueɔ ye yi mi tɛ.

Benɛ i ya su Coron ɔ, e kɛ we nɛ a hla mi kaa asafo mi nɔkɔtɔma. Imi pɛ ji asafo mi nɔkɔtɔma ngɛ lejɛ ɔ. Enɛ ɔ he ɔ, i bɔni Teokrase Sɔmɔmi Sukuu, Sɔmɔmi Kpe, Asafo Mi Womi Mi Ní Kasemi kɛ Hwɔɔmi Mɔ Mi Ní Kasemi ɔ nɔ hyɛmi daa otsi. Jehanɛ hu ɔ, daa otsi ɔ, i tuɔ magbɛ nɔ munyu. Akɛnɛ i be deka he je ɔ, i ná we be kɛ susu ye si fɔfɔɛ ɔ he hu. I nui he kaa e piɛ imi pɛ!

Fiɛɛmi ní tsumi ɔ nɛ i ngɛ tsue ngɛ Coron ɔ wo yiblii, nɛ bɔɔbɔɔbɔɔ ɔ, a baptisi ye Baiblo kaseli ɔmɛ ekomɛ. Se kɛ̃ ɔ, i kɛ nyagba komɛ hu kpe. Be komɛ ɔ, i nyɛɛɔ kɛ jeɔ mɔtu kɛ ya siɔ piani loko i ya suɔ zugba kpɔ nɛ i yaa fiɛɛ ngɛ mi ɔ mi, nɛ ke i ya su hu ɔ, i li he nɛ ma hwɔ. Zugba kpɔhi nɛ nyu bɔle mɛ ɔ fuu ngɛ asafo ɔ zugba kpɔ ɔ mi. E ngɛ mi kaa oslɔke kuɔ wawɛɛ ngɛ wo ɔ nɔ, nɛ i li slemi mohu lɛɛ, se kɛ̃ ɔ, i kɛ lɛ pɔɔ blɔ hiami ngɛ wo ɔ nɔ. Ngɛ haomi be nɛ ɔmɛ tsuo a mi ɔ, Yehowa po ye he piɛ. I ba yɔse kaa Yehowa ngɛ mi ye buae konɛ ma nyɛ ma tsu ní tsumi nɛ e he wa wawɛɛ nɛ a kɛ maa wo ye dɛ pee se ɔ.

Ngɛ jeha 1978 ɔ mi ɔ, a ha nɛ i ya sɔmɔ ngɛ Papua New Guinea nɛ ngɛ Australia ma a woyi je ɔ. Papua New Guinea ji he ko nɛ yokuhi ngɛ wawɛɛ, nɛ e piɛ bɔɔ nɛ e klemi kɛ Spain ma a klemi maa sɔ. E pee mi nyakpɛ kaa nihi nɛ a ngɛ Papua New Guinea ɔ a hiɛmi maa su ayɔ etɛ, se gbihi nɛ a tuɔ ɔ hiɛ pe 800. Nihi nɛ a ngɛ ma a mi ɔ a ti nihi hiɛhiɛɛ tuɔ Melanesian Pidgin nɛ́ a pɔɔ lɛ tsɛmi ke Tok Pisin ɔ.

A ha nɛ i kɛ be bɔɔ ya sɔmɔ ngɛ asafo ko nɛ a tuɔ blɛfo gbi ngɛ mi ɔ mi ngɛ ma ngua nɛ ji Port Moresby ɔ mi. Se i ya je asafo ko nɛ a tuɔ Tok Pisin ngɛ mi ɔ mi, nɛ i ya kase jamɛ a gbi ɔ. I fiɛɛɔ ngɛ gbi nɛ i ngɛ kasee ɔ mi. Enɛ ɔ ha nɛ i ya ye hɛ mi wawɛɛ ngɛ gbi ɔ kasemi mi. E kɛ we nɛ i tu magbɛ nɔ munyu ngɛ Tok Pisin mi. Benɛ i ya Papua New Guinea ɔ, e sui jeha kake nɛ a ha nɛ i ya sɔmɔ kaa kpɔ mi nɔ hyɛlɔ ngɛ Tok Pisin asafohi babauu nɛ ngɛ kpokpa a nɔ ɔ a mi. Enɛ ɔ pee mi nyakpɛ wawɛɛ.

Akɛnɛ asafo ɔmɛ a he kɛ he je ɔ, i toɔ kpɔ mi kpehi fuu a he blɔ nya, nɛ enɛ ɔ haa nɛ i pɔɔ blɔ hiami wawɛɛ. Akɛnɛ i ya je ma ehe mi, nɛ e slo gbi nɛ a tuɔ kɛ bɔ nɛ a peeɔ a ní ha a he je ɔ, sisije ɔ,  i nu he kaa e piɛ imi pɛ. I nyɛ we nɛ i kɛ lɔle nɛ hia blɔ kɛ ya slaa asafo ɔmɛ, ejakaa yokuhi fuu ngɛ lejɛ ɔ. Enɛ ɔ he ɔ, daa otsi ɔ, i kɛ ɛloplee hiaa blɔ. Be komɛ ɔ, imi pɛ i hiɔ ɛloplee nyafii ko nɛ e tsu we ní saminya a mi kɛ hiaa blɔ. Blɔ hiami nɛ ɔmɛ ha nɛ i ye tsui wawɛɛ kaa bɔ nɛ e ji benɛ i kɛ boat hia blɔ ɔ!

Nihi bɔɔ pɛ lɛ a ngɛ tɛlifoo. Enɛ ɔ he ɔ, i kɛ asafo ɔmɛ sɛɛɔ ní kɛ guɔ sɛ womi ngmami nɔ. Behi fuu ɔ, i ya suɔ nyɛmimɛ ɔmɛ a ngɔ loko sɛ womi ɔmɛ po ba suɔ, nɛ e ma bi nɛ ma hla nyɛmimɛ ɔmɛ a se blɔ. Be fɛɛ be nɛ ma na nyɛmimɛ ɔmɛ ɔ, a nyaa ye he, nɛ a jeɔ hɛsa kpo. Enɛ ɔ haa nɛ i kaiɔ kaa ye dengme gbomi ɔ pee we yaka. Yehowa ye bua mi ngɛ blɔhi fuu a nɔ, nɛ huɛ bɔmi nɛ ngɛ i kɛ lɛ wa kpɛti ɔ mi wa wawɛɛ.

Benɛ i ya asafo mi kpe kekleekle be ngɛ Bougainville zugba kpɔ nɛ nyu bɔle lɛ ɔ nɔ ɔ, i kɛ nyɛminyumu ko kɛ e yo ya kpe ngɛ lejɛ ɔ. A ba ye ngɔ kɛ a nya he muɔ nɛ a bi mi ke, “O kai wɔ lo?” Kɛkɛ nɛ i kai kaa kekleekle be nɛ i ya Port Moresby ɔ, i fiɛɛ ha mɛ. I kɛ mɛ je Baiblo ɔ kasemi sisi, nɛ i ngɔ mɛ kɛ ha nyɛminyumu ko nɛ ngɛ lejɛ ɔ konɛ e kɛ mɛ nɛ tsa nɔ. Amlɔ nɛ ɔ, a baptisi mɛ! Jɔɔmihi babauu nɛ i ná benɛ i hi Papua New Guinea jeha etɛ ɔ, a kpɛti kake ji nɛ ɔ nɛ.

Loko ma je Coron ma a mi ngɛ jeha 1978 ɔ mi ɔ, i kɛ nyɛmiyo ko nɛ e he ngɛ fɛu nɛ e suɔ Yehowa a ya kpe. A tsɛɛ lɛ ke Adel. E ji daa blɔ gbalɔ nɛ e ngɛ e bimɛ enyɔ nɛ ji Samuel kɛ Shirley tsɔsee. Lɛ nɔuu nɛ e ngɛ e mami nɛ e wa ngɛ jeha mi ɔ hyɛe. Ngɛ May 1981 ɔ, i kpale kɛ ho Philippines ya, nɛ i kɛ Adel sɛ gba si himi mi. Lɔ ɔ se ɔ, i kɛ Adel tsu blɔ gbami ní tsumi ɔ, nɛ wa pee kake kɛ hyɛ weku ɔ nɔ.

E ngɛ mi kaa i ngɛ weku mohu lɛɛ, se ngɛ jeha 1983 ɔ mi ɔ, a kpale hla mi kaa ma ya sɔmɔ kaa blɔ gbalɔ klɛdɛɛ ngɛ Linapacan zugba kpɔ nɛ nyu bɔle lɛ ngɛ Palawan kpokpa a nɔ ɔ mi. Enɛ ɔ he ɔ, wa weku ɔ tsuo hia kɛ ya hi lejɛ ɔ. Ma nɛ ɔ tsɔ e he banee nɛ Odasefono ko hu be lejɛ ɔ. Maa pee jeha kake se ɔ, Adel mami ba gbo. Se waa kɛ wa he wo fiɛɛmi ní tsumi ɔ mi wawɛɛ nɛ lɔ ɔ ye bua wɔ nɛ wa nyɛ da si fɔfɔɛ ɔ nya. Waa kɛ nihi fuu nɛ a suɔ kaa a maa ba asafo mi kpe ɔ je Baiblo ɔ kasemi sisi. Be bɔɔ se ɔ, wa na kaa wa hia Matsɛ Yemi Asa kpokploo ko. Enɛ ɔ he ɔ, wɔ nitsɛmɛ wa ma eko. Benɛ wa ye jeha etɛ ngɛ Linapacan se ɔ, wa bua jɔ kaa nihi 110 ba Kaimi ɔ nɛ wa pee ɔ, nɛ a kpɛti nihi fuu ya a hɛ mi, nɛ a baptisi mɛ pee se benɛ wa je lejɛ ɔ.

Ngɛ jeha 1986 mi ɔ, a ha nɛ i ya sɔmɔ ngɛ Culion zugba kpɔ nɛ nyu bɔle lɛ ɔ nɔ. Nihi fuu ngɛ lejɛ ɔ nɛ a nu kpiti hiɔ. Benɛ wa hi lejɛ ɔ bɔɔ ɔ, a hla Adel hu kaa e sɔmɔ kaa blɔ gbalɔ klɛdɛɛ. Sisije ɔ, wa ye gbeye kaa wa maa fiɛɛ kɛ ha nihi nɛ a nu kpiti ɔ. Se nyɛmimɛ nɛ a ngɛ ma a mi ɔ ha nɛ wa ná nɔ mi mami kaa a pee tsopa kɛ ha nihi tsuo nɛ a nu kpiti hiɔ ɔ, enɛ ɔ he ɔ, e he maa wa kaa a hiɔ ɔ ma sã nɔ. Nihi nɛ a nu kpiti hiɔ ɔ, a kpɛti ni komɛ yaa asafo mi kpe nɛ a peeɔ ngɛ nyɛmiyo ko we mi ɔ. Bɔɔbɔɔbɔɔ ɔ, e yi ha wɔ hu kaa wa maa fiɛɛ hɛnɔkami nɛ wa ngɛ ɔ kɛ ha kpititsɛmɛ ɔmɛ nɛ a susu kaa Mawu  kɛ adesahi kua mɛ ɔ. E hi wawɛɛ kaa nimli nɛ ɔmɛ nɛ a be he wami ɔ ba kase Yehowa he ní, nɛ a bua jɔ wawɛɛ kaa hwɔɔ se ɔ, a ma ná nɔmlɔ tso mi he wami kpakpa.—Luka 5:​12, 13.

Mɛni ye bua wa bimɛ ɔmɛ nɛ a nyɛ nɛ a hi Culion ma a mi? Wa fɔ nyɛmimɛ yihewi enyɔ komɛ nɛ a ngɛ Coron ɔ nine kɛ ba wa ngɔ konɛ wa bimɛ ɔmɛ kɛ mɛ nɛ bɔ. Samuel kɛ Shirley kɛ yihewi enyɔ nɛ ɔmɛ suɔ kaa a maa ye bua nihi konɛ a le anɔkuale ɔ. Enɛ ɔ he ɔ, a kɛ jokuɛwi fuu kaseɔ Baiblo ɔ, nɛ i kɛ Adel hu waa kɛ jokuɛ ɔmɛ a fɔli ɔmɛ kaseɔ Baiblo ɔ. E ba su he ko ɔ, waa kɛ wekuhi 11 kaseɔ Baiblo ɔ. Nihi nɛ waa kɛ mɛ ngɛ Baiblo ɔ kasee ɔ ngɛ a hɛ mi yae, enɛ ɔ he ɔ, wa nyɛ nɛ wa to asafo ehe sisi.

Sisije ɔ, imi pɛ ji asafo mi nɔkɔtɔma ngɛ lejɛ ɔ. Enɛ ɔ he ɔ, asafo ɔ ní tsumi kɔni ɔ de mi kaa i kɛ fiɛɛli kpaanyɔ nɛ a ngɛ Culion ɔ nɛ pee asafo mi kpe daa otsi. Jehanɛ hu ɔ, a de mi kaa i kɛ fiɛɛli nɛɛ nɛ a ngɛ kɔpe nɛ ji Marily ɔ mi ɔ nɛ pee asafo mi kpe daa otsi. Ke o ngɔ lɛ kɛ hia blɔ kɛ yaa kɔpe nɛ ɔ mi ɔ, e ma he ngmlɛfia etɛ. Ke wa kpa asafo mi kpe ɔ, wa nyɛɛɔ ngmlɛfiahi babauu ngɛ yokuhi a kpɛ nɛ waa kɛ nihi ya kaseɔ Baiblo ɔ ngɛ kɔpe ko nɛ a tsɛɛ ke Halsey ɔ mi.

Bɔɔbɔɔbɔɔ ɔ, nihi babauu nɛ a ngɛ Marily kɛ Halsey ɔ ba anɔkuale ɔ mi, nɛ wa ma Matsɛ Yemi Asahi ngɛ he nɛ ɔmɛ. Nyɛmimɛ ɔmɛ kɛ ni kpahi nɛ a bua jɔ sɛ gbi ɔ he ngɛ Linapacan ɔ ye bua kɛ ma Matsɛ Yemi Asa amɛ. Matsɛ Yemi Asa nɛ a ma ngɛ Marily ɔ ma nyɛ maa wo nihi 200, nɛ a ma nyɛ ma bli mi hulɔ. Enɛ ɔ he ɔ, wa nyɛ nɛ wa ngɔ lejɛ ɔ kɛ pee kpehi.

Ngɛ jeha 1993 ɔ mi benɛ jokuɛ ɔmɛ wa a, i kɛ Adel je kpɔ mi nɔ hyɛmi ní tsumi ɔ sisi ngɛ Philippines. Nɛ ngɛ jeha 2000 ɔ mi ɔ, i ya Sɔmɔli A Tsɔsemi Sukuu ɔ konɛ a tsɔse mi nɛ ma tsɔɔ nihi nɛ a yaa jamɛ a sukuu ɔ ní. I nu he kaa ye he sui kɛ ha ní tsumi nɛ ɔ, se Adel woɔ mi he wami be fɛɛ be. E kaiɔ mi kaa Yehowa ma ha mi he wami nɛ ma kɛ tsu ní tsumi ehe nɛ a kɛ wo ye dɛ ɔ. (Filip. 4:13) Adel le kaa nɔ́ nɛ e ngɛ dee ɔ ji anɔkuale, ejakaa e nyɛ nɛ e ngɛ ní tsumi nɛ a kɛ wo e dɛ ɔ tsue ngɛ he wami nɛ e be ɔ tsuo se.

 Ngɛ jeha 2006 benɛ i ngɛ ní tsɔɔe ngɛ Sɔmɔli A Tsɔsemi Sukuu ɔ, Adel nu hiɔ ko nɛ a tsɛɛ ke Parkinson disease ɔ. Wa nya kpɛ wa he wawɛɛ! Benɛ i de Adel kaa i suɔ nɛ wa kpa be tsuo sɔmɔmi ní tsumi ɔ konɛ ma hyɛ e nɔ ɔ, e de mi ke, “Mo hla dɔkita ko nɛ e ba hyɛ mi, ejakaa i le kaa Yehowa maa ye bua wɔ konɛ wa tsu ní tsumi nɛ a kɛ wo wa dɛ ɔ.” Adel ya nɔ nɛ e kɛ jeha ekpa tsu e sɔmɔmi ní tsumi ɔ nɛ e tu we níhi a he munyu nyanyaanya. Benɛ e nyɛ we nyɛɛmi kulaa a, e hiɔ wheelchair mi kɛ fiɛɛɔ. Benɛ munyu tumi he wa ha lɛ po ɔ, e ngɔɔ munyungu kake loo enyɔ kɛ haa sane heto ngɛ asafo mi kpe sisi. Nyɛmimɛ ɔmɛ maneɔ Adel sɛ gbi be fɛɛ be nɛ a deɔ lɛ kaa a bua jɔ nɔ hyɛmi nɔ́ kpakpa nɛ e ngɛ pee ɔ he wawɛɛ. Adel fĩ si kɛ ya si benɛ e gbo ngɛ jeha 2013 ɔ mi. I kɛ ye suɔlɔ Adel nɛ e yeɔ anɔkuale ɔ hi si jeha 30 kɛ se sɔuu. Enɛ ɔ he ɔ, benɛ e gbo ɔ, i ye aywilɛho nɛ ye hɛ bɔni jami ekohu.

Adel suɔ nɛ ma ya nɔ nɛ ma tsu be tsuo sɔmɔmi ní tsumi ɔ. Enɛ ɔ he ɔ, i pee jã. Akɛnɛ i ya nɔ nɛ i pee babauu he je ɔ, i nyɛ nɛ i da aywilɛho yemi ɔ nya. Kɛ je jeha 2014 kɛ ya si jeha 2017 ɔ, a ha nɛ i ya slaa asafohi nɛ a tuɔ Tagalog gbi ɔ ngɛ mahi nɛ a tsi wa ní tsumi ɔ nya ngɛ mi ɔ mi. Ngɛ lɔ ɔ se ɔ, i ya slaa asafo komɛ nɛ a tuɔ Tagalog gbi ɔ ngɛ Taiwan, United States kɛ Canada. Ngɛ jeha 2019 ɔ mi ɔ, a pee Sukuu Kɛ Ha Matsɛ Yemi Sane Kpakpa Fiɛɛli ɔ ekomɛ ngɛ India kɛ Thailand ngɛ blɛfo gbi mi, nɛ i ya tsɔɔ sukuubi ɔmɛ ní. Ní tsumi nɛ ɔmɛ tsuo nɛ i tsu ɔ ha nɛ ye bua jɔ wawɛɛ. Ke i kɛ ye he wo Yehowa sɔmɔmi mi vii ɔ, e haa nɛ ye bua jɔɔ wawɛɛ.

Be fɛɛ be nɛ a ma ha mi ní tsumi ehe ko ɔ, huɛ bɔmi gbagbanii hiɔ i kɛ nyɛmimɛ ɔmɛ a kpɛti. Enɛ ɔ he ɔ, ke e ma bi nɛ ma je a he ɔ, e he waa ha mi wawɛɛ. Ke e ba jã a, i ngɔɔ ye hɛ kɛ fɔɔ Yehowa nɔ wawɛɛ. Yehowa yeɔ buaa mi be fɛɛ be, nɛ enɛ ɔ ha nɛ i jeɔ ye tsui mi nɛ i kplɛɛɔ tsakemi fɛɛ tsakemi nɛ maa ba ye si himi mi ɔ nɔ. Amlɔ nɛ ɔ, i ngɛ sɔmɔe kaa blɔ gbalɔ klɛdɛɛ ngɛ Philippines. Ye hɛ muɔ si ngɛ ye asafo ehe ɔ mi, nɛ nihi nɛ a ngɛ asafo ɔ mi ɔ susuɔ ye he wawɛɛ, nɛ a yeɔ buaa mi kaa weku. Samuel kɛ Shirley hu ngɛ mɔde bɔe wawɛɛ kaa a maa kase a mami hemi kɛ yemi ɔ, nɛ ye bua jɔ kaa a ngɛ jã pee.—3 Yoh. 4.

Ngɛ anɔkuale mi ɔ, i kɛ kahi fuu kpe ngɛ ye si himi mi. E dɔ mi wawɛɛ kaa ye yo nɛ i suɔ lɛ ɔ na nɔ́ nɛ e gbo ngɛ hiɔ yaya nɛ ɔ dɛ mi. Jehanɛ hu ɔ, e he ba hia nɛ ma tsake ye he kɛ wo si fɔfɔɛ slɔɔtohi a mi. Se kɛ̃ ɔ, i na kaa Yehowa “kɛ wa ti nɔ fɛɛ nɔ he kɛ we.” (Níts. 17:27) Yehowa nine “be kpiti tsɔ” nɛ e kɛ maa ye bua e sɔmɔli nɛ e wo mɛ he wami, nɛ ni nɛmɛ nɛ a ngɛ hehi nɛ tsɔ a he banee ɔ po piɛɛ he. (Yes. 59:1) Yehowa, ye Tɛsa a kɛ mi ngɛ ye wami be ɔ tsuo ɔ, nɛ ye hɛ sa nɔ́ fɛɛ nɔ́ nɛ e pee ha mi ɔ. Ngɛ anɔkuale mi ɔ, Yehowa si we mi kɔkɔɔkɔ.