1-2. (a) Mɛni be nɛ wa kaiɔ wa suɔlɔ ko nɛ e gbo ɔ titli? (b) Mɛni nɛ Yesu to he blɔ nya gbɔkuɛ nɛ e nɔ jena e ma gbo ɔ?

 KE WA suɔlɔ ko gbo jehahi abɔ po ɔ, loloolo ɔ, wa kaiɔ lɛ. Daa jeha ke e su be nɛ nɔ ɔ gbo ɔ, wa kaiɔ lɛ wawɛɛ.

² Daa jeha a, waa kɛ nimli ayɔhi abɔ kaiɔ nɔ ko nɛ wa suɔ lɛ wawɛɛ ɔ e gbenɔ. Jamɛ a nɔ ɔ ji Yesu Kristo. (1 Pet. 1:8) Wa buaa wa he nya kɛ kaiɔ nɔ nɛ e ngɔ e wami kɛ ha kaa kpɔmi nɔ́ nɛ e kpɔ̃ wɔ kɛ je gbenɔ dɛ mi ɔ. (Mat. 20:28) Ngɛ anɔkuale mi ɔ, Yesu suɔ nɛ e se nyɛɛli nɛ a kai e gbenɔ ɔ. Gbɔkuɛ nɛ e nɔ jena Yesu ma gbo ɔ, e to ní yemi klɛdɛɛ ko he blɔ nya nɛ e fã ke: “Nyɛɛ ya nɔ nɛ nyɛɛ pee enɛ ɔ nɛ nyɛ kɛ kai mi.”​—Luka 22:19.

3. Mɛni he wa ma susu ngɛ ní kasemi nɛ ɔ mi?

³ Nihi nɛ a yaa Kristo gbenɔ ɔ Kaimi ɔ a kpɛti nihi bɔɔ ko pɛ nɛ a ngɛ hɛ nɔ kami kaa a maa ya hiɔwe. Se nihi ayɔhi abɔ nɛ a ngɛ hɛ nɔ kami kaa a maa hi zugba a nɔ ɔ hu yaa Kaimi ɔ eko. Ngɛ ní kasemi nɛ ɔ mi ɔ, wa ma susu nɔ́ he je nɛ kuu enyɔ nɛ ɔmɛ tsuo yaa Kaimi ɔ daa jeha kɛ bua jɔmi ɔ he. Jehanɛ hu ɔ, wa maa na bɔ nɛ wa náa Kaimi ɔ nɛ wa yaa a he se  ha. Nyɛ ha nɛ waa je sisi kɛ yi mi tomi he je nɛ nihi nɛ a pɔ mɛ nu ɔ yaa Kaimi ɔ.

4. Mɛni he je nɛ nihi nɛ a pɔ mɛ nu ɔ yeɔ abolo ɔ eko nɛ a nuɔ wai ɔ eko ngɛ Kaimi ɔ sisi ɔ?

⁴ Daa jeha a, nihi nɛ a pɔ mɛ nu nɛ a yaa Kaimi ɔ yeɔ abolo ɔ eko nɛ a nuɔ wai ɔ eko. Mɛni he je nɛ e da blɔ kaa a yeɔ abolo ɔ eko nɛ a nuɔ wai ɔ eko ɔ? Bɔ nɛ pee nɛ waa na sane bimi nɛ ɔ heto ɔ, ha nɛ wa susu nɔ́ nɛ ya nɔ gbɔkuɛ nɛ e nɔ jena Yesu ma gbo ɔ he nɛ waa hyɛ. Benɛ a ye Hetsɔmi ɔ ta a, Yesu to ní yemi kpa ko he blɔ nya. Lɔ ɔ ji Nyɔmtsɛ ɔ Gbɔkuɛ Niye Ní ɔ. E ngɔ abolo kɛ ha e kaseli anɔkualetsɛmɛ 11 ɔ nɛ e de mɛ ke a ye, nɛ e ngɔ wai hu kɛ ha mɛ nɛ e de mɛ ke a nu. Yesu kɛ mɛ tu somi enyɔ he munyu. Lɔ ɔmɛ ji somi ehe ɔ, kɛ Matsɛ Yemi ɔ he somi ɔ. * (Luka 22:19, 20, 28-30) Somi enyɔ nɛ ɔmɛ bli blɔ kɛ ha bɔfo nɛ ɔmɛ kɛ nihi bɔɔ ko nɛ́ a sɔmɔ kaa matsɛmɛ kɛ osɔfohi ngɛ hiɔwe. (Kpoj. 5:10; 14:1) Nihi nɛ a pɔ mɛ nu ɔ a kpɛti nihi nɛ piɛ ngɛ zugba a nɔ nɛ a ngɛ somi enyɔ nɛ ɔmɛ a mi ɔ pɛ nɛ a ngɛ he blɔ nɛ a yeɔ abolo ɔ eko nɛ a nuɔ wai eko ngɛ Kaimi ɔ sisi.

5. Mɛni nɛ nihi nɛ a pɔ mɛ nu ɔ le ngɛ hɛ nɔ kami nɛ a ha mɛ ɔ he?

⁵ Yi mi tomi kpa ko he je nɛ nihi nɛ a pɔ mɛ nu ɔ suɔ kaa a maa ya Kaimi ɔ ji kaa e haa nɛ a náa he blɔ kɛ susuɔ hɛ nɔ kami nɛ a ngɛ ɔ he. Yehowa ha mɛ hɛ nɔ kami nɛ se be konɛ a kɛ Yesu Kristo nɛ a tle lɛ si ɔ kɛ nimli 144,000 ɔ a kpɛti nihi nɛ a ngɛ hiɔwe momo ɔ nɛ a hi si ngɛ Yehowa Mawu hɛ mi. Jehanɛ hu ɔ, Yehowa ha mɛ nɔmlɔ tso nɛ e be gboe nɛ e be puɛe! (1 Kor. 15:51-53; 1 Yoh. 3:2) Nihi nɛ a pɔ mɛ nu ɔ le kaa Yehowa fɔ mɛ nine konɛ a ná he blɔhi kaa jã ngɛ hiɔwe. Se ja a ye anɔkuale kɛ ya si gbenɔ mi loko a ma nyɛ maa ya hiɔwe. (2 Tim. 4:7, 8) Ke nihi nɛ a pɔ mɛ nu ɔ susu hɛ nɔ kami nɛ a ngɛ kaa a maa ya hiɔwe ɔ he ɔ, e haa nɛ a ná bua jɔmi wawɛɛ. (Tito 2:13) Se ‘jijɔ kpa amɛ’ hu nɛɛ? (Yoh. 10:16) Mɛni ji yi mi tomi komɛ a he je nɛ jijɔ kpa amɛ yaa Kaimi ɔ?

6. Mɛni he je nɛ jijɔ kpa amɛ yaa Kaimi ɔ daa jeha a?

⁶ Jijɔ kpa amɛ yaa Kaimi ɔ nɛ a yi abolo ɔ eko nɛ a nui wai ɔ eko, se a bua jɔɔ kaa a yaa. Jeha 1938 ɔ ji kekleekle be nɛ a fɔ nihi nɛ a ngɛ hɛ nɔ kami kaa a maa hi zugba a nɔ nine ɔ kɛ ba Kaimi ɔ sisi. Hwɔɔmi Mɔ nɛ je kpo ngɛ March 1, 1938 ɔ de ke: “E maa hi kaa jijɔ kpa amɛ maa ya Kaimi ɔ konɛ a na nɔ́ nɛ maa ya nɔ ɔ. E sa nɛ a bua nɛ jɔ ngɛ jamɛ a be ɔ mi hulɔ, nɛ jã nɛ e ji.” Kaa bɔ nɛ ke a fɔ nihi nine kɛ ya yo kpeemi sisi nɛ a bua jɔɔ ɔ, jã kɛ̃ nɛ jijɔ kpa amɛ hu a bua jɔɔ ke a ya Kaimi ɔ.

7. Mɛni he je nɛ jijɔ kpa amɛ hyɛɔ blɔ kaa a maa bu Kaimi ɔ he munyu ɔ tue ɔ?

⁷ Jijɔ kpa amɛ hu susuɔ hɛ nɔ kami nɛ a ngɛ ɔ he kaa bɔ nɛ nihi nɛ a pɔ mɛ nu ɔ peeɔ ɔ. A hyɛɔ blɔ kaa a maa bu munyu nɛ a maa tu ngɛ Kaimi ɔ sisi ɔ tue. Jamɛ a munyu ɔ kɔɔ nɔ́ nɛ Kristo kɛ nimli 144,000 nɛ a maa piɛɛ e he kɛ ye matsɛ ɔ maa pee ha adesahi nɛ a yeɔ anɔkuale ngɛ Jeha Akpe Nɔ Yemi ɔ mi ɔ he titli. Matsɛ Yesu Kristo maa nyɛɛ nihi nɛ a maa ye nɔ ngɛ hiɔwe ɔ a hɛ mi kɛ pee zugba a paradeiso, nɛ a maa ye bua  adesahi nɛ a buɔ Yehowa tue ɔ nɛ́ a ye mluku. Nimli ayɔhi abɔ nɛ a yaa Kaimi ɔ nɛ a ji jijɔ kpa amɛ ɔ ma nyɛ maa po he foni kaa hwɔɔ se ɔ, Baiblo gbami komɛ kaa Yesaya 35:5, 6; 65:21-23; kɛ Kpo Jemi 21:3, 4 ɔ maa ba mi. Ke a pee jã a, hyɛ bɔ nɛ a bua maa jɔ ha! Ke a po he foni kaa a kɛ a suɔli maa hi je ehe ɔ mi ɔ, lɔ ɔ ma ha nɛ hwɔɔ se he hɛ nɔ kami nɛ a ngɛ ɔ mi maa wa, nɛ a maa ya nɔ ma sɔmɔ Yehowa kaa bɔ nɛ a fia a pɛɛ si kaa a maa pee ɔ.​—Mat. 24:13; Gal. 6:9.

8. Mɛni yi mi tomi kpa ko he je nɛ jijɔ kpa amɛ yaa Kaimi ɔ?

⁸ Jijɔ kpa amɛ yaa Kaimi ɔ ngɛ yi mi tomi kpa ko hu he je. A suɔ nɛ a je suɔmi kpo kɛ tsɔɔ nihi nɛ a pɔ mɛ nu ɔ nɛ a fĩ a se. Mawu Munyu ɔ tsɔɔ kaa nihi nɛ a pɔ mɛ nu ɔ kɛ nihi nɛ a ngɛ hɛ nɔ kami kaa a maa hi zugba a nɔ ɔ maa pee kake kɛ tsu ní. Ngɛ mɛni blɔ nɔ? Nyɛ ha nɛ wa susu nɔ hyɛmi ní komɛ a he.

9. Mɛni nɛ gbami nɛ ngɛ Zakaria 8:23 ɔ tsɔɔ ngɛ bɔ nɛ jijɔ kpa amɛ naa nihi nɛ a pɔ mɛ nu ɔ ha a he?

⁹ Kane Zakaria 8:23. Gbami nɛ ɔ tsɔɔ bɔ nɛ jijɔ kpa amɛ naa a nyɛmimɛ nyumuhi kɛ yihi nɛ a pɔ mɛ nu ɔ ha. Munyu nɛ ji “Yuda no” kɛ “nyɛ” ɔ daa si kɛ ha nihi nɛ a pɔ mɛ nu nɛ a piɛ ngɛ zugba a nɔ ɔ. (Rom. 2:28, 29) ‘Nyumuhi nyɔngma nɛ a maa je ma slɔɔtohi a mi’ ɔ daa si kɛ ha jijɔ kpa amɛ. A maa “pɛtɛ” nihi nɛ a pɔ mɛ nu ɔ a tade ɔ he loo a kɛ anɔkuale yemi maa mɛtɛ a he kɛ sɔmɔ Yehowa. Enɛ ɔ he ɔ, ngɛ gbɔkuɛ nɛ a maa ye Kaimi ɔ nɔ ɔ, jijɔ kpa amɛ yaa Kaimi ɔ kɛ tsɔɔ kaa a mɛtɛ nihi nɛ a pɔ mɛ nu ɔ a he.

10. Mɛni Yehowa pee kɛ ha nɛ gbami nɛ ngɛ Ezekiel 37:15-19, 24, 25 ɔ ba mi?

¹⁰ Kane Ezekiel 37:15-19, 24, 25. Bɔ nɛ pee nɛ gbami nɛ ɔ nɛ ba mi ɔ, Yehowa ha nihi nɛ a pɔ mɛ nu ɔ kɛ jijɔ kpa amɛ pee kake kɛ ngɛ ní tsue. Gbami ɔ tu tso enyɔ a he munyu. Nihi nɛ a ngɛ hɛ nɔ kami kaa a maa ya hiɔwe ɔ ngɛ kaa tso nɛ e daa si kɛ ha “Yuda nɔ yemi ɔ,” (nɛ ji wɛtso nɛ a hla Israel matsɛmɛ ɔmɛ kɛ je mi ɔ). Nihi nɛ a ngɛ hɛ nɔ kami kaa a maa hi zugba a nɔ ɔ ngɛ kaa tso nɛ e daa si kɛ ha ‘Israel loo Efraim nɔ yemi ɔ.’ * Yehowa ma bla kuu enyɔ nɛ ɔmɛ nɛ e maa pee mɛ “tso kake.” Enɛ ɔ tsɔɔ kaa a kɛ kake peemi ma sɔmɔ ngɛ a Matsɛ kake nɛ ji Yesu Kristo sisi. Daa jeha a, nihi nɛ a pɔ mɛ nu ɔ kɛ jijɔ kpa amɛ tsuo yaa Kaimi ɔ. A blaa kaa “to kuu kake” ngɛ “to nɔ hyɛlɔ kake” sisi kɛ yaa Kaimi ɔ.​—Yoh. 10:16.

11. Mɛni ji nɔ́ titli nɛ “jijɔ kpa amɛ” nɛ a tu a he munyu ngɛ Mateo 25:31-36, 40 peeɔ kɛ a fĩɔ Yesu nyɛmimɛ ɔmɛ a se?

¹¹ Kane Mateo 25:31-36, 40. “Jijɔ ɔmɛ” nɛ Yesu tu a he munyu ngɛ nɔ́ he tomi nɔ́ nɛ ɔ mi ɔ daa si kɛ ha dali nɛ a ngɛ nyagbe ligbi nɛ ɔmɛ a mi nɛ a ngɛ hɛ nɔ kami kaa a maa hi zugba a nɔ ɔ, nɛ ji jijɔ kpa amɛ nɛ a ngɛ wami mi mwɔnɛ ɔ. A kɛ anɔkuale yemi fĩɔ Kristo nyɛmimɛ nɛ a pɔ mɛ nu ɔ a se. A peeɔ enɛ ɔ kɛ guɔ a he nɛ a kɛ woɔ fiɛɛmi kɛ kaselɔ peemi ní tsumi ɔ mi ngɛ je kɛ wɛ ɔ nɔ.​—Mat. 24:14; 28:19, 20.

12-13. Mɛni blɔ kpa komɛ a nɔ nɛ jijɔ kpa amɛ guɔ kɛ fĩɔ Kristo nyɛmimɛ ɔmɛ a se?

¹² Daa jeha a, ke e piɛ otsi bɔɔ loko Kaimi ɔ maa su ɔ, jijɔ kpa amɛ fĩɔ Kristo nyɛmimɛ ɔmɛ a se kɛ guɔ a he nɛ a kɛ woɔ fiɛɛmi ní tsumi ɔ mi wawɛɛ ngɛ je kɛ wɛ ɔ nɔ. A peeɔ jã kɛ fɔɔ tsui kpakpatsɛmɛ nine konɛ a ba Kaimi ɔ. (Hyɛ daka nɛ ji, “ Anɛ O Ngɛ O He Dlae Kɛ Ha Kaimi ɔ Lo?”) Jehanɛ hu ɔ, e ngɛ mi kaa tsa pi asafo ɔmɛ tsuo a mi nɛ nihi nɛ  a pɔ mɛ nu ɔ eko ngɛ, se a toɔ blɔ nya konɛ a nyɛ nɛ a ye Kaimi ɔ ngɛ asafohi tsuo a mi ngɛ je kɛ wɛ. Jijɔ kpa amɛ ngɛ he bua jɔmi kaa a ma fĩ Kristo nyɛmimɛ ɔmɛ a se ngɛ blɔ nɛ ɔmɛ a nɔ. Jijɔ kpa amɛ le kaa Yesu naa níhi nɛ a peeɔ kɛ fĩɔ e nyɛmimɛ nɛ a pɔ mɛ nu ɔ a se ɔ kaa lɛ nɛ a ngɛ pee kɛ ngɛ hae.​—Mat. 25:37-40.

¹³ Ngɛ hɛ nɔ kami nɛ wa ti nɔ fɛɛ nɔ ngɛ ɔ se ɔ, mɛni yi mi tomi kpa komɛ a he je nɛ wɔ tsuo wa yaa Kaimi ɔ?

14. Mɛni blɔ nɔ nɛ Yehowa kɛ Yesu je suɔmi agbo kpo kɛ tsɔɔ wɔ?

¹⁴ Wa bua jɔ suɔmi nɛ Yehowa kɛ Yesu je kpo kɛ tsɔɔ wɔ ɔ he. Yehowa je suɔmi kpo kɛ tsɔɔ wɔ ngɛ blɔhi fuu a nɔ. Se blɔ nɛ pe kulaa nɛ e gu nɔ kɛ je suɔmi kpo kɛ tsɔɔ wɔ ji e Bi nɛ e fiɛ we e he nɛ e ha nɛ e ba na nɔ́ nɛ a e gbo ha wɔ ɔ. (Yoh. 3:16) Yesu hu je suɔmi agbo kpo kɛ tsɔɔ wɔ nɛ e ngɔ e wami kɛ sã afɔle ngɛ wa he je. (Yoh. 15:13) Nɔ́ ko be nɛ wa ma nyɛ maa pee kɛ to Yehowa kɛ Yesu nane mi ngɛ suɔmi nɛ a je kpo kɛ tsɔɔ wɔ ɔ he. Se daa ligbi ɔ, wa ma nyɛ maa ngɔ wa ní peepee kɛ tsɔɔ kaa wa bua jɔ nɔ́ nɛ a pee ha wɔ ɔ he. (Kol. 3:15) Wa yaa Kaimi ɔ bɔ nɛ pee nɛ wa kai suɔmi nɛ a je kpo kɛ tsɔɔ wɔ ɔ konɛ wɔ hu waa suɔ mɛ.

15. Mɛni he je nɛ nihi nɛ a pɔ mɛ nu ɔ kɛ jijɔ kpa amɛ tsuo naa kpɔmi nɔ́ ɔ kaa nɔ́ ko nɛ he jua wa a?

¹⁵ Wa bua jɔ nike ní nɛ ji kpɔmi nɔ́ ɔ he wawɛɛ. (Mat. 20:28) Nihi nɛ a pɔ mɛ nu ɔ naa kpɔmi nɔ́ ɔ kaa nɔ́ ko nɛ he jua wa ejakaa e haa nɛ a náa nɔ mi mami ngɛ a hɛ nɔ kami nɛ se be ɔ mi. Akɛnɛ a ngɛ hemi kɛ yemi ngɛ Kristo afɔle sami ɔ mi he je ɔ, Yehowa bu mɛ kaa dali nɛ e ngɔ mɛ kɛ pee e bimɛ. (Rom. 5:1; 8:15-17, 23) Jijɔ kpa amɛ hu a bua jɔ kpɔmi nɔ́ ɔ he. Akɛnɛ a ngɛ hemi kɛ yemi ngɛ Kristo afɔle sami ɔ mi he je ɔ, a he tsɔ ngɛ Mawu hɛ mi nɛ a ma nyɛ maa ngɔ jami kluɔɔ kɛ ha lɛ. A ngɛ hɛ nɔ kami hu kaa a maa je “amanehlu ngua a mi.” (Kpoj. 7:13-15) Nihi nɛ a pɔ mɛ nu ɔ kɛ jijɔ kpa amɛ tsuo a bua jɔ kpɔmi nɔ́ ɔ he. Blɔ kake nɔ nɛ a guɔ kɛ tsɔɔ kaa a bua jɔ kpɔmi nɔ́ ɔ he ji Kaimi ɔ nɛ a yaa daa jeha a.

16. Mɛni yi mi tomi kpa ko he je nɛ wa yaa Kaimi ɔ?

¹⁶ Yi mi tomi kpa ko he je nɛ wa yaa Kaimi ɔ ji wa suɔ nɛ waa bu Yesu tue. Ke wa ngɛ hɛ nɔ kami kaa wa maa ya hiɔwe jio, wa hɛ nɔ kami ji wa maa hi zugba a nɔ jio, wa ti fɛɛ nɔ suɔ kaa e maa bu fami nɛ Yesu kɛ ha gbɔkuɛ nɛ e to Kaimi ɔ sisi ɔ tue. E de ke: “Nyɛɛ ya nɔ nɛ nyɛɛ pee enɛ ɔ nɛ nyɛ kɛ kai mi.”​—1 Kor. 11:23, 24.

17. Mɛni blɔ nɔ nɛ Kaimi ɔ yeɔ bua wɔ nɛ wa hɛɛ kɛ suɔ Yehowa he?

¹⁷ E hɛɛ wɔ kɛ suɔ Yehowa he. (Yak. 4:8) Wa kase kaa Kaimi ɔ haa nɛ wa ti nɛ fɛɛ nɔ susuɔ hɛ nɔ kami nɛ Yehowa ha wɔ ɔ he, nɛ e ha nɛ wa pueɔ wa yi mi tɛ ngɛ suɔmi agbo nɛ e je kpo kɛ tsɔɔ wɔ ɔ he. (Yer. 29:11; 1 Yoh. 4:8-10) Ke wa susu hɛ nɔ kami nɛ wa ngɛ ngɛ hwɔɔ se he kɛ suɔmi nɛ Mawu jeɔ kpo kɛ tsɔɔ wɔ daa a he ɔ, suɔmi nɛ wa ngɛ kɛ ha Yehowa a mi maa wa, nɛ huɛ bɔmi nɛ ngɛ waa kɛ lɛ wa kpɛti ɔ hu mi maa wa.​—Rom. 8:38, 39.

18. Ke wa susu Yesu nɔ hyɛmi nɔ́ ɔ he ɔ, mɛni nɛ e maa wo wɔ he wami nɛ waa pee?

¹⁸ E woɔ wɔ he wami konɛ waa kase Yesu nɔ hyɛmi nɔ́ ɔ. (1 Pet. 2:21) Ke e piɛ ligbi bɔɔ nɛ  a maa ye Kaimi ɔ, wa kaneɔ Baiblo mi sanehi nɛ kɔɔ nyagbe otsi nɛ Yesu hi zugba a nɔ, e gbenɔ ɔ, kɛ si nɛ a tle lɛ ɔ he, nɛ wa susuɔ he hulɔ. Nɛ ngɛ gbɔkuɛ nɛ a maa ye Kaimi ɔ nɔ ɔ, munyu nɛ a tuɔ ngɛ Kaimi ɔ sisi ɔ haa nɛ wa kaiɔ suɔmi nɛ Yesu je kpo kɛ ha wɔ ɔ. (Efe. 5:2; 1 Yoh. 3:16) Ke wa kane bɔ nɛ Yesu ngɔ e he kɛ sã afɔle ɔ he ní nɛ wa susu he ɔ, lɔ ɔ ma ha nɛ wa “maa ya nɔ maa nyɛɛ kaa bɔ nɛ jamɛ a nɔ ɔ nyɛɛ ɔ.”​—1 Yoh. 2:6.

19. Mɛni wa maa pee konɛ waa ya nɔ nɛ waa hi Mawu suɔmi ɔ mi?

¹⁹ Wa yaa nɔ nɛ wa fiaa wa pɛɛ si kaa wa maa hi Mawu suɔmi ɔ mi. (Jud 20, 21) Ke wa bɔɔ mɔde nɛ wa buɔ Mawu tue, wa tsɔɔ e biɛ ɔ he, nɛ wa haa nɛ e tsui nɔɔ e mi ɔ, lɔ ɔ tsɔɔ kaa wa ngɛ Mawu suɔmi ɔ mi. (Abɛ 27:11; Mat. 6:9; 1 Yoh. 5:3) Kaimi ɔ nɛ wa yaa a haa nɛ waa kɛ wa ní peepee tsɔɔ kaa wa ngɛ Yehowa dee ke, ‘I suɔ nɛ ma hi o suɔmi ɔ mi kɛ ya neneene!’

20. Mɛni yi mi tomi kpa komɛ a he je nɛ e sa kaa waa ya Kaimi ɔ?

²⁰ Ke wa hɛ nɔ kami ji wa maa ya hiɔwe jio, wa maa hi zugba a nɔ kɛ ya neneene jio, wa le nɔ́ he je nɛ e sa nɛ waa ya Kaimi ɔ. Daa jeha ke wa bua wa he nya ngɛ jamɛ a ligbi ɔ nɔ ɔ, e kaiɔ wɔ nɔ ko nɛ wa suɔ lɛ wawɛɛ ɔ e gbenɔ ɔ. Jamɛ a nɔ ɔ ji Yesu Kristo. Nɔ́ nɛ pe kulaa a, wa kaiɔ suɔmi agbo nɛ Yehowa je kpo kɛ tsɔɔ wɔ ɔ, nɛ ji e Bi ɔ nɛ e kɛ lɛ ha kaa kpɔmi nɔ́ ɔ. Jeha nɛ ɔ, wa maa ye Kaimi ɔ Soha gbɔkuɛ, April 15, 2022. Wa suɔ Yehowa kɛ e Bi ɔ. Enɛ ɔ he ɔ, jamɛ a ligbi ɔ nɛ wa ma kai Yesu gbenɔ ɔ, e sɛ nɛ nɔ́ kpa ko he nɛ hia wɔ pe Kaimi ɔ nɛ wa maa ya a.