1-2. Mɛni nyagbahi nɛ Yehowa sɔmɔli anɔkualetsɛmɛ komɛ kɛ ma nyɛ maa kpe?

 KE OSLAA ko ba wa nɔ ɔ, wa si himi ma nyɛ ma tsake tlukaa. Kaa nɔ hyɛmi nɔ́ ɔ, nyɛminyumu ko nɛ yeɔ anɔkuale nɛ a tsɛɛ lɛ ke Luis a ɔ ba ná le kaa e ná kansa. Dɔkita a ha nɛ e le kaa e piɛ nyɔhiɔ bɔɔ komɛ pɛ nɛ e ma gbo. Monika kɛ e huno ɔ tsuo ngɛ Yehowa sɔmɔe kɛ hɛdɔ. Se ligbi ko ɔ, Monika ná le kaa e huno ɔ nɛ e ji asafo mi nɔkɔtɔma a ngɛ ní yayahi pee ngɛ laami mi jehahi babauu. Olivia ji nyɛmiyo nɛ sɛ we gba si himi mi. E biɔ nɛ e hia kɛ je e we ɔ mi tlukaa, ejakaa e be kɛe nɛ kɔɔhiɔ ko nɛ nya wa a maa fia. Pee se nɛ e kpale kɛ ba a, e ba na kaa kɔɔhiɔ nɛ nya wa a kpata e we ɔ hɛ mi kulaa. Ngɛ be kpiti mi ɔ, nyɛmimɛ nɛ ɔmɛ a si himi tsake kulaa. Anɛ o kɛ si fɔfɔɛ nɛ mi wa kaa kikɛ kpe hyɛ nɛ ha nɛ o si himi tsake tlukaa lo?

² E ngɛ mi kaa waa kɛ anɔkuale yemi sɔmɔɔ Yehowa mohu lɛɛ, se níhi a mi waa ha wɔ, nɛ wa nuɔ hiɔ kaa ni kpahi nɔuu. Jehanɛ hu ɔ, eko ɔ, Mawu he nyɛli maa wa wɔ yi mi aloo a maa te si kɛ wo wɔ. E ngɛ mi kaa Yehowa tsi we nyagba nɛ ɔmɛ a nya mohu lɛɛ, se e wo si kaa e maa ye bua wɔ. (Yes. 41:10) Yehowa maa ye bua wɔ konɛ waa ya nɔ nɛ wa ná bua jɔmi, waa mwɔ yi mi kpɔhi nɛ da, nɛ waa ya nɔ nɛ waa ye lɛ anɔkuale ngɛ haomi behi a mi. Ngɛ ní kasemi nɛ ɔ mi ɔ, wa ma susu níhi eywiɛ nɛ Yehowa peeɔ kɛ yeɔ bua wɔ ke waa kɛ haomihi ngɛ kpee ngɛ wa si himi mi ɔ he. Jehanɛ hu ɔ, wa ma susu nɔ́ nɛ  wa ma nyɛ maa pee konɛ wa ná Yehowa yemi kɛ buami ɔ he se.

YEHOWA MAA BU O HE

3. Ke waa kɛ si fɔfɔɛ ko nɛ mi wa kpe ɔ, mɛni nɛ e he ma nyɛ maa wa ha wɔ kaa wa maa pee?

³ Nyagba a. Ke waa kɛ haomi ko ngɛ kpee ɔ, e he ma nyɛ maa wa kaa wa ma susu níhi a he saminya nɛ waa mwɔ yi mi kpɔhi. Mɛni he je? Ejakaa ngɛ jamɛ a be ɔ mi ɔ, eko ɔ, wa tsui maa hi wɔ yee wawɛɛ. Eko ɔ, ngɛ jamɛ a be ɔ mi ɔ, wa maa hao nɛ wa maa hi aywilɛho yee wawɛɛ. Wa juɛmi ma nyɛ maa gbɛ, nɛ wa be lee nɔ́ nɛ wa maa pee. Mo kadi bɔ nɛ nyɛmimɛ yihi nɛ wa tu a he munyu kɛ sɛ hlami ɔ nu he ha benɛ a kɛ kahi kpe ɔ. Olivia de ke: “Benɛ kɔɔhiɔ nɛ nya wa a kpata ye we ɔ hɛ mi ɔ, i pee basaa nɛ i li nɔ́ nɛ ma pee.” Monika nɛ e huno ɔ yi lɛ anɔkuale ɔ de ke: “Ye kɔni mi jɔ̃ wawɛɛ. I nu he kaa nɔ́ nɛ a kɛ ha gbɔ mi. E he wa ha mi kaa ma pee ní nyafinyafihi nɛ i peeɔ daa ligbi ɔ po. I susuu we gblee kaa nɔ́ ko kaa kikɛ maa ba ye nɔ.” Mɛni Yehowa wo si kaa e maa pee kɛ ye bua wɔ ke wa hao?

4. Ngɛ Filipi Bi 4:​6, 7 ɔ nya a, mɛni Yehowa wo si kaa e maa pee ha wɔ?

⁴ Mɛni Yehowa wo si kaa e maa pee ha wɔ? Baiblo ɔ tsɔɔ kaa e ma ha wɔ “Mawu tue mi jɔmi ɔ.” (Kane Filipi Bi 4:​6, 7.) Tue mi jɔmi nɛ ɔ tsɔɔ bɔ nɛ wa peeɔ kpoo ha akɛnɛ huɛ bɔmi kpakpa ngɛ waa kɛ Yehowa wa kpɛti ɔ he je. Tue mi jɔmi nɛ ɔ “pã níhi a sisi numi tsuo.” Enɛ ɔ tsɔɔ kaa tue mi jɔmi nɛ ɔ se be kulaa. Kaa nɔ hyɛmi nɔ́ ɔ, anɛ o je o tsui mi kɛ sɔle ha Yehowa hyɛ, nɛ lɔ ɔ se ɔ, o nu he kaa o tue mi jɔ mo wawɛɛ lo? Jamɛ a he numi ɔ ji “Mawu tue mi jɔmi ɔ” nɛ.

5. Mɛni blɔ nɔ nɛ Mawu tue mi jɔmi ɔ buɔ wa juɛmi kɛ wa tsui he?

⁵ Jehanɛ hu ɔ, Filipi Bi 4:7 ɔ tsɔɔ kaa Mawu tue mi jɔmi ɔ ‘maa bu wa tsui kɛ wa juɛmi he’ aloo e maa po he piɛ. Munyungu nɛ ji “bu” nɛ a kɛ tsu ní ngɛ ngmami ɔ mi ɔ, tsɔɔ bɔ nɛ ta buli poɔ ma ko he piɛ ha konɛ he nyɛli nɛ a ko ba tua ma a. Nihi nɛ a ngɛ ma kaa jã a mi ɔ hwɔɔ mahe fuaa, ejakaa a le kaa ta buli ngɛ ma a agbo ɔmɛ a he bue. Jã nɔuu kɛ̃ nɛ ke Mawu tue mi jɔmi ɔ ngɛ wa tsui kɛ wa juɛmi he bue ɔ, wa peeɔ kpoo, ejakaa wa le kaa wa ngɛ slɔkee. (La 4:8) Kaa bɔ nɛ e ji ngɛ Hana blɔ fa mi ɔ, ke wa nyagba amɛ ji amlɔ nɔuu po ɔ, wa ma nyɛ maa ya nɔ ma ná tue mi jɔmi. (1 Sam. 1:​16-18) Nɛ ke wa pee kpoo ɔ, behi fuu ɔ, e yeɔ bua wɔ nɛ wa nyɛɔ nɛ wa susuɔ níhi a he saminya nɛ wa mwɔɔ yi mi kpɔhi nɛ da.

6. Mɛni wa ma nyɛ maa pee konɛ wa ná Mawu tue mi jɔmi ɔ? (Hyɛ foni ɔ hulɔ.)

⁶ Mɛni e sa nɛ waa pee? Ke o ngɛ haoe ɔ, mo bi yemi kɛ buami kɛ je o he bulɔ ɔ ngɔ. Ngɛ  mɛni blɔ nɔ? Moo sɔle ha Yehowa hluu kɛ ya si benɛ o maa nu he kaa o ná Mawu tue mi jɔmi ɔ. (Luka 11:9; 1 Tɛs. 5:17) Luis nɛ wa tu e he munyu kɛ sɛ hlami ɔ hao wawɛɛ benɛ e ná le kaa nyɔhiɔ bɔɔ pɛ lɛ e piɛ ha lɛ ɔ. Se e kɛ e yo Ana tsɔɔ nɔ́ nɛ ye bua mɛ nɛ a fĩ si. E de ke: “Ngɛ si fɔfɔɛ kaa kikɛ mi ɔ, e he wa ha wɔ kaa wa maa mwɔ yi mi kpɔ ngɛ hiɔ tsami blɔ nɔ tomi kɛ ní kpahi a he. Se akɛnɛ wa sɔle ha Yehowa he je ɔ, wa nyɛ nɛ wa ná tue mi jɔmi ngɛ si fɔfɔɛ nɛ mi wa nɛ ɔ mi.” Luis kɛ e yo ɔ de kaa a sɔle wawɛɛ si abɔ nɛ a bi Yehowa konɛ e ha nɛ a tue mi nɛ jɔ mɛ, nɛ a pee kpoo, nɛ a ná nile kɛ mwɔ yi mi kpɔhi nɛ da. Nɛ a nu he kaa Yehowa ye bua mɛ hulɔ. Ke o kɛ haomi ko ngɛ kpee ɔ, mo ya nɔ nɛ o sɔle, nɛ Yehowa tue mi jɔmi ɔ maa bu o tsui kɛ o juɛmi he.—Rom. 12:12.

YEHOWA MAA WO MO HE WAMI

7. Ke waa kɛ ka ko ngɛ kpee ɔ, kɛ wa ma nyɛ maa nu he ha kɛɛ?

⁷ Nyagba a. Ke waa kɛ kahi ngɛ kpee ɔ, e haa nɛ bɔ nɛ wa nuɔ níhi a he ha, bɔ nɛ wa susuɔ níhi a he ha, kɛ bɔ nɛ wa peeɔ wa ní ha a tsakeɔ. Kaa bɔ nɛ ke kɔɔhiɔ nɛ nya wa ngɛ fiae nɛ oslɔke kpaa mele ɔ kɛ yaa kɛ baa a, jã nɔuu kɛ̃ nɛ ke waa kɛ haomihi ngɛ kpee ɔ, wa náa he numi slɔɔtoslɔɔtohi. Ana nɛ wa tu e he munyu kɛ sɛ hlami ɔ tsɔɔ kaa e ná he numi slɔɔtoslɔɔtohi benɛ e huno Luis gbo ɔ. E de ke: “Be komɛ ɔ, ke i pee yeyeeye ɔ, kɛkɛ i bɔni ye he piami, jehanɛ hu ɔ, ye mi mi fuɔ kaa e gbo.” Jehanɛ hu ɔ, Ana nu he kaa e piɛ lɛ pɛ, nɛ e he wa ha lɛ kaa e maa mwɔ yi mi kpɔhi ngɛ níhi nɛ Luis lɛ mwɔɔ yi mi kpɔ ngɛ he ɔ a he. Be komɛ hu ɔ, e nuɔ he kaa nyagba nɛ e kɛ ngɛ kpee ɔ kle pe lɛ. Mɛni Yehowa peeɔ kɛ yeɔ bua wɔ ke bɔ nɛ wa nuɔ he ha a ha nɛ wa ngɛ haoe tsɔ ɔ?

8. Ngɛ 1 Petro 5:10 nya a, mɛni nɔ mi mami nɛ Yehowa ha wɔ?

⁸ Mɛni Yehowa wo si kaa e maa pee ha wɔ? Yehowa wo si kaa e maa wo wɔ he wami. (Kane 1 Petro 5:10.) Ke kɔɔhiɔ nɛ nya wa ngɛ fiae ngɛ wo ɔ nɔ ɔ, oslɔke kuɔ kɛ náa mele ɔ, nɛ e haa nɛ mele ɔ kpaa. Enɛ ɔ he ɔ, bɔ nɛ pee nɛ mele ɔ nɛ e nyɛ nɛ e da oslɔke ɔ nya a, a pee ní komɛ ngɛ mele ɔ sisi hiɛ kɛ hiɛ. Ní nɛ ɔmɛ yeɔ bua mele ɔ nɛ e kpa we tsɔ, nɛ e haa nɛ nihi nɛ a ngɛ mele ɔ mi ɔ hiɔ slɔkee nɛ a ya suɔ he nɛ a yaa a. Se kɛ̃ ɔ, loko ní nɛ ɔmɛ nɛ a pee kɛ wo mele ɔ sisi hiɛ kɛ hiɛ ɔ ma tsu ní saminya a, ja mele ɔ ngɛ nyɛɛe. Jã nɔuu kɛ̃ nɛ Yehowa hu maa wo wɔ he wami ke wa ya nɔ nɛ waa kɛ anɔkuale yemi sɔmɔ lɛ ngɛ haomi behi a mi.

9. Mɛni blɔ nɔ nɛ ga dadehi nɛ waa kɛ hlaa níhi a mi ɔ ma nyɛ maa ye bua wɔ? (Hyɛ foni ɔ hulɔ.)

⁹ Mɛni e sa nɛ waa pee? Ke o kɛ haomihi ngɛ  kpee po ɔ, moo bɔ mɔde kaa o maa ya nɔ maa sɔle, nɛ o ya asafo mi kpehi kɛ fiɛɛmi daa. Eko ɔ, o be nyɛɛe maa pee babauu kaa bɔ nɛ o pee be ko nɛ be ɔ, se mo kai kaa Yehowa hyɛ we blɔ kaa waa pee nɔ́ ko nɛ wa be nyɛe maa pee. (Kɛ to Luka 21:​1-4 ɔ he.) Jehanɛ hu ɔ, e he hia nɛ o ná be kɛ kase ní nɛ o pue o yi mi tɛ. Mɛni he je? Ejakaa Yehowa gu e we asafo ɔ nɔ kɛ ha wɔ womihi kɛ videohi nɛ maa ye bua wɔ konɛ wa he nɛ wa ngɛ haomi behi a mi. Ke o ngɛ hlae nɛ o na nɔ́ nɛ maa ye bua mo ɔ, o ma nyɛ maa ngɔ JW Library^®, Watch Tower Publications Index, kɛ Research Guide for Jehovah’s Witnesses ɔ kɛ hla níhi a mi. Monika nɛ wa tu e he munyu kɛ sɛ hlami ɔ tsɔɔ kaa ke níhi ngɛ lɛ dɔe pɛ ɔ, e hlaa níhi a mi ngɛ ga dade nɛ ɔmɛ a mi nɛ e haa nɛ e he waa ekohu. Kaa nɔ hyɛmi nɔ́ ɔ, e hla níhi a mi kɛ kɔ munyu nɛ ji “abofu” ɔ he. Ngɛ be kpahi a mi hu ɔ, e hlaa níhi a mi ngɛ “lakpa yemi” loo “anɔkuale yemi” he. Lɔ ɔ se ɔ, e kaneɔ níhi nɛ e na a kɛ ya siɔ benɛ e tsui nɔɔ e mi. E de ke: “Behi fuu ɔ, loko ma hla níhi a mi ɔ, i peeɔ yeyeeye, se ke i ya nɔ nɛ i kane ní ɔ, i nuɔ he kaa nɔ́ nɛ Yehowa fua mi. Bɔɔbɔɔbɔɔ ɔ, i ba na kaa Yehowa nu mi sisi wawɛɛ, nɛ e ngɛ mi ye buae hulɔ.” Yehowa hu ma nyɛ maa ye bua mo konɛ o ya nɔ nɛ o ná tue mi jɔmi.—La 119:​143, 144.

YEHOWA MAA PIƐƐ O HE

10. Ke oslaa ko ba wa nɔ se ɔ, kɛ wa ma nyɛ maa nu he ha kɛɛ?

¹⁰ Nyagba a. Ke haomi ko ba wa nɔ se ɔ, be komɛ ɔ, wa gbɔjɔɔ nɛ wa kɔní mi hu jɔ̃ɔ. Wa ma nyɛ maa nu he kaa fo tulɔ ko nɛ e tuɔ fo wawɛɛ be ko nɛ be, se amlɔ nɛ ɔ, e nyɛ we nɛ e nyɛɛ kpakpa ko ɔ. Eko ɔ, e he maa wa ha wɔ kaa wa maa pee ní nyafinyafi komɛ nɛ haa wɔ bua jɔmi nɛ wa nyɛɔ peeɔ be ko nɛ be ɔ. Kaa bɔ nɛ Eliya nu he ɔ, wɔ hu wa ma nyɛ maa nu he kaa wa be nyɛe maa te si, nɛ wa maa suɔ nɛ waa hwɔ si pɛ. (1 Ma. 19:​5-7) Mɛni Yehowa wo si kaa e maa pee ha wɔ ke wa gbɔjɔ?

11. Mɛni ji nɔ́ kpa ko hu nɛ Yehowa peeɔ kɛ yeɔ bua wɔ? (La 94:18)

¹¹ Mɛni Yehowa wo si kaa e maa pee ha wɔ? E wo si kaa e maa ye bua wɔ. (Kane La 94:18.) Kaa bɔ nɛ fo tulɔ ko nɛ e plaa a hia yemi kɛ buami konɛ e nyɛ nɛ e nyɛɛ ɔ, wɔ hu wa maa hia yemi kɛ buami konɛ waa ya nɔ nɛ wa sɔmɔ Yehowa be fɛɛ be. Ke waa kɛ haomihi ngɛ kpee ɔ, Yehowa wo si ke: ‘Imi ji Yehowa, o Mawu ɔ nɛ; imi lɛ i ngɛ mo he wami woe ɔ nɛ, i ngɛ mo dee ke, “koo ye gbeye! Ma piɛɛ  o he!”’ (Yes. 41:13) Matsɛ David na kaa Yehowa ye bua lɛ wawɛɛ. Benɛ e kɛ kahi kpe, nɛ e he nyɛli ɔmɛ te si kɛ wo lɛ ɔ, e de Yehowa ke: “O pɛtɛ ye he wawɛɛ.” (La 18:35) Se mɛni Yehowa peeɔ kɛ yeɔ bua wɔ?

12. Mɛnɔmɛ nɛ eko ɔ, Yehowa maa gu a nɔ kɛ ye bua wɔ ke wa gbɔjɔ?

¹² Behi fuu ɔ, nɔ́ nɛ Yehowa peeɔ kɛ yeɔ bua wɔ ji kaa e woɔ ni kpahi he wami konɛ a ye bua wɔ. Kaa nɔ hyɛmi nɔ́ ɔ, be ko benɛ David gbɔjɔ ɔ, e huɛ Yonatan ba e ngɔ nɛ e ba wo lɛ he wami. (1 Sam. 23:​16, 17) Jã nɔuu kɛ̃ nɛ Yehowa hla Elisha kaa e pee ní pɔtɛɛ komɛ kɛ ye bua Eliya. (1 Ma. 19:​16, 21; 2 Ma. 2:2) Mwɔnɛ ɔ, Yehowa ma nyɛ maa gu wa weku li, wa huɛmɛ, loo asafo mi nikɔtɔmahi a nɔ kɛ ye bua wɔ. Se be komɛ ɔ, ke wa hao ɔ, wa suɔ nɛ waa yu wa he ngɛ ni kpahi a he, nɛ́ wɔ pɛ waa hi he ko. Tɔmi ko be he kaa nɔ ko maa nu he jã. Se mɛni wa ma nyɛ maa pee konɛ Yehowa nɛ ye bua wɔ?

13. Mɛni wa ma nyɛ maa pee konɛ Yehowa nɛ ye bua wɔ? (Hyɛ foni ɔ hulɔ.)

¹³ Mɛni e sa nɛ waa pee? Moo bɔ mɔde wawɛɛ kaa o be o he tsɔe ngɛ ni kpahi a he. Ke wa tsɔ wa he kɛ je ni kpahi a he ɔ, e ma nyɛ ma ha nɛ wa susu wɔ nitsɛmɛ pɛ, kɛ nyagbahi nɛ waa kɛ ngɛ kpee ɔ he. Enɛ ɔ ma nyɛ ma ha nɛ waa mwɔ yi mi kpɔhi nɛ dɛ. (Abɛ 18:1) Ngɛ anɔkuale mi ɔ, be komɛ ɔ, ke waa kɛ nyagbahi nɛ a mi wa ngɛ kpee ɔ, e ma bi nɛ wɔ pɛ waa hi he ko. Se kɛ̃ ɔ, ke wa tsɔ wa he be kɛkɛɛ ngɛ nihi a he ɔ, e ma nyɛ ma ha nɛ wa kua yemi kɛ buami nɛ Yehowa kɛ ngɛ wɔ hae kɛ gu wa nyɛmimɛ ɔmɛ a nɔ ɔ. Enɛ ɔ he ɔ, ke níhi a mi wa ha wɔ po ɔ, e sa nɛ waa kplɛɛ yemi kɛ buami nɛ wa weku li, wa huɛmɛ, kɛ asafo mi nikɔtɔma amɛ kɛ ma ha wɔ ɔ nɔ. Moo na mɛ kaa nihi nɛ Yehowa ngɛ a nɔ gue kɛ ngɛ mo ye buae.—Abɛ 17:17; Yes. 32:​1, 2.

YEHOWA MAA WO O BUA

14. Mɛni ji ní komɛ nɛ ma ha nɛ waa ye gbeye?

¹⁴ Nyagba a. Be komɛ ɔ, ní komɛ ma nyɛ ma ha nɛ waa ye gbeye. Baiblo ɔ tsɔɔ kaa Mawu sɔmɔli anɔkualetsɛmɛ komɛ hao, nɛ a ye gbeye wawɛɛ akɛnɛ a he nyɛli te si kɛ wo mɛ loo ni kpahi nyɛ a nɔ ɔ he je. (La 18:4; 55:​1, 5) Jã nɔuu kɛ̃ nɛ eko ɔ, waa kɛ si temi kɛ womi ma nyɛ maa kpe ngɛ sukuu, wa ní tsumi he, kɛ wa weku ɔ mi. Jehanɛ hu ɔ, ma nɔ yeli ɔmɛ ma nyɛ maa te si kɛ wo wɔ. Eko ɔ, ngɛ hiɔ ko nɛ ngɛ wa nya gbae he je ɔ, wa ngɛ gbeye yee kaa wa ma gbo. Ngɛ behi kaa jã mi ɔ, wa ma nyɛ maa nu he kaa wa be hɛ nɔ kami ko. Mɛni  Yehowa peeɔ kɛ yeɔ bua wɔ ngɛ si fɔfɔɛ kaa jã a mi?

15. Ngɛ La 94:19 ɔ nya a, mɛni Yehowa maa pee ha wɔ?

¹⁵ Mɛni Yehowa wo si kaa e maa pee ha wɔ? E maa wo wa bua nɛ e ma ha nɛ wa he maa jɔ wɔ. (Kane La 94:19.) Ngmami nɛ ɔ ma nyɛ ma ha nɛ wa susu jokuɛ yoyo ko nɛ e ngɛ gbeye yee nɛ e nyɛ we mahe hwɔmi akɛnɛ oslabai ngɛ gbae wawɛɛ ɔ he je. Moo po he foni kaa e tsɛ ɔ ba e ngɔ nɛ e ba wo lɛ kɛ ya si benɛ jokuɛ ɔ nɔ mahe mi. E ngɛ mi kaa loloolo ɔ, oslabai ngɛ gbae mohu lɛɛ, se akɛnɛ e tsɛ ɔ wo lɛ he je ɔ, e tsui nɔ e mi nɛ e nu he kaa e ngɛ slɔkee. Ke waa kɛ kahi nɛ a nya wa ngɛ kpee ɔ, e he maa hia nɛ wa hiɔwe Tsɛ ɔ nɛ pɛtɛ wa he kɛ ya si benɛ wa maa pee kpoo nɛ wa ma ná tue mi jɔmi. Se mɛni wa ma nyɛ maa pee konɛ Yehowa nɛ wo wa bua?

16. Mɛni wa ma nyɛ maa pee konɛ Yehowa nɛ wo wa bua? (Hyɛ foni ɔ hulɔ.)

¹⁶ Mɛni e sa nɛ waa pee? Be fɛɛ be ɔ, mo ná be kɛ ha Yehowa, nɛ o sɔle nɛ o kane e Munyu ɔ daa. (La 77:​1, 12-14) Ke o peeɔ jã a, be fɛɛ be nɛ o kɛ ka ko maa kpe ɔ, o ma bi o hiɔwe Tsɛ ɔ yemi kɛ buami kekle. Moo sɔle kɛ ha Yehowa nɛ o de lɛ nɔ́ he je nɛ o ngɛ gbeye yee kɛ bɔ nɛ o ngɛ he nue ha. Ha nɛ Yehowa hu kɛ mo nɛ tu munyu nɛ e wo o bua kɛ gu Ngmami ɔ nɔ. (La 119:28) O ma nyɛ maa na ngmami pɔtɛɛ komɛ ngɛ Baiblo ɔ mi nɛ maa wo o bua ke o ngɛ gbeye yee. Kaa nɔ hyɛmi nɔ́ ɔ, o ma nyɛ maa na bua womi munyu komɛ ngɛ Hiob, La, kɛ Abɛ womi ɔ mi. Jehanɛ hu ɔ Yesu munyuhi nɛ ngɛ Mateo yi 6 ma nyɛ maa ye bua mo. Ke o sɔle ha Yehowa nɛ o kane e Munyu ɔ, e maa wo o bua.

17. Mɛni nɔ mi mami nɛ wa ma nyɛ ma ná?

¹⁷ Ke waa kɛ haomihi loo si fɔfɔɛhi nɛ a mi wa ngɛ kpee ɔ, wa ma nyɛ ma ná nɔ mi mami kaa Yehowa maa po wa he piɛ nɛ e maa ye bua wɔ, nɛ e be wɔ kuae kɔkɔɔkɔ. (La 23:4; 94:14) Yehowa wo si kaa e maa bu wa he, e maa wo wɔ he wami, e maa piɛɛ wa he, nɛ e maa wo wa bua. Yesaya 26:3 ɔ de ngɛ Yehowa he ke: ‘Nɔ nɛ ngɔɔ e hɛ kɛ fɔɔ o nɔ, nɛ e heɔ mo yeɔ ɔ, o maa bu e he nɛ o ma ha lɛ tue mi jɔmi.’ Enɛ ɔ he ɔ, ngɔɔ o hɛ kɛ fɔ Yehowa nɔ nɛ o pee nɔ́ fɛɛ nɔ́ nɛ o ma nyɛ konɛ o ná yemi kɛ buamihi tsuo nɛ e kɛ ma ha mo ɔ he se. Ke o pee jã a, o ma ná he wami ekohu ngɛ haomi behi a mi.