1, 2. Mɛni bɔfo Paulo pee kɛ tsɔɔ kaa e bua jɔ Mawu dloomi ɔ he?

BƆFO Paulo kɛ nɔ mi mami de ke: ‘Dloomi nɛ Mawu dloo mi ɔ pee we yaka.’ (Kane 1 Korinto Bi 15:9, 10.) Akɛnɛ be ko nɛ be ɔ, Paulo wa Kristofohi yi mi he je ɔ, e le kaa e sɛ kaa Mawu nɛ na lɛ mɔbɔ.

² Benɛ e piɛ bɔɔ nɛ Paulo ma gbo ɔ, e ngma sɛ womi ya ha Timoteo. E de lɛ ke: “I naa wa Nyɔmtsɛ Kristo Yesu si kaa e ha mi he wami nɛ ma kɛ tsu ní. I naa lɛ si kaa e sa e hɛ mi kaa e hla mi nɛ ma ba sɔmɔ lɛ.” (1 Tim. 1:12-14) Mɛni ji jamɛ a sɔmɔmi ɔ? Paulo de asafo mi nikɔtɔmahi nɛ a ngɛ Efeso ɔ ke: ‘Ye wami tete he hia we mi. Nɔ́ nɛ he hia mohu ji kaa ní tsumi nɛ Nyɔmtsɛ Yesu ha mi ɔ, ma tsu kɛ gbe nya. Lɔ ɔ ji kaa ma fiɛɛ sane kpakpa a nɛ tsɔɔ kaa Mawu mi mi hi ha adesahi tsuo ɔ.’​—Níts. 20:24.

3. Mɛni sɔmɔmi ní tsumi klɛdɛɛ lɛ a kɛ wo Paulo dɛ? (Moo hyɛ foni nɛ ngɛ ní kasemi ɔ sisije ɔ.)

³ Mɛni “sane kpakpa” nɛ maa Yehowa dloomi ɔ nɔ mi nɛ  Paulo fiɛɛ ɔ? E de Kristofohi nɛ a hi Efeso ɔ ke: “I heɔ yeɔ kaa ní tsumi nɛ Mawu dloomi ɔ tu ngɔ wo ye dɛ ngɛ nyɛ ma je li ɔmɛ nyɛ he ɔ, nyɛ maa nu he.” (Efe. 3:1, 2) A fã Paulo kaa e fiɛɛ sane kpakpa a kɛ ha nihi nɛ a pi Yuda bi, konɛ mɛ hu a nyɛ nɛ a pee Kristo huɛmɛ ngɛ Mesia Matsɛ Yemi ɔ sisi. (Kane Efeso Bi 3:5-8.) Paulo kɛ kã fiɛɛ sane kpakpa a, nɛ e pee nɔ hyɛmi nɔ́ kpakpa kɛ ha Kristofohi nɛ a ngɛ mwɔnɛ ɔ, nɛ e tsɔɔ kaa dloomi nɛ Mawu dloo lɛ ɔ “pee we yaka.”

4, 5. Mɛni he je nɛ wa ma nyɛ ma de ke ‘sane kpakpa nɛ kɔɔ matsɛ yemi ɔ he ɔ’ nɔuu ji “sane kpakpa nɛ tsɔɔ kaa Mawu mi mi hi ha adesahi tsuo” ɔ?

⁴ Ngɛ nyagbe ligbi nɛ ɔmɛ a mi ɔ, a fã Yehowa we bi kaa a fiɛɛ ‘sane kpakpa nɛ kɔɔ matsɛ yemi ɔ he ɔ, bɔ nɛ pee nɛ je ma amɛ tsuo nɛ a nu; nɛ lɔ ɔ se loko nyagbe ɔ maa ba.’ (Mat. 24:14) Sɛ gbi ɔ nɛ wa ngɛ fiɛɛe ɔ hu ji “sane kpakpa nɛ tsɔɔ kaa Mawu mi mi hi ha adesahi tsuo.” Yehowa gu Kristo nɔ kɛ je mi mi himi kpo kɛ tsɔɔ wɔ, enɛ ɔ lɛ haa wa hyɛɔ blɔ kaa wa ma ná jɔɔmihi fuu ngɛ Matsɛ Yemi ɔ sisi ɔ nɛ. (Efe. 1:3) Anɛ wa ti nɔ tsuaa nɔ ma nyɛ maa kase Paulo lo? Anɛ wa ma nyɛ maa tsɔɔ kaa wa bua jɔ Yehowa dloomi ɔ he nɛ wa fiɛɛɔ kɛ kã lo?​—Kane Roma Bi 1:14-16.

⁵ Ngɛ ní kasemi nɛ sɛ hlami ɔ mi ɔ, wa kase kaa wa ji yayami peeli se wa ngɛ Yehowa dloomi ɔ he se náe ngɛ blɔhi fuu a nɔ. Enɛ ɔ he ɔ, e ji wa blɔ nya ní tsumi kaa wa ma ha nɛ nihi tsuo nɛ a le blɔhi a nɔ nɛ Yehowa guɔ kɛ tsɔɔ kaa e suɔ adesahi, kɛ bɔ nɛ a ti nɔ tsuaa nɔ ma plɛ kɛ ná he se ha. Mɛni ji ní komɛ nɛ Mawu kɛ dloo wɔ nɛ e sa kaa wa ha nɛ nihi nɛ a le?

6, 7. Ke wa fiɛɛ kpɔmi nɔ́ ɔ he sane kpakpa a kɛ tsɔɔ nihi ɔ, ngɛ mɛni blɔ nɔ lɔ ɔ tsɔɔ kaa wa ngɛ Mawu dloomi ɔ he sane kpakpa a fiɛɛe?

⁶ Mwɔnɛ ɔ, nihi fuu peeɔ mɛ nitsɛmɛ a tsui nya ní, nɛ ke a ngɛ yayami pee po ɔ, a he nile kojo we mɛ. Enɛ ɔ he ɔ, a li nɔ́ he je nɛ wa hia kpɔmi nɔ́ ɔ. Se kɛ̃ ɔ, nihi fuu yɔse kaa mɛ nitsɛmɛ a tsui nya ní nɛ a peeɔ ɔ ha we nɛ a náa bua jɔmi nitsɛnitsɛ. Ja a kɛ Yehowa Odasefohi kase ní loko a leɔ nɔ́ nɛ ji yayami, nɔ́ nɛ jeɔ yayami peemi mi kɛ baa, kɛ nɔ́ nɛ e sa kaa waa pee konɛ a kpɔ̃ wɔ kɛ je yayami dɛ mi. Ke tsui kpakpatsɛmɛ ba ná le kaa Yehowa je suɔmi mi nɛ e tsɔ e Bi ɔ kɛ ba zugba a nɔ nɛ e ba kpɔ̃ wɔ kɛ je yayami kɛ gbenɔ dɛ mi ɔ, a bua jɔɔ.​—1 Yoh. 4:9, 10.

⁷ Paulo tu Yehowa Bi nɛ e suɔ lɛ ɔ he munyu ke: ‘Kristo ngɔ e he ngɔ sã bɔ, nɛ e kɛ e muɔ kpɔ̃ wɔ, nɛ Yehowa dloomi babauu ɔ nya a, a ngɔ wa he yayami ɔmɛ ngɔ pa wɔ.’ (Efe. 1:7) Kristo kpɔmi afɔle sami ɔ ji nɔ́ nɛ pe kulaa nɛ tsɔɔ kaa Mawu suɔ wɔ, nɛ e tsɔɔ hu kaa Yehowa ji dloolɔ ngua. Ke wa ba le kaa ke wa je hemi kɛ yemi kpo ngɛ Yesu afɔle sami ɔ mi ɔ, Mawu maa ngɔ wa he yayami kɛ pa wɔ nɛ wa ma ná he nile kpakpa a, wa bua jɔɔ! (Heb. 9:14) Niinɛ, enɛ ɔ ji sane kpakpa nɛ e sa kaa waa fiɛɛ kɛ ha nihi!

8. Mɛni he je nɛ e sa kaa adesahi nɛ a kɛ Mawu nɛ kpata a?

⁸ E ji wa blɔ nya ní tsumi kaa wa ma ha nɛ nihi nɛ a le kaa a kɛ a Bɔlɔ ɔ ma  nyɛ maa bɔ huɛ. Ke nihi je we hemi kɛ yemi kpo ngɛ Yesu afɔle sami ɔ mi ɔ, Mawu buɔ mɛ kaa e he nyɛli. Bɔfo Yohane ngma ke: “Nɔ nɛ heɔ Bi ɔ yeɔ ɔ, e nine su neneene wami ɔ nɔ; se nɔ tsuaa nɔ nɛ bui Bi ɔ tue ɔ, e be neneene wami náe. Mawu maa gbla e tue mohu.” (Yoh. 3:36) Wa bua jɔɔ kaa kɛ gu Kristo afɔle sami ɔ nɔ ɔ, wa ma nyɛ ma dla waa kɛ Mawu wa kpɛti. Paulo de ke: “Nyɛɛ kɛ Mawu nyɛ kpɛti kɛ saminya, nɛ nyɛ pee nyɛ he e he nyɛli. Nyɛ peeɔ ní yayamihi, nɛ nyɛ susuɔ ní yayamihi hulɔ. Se amlɔ nɛ ɔ, kɛ gu e bi ɔ nɛ ba ngɛ he lo mi ɔ gbenɔ ɔ nɔ ɔ, e kɛ nyɛ ba kpata.”​—Kol. 1:21, 22.

9, 10. (a) Mɛni ní tsumi nɛ Kristo kɛ wo e nyɛmimɛ nɛ a pɔ mɛ nu ɔ a dɛ? (b) Mɛni blɔ nɔ “to kpa” amɛ guɔ kɛ yeɔ bua a nyɛmimɛ nɛ a pɔ mɛ nu ɔ?

⁹ Kristo ngɔ ní tsumi ko kɛ wo e nyɛmimɛ nɛ a pɔ mɛ nu ɔ a dɛ kaa a “dla e kɛ nihi tsuo a kpɛti.” Paulo ngma sɛ womi kɛ ya ha Kristofohi nɛ a pɔ mɛ nu nɛ a hi si ngɛ kaseli ɔmɛ a be ɔ mi ɔ. E de mɛ ke: “Mawu lɛ pee enɛ ɔ tsuo. Kɛ gu Kristo nɔ ɔ, e dla waa kɛ lɛ wa kpɛti. Nɛ ní tsumi nɛ e ngɔ wo wa dɛ ji kaa wa ha e dla e kɛ nihi tsuo a kpɛti. Nɔ́ nɛ i ngɛ dee ji kaa kɛ gu Kristo nɔ ɔ, Mawu ngɔ je ɔ tsuo he yayami kɛ pa mɛ, nɛ e ngɛ e kɛ je ɔ tsuo a kpɛti dlae; nɛ sɛ gbi nɛ e tu ngɔ wo wa dɛ mi ji kaa e suɔ nɛ a dla e kɛ je ɔ tsuo a kpɛti. Lɔ ɔ he ɔ, wa ji bɔfohi ngɛ Kristo biɛ mi ejakaa Mawu gu wa nɔ nɛ e kɛ nihi ngɛ munyu tue. Waa kɛ Kristo biɛ ngɛ nyɛ pɛɛ kpae ke nyɛ ha nɛ a dla nyɛɛ kɛ Mawu nyɛ kpɛti.”​—2 Kor. 5:18-20.

¹⁰ “To kpa” amɛ náa he blɔ kɛ yeɔ bua a nyɛmimɛ nɛ a pɔ mɛ nu ɔ ngɛ fiɛɛmi ní tsumi ɔ mi. (Yoh. 10:16) A daa Kristo nane mi kɛ yeɔ bua nihi wawɛɛ konɛ a ba le anɔkuale ɔ, konɛ huɛ bɔmi gbagbanii nɛ hi a kɛ Yehowa a kpɛti. Enɛ ɔ he hia ngɛ sane kpakpa nɛ kɔɔ Mawu dloomi ɔ he ɔ fiɛɛmi mi.

11, 12. Mɛni he je nɛ e sa kaa wa ha nɛ nihi nɛ a le kaa a ma nyɛ maa sɔle kɛ ha Yehowa a?

¹¹ Nihi fuu sɔleɔ ejakaa lɔ ɔ haa mɛ bua jɔmi, se a he we yi kaa Mawu buɔ a sɔlemi tue. E he hia nɛ a le kaa Yehowa “buɔ” sɔlemi tue. David nɛ ji la polɔ ɔ ngma ke: “Ee, mo pɛ lɛ o buɔ kue fami tue. O ngɔ adesahi tsuo maa ba, nɛ a ba bu akɔtaa ngɛ a yayami ɔmɛ a he. Ke wa he yayami ɔmɛ ngɛ wɔ haoe ɔ, mo lɛ o kɛ paa wɔ.”​—La 65:2, 3.

¹² Yesu de e kaseli ɔmɛ ke: “Nɔ́ tsuaa nɔ́ nɛ nyɛ ma kpa he pɛɛ ngɛ ye biɛ mi ɔ, ma pee.” (Yoh. 14:14) E ngɛ heii kaa munyu nɛ ji “nɔ́ tsuaa nɔ́” ɔ tsɔɔ nɔ́ saisaa ko nɛ saa Yehowa hɛ mi. Yohane ha wɔ nɔ mi mami ke: “Wa yi gbeye ngɛ Mawu hɛ mi, ejakaa wa le kaa ke waa kɛ juɛmi kpakpa bi lɛ nɔ́ ko ɔ, e buɔ wɔ tue.” (1 Yoh. 5:14) E he hia nɛ waa tsɔɔ nihi nɛ a le kaa tsa pi bua jɔmi pɛ nɛ sɔlemi haa nɔ, mohu ɔ, e ji blɔ nɛ wa guɔ nɔ kɛ hɛɛ wɔ kɛ suɔ Yehowa “dloomi sɛ ɔ he”! (Heb. 4:16) Ke wa tsɔɔ nihi bɔ nɛ a sɔleɔ ha, nɔ nɛ e sa kaa a sɔle kɛ ha, kɛ níhi nɛ e sa kaa a sɔle kɛ bi ɔ, lɔ ɔ maa ye bua mɛ nɛ huɛ bɔmi gbagbanii maa hi a kɛ Yehowa a kpɛti, nɛ a ma ná bua womi ngɛ haomi behi a mi.​—La 4:1; 145:18.

13, 14. (a) Mɛni he blɔhi nɛ se be lɛ nihi nɛ a pɔ mɛ nu ɔ ma ná hwɔɔ se? (b) Mɛni ji nɔ́ nɛ se be nɛ nihi nɛ a pɔ mɛ nu ɔ maa pee ha adesahi?

¹³ Yehowa maa dloo wɔ wawɛɛ ngɛ je ehe ɔ mi pe bɔ nɛ e ngɛ pee ha wɔ amlɔ nɛ ɔ. Bɔfo Paulo tu he blɔ ngua nɛ Mawu ha nimli 144,000, nɛ a maa piɛɛ Kristo he kɛ ye matsɛ ngɛ e hiɔwe Matsɛ Yemi ɔ mi ɔ he munyu. E de ke: “Mawu lɛɛ e mɔbɔ nami ɔ hiɛ babauu; jã kɛ̃ nɛ suɔmi nɛ e ngɛ kɛ ha wɔ ɔ hu kle. Lɔ ɔ he ɔ, be mi nɛ wa gbo tue, nɛ wa pee kaa nihi nɛ gbo ɔ, e ha wa ba wami mi ekohu benɛ e tle Kristo si kɛ je gbeje ɔ. Dloomi nya nɛ a he nyɛ yi wami. Mawu tle waa kɛ Kristo si, konɛ waa kɛ lɛ tsuo nɛ ye tsɛ ngɛ hiɔwe ejakaa wa ngɛ e mi. E pee enɛ ɔ konɛ e kɛ tsɔɔ yi nɔhi tsuo nɛ maa ba hwɔɔ se ɔ kaa Kristo Yesu he ɔ, e suɔ wɔ saminya, nɛ e dloo wɔ babauu.”​—Efe. 2:4-7.

¹⁴ Wa juɛmi be nyɛe maa kpe ní kpakpahi nɛ Yehowa kɛ maa dloo Kristofohi nɛ a pɔ mɛ nu ɔ he be mi nɛ a ma ya piɛɛ Kristo he kɛ ye matsɛ ngɛ hiɔwe ɔ. (Luka 22:28-30; Filip. 3:20, 21; 1 Yoh. 3:2) Mɛ ji nihi titli nɛ Yehowa maa ‘dloo mɛ babauu.’ A maa pee “Yerusalem he,” nɛ ji Kristo ayɛflo ɔ. (Kpoj. 3:12; 17:14; 21:2, 9, 10) A maa piɛɛ Yesu he kɛ ‘tsa nihi ngɛ je ɔ mi,’ nɛ a maa tsɔɔ adesahi nɛ a buɔ Mawu tue ɔ blɔ konɛ a ye a he kɛ je yayami kɛ gbenɔ dɛ mi, konɛ a ye mluku.​—Kane Kpojemi 22:1, 2, 17.

15, 16. Mɛni blɔ nɔ Yehowa maa gu kɛ dloo “to kpa” amɛ hwɔɔ se?

¹⁵ Efeso Bi 2:7 ɔ tsɔɔ kaa Mawu maa dloo wɔ ngɛ je ehe ɔ mi hulɔ. Atsinyɛ jemi ko be he kaa ngɛ Yehowa je ehe ɔ mi ɔ, e maa “dloo wɔ babauu.” (Luka 18:29, 30) Blɔhi nɛ pe kulaa nɛ Yehowa maa gu nɔ kɛ dloo wɔ ɔ a kpɛti kake ji, gbogboehi a si nɛ e ma tle kɛ je “gbeje” ɔ. (Hiob 14:13-15; Yoh. 5:28, 29) A ma tle nyumuhi kɛ yihi anɔkualetsɛmɛ nɛ a gbo loko Kristo ba gbo kɛ kpɔ̃ wɔ, kɛ “to kpa” amɛ a kpɛti nihi nɛ a ye anɔkuale kɛ ya su gbenɔ mi ngɛ nyagbe ligbi nɛ ɔmɛ a mi ɔ tsuo si kɛ ba wami mi konɛ a ba sɔmɔ Yehowa ekohu.

¹⁶ A ma tle nimli ayɔhi abɔ nɛ a li Mawu nɛ a kɛ gbo ɔ hu si. A ma ha mɛ he blɔ konɛ a kase Yehowa he ní nɛ a ba a he si kɛ ha e nɔ yemi ɔ. Yohane ngma ke: ‘I na nihi nɛ gbo ɔ tsuo nɛ daa si ngɛ matsɛ sɛ ɔ hɛ mi, ni nguahi, kɛ ni wawihi. A bli womihi a nya. A bli womi kpa hu nya; nɛ enɛ ɔ lɛɛ nihi nɛ a hɛ ngɛ ɔ a biɛ nɛ a ngma kɛ wo mi. A kojo ni gbogboe ɔmɛ ngɛ níhi nɛ a pee ɔ a he kaa bɔ nɛ a ngma ngɔ wo womi ɔmɛ a mi ɔ. Kɛkɛ nɛ wo jé ni gbogboehi tsuo nɛ ngɛ e mi ɔ ngɔ ha. Gbenɔ, kɛ gbeje hu jé ni gbogboehi tsuo nɛ a kɛ to ɔ ngɔ ha. Nɛ a kojo mɛ ngɛ nɔ́ nɛ nɔ tsuaa nɔ pee ɔ he.’ (Kpoj. 20:12, 13) Ngɛ anɔkuale mi ɔ, e ma bi nɛ nihi nɛ a ma tle mɛ si ɔ nɛ a kase bɔ nɛ a kɛ Baiblo sisi tomi mlaahi ma tsu ní ha. Jehanɛ se hu ɔ, e he maa hia nɛ a kɛ blɔ tsɔɔmi ehe nɛ kɔɔ níhi nɛ Yehowa ma hla ngɛ nihi a dɛ ngɛ je ehe ɔ mi ɔ he nɛ a ngma ngɛ ‘womi ɔmɛ’ a mi ɔ nɛ tsu ní. Blɔ tsɔɔmi ehe nɛ ɔmɛ nɛ a ngma ngɛ womi ɔmɛ a mi ɔ ji blɔ kpa ko hu nɔ nɛ Yehowa maa gu kɛ dloo wɔ.

17. Ke wa ngɛ nihi odase yee ɔ, mɛni e sa kaa e hi wa juɛmi mi?

¹⁷ Amlɔ nɛ ɔ ji be nɛ e he hia pe kulaa  nɛ e sa kaa waa fiɛɛ Matsɛ Yemi ɔ he sane kpakpa a, ejakaa nyagbe ɔ su si ta! (Mar. 13:10) Atsinyɛ jemi ko be he kaa sane kpakpa a maa Yehowa dloomi ɔ nɔ mi. Be fɛɛ be nɛ wa maa ye nihi odase ɔ, e sa kaa enɛ ɔ nɛ hi wa juɛmi mi. Ke wa ngɛ fiɛɛe ɔ, oti nɛ waa kɛ maa wa hɛ mi ji kaa wa maa wo Yehowa hɛ mi nyami. Wa ma nyɛ maa pee jã ke wa tsɔɔ nihi kaa níhi tsuo nɛ Yehowa wo si kaa e kɛ maa jɔɔ wɔ ngɛ je ehe ɔ mi ɔ maa Yehowa dloomi ɔ nɔ mi.  

18, 19. Mɛni blɔ nɔ wa guɔ kɛ woɔ Yehowa hɛ mi nyami ngɛ e dloomi ɔ he je?

¹⁸ Ke wa ngɛ nihi odase yee ɔ, wa ma nyɛ ma ha nɛ a le kaa ngɛ Kristo Matsɛ Yemi ɔ sisi ɔ, a ma ná kpɔmi afɔle sami ɔ he se kɛ pi si, nɛ bɔɔbɔɔbɔɔ ɔ, a maa ye mluku. Baiblo ɔ de ke: “Adebɔ níhi tsuo maa ye a he, nɛ gbenɔ be he wami náe ngɛ a nɔ hu; nɛ a kɛ Mawu bimɛ ɔmɛ maa hi si ngɛ he jɔmi mi, nɛ a maa wo a hɛ mi nyami.” (Rom. 8:21) Yehowa mi mi himi nɛ se be ɔ he je nɛ nɔ́ nɛ ɔ maa ba mi ɔ nɛ.

¹⁹ E ji he blɔ ngua nɛ wa ná kaa wa maa fiɛɛ manye munyu nɛ a wo he si ngɛ Kpojemi 21:4, 5 ɔ kɛ tsɔɔ nihi. A de ngɛ lejɛ ɔ ke: “Mawu ma tsu a hɛ mi vo nyu tsuo. Nɔ ko be gboe hu; nɔ ko be kɔmɔ yee hu; nɔ ko be ya foe hu, nɛ nɔ ko be nɔ́ nae hu. Ejakaa ní momo ɔmɛ a se po.” Kɛkɛ nɛ Yehowa nɛ hii si ngɛ matsɛ sɛ ɔ nɔ ɔ de ke: “Hyɛ, i ngɛ níhi tsuo pee ehe!” E de hu ke: “Ngmaa enɛ ɔ, ejakaa anɔkuale munyu nɛ sa kaa a he ye ji nɛ ɔ nɛ.” Ke waa kɛ kã fiɛɛɔ sane kpakpa nɛ ɔ kɛ tsɔɔ nihi ɔ, lɔ ɔ tsɔɔ kaa wa ngɛ Yehowa hɛ mi nyami woe nitsɛnitsɛ ngɛ e dloomi ɔ he je!