HELA munyungu nɛ a tsɔɔ sisi ke “zugba lɛ” ngɛ Je Ehe Baiblo ɔ mi ɔ, ma nyɛ maa tsɔɔ lɔlehi loo zugba lɛ slɔɔtoslɔɔtohi. (Níts. 8:​28, 29, 38) Se e ma nyɛ maa ba kaa Etiopia nyumu ɔ hɛɛ zugba lɛ nɛ kle pe zugba lɛ nɛ a kɛ yaa ta loo a kɛ kaa fo ɔ. Mo susu yi mi tomi komɛ a he je nɛ wa ngɛ jã dee ɔ he nɛ o hyɛ.

Etiopia nyumu nɛ ɔ nɛ e hɛɛ blɔ nya ngua a hia blɔ kɛ ya he tsitsaa. E ji “nyumu nɛ e hɛɛ blɔ nya ngɛ Etiopia manyɛ Kandake sisi, nɛ e ji manyɛ ɔ juetlihi tsuo a nɔ hyɛlɔ.” (Níts. 8:27) Sudan ma nɛ ngɛ amlɔ nɛ ɔ kɛ Egipt ma nɛ ngɛ mwɔnɛ ɔ fã komɛ piɛɛ blema Etiopia ma a he. E ma nyɛ maa ba kaa pi lɔle loo zugba lɛ kake pɛ nɛ Etiopia nyumu ɔ kɛ hia blɔ ɔ tsuo, eko ɔ, e hɛɛ baagihi loo tlomihi kɛ ha blɔ gagaaga nɛ e hia a. Ngɛ kaseli ɔmɛ a be ɔ mi ɔ, lɔlehi nɛ a kɛ woɔ nihi kɛ hiaa blɔ ɔ ji zugba lɛhi nɛ a ngɛ nane eywiɛ nɛ a ngɔ nɔ́ kɛ ha nɔ. Womi nɛ ji Acts—An Exegetical Commentary ɔ de ke: “Zugba lɛ nɛ ɔ ji zugba lɛ ko nɛ blɔ ngɛ mi nɛ a ma nyɛ maa ngɔ baagihi kɛ ní kpahi kɛ wo mi kɛ hia blɔ, enɛ ɔ haa nɛ e he wɛ kɛ ha nihi kaa a kɛ maa hia blɔ gagaaga.”

Etiopia nyumu ɔ ngɛ ní kanee benɛ Filipo ya ná lɛ ɔ. Ngmami ɔ tsɔɔ kaa “benɛ Filipo ngɛ fo tue ngɛ [Etiopia nyumu ɔ] kasa nya a, e nu nɛ e wo e gbi nɔ kɛ ngɛ gbalɔ Yesaya womi ɔ kanee.” (Níts. 8:30) Zugba lɛ nɛ a kɛ hiaa blɔ ɔ he sɔɛ tsɔ. Akɛnɛ zugba lɛ nɛ ɔmɛ nyɛɛɔ blɛuu he je ɔ, e he be wae kaa Etiopia nyumu ɔ ma nyɛ maa kane ní. Jehanɛ hu ɔ, e he be wae kaa Filipo ma nyɛ maa tu fo kɛ ya ná lɛ.

Etiopia nyumu ɔ “kpa Filipo pɛɛ kaa e kuɔ nɛ e ba hi si ngɛ e kasa nya.” (Níts. 8:31) Ngɛ zugba lɛ nɛ a kɛ kaa fo ɔ blɔ fa mi ɔ, nɔ nɛ hɛɛ zugba lɛ ɔ daa si ngɛ mi. Se akɛnɛ blɔ ngɛ zugba lɛ nɛ a kɛ hiaa blɔ ɔ mi he je ɔ, Filipo nyɛ nɛ e hi si ngɛ Etiopia nyumu ɔ kasa nya.

Ngɛ Ní Tsumi yi 8 ɔ nya, kɛ odase kpahi nɛ wa na ngɛ yi nɔ sanehi a mi he je ɔ, lingmi nɛ ɔ, wa naa ngɛ wa womi ɔmɛ a mi kaa zugba lɛ nɛ Etiopia nyumu ɔ hiɔ mi ɔ kle pe ta zugba lɛ aloo zugba lɛ nɛ a kɛ kaa fo ɔ.