1-2. Mɛni nyakpɛ nɔ́ ko nɛ ya nɔ ngɛ Pentekoste ligbi ɔ nɔ ngɛ jeha 33 ɔ mi?

MO SUSU nɔ́ nɛ ya nɔ Hɔgba mɔtu ngɛ Pentekoste ligbi ɔ nɔ ngɛ jeha 33 ɔ mi ngɛ Yerusalem ɔ he nɛ o hyɛ. Kaseli 120 bua a he nya ngɛ hiɔwe tsu ko mi. (Níts. 1:13-15; 2:1) Yesu sɛ hlami fã mɛ kaa a hi Yerusalem, ejakaa e be kɛe nɛ a ma ná nike ní klɛdɛɛ ko. (Níts. 1:4, 5) Lɔ ɔ se ɔ, mɛni ba?

² “Si kake too ɔ, nɔ́ ko bɔni pɛmi kɛ je hiɔwe kaa kɔɔhiɔ nɛ nya wa nɛ ngɛ fiae.” Nɔ́ ɔ pɛmi ɔ hyi we ɔ mi tsuo. Kɛkɛ nɛ “lilɛhi nɛ a ngɛ kaa la” ba ma kaseli ɔmɛ a yi mi, nɛ “mumi klɔuklɔu hyi mɛ tsuo tɔ.” (Níts. 2:2-4) Kɛ gu blɔ nɛ ɔ nɔ ɔ, Yehowa plɛ e mumi klɔuklɔu ɔ kɛ pue kaseli ɔmɛ a nɔ. (Níts. 1:8) A ba pee nihi nɛ a ngɔ mumi klɔuklɔu * ɔ kɛ pɔ mɛ nu kekle nɛ a ná hɛ nɔ kami kaa a kɛ Yesu maa ye matsɛ ngɛ hiɔwe.

3. Mɛni he je nɛ nihi nɛ a pɔ mɛ nu ngɛ Pentekoste ligbi ɔ nɔ ɔ ná nɔ mi mami kaa a kɛ mumi klɔuklɔu ɔ lɛ pɔ mɛ nu ɔ?

³ Kaa o piɛɛ kaseli ɔmɛ a he ngɛ hiɔwe tsu ɔ mi ɔ, jinɛ o hɛ be jamɛ a ligbi ɔ nɔ jee kɔkɔɔkɔ. Lilɛ nɛ ngɛ kaa la ba ma o yi mi, kɛkɛ nɛ o bɔni gbi slɔɔtohi tumi! (Níts. 2:5-12) Enɛ ɔ ma ha nɛ o ná nɔ mi mami kaa a kɛ mumi klɔuklɔu ɔ pɔ mo nu. Se anɛ nihi nɛ a kɛ mumi klɔuklɔu ɔ  pɔ mɛ nu ɔ tsuo na okadi ko ngɛ nyakpɛ blɔ nɔ lo? Anɛ a pɔ mɛ nu ngɛ be kake mi ngɛ a si himi mi lo? Ohoo. Kɛ wa pee kɛɛ kɛ le?

4. Anɛ a pɔ Kristofohi nɛ a hi si ngɛ kaseli ɔmɛ a be ɔ mi ɔ tsuo nu ngɛ be kake mi ngɛ a si himi mi lo? Moo tsɔɔ nya.

⁴ Nyɛ ha nɛ wa susu be nɛ a ma nyɛ maa pɔ nɔ ko nu ɔ he. Pi Kristofohi 120 ɔ pɛ nɛ a pɔ mɛ nu ngɛ Pentekoste ligbi ɔ nɔ ngɛ jeha 33 ɔ mi. Pee se ngɛ jamɛ a ligbi ɔ nɔuu mi ɔ, nihi 3,000 hu ná mumi klɔuklɔu ɔ nɛ a wo he si ɔ. A pɔ mɛ nu benɛ a baptisi mɛ ɔ. (Níts. 2:37, 38, 41) Se ngɛ lɔ ɔ se ɔ, pi nihi tsuo nɛ a ná mumi klɔuklɔu ɔ benɛ a baptisi mɛ ɔ. Samaria bi ɔmɛ ná mumi klɔuklɔu ɔ ngɛ a baptisimi se. (Níts. 8:14-17) Se Konelio kɛ e weku ɔ lɛɛ, a nu pɔmi ɔ ngɛ ekpa kulaa. A pɔ mɛ nu po loko a baptisi mɛ.​—Níts. 10:44-48.

5. Ngɛ 2 Korinto Bi 1:21, 22 ɔ nya a, mɛni yaa nɔ ke a kɛ mumi klɔuklɔu ɔ pɔ nɔ ko nu?

⁵ Jehanɛ hu ɔ, nyɛ ha nɛ wa susu nɔ́ nɛ yaa nɔ ke a kɛ mumi klɔuklɔu ɔ pɔ Kristofo no ko nu ɔ he nɛ waa hyɛ. Eko ɔ, sisije ɔ, e he maa wa ha ni komɛ nɛ a pɔ mɛ nu ɔ kaa a maa kplɛɛ nɔ kaa Yehowa hla mɛ. Eko ɔ, a ma bi ke, ‘Mɛni he je nɛ Mawu hla mi?’ Eko ɔ, ni komɛ hu be a ní pee jã. Bɔfo Paulo tsɔɔ nɔ́ nɛ yaa nɔ ke a pɔ nɔ ko nu. E de ke: “Benɛ nyɛ he ye se ɔ, a gu e nɔ nɛ a ngɔ mumi klɔuklɔu nɛ a wo he si ɔ kɛ sɔu nyɛ nya, * enɛ ɔ ji wa gbosi ní yemi ɔ he okadi nɛ a sɛ hlami nɛ a kɛ ha.” (Efe. 1:13, 14; sisi ningma.) Enɛ ɔ he ɔ, Yehowa guɔ e mumi klɔuklɔu ɔ nɔ kɛ haa nɛ Kristofohi nɛ ɔmɛ náa nɔ mi mami kaa a hla mɛ. Kɛ gu blɔ nɛ ɔ nɔ ɔ, mumi klɔuklɔu ɔ pee kaa “okadi [si womi]” nɛ maa nɔ mi kɛ haa nɔ ɔ kaa hwɔɔ se ɔ, e maa hi hiɔwe kɛ ya neneene, se pi zugba nɛ ɔ nɔ.​—Kane 2 Korinto Bi 1:21, 22.

6. Ke Kristofo no nɛ a pɔ lɛ nu ɔ maa ya hiɔwe ɔ, mɛni e sa nɛ e pee?

 ⁶ Ke a pɔ Kristofo no ko nu ɔ, anɛ lɔ ɔ tsɔɔ kaa kokooko ɔ, e maa ya hiɔwe lo? Dɛbi. Nɔ ɔ ngɛ nɔ mi mami kaa a hla lɛ kaa e maa ya hiɔwe. Se e sa nɛ e kai munyu nɛ ɔ: “Nyɛmimɛ, nyɛɛ bɔ mɔde wawɛɛ nitsɛ pe kekle ɔ konɛ nyɛ nitsɛmɛ nyɛ ná nyɛ tsɛmi ɔ kɛ nyɛ hlami ɔ nɔ mi mami nɛ pi si, ejakaa ke nyɛ yaa nɔ nɛ nyɛ peeɔ ní nɛ ɔmɛ ɔ, nyɛ be si gbee kɔkɔɔkɔ.” (2 Pet. 1:10) Enɛ ɔ he ɔ, e ngɛ mi kaa a pɔ nɔ ɔ nu, loo a hla lɛ kaa e maa ya hiɔwe mohu lɛɛ, se ja e ya nɔ nɛ e ye anɔkuale loko e nine maa su hiɔwo nɛ ɔ nɔ.​—Filip. 3:12-14; Heb. 3:1; Kpoj. 2:10.

7. Kɛ nihi nɛ a pɔ mɛ nu ɔ peeɔ kɛɛ kɛ leɔ kaa a maa ya hiɔwe?

⁷ Se kɛ nɔ ko maa pee kɛɛ kɛ le kaa e maa ya hiɔwe ha kɛɛ? Heto ɔ jeɔ kpo heii ngɛ sɛ womi nɛ Paulo ngma kɛ ya ha Roma bi nɛ a “tsɛ mɛ kaa a ba pee ni klɔuklɔuhi ɔ” mi. E de mɛ ke: “Pi nyɔguɛ mumi nɛ nyɛ ná nɛ nyɛ maa hi gbeye yee ekohu, mohu ɔ, nyɛ ná bi ngɔmi mumi kaa binyumuhi, nɛ kɛ gu mumi nɛ ɔ nɔ ɔ, wa kpaa ngmlaa ke: ‘Abba, Tsaatsɛ!’ Mumi ɔ nitsɛ yeɔ odase kɛ piɛɛɔ wa mumi ɔ he kaa wa ji Mawu bimɛ.” (Rom. 1:7; 8:15, 16) Enɛ ɔ he ɔ, kɛ gu mumi klɔuklɔu ɔ nɔ ɔ, Mawu ha nɛ e pee heii kɛ ha nihi nɛ a pɔ mɛ nu ɔ kaa a maa ya hiɔwe.​—1 Tɛs. 2:12.

8. Ngɛ mɛni blɔ nɔ nɛ 1 Yohane 2:20, 27 ɔ tsɔɔ kaa e he hia we nɛ nɔ ko nɛ e ma nɔ mi ha Kristofohi nɛ a pɔ mɛ nu ɔ kaa a pɔ mɛ nu?

⁸ Yehowa ha we nɛ nihi nɛ a pɔ mɛ nu ɔ a yi mi nɛ pee mɛ enyɔɔnyɔ kaa a maa ya hiɔwe loo a be yae. (Kane 1 Yohane 2:20, 27.) Ngɛ anɔkuale mi ɔ, e sa nɛ Kristofohi nɛ a pɔ mɛ nu ɔ nɛ a ha nɛ Yehowa nɛ gu e we asafo ɔ nɔ kɛ tsɔse mɛ kaa bɔ nɛ e tsɔseɔ e sɔmɔli tsuo ɔ. Se e he hia we nɛ nɔ ko nɛ ma nɔ mi ha mɛ kaa a pɔ mɛ nu. Yehowa gu he wami nɛ pe kulaa ngɛ je ɔ mi, nɛ ji e mumi klɔuklɔu ɔ nɔ kɛ ha nɛ a na heii kaa a pɔ mɛ nu!

9. Kaa bɔ nɛ a tsɔɔ ngɛ Efeso Bi 1:18 ɔ, ke a pɔ nɔ ko nu ɔ, mɛni tsakemi nɛ baa e blɔ fa mi?

⁹ Eko ɔ, e he maa wa ha Mawu sɔmɔli nɛ a ngɛ mwɔnɛ ɔ a kpɛti nihi fuu kaa a maa le nɔ́ nɛ yaa nɔ ke Mawu pɔ nɔ ko nu. Mɛni he je? Ejakaa a pɔɛ mɛ nu. Mawu bɔɛ adesahi kaa a hi hiɔwe, mohu ɔ, e bɔ mɛ kaa a hi zugba a nɔ kɛ ya neneene. (1 Mose 1:28; La 37:29) Se Yehowa hla adesa komɛ kaa a ya hiɔwe. Enɛ ɔ he ɔ, ke e pɔ mɛ nu ɔ, e tsakeɔ hɛ nɔ kami nɛ a ngɛ kɛ bɔ nɛ a susuɔ níhi a he ha a kulaa, konɛ a kɛ a hɛ nɛ ma si himi ngɛ hiɔwe ɔ nɔ.​—Kane Efeso Bi 1:18.

10. Ke ‘a fɔ nɔ ko ekohu’ ɔ, mɛni e tsɔɔ? (Hyɛ sisi ningma a hulɔ.)

¹⁰ Ke a ngɔ mumi klɔuklɔu ɔ kɛ pɔ Kristofo no ko nu ɔ, lɔ ɔ tsɔɔ kaa ‘a fɔ lɛ ekohu’ loo ‘a je hiɔwe kɛ fɔ lɛ.’ * Yesu tsɔɔ hu kaa a be nyɛe maa tsɔɔ nɔ ko nɛ a pɔɛ lɛ nu ɔ bɔ nɛ ke ‘a fɔ nɔ ko ekohu,’ aloo “a je mumi mi kɛ fɔ” nɔ ko ɔ, e ngɛ ha.​—Yoh. 3:3-8; sisi ningma.

11. Ke a pɔ nɔ ko nu ɔ, mɛni tsakemi lɛ baa ngɛ e susumi mi? Moo tsɔɔ nya.

¹¹ Ke a pɔ Kristofo no ko nu ɔ, mɛni blɔ  nɔ nɛ bɔ nɛ e susuɔ níhi a he ha a tsakeɔ? Loko Yehowa maa pɔ Kristofohi nɛ ɔmɛ nu ɔ, a hɛ nɔ kami ji kaa a maa hi zugba a nɔ kɛ ya neneene. A kɛ bua jɔmi hyɛɛ be nɛ Yehowa ma je ní yayahi tsuo kɛ je nɛ e maa pee zugba a paradeiso ɔ blɔ. Eko ɔ, a susuɔ bɔ nɛ a ma nya ha ke a tle a weku li nɛ a gbo ɔ si kɛ ba wami mi ekohu ɔ he. Se kɛ je benɛ a pɔ mɛ nu ɔ, a bɔni níhi a he susumi ngɛ blɔ kpa nɔ. Mɛni he je? Pi kaa a susuɔ kaa zugba a nɔ si himi hí. Pi zugba a nɔ haomihi kɛ nyagbahi nɛ ha nɛ a juɛmi tsake. Pi kaa a ba ná he numi ɔ tlukaa kaa zugba a nɔ si himi ɔ be ngɔe hu. Mohu ɔ, Yehowa guɔ e mumi klɔuklɔu ɔ nɔ kɛ tsakeɔ a susumi kɛ a hɛ nɔ kami nɛ be ko ɔ, a bua jɔ he ɔ.

12. Kaa bɔ nɛ 1 Petro 1:3, 4 ɔ tsɔɔ ɔ, kɛ hɛ nɔ kami nɛ Kristofohi nɛ a pɔ mɛ nu ɔ ngɛ ɔ haa nɛ a nuɔ he ha kɛɛ?

¹² Eko ɔ, Kristofo no ko nɛ a pɔ lɛ nu ɔ ma susu kaa e sɛ kɛ ha he blɔ nɛ se be nɛ ɔ. Se e juɛmi pee we lɛ enyɔɔnyɔ kaa Yehowa hla lɛ loo e hlɛ lɛ. E bua jɔɔ wawɛɛ ke e susu hɛ nɔ kami nɛ e ngɛ kaa e maa ya hiɔwe ɔ he, nɛ e jeɔ hɛ sa kpo.​—Kane 1 Petro 1:3, 4.

13. Kɛ nihi nɛ a pɔ mɛ nu ɔ naa a si himi ngɛ zugba a nɔ ɔ ha kɛɛ?

¹³ Se anɛ enɛ ɔ tsɔɔ kaa nihi nɛ a pɔ mɛ nu ɔ suɔ nɛ a gbo lo? Bɔfo Paulo ha sane bimi nɛ ɔ heto. E ngɔ a nɔmlɔ tso ɔ kɛ to bo tsu he, nɛ e de ke: “Ngɛ anɔkuale mi ɔ, wɔ nɛ́ wa ngɛ bo tsu nɛ ɔ mi ɔ, wa kɛmɛɔ, nɛ wa haoɔ wawɛɛ, ejakaa wa sume nɛ wa ma je enɛ ɔ kɛ fɔ si, se kɛ̃ ɔ, wa suɔ kaa wa maa wo kaketsɛ ɔ, bɔ nɛ pee nɛ wami ɔ nɛ e mi nɔ́ nɛ gboɔ ɔ.” (2 Kor. 5:4) Pi kaa zugba a nɔ si himi ɔ gbe Kristofohi nɛ ɔmɛ a nya, nɛ́ lɔ ɔ he ɔ, a suɔ nɛ a gbo mla konɛ a ya hiɔwe. Mohu ɔ, a bua jɔ a si himi ngɛ zugba a nɔ ɔ he, nɛ a suɔ nɛ a kɛ a weku li kɛ a huɛmɛ nɛ pee kake kɛ sɔmɔ Yehowa a wami be tsuo. Se ngɛ nɔ́ fɛɛ nɔ́ ko nɛ a ngɛ pee ɔ mi ɔ, a ngɔɔ a hɛ kɛ maa si himi nɛ ngɛ nyami nɛ a ma ná hwɔɔ se ɔ nɔ.​—1 Kor. 15:53; 2 Pet. 1:4; 1 Yoh. 3:2, 3; Kpoj. 20:6.

14. Mɛni ji ní komɛ nɛ tsɔɔ we kaa a ngɔ mumi klɔuklɔu ɔ kɛ pɔ nɔ ko nu?

¹⁴ Eko ɔ, be komɛ ɔ, o biɔ o he ke, ‘Anɛ a pɔ mi nu lo?’ Ke jã a, lɛɛ mo susu sane bimihi nɛ a he hia nɛ ɔ he: Anɛ o ngɛ he numi nɛ mi wa kaa o maa pee Yehowa suɔmi nya ní lo? Anɛ o nuɔ he kaa o kɛ kã fiɛɛɔ wawɛɛ lo? Anɛ o bua jɔ Baiblo ɔ kasemi he, nɛ o kaseɔ “Mawu níhi nɛ a mi kuɔ ɔ” lo? (1 Kor. 2:10) Anɛ o nuɔ he kaa Yehowa ha nɛ o fiɛɛmi ní tsumi ɔ woɔ yiblii wawɛɛ lo? Anɛ o náa he numi nɛ mi wa kaa e sa nɛ o ye bua ni kpahi nɛ a kase Yehowa he ní lo? Anɛ o naa odasehi nɛ haa nɛ o naa kaa Yehowa ye bua mo ngɛ blɔ pɔtɛɛ komɛ a nɔ ngɛ o si himi mi lo? Ke o ha sane bimi nɛ ɔmɛ tsuo a heto ke, ee ɔ, anɛ lɔ ɔ tsɔɔ kaa Yehowa tsɛ mo kɛ yaa hiɔwe lo? Ohoo, lɔ ɔ tsɔɔ we jã. Mɛni he je? Ejakaa Mawu sɔmɔli tsuo ma nyɛ maa nu he jã, a pɔ mɛ nu jio, a pɔɛ mɛ jio. Yehowa ma nyɛ maa ngɔ e mumi klɔuklɔu ɔ kɛ ha e sɔmɔli ɔmɛ a ti nɔ tsuaa nɔ konɛ e ná he wami nɛ ɔ nɔuu, nɔ ɔ maa hi zugba a nɔ jio, e maa ya hiɔwe jio. Ngɛ anɔkuale mi ɔ, ke o yi mi tɛ̃ mo kaa o maa ya hiɔwe ɔ, lɛɛ lɔ ɔ tsɔɔ kaa a pɔɛ mo nu. Ni nɛmɛ nɛ Yehowa hla mɛ ɔ a yi mi pee we mɛ enyɔɔnyɔ ngɛ enɛ ɔ he! A le kaa Yehowa hla mɛ!

15. Kɛ wa plɛ kɛ le kaa tsa pi nihi tsuo nɛ a ná Mawu mumi ɔ nɛ a hla mɛ kaa a ya hiɔwe ha kɛɛ?

 ¹⁵ A wo anɔkualetsɛmɛ fuu a ta ngɛ Baiblo ɔ mi nɛ a ná Yehowa mumi klɔuklɔu ɔ, se a yɛ hiɔwe. Kaa nɔ hyɛmi nɔ́ ɔ, David ji nɔ ko nɛ mumi klɔuklɔu ɔ kudɔ lɛ. (1 Sam. 16:13) Mumi klɔuklɔu ɔ ye bua lɛ nɛ e nu Yehowa níhi nɛ a mi kuɔ ɔ sisi, nɛ e kudɔ lɛ nɛ e ngma Baiblo ɔ fã komɛ. (Maak. 12:36) Se ngɛ enɛ ɔ tsuo se ɔ, bɔfo Petro tsɔɔ kaa “David kuɛ kɛ yɛ hiɔwe.” (Níts. 2:34) Yohane Nɔ Baptisilɔ ɔ hu ji nɔ ko nɛ “mumi klɔuklɔu ɔ . . . hyi lɛ tɔ.” (Luka 1:13-16) Yesu tsɔɔ kaa adesa ko hí si hyɛ nɛ pe Yohane, se Yohane piɛɛ we nihi nɛ a maa ye matsɛ ngɛ hiɔwe ɔ a he. (Mat. 11:10, 11) Yehowa ngɔ e mumi klɔuklɔu ɔ kɛ tsu ní kɛ ha nyumu nɛ ɔmɛ he wami nɛ a kɛ pee nyakpɛ níhi, se e kɛ mumi nɛ ɔ hlɛ mɛ kaa a ya hiɔwe. Anɛ enɛ ɔ tsɔɔ kaa a yi anɔkuale, aloo a he sui kaa a maa hla mɛ kaa matsɛmɛ ngɛ hiɔwe lo? Dɛbi. Nɔ́ nɛ e tsɔɔ kɛkɛ ji kaa Yehowa ma tle mɛ si kɛ ba wami mi ngɛ Paradeiso mi ngɛ zugba a nɔ.​—Yoh. 5:28, 29; Níts. 24:15.

16. Mwɔnɛ ɔ, mɛni jɔɔmi nɛ Mawu sɔmɔli hiɛhiɛɛ ngɛ blɔ hyɛe?

¹⁶ Mawu sɔmɔli nɛ a ngɛ mwɔnɛ ɔ a ti nihi hiɛhiɛɛ be hiɔwe yae. Kaa bɔ nɛ e ji ngɛ Abraham, Sara, David, Yohane Nɔ Baptisilɔ ɔ kɛ nyumuhi kɛ yihi kpahi fuu nɛ a hi si blema a blɔ fa mi ɔ, mɛ hu a ngɛ blɔ hyɛe kaa a maa hi zugba a nɔ ngɛ Mawu Matsɛ Yemi ɔ sisi.​—Heb. 11:10.

17. Mɛni he wa ma susu ngɛ ní kasemi nɛ nyɛɛ se ɔ mi?

¹⁷ Mwɔnɛ ɔ, Kristofohi nɛ a pɔ mɛ nu ɔ a ti ni komɛ ngɛ wa kpɛti, enɛ ɔ he ɔ, eko ɔ, wa ma bi wa he sane komɛ. (Kpoj. 12:17) Kaa nɔ hyɛmi nɔ́ ɔ, kɛ e sa nɛ nɛ nihi nɛ a pɔ mɛ nu ɔ nɛ a na a he ha kɛɛ? Ke o kɛ nɔ ko ngɛ asafo mi nɛ e bɔni abolo ɔ yemi nɛ e bɔni wai ɔ hu numi ngɛ Kaimi ɔ sisi ɔ, kɛ e sa kaa o kɛ lɛ nɛ hi si ha kɛɛ? Nɛ ke nihi nɛ a deɔ ke a pɔ mɛ nu ɔ a yibɔ ngɛ hɛ mi yae hu nɛɛ? Anɛ e sa nɛ lɔ ɔ nɛ hao mo lo? Wa maa na sane bimi nɛ ɔmɛ a heto ngɛ ní kasemi nɛ nyɛɛ se ɔ mi.