Tsa pi asafo mi kpehi, kpɔ mi kpehi kɛ kpokpa nɔ kpehi a sisi pɛ nɛ wa ma nyɛ ma ja Yehowa ngɛ. Mohu ɔ, wa ti nɔ fɛɛ nɔ ma nyɛ ma ja Yehowa ngɛ e dɛ he, nɛ waa kɛ wa weku ɔ hu ma nyɛ maa pee jã. Ga womihi nɛ nyɛɛ se ɔ ma nyɛ maa ye bua mo kɛ pee dɛ he ní kasemi loo weku Mawu jami:

• Dla o he kɛ ha asafo mi kpehi. Nyɛ ma nyɛ maa kase lahi nɛ a ma la ngɛ asafo mi kpe ɔ sisi ɔ, nɛ o ye bua nɔ fɛɛ nɔ ngɛ weku ɔ mi konɛ a dla a he kɛ ha heto ko.

• Moo kane Baiblo mi sane ko. Lɔ ɔ se ɔ, mo tɛni nɔ́ ko nɛ ya nɔ ngɛ sane nɛ o kane ɔ mi ɔ he foni. Aloo moo ngma nɔ́ nɛ o kase ngɛ jamɛ a sane ɔ mi ɔ kɛ fɔ si.

• Kane sɔlemi ko nɛ a ngma ngɛ Baiblo ɔ mi ɔ nɛ o susu he. Moo hyɛ bɔ nɛ jamɛ a sɔlemi ɔ ma nyɛ maa ye bua mo ha konɛ o sɔlemihi nɛ a nu tso.

• Moo hyɛ video ko ngɛ jw.org ɔ nɔ ɔ, nɛ o kɛ ni kpahi nɛ susu he, aloo moo ngma nɔ́ nɛ o bua jɔ he ngɛ video ɔ mi ɔ kɛ fɔ si.

• Nyɛ dla nyɛ he kɛ ha fiɛɛmi ní tsumi ɔ. Nɔ ko ngɛ weku ɔ mi ɔ ma nyɛ maa pee e he kaa wetsɛ nɛ nɔ kpa ko hu ma nyɛ maa ye lɛ odase konɛ e le nɔ́ nɛ e ma de ke e ngɛ fiɛɛmi mi.

• Nyɛ ma nyɛ maa hyɛ adebɔ níhi, nɛ nyɛ susu nɔ́ nɛ e tsɔɔ nyɛ ngɛ Yehowa he ɔ he. a