1. Ke o ngɛ Yehowa he susue ɔ, mɛni lɛ baa o juɛmi mi?

 ANƐ o susu bɔ nɛ Yehowa ngɛ ha a he hyɛ lo? Ke o ngɛ sɔlee ha lɛ ɔ, mɛni baa o juɛmi mi? E ngɛ mi kaa wa be nyɛe maa na Yehowa mohu lɛɛ, se Baiblo ɔ kale lɛ ngɛ blɔ slɔɔtohi a nɔ. Baiblo ɔ kale Yehowa kaa ‘pu kɛ tsɛ̃i,’ kɛ “la nɛ sãa nɔ́ pɛsɛpɛsɛ.” (La 84:11; Heb. 12:29) Ezekiel kale Yehowa ngɛ nina mi kaa safiro tɛ, dade ko nɛ ngɛ kpɛe, kɛ alale nɛ ngɛ fɛu wawɛɛ. (Eze. 1:​26-28) Bɔ nɛ Baiblo ɔ plɛ kɛ kale Yehowa ha a ma nyɛ maa pee wɔ nyakpɛ loo waa ye gbeye po.

2. Mɛni ma nyɛ ma ha nɛ e he nɛ wa ha nɔ ko kaa e maa hɛ kɛ su Yehowa he?

² Eko ɔ, akɛnɛ wa be nyɛe maa na Yehowa kɛ wa hɛngmɛ he je ɔ, e he ma nyɛ maa wa ha wɔ kaa wa ma he ye kaa Yehowa suɔ wɔ. Ni komɛ hu susuɔ kaa ngɛ ní yaya komɛ nɛ ya nɔ ngɛ a si himi mi he je ɔ, Yehowa be nyɛe maa suɔ mɛ. Eko ɔ, a tsɛmɛ je we suɔmi kpo kɛ tsɔɔ mɛ. Ngɛ anɔkuale mi ɔ, Yehowa le nɔ́ he je nɛ wa nuɔ he jã, kɛ nɔ́ he je nɛ e he ma nyɛ maa wa ha wɔ kaa wa maa hɛ kɛ su e he. Bɔ nɛ pee nɛ e ye bua wɔ ɔ, e ha nɛ wa le nɔ tutuutu nɛ e ji kɛ gu e Munyu nɛ ji Baiblo ɔ nɔ.

3. Mɛni he je nɛ e sa nɛ wa susu Yehowa suɔmi ɔ he saminya a?

³ Munyungu kake nɛ a kɛ ma nyɛ maa kale Yehowa saminya ji Suɔmi. Yehowa ngɛ suɔmi wawɛɛ. Baiblo ɔ de ke: “Mawu ji suɔmi.” (1 Yoh. 4:8) Suɔmi lɛ haa nɛ Yehowa peeɔ nɔ́ fɛɛ nɔ́. Akɛnɛ Yehowa mi mi jɔ, nɛ e suɔmi ɔ se be he je ɔ, e jeɔ suɔmi kpo kɛ tsɔɔ nihi nɛ a sɔmɔ we lɛ ɔ po. (Mat. 5:​44, 45) Ngɛ ní kasemi nɛ ɔ mi ɔ, wa ma susu Yehowa he, nɛ wa ma susu suɔmi  nɛ e ngɛ ɔ hu he. Ke wa ya nɔ nɛ wa kase Mawu he ní ɔ, e ma ha nɛ suɔmi nɛ wa ngɛ kɛ ha lɛ ɔ mi maa wa wawɛɛ.

YEHOWA SUSUƆ O HE WAWƐƐ

4. Kɛ bɔ nɛ Yehowa susuɔ o he ha a haa nɛ o nuɔ he ha kɛɛ? (Hyɛ foni ɔ hulɔ.)

⁴ “Yehowa mi mi hi wawɛɛ.” (Yak. 5:11) Ngɛ Baiblo ɔ mi ɔ, Yehowa ngɔ e he kɛ to binyɛ ko nɛ e mi mi sãa lɛ ɔ he. (Yes. 66:​12, 13) Mo susu bɔ nɛ binyɛ ko jeɔ suɔmi kpo kɛ tsɔɔ e bi ɔ he nɛ o hyɛ. E woɔ e bi ɔ ngɛ e tɛ nɔ, nɛ e kɛ gbi blɛuu tuɔ munyu kɛ woɔ e bi ɔ bua. Ke bimwɔyo ɔ ngɛ ya foe loo nɔ́ yeyee ko ngɛ lɛ pee ɔ, binyɛ ɔ bɔɔ mɔde kaa e ma tsu e nyagba a he ní kɛ ha lɛ. Jã nɔuu kɛ̃ nɛ wɔ hu wa ma nyɛ maa ngɔ wa hɛ kɛ fɔ Yehowa suɔmi ɔ nɔ ke wa ngɛ nɔ́ nae. La polɔ ɔ ngma ke: “Ke yi mi susumi tsɔ ha nɛ i pee basaa kikɛ nɛ ɔ, mo lɛ o haa mi bua jɔmi, nɛ ye nɔ gbagba tee ekohu.”—La 94:19.

5. Kɛ o náa Yehowa suɔmi nɛ se pui ɔ he se ha kɛɛ?

⁵ Yehowa ji Mawu anɔkualetsɛ. (La 103:8) Ke wa pee yayami po ɔ, e kɔni mi jɔ̃ we ngɛ wa he. Kaa nɔ hyɛmi nɔ́ ɔ, Israel bi ɔmɛ pee yayami kɛ si Yehowa si abɔ. Se ke a pia a he nɛ a tsake a tsui ɔ, Yehowa jeɔ e suɔmi nɛ se pui ɔ kpo kɛ tsɔɔ mɛ. Yehowa de kɛ kɔ a he ke: “O he jua wa ha mi, akɛnɛ o hɛ mi ba nyami, nɛ i suɔ mo he je ɔ.” (Yes. 43:​4, 5) Suɔmi nɛ Mawu ngɛ ɔ tsakee we. Wa ma nyɛ maa ngɔ wa hɛ kɛ fɔ e nɔ be fɛɛ be. Ke wa tɔ̃ tɔmi nɛ hɛdɔ ngɛ he po ɔ, Yehowa be wɔ kuae kɔkɔɔkɔ. Ke wa tsake wa tsui nɛ wa kpale kɛ ba Yehowa ngɔ ɔ, e maa ya nɔ ma je suɔmi kpo kɛ tsɔɔ wɔ. E de ke “be tsuaa be ɔ, e kɛ nɔ tɔmi paa.” (Yes. 55:7) Baiblo ɔ tsɔɔ kaa ke Mawu ngɔ wa tɔmi kɛ ke wɔ ngɛ blɔ nɛ ɔ nɔ ɔ, ‘lɛ nitsɛ e ma ha wɔ he jɔmi.’—Níts. 3:19.

6. Mɛni nɛ Zakaria 2:8 ɔ tsɔɔ wɔ ngɛ Yehowa he?

⁶ Kane Zakaria 2:8. Akɛnɛ Yehowa suɔ wɔ he je ɔ, e le bɔ nɛ wa nuɔ he ha, nɛ e suɔ nɛ e po wa he piɛ. Ke wa ngɛ nɔ́ nae ɔ, e dɔɔ lɛ wawɛɛ. Enɛ ɔ he ɔ, wa ma nyɛ ma ná nɔ mi mami kaa ke wa sɔle ha Yehowa kaa e ‘baa wa yi kaa bɔ nɛ nɔ baa lɛ nitsɛ e hɛngmɛ yi ɔ,’ e maa bu wɔ tue. (La 17:8) Hɛngmɛ ji nɔmlɔ tso ɔ he nɔ́ ko nɛ he hia saminya. Enɛ ɔ he ɔ, ke Yehowa ngɔ wɔ kɛ to e hɛngmɛ he ɔ, e ngɛ kaa nɔ́ nɛ e ngɛ wɔ dee ke, ‘Nɔ nɛ maa ye nyɛ awi ɔ, ye imi Yehowa awi.’

7. Mɛni he je nɛ e he hia nɛ wa ná nɔ mi mami nɛ mi wa kaa Yehowa suɔ wɔ ɔ?

 ⁷ Yehowa suɔ nɛ wa ná nɔ mi mami kaa e suɔ wa ti nɔ fɛɛ nɔ. Se e le kaa ngɛ ní komɛ nɛ ya nɔ ngɛ wa si himi mi he je ɔ, eko ɔ, wa ma susu kaa e be nyɛe maa suɔ wɔ. Aloo eko ɔ, waa kɛ si fɔfɔɛ ko ngɛ kpee amlɔ nɛ ɔ, nɛ́ ma nyɛ ma ha nɛ e he nɛ wa ha wɔ kaa wa ma ná nɔ mi mami kaa Yehowa suɔ wɔ. Mɛni maa ye bua wɔ konɛ nɔ mi mami nɛ wa ngɛ ngɛ Yehowa mi ɔ mi nɛ wa? E he hia nɛ waa le bɔ nɛ Yehowa jeɔ suɔmi kpo kɛ tsɔɔ Yesu, nihi nɛ a pɔ mɛ nu ɔ, kɛ wɔ tsuo ha.

BƆ NƐ YEHOWA JEƆ SUƆMI KPO HA

8. Mɛni ha nɛ Yesu ná nɔ mi mami kaa e Tsɛ ɔ suɔ lɛ?

⁸ Yehowa kɛ e Bi nɛ e suɔ lɛ ɔ hi si be kɛkɛɛ pe nɔ fɛɛ nɔ. Ngɛ jehahi abɔ nɛ a kɛ hi hiɔwe ɔ, huɛ bɔmi kpakpa hi mɛ ni enyɔ ɔmɛ a kpɛti. Ke wa kane Mateo 17:5 ɔ, wa naa heii kaa Yehowa je suɔmi kpo kɛ tsɔɔ Yesu. Jinɛ Yehowa ko nyɛ de kɛkɛ ke, ‘Nɔ nɛ ye bua jɔ e he ji nɛ ɔ nɛ.’ Se akɛnɛ e suɔ nɛ waa le bɔ nɛ e suɔ Yesu ha a he je ɔ, e de ke “ye Bi nɛ i suɔ lɛ.” Yehowa bua jɔ Yesu he ejakaa e suɔ kaa e maa je e tsui mi nɛ e ngɔ e wami kɛ sã afɔle. (Efe. 1:7) E ngɛ heii kaa Yesu hu le kaa e Tsɛ ɔ suɔ lɛ. Akɛnɛ Yehowa suɔ Yesu nitsɛnitsɛ he je ɔ, Yesu yi mi pee we lɛ enyɔɔnyɔ ngɛ suɔmi nɛ e Tsɛ ɔ ngɛ ha lɛ ɔ he. Yesu kɛ nɔ mi mami de si abɔ kaa e Tsɛ ɔ suɔ lɛ.—Yoh. 3:35; 10:17; 17:24.

9. Mɛni munyu nɛ waa kɛ ma nyɛ maa kale suɔmi nɛ Yehowa ngɛ kɛ ha nihi nɛ a pɔ mɛ nu ɔ? Moo tsɔɔ nya. (Roma Bi 5:5)

⁹ Jehanɛ hu ɔ, Yehowa je suɔmi kpo kɛ tsɔɔ nihi nɛ a pɔ mɛ nu ɔ. (Kane Roma Bi 5:5.) Mo kadi munyu nɛ a kɛ tsu ní kɛ tsɔɔ bɔ nɛ Yehowa suɔ mɛ wawɛɛ ha. E de ke: ‘Yehowa plɛ e suɔmi ɔ ngɔ wo wa tsui mi.’ Womi ko ngɔ Mawu suɔmi ɔ kɛ to pa nɛ ngɛ bee ɔ he. Nɔ́ he tomi nɔ́ nɛ ɔ tsɔɔ bɔ nɛ Yehowa suɔ nihi nɛ a pɔ mɛ nu ɔ wawɛɛ ha! Nihi nɛ a pɔ mɛ nu ɔ le kaa ‘Mawu suɔ mɛ.’ (Jud 1) Bɔfo Yohane tsɔɔ bɔ nɛ a nuɔ he ha a. E ngma ke: “Nyɛɛ hyɛ suɔmi sɔuu nɛ Tsɛ ɔ ngɛ kɛ ha wɔ, kaa a ma tsɛ wɔ ke Mawu bimɛ!” (1 Yoh. 3:1) Anɛ nihi nɛ a pɔ mɛ nu ɔ pɛ nɛ Yehowa jeɔ suɔmi kpo kɛ tsɔɔ lo? Dɛbi. Yehowa suɔ wɔ tsuo.

10. Mɛni ji nɔ́ nɛ pe kulaa nɛ Yehowa pee kɛ tsɔɔ kaa e suɔ mo?

¹⁰ Mɛni ji nɔ́ ko nɛ pe kulaa nɛ Yehowa pee kɛ tsɔɔ kaa e suɔ wɔ? Lɔ ɔ ji kpɔmi nɔ́ ɔ nɛ́ e kɛ ha wɔ ɔ nɛ. Kɛ gu kpɔmi nɔ́ ɔ nɔ ɔ, Yehowa je suɔmi nɛ pe kulaa kɛ tsɔɔ adesahi ngɛ je ɔ mi tsuo. (Yoh. 3:16; Rom. 5:8) Yehowa ngɔ e Bi nɛ e fiɛ we e he ɔ kɛ ha, nɛ e ba gbo kɛ ha adesahi tsuo konɛ a nyɛ nɛ a ngɔ a he yayamihi kɛ ke mɛ nɛ a ba pee Yehowa huɛ. (1 Yoh. 4:10) Ke wa ya nɔ nɛ wa pue wa yi mi tɛ ngɛ nɔ́ nɛ Yehowa kɛ Yesu pee kɛ ha wɔ nɛ ɔ he ɔ, e ma ha nɛ waa na kaa Yehowa suɔ wa kpɛti nɔ fɛɛ nɔ. (Gal. 2:20) Pi nɛ Yehowa ngɔ kpɔmi nɔ́ ɔ kɛ ha konɛ e kɛ ye dami sane kɛkɛ. Mohu ɔ, e pee jã konɛ e kɛ tsɔɔ kaa e suɔ wɔ. Yehowa ngɔ Yesu nɛ e fiɛ we e he ɔ kɛ sã afɔle ngɛ wa he konɛ e kɛ ma nɔ mi kaa e suɔ wɔ. Yehowa ngmɛ blɔ nɛ e Bi ɔ ba na nɔ́ nɛ e gbo ngɛ wa he.

11. Mɛni wa kaseɔ ngɛ Yeremia 31:3 ɔ mi?

¹¹ Kaa bɔ nɛ wa na a, pi nɛ Yehowa nuɔ he pɛ kɛkɛ kaa e suɔ wɔ, mohu ɔ, e deɔ wɔ kaa e suɔ wɔ. (Kane Yeremia 31:3.) Yehowa gbla wɔ kɛ ba e ngɔ akɛnɛ e suɔ wɔ ɔ he je. (Kɛ to 5 Mose 7:​7, 8 ɔ he.) Nɔ́ ko nɔ́ ko loo nɔ ko nɔ ko be nyɛe ma je wɔ kɛ je Mawu suɔmi ɔ he. (Rom. 8:​38, 39) Kɛ suɔmi nɛ ɔ haa nɛ o nuɔ he ha kɛɛ? Moo kane La 23 ɔ, nɛ o hyɛ bɔ nɛ suɔmi nɛ Yehowa ngɛ ha David ɔ ná e nɔ he wami ha,  kɛ bɔ nɛ e ma nyɛ ma ná wɔ tsuo wa nɔ he wami ha.

KƐ YEHOWA SUƆMI Ɔ HAA NƐ O NUƆ HE HA KƐƐ?

12. Kɛ o maa mwɔ La 23 ɔ nya ha kɛɛ?

¹² Kane La 23:​1-6. Munyuhi nɛ ngɛ ngmami nɛ ɔ mi ɔ ji la nɛ maa nɔ mi kaa Yehowa suɔ wɔ nɛ e susuɔ wa he. David ji nɔ nɛ ngma la nɛ ɔ nɛ. David tsɔɔ huɛ bɔmi gbagbanii nɛ ngɛ e kɛ Yehowa nɛ ji e Nɔ Hyɛlɔ ɔ a kpɛti. Akɛnɛ David ha nɛ Yehowa tsɔɔ lɛ blɔ, nɛ e ngɔ e hɛ kɛ e fɔ e nɔ kulaa he je ɔ, e nu he kaa e ngɛ slɔkee. David le kaa Yehowa ma je suɔmi kpo kɛ tsɔɔ lɛ daa ligbi ngɛ e si himi mi. Mɛni ha nɛ David ná nɔ mi mami nɛ ɔ?

13. Mɛni he je nɛ David ná nɔ mi mami kaa Yehowa susuɔ e he ɔ?

¹³ ‘Nɔ́ ko nɔ́ ko be mi hiae.’ Akɛnɛ Yehowa haa David e hiami níhi be fɛɛ be he je ɔ, David nu he kaa nɔ́ ko nɔ́ ko he hia we lɛ. Jehanɛ hu ɔ, David le kaa Yehowa ji e huɛ nɛ e kplɛɛ e nɔ. Enɛ ɔ he ɔ, David ná nɔ mi mami nɛ mi wa kaa bɔ fɛɛ bɔ nɛ níhi ma ji ha ngɛ e si himi mi ɔ, Yehowa maa ya nɔ ma ha lɛ e hiami níhi tsuo. Akɛnɛ David ngɛ hemi kɛ yemi kaa Yehowa suɔ lɛ nɛ e susuɔ e he he je ɔ, lɔ ɔ ye bua lɛ nɛ e hɛwi tsɔ, nɛ e bua jɔ níhi nɛ e ngɛ ɔ he.—La 16:11.

14. Mɛni blɔ nɔ nɛ eko ɔ, Yehowa maa je suɔmi mi kɛ hyɛ wa nɔ?

¹⁴ Yehowa jeɔ suɔmi mi nɛ e hyɛɔ wa nɔ, titli ngɛ behi nɛ a mi wa mi. Claire a nɛ e sɔmɔ ngɛ Betel jeha 20 kɛ se ɔ nu he kaa e be hɛ nɔ kami ko benɛ e weku ɔ kɛ si fɔfɔɛhi nɛ a mi wa a kpe setsɔsetsɔ ɔ. E papaa nu stroke, nɛ a  fiee e nyɛmiyo wayoo kɛ je asafo ɔ mi, nɛ a weku ɔ ní tsumi puɛ, nɛ a we hu je a dɛ. Kɛ Yehowa je e suɔmi ɔ kpo kɛ tsɔɔ mɛ ha kɛɛ? Claire de ke: “Daa ligbi ɔ, Yehowa haa nɛ wa nine suɔ wa hiami níhi a nɔ. Yehowa ha wɔ wa hiami níhi po kɛ be nɔ si abɔ! I susuɔ bɔ nɛ Yehowa ye bua ye weku ɔ he nɛ i kaiɔ be fɛɛ be. Jã nɛ i pee ɔ ye bua mi nɛ i kɛ bua jɔmi sɔmɔ Yehowa ngɛ haomi behi a mi.”

15. Mɛni ha nɛ David ná he wami ehe ɔ? (Hyɛ foni ɔ hulɔ.)

¹⁵ “E haa nɛ i náa he wami he.” Be komɛ ɔ, David haoɔ wawɛɛ ngɛ nyagbahi kɛ kahi nɛ e kɛ ngɛ kpee ɔ he. (La 18:​4-6) Se akɛnɛ Yehowa suɔ David nɛ e susuɔ e he he je ɔ, e wo lɛ he wami. Ke David hao nɛ pɔ tɔ e he ɔ, Yehowa haa nɛ e jɔɔ e he ngɛ “nga mumu nɔ” nɛ e ngɔɔ lɛ kɛ yaa ‘takuhi nɛ a mi nyu jɔ ɔ a he.’ Enɛ ɔ haa nɛ David náa he wami ehe, nɛ e yaa nɔ nɛ e sɔmɔɔ Yehowa kɛ bua jɔmi.—La 18:​28-32.

16. Mɛni blɔ nɔ nɛ Yehowa suɔmi ɔ wo mo he wami?

¹⁶ Mwɔnɛ ɔ, wɔ hu waa kɛ haomihi kɛ kahi kpeɔ ngɛ wa si himi mi. Se ‘akɛnɛ Yehowa suɔmi ɔ se pui gblegbleegble he je ɔ, wa hɛ mi kpataa we.’ (Kɔmɔ 3:22; Kol. 1:11) Mo susu Rachel nɔ hyɛmi nɔ́ ɔ he nɛ o hyɛ. Benɛ e huno ɔ kpa Yehowa sɔmɔmi nɛ e je e he ngɛ COVID-19 be ɔ mi ɔ, e hao wawɛɛ. Se mɛni nɛ Yehowa pee kɛ ye bua Rachel? E de ke: “Yehowa ha nɛ i nu he kaa e suɔ mi. E ha nɛ huɛmɛ nɛ a susuɔ ye he ɔ, ná be kɛ ha mi, nɛ a ngɔ niye ní kɛ ba ha mi, nɛ a mane mi sɛ gbihi kɛ ngmamihi nɛ woɔ nɔ bua. Jehanɛ hu ɔ, ke a na mi ɔ, a kɛ mi muɔɔ, nɛ a kaiɔ mi kaa Yehowa susuɔ ye he. Ngɛ anɔkuale mi ɔ, be fɛɛ be ɔ, i naa Yehowa si kaa e ha nɛ i ba piɛɛ weku agbo nɛ suɔmi ngɛ mi nɛ ɔ he.”

17. Mɛni he je nɛ David “yi gbeye” ɔ?

¹⁷ ‘I yi gbeye, ejakaa mo Yehowa, o ngɛ ye kasa nya haa.’ David kɛ haomihi kpe ngɛ e si himi mi tsuo, nɛ e ngɛ he nyɛli fuu nɛ a he wa hulɔ. Se kɛ̃ ɔ, Yehowa suɔmi ɔ ha nɛ e nu he kaa e ngɛ slɔkee. David nyɛ nɛ e na kaa Yehowa piɛɛ e he ngɛ si fɔfɔɛhi tsuo nɛ e kɛ ngɛ kpee ɔ mi, nɛ enɛ ɔ wo lɛ he wami wawɛɛ. Enɛ ɔ he ɔ, David nyɛ nɛ e la ke: “[Yehowa] ha nɛ i jɔɔ gbeye yemi.” (La 34:4) Ngɛ anɔkuale mi ɔ, David ye gbeye be komɛ mohu lɛɛ, se e nyɛ nɛ e ye gbeye yemi nɛ ɔ nɔ, ejakaa e le kaa Yehowa suɔ lɛ.

18. Ke o ngɛ gbeye yee ɔ, kɛ lemi nɛ o le kaa Yehowa suɔ mo ɔ maa wo mo he wami ha kɛɛ?

¹⁸ Kɛ lemi nɛ wa le kaa Yehowa suɔ wɔ ɔ woɔ  wɔ he wami ha kɛɛ ke waa kɛ si fɔfɔɛhi nɛ a mi wa ngɛ kpee? Nyɛmiyo ko nɛ a tsɛɛ lɛ ke Susi nɛ e ji blɔ gbalɔ ɔ tsɔɔ bɔ nɛ e kɛ e huno ɔ nu he ha benɛ a bi nyumu ɔ gbe e he ɔ. E de ke: “Ke o kɛ si fɔfɔɛ ko nɛ ngɛ gbeye kpe ɔ, e saa o he wawɛɛ nɛ o nuɔ he kaa o be hɛ nɔ kami ko kulaa. Se Yehowa suɔmi ɔ ha nɛ wa nu he kaa e ngɛ wa he piɛ poe nɛ wa ngɛ slɔkee.” Rachel nɛ wa tu e he munyu kɛ sɛ hlami ɔ de ke: “Ligbi ko nyɔ mi nɛ i hao, nɛ i pee yeyeeye nɛ i ye gbeye ɔ, i sɔle wawɛɛ kɛ ha Yehowa. Oya nɔuu nɛ i nu he kaa Yehowa wo mi he wami, nɛ e ha nɛ ye tsui nɔ ye mi kaa bɔ nɛ binyɛ ko woɔ e bi bua nɛ́ e hwɔɔ mahe ɔ. Ye hɛ be jamɛ a ligbi ɔ nɔ jee gblegbleegble.” A wo Asafo mi nɔkɔtɔma ko nɛ a tsɛɛ lɛ ke Tasos ɔ tsu jeha eywiɛ sɔuu akɛnɛ e sume nɛ e kɛ e he nɛ wo ta buli a ní tsumi mi ɔ he je. Mɛni Yehowa pee kɛ tsɔɔ kaa e suɔ lɛ nɛ e susuɔ e he? E de ke: “Yehowa hyɛ ye nɔ nɛ e ha mi ye hiami níhi tsuo kɛ be nɔ pe bɔ nɛ i hyɛ blɔ ɔ po. Enɛ ɔ wo mi he wami nɛ i ná nɔ mi mami kaa ma nyɛ ma ngɔ ye hɛ kɛ fɔ Yehowa nɔ kɛ ye tsui tsuo. Jehanɛ hu ɔ, e ngɛ mi kaa a wo mi tsu mohu lɛɛ, se Yehowa gu e mumi klɔuklɔu ɔ nɔ kɛ wo mi he wami nɛ i ná bua jɔmi. Enɛ ɔ ha nɛ i ná nɔ mi mami kaa ke i kɛ Yehowa pee kake kɛ tsu ní ɔ, ma ná e kpakpa peemi ɔ he se wawɛɛ. Lɔ ɔ he ɔ, i je blɔ gbami ní tsumi ɔ sisi ngɛ tsu womi he ɔ.”

MOO HƐ KƐ SU MAWU NƐ E NGƐ SUƆMI Ɔ HE

19. (a) Kɛ lemi nɛ wa le kaa Yehowa suɔ wɔ ɔ náa wa sɔlemihi a nɔ he wami ha kɛɛ? (b) Munyuhi nɛ a kɛ kale Yehowa suɔmi ɔ, a kpɛti te nɛɛ lɛ o bua jɔ he wawɛɛ? (Hyɛ daka nɛ ji, “ Ngmamihi Nɛ Maa Ye Bua Wɔ Konɛ Waa Nu He Kaa Yehowa Suɔ Wɔ.”)

¹⁹ Níhi a si kpamihi nɛ wa susu a he kɛ sɛ hlami ɔ tsɔɔ kaa Yehowa nɛ ji ‘Mawu nɛ ngɛ suɔmi ɔ’ piɛɛ wa he! (2 Kor. 13:11) E susuɔ wa kpɛti nɔ fɛɛ nɔ he. Wa ngɛ nɔ mi mami kaa Yehowa ‘suɔmi nɛ se pui ɔ bɔle wɔ kɛ kpe.’ (La 32:10) Ke wa ya nɔ nɛ wa pue wa yi mi tɛ ngɛ bɔ nɛ Yehowa je suɔmi kpo kɛ tsɔɔ wɔ ha a he ɔ, wa maa na kaa e susuɔ wa he wawɛɛ, nɛ wa maa hɛ kɛ su e he wawɛɛ. Wa ma nyɛ maa sɔle ha lɛ faa nɛ wa de lɛ kaa wa hia e suɔmi ɔ wawɛɛ. Wa ma nyɛ ma de lɛ wa nyagba amɛ tsuo, nɛ́ wa ná nɔ mi mami kaa e le bɔ nɛ wa ngɛ he nue ha nɛ e pee klaalo kaa e maa ye bua wɔ.—La 145:​18, 19.

20. Mɛni blɔ nɔ nɛ suɔmi nɛ Yehowa ngɛ kɛ ha mo ɔ haa nɛ o hɛɔ kɛ suɔ e he?

²⁰ Kaa bɔ nɛ ke fĩɛ ngɛ wɔ yee nɛ wa ya hlueɔ la konɛ wa he nɛ dɔ la a, jã nɔuu kɛ̃ nɛ wa hɛɔ kɛ suɔ Yehowa suɔmi ɔ he ke waa kɛ haomihi ngɛ kpee. Ngɛ anɔkuale mi ɔ, Yehowa susuɔ wa he wawɛɛ, nɛ e suɔmi ɔ se be. Enɛ ɔ he ɔ, o bua nɛ jɔ kaa Yehowa suɔ mo. Nyɛ ha nɛ wɔ tsuo wa kplɛɛ Yehowa suɔmi ɔ nɔ nɛ waa kɛ bua jɔmi nɛ de ke: ‘I suɔ Yehowa’!—La 116:1.