1-2. (a) Kɛ wa maa nu he ha kɛɛ ke wa pue wa yi mi tɛ ngɛ Yesu si himi kɛ e sɔmɔmi ní tsumi ɔ he? (b) Mɛni he wa ma susu ngɛ ní kasemi nɛ ɔ mi?

 KE WA suɔlɔ ko gbo ɔ, wa hɛ jaa ngɛ e he wawɛɛ! Be komɛ ɔ, ke wa susu níhi nɛ ya nɔ loko e gbo ɔ he ɔ, e dɔɔ wɔ wawɛɛ, titli ke e na nɔ́ loko e gbo. Se ke be pue mi, nɛ wa susu níhi nɛ e tsɔɔ wɔ, níhi nɛ e pee aloo ní komɛ nɛ e de kɛ wo wa nya muɔ loo kɛ wo wɔ he wami ɔ he ɔ, e haa nɛ wa bua jɔɔ.

² Jã kɛ̃ nɛ ke wa kane bɔ nɛ Yesu na nɔ́ loko e gbo ɔ he ní ɔ, e dɔɔ wɔ. Ngɛ Kaimi be ɔ mi ɔ, wa heɔ be kɛ susuɔ bɔ nɛ Yesu kpɔmi afɔle sami ɔ he hia ha a he. (1 Kor. 11:24, 25) Se ke wa pue wa yi mi tɛ ngɛ níhi nɛ Yesu pee kɛ níhi nɛ e de benɛ e ngɛ zugba a nɔ he ɔ, wa bua jɔɔ wawɛɛ. Ke wa susu níhi nɛ Yesu ngɛ pee amlɔ nɛ ɔ, kɛ níhi nɛ e maa pee ha wɔ hwɔɔ se ɔ he ɔ, e woɔ wɔ he wami. Kaa bɔ nɛ wa maa na ngɛ ní kasemi nɛ ɔ mi ɔ, ke wa pue wa yi mi tɛ ngɛ ní nɛ ɔmɛ kɛ suɔmi nɛ e ngɛ kɛ ha wɔ ɔ he ɔ, e maa ye bua wɔ nɛ wa je hɛ sa kpo ngɛ blɔ pɔtɛɛ komɛ a nɔ.

3. Mɛni he je nɛ e sa nɛ wa bua nɛ jɔ kpɔmi nɔ́ ɔ he ɔ?

³ Ke wa susu Yesu si himi kɛ e gbenɔ ɔ he ɔ, e haa nɛ wa jeɔ hɛ sa kpo. Benɛ Yesu ngɛ zugba a nɔ ɔ, e tsɔɔ nihi jɔɔmihi nɛ Mawu Matsɛ Yemi ɔ kɛ maa ba. Wa bua jɔ níhi nɛ Matsɛ Yemi ɔ maa pee ha wɔ ɔ he wawɛɛ. Wa bua jɔ kpɔmi nɔ ɔ hu he ejakaa kɛ gu lɔ ɔ nɔ ɔ, huɛ bɔmi kpakpa ma nyɛ maa hi waa kɛ Yehowa kɛ Yesu wa kpɛti. Nihi nɛ a he Yesu ye ɔ ngɛ hɛ kɛ nɔ fɔmi kaa a maa hi si kɛ ya neneene, nɛ a maa na a suɔli nɛ a gbo ɔ ekohu. (Yoh. 5:28, 29;  Rom. 6:23) Jinɛ wa sɛ kɛ ha jɔɔmi nɛ ɔmɛ, nɛ wa be nyɛe maa to Mawu kɛ Kristo nane mi ngɛ nɔ́ nɛ a pee kɛ ha wɔ ɔ he hulɔ. (Rom. 5:8, 20, 21) Se wa ma nyɛ maa pee níhi kɛ tsɔɔ kaa wa bua jɔ nɔ́ a pee kɛ ha wɔ nɛ ɔ he. Ngɛ mɛni blɔ nɔ?

4. Mɛni Maria Magdalena pee kɛ tsɔɔ kaa e bua jɔ nɔ́ nɛ Yesu pee ha lɛ ɔ he? (Hyɛ foni ɔ.)

⁴ Mo susu Maria Magdalena nɛ ji Yuda no ɔ nɔ hyɛmi nɔ́ ɔ he nɛ o hyɛ. E na nɔ́ wawɛɛ ejakaa daimoniohi kpaago hao lɛ. Eko ɔ, e nu he kaa nɔ ko be nɛ maa ye bua lɛ. Hyɛ bɔ nɛ e bua maa jɔ ha benɛ Yesu hia daimonio ɔmɛ ngɛ e mi ɔ. Bua jɔmi nɛ e ná a ha nɛ e ba pee Yesu se nyɛɛlɔ, nɛ e ngɔ e be, e he wami kɛ níhi nɛ e ngɛ ɔ tsuo kɛ fĩ Yesu se ngɛ e sɔmɔmi ní tsumi ɔ mi. (Luka 8:1-3) E ngɛ mi kaa Maria bua jɔ nɔ́ nɛ Yesu pee ha lɛ ɔ he mohu lɛɛ, se e li kaa hwɔɔ se ɔ, Yesu maa pee níhi nɛ pã jã po kɛ ha lɛ. Yesu maa ngɔ e wami kɛ ha ngɛ adesahi a he, “konɛ nɔ fɛɛ nɔ nɛ e heɔ lɛ yeɔ ɔ,” e ná neneene wami. (Yoh. 3:16) E ngɛ mi kaa Maria li ní nɛ ɔmɛ tsuo mohu lɛɛ, se e ye anɔkuale kɛ tsɔɔ kaa e hɛ sa nɔ́ nɛ Yesu pee ɔ. Benɛ Yesu ngɛ nɔ́ nae ngɛ sɛumi tso ɔ nɔ ɔ, Maria ngɛ lejɛ ɔ, ejakaa e susuɔ Yesu he, nɛ e suɔ nɛ e wo ni kpahi nɛ a ngɛ lejɛ ɔ a bua. (Yoh. 19:25) Benɛ Yesu gbo ɔ, Maria kɛ yi enyɔ komɛ ngɔ tsopahi kɛ a he via kɛ ba e yɔkɔ ɔ mi konɛ a kɛ ba kpa e gbogboe ɔ. (Maak. 16:1, 2) Yehowa jɔɔ Maria wawɛɛ ejakaa e ye Yesu anɔkuale. Benɛ a tle Yesu si ɔ, e kɛ Maria tu munyu nɛ enɛ ɔ ha nɛ Maria bua jɔ wawɛɛ. Ngɛ anɔkuale mi ɔ, pi kaseli ɔmɛ tsuo nɛ a ná he blɔ nɛ ɔ.​—Yoh. 20:11-18.

5. Mɛni wa ma nyɛ maa pee kɛ tsɔɔ kaa wa bua jɔ níhi tsuo nɛ Yehowa kɛ Yesu pee ha wɔ ɔ he?

⁵ Ke wɔ hu wa ngɔ wa be, wa he wami kɛ wa sika kɛ fĩ Matsɛ Yemi ɔ ní tsumi ɔ se ɔ, lɔ ɔ tsɔɔ kaa wa bua jɔ níhi tsuo nɛ Yehowa kɛ Yesu pee ha wɔ ɔ he. Kaa nɔ hyɛmi nɔ́ ɔ, wa ma nyɛ maa ngɔ wa he kɛ ha  konɛ waa ye bua kɛ ma asafo ɔ tsuhi loo waa ye bua kɛ dla tsu nɛ ɔmɛ.

6. Mɛni he je nɛ wa ma nyɛ ma de ke kpɔmi nɔ́ ɔ ji nike ní nɛ Yehowa kɛ ha wa ti nɔ fɛɛ nɔ ɔ?

⁶ Yehowa kɛ Yesu suɔ wɔ wawɛɛ. Ke wa susu suɔmi nɛ ɔ nɛ a ngɛ kɛ ha wɔ ɔ he ɔ, e maa wo wɔ he wami konɛ wɔ hu waa suɔ mɛ. (1 Yoh. 4:10, 19) Ke wa ti nɔ fɛɛ nɔ yɔse kaa Yesu gbo kɛ ha lɛ ɔ, e haa nɛ suɔmi nɛ wa ngɛ kɛ ha Yehowa kɛ Yesu ɔ mi waa wawɛɛ. Jã nɛ bɔfo Paulo hu nu he. Munyu nɛ e ngma kɛ ya Galatia bi ɔmɛ ɔ tsɔɔ kaa e hɛ sa kpɔmi nɔ́ ɔ wawɛɛ. E de ke: “Mawu Bi ɔ . . . suɔ mi nɛ e ngɔ e he kɛ ha ngɛ ye he.” (Gal. 2:20) Kɛ gu kpɔmi nɔ́ ɔ nɔ ɔ, Yehowa gbla mo kɛ ba e ngɔ konɛ o nyɛ nɛ o pee e huɛ. (Yoh. 6:44) Anɛ o bua jɔɛ akɛnɛ o ba le kaa Yehowa na nɔ́ kpakpa ko ngɛ o he, nɛ e wo hiɔ nɛ pe kulaa ngɛ o he konɛ o ba pee e huɛ ɔ lo? Anɛ e ha we nɛ suɔmi nɛ o ngɛ kɛ ha Yehowa kɛ Yesu ɔ mi nɛ wa lo? Ke jã a, lɛɛ e sa nɛ wa bi wa he ke, ‘Mɛni nɛ jamɛ a suɔmi ɔ maa wo mi he wami nɛ ma pee?’

7. Kaa bɔ nɛ foni ɔ tsɔɔ ɔ, mɛni wɔ tsuo wa ma nyɛ maa pee kɛ tsɔɔ kaa wa suɔ Yehowa kɛ Yesu? (2 Korinto Bi 5:14, 15; 6:1, 2)

⁷ Suɔmi nɛ wa ngɛ kɛ ha Mawu kɛ Kristo ɔ woɔ wɔ he wami nɛ wa jeɔ suɔmi kpo kɛ tsɔɔ ni kpahi. (Kane 2 Korinto Bi 5:14, 15; 6:1, 2.) Blɔ kake nɔ nɛ wa guɔ kɛ jeɔ suɔmi nɛ ɔ kpo ji fiɛɛmi ní tsumi ɔ nɛ waa kɛ kã tsuɔ ɔ. Wa fiɛɛɔ ha nɔ fɛɛ nɔ. Wa ha we nɛ he nɛ nɔ ko je, he womi nɔ su, sika, loo blɔ nya nɛ nɔ ko ngɛ ɔ nɛ ha nɛ waa hla nihi a mi kulaa. Ke wa fiɛɛ ha nɔ fɛɛ nɔ ɔ, lɔ ɔ tsɔɔ kaa wa ngɛ Yehowa suɔmi nya ní pee, ejakaa Yehowa suɔmi nya ní ji “kaa a he nimli slɔɔtohi tsuo a yi wami nɛ a ba ná anɔkuale ɔ he nile nitsɛnitsɛ ɔ.”​—1 Tim. 2:4.

8. Mɛni wa ma nyɛ maa pee kɛ tsɔɔ kaa wa suɔ wa nyɛmimɛ ɔmɛ?

 ⁸ Jehanɛ se hu ɔ, ke wa jeɔ suɔmi kpo kɛ tsɔɔ wa nyɛmimɛ ɔmɛ ɔ, lɔ ɔ tsɔɔ kaa wa suɔ Mawu kɛ Kristo. (1 Yoh. 4:21) Wa susuɔ wa nyɛmimɛ ɔmɛ a hiami níhi a he wawɛɛ, nɛ wa yeɔ bua mɛ ngɛ haomi behi a mi. Ke a suɔlɔ ko gbo ɔ, wa woɔ a bua, ke a be he wami ɔ, wa ya slaa mɛ, nɛ wa bɔɔ mɔde hu kaa wa maa wo mɛ he wami ke a kɔni mi jɔ̃. (2 Kor. 1:3-7; 1 Tɛs. 5:11, 14) Wa yaa nɔ nɛ wa sɔleɔ ha mɛ ejakaa wa le kaa “dalɔ pɛɛ kpami nɛ mi wa a tsuɔ ní wawɛɛ.”​—Yak. 5:16.

9. Mɛni ji nɔ́ kpa ko hu nɛ wa ma nyɛ maa pee kɛ tsɔɔ kaa wa suɔ wa nyɛmimɛ ɔmɛ?

⁹ Wa jeɔ suɔmi kpo kɛ tsɔɔ wa nyɛmimɛ nyumuhi kɛ yihi hulɔ kɛ gu mɔde nɛ wa bɔɔ konɛ tue mi jɔmi nɛ hi waa kɛ mɛ wa kpɛti ɔ nɔ. Wa bɔɔ mɔde kaa wa maa kase bɔ nɛ Yehowa ngɔɔ tɔmi kɛ keɔ ha a. Ke Yehowa je e tsui mi faa nɛ e ngɔ e Bi ɔ kɛ ha ngɛ wa yayami ɔmɛ a he ɔ, anɛ e sɛ nɛ wɔ hu waa pee klaalo kaa wa maa ngɔ wa nyɛmimɛ ɔmɛ a tɔmihi kɛ ke mɛ lo? Wa sume nɛ waa pee kaa nyɔguɛ yiwutsotsɛ ɔ nɛ Yesu tu e he munyu ngɛ e nɔ́ he tomi nɔ́ ɔ mi ɔ. E ngɛ mi kaa nyɔguɛ nɛ ɔ nyɔmtsɛ ɔ ngɔ hiɔ babauu nɛ nyɔguɛ ɔ hɛɛ lɛ ɔ kɛ ke lɛ mohu lɛɛ, se nyɔguɛ ɔ lɛɛ e sume kaa e maa ngɔ hiɔ nyafii nɛ e nyɛmi nyɔguɛ ko hɛɛ lɛ ɔ kɛ ke lɛ. (Mat. 18:23-35) Ke nyagba ko ba o kɛ nɔ ko nyɛ kpɛti ngɛ asafo ɔ mi ɔ, anɛ o ma nyɛ maa ya nɔ ɔ ngɔ kekle nɛ nyɛ ya dla nyɛ kpɛti loko o ya Kaimi ɔ lo? (Mat. 5:23, 24) Ke o pee jã a, lɔ ɔ maa tsɔɔ kaa o suɔ Yehowa kɛ Yesu wawɛɛ.

10-11. Mɛni asafo mi nikɔtɔmahi ma nyɛ maa pee kɛ tsɔɔ kaa a suɔ Yehowa kɛ Yesu? (1 Petro 5:1, 2)

¹⁰ Mɛni asafo mi nikɔtɔmahi ma nyɛ maa pee kɛ tsɔɔ kaa a suɔ Yehowa kɛ Yesu? E he hia nɛ a hyɛ Yesu jijɔ ɔmɛ a nɔ. (Kane 1 Petro 5:1, 2.) Yesu ha nɛ nɔ́ nɛ ɔ pee heii kɛ ha bɔfo Petro. Akɛnɛ Petro kua Yesu si etɛ sɔuu he je ɔ, eko ɔ, Petro suɔ wawɛɛ nɛ e tsɔɔ kaa e suɔ Yesu. Se benɛ a tle Yesu si ɔ, e bi Petro ke: “Simon, Yohane bi, o suɔ mi lo?” Wa ma nyɛ ma ná nɔ mi mami kaa Petro maa pee nɔ́ fɛɛ nɔ́ kɛ tsɔɔ kaa e suɔ e Nyɔmtsɛ ɔ. Yesu de Petro ke: “Hyɛ ye jijɔ tsɔwi ɔmɛ a nɔ.” (Yoh. 21:15-17) Lɔ ɔ he ɔ, Petro je suɔmi mi nɛ e hyɛ e Nyɔmtsɛ ɔ jijɔ ɔmɛ a nɔ e wami be tsuo kɛ tsɔɔ kaa e suɔ Yesu niinɛ.

¹¹ Asafo mi nikɔtɔmahi, ngɛ Kaimi be ɔ mi ɔ, mɛni nyɛ ma nyɛ maa pee kɛ tsɔɔ kaa nɔ́ nɛ Yesu de Petro ɔ he hia nyɛ wawɛɛ? Nyɛ ma nyɛ maa tsɔɔ kaa nyɛ suɔ Yehowa kɛ Yesu kɛ gu nyɛmimɛ ɔmɛ nɛ nyɛ ma pɔ mɛ slaami ɔ nɔ. Jehanɛ hu ɔ, nyɛɛ bɔ mɔde wawɛɛ nɛ nyɛɛ ye bua nihi nɛ a gbɔjɔ ɔ konɛ a kpale kɛ ba Yehowa ngɔ ekohu. (Eze. 34:11, 12) Nyɛ ma nyɛ maa wo Baiblo kaseli kɛ ni hehi nɛ a ba Kaimi ɔ hu he wami. Wa suɔ nɛ wa ha nɛ mɛ tsuo a bua nɛ jɔ wawɛɛ, ejakaa wa ngɛ hɛ nɔ kami kaa mɛ hu a ma nyɛ ma ba pee Yesu kaseli.

12. Mɛni he je nɛ ke wa susu munyu nɛ Yesu tu gbɔkuɛ nɛ e nɔ jena e ma gbo ɔ he ɔ, e ma ha nɛ waa pee kã a? (Yohane 16:32, 33)

¹² Gbɔkuɛ nɛ e nɔ jena Yesu ma gbo ɔ, e de e kaseli ɔmɛ ke: “Nyɛ maa na amanehlu ngɛ je ɔ mi, se nyɛɛ pee kã! I ye je ɔ nɔ kunimi.” (Kane Yohane 16:32, 33.) Benɛ Yesu he nyɛli ɔmɛ te si kɛ wo lɛ ɔ, mɛni ye bua lɛ nɛ e nyɛ nɛ e da nya,  nɛ e ye anɔkuale kɛ ya si gbenɔ mi po ɔ? E ngɔ e hɛ kɛ fɔ Yehowa nɔ. Akɛnɛ Yesu le kaa e se nyɛɛli ɔmɛ hu kɛ kahi kaa jã maa kpe he je ɔ, e de Yehowa konɛ e bu a he. (Yoh. 17:11) Mɛni he je nɛ enɛ ɔ haa nɛ wa peeɔ kã a? Ejakaa Yehowa he wa kulaa pe wa he nyɛli ɔmɛ. (1 Yoh. 4:4) E naa nɔ́ fɛɛ nɔ́. Ngɛ anɔkuale mi ɔ, wa ngɛ nɔ mi mami kaa ke wa ngɔ wa hɛ kɛ fɔ Yehowa nɔ ɔ, wa be gbeye yee nɛ wa maa pee kã.

13. Mɛni nɛ Yosef nɛ e je Arimatia a pee kɛ tsɔɔ kaa e ngɛ kã?

¹³ Mo susu Yosef nɛ e je Arimatia a nɔ hyɛmi nɔ́ ɔ he nɛ o hyɛ. Yuda bi ɔmɛ buu lɛ wawɛɛ. E ji Yuda bi ɔmɛ a kojomi he ngua nɛ ji Sanhedrin ɔ mi no. Se benɛ Yesu ngɛ zugba a nɔ ɔ, Yosef nyɛ we nɛ e pee kã kulaa. Yohane de ngɛ e he ke “e ji Yesu kaselɔ, se Yuda bi ɔmɛ a he gbeye yemi he je ɔ, e ha we nɛ nihi nɛ a le.” (Yoh. 19:38) E ngɛ mi kaa Yosef bua jɔ Matsɛ Yemi ɔ he sɛ gbi ɔ he mohu lɛɛ, se e ha we nɛ ni kpahi nɛ a na kaa e ngɛ hemi kɛ yemi ngɛ Yesu mi. E ma nyɛ maa ba kaa e ngɛ gbeye yee kaa ke nihi le kaa e ji Yesu kaselɔ ɔ, a be lɛ bue hu. Se Baiblo ɔ ha nɛ wa na kaa benɛ Yesu gbo ɔ, Yosef “kɛ kã pue nɔ kɛ ya Pilato ngɔ nɛ e ya kpa lɛ pɛɛ kaa e ngɔ Yesu gbogboe ɔ kɛ ha lɛ.” (Maak. 15:42, 43) Jehanɛ lɛɛ, Yosef ha nɛ nihi le kaa e ji Yesu kaselɔ.

14. Mɛni e sa nɛ o pee ke o yeɔ adesa hɛ mi gbeye?

¹⁴ Anɛ mo hu o ye nimli a hɛ mi gbeye nɛ o pee o ní kaa Yosef hyɛ lo? Anɛ be komɛ ɔ, o yeɔ gbeye kaa o ma ha nɛ nihi nɛ o kɛ mɛ yaa sukuu loo nihi nɛ o kɛ mɛ tsuɔ ní ɔ nɛ a le kaa Yehowa Odasefo no ji mo? Anɛ o ngɛ o nane si gblae kaa o ma ha nɛ a baptisi mo aloo o maa je fiɛɛmi yami sisi, ejakaa o ngɛ gbeye yee kaa eko ɔ, nihi maa tu munyu kɛ si mo lo? Ko ha nɛ susumi nɛ ɔmɛ nɛ a tsi o nya nɛ o ko pee nɔ́ nɛ o le kaa e da. Moo je o tsui mi nɛ o sɔle ha Yehowa. Mo de lɛ nɛ e wo mo he wami konɛ o pee e suɔmi nya ní. Ke o na bɔ nɛ Yehowa ngɛ o sɔlemi ɔmɛ a heto hae ha a, e maa wo mo he wami wawɛɛ nɛ o maa pee kã.​—Yes. 41:10, 13.

15. Benɛ Yesu je e he kpo kɛ tsɔɔ e kaseli ɔmɛ ɔ, mɛni nɛ bua jɔmi nɛ a ná a ha nɛ a pee? (Luka 24:52, 53)

¹⁵ Benɛ Yesu gbo ɔ, e dɔ e kaseli ɔmɛ wawɛɛ. Moo po he foni kaa o ngɛ a si fɔfɔɛ ɔ mi. A huɛ nɛ a fiɛ we e he kulaa a  gbo, nɛ a hɛ nɔ kami hu ta. (Luka 24:17-21) Se kɛ̃ ɔ, benɛ a tle Yesu si nɛ e je e he kpo kɛ tsɔɔ mɛ ɔ, e to e tsui si kɛ ye bua mɛ nɛ a na bɔ nɛ e ha nɛ Baiblo gbami bami ha. Lɔ ɔ se ɔ, e ngɔ ní tsumi ko nɛ he hia kɛ wo a dɛ. (Luka 24:26, 27, 45-48) Benɛ Yesu ho hiɔwe ya ligbi 40 se ɔ, kaseli ɔmɛ a bua jɔ wawɛɛ nɛ a yi aywilɛho hu. A bua jɔ wawɛɛ ejakaa a le kaa Yesu ngɛ wami mi, nɛ e maa ye bua mɛ konɛ a nyɛ nɛ a tsu ní tsumi ehe nɛ e kɛ wo a dɛ ɔ. Bua jɔmi nɛ a ná a, ha nɛ a ya nɔ nɛ a je Yehowa yi.​—Kane Luka 24:52, 53; Níts. 5:42.

16. Mɛni blɔ nɔ wa ma nyɛ maa gu kɛ kase Yesu kaseli ɔmɛ?

¹⁶ Mɛni blɔ nɔ wa maa gu kɛ kase Yesu kaseli ɔmɛ? Waa kɛ bua jɔmi ma nyɛ ma sɔmɔ Yehowa be fɛɛ be, pi ngɛ Kaimi be ɔ mi pɛ. Enɛ ɔ peemi ma bi nɛ waa ngɔ Mawu Matsɛ Yemi ɔ kɛ ye kekle blɔ he ngɛ wa si himi mi. Kaa nɔ hyɛmi nɔ́ ɔ, nihi babauu to a ní tsumi he blɔ nya saminya konɛ a nyɛ nɛ a fiɛɛ, a ya asafo mi kpehi, nɛ a pee weku Mawu jami be fɛɛ be. Ni komɛ po ngɔ he lo nya níhi nɛ ni kpahi susu kaa e he hia pe kulaa a kɛ sã afɔle bɔ nɛ pee nɛ a nyɛ nɛ a pee babauu ngɛ asafo ɔ mi aloo a ya sɔmɔ ngɛ he nɛ fiɛɛli fuu a he hia ngɛ. E ngɛ mi kaa e biɔ mɔde bɔmi loko wa ma nyɛ maa ya nɔ ma sɔmɔ Yehowa mohu lɛɛ, se e wo si kaa e maa jɔɔ wɔ wawɛɛ ke wa ngɔ Matsɛ Yemi ɔ kɛ ye kekle blɔ he ngɛ wa si himi mi.​—Abɛ 10:22; Mat. 6:32, 33.

17. Mɛni o fia o pɛɛ si kaa o maa pee ngɛ Kaimi be nɛ ɔ mi? (Hyɛ foni ɔ.)

¹⁷ Jeha nɛ ɔ, wa ma kai Yesu gbenɔ ɔ Pɛplɛgbi ngɛ April ligbi 4 ɔ nɔ. Koo mlɛ kɛ ya si jamɛ a ligbi ɔ loko o pue o yi mi tɛ ngɛ Yesu si himi, e gbenɔ, kɛ suɔmi nɛ e kɛ Yehowa je kpo kɛ tsɔɔ wɔ ɔ he. Ngɔɔ he blɔ fɛɛ he blɔ nɛ o ma ná ngɛ Kaimi be ɔ mi tsuo ɔ kɛ pee jã. Kaa nɔ hyɛmi nɔ́ ɔ, mo he be kɛ kane níhi nɛ ngɛ daka nɛ ngɛ April 2019 Kristofohi A Si Himi Kɛ A Sɔmɔmi Ní Tsumi ɔ​—Ní Kasemi Womi ɔ ba fa 4 ɔ mi, nɛ o pue o yi mi tɛ ngɛ he. Be mi nɛ o ngɛ níhi nɛ ya nɔ ngɛ Yesu si himi mi ɔ he ní kasee ɔ, moo hyɛ kaa o maa na ngmamihi nɛ ma ha nɛ bua jɔmi, suɔmi, kɛ kã nɛ o ngɛ ɔ mi maa wa, nɛ o ya nɔ nɛ o je hɛ sa kpo lo. Lɔ ɔ se ɔ, mo susu ní pɔtɛɛ komɛ nɛ o ma nyɛ maa pee kɛ tsɔɔ kaa o bua jɔ nɔ́ nɛ Yehowa kɛ Yesu pee ɔ he wawɛɛ. O ma nyɛ ma ná nɔ mi mami kaa Yesu bua maa jɔ nɔ́ fɛɛ nɔ́ nɛ o maa pee konɛ o nyɛ nɛ o kai lɛ ngɛ Kaimi be nɛ ɔ mi ɔ he wawɛɛ.​—Kpoj. 2:19.