1. Mɛni ní tsumi nɛ Yehowa suɔ kaa wa tsu mwɔnɛ ɔ?

 MWƆNƐ Ɔ, Mawu suɔ kaa waa fiɛɛ Matsɛ Yemi ɔ he sane kpakpa a ngɛ je ɔ mi tsuo. (Maak. 13:10; 1 Tim. 2:3, 4) Ní tsumi nɛ ɔ ji Yehowa nɔ́, nɛ e hla e Bi nɛ e suɔ lɛ ɔ konɛ e nyɛɛ hɛ mi. Akɛnɛ Yesu lɛ ngɛ ní tsumi nɛ ɔ hɛ mi nyɛɛe he je ɔ, wa ma nyɛ ma ná nɔ mi mami kaa wa ma nyɛ ma tsu ní tsumi nɛ ɔ kɛ pi si kaa bɔ nɛ Yehowa suɔ kaa wa tsu ɔ loko nyagbe ɔ maa ba.​—Mat. 24:14.

2. Mɛni he wa ma susu ngɛ ní kasemi nɛ ɔ mi?

² Ngɛ ní kasemi nɛ ɔ mi ɔ, wa maa na bɔ nɛ Yesu guɔ “tsɔlɔ anɔkualetsɛ kɛ ní lelɔ ɔ” nɔ kɛ haa wɔ mumi mi niye ní ha. Wa maa na hu kaa e to blɔ nya konɛ e se nyɛɛli ɔmɛ nɛ a fiɛɛ sane kpakpa a pe bɔ nɛ a fiɛɛɔ be ko nɛ be ɔ. (Mat. 24:45) Jehanɛ hu ɔ, wa maa na nɔ́ nɛ wa ti nɔ fɛɛ nɔ ma nyɛ maa pee kɛ fĩ Yesu kɛ tsɔlɔ anɔkualetsɛ ɔ se.

3. Mɛni he blɔ nɛ a ha Yesu?

³ Yesu lɛ ngɛ fiɛɛmi ní tsumi ɔ hɛ mi nyɛɛe. Kɛ wa plɛ kɛ le kɛɛ? Benɛ e piɛ bɔɔ nɛ Yesu maa ho hiɔwe ya a, e kɛ e kaseli anɔkualetsɛmɛ ɔmɛ a ti ni komɛ kpe ngɛ Galilea yoku ɔ nɔ. E de mɛ ke: “A ngɔ he blɔhi tsuo nɛ ngɛ hiɔwe kɛ zugba a nɔ ɔ kɛ ha mi.” Mo kadi nɔ́ nɛ e de kɛ nyɛɛ se nɛ ɔ: “Nyɛɛ ya nɛ nyɛ ya pee nihi nɛ a ngɛ je ma amɛ tsuo a mi ɔ ye kaseli.” (Mat. 28:18, 19) Ní tsumihi nɛ Yehowa kɛ wo Yesu dɛ ɔ a kpɛti kake ji he blɔ nɛ e ha lɛ kaa e nyɛɛ fiɛɛmi ní tsumi ɔ hɛ mi.

4. Mɛni he je nɛ wa ma nyɛ ma ná nɔ mi mami kaa Yesu ngɛ fiɛɛmi ní tsumi ɔ hɛ mi nyɛɛe ɔ?

 ⁴ Yesu de e kaseli ɔmɛ ke a maa fiɛɛ, nɛ a maa pee nihi kaseli ngɛ “je ma amɛ tsuo” a mi, nɛ e maa piɛɛ a he “ligbi ɔmɛ tsuo kɛ yaa si níhi a blɔ nya tomi ɔ nyagbe be ɔ.” (Mat. 28:20) Munyu nɛ ɔ tsɔɔ heii kaa Yesu maa ya nɔ nɛ e maa nyɛɛ fiɛɛmi ní tsumi ɔ hɛ mi kɛ ba si wa be nɛ ɔ mi.

5. Mɛni wa ngɛ pee kɛ ngɛ ye buae konɛ gbami nɛ ngɛ La 110:3 ɔ nɛ ba mi?

⁵ Yesu hɛwi kaa ngɛ nyagbe be nɛ ɔ mi ɔ, a be nihi fuu nae nɛ a maa fiɛɛ sane kpakpa a. E le kaa gbami nɛ ɔ nɛ la polɔ ɔ gba a maa ba mi. La polɔ ɔ de ke: ‘Ligbi ɔ nɛ o maa hia ta a, o ma mi bi ɔmɛ maa ngɔ a he kɛ ha ngɛ mɛ nitsɛmɛ a suɔmi nya.’ (La 110:3) Ke o ngɔɔ o he kɛ woɔ fiɛɛmi ní tsumi ɔ mi ɔ, lɛɛ o ngɛ Yesu kɛ tsɔlɔ anɔkualetsɛ ɔ a se fĩe konɛ gbami nɛ ɔ nɛ ba mi. Ní tsumi ɔ ngɛ hɛ mi yae, se nyagbahi ngɛ mi.

6. Mɛni ji nyagba kake nɛ waa kɛ kpeɔ ngɛ Matsɛ Yemi fiɛɛmi ní tsumi ɔ mi mwɔnɛ ɔ?

⁶ Nyagba kake nɛ waa kɛ kpeɔ ngɛ Matsɛ Yemi fiɛɛmi ní tsumi ɔ mi ji si temi kɛ womi. Hemi kɛ yemi kuali, jami hɛ mi nyɛɛli kɛ nihi nɛ a kɛ a he woɔ ma kudɔmi sanehi a mi ɔ tuɔ lakpa munyuhi ngɛ wa fiɛɛmi ní tsumi ɔ he. Ke wa weku li, nihi nɛ wa le mɛ kɛ nihi nɛ waa kɛ mɛ tsuɔ ní ɔ nu lakpa munyu nɛ ɔmɛ ɔ, eko ɔ, a maa nyɛ wa nɔ konɛ wa kpa Yehowa sɔmɔmi nɛ wa kpa fiɛɛmi yami. Ngɛ ma komɛ a nɔ ɔ, wa he nyɛli woɔ wa nyɛmimɛ ɔmɛ a he gbeye, a tuaa mɛ, nɛ a nuɔ mɛ nɛ a woɔ mɛ tsu po. E pee we wɔ nyakpɛ kaa nihi peeɔ wɔ jã. Yesu gba ke: “Ye biɛ ɔ he je ɔ, je ma amɛ tsuo maa nyɛ nyɛ.” (Mat. 24:9) Nyɛmi nɛ nihi nyɛɔ wɔ ɔ ji odase nɛ tsɔɔ kaa Yehowa kplɛɛ wa nɔ. (Mat. 5:11, 12) Abosiami lɛ ha nɛ nihi teɔ si kɛ woɔ wɔ ɔ nɛ. Se Yesu ngɛ he wami kulaa pe Satan! Ngɛ Yesu yemi kɛ buami nya a, wa ngɛ sane kpakpa fiɛɛe kɛ ngɛ nihi tsɔɔe ngɛ je kɛ wɛ. Nyɛ ha nɛ waa hyɛ odase nɛ tsɔɔ jã.

7. Mɛni o na kaa e ngɛ nɔ yae nɛ tsɔɔ kaa munyu nɛ ngɛ Kpo Jemi 14:6, 7 ɔ ngɛ mi bae?

⁷ Nyagba kpa ko hu nɛ waa kɛ kpeɔ ngɛ fiɛɛmi ní tsumi ɔ mi ji kaa nihi tuɔ gbi slɔɔtoslɔɔtohi nɛ tsa pi tsuo nɛ wa nuɔ sisi. Ngɛ nina nɛ Yesu ha nɛ bɔfo Yohane na a mi ɔ, Yesu tsɔɔ kaa sane kpakpa a maa ye jamɛ a nyagba a nɔ ngɛ wa be nɛ ɔ mi. (Kane Kpo Jemi 14:6, 7.) Ngɛ mɛni blɔ nɔ? Wa ngɛ Matsɛ Yemi ɔ he sɛ gbi ɔ fiɛɛe kɛ ngɛ nihi babauu tsɔɔe. Mwɔnɛ ɔ, nihi nɛ a ngɛ je kɛ wɛ nyɛɔ nɛ a kaneɔ Baiblo kasemi womihi ngɛ jw.org ɔ nɔ ejakaa a tsɔɔ wa womi ɔmɛ a sisi kɛ ya gbihi nɛ hiɛ pe 1,000 mi. Blɔ Tsɔɔmi Ajla Toli ɔmɛ kplɛɛ nɔ kaa a tsɔɔ O Ma Nyɛ Ma Ná Bua Jɔmi Kɛ Ya Neneene! womi ɔ sisi kɛ ya gbihi 700 kɛ se mi. Womi nɛ ɔ ji womi titli nɛ waa kɛ nihi kaseɔ. A peeɔ videohi kɛ haa nihi nɛ a tue nui nɔ́, nɛ a peeɔ womihi kɛ haa nihi nɛ a hyɛ we nɔ́, nɛ a kɛ nine nguɛ kaneɔ. Wa na kaa Baiblo gbamihi ngɛ mi bae. Nihi je ‘je mahi nɛ a tuɔ gbi slɔɔtohi’ a mi, nɛ a ba ngɛ “gbi nɛ he tsɔ” nɛ ji Baiblo ɔ mi anɔkuale ɔ kasee. (Zak. 8:23; Zef. 3:9) Akɛnɛ Yesu Kristo lɛ ngɛ fiɛɛmi ní tsumi ɔ hɛ mi nyɛɛe he je ɔ, wa nyɛ nɛ wa ngɛ ní nɛ ɔ tsue.

8. Mɛni yiblii nɛ wa fiɛɛmi ní tsumi ɔ ngɛ woe?

⁸ Mwɔnɛ ɔ, nihi nɛ a hiɛ pe 8,000,000 nɛ́ a ngɛ mahi 240 a nɔ ɔ kɛ Yehowa asafo ɔ ngɛ bɔe, nɛ daa jeha a, a baptisiɔ nihi akpehi abɔ. Pi wa yibɔ ɔ nɛ ngɛ hɛ mi yae ɔ pɛ ji nɔ́ nɛ he hia, mohu ɔ, kaseli ehe nɛ a ngɛ mɔde bɔe kaa a ma je Kristofohi a suhi  kpo, nɛ́ a wo “su ehe ɔ” ji nɔ́ ko nɛ he hia wawɛɛ. (Kol. 3:8-10) A ti nihi fuu kpa je mi bami yaya kɛ ma he suɔmi ní peepeehi, a kpa awi yemi, nɛ a hlɛ nɔ mi hu. Gbami nɛ ngɛ Yesaya 2:4 ɔ ngɛ mi bae. Lejɛ ɔ de ke: ‘A dla we a he kɛ ha ta hu.’ Be mi nɛ wa ngɛ mɔde bɔe kaa wa maa wo su ehe ɔ, e gblaa nihi kɛ baa Yehowa asafo ɔ mi, nɛ lɔ ɔ tsɔɔ kaa wa ngɛ wa hɛ mi nyɛɛlɔ nɛ ji Kristo Yesu se nyɛɛe. (Yoh. 13:35; 1 Pet. 2:12) Mɛni he je nɛ níhi ngɛ nɔ yae jã? Ejakaa Yesu ngɛ wɔ ye buae.

9. Ngɛ Mateo 24:45-47 ɔ nya a, mɛni nɛ a gba kɛ fɔ si kaa e maa ba mi ngɛ nyagbe ligbi ɔ mi?

⁹ Kane Mateo 24:45-47. Yesu gba kɛ fɔ si kaa ngɛ nyagbe ligbi ɔ mi ɔ, e maa hla “tsɔlɔ anɔkualetsɛ kɛ ní lelɔ” ko nɛ́ e to mumi mi niye ní he blɔ nya. Enɛ ɔ he ɔ, wa hyɛɔ blɔ kaa tsɔlɔ nɛ ɔ ma tsu ní wawɛɛ ngɛ wa be nɛ ɔ mi. Munyu nɛ ɔ ngɛ mi bae niinɛ. Wa hɛ mi nyɛɛlɔ ɔ guɔ nihi nɛ a pɔ mɛ nu ɔ a kpɛti nihi bɔɔ ko a nɔ kɛ haa Mawu we bi kɛ nihi nɛ a ngɛ munyu ɔ he bua jɔmi ɔ mumi mi “niye ní ngɛ be nɛ sa mi.” Nyumu nɛ ɔmɛ pee we a he nyɔmtsɛmɛ ngɛ ni kpahi a hemi kɛ yemi ɔ nɔ. (2 Kor. 1:24) Mohu ɔ, a le kaa Yesu ji ‘a nyatsɛ kɛ a tatsɛ.’​—Yes. 55:4.

10. Womihi nɛ ngɛ foni ɔ mi ɔ te nɛɛ nɛ e ye bua mo nɛ o bɔni Yehowa sɔmɔmi?

¹⁰ Kɛ je jeha 1919 ɔ, tsɔlɔ anɔkualetsɛ ɔ pee womi slɔɔtohi kɛ ye bua ni hehi nɛ a ngɛ munyu ɔ he bua jɔmi ɔ konɛ a ná he blɔ kɛ kase Mawu Munyu ɔ mi anɔkuale ɔ. Ngɛ jeha 1921 ɔ mi ɔ, tsɔlɔ ɔ pee womi nɛ ji The Harp of God ɔ kɛ ye bua nihi nɛ a ngɛ munyu ɔ he bua jɔmi ɔ konɛ a kase Baiblo sisije tsɔɔmi ɔmɛ. Benɛ be ngɛ mi puee ɔ, a pee womi kpahi kɛ piɛɛ he. Mɛni womi lɛ ye bua mo nɛ o ba le wa hiɔwe Tsɛ ɔ, nɛ  o ná suɔmi kɛ ha lɛ? Anɛ e ji “Let God Be True,” The Truth That Leads to Eternal Life, You Can Live Forever in Paradise on Earth, Knowledge That Leads to Everlasting Life, Mɛni Tutuutu Ji Baiblo ɔ Tsɔɔmi?, Mɛni Baiblo ɔ Ma Nyɛ Maa Tsɔɔ Wɔ?, aloo womi ehe nɛ ji, O Ma Nyɛ Ma Ná Bua Jɔmi Kɛ Ya Neneene! ɔ lo? A pee womi nɛ ɔmɛ konɛ e ye bua wɔ nɛ waa pee nihi kaseli, nɛ a ba ngɛ be nya pɛpɛɛpɛ.

11. Mɛni he je nɛ e he hia nɛ waa kase Baiblo ɔ saminya nɛ́ waa le Yehowa he ní fuu ɔ?

¹¹ Tsa pi ni hehi nɛ a ngɛ munyu ɔ he bua jɔmi ɔ pɛ nɛ e he hia nɛ a kase Baiblo ɔ mi níhi nɛ a mi kuɔ ɔ nɛ a le Yehowa he ní fuu. E sa nɛ wɔ tsuo waa pee jã. Bɔfo Paulo ngma ke: “Nihi nɛ a wa a, a nɔ́ ji niye ní nɛ he wa.” Paulo de hu kaa ke waa kɛ níhi nɛ wa kaseɔ ngɛ Baiblo ɔ mi ɔ tsu ní ɔ, e maa ye bua wɔ nɛ wa maa “le slɔɔto nɛ ngɛ nɔ́ nɛ da kɛ nɔ́ nɛ dɛ tsuo a kpɛti.” (Heb. 5:14) Ngɛ be nɛ mi wa nɛ ɔ mi ɔ, e he ma nyɛ maa wa kaa waa kɛ Yehowa mlaahi ma tsu ní ejakaa nihi fuu a je mi bami puɛ wawɛɛ. Se Yesu hyɛɔ kaa wa nine maa su mumi mi niye ní nɛ he wami ngɛ mi nɛ ma ha nɛ wa hemi kɛ yemi mi nɛ wa a nɔ. Wa náa niye ní nɛ ɔ ngɛ Mawu Munyu nɛ ji Baiblo ɔ nɛ a je mumi mi kɛ ngma a mi. Yesu guɔ tsɔlɔ anɔkualetsɛ ɔ nɔ kɛ toɔ niye ní nɛ ɔ he blɔ nya, nɛ e haa nɛ wa nine suɔ nɔ.

12. Mɛni blɔ nɔ wa wo Mawu biɛ ɔ hɛ mi nyami kaa bɔ nɛ Yesu pee ɔ?

¹² Wɔ hu wa woɔ Mawu biɛ ɔ hɛ mi nyami kaa bɔ nɛ Yesu pee ɔ. (Yoh. 17:6, 26) Kaa nɔ hyɛmi nɔ́ ɔ, ngɛ jeha 1931 ɔ, wa da Ngmami ɔ nɔ nɛ wa ngɔ biɛ nɛ ji Yehowa Odasefohi ɔ kɛ fɔ wa nɔ. Enɛ ɔ tsɔɔ bɔ nɛ Mawu biɛ ɔ he hia wɔ ha, e tsɔɔ hu kaa wa suɔ nɛ nihi nɛ a le wɔ kɛ wa hiɔwe Tsɛ ɔ biɛ ɔ. (Yes. 43:10-12) Kɛ je October 1931 ɔ, a ngmaa Mawu biɛ ɔ ngɛ womi  tɛtlɛɛ nɛ ɔ eko fɛɛ eko hɛ mi. Jehanɛ hu ɔ, a ngɔ Mawu biɛ kɛ wo hehi nɛ e sa kaa e hi ngɛ New World Translation of the Holy Scriptures ɔ mi. Se jami kpa amɛ lɛɛ a je Yehowa biɛ ngɛ a Baiblo sisi tsɔɔmi ɔmɛ babauu a mi.

13. Mɛni ha nɛ o na nɔ mi mami kaa Yesu guɔ “tsɔlɔ anɔkualetsɛ kɛ ní lelɔ ɔ” nɔ kɛ tsuɔ ní mwɔnɛ ɔ? (Yohane 6:68)

¹³ Yesu gu “tsɔlɔ anɔkualetsɛ kɛ ní lelɔ ɔ” nɔ kɛ to asafo ko nɛ se be sisi ngɛ zugba a nɔ konɛ e sɔmɔli nɛ a ja lɛ ngɛ anɔkuale mi. Kɛ o naa jamɛ a asafo ɔ ha kɛɛ? Eko ɔ, mo hu o nu he kaa bɔ nɛ bɔfo Petro nu he ɔ. E bi Yesu ke: “Mɛnɔ ngɔ nɛ wa maa je kɛ ya? Mo lɛ o ngɛ neneene wami munyu ɔmɛ ɔ nɛ.” (Yoh. 6:68) Ke pi nɛ wa ba na Yehowa asafo ɔ, jinɛ mwɔnɛ ɔ, jije wa ngɛ? Kɛ gu asafo nɛ ɔ nɔ ɔ, Kristo haa nɛ wa nine suɔ nɔ́ fɛɛ nɔ́ nɛ e he hia kaa wa ná konɛ waa ya nɔ nɛ waa ye Mawu anɔkuale ɔ nɔ. Yesu tsɔseɔ wɔ konɛ wa nyɛ nɛ wa tsu wa fiɛɛmi ní tsumi ɔ saminya hulɔ. Jehanɛ hu ɔ, e yeɔ bua wɔ konɛ waa wo “su ehe ɔ,” konɛ waa sa Yehowa hɛ mi.​—Efe. 4:24.

14. Mɛni se nɛ o ná ngɛ COVID-19 hiɔ be nɛ ɔ mi ɔ akɛnɛ o piɛɛ Yehowa asafo ɔ he ɔ he je?

¹⁴ Yesu haa wɔ blɔ tsɔɔmi nɛ sa ngɛ haomi behi a mi. Wa na se nami nɛ ngɛ blɔ tsɔɔmi nɛ ɔ he benɛ COVID-19 hiɔ ɔ je sisi ɔ. Be mi nɛ nihi babauu ngɛ je ɔ mi ɔ li nɔ́ nɛ a maa pee ɔ, Yesu ngɔ blɔ tsɔɔmi nɛ ngɛ heii kɛ ha wɔ konɛ wa nyɛ nɛ waa hi si slɔkee. A wo wɔ he wami kaa waa wo nose mask ke wa ngɛ nihi a kpɛti, nɛ́ wa ha nɛ blɔ nɛ hi waa kɛ nihi wa kpɛti. A wo asafo mi nikɔtɔma amɛ he wami kaa a kɛ nyɛmimɛ nɛ a ngɛ asafo ɔ mi ɔ nɛ pɔ ní sɛɛmi ngɛ  fon nɔ konɛ a hyɛ kaa a ngɛ nɔmlɔ tso mi he wami, nɛ huɛ bɔmi kpakpa ngɛ a kɛ Yehowa a kpɛti lo. (Yes. 32:1, 2) Jehanɛ hu ɔ, wa nine suɔ blɔ tsɔɔmihi kɛ he wami womi munyuhi a nɔ kɛ jeɔ Blɔ Tsɔɔmi Ajla Toli ɔmɛ a ngɔ ngɛ a we amaniɛ bɔmi ɔ mi.

15. Mɛni blɔ tsɔɔmi a kɛ ha wɔ ngɛ bɔ nɛ e sa kaa waa pee asafo mi kpehi kɛ bɔ nɛ e sa kaa wa tsu fiɛɛmi ní tsumi ɔ ha a he ngɛ hiɔ be nɛ ɔ mi, nɛ mɛni je mi kɛ ba?

¹⁵ Jehanɛ hu ɔ, ngɛ hiɔ be nɛ ɔ mi ɔ, wa nine su blɔ tsɔɔmi nɛ ngɛ heii nɔ kɛ kɔ bɔ nɛ wa ma plɛ kɛ pee Kristofohi a kpehi, kɛ bɔ nɛ wa ma tsu fiɛɛmi ní tsumi ɔ ha a he. Ngɛ be kpiti mi ɔ, wa bɔni asafo mi kpehi, kpɔ mi kpehi kɛ kpokpa nɔ kpehi peemi kɛ gu videoconferencing kɛ fon nɔ. Jehanɛ hu ɔ, wa fiɛɛɔ ngɛ fon nɔ, nɛ wa ngmaa lɛtɛ hu kɛ fiɛɛɔ. Yehowa jɔɔ wa mɔde bɔmi ɔ nɔ. Asafo ɔ ní tsumi kɔnihi fuu bɔ amaniɛ kaa fiɛɛli a he ngɛ hiɛe wawɛɛ. Ngɛ anɔkuale mi ɔ, wa kpɛti nihi fuu ná níhi a si kpamihi nɛ woɔ nɔ he wami.​—Hyɛ daka nɛ ji, “ Yehowa Jɔɔ Wa Fiɛɛmi Ní Tsumi ɔ Nɔ.”

16. Mɛni nɔ mi mami wa ma nyɛ ma ná?

¹⁶ Eko ɔ, ni komɛ ma susu kaa asafo ɔ ngɛ nɔ́ ko pee tsɔ ngɛ hiɔ be nɛ ɔ mi. Se benɛ je ngɛ jɔe nɛ je ngɛ nae ɔ, wa na heii kaa nile ngɛ blɔ tsɔɔmihi nɛ a kɛ haa wɔ ɔ mi. (Mat. 11:19) Ke wa pue wa yi mi tɛ ngɛ bɔ nɛ Yesu je suɔmi mi kɛ ngɛ e we bi a hɛ mi nyɛɛe ha a he ɔ, wa ma nyɛ ma ná nɔ mi mami kaa pu lɛ ngɛ tsoe jio, hiɔmi lɛ ngɛ nɛe jio, Yehowa kɛ e Bi nɛ e suɔ lɛ ɔ, maa piɛɛ wa he.​—Kane Hebri Bi 13:5, 6.

17. Akɛnɛ Yesu ji wa hɛ mi nyɛɛlɔ ɔ, kɛ o nuɔ he ha kɛɛ?

¹⁷ Hyɛ bɔ nɛ wa bua jɔ ha kaa Yesu ji wa hɛ mi nyɛɛlɔ! Ngɛ asafo nɛ wa ngɛ mi ɔ mi ɔ, kusumi, ma nɛ wa je mi, loo gbi nɛ wa tuɔ nyɛ we nɛ e gba wa kpɛti. Wa náa mumi mi niye ní nɛ he wami ngɛ mi nɛ wa yeɔ, nɛ a tsɔseɔ wɔ konɛ wa tsu fiɛɛmi ní tsumi ɔ saminya. A tsɔɔ wa ti nɔ fɛɛ nɔ bɔ nɛ wa ma plɛ kɛ wo su ehe ɔ ha, nɛ́ waa suɔ wa nyɛmimɛ ɔmɛ. Wa ngɛ yi mi tomi kpakpa he je nɛ wa ma nyɛ maa fĩa kaa Yesu ji wa hɛ mi nyɛɛlɔ!