NÍ KASEMI 4
Yehowa Jɔɔ Mɔde Nɛ Wa Bɔɔ Kaa Wa Maa Ya Kaimi ɔ Nɔ
“Nyɛɛ ya nɔ nɛ nyɛɛ pee enɛ ɔ nɛ nyɛ kɛ kai mi.”—LUKA 22:19.
LA 19 Nyɔmtsɛ ɔ Gbɔkuɛ Niye Ní ɔ
NƆ́ NƐ WA MAA KASE a
1-2. Mɛni he je nɛ wa yaa Kaimi ɔ daa jeha a?
MAA pee jeha 2,000 nɛ be ɔ, Yesu ngɔ e wami kɛ ha ngɛ wa he, nɛ kɛ gu lɔ ɔ nɔ ɔ, wa ma nyɛ ma ná neneene wami. Gbɔkuɛ nɛ e nɔ jena Yesu ma gbo ɔ, e fã e se nyɛɛli ɔmɛ kaa a kai nɔ́ nɛ e je suɔmi mi nɛ e pee kɛ ha mɛ ɔ, kɛ gu gbijlɔ nɛ ngɛ kpokploo nɛ a kɛ abolo kɛ wai maa ye ɔ nɔ.—1 Kor. 11:23-26.
2 Wa buɔ Yesu fami nɛ ɔ tue ejakaa wa suɔ lɛ wawɛɛ. (Yoh. 14:15) Daa jeha ngɛ Kaimi be ɔ mi ɔ, wa jeɔ hɛ sa kpo ngɛ nɔ́ nɛ Yesu pee kɛ ha wɔ ɔ he kɛ gu sɔlemi nɛ wa sɔleɔ kɛ wa yi mi tɛ nɛ wa pueɔ ngɛ bɔ nɛ wa náa e gbenɔ ɔ he se ha a he. Waa kɛ bua jɔmi hu tsuɔ fiɛɛmi ní tsumi ɔ wawɛɛ, nɛ wa woɔ nihi fuu he wami konɛ a ba piɛɛ wa he kɛ ye gbijlɔ klɛdɛɛ nɛ ɔ. Ngɛ anɔkuale mi ɔ, wa fia wa pɛɛ si kaa wa be hae nɛ nɔ́ ko nɔ́ ko nɛ tsi wa nya nɛ wa ko ya Kaimi ɔ.
3. Mɛni he wa ma susu ngɛ ní kasemi nɛ ɔ mi?
3 Ngɛ ní kasemi nɛ ɔ mi ɔ, wa ma susu níhi nɛ Yehowa we bi bɔɔ mɔde wawɛɛ nɛ a peeɔ konɛ a nyɛ nɛ a kai Yesu gbenɔ ɔ he. Wa ma susu bɔ nɛ Yehowa we bi (1) kaiɔ Yesu gbenɔ ɔ kaa bɔ nɛ e tsɔɔ kaa a pee lɛ ha a, (2) bɔ nɛ wa fɔɔ nihi nine kɛ baa Kaimi ɔ ha, kɛ (3) bɔ nɛ wa bɔɔ mɔde nɛ wa kaiɔ Yesu gbenɔ ɔ ha ngɛ si fɔfɔɛhi nɛ a mi wa po mi.
WA KAIƆ YESU GBENƆ Ɔ KAA BƆ NƐ YESU TSƆƆ KAA A PEE LƐ Ɔ
4. Mɛni anɔkualehi nɛ a tsɔɔ wɔ daa jeha ngɛ Kaimi ɔ sisi, nɛ mɛni he je nɛ e sɛ nɛ waa na anɔkuale nɛ ɔmɛ kaa nɔ́ nyafii ko kulaa? (Luka 22:19, 20)
4 Daa jeha ke wa ya Kaimi ɔ, a daa Baiblo ɔ nɔ kɛ tuɔ munyu ko nɛ haa sane bimi komɛ a heto heii. Wa ba leɔ nɔ́ he je nɛ adesahi hia kpɔmi nɔ́ ɔ kɛ bɔ nɛ nɔmlɔ kake pɛ gbenɔ ma nyɛ ma je nihi babauu a he yayamihi kɛ je ha. A kaiɔ wɔ nɔ́ nɛ abolo ɔ kɛ wai ɔ daa si kɛ ha, kɛ nihi nɛ e sa nɛ a ye abolo ɔ nɛ a nu wai ɔ eko. (Kane Luka 22:19, 20.) Jehanɛ hu ɔ, wa pueɔ wa yi mi tɛ ngɛ jɔɔmihi nɛ se be nɛ nihi nɛ a ngɛ hɛ nɔ kami kaa a maa hi zugba a nɔ ma ná a he. (Yes. 35:5, 6; 65:17, 21-23) Anɔkuale nɛ ɔmɛ a he hia wawɛɛ nɛ e sɛ nɛ waa na mɛ kaa nɔ́ nyafii ko kulaa. Mɛni he je? Ejakaa nihi ayɔ akpehi abɔ li anɔkuale nɛ ɔmɛ, nɛ a li se nami nɛ ngɛ Yesu kpɔmi afɔle sami ɔ he hulɔ. Jehanɛ se hu ɔ, a kai we Yesu gbenɔ ɔ kaa bɔ nɛ Yesu tsɔɔ e se nyɛɛli ɔmɛ kaa a pee ɔ. Mɛni he je?
5. Benɛ Yesu bɔfo ɔmɛ a kpɛti nihi fuu gbo se ɔ, kɛ ni komɛ plɛɔ kɛ kaiɔ Yesu gbenɔ ɔ ha kɛɛ?
5 Be bɔɔ se benɛ Yesu bɔfo ɔmɛ a kpɛti nihi fuu gbo ɔ, lakpa Kristofohi ba sɛ asafo ɔ mi. (Mat. 13:24-27, 37-39) A tu “munyu kpɛ̃kpɛ̃ɛhi konɛ a kɛ gbla kaseli ɔmɛ kɛ nyɛɛ mɛ nitsɛmɛ a se.” (Níts. 20:29, 30) “Munyu kpɛ̃kpɛ̃ɛhi” nɛ lakpa Kristofohi nɛ ɔmɛ bɔni tsɔɔmi ɔ eko ji kaa Yesu kɛ e wami ha we “si kake nyɔngloo, konɛ e tloo nihi babauu a he yayamihi” kaa bɔ nɛ Baiblo ɔ tsɔɔ ɔ. Mohu ɔ, a tsɔɔ kaa e sa nɛ e ngɔ e wami kɛ sã afɔle si abɔ. (Heb. 9:27, 28) Mwɔnɛ ɔ, nihi babauu he lakpa tsɔɔmi nɛ ɔ ye, nɛ a yeɔ gbijlɔ nɛ ɔ daa otsi, be komɛ po ɔ, daa ligbi ngɛ a sɔlemi ɔmɛ a mi. Katoliki bi ɔmɛ tsɛɔ gbijlɔ nɛ ɔ ke “Mass.” b E ngɛ mi kaa jami komɛ hu pee we lɛ jã mohu lɛɛ, se loloolo ɔ, a li se nami nɛ ngɛ Yesu kpɔmi afɔle sami ɔ he. Ni komɛ ma bi ke, ‘Anɛ Yesu gbenɔ ɔ ma nyɛ ma ha nɛ a kɛ ye yayamihi nɛ ke mi niinɛ lo?’ Mɛni he je nɛ a biɔ jã a? Ejakaa nihi nɛ a hɛɛ susumi ɔ kaa Yesu gbenɔ ɔ be nyɛe ma ha nɛ a kɛ wa yayamihi nɛ ke wɔ ɔ mlɔɔ mɛ. Mɛni blɔ nɔ nɛ Yesu se nyɛɛli anɔkualetsɛmɛ ye bua nihi konɛ a nu sane nɛ ɔ sisi?
6. Benɛ e ke suu jeha 1872 ɔ, mɛni Baiblo kaseli ɔmɛ ba nu sisi?
6 Ngɛ jeha 1870 ɔ mi ɔ, Baiblo kaseli ɔmɛ bɔni Baiblo ɔ kasemi wawɛɛ, nɛ Charles Taze Russell ji nɔ nɛ nyɛɛ a hɛ mi. A suɔ nɛ a le nɔ́ tutuutu nɛ Yesu kpɔmi afɔle sami ɔ tsɔɔ, kɛ bɔ nɛ e sa nɛ a kai Yesu gbenɔ ɔ ha. Benɛ e ke suu jeha 1872 ɔ, Baiblo kaseli ɔmɛ ba nu sisi kaa Yesu ngɔ e wami ngɔ ha konɛ e kɛ kpɔ̃ adesahi tsuo. Jehanɛ hu ɔ, a ma we a nya kɛ fɔ nɔ́ nɛ a kase ɔ nɔ, mohu ɔ, a pee womihi, adafi fiami womihi, kɛ womi tɛtlɛɛhi kɛ ye bua ni kpahi nɛ a le nɔ́ nɛ a na a. Lɔ ɔ se ɔ, a kpeɔ si kake daa jeha nɛ a kaiɔ Yesu gbenɔ ɔ kaa bɔ nɛ Kristofohi nɛ a hi si ngɛ kaseli ɔmɛ a be ɔ mi ɔ pee ɔ.
7. Ngɛ mɛni blɔ nɔ nɛ wa náa níhi a mi hlami nɛ Baiblo kaseli ɔmɛ pee jehahi babauu nɛ be ɔ he se?
7 Mwɔnɛ ɔ, wa náa níhi a mi hlami nɛ anɔkuale Kristofohi nɛ ɔmɛ pee jehahi babauu nɛ be ɔ he se wawɛɛ. Ngɛ mɛni blɔ nɔ? Yehowa ye bua wɔ nɛ wa ba le nɔ́ nɛ Yesu kpɔmi afɔle sami ɔ tsɔɔ tutuutu, kɛ nɔ́ nɛ e maa pee kɛ ha adesahi tsuo. (1 Yoh. 2:1, 2) Wa ba kase hu kaa hɛ nɔ kami enyɔ lɛ ngɛ kɛ ha adesahi nɛ a peeɔ Mawu suɔmi nya ní ɔ. Ni komɛ ngɛ hɛ nɔ kami kaa a maa ya hiɔwe nɛ a be gboe hu gblegbleegble, nɛ nihi ayɔhi abɔ hu ngɛ hɛ nɔ kami kaa a maa hi si ngɛ zugba a nɔ kɛ ya neneene. Ke wa susu bɔ nɛ Yehowa suɔ wɔ ha kɛ bɔ nɛ wa ti nɔ fɛɛ nɔ náa Yesu kpɔmi afɔle sami ɔ he se ha a he ɔ, e haa nɛ wa hɛɛ kɛ suɔ Yehowa he wawɛɛ. (1 Pet. 3:18; 1 Yoh. 4:9) Enɛ ɔ he ɔ, kaa bɔ nɛ wa nyɛmimɛ anɔkualetsɛmɛ nɛ a hi si blema a pee ɔ, wɔ hu wa fɔɔ nihi nine konɛ a ba piɛɛ wa he kɛ kai Yesu gbenɔ ɔ kaa bɔ nɛ Yesu tsɔɔ wɔ kaa waa pee ɔ pɛpɛɛpɛ.
WA FƆƆ NIHI NINE KƐ HAA KAIMI Ɔ
Mɛni o ma nyɛ maa pee konɛ o nyɛ nɛ o tsu babauu ngɛ Kaimi be ɔ mi? (Hyɛ kuku 8-10) e
8. Mɛni nɛ Yehowa we bi pee kɛ fɔ nihi nine kɛ ba Kaimi ɔ? (Hyɛ foni ɔ.)
8 Kɛ je blema tɔɔ nɛ Yehowa we bi fɔɔ nihi nine kɛ baa Kaimi ɔ. Ngɛ jeha 1881 ɔ sisije ɔ, a fia adafi ngɛ Hwɔɔmi Mɔ ko mi kaa nyɛmimɛ nyumuhi kɛ yihi nɛ a ngɛ United States ɔ ma nyɛ ma bua a he nya ngɛ nyɛmi ko we mi ngɛ Allegheny Pennsylvania kɛ ha blɔ nya tomi klɛdɛɛ nɛ ɔ. Pee se ɔ, a ha nɛ asafo fɛɛ asafo kai Yesu gbenɔ ɔ ngɛ a we asafo ɔmɛ a mi. Ngɛ March 1940 ɔ mi ɔ, a wo fiɛɛli he wami kaa a ma nyɛ maa fɔ nɔ fɛɛ nɔ nɛ e bua jɔ sane kpakpa a he ngɛ a kpɔ ɔ mi ɔ nine kɛ ba Kaimi ɔ eko. Jeha 1960 ɔ mi ji kekleekle be nɛ a print nine fɔmi womihi kɛ ha asafo ɔmɛ. Kɛ je lɔ ɔ se ɔ, a gba Kaimi ɔ he nine fɔmi womihi babauu kɛ ha nihi. Mɛni he je nɛ wa bɔɔ mɔde wawɛɛ kɛ fɔɔ nihi nine ɔ?
9-10. Ke wa bɔ mɔde nɛ wa fɔ nihi nine kɛ ba Kaimi ɔ, mɛnɔmɛ nɛ a náa he se? (Yohane 3:16)
9 Yi mi tomi kake he je nɛ wa fɔɔ nihi nine konɛ a ba piɛɛ wa he kɛ kai Yesu gbenɔ ɔ ji kaa wa suɔ nɛ nihi nɛ a maa ba Kaimi ɔ kekleekle be ɔ, nɛ a ba le nɔ́ nɛ Yehowa kɛ Yesu pee kɛ ha wɔ tsuo ɔ. (Kane Yohane 3:16.) Wa hyɛɛ blɔ kaa nɔ́ nɛ a maa na, kɛ nɔ́ nɛ a maa nu ngɛ Kaimi ɔ sisi ɔ maa ta a tsui he konɛ a ya nɔ nɛ a kase Yehowa he ní babauu nɛ a ba sɔmɔ lɛ. Se ni kpahi hu náa he se.
10 Wa fɔɔ nihi nɛ a kpa Yehowa sɔmɔmi ɔ hu nine kɛ baa Kaimi ɔ. Jã nɛ wa peeɔ ɔ kaiɔ mɛ kaa loloolo ɔ, Mawu suɔ mɛ. A kpɛti nihi fuu kplɛɛɔ nine fɔmi ɔ nɔ nɛ a baa, nɛ ke wa na mɛ ɔ, wa bua jɔɔ wawɛɛ. Ke a ba Kaimi ɔ, e kaiɔ mɛ bua jɔmi nɛ a ná be ko nɛ be nɛ a ngɛ Yehowa sɔmɔe ɔ. Mo susu nyɛmiyo Monica nɔ hyɛmi nɔ́ ɔ he nɛ o hyɛ. c E bɔni fiɛɛmi yami ekohu ngɛ COVID-19 be ɔ mi, nɛ benɛ e ya jeha 2021 Kaimi ɔ, e de ke: “Kaimi nɛ ɔ ji Kaimi ko nɛ se be kulaa kɛ ha mi. I kpa fiɛɛmi yami jeha 20 nɛ be ɔ, se i kpale ná he blɔ nɛ i fiɛɛ, nɛ i fɔ nihi nine kɛ ha Kaimi ɔ. I je ye tsui mi tsuo kɛ pee jã, ejakaa ye hɛ sa nɔ́ nɛ Yehowa kɛ Yesu pee kɛ ha mi ɔ wawɛɛ.” (La 103:1-4) Ke nihi kplɛɛ wa nine fɔmi ɔ nɔ nɛ a ba Kaimi ɔ jio, a bɛ jio, wa bɔɔ mɔde wawɛɛ kaa wa maa fɔ nihi nine, ejakaa wa le kaa Yehowa bua jɔ wa mɔde bɔmi ɔ he.
11. Mɛni blɔ nɔ nɛ Yehowa jɔɔ mɔde nɛ wa bɔɔ kaa wa maa fɔ nihi nine kɛ ba Kaimi ɔ nɔ? (Hagai 2:7)
11 Yehowa jɔɔ mɔde nɛ wa bɔɔ kaa wa maa fɔ nihi nine kɛ ha Kaimi ɔ nɔ wawɛɛ. E ngɛ mi kaa COVID-19 ɔ he je ɔ, wa nyɛ we nɛ waa pee níhi kaa bɔ nɛ wa peeɔ sa a mohu lɛɛ, se ngɛ jeha 2021 ɔ mi ɔ, nihi 21,367,603 sɔuu nɛ a ba Kaimi ɔ. Ke wa ngɔ Yehowa Odasefohi abɔ nɛ ngɛ je kɛ wɛ ɔ kɛ to yibɔ nɛ ɔ he ɔ, nihi nɛ a ba Kaimi ɔ hyɛ wawɛɛ nitsɛ! Pi nihi abɔ nɛ a ba Kaimi ɔ pɛ ji nɔ́ nɛ he hia Yehowa. E susuɔ nihi nɛ a ba Kaimi ɔ a ti nɔ fɛɛ nɔ he wawɛɛ hulɔ. (Luka 15:7; 1 Tim. 2:3, 4) Wa ma nyɛ ma ná nɔ mi mami kaa ke wa fɔ nihi nine ɔ, Yehowa guɔ lɔ ɔ nɔ kɛ yeɔ bua wɔ nɛ wa naa nihi nɛ a ngɛ munyu ɔ he bua jɔmi.—Kane Hagai 2:7.
WA YAA KAIMI Ɔ NGƐ SI FƆFƆƐHI NƐ A MI WA PO MI
Yehowa jɔɔ mɔde nɛ wa bɔɔ kaa wa maa ya Kaimi ɔ nɔ (Hyɛ kuku 12) f
12. Mɛni si fɔfɔɛhi ma nyɛ ma ha nɛ e he nɛ wa kaa wa ma kai Yesu gbenɔ ɔ? (Hyɛ foni ɔ.)
12 Yesu gba kɛ fɔ si kaa ngɛ nyagbe ligbi ɔmɛ a mi ɔ, waa kɛ si fɔfɔɛhi nɛ a mi wa maa kpe. Ekomɛ ji wa weku li nɛ a maa te si kɛ wo wɔ, yi mi wami, tahi, gbenɔ hiɔhi nɛ maa ba kɛ ekpahi fuu. (Mat. 10:36; Maak. 13:9; Luka 21:10, 11) Be komɛ ɔ, si fɔfɔɛ nɛ ɔmɛ haa nɛ e he waa ha wɔ kaa wa ma kai Yesu gbenɔ ɔ. Mɛni nɛ wa nyɛmimɛ komɛ pee konɛ a nyɛ nɛ a da haomi nɛ ɔmɛ a nya, nɛ kɛ Yehowa ye bua mɛ ha kɛɛ?
13. Mɛni blɔ nɔ nɛ Yehowa jɔɔ Nyɛminyumu Artem ngɛ kã nɛ e je kpo, kɛ e pɛɛ si nɛ e fia kaa e ma kai Yesu gbenɔ ɔ ngɛ tsu womi he ɔ he?
13 Tsu womi. Wa nyɛmimɛ nɛ a wo mɛ tsu ngɛ a hemi kɛ yemi ɔ he je ɔ, peeɔ nɔ́ fɛɛ nɔ́ nɛ a ma nyɛ kɛ kaiɔ Yesu gbenɔ ɔ. Mo susu Nyɛminyumu Artem nɔ hyɛmi nɔ́ ɔ he nɛ o hyɛ. Benɛ jeha 2020 Kaimi ɔ ngɛ sue ɔ, a wo lɛ tsu ngɛ tsu tokofii ko mi, nɛ nihi enuɔ pɛ lɛ a ma nyɛ maa ya tsu nɛ ɔ mi. E ngɛ mi kaa a wo lɛ tsu mohu lɛɛ, se e bɔ mɔde nɛ e hla ní komɛ kɛ da si kɛ ha abolo ɔ kɛ wai ɔ, nɛ e to blɔ nya konɛ e tu Kaimi ɔ he munyu ɔ kɛ ha e he. Se nihi nɛ a piɛɛ e he ngɛ tsu womi he ɔ nuɔ sigaleti, nɛ a tuɔ munyu nɛ sɛ kulaa. Mɛni e pee ngɛ he? E kpa mɛ pɛɛ kaa a ko nu sigaleti loo a ko tu munyu yaya ko ngmlɛfia kake pɛ. Artem nya kpɛ e he wawɛɛ kaa ni ɔmɛ kplɛɛ nɔ kaa a be jã pee ke e ngɛ Kaimi ɔ yee. Artem de ke: “I bɔ mɔde kaa i kɛ mɛ maa sɛɛ Kaimi ɔ he ní.” E ngɛ mi kaa sisije ɔ, a bua jɔɛ kaa a maa bu Artem tue mohu lɛɛ, se benɛ e ye Kaimi ɔ ta a, a bi lɛ sanehi fuu kɛ kɔ he.
14. E ngɛ mi kaa COVID-19 hiɔ ɔ gbɛ fia je ɔ mi mohu lɛɛ, se mɛni mɔde nɛ Yehowa we bi bɔ konɛ a nyɛ nɛ a kai Yesu gbenɔ ɔ?
14 COVID-19 hiɔ ɔ. Hiɔ nɛ ɔ he je ɔ, Yehowa we bi nyɛ we nɛ a kpe hɛ mi kɛ hɛ mi kɛ pee Kaimi ɔ. Se kɛ̃ ɔ, a nyɛ nɛ a kai Yesu gbenɔ ɔ. d Asafohi nɛ a ngɛ hehi nɛ Intanɛti ngɛ ɔ nyɛ nɛ a pee Kaimi ɔ kɛ gu videoconference nɔ. Se nihi ayɔhi abɔ nɛ a ngɛ hehi nɛ Intanɛti be ɔ hu nɛɛ? Ngɛ ma komɛ a nɔ ɔ, a to blɔ nya nɛ nyɛmimɛ ɔmɛ bu munyu ɔ tue ngɛ tiivi loo radio nɔ. Jehanɛ hu ɔ, asafo ɔ ní tsumi kɔni ɔmɛ record munyu ɔ ngɛ gbihi 500 kɛ se mi konɛ nihi nɛ a ngɛ kɔpehi loo hehi nɛ tsɔ a he banee ɔ nɛ a nyɛ nɛ a kai Yesu gbenɔ ɔ. Lɔ ɔ se ɔ, a to blɔ nya nɛ nyɛmimɛ nyumuhi ngɔ munyu ɔ nɛ a record ɔ kɛ ya ha nyɛmimɛ nɛ a ngɛ lejɛ ɔmɛ.
15. Mɛni o kase ngɛ Baiblo kaselɔ ko nɛ a tsɛɛ lɛ ke Sue ɔ nɔ hyɛmi nɔ́ ɔ mi?
15 Weku li nɛ a maa te si kɛ wo wɔ. Ngɛ ni komɛ a blɔ fa mi ɔ, nɔ́ nɛ haoɔ mɛ wawɛɛ nɛ haa nɛ e he waa ha mɛ kaa a maa ya Kaimi ɔ ji a weku li nɛ a teɔ si kɛ woɔ mɛ. Mo susu Baiblo kaselɔ ko nɛ a tsɛɛ lɛ ke Sue nɔ hyɛmi nɔ́ ɔ he nɛ o hyɛ. Ligbi nɛ e nɔ jena nɛ a maa ye jeha 2021 Kaimi ɔ, Sue de e Baiblo tsɔɔlɔ ɔ kaa e be nyɛe maa ya Kaimi ɔ akɛnɛ e weku li teɔ si kɛ woɔ lɛ ɔ he je. Nɔ nɛ e kɛ Sue kaseɔ Baiblo ɔ kane Luka 22:44 ɔ kɛ tsɔɔ lɛ. Lɔ ɔ se ɔ, e de Sue kaa ke waa kɛ nyagbahi ngɛ kpee ɔ, e sa nɛ waa kase Yesu nɔ hyɛmi nɔ́ ɔ, nɛ waa sɔle ha Yehowa nɛ waa ngɔ wa hɛ kɛ fɔ e nɔ ngɛ nɔ́ fɛɛ nɔ́ mi. E nɔ jena a, Sue to abolo ɔ kɛ wai ɔ he blɔ nya kɛ fɔ si nɛ e hyɛ Mɔtu Mawu Jami klɛdɛɛ ɔ ngɛ jw.org ɔ nɔ. Jamɛ a gbɔkuɛ ɔ, e ya sɛ e tsu ɔ mi nɛ e bu Kaimi ɔ tue ngɛ fon nɔ. Pee se ɔ, Sue ngma sɛ womi kɛ ya ha nɔ nɛ kɛ lɛ kaseɔ Baiblo ɔ, nɛ e de lɛ ke: “Hiɛ ɔ, o wo mi he wami wawɛɛ nitsɛ. I pee nɔ́ fɛɛ nɔ́ nɛ ma nyɛ konɛ ma bu Kaimi ɔ tue, nɛ Yehowa hu ye bua mi. Ngɛ anɔkuale mi ɔ, ye bua jɔ wawɛɛ kaa Yehowa ye bua mi!” Anɛ mo hu o susu kaa Yehowa maa ye bua mo ke o kɛ si fɔfɔɛ ko kaa jã kpe lo?
16. Mɛni he je nɛ wa ngɛ nɔ́ mi mami kaa Yehowa maa jɔɔ mɔde nɛ wa bɔɔ kaa wa maa ya Kaimi ɔ nɔ ɔ? (Roma Bi 8:31, 32)
16 Yehowa bua jɔɔ mɔde nɛ wa bɔɔ kaa wa ma kai Yesu gbenɔ ɔ he wawɛɛ. Wa ma nyɛ ma ná nɔ mi mami kaa Yehowa maa jɔɔ wɔ ke wa je hɛ sa kpo ngɛ nɔ́ nɛ e pee kɛ ha wɔ ɔ he. (Kane Roma Bi 8:31, 32.) Enɛ ɔ he ɔ, nyɛ ha nɛ waa fia wa pɛɛ si kaa wa maa ya jeha nɛ ɔ Kaimi ɔ, nɛ waa bɔ mɔde nɛ waa pee babauu ngɛ Yehowa sɔmɔmi mi ngɛ Kaimi be ɔ mi.
LA 18 Wa Bua Jɔ Kpɔmi Nɔ́ ɔ He
a Ngɛ Pɛplɛgbi April ligbi 4, 2023 ɔ nɔ ɔ, nihi ayɔhi abɔ ngɛ je kɛ wɛ ɔ maa ya Kristo gbenɔ ɔ Kaimi ɔ. Ngɛ nihi babauu a blɔ fa mi ɔ, Kaimi nɛ ɔ maa pee kekleekle nɔ́ nɛ a maa ya. Nihi nɛ a kpa Yehowa sɔmɔmi jehahi babauu nɛ́ a ya Kaimi ɔ kɛ ɔ, hu maa ba eko. Ni komɛ a si fɔfɔɛ he je ɔ, e he ma nyɛ maa wa kaa a maa ya Kaimi ɔ eko, se loloolo ɔ, a maa ya. Bɔ fɛɛ bɔ nɛ o si fɔfɔɛ ma ji ha a, o ma nyɛ ma ná nɔ mi mami kaa Yehowa bua maa jɔ ke e na kaa o bɔ mɔde nɛ o ya Kaimi ɔ.
b Nihi babauu nɛ a yaa sɔlemi ɔ he ye kaa ke a ngɛ gbijlɔ nɛ ɔ yee ɔ, abolo ɔ tsakeɔ kɛ peeɔ Kristo nɔmlɔ tso nɛ wai ɔ hu tsakeɔ kɛ peeɔ Kristo muɔ. A susu hu kaa be fɛɛ be nɛ a kɛ a he maa wo gbijlɔ nɛ ɔ mi ɔ, Yesu ngɔ e nɔmlɔ tso kɛ e muɔ kɛ ngɛ afɔle sãe ekohu.
c A tsake biɛ ɔmɛ ekomɛ.
d Yaa jw.org ɔ nɔ nɛ o hyɛ munyuyi nɛ ji, “Jeha 2021 Kaimi ɔ” hulɔ.
