Be komɛ ɔ, hehi nɛ a tsɔse nyɛmimɛ nyumu komɛ ngɛ ɔ haa nɛ nyumuhi naa yihi kaa a he hia we. Kaa nɔ hyɛmi nɔ́ ɔ, Hans nɛ e ji kpɔ mi nɔ hyɛlɔ ngɛ Bolivia a de ke: “Ngɛ ma komɛ a kusumi nya a, nyumuhi naa a he kaa a nɔ kuɔ wawɛɛ nɛ a woɔ a he nɔ, enɛ ɔ haa nɛ nyumu ɔmɛ naa a he kaa a he hia kulaa pe yihi, nɛ a bui yihi fɛɛ.” Asafo mi nɔkɔtɔma ko nɛ a tsɛɛ lɛ ke Shengxian nɛ e ngɛ Taiwan ɔ de ke: “Ngɛ he nɛ i ngɛ ɔ, nyumuhi fuu nuɔ he kaa ke nyumuhi ngɛ munyu tue ɔ, e sɛ nɛ yihi nɛ a tu munyu. Ke yo ko tsɔɔ e susumi ngɛ nɔ́ ko he, nɛ nyumu ko wo nɔ ta ngɛ e huɛmɛ a kpɛti ɔ, eko ɔ, a maa ye nyumu ɔ he fɛu nɛ a be lɛ bue.” Nyumu komɛ hu peeɔ ní kpahi kɛ tsɔɔ kaa a be bumi kɛ ha yihi. Kaa nɔ hyɛmi nɔ́ ɔ, a deɔ ní komɛ nɛ ngɛ muɔ ngɛ yihi a he kɛ yeɔ a he fɛu.

Se anɔkuale sane ji kaa, ngɛ bɔ nɛ a tsɔse nyumu ko ha loo bɔ nɛ e ma a mi kusumi ngɛ ha tsuo se ɔ, e ma nyɛ maa pee tsakemi. E ma nyɛ ma tsake susumi nɛ e hɛɛ kaa nyumuhi a nɔ kuɔ pe yihi ɔ. (Efe. 4:​22-24) Ke nyumu ko pue e yi mi tɛ ngɛ nɔ hyɛmi nɔ́ nɛ Yehowa pee ɔ he ɔ, e maa ye bua lɛ konɛ e pee tsakemi. Ngɛ munyu nɛ ɔ mi ɔ, wa ma susu bɔ nɛ Yehowa kɛ yihi hiɔ si ha a he, nɛ wa maa hyɛ nɔ́ nɛ maa ye bua nyɛmimɛ nyumuhi konɛ a kɛ yihi nɛ hi si saminya kaa bɔ nɛ Yehowa peeɔ ɔ. Jehanɛ hu ɔ, wa maa hyɛ nɔ́ nɛ asafo mi nikɔtɔmahi ma nyɛ maa pee kɛ tsɔɔ kaa a buɔ nyɛmimɛ yihi.

KƐ YEHOWA KƐ YIHI HIƆ SI HA KƐƐ?

Yehowa peeɔ nɔ hyɛmi nɔ́ kpakpa ngɛ bɔ nɛ e sa kaa waa kɛ yihi nɛ si hi ha a he. E ji Tsɛ nɛ e mi mi sãa lɛ, nɛ e suɔ e bimɛ tsuo. (Yoh. 3:16) Nyɛmimɛ yihi nɛ a yeɔ anɔkuale ɔ a he jua wa ha Yehowa wawɛɛ. Mo susu ní komɛ nɛ Yehowa pee kɛ tsɔɔ kaa e buɔ yihi nɛ e suɔ mɛ wawɛɛ ɔ he nɛ o hyɛ.

 Yehowa kɛ yihi hiɔ si kaa bɔ nɛ e kɛ nyumuhi hiɔ si ɔ. Yehowa bɔ nyumuhi kɛ yihi tsuo ngɛ e subai nɔ. (1 Mose 1:27) E bɔɛ nyumuhi konɛ a le ní pe yihi, nɛ e ha we mɛ dloomi nike ní ko nɛ yihi be eko. Jehanɛ hu ɔ, e de we kaa e suɔ nyumuhi a sane pe yihi. (2 Kron. 19:7) Yehowa bɔ nyumuhi kɛ yihi nɛ e ha mɛ tsuo nyɛmi nɛ a kɛ ma nyɛ maa nu Baiblo ɔ mi anɔkualehi a sisi, nɛ́ a kase e su kpakpa amɛ hulɔ. Jehanɛ hu ɔ, Yehowa bua jɔ nyumuhi kɛ yihi nɛ a ngɛ hemi kɛ yemi ngɛ e mi ɔ tsuo a he. E ha nyumuhi kɛ yihi tsuo he blɔ kaa a hi si ngɛ zugba a nɔ kɛ ya neneene aloo a pee osɔfohi kɛ matsɛmɛ ngɛ hiɔwe. (2 Pet. 1:​1, sisi ningma.) Ngɛ anɔkuale mi ɔ, Yehowa nɛ yihi kaa a he hia we.

Yehowa buɔ mɛ tue. Yehowa susuɔ bɔ nɛ yihi nuɔ he ha a he, nɛ e susuɔ nyagbahi nɛ a kɛ kpeɔ ɔ hu he. Kaa nɔ hyɛmi nɔ́ ɔ, e bu Rahel kɛ Hana a sɔlemihi tue nɛ e ha a sɔlemi ɔmɛ a he heto. (1 Mose 30:22; 1 Sam. 1:​10, 11, 19, 20) Jehanɛ hu ɔ, Yehowa ha nɛ a ngma nyumuhi nɛ a bu yihi tue ɔ a he sane ngɛ Baiblo ɔ mi. Kaa nɔ hyɛmi nɔ́ ɔ, Yehowa de Abraham kaa e bu e yo Sara tue, nɛ e pee jã. (1 Mose 21:​12-14) Matsɛ David hu bu Abigail tue. Ngɛ anɔkuale mi ɔ, David nu he kaa Yehowa lɛ tsɔ Abigail kaa e kɛ lɛ nɛ ba tu munyu ɔ nɛ. (1 Sam. 25:​32-35) Yesu nɛ e kaseɔ e Tsɛ ɔ su kpakpa amɛ ɔ bu Maria nɛ ji e nyɛ ɔ tue. (Yoh. 2:​3-10) Nɔ hyɛmi ní nɛ ɔmɛ ha nɛ wa naa kaa blɔ kake nɛ Yehowa guɔ nɔ kɛ tsɔɔ kaa e buɔ yihi ji kaa e buɔ mɛ tue.

Yehowa ngɛ hɛ kɛ nɔ fɔmi ngɛ yihi a mi. Kaa nɔ hyɛmi nɔ́ ɔ, Yehowa ngɛ hɛ kɛ nɔ fɔmi ngɛ Hawa mi kaa e ma nyɛ maa ye bua kɛ hyɛ zugba a tsuo nɔ. (1 Mose 1:28) Jã nɛ Yehowa pee ɔ tsɔɔ kaa e naa Hawa kaa e he hia, nɛ e ji he piɛɛlɔ kɛ ha Adam. Jehanɛ hu ɔ, Yehowa ngɔ ní tsumi kɛ wo gbalɔyo Debora kɛ Hulda a dɛ kaa a wo e we bi ga, nɛ kojolɔ ko kɛ matsɛ ko hu piɛɛ he. (Many. 4:​4-9; 2 Ma. 22:​14-20) Mwɔnɛ ɔ, Yehowa ngɔ ní tsumi kɛ wo yihi nɛ a ji Kristofohi ɔ a dɛ. Yihi anɔkualetsɛmɛ nɛ ɔmɛ sɔmɔɔ kaa blɔ gbali, kɛ ma se sane kpakpa fiɛɛli, nɛ a kpɛti ni komɛ hu ji fiɛɛli ngɛ asafo ɔ mi. Jehanɛ hu ɔ, a yeɔ bua kɛ tɛniɔ tsuhi nɛ asafo ɔ maa a, nɛ a ti ni komɛ hu yeɔ bua kɛ dlaa Matsɛ Yemi Asahi kɛ asafo ɔ tsu kpahi. A kpɛti ni komɛ sɔmɔɔ ngɛ Betel kɛ gbi sisi tsɔɔmi hehi nɛ a be Betel. Nyɛmimɛ yi nɛ ɔmɛ ngɛ kaa tabo ngua nɛ Yehowa guɔ a nɔ kɛ tsuɔ e yi mi tomihi a he ní. (La 68:11) Ngɛ anɔkuale mi ɔ, Yehowa nɛ yihi kaa a gbɔjɔ loo nihi nɛ a sɛ kɛ ha ní tsumihi.

MƐNI MAA YE BUA NYƐMIMƐ NYUMUHI KONƐ A KƐ YIHI NƐ HI SI SAMINYA KAA BƆ NƐ YEHOWA PEEƆ Ɔ?

Nyɛmimɛ nyumuhi, ke wa suɔ nɛ waa le kaa waa kɛ nyɛmimɛ yihi hiɔ si kaa bɔ nɛ Yehowa peeɔ ɔ, e sa nɛ waa kɛ anɔkuale yemi nɛ hyɛ wa ní peepee kɛ wa susumi saminya. Loko wa ma nyɛ maa pee jã a, wa hia yemi kɛ buami. Kaa bɔ nɛ X-ray machine ko ma nyɛ maa na hiɔ nɛ ngɛ nɔ ko tsui mi ɔ, jã nɔuu kɛ̃ nɛ huɛmɛ kpakpahi kɛ Mawu Munyu ɔ ma nyɛ maa ye bua wɔ konɛ waa le ke ji wa naa yihi kaa bɔ nɛ Yehowa naa mɛ ɔ. Mɛni wa ma nyɛ maa pee konɛ wa nine nɛ su yemi kɛ buami nɛ ɔ nɔ?

Mo bi o huɛ ko nɛ yeɔ mo anɔkuale. (Abɛ 18:17) Wa ma nyɛ maa ya wa huɛ ko nɛ wa he lɛ ye, nɛ e mi mi jɔ, nɛ susuɔ nɔ́ he saminya a ngɔ, nɛ wa bi lɛ ke: “Kɛ o susu kaa i kɛ yihi hiɔ si ha kɛɛ? Anɛ a nuɔ he kaa i buɔ mɛ lo? Anɛ nɔ́ kpa ko ngɛ nɛ ma nyɛ ma pee konɛ i kɛ mɛ nɛ hi si saminya lo?” Ke o huɛ ɔ de mo ní komɛ nɛ o ma nyɛ maa pee konɛ o ya o hɛ mi ɔ, koo ngɔ níhi kɛ je o nya. Mohu ɔ, moo pee klaalo kaa o maa pee tsakemihi nɛ a he hia a.

Moo kase Mawu Munyu ɔ. Nɔ́ kake nɛ se be nɛ ma nyɛ maa ye bua wɔ nɛ waa le bɔ nɛ waa kɛ nyɛmimɛ yihi hiɔ si ha a ji kaa wa maa ngɔ Mawu Munyu ɔ kɛ kpa wa mi. (Heb. 4:12) Ke wa ngɛ Baiblo ɔ kasee ɔ, wa ma nyɛ ma susu nyumu komɛ nɛ a kɛ yihi hi si saminya kɛ nyumuhi nɛ a pee we jã a he. Lɔ ɔ se ɔ, wa ma nyɛ maa ngɔ a ní peepee ɔ kɛ to wa nɔ́ ɔ he. Jehanɛ hu ɔ, e sa nɛ waa hyɛ nɛ hi nɛ wa ko ngɔ ngmami kake ko nɛ wa kane ɔ kɛ fĩ juɛmi nɛ dɛ nɛ ni komɛ hɛɛ ngɛ yihi a he ɔ se. Mohu ɔ, e sa kaa wa susu ngmamihi fuu nɛ tsɔɔ bɔ nɛ e sa kaa nyumu ko kɛ yo nɛ hi si ha a he. Kaa nɔ hyɛmi nɔ́ ɔ, 1 Petro 3:7 ɔ tsɔɔ kaa e sa nɛ hunomɛ nɛ a hɛɛ a yihi kɛ “bumi kaa bɔ nɛ a hɛɛɔ buɛ nɛ he wɛ ɔ.” a Anɛ enɛ ɔ tsɔɔ kaa nyumuhi a nɔ kuɔ, nɛ a ngɛ nile  kɛ nyɛmi pe yihi lo? Dɛbi kulaa! Moo ngɔ Petro munyu ɔmɛ kɛ to Galatia Bi 3:​26-29 ɔ nɛ tsɔɔ kaa Yehowa hla nyumuhi kɛ yihi tsuo kaa a piɛɛ Yesu he kɛ ye Matsɛ ngɛ hiɔwe ɔ he. Ke wa kase Mawu Munyu ɔ, nɛ wa bi wa huɛ ko kaa e de wɔ bɔ nɛ e naa kaa waa kɛ yihi hiɔ si ha a, e maa ye bua wɔ konɛ wa je bumi nɛ sa kpo kɛ tsɔɔ wa nyɛmimɛ yihi.

MƐNI ASAFO MI NIKƆTƆMAHI MA NYƐ MAA PEE KƐ TSƆƆ KAA A BUƆ NYƐMIMƐ YIHI?

Nyɛmimɛ nyumuhi nɛ a ngɛ asafo ɔ mi ɔ ma nyɛ ma je bumi kpo kɛ tsɔɔ nyɛmimɛ yihi ke ji kaa a kase nɔ hyɛmi nɔ́ kpakpa nɛ asafo mi nikɔtɔmahi peeɔ ɔ. Mɛni nɔ hyɛmi nɔ́ nɛ asafo mi nikɔtɔmahi peeɔ kɛ tsɔɔ kaa a buɔ nyɛmimɛ yihi? Nyɛ ha nɛ wa susu ní pɔtɛɛ komɛ nɛ a peeɔ ɔ he nɛ waa hyɛ.

Asafo mi nikɔtɔmahi jeɔ nyɛmimɛ yihi a yi. Bɔfo Paulo pee nɔ hyɛmi nɔ́ kɛ ha asafo mi nikɔtɔmahi. Ngɛ sɛ womi nɛ e ngma kɛ ya ha Roma bi ɔmɛ ɔ mi ɔ, e je nyɛmimɛ yi komɛ a yi. (Rom. 16:12) Moo hyɛ bɔ nɛ nyɛmimɛ yi nɛ ɔmɛ a bua maa jɔ ha benɛ a kane Paulo sɛ womi ɔ kɛ tsɔɔ asafo ɔ tsuo ɔ. Jã nɔuu kɛ̃ nɛ asafo mi nikɔtɔmahi nɛ a ngɛ mwɔnɛ ɔ jeɔ nyɛmimɛ yihi a yi ngɛ su kpakpahi nɛ a ngɛ kɛ ní tsumi nɛ a ngɛ tsue kɛ ha Yehowa a he. Enɛ ɔ nɛ asafo mi nikɔtɔmahi peeɔ ɔ haa nɛ nyɛmimɛ yihi nuɔ he kaa a buɔ mɛ nɛ a he hia wawɛɛ. Ke asafo mi nɔkɔtɔma ko wo nyɛmiyo ko he wami ɔ, e ma nyɛ maa ye bua lɛ konɛ e ya nɔ nɛ e kɛ anɔkuale yemi nɛ sɔmɔ Yehowa.—Abɛ 15:23.

Ke asafo mi nɔkɔtɔma ko ngɛ nyɛmiyo ko yi jee ɔ, e sa nɛ e je e tsui mi nɛ e tsɔɔ nɔ́ tutuutu he je nɛ e ngɛ e yi jee ɔ. Mɛni he je nɛ enɛ ɔ he hia a? Nyɛmiyo ko nɛ a tsɛɛ lɛ ke Jessica a de ke: “Ke nyɛminyumu ko de nyɛmiyo ko ke ‘o bɔ mɔde saminya a,’ e haa nɛ nyɛmiyo ɔ bua jɔɔ. Se ke nyɛminyumu ko je wa yi ngɛ nɔ́ pɔtɛɛ ko he ɔ, e woɔ wɔ he wami nɛ wa nɔ gbagba teɔ. Kaa nɔ hyɛmi nɔ́ ɔ, ke nyɛmiyo ko haa nɛ e bimɛ ɔmɛ hiɔ si kpoo ngɛ asafo mi kpehi a sisi, aloo e ya ngɔɔ Baiblo kaselɔ ko kɛ baa asafo mi kpe, nɛ a je e yi ngɛ he ɔ, e woɔ lɛ he wami  wawɛɛ.” Ke asafo mi nikɔtɔmahi je nyɛmimɛ yihi a yi ngɛ nɔ́ pɔtɛɛ ko nɛ a pee ɔ he ɔ, e haa nɛ nyɛmimɛ yi ɔmɛ nuɔ he kaa a he hia ngɛ asafo ɔ mi.

Asafo mi nikɔtɔmahi buɔ nyɛmimɛ yi ɔmɛ tue. Asafo mi nikɔtɔmahi nɛ a baa a he si ɔ susuu we kaa a le ní pe nɔ fɛɛ nɔ. Asafo mi nikɔtɔmahi kaa jã a biɔ nyɛmimɛ yihi ga womi ngɛ níhi a he, nɛ ke nyɛmimɛ yi ɔmɛ ngɛ a juɛmi tsɔɔe ɔ, a buɔ mɛ tue saminya. Ke asafo mi nikɔtɔmahi peeɔ jã a, e woɔ nyɛmimɛ yi ɔmɛ he wami wawɛɛ, nɛ mɛ nitsɛmɛ hu a náa he se. Ngɛ mɛni blɔ nɔ? Asafo mi nɔkɔtɔma ko nɛ a tsɛɛ lɛ ke Gerardo nɛ e sɔmɔɔ ngɛ Betel ɔ de ke: “I ba na kaa ke i bi nyɛmimɛ yihi ga womi ngɛ nɔ́ ko he ɔ, e yeɔ bua mi nɛ i nyɛɔ nɛ i tsuɔ ye ní tsumi ɔ saminya. Behi fuu ɔ, a ngɛ níhi a si kpami ngɛ ní tsumi ko mi pe nyɛmimɛ nyumuhi fuu po, ejakaa a tsu jamɛ a ní tsumi ɔ be kɛkɛɛ.” Ngɛ asafo ɔ mi ɔ, nyɛmimɛ yihi fuu sɔmɔɔ kaa blɔ gbali, enɛ ɔ he ɔ, a le níhi fuu kɛ kɔɔ nihi nɛ a ngɛ zugba kpɔ ɔ mi ɔ a he. Asafo mi nɔkɔtɔma ko nɛ a tsɛɛ lɛ ke Bryan ɔ de ke: “Ngɛ anɔkuale mi ɔ, wa nyɛmimɛ yi ɔmɛ ngɛ nile kɛ su kpakpahi fuu nɛ he hia asafo ɔ wawɛɛ. Enɛ ɔ he ɔ, moo bɔ mɔde nɛ o ná a níhi a si kpami ɔmɛ a he se!”

Asafo mi nikɔtɔmahi nɛ a ngɛ nile ɔ kɛ oya yemi kua we nyɛmimɛ yihi a ga womi. Mɛni he je? Asafo mi nɔkɔtɔma ko nɛ a tsɛɛ lɛ ke Edward ɔ de ke, “Nyɛmiyo ko níhi a si kpami loo e juɛmi kpo nɛ e ma je ɔ ma nyɛ maa ye bua nyɛminyumu ko konɛ e nu sane ko sisi saminya. Jehanɛ hu ɔ, lɔ ɔ ma nyɛ maa ye bua nyɛminyumu ɔ konɛ e nu he kɛ ha ni kpahi.” (Abɛ 1:5) Ke asafo mi nɔkɔtɔma ko be nyɛmiyo ko ga womi ngɔe kɛ tsu ní po ɔ, e ma nyɛ maa na lɛ si kaa e tsɔɔ e juɛmi, kɛ bɔ nɛ e ngɛ he nue ha.

Asafo mi nikɔtɔmahi tsɔseɔ nyɛmimɛ yihi. Asafo mi nikɔtɔmahi nɛ a le ní ɔ, bɔɔ mɔde kaa a ma tsɔse nyɛmimɛ yihi. Kaa nɔ hyɛmi nɔ́ ɔ, a ma nyɛ ma tsɔɔ nyɛmiyo ko bɔ nɛ a hyɛɛ fiɛɛmi yami kpe nɔ ha, konɛ ke nyɛminyumu ko nɛ a baptisi lɛ be lejɛ ɔ, e nyɛ nɛ e hyɛ fiɛɛmi yami kpe ɔ nɔ. A ma nyɛ ma tsɔse mɛ nɛ a le bɔ nɛ a kɛ klama komɛ tsuɔ ní ha, konɛ a nyɛ nɛ a ye bua ngɛ asafo ɔ tsuhi a mami kɛ a dlami mi. Ngɛ Betel ɔ, nyɛmimɛ nyumuhi nɛ a hyɛɛ ní tsumihi a nɔ ɔ tsɔseɔ nyɛmimɛ yihi kɛ haa ní tsumi slɔɔtoslɔɔtohi. Ní tsumi nɛ ɔmɛ ekomɛ ji: Níhi a dlami, níhi a hemi kɛ e juami, sika he blɔ nya tomi, kɔmpiuta blɔ nɔ tomihi a he ní tsumi kɛ ekpahi. Ke asafo mi nikɔtɔmahi tsɔseɔ nyɛmimɛ yihi ɔ, e tsɔɔ kaa a naa mɛ kaa a he hia, nɛ a ma nyɛ maa ngɔ hɛ kɛ fɔ a nɔ.

Nyɛmimɛ yihi fuu nɛ asafo mi nikɔtɔmahi tsɔse mɛ ɔ yeɔ bua ni kpahi. Kaa nɔ hyɛmi nɔ́ ɔ, ke adebɔ mi oslaa ko ba a, nyɛmimɛ yi komɛ nɛ a tsɔse mɛ ɔ yeɔ bua kɛ maa tsu ɔmɛ ekohu ngɛ he nɛ oslaa a ba ngɛ ɔ. Nyɛmimɛ yi kpahi nɛ a tsɔse mɛ kɛ ha ma nɔ odase yemi ɔ hu tsɔseɔ nyɛmimɛ yihi fuu konɛ a nyɛ nɛ a kɛ a he nɛ wo fiɛɛmi ní tsumi ɔ fã nɛ ɔ mi. Kɛ nyɛmimɛ yihi naa asafo mi nikɔtɔmahi nɛ a tsɔseɔ mɛ ɔ ha kɛɛ? Nyɛmiyo ko nɛ a tsɛɛ lɛ ke Jennifer a de ke: “Benɛ i ná he blɔ kɛ ye bua kɛ ma Matsɛ Yemi Asa ko ɔ, nyɛminyumu ɔ nɛ hyɛɛ wa nɔ ɔ ná be kɛ ha mi nɛ e tsɔse mi. E to ní tsumi nɛ i tsu ɔ he hɛ, nɛ e je ye yi ngɛ he. Ye bua jɔɔ ke i kɛ lɛ ngɛ ní tsue, ejakaa e haa nɛ i nuɔ he kaa ye he hia nɛ a ma nyɛ maa ngɔ hɛ kɛ fɔ ye nɔ.”

KE WAA KƐ NYƐMIMƐ YIHI HI SI SAMINYA A, WA NÁA HE SE

Wa suɔ wa nyɛmimɛ yihi nɛ a yeɔ anɔkuale ɔ kaa bɔ nɛ Yehowa hu suɔ mɛ ɔ! Enɛ ɔ he ɔ, waa kɛ mɛ hiɔ si kaa wa weku mi bimɛ. (1 Tim. 5:​1, 2) Wa bua jɔ wawɛɛ kaa waa kɛ mɛ tsuo ngɛ Yehowa sɔmɔe. Jehanɛ hu ɔ, ke a nu he kaa wa suɔ mɛ nɛ wa fĩɔ a se ɔ, wa bua jɔɔ. Nyɛmiyo ko nɛ a tsɛɛ lɛ ke Vanessa a de ke: “Ye bua jɔ wawɛɛ kaa i piɛɛ Yehowa asafo ɔ he, ejakaa nyɛmimɛ nyumuhi nɛ a ngɛ asafo ɔ mi ɔ woɔ mi he wami.” Nyɛmiyo ko nɛ e ngɛ Taiwan ɔ de ke: “Ye bua jɔ wawɛɛ kaa Yehowa kɛ e we asafo ɔ ngɛ bumi kɛ ha yihi nɛ a naa mɛ kaa a he hia. Enɛ ɔ wo ye hemi kɛ yemi ɔ mi he wami wawɛɛ, nɛ ye bua jɔ kaa i piɛɛ Yehowa asafo ɔ he.”

Hyɛ bɔ nɛ Yehowa bua maa jɔ ha ke e na kaa nyumuhi nɛ a ji Kristofohi ɔ ngɛ mɔde bɔe kaa a kɛ yihi maa hi si kaa bɔ nɛ e peeɔ ɔ! (Abɛ 27:11) Asafo mi nɔkɔtɔma ko nɛ a tsɛɛ lɛ ke Benjamin nɛ e ngɛ Scotland ɔ de ke: “Mwɔnɛ ɔ, nyumuhi fuu bui yihi fɛɛ, enɛ ɔ he ɔ, ke wa nyɛmimɛ yi ɔmɛ ba Matsɛ Yemi Asa a nɔ ɔ, wa suɔ nɛ a na kaa wa ngɛ slɔɔto.” Nyɛ ha nɛ wɔ tsuo waa pee nɔ́ fɛɛ nɔ́ nɛ wa ma nyɛ kɛ kase Yehowa nɛ waa kɛ wa nyɛmimɛ yihi nɛ a he jua wa ha wɔ ɔ nɛ hi si ngɛ suɔmi kɛ bumi mi.—Rom. 12:10.